انثنى غيم نجد لخد الحجاز النرجسيه

٦٣

مشت ومعاها الدله والفناجين والتمر والرطب وجلست على الدَكه:امي قالت لي تبيني ياجدي
لف لها:ارحبي يا بنت ولدي اقلطي
ابتسمت له وصبت له فنجان ومدته واخذه منها
ورفع انظاره:تشوفين حلال عمك سعود ؟
لفت تناظر النياق اللي على مدى بصرها وهمست:الله يرحمه
رَده:ماهو تفريط مني على حلال ولدي هذا جزاة ولده اللي كواني ولا تاب
لفت عليه وعقدت حاجبينها وكمل رَده:معد عندي شي أخسره ناوي أكسر خشمه أكسره
بلعت ريقها شموخ من طرى عليها بهاج ونزلت انظارها واعتدل بجلسته من شاف النياق هاجت وتبعثرت بالحوض
ولفت شموخ من سمعت اصواتهم من بعيد ووقف رَده ووقفت معه شموخ تناظر النياق تشابكت ببعضها وطاحت كانت تحاول تنهض لكن تربطت اقدامها وناقه تلو الاخرى طاحت على الارض لين سكنت اصواتهم
وهمست شموخ:شصار ؟
رَده:خذاها اللي خلقها
لفت لرَده:جدي
رَده التفت لها ومسك كتفها:تعالي قهويني
مشى يرجع يجلس وناظرت النياق شموخ بخوف وشافت عبدلي يتقدم يركض ودخل
وناظر رَده:تم ياعمي حطيته بالماء اللي عندهم
هز راسه رَده ومشى عبدلي خارج ولفت شموخ تناظر جدها اللي قاعد لوحده وبلعت ريقها بخوف وهي تشوف نياق بهاج طايحه بالارض
-

هبطت الطياره ونزلت معاه ويدها بيده وصلوا الرياض ولفت له تناظره مبتسم يمشي معها
هو لبس اللي شرته له يجبر بخاطرها ويغير عن مودها وابتسمت لين خرجوا وشافت سلطان واقف عند سيارته ومن ناظرهم تقدم ناظر بهاج وملابسه وعضت شفتها أنهار تناظره مذهول
بهاج:علامك ؟
سلطان:سوتها أم سعود ؟
بهاج:الله يسلمك
سلطان:والله ودي اقول حمدلله على السلامه لكني مدري من انت
ضحك بهاج:ما أرد أم سعود
ضحكت أنهار:كيفك سلطان !
سلطان ناظرها:ارحبي
ابتسم ومشى يسلم على بهاج اللي ماتردد يحضنه وهمس:ارحب يا أخوي
ابتعد سلطان من نطق بأخوي بهاج يأكل له هو من يكون له وابتسم له وركب بهاج يمينه
حرك سلطان واخذ نفس ولف بهاج للطريق
بهاج:وش الجديد ؟
سلطان:تعرفه
لف عليه بهاج:كيف نورا وريوف !
سلطان:ماعليهم خلاف
أنهار:يعرفون اننا رجعنا ؟
سلطان:لا والله ماقلت لأحد
أنهار ابتسمت وكمل سلطان:ريوف وفهد عند نورا بالبيت
بهاج:متجمعين على الخير ان شاء الله
أنهار:مافتحت جوالي بعد ما نزلنا
بهاج عقد حاجبه ولف لها:لا تفتحينه
رفعت راسها:ليش ؟
بهاج:ان وصلتي افتحيه احسن لا يدقون عليك ويعرفون
سكتت ولف بهاج للطريق يفتح جواله وبلع ريقه من وصلته رساله مضمونها:صاحب الهويه المنتهيه بـ ٩٠٧ راجع أقرب مركز شرطه لمراجعة الشكوى الصادره عنك ملف ٢٨٢٠
قفل جواله ومسكه بقوه سواها رَده واشتكاه على الحلال اللي حلاله وتنازل عنه بيده لكن يبي يغثه ويشرشحه دون سبب
لف سلطان عليه وناظره ورجع يكمل طريقه
وقف عند البيت ونزلت أنهار ولف لها بهاج:أنهار
لفت عليه وتقدم لها:عطيني جوالك دقايق
أنهار:ليش ؟
بهاج:بشغله لك واجيبه ادخلي انتي
أنهار:اوكيه بتنزلون الاغراض ؟
سلطان:جايتك جايتك ادخلي لخواتك
هزت راسها ومشت تدخل وتقدم سلطان لبهاج:وش العلم ؟
شغل جوال أنهار ووصلتها رساله استدعاء لأقرب مركز شرطه ولف بغضب:الله يلعنه
سلطان:ولد وش صار
مد الجوال بهاج وعض شفته يبتعد عنه ويمسك راسه وتنهد سلطان:وش كنت تحسب ؟
بهاج التفت لسلطان:انا بحرق عليه المزرعه باللي فيها
سلطان:اهدأ وخل نعرف وش نسوي ، بتقول لأنهار ؟
