انثنى غيم نجد لخد الحجاز النرجسيه

٤١

خرج للبلكونه واخذ جواله يناظره دق وهو يناظر البيت والحديقه الفارغه ونطق:الو
نورا:ليش محد يرد علينا ؟
بهاج:انا انشغلت
نورا:وأنهار فينها ماترد ؟
بهاج؛أنهار ! أنهار ماتقدر تتكلم
نورا:طيب ترد واتس اب ، اش قال الدكتور ؟
بهاج:مالقينا الصبح دكتور عطونا موعد الساعه ٢ الظهر وبنروح بعد شوي
نورا:اوف وباقي يعورها ؟
بهاج؛اي واجد ان شاء الله يخف
نورا:ان شاء الله ، يعني العصر بتجون ؟
بهاج تذكر اللي بيجون يمترّون المطبخ:لا وشو العصر
نورا:اجل !
بهاج:يعني عالمغرب او العشاء
نورا:ليش ؟
بهاج:مواعد واحد معاي بالجامعه ابيه يعدل لي جدولي وبنتكلم مع الدكتور يشوف اوراق ريوف
نورا:طيب بس لا تطولون
بهاج:احد سأل علينا؟
نورا:محد لاحظ الى الان
بهاج:امي ما مرت عليكم؟
نورا:لا
بهاج:طيب زين ، تبون شي ؟
نورا:سلامتكم
قفل منها ودخل يده بجيبه يطلع دخانه ويتكي يشغل سيقارته ويناظر البيت
ما يعرف كيف بينتقل لهنا وكيف وكم بياخذ وقت عشان يقول انه بيعيش هنا ومعه أنهار وبيستقر وبيختارها زوجه له وبيحلّ موضوع امه وابوها اللي يعقد كل شي ويشابك كل شي
اخذ نفس يحاول ما يخاف يحاول ما يشيل هم يتذكر فرحتها وبس يتذكر انها تبي نفس ماهو يبي وهذا اللي يطمنه هذا اللي يفرحه
هو قاعد يعيش يوم واحد معها ووده يطول وده يعيش عمره كله نفس هاليوم ، تشاركه مشاويره تختار لبيتهم أثاث تصرف من جيبه مصاريف ، تدلل عليه وتزور جيرانهم معاه تزوره بشغله
تنهد وغمض عيونه ينفث زيقارته
،
ابتسمت وهي تشوف شكلها بالمرايه اللي قدام الحمام واخذت نفس تعدل شكلها ، تعدل شكلها عشانه عشان تبغاه يشوفها تبغى ينبهر فيها زي عادته
ناظرت فستانها الملون بالأورنج بلون نادر يزهى عليها بلونها وملامحها وشعرها المموج كل شي يناسبها تعرف تختار اللي يبرز جمالها ويخليها مختلفه
انحنت تلبس كعبها ورفعت راسها تتعطر وتقرب عطرها من عنقها وتبخه لانها تدري انه يحب عطرها ويحب ريحتها
عدلت روجها وشدت على يدينها بربكه وخرجت تمشي وشافته بالبلكونه معطيها ظهره ويدخن وتاكي
ابتسمت ومشت تدق بكعبها بالأرض تلفت انتباهه والتفت من سمع صوت كعبها واعتدل بوقوفه من شافها جايه له
ابتسمت تخفي توترها:ماراح تدخن كثير هنا
بلعت ريقها تلف تناظر نظراته وتمنت لو انها ما تسرّعت ما بادرت وجات له لانه يناظرها بنظرات تربكها تحرقها توترها وابتسمت تناظر سكونه
وعض شفته يرفع حاجبينه بذهول:ياسَعدي ، حظه اللي ربي كاتب له العمر كله معك
ابتسمت تشوفه يتقدم لها ومد ذراعه يحاوط خصرها ويقربها منه ويلم كفوفه ببعضها خلف خصرها ونزل انظاره لعنقها اللي بان عليه بلع ريقها من ربكتها
وتكلم يكشف هيامها بنبرة صوته:وتسرفين ، تسرفين بالجيّه وبالمشيه وبدّقة خطواتك لي ، تسرفين ولا لي قوه ، تقولين انت يابهاج مندفع واقولك من يلوم المهتوي ؟ ولا انا ادري ، لا ذبحني ظماك ولاني رويتك
تنهدت ترفع يدينها على صدره وتناظر نظراته اللي تشكلت بالخوف والضيق والتمنّع والعشق