بهاج بلع ريقه وهو يتصدد من توتره وغضبه:مدري مدري
سلطان نزل انظاره يقرأ الرساله وناظره بهاج
:بتكلم مع ابراهيم واشوف
سلطان:لا تبطي بهاج مانبي يجون لين عندها يسحبونها
بهاج:اكسر يد تنمد لها
سلطان:تكفى بهاج مانبي مشاكل
بهاج هز راسه:انا ادري بالمشاكل
'
ابتسمت وهي تسمع سوالفهم من دخولها ودخلت ولفوا لها على بالهم سلطان وشهقت ريوف:أنهاري
ضحكت وتقدمت تحضنها وابتسمت نورا توقف
ريوف:وحشتيني ياويلي محلوه
ناظرتها أنهار:بس لعبت بشعري
لفت لنورا وحضنتها وغمضت عيونها نورا:وحشتيني
أنهار:انتي كمان
لفت لفهد اللي جالس وعقدت حاجبينها:فهد وساكت ؟ غريبه
فهد:بهاج وينه ؟
عقدت حاجبينها تبعد شعرها عن وجهها:ليه ؟
فهد:بسلم عليه
مشى يخرج ولفت لهم وابتسمت:اش تسوون ؟
ريوف:اجلسي اشوف
جلست بينهم وناظرت نورا:صار شي واحنا مسافرين ؟
ريوف ضحكت:مافاتك شي كثير
دخل بهاج ولفوا عليه وهمست نورا:اوميقاد
ريوف ضحكت:مو بس انتي متغيره بهاج كمان
كان ضايق صدره وعاقد حجاجه لكن من دخل عليهم ضحك من كلامهم
وقفت ريوف:ما اصدق شورت وتيشيرت ؟ ومين بهاج ؟
نورا ضحكت:تأثير أنهار قوي لهالدرجه
دخلوا سلطان وفهد وجلسوا وتقدم بهاج يجلس ولفت عليه أنهار مبتسمه
ريوف:تكفى بهاج استمر على هذا الستايل يمكن يتعدل شليويح كمان
فهد مارد ولف بهاج عليه:انت علامك ؟
فهد:مادريت انك تشتغل
سكت بهاج ثواني ولف لسلطان ورجع ناظر فهد
فهد:ليه مخبي ؟ بنحسدك ؟
لفوا البنات يناظرونهم واخذ نفس بهاج:ظنك فيني كذا ؟
فهد:اجل وش القصه يوم اني اتوظف بمكان والله بعد مده انصدم ان راتبي من ولد عمي ، ان وظيفتي بشركة ولد عمي
لفت نورا لسلطان اللي ساكت وناظرهم بهاج
:ماخبيته ماجا له مناسبه اقوله
فهد:تستهبل بهاج ؟ تشتري وتبيع شهور وماجات مناسبه تقولي والا تقول لسلطان ؟
بهاج:انت تشوف وش حوالينا يوم انك تلومني ؟ تعرف وش جانا ووش بيجينا تلومني ليه ماعلمتك ؟
فهد:وش جاك بهاج ؟ هذاك كنت مسافر مابك شي
بهاج اخذ نفس يكتم غضبه:فهد لا نزيدها على بعض انا ماني بخير وانت معصب اقصر الشر
وقف سلطان:فهد امش
فهد:طيب ماشي
تركهم وخرج ولفت ريوف تناظره ومشت خلفه وخرجت
لفت نورا لسلطان وهمست:مافهمت شي !
سلطان ناظر بهاج اللي يهز رجله بغضب وتاكي على ركبته:بهاج
رفع راسه بهاج له:بتلومني انت بعد ؟
سلطان:مايهمني هذا حلالك وانت حرّ بس قبل ما تنحاس الأمور انا بتزوج نورا
لفت بصدمه أنهار تناظرهم ولفت نورا بذهول لسلطان
وعقد حاجبينه بهاج يناظرهم وهمست أنهار:مين؟
سلطان:انا ونورا
بهاج:اهلك يدرون ؟
سلطان:لا بتخرج نورا من عندك ماني طالبها من ابوها ولا يهمني راي ابوي
بهاج:قلت لهم وردوك ؟
سلطان اخذ نفس:مطرود من عندهم
عقد حاجبه بهاج:ليه ؟
سلطان:تلاسنت مع الشيبه وباقي الرجال وطردني الشيبه
بهاج سكت يناظره وكمل سلطان:وادري الجاي ماهو خير لذلك ماني مطول ، ابيها
لفت نورا تناظر بهاج اللي يناظرها وجمد وجهها بربكه ولفت أنهار تناظر بهاج ورجعت تناظرهم
بهاج هز راسه ولارد ولفت نورا لأنهار اللي تناظرها وتلوّن وجهها بالإحمرار ماتوقعت سلطان يكون سريع لهالدرجه ويقول هذا الكلام قدامها
'
ركضت خلفه:فهد فهد استناني طيب
لف عليها:اقعدي عندهم ان بغيتي ترجعين كلميني
ريوف وقفت قدامه:اشبك ؟
فهد:مافيني شي
جا بيروح ومسكت ذراعه:طيب كلمني
لف عليها واخذ نفس:كنتي تدرين عن بهاج ؟
ريوف:انه !
فهد:موظفني بشركته ومخبي علي انها له ومتشارك فيها مع ابراهيم
ريوف:طيب اش اللي يزعل مو فاهمه ؟ هذا حلاله ورزق ربي فتحه له
فهد مسك راسه:ياخي لا تطلعوني كأني حاسد ماعلي برزقه انا علي ليه خبى ليه ماقال لي ليه خلاني اتوظف بمكان هو يملكه ولا علمني ، ابسط حقوقي ياعالم اعرف انا عند من اشتغل
ريوف عقدت حاجبينها:فهد والله ما يسوى الموضوع ما يسوى تستقبل بهاج كذا
سكت فهد وصد عنها وكملت ريوف:راجع من السفر مبسوط أقلها تخليه وقت ثاني تتكلمون
فهد ناظرها وكملت ريوف:ما اعرف كل اللي اشوفه انه حرام تزعل من بهاج او يزعل منك
فهد:ماني زعلان معصب بس
ريوف:وبتسوق معصب ؟ وشو بتدخل بشاحنه انت كمان من عصبيته !
فهد لف لها:تخافين علي والا وش تسمين ذا ؟
ريوف:والله انت مستخف بنفسك عندي
فهد ناظرها وسكت وكملت ريوف:تعال ادخل وهد الموضوع
فهد تنهد:ماني معصب لا تخافين وماني داخل برجع البيت اريح
ريوف:لوحدك ؟
فهد:تبين ترجعين معي ؟
ريوف:ليش ما تجلس طيب اجلس معانا سوا نفس دايم
فهد رفع راسه للبيت وناظرت توتره:فهد تكفى والله ما يسوى
تقدم قبلها وابتسمت تمشي خلفه:عاش شليويح
دخل ولف بهاج يناظره وناظرهم وتقدم يجلس
وابتسمت ريوف:بنسولف بكل هدوء بدون هواش
مارد بهاج وهو صاد وجلست ريوف ولفت لها أنهار:تدرين ؟
ناظرت نورا اللي صاده ورجعت تناظر أنهار:امداها قالت لك ؟
لفت أنهار لنورا:ماشاء الله متى كان بيكون دوري تعلميني ؟ بأول ولد ؟
نورا لفت لها بذهول:لا تكفين أنهار اخر وحده تتكلمين انتي
ريوف:تكفون نخلص من فهد وبهاج بتتهاوشون انتوا خلونا نجلس ياخي زي الناس العاقله
لفت أنهار تناظر نورا اللي صدت:انا ما خبيت عنكم انتوا ما فهمتوا
لفت لها نورا وناظرها بهاج وكملت أنهار:كل ما اجي مبسوطه ذكرتوني كأنه شي فرض ان بهاج اخوك وما تلوقون على بعض لين صرت اتخبى بالسرّ عن كلامكم
لف سلطان يناظرهم وتنهدت ريوف تصد بإنزعاج
نورا تقدمت تناظرها:تلوميني يعني ليش مافهمتك ؟ ليش تسكتين يوم كنت اقولك ليش والحين تعيشين شي مع بهاج ما اعرف عنه ! اكتشفه من نفسي ؟
لفت أنهار عليها وناظرتها نورا:من متى أنهار صرنا كذا ؟ جينا من بيتنا بجده خوات وتغير كل شي بمزرعة الشيبه ؟
أنهار:تنكرين ؟ ايوا تغير كل شي اذا حتى الانسان اللي جينا معاه تغير
ريوف صدت من طاري ابوها واعتلت حلقها غصتها
وناظروهم فهد وسلطان وبهاج بهدوء
نورا:ماني منتظرته يرجع نفس ما انتوا تنتظرونه انا هذا الانسان دفنته بجده
أنهار:ما اعرف ليش تكابرين وبتتزوجين بدون ما يأثر عليك انه غايب ؟
لفت أنهار ورفعت يدينها وهي ترجف:ياخي عايش بس ماهو معانا
نورا رفعت صوتها بربكه تخفي توترها:ما ابغاه ما ابغاه ولا بستناه لا بزواجي ولا بعيالي ولا بموتي حتى شفتي لو اموت ما ابيه يبكي على ترابي
لفت أنهار بإنزعاج من طاري الموت ولفت لنورا اللي متجمعه بعيونها دموعها وبلعت ريقها أنهار من حست انها بتبكي
ولفت نورا من شافتهم يناظرون ريوف والتفتت أنهار تناظرها مغطيه بوجهها يدينها وما يطلع منها صوت
بكت لأنها اكثر وحده تنتظره واكثر وحده تبيه يرجع واكثر وحده تحبه وتسامحه ولانهم ما يدرون عن حاله
وهزت رجلها أنهار من شافتها كانت حابسه بكاها وعضت شفتها نورا تصد عنهم
صد بهاج عنهم وتنهد بتعب وغمض عيونه ثواني ولف لفهد:ماخبيت عنك متعمد