وكمل بإستسلام:انتي تقتليني على مهلك ، صابر وعذري بالصبر شماتة أصحاب الشوارب والّحى
ترددت بهمس مسموع:أخاف
هز راسه يكمل ترددها بلسانه:تخافين ينتهي عمرك تتوسدين جرحك ما تتوسدين حضني ؟ يمين بالله واللي زرع فيني هالشارب اني لأشقي على دربك ولا اقول اخ
كانت تحس بالخوف لانها عاشت معه كل اللي تبيه ، عاشت هذا اليوم وودها تعيشه كل أيامها لكنها تخاف ترجع ولا تقدر تعيده وهزت راسها بالنفي:بيردونك كثير عني
بهاج هز راسه:داري ، لكن ما دامني حيّ حطيني بوجه الظروف
ظلت تناظر عيونه وما قوَى وقف عند اللحظه اللي المفروض ما يوقف عندها لكنه فلت ذراعينه عن خصرها يبتعد عنها خطوتين وعينه عليها
يبتعد للخلف وينكوي بكل خطوه ولكنه ابتسم عشان خوفها عشان فوضى صدرها ورعبها من اندفاعه وما اندفع
خرج من البلكونه ومشى يدخل الغرفه الفارغه واخذ نفس يفتح زرار ثوبه ويشد على فكه
سمع صوت كعبها وغمض عيونه يهدي دقات قلبه والتفت من دخلت وابتسمت:بلبس عبايتي ونطلع
هز راسه والتفت للمرايه اللي بالحمام وهو يعدل شماغه ولفت تناظره وبتردد مسكت جوالها ومشت خلفه توقف وترفع جوالها وتغطي بوجهها الجوال وتصور انعكاسهم سوا وناظرها وهو يعدل شماغه وابتسم
والتفت يمد يده لخصرها يقدمها لمستواه وجنبه وابتسمت تستند على جسمه وتصور ونزل انظاره يناظر جوالها وصورهم فيه وناظر ابتسامتها وتلاشت ابتسامته كل خوفه بخط الرجعه ، كل خوفه يختفي كل ذا يرجع من جديد يحاول يرحع من جديد لصوت المشاكل
نزلت انظارها لجوالها:تجنن لون فستاني خيال
رفعت راسها له تناظر سرحانه:صح؟
هز راسه:خل نمشي
خرجت تلبس عبايتها ومشى قبلها يخرج وياخذ نفس بضيق والتفت من خرجت ومشوا مشي لين بيت ابراهيم
دخلت البيت ولفت للخدامه اللي فتحت لها والتفتت من سمعت:ياهلا ياهلا
ابتسمت وتقدمت تسلم عليها:كيفك؟
أريج:حمدلله انتي كيفك ؟ نورتي
ابتسمت لها أنهار:حمدلله ، تسلمين
أريج:تفضلي خذي راحتك
دخلت للمدخل وحطت شنطتها وفصخت عبايتها تمدها للخدامه وعدلت شكلها ولفت تدخل المجلس
ابتسمت أريج:اخيراً ! ، ازعجني ابراهيم
ضحكت أنهار وجلست:لا تزعلين بس كنت خايفه اجيك
أريج:ليش ؟
أنهار:خفت تكونين كبيره
ضحكت أريج ولفت أنهار تاخذ القهوه وابتسمت أريج:بناتي من الصباح متحمسين ياماما متى تجي صاحبتك
ابتسمت أنهار:فينهم ؟
أريج:فوق قلت يجلسون شوي لا يزعجوني ، ومهنّا عند ابوه
أنهار:ماشاء الله مو باين انك جايبه ثلاثه
أريج:تزوجت وانا صغيره ترا
رفعت حاجبينها أنهار:كيف وافقتي؟
ضحكت أريج:احبه ، قلت لو اعيش في كوخ عادي
ابتسمت أنهار وكملت أريج:وشدّ حيله ابراهيم وحمدلله بيتنا هذا ملك
أنهار:ماشاء الله تبارك الله
أريج:كيفك مع البيت الجديد ؟
ابتسمت أنهار واخذت نفس:صراحه انا ما أفهم كثير بالأثاث بلاقي صعوبه لين أخلص كل شي
أريج:عندي رقم مصممه سوت لي الحديقه الخارجيه ومجلس الرجال ، شغلها حلو تبين رقمها؟
هزت راسها أنهار:اكيد
أريج:تمام ارسله عليك ان شاء الله ، شغلها سريع ماشاء الله ، انتم ما بتجلسون هنا ؟
أنهار:حالياً لا بالمزرعه جالسين
أريج:مع امك وابوك ؟