ناظره فهد ورفع عيونه بهاج له:بيوم واحد حطيت ورث ابويه كله مع ابراهيم واستامنته وشريت هذا البيت وشريت بيت لأمي وادري ما بتسكنه ، طلبتك تاخذ ريوف وتبعد وتسكن هنا وحطيتك بمكان ابن امه احد يتجرأ عليك فيه ، اصحابك اللي يتوددون لك بدوامك ويطلعون معك كل يوم وكل يومين واحد عازمك يدرون انك اخوي وهذا سبب ودهم لك
ناظره فهد وكمل بهاج:ان كان بيبرد عليك الكلام
سلطان:ماهو قصده بهاج
بهاج لف عليه:وماهو قصدك انت بعد انا ماولدت بينكم وكبرت بينكم عشان اصغر شيطان يفتنا ببعضنا
سلطان اعتدل بربكه وشبك يدينه:ادري اني ماتكلمت معك بعد اللي قلته لك وادري ان مالي وجه وادري انك يوم كنت قدام عيني تحت تريله مافكرت الا اني الحقك
بهاج:تحسب اني ما ادري عن غلاتي عندكم ؟ والله ومتأكد تغلوني اكثر من امي وادري انك دافعت عني عند الشيبه وانطردت من عند اهلك عشاني ولو فهد معك ما قصر
بلع ريقه فهد:اسف وماهو قصدي
بهاج رجع ظهره لورا:بسيطه ياولد عمي بسيطه
سكتوا جميع بالجلسه كل واحد بهمه سرَى وعض شفته سلطان يناظرهم سكوت ووقف:بجيب عشاء وش تبون اجيب ؟
رفع راسه بهاج له ووقف فهد:بجي معك
سلطان:تعال
خرجوا تاركين بهاج مع البنات والتفت يناظر البنات وصدودهم عن بعض يدري انهم يكتمون ولهاللحظه ما تفجر شي فيهم لا زالوا يكتمون
ويدري ان لو أنهار صار لها شي بينهارون جميع معها وماهو وقته ينهارون لانه تعب تثاقلت عايه همومه وهمومهم جميع ولا يدري كيف يبعد كل الأذى لوحده
بهاج:ماجاب سلطان الشنط والا كان قسمنا عليكم هداياكم
ماردوا عليه واخذ نفس يجمع نفسه:شرينا كل شي لونه بنفسجي عشان الفصعونه اخر العنقود
ناظرته وضحكت وسط حزنها وابتسم:كل ماشافت شي أنهار بنفسجي شرته لو ان ماله لزوم
لفت أنهار لريوف اللي تبتسم وكمل بهاج:ولو درينا ان عندنا عروس شرينا جهازك من أبوظبي
رفعت عيونها نورا له وابتسمت لانه مبتسم وكمل بهاج:اييي عليك بسلطان وراس سلطان اليابس ما بيلينه الا انتي
ضحكت لان فعلاً سلطان عنيد وهي تكسر عناده
وناظر أنهار:والمره الجايه نجيب هداياكم من باريس أنا وأم سعود
ابتسمت بإمتنان لانه يداريهم كلهم ولانه مانسي حلمها بإنها تسافر معه لوحدهم ويوم قال لها ما شبعتي سفر مع اهلك قالت له معاك
ابتسم لها ووقف:بجيب الشنط واجيكم
خرج تاركهم وقفل الباب خلفه وغمض عيونه بتعب رفع راسه بضيق وهمس:يارب
ظل يناظر السماء لثواني وخرج وركب سيارته وطلع جواله يدق على ابراهيم
'
أنهار لفت لهم:بتساعدوني نرتبها ؟
نورا:بغرفتك مع أبو سعود ؟
ضحكت أنهار وضحكت ريوف ووقفت نورا قبلها ومشت معاهم
دخلوا غرفة بهاج وجلسوا على السرير وفصخت عبايتها أنهار:متى كلمك سلطان ؟
نورا:ترا علمت ريوف قريب
ريوف:كلمها باليوم اللي انحرق فيه المستودع
لفت انهار وابتسمت بإعجاب:اوه مشهد رومانسي اكيد وسط النيران
نورا:لا أنهار كنا نتكلم وكان يقولي يعني عن مشاعره وما قطع كلامنا الا الحريق هذا كلامه اللي كان واضح والا من قبل لمح لي
أنهار:اوكيه كان واضح سلطان بس ماتوقعت بسرعه كذا انتي واياه تتفقون
ريوف:ياحياتي ياسلطان يحاول من زمان واختك مسويه ثقيله
نورا:مو ثقيله بس بنات بالبدايه حسيته مو ذوقي مو الشخص اللي ابغاه بعدين طلع طيوب
لفت ريوف عليها:ياااايييي
ضحكت أنهار وهي واقفه تناظرهم:طيب اش قال بالضبط وكيف قالك بنتزوج حياتي بالتفاصيل نبغى
نورا:وتعلمينا انتي كمان !
ابتسمت انهار:اوكيه بقول اهم شي لاني احس بتأنيب الضمير
سكتوا يناظرونها وناظرتهم:هذاك اليوم يوم رحت الرياض مع بهاج عشان ضرسي يعورني ؟ ماكان يعورني كانت مسرحيه عشان نروح سوا
ناظرتها نورا بصدمه ورمت المخده ريوف:كلبه تعرفين تمثلين
نورا:وانا حياتي هذاك اليوم مانمت انتظرك ترجعين واطمن على ضرسك عساه الكسر
ضحكت أنهار:لا تدعين
لفت من انفتح الباب ودخل بهاج بالشنط وناظرهم وحطها بنص الغرفه والتفت لأنهار:بغير ملابسي واطلع انا
عقدت حاجبها وتقدمت له:فين ؟
بهاج:بشوف ابراهيم
أنهار:الحين بهاج ؟ طيب ما ارتحت ولا جلست
بهاج:بعطيه الاوراق اللي معي وارتاح مره وحده
لفت ريوف لنورا ووقفوا وخرجوا من الغرفه ومشى بهاج لغرفة الملابس وابتسمت أنهار تلحقه
تكت على الدولاب وابتسمت ولف لها:علامك
أنهار:ريوف ونورا يوم شافونا سوا خرجوا يتركونا لحالنا
ابتسم وهو ياخذ ثوبه من الدولاب وابتسمت تتنهد:يعني اخيراً الكل يعتبرنا متزوجين
لف لها وابتسم من ابتسامتها وتقدم لها وناظرته
:بنتظرك لين ترجع ونتكلم سوا
بهاج:على خشمي
حطت يدها على تيشيرته وكملت:بتاكل برا ؟
بهاج:بتطبخين لي يعني ؟
ابتسمت:لو طلبت من برا يعتبر طبخ ؟
ضحك بهدوء وتقدم يبوس خدها:باكل برا
أنهار ناظرته قريب منها:وترجع تنام هنا ؟
بهاج هز راسه:معك بغرفتنا انا واياك
ابتسمت له وابتسم يناظر عيونها ومشى يلبس ثوبه
اخذ مفتاحه وخرج من الغرفه وهو يقفل ازاريره ومشت وراه:لا تطول بهاج اوكيه ؟
بهاج التفت يحاوط كتوفها بذراعه وينزل معها:ابشري
أنهار ابتسمت لانهم نزلوا سوا قدام عيون ريوف ونورا ومشى معها للباب وفتحته والتفت:كنتي بتودعيني بالبلكونه ؟
ضحكت تستند على الباب:بودعك المره الجايه منها
بهاج:لا ابيك تستقبليني الليله منها
ابتسمت وهزت راسها له وخرج قدام عيونها تلاشت ابتسامتها من سكن جوفها الخوف بدون سبب وقفلت الباب خلفه ولفت تدخل للبنات
'
ناظر ابراهيم مع بلور مكتبه وتقدم يدخل ورفع راسه ابراهيم:حيّ الشريك
ابتسم بهاج وتقدم له وحضنه:البقى ابو مهنّا
ابراهيم ابتعد:جبت لنا الخير وجيت ؟
ضحك ابراهيم وجلس:خليتك تبطي تنتظرني ؟
ابراهيم:لا والله انا عندي شغل وقعدت لين طلعوا الموظفين كلهم
بهاج هز راسه:مامن احد
ابراهيم:وش عندك ؟
بهاج اخذ نفس يناظر قدامه ولف لابراهيم:مدري والله من وين ابدأ
ابراهيم عقد حاجبينه:عسى ماشر !
بهاج:ابوي يوم توفى صار حلاله كله لجدي وجدي تنازل عنه لي لكن الحين علاقتنا ماهي زينه ورافع علي قضيه يبي ارد له الحلال
ابراهيم رجع ظهره لورا:ماهو صار حلالك ؟
بهاج:انا جاي اسألك ابراهيم انا عندي ورقة تنازله من مبطي ومتأكد منها وهي عند امي بس الشي الوحيد اللي ما تنازل عنه الا بالقول هو بيت ابوي بالمزرعه
ابراهيم:اجل ماله حسّ جيب ورقة تنازله وارفعها وامورك زينه
بهاج:متأكد ؟
ابراهيم:اكيد بهاج دامه تنازل ماله حق يطالب بشي
بهاج:طيب بستشيرك بشي ثاني
ابراهيم:ابشر بي
بهاج:أم سعود حرقت مستودع جدي بليله ومحد درا لكنه عرف بعد وقت واشتكاها وبيشهد معه شهود زور
ابراهيم:حارقته قاصده ؟
بهاج هز راسه وسكت ابراهيم وكمل بهاج:لكن محد شافها شهوده زور
ابراهيم:والله بذي بهاج ماعندي علم وودي اخلي المستشار القانوني للشركه يساعدك لكن ماهو مجاله قضايا كذا
بهاج صد عنه وكمل ابراهيم:بس بهاج انتم اهل ليه كل ذا ؟
بهاج:تقولها لي ؟
ابراهيم:خذ زوجتك ورح لجدك طيح عند رجوله وسايره وان شاء الله محلوله
بهاج التفت يناظر ابراهيم وكمل ابراهيم:ماظنتي تنحل على خير لو كبر الموضوع
اخذ نفس بهاج وفرك عيونه بتعب وهز راسه يناظر ابراهيم:عطلتك عن بيتك
ابراهيم:وش هالكلام يابهاج !