ابتسمت أنهار:ماما الله يرحمها مع ابويه وزوجته وخواتي واهل بهاج كمان
أريج:الله يرحمها ، زوجة ابوك تعرفونها ؟
ضحكت أنهار:أم بهاج
رفعت حاجبينها بدهشه:اوه ام بهاج ماخذه ابوك ؟ يعني علاقتكم قويه سوا اكيد طلعاتكم سوا معاهم
ضحكت أنهار:اوف نحب بعض مره
ابتسمت أريج:حمدلله
اخذت نفس أنهار ولفت من دخلوا بنتين وابتسمت:اهلين
أريج:سلموا على خاله أنهار
تقدموا يسلمون وابتسمت:كيفكم ؟
هزت راسها لين:حمدلله
أنهار:أي صف انتي ؟
لين:ثالث ابتدائي
أنهار: ماشاء الله عليك سنه ثالث صعبه شدي حيلك
لين هزت راسها ولفت للثانيه:وانتي ؟
ليان:أولى
ابتسمت أنهار:وشطوره بالحروف ؟
هزت راسها ليان وكملت أنهار:بجي المره الجايه واخليك تقولين لي الحروف وتكتبينها واذا ما غلطتي بوديك مشوار حلو
ليان:البحر ؟
ضحكت أريج:يحبون البحر ونادر نروح للشرقيه عشان البحر
ابتسمت أنهار ولفت عليهم:انا كنت في جِده كنت كل يوم أروح البحر بيتنا كان قريب منه
لين:تسبحين ؟
هزت راسها بالإيجاب أنهار
لين:انا بابا قال نروح في الاجازه اول ماما وبابا راحوا لندن وخلونا
ضحكت بإحراج أريج وابتسمت أنهار ولفت عليها
:كيف لندن ؟
أريج:خيال احبها مو اول مره ازورها بس زرتها مع ابراهيم اول مره
أنهار:لندن بالشتويه روعه
أريج:اي رحنا قبل اجيب مهنّا كان حلو الجو
أنهار ضحكت:اخر سفره سافرتها كانت لندن
أريج:اي سنه ؟
أنهار:يمكن ثلاث سنين
أريج:تصدقين نفس السنه !
ضحكت أنهار:يعني مو مره نتقابل اكيد تقابلنا ومو حاسين
أريج ضحكت ولفت للين وليان:روحوا عند بابتكم سلموا على عمو بهاج وجيبوا مهنّا معاكم
خرجوا ولفت أنهار وابتسمت:الله يخليهم لك
أريج:امين عقبال يلعب معاهم سعود
ضحكت أنهار:سعود الكل اختار اسمه الا انا
أريج:انا ما اعرف ابراهيم ينادي زوجك أبو سعود
أنهار:على إسم ابوه الله يرحمه
أريج:الله يرحمه
،
بهاج:صادق ؟
ابراهيم:والله الترم الثاني تداوم على طول
بهاج:ماتقصر
ابراهيم:باقي اخر سنه محلوله ان شاء الله تاخذ ترم ثاني وصيفي وامورها زينه
بهاج:ان شاء الله
ابراهيم:هي اخت زوجتك ؟
بهاج هز راسه؛واختي ساكنين عندي وتحت عيني
ابراهيم ابتسم:الله يخليكم لبعض
لف بهاج لمهنّا اللي بحضنه:والشيخ ابو ابراهيم؟
ضحك ابراهيم يناظر ولده الصغير اللي لابس ثوب على طوله وبحضن بهاج ياكل:لا تعدم ثوب عمك
بهاج ابتسم:خله ياكل
ابراهيم:عقبال تشيل ولدك ان شاء الله ، عاد لا تبطون خلوه يلحق يكبر مع مهنّا
ابتسم بهاج:الله يجيب كل خير
دخلوا البنات ولف ابراهيم:ياهلا ياهلا
دخلت لين تناظر بهاج وابتسم ابراهيم:سلموا
تقدموا يسلمون عليه وجلسوا جنب ابراهيم
لين:ماما تبغى مهنّا
بهاج:لا مهنّا بيجي معاي خلاص باخذه بيتي
ليان:لا مهنّا اخونا
بهاج ضحك:شوفيه جالس بحضني يحبني
لين:عادي يروح معاك واحنا نروح مع خاله أنهار
رفع حاجبه بهاج؛تروحون وين ؟
لين:بتودينا البحر
ضحك ابراهيم:نقطة ضعفهم
ابتسم بهاج:خلاص انتوا تروحون مع خاله أنهار وانا مهنّا معاي ، اتفقنا ؟
هزت راسها لين ونزل مهنّا من حضنه يتركه يمشي ومشكت ذراعه ليان تمشي معاه للخارج
.