بهاج:بتطلع الحين؟
هز راسه ابراهيم:نطلع سوا
وقف بهاج معه وخرجوا وركب سيارته بهاج وتقدم ابراهيم لشباكه:سيارة من هذي ؟
هز راسه بهاج:لواحد من عيال عمي
ابراهيم:ما بتشتري سياره ؟
بهاج؛شريت بيشحنونها قريب
ابراهيم:بعطيك سيارتي الثانيه لين تدبر امورك
بهاج:لا والله ابو مهنّا ماقصرت
ابراهيم طلع من جيبه مفتاح:ان وصلت سيارتك ردها ما احتاجها والله
بهاج ناظر المفتاح:ماتقصر بس زينه اموري
ابراهيم:خذها بهاج خذها لا تردني
سكت بهاج واخذ المفتاح وابتسم ابراهيم:تلقاها عند الباب
بهاج؛ماقصرت
ابتسم ابراهيم:بالتوفيق يابهاج ، بشرني
ابتسم له بهاج بإمتنان وتقدم ابراهيم لسيارته وحرك بهاج بضيق وتفكير نزل انظاره لجوالها اللي معاه وناظر خلفيتها صورتهم سوا
هدت سرعته وهو يناظرهم سوا ورجع يناظر الطريق
'
أنهار:جرب تكلمه سلطان جوالي معاه اتوقع ناسيه
سلطان؛كلمته قبل اجي قال تعشوا
أنهار عقدت حاجبينها:بيطول ؟
سلطان؛ما سألته تعالي كلي ماعليك بيجي
جلست معهم ومد سلطان الاكل لنورا وناظرته ورفع عيونه؛بدون كاتشاب نفس ما تحبينه
ابتسمت ريوف:حافظ التفاصيل وافقي عليه نورا
ضحكت نورا تاخذ الاكل منه وابتسم سلطان
تعشت معهم وبالها معاه وبتأخيره ولفت لريوف اللي باست خدها:تبغين شي ؟
أنهار:لا حياتي انتبهي لنفسك
ريوف:اوكيه باي
اشرت لهم وخرجت مع فهد ولف سلطان لنورا:تطلعين برا ؟
نورا ناظرت أنهار اللي وقفت:بطلع فوق انا
مشت تاركتهم ولفت نورا لسلطان؛مو برد ؟
سلطان؛تعالي نجرب
قالها وهو يوقف ومشت معاه وخرجوا للحديقه ومشت معاه بهدوء وهي تناظر خطواتها
ولف سلطان عليها يناظرها:لو ضاقت علينا بتتراجعين؟
لفت عليه وعقدت حاجبينها:مافهمت
سلطان نزل نظره لأقدامهم سوا:يعني لو صارت امور كثيره كركبت حياتنا جميع
لف يناظرها:بتتراجعين عنّي ؟
نورا:سلطان انت تعرف اني اخذت وقت طويل عشان استوعبك وعشان اتأكد وعشان اتخطى اشياء كثيره ، بس هذا الوقت كله يدل ان قراري مستحيل يتغير مهما صار ، يمكن ماتعرف هالشي بس انا سلطان صعبه وصعب ارسي على قرار واذا رسيت ما اغيره ولا ابدله اعيشه لو انه صعب ولو انه بعد فتره بيكون قرار خاطئ ولو ان بيمليني ندم اعيشه لين انتهي منه
سكت يناظرها وكملت نورا:تخصصي ماكان احد من اهلي يبغاه ولاني كنت متأكده منه دخلته بدون اشاور والتفت وراي ، فساتيني اللي ياما محد شافها حلوه لبستها وكنت اشوفها تزهى عليّ
سلطان:بس انا ماني تخصص ولاني فستان ، انا مستقبل تعيشينه لين المشيب
سكتت تناظره وكمل سلطان:بس دام هذا كلامك بي فتطمني حفظتك في ذرى قلب بدويٍ ما يعرف ممشى غير ممشاك
ابتسمت:وهذا الـ إبدوي بيكون قد قراري أكيد ؟
ابتسم يناظر ابتسامتها ونطقها لتقليد نطقه لبدوي وسكت وضحكت من نظراته بتوتر وتقدمت عنه تجلس
وناظرها وهي جالسه:امهليني عمر لين الله يجيب الكلام
'
جلست بالبلكونه تراقب الشارع وباب البيت وتنتظره رفعت راسها تناظر السماء واسندت راسها تغطي نفسها بوشاحها وتأملت نجوم ربي في سماه كل شي يتصور قدامه من هالفضاء هو كل ليله قضتها معاه من أول مره شافته وعرفت شهامته وحبته سرّ وحبته علن لين قبل يغيب بساعات عنها
كل ذكرياته الحنونه وصوته الدافي أحمل وعوده أصدقها ، تضحياته ودلاله كل غالي هداها اياه وصانته وأول ثمين ملكته هو قلبه ، الطمأنينه اللي لبسها اياها بعد مخاوفها اللي تخطتها بصعوبه ، كيف نطقت له بمرّه بينها وبينه بالسرّ بإن حُبه ينقال عنه غلط وذنب وقال لها : ولو أتوب من الذنوب اللي جنت أيامي ما أتوبك يا أجمل ذنوبي
غمضت عيونها تتنهد بوسع صدرها ولفت من سمعت سلطان ينطق:ارحب ابو سعود
رفعت راسها تناظره يدخل مع الباب وابتسمت
رفع راسه وشافها بالبلكونه هي فعلاً انتظرته لوحدها ببلكونة بيته اللي اختاره عشانها
وقف وهو ماسك مفتاحه بيدينه الثنتين يناظرها وابتسم من ابتسامتها وتقدم لسلطان ونورا:شعندكم سهَارى
سلطان:انتظر إذنك
عقد حاجبينه بهاج ورفعت راسها نورا لسلطان اللي نطق:بمشي المعزبّه شوي بالحاره وراجع
ضحك بهاج من خشونة سلطان وناظر نورا:كيف وافقتي عليه بالله وهو يقولك معزبّه ؟
ضحكت نورا وناظره سلطان:افا
بهاج:تبين نورا ؟
نورا:ما سألني ولا شاورني بهاج
سلطان التفت لها:وين يصير عنصر المفاجأه !
نورا رفعت حاجبنها:اها اقنعتني
اخذ نفس بهاج:توكل
ابتسم سلطان يربت على كتف بهاج ومشى بهاج يدخل البيت وطلع مع الدرج رايح للبلكونه وقف عند اول عتبات الدرج بعد وصوله وناظرها تخرج
ووقف من شافها تقوم له ناويه تحضنه وفعلاً حضنته ومسك ظهرها بكف وبكفه الثانيه حط مفتاحه بجيبه:كل ما ابطيت بتشتاقين لي كذا ؟
عقد حاجبينه وكمل:والا ما اشتقتي لي ؟
ابتعدت عنه تناظره:وحشتني
ابتسم لها وتقدمت تبوس خده وتحاوط رقبته وتميل بجسمها عليه وحاوط خصرها يرمش بهدوء من الدلال اللي بين يدينه وهمس:ترفقي فيني
كررت بوساتها لخده ولمست بكفها خده الثاني تهمس له:ما ابغى شعر دقنك يضايقني ببوساتي
ابتسم لها من ناظرته؛وجّبت الحلاقه ؟
ابتسمت تمسك شاربه باصابعها:ابغى الشارب وبس
بهاج؛واللي خلق هالشارب وزرعه فيني ان كان تبيني اتيه بتيه تبيني ادل بدل ، الناس كلها ماشيه لرضاك انتف كل شعره بخدي ماتبينها
رجعت تبوس خده برقه ومشى وهي تمشي وراها لين وصل للبلكونه وبعدت عنه تضحك وناظرها وعقد حاجبه من ضحكتها وابتسم:علامك؟
أنهار:روجي طبع فيك وحتى ياقة ثوبك
نزل انظاره لياقته وناظرها:خافي الله ثوب فيه عطرك ماغسلته شلون اغسل هذا وفي لمسة شفايفك
نزلت انظارها لياقته:لا تغسله
رفعت عيونها تشوف عيونه وتكلم بهدوء:تعالي اجلسي بحضني بنسولف سوا
مسك كفها وجلس وجلست بحضنه وناظرت البلكونه اللي متوسطينها ورجعت تناظرها
:أحُبك كل يوم زياده اخذت روحي لروحك بهاج اش بتاخذ اكثر ؟
بهاج ابتسم لها:بوسه
ضحكت تناظر نظراته لثغرها ولمست شاربه باصابعها تتكي على صدره:تحتلني بعدين نتفاوض ؟
ضحك لانها تحفظ كلامه حتى لو قاله من زمن وهز راسه:بس قبل نتفاوض على بوسه تسمعيني زين ؟
أنهار:انا صماء عند الكل الا عندك
ابتسم يرفع شعرها عن وجهها:اسم الله عليك
أنهار:بتقولي شي بيخوفني ؟
بهاج:لا تخافين حتى لو تخافينه انا جنبك وانتي بحضني
أنهار سكتت تناظره وناظر عيونها لثواني ساكت وتكلم بصوته اللي تحبه الدافي اللي يلمس قلبها قبل يوصل لسمعها:وش صار لنا قبل هذي القعده أنا وإياك ؟ تعبنا واجد انحطيت بمكان قلت فيه هذي نهايتنا لكن وقفتي قدام مستودع وش كبره وحرقتيه ، حرقتيه على شانك قبل يكون على شاني وهذا انتي بحضني لانك قويه فيني وبحبي
ناظرته يكمل لها:نتيجة هالمستودع المحروق انتي زوجتي علن وراعية قلبي وحلالي وراس مالي وذكرياتي ، لكن أنهار
سكتت بخوف من سكت وصد بوجهه يتنهد ورجع ناظرها:الشيبه ماعجبته النتيجه ولا السبايب
عقدت حاجبينها وكمل بهاج:مشتكي عليك
سكت من جمد وجهها وتغير وجهها بخوف ومسك ذراعينها:أنهار اسمعيني هو بس اشتكى وادري ماله نيّه يزيد اكثر
أنهار هزت راسها بالنفي بخوف وهمست:بيسجنوني ؟
بهاج عقد حجاجه:يعقبون من ما يكونون والله يعقبون
أنهار:بهاج بيسجنوني
تمسك بوجهها لانها بدت تبكي بخوف:أنهار اسمعيني يا ابوي
أنهار بلعت ريقها وهي تنزل دموعها بخوف ومسكت كفوفه برجفه وناظرها بهاج
:هو يبينا نرجع مكسورين للمزرعه هو بيطخ لو رحنا سوا انا وانتي واعتذرنا وبنعتذر وبتمرّ ، بتمرّ أنهار نفس ما مرّت قبل
غمضت عيونها تبكي وهزها:أنهار لا تخافين
أنهار:واذا ما رضي واذا سجنّي بهاج ؟
بهاج:لو ورا حريّة راسك حبل المشنقه لي والله ما اتردد
أنهار بكت تستلم لدموعها:بهاج
تنهد من شافها تبكي وحضنها يسمعها تبكي وتكلمت وسط نحيبها:كنت حاسه كنت خايفه نرجع ادري بيصير شي ادري بهاج
بهاج مسح على ظهرها:ماصار يا أبوي ولا بيصير نروح انا وانتي بكره وبتنحل صدقيني أنا معك متى خليتك ؟
أنهار شدت عليه:بهاج لا تخليني تكفى
بهاج:ما أخليك يا أبوي ما أخليك
أنهار:مابقدر اشوفه مابقدر ارجع اشوفه بهاج ما ابغى اشوفن
سكت وكملت أنهار:اشتقت له
عقد حاجبينه من شهقت تبكي ومسح على ظهرها من عرف انها تقصد ابوها رغم كل هذا الخوف اللي يسكنها خطر ببالها
تنهد وبعدها عن حضنه يناظر دموعها ومسحها بيدينه:تهون يا أبوي انتي تهون مردها بتزين لا تبكين
رفعت راسها تكتم شهقاتها ومسحت دموعها وناظرها:بتجين معي وما بتبكين قدام احد ما تنزل دمعه وحده تدرين وش سوت بي دموعك
وناظرته وهز راسه له:طيب ؟
هزت راسها تجاريه وهو يدري قبل هي تدري ان دموعها بتسيل على خدينها سيل اذا شافته
ابتسم لها يطمنها ونزل ذراعه يشيلها بحضنه ويوقف
تمسكت برقبته تحط راسها على صدره ومشى يخرج من البلكونه
يمشي شايلها بين ذراعينه وكل حاجه في خيَاله تمرّه نزل انظاره لها على صدره وهو يمشي هو ما يحبها في الليل الأكحل بس ! هو حتى بعزّ شمس القايله هايم ومهتوي يدري ان ينساق البحر كله لدمع عينها ويدري انه بيحزن بفراقها لأن الدنيا ما تغني على ليلاهم ولكنه بينتظر ليلاه اللي تغني له هي بين يدينه مثل المستحيل كل ما قال طلتها صارت سراب ولكن كيف تغيب لو بتغيب وهي كل ضحكاته معها ، سخطه وغضبه كل شي كانت شايلته ، رماديّة الصوره وسوء العالم خشونة الموقف ألآم جوفه غياب أبوه ، سدّت كل ما كان يبي له سدّ بجوف صدره
حطها على السرير وناظرته من قريب مارمشت خوفاً انه يغيب انه تندم على رمش عينه ليه أرمش
تبي تشبع نظرها وبصرها تبي تحفظه ترسمه بصدرها ماشافت من عيونه السود الا البياض ، البياض اللي بيّض وجيه سواد أيامها ، كان الأمان من الفزع كان أحلى المنام ، تجرّ أنفاسها وهو قدامها تسمع بصوت أنفاسه بين ارتجافها والهدوء هو باسها وكأنه يلملم كل جوارحه في بوسته يجمع خوفه وارتباكه يجمع حنيّته وقسوة أيامه يجمع اللي ما أنجمع
ابتعدت عن وجهه ورفعت عيونها اللي تمتلي بالبحر تتأمل عيونه وتشوف خاطره حيله المهدود رفعت كفوفها لوجهه:أحُبَك بهاج
بهاج:لا تقولينها كأنك توادعيني قبل أوادعك أنطق شهادتي ويدفنوني
ماردت عليه لانها تدري بحجم الجاي ولو إنها تجهله وهزت راسها له ورفع راسه يبوس جبينها وهي منسدحه على سريره ووقف يمشي لجهة سريره والتفتت تناظره ياخذ نفس طويل وهو صاد عنها وكأنه يقوّي نفسه والتفت لها وانسدح بجانبها توسطت حضنه وغمضت عيونها
مسح عليها بهدوء وسط ضجة عقله وأفكاره صرخات جوفه لين انقضى وقت كافي يقتنع فيه انها نامت
لف يمد يمينه لجواله من هزّ واخذه يفتح الرساله اللي جاته من رقم غريب وعقد حاجبينه من شاف الصوره والكلام
فتح الصوره يناظر نياق أبوه حلال أبوه وأغلى شي كان يملكه سعود بحياته اللي بقى من بعد موته حيّ طايح وسط حوضه ميّت
جمد وجهه يتأمل الصوره هو يعرفهم يميزهم ويدري انهم هم ماهو كذب ويدري انها ماتت جميع
نزل انظاره للرساله اللي مضمونها
" هانت على الشيبه يكسر شموخك بحلال ولده وأغلى عياله وفقيده ، كل اللي كان يحب سعود كان يحب نياقه وحلاله واليوم رَدّه اخذ حق أبوك منك لو كان حيّ ، محد يطول الشيبه ولا يقدر عليه أحد الا اللي خلقه قال وفَعل وهذا انت صغير عنده ، ظني مامن عوض بعد "
مايدري كم اخذ من الوقت يقرأ الرساله ويناظر الصوره مايدري كيف يتقبل الخبر اللي وصله وهي بوسط حضنه نايمه هنيّه كيف ما خدشها شرّ جوفه اللي كواه كيف ما حرقها لهيب صدره اللي متوسطته

-
( انزل يومياً بالاستقرام لو مو حابين تنتظروني هنا هذا استقرامي متواجده فيه دايماً r_55shog )