كانت تتغدا مع أريج وبناتها وتضحك وتسولف بكل أريحيه شربت الشاهي بعدها وجوّلتها بالبيت ورتها قطع شرتها من برا وشنطها اللي عارضتها بغرفة ملابستها كانوا يتكلمون بكل المواضيع اللي تحبها أنهار وابتسمت أنهار:ريوف اختي تعشق هاللون
ابتسمت أريج:المره الجايه تعالي مع خواتك ودي اشوفهم
اخذت نفس أنهار وهزت راسها
دخلت لين:خاله أنهار عمو بهاج يقول يالله
أريج:ما طولتوا ؟
أنهار:بيأذن للمغرب وإحنا عندكم !
ضحكت أريج:بس والله مره استانست
أنهار مشت تاخذ عبايتها من يد الخدامه:وانا اكثر ، المره الجايه ببيتي ان شاء الله اذا خلصته
أريج:اكيد ، صح ذكرتيني كنت بقولك لو احتجتي وحده من خداماتي تنظف معاك تساعدك كلميني ارسلها لك
أنهار:تسلمين
اخذت شنطتها وهي تحط طرحتها على راسها وتسلم على أريج
باست البنات وخرجت ابتسمت من خرجت من الحديقه وشافته واقف عند الباب
لف عليها وابتسم:لو ماقلت مشينا نمتي عندهم؟
أنهار ضحكت تمشي معاه لبيتهم:مو لهالدرجه بس استحيت اتكلم عندها
بهاج:انبسطتي ؟
فتح الباب ودخلت:مره مره تجنن تخيل ورتني شنطها اللي شاريتها من البحرين خيال وعطتني رقم مصممه عشان الحديقه الخارجيه ، وحتى قالت اذا احتاج شغل بالبيت بترسل لي خدامتها اف عسل
ابتسم يقفل الباب خلفه وتدخل تفصخ عبايتها وتجلس على الكنبه:بس انهلكت نوم بهاج
رجعت راسها لورا بتعب ورفعت عيونها عليه:مانعست ؟
بهاج:والله الا
رفعت رجلينها تفصخ كعبها وترميه وترفع رجلينها على الكنبه:نعسانه ودي انام هنا
بهاج؛بعد صلاة المغرب بيجون يمترون المطبخ وبعدها نمشي
أنهار:يعني ما يصير تنامين يا أنهار
بهاج:تبين تنامين ؟ نامي بس بخليك هنا وامشي لوحدي
أنهار جلست بإعتدال:ماتسويها
وقفت تاخذ كعبها بيدها:بغير ملابسي واجي
مشت تاركته مكانه يناظرها حافيه تمشي بفستانها وشعرها واخذ نفس يصد ويجلس
فرك عيونه بتعب من السهر وانتظرها لين تخلص
دق جواله وطلعه ورد:هلا ، طيب
وقف ورفع صوته:أنهار
ماردت عليه وتقدم يناديها:أنهار
تقدم للباب اللي مفتوح نصه وتقدم بيدخل على ردّها:بلبس ثواني
وقف مكانه من شافها تعطيه ظهرها وتحاول تفتح فستانها اللي فتحت نصه ولفت من تقدم يسألها:من اول تحاولين فيه ؟
بلعت ريقها وصدت عنه:مافيني قوه افتحه والا انا اللي قفلته
بهاج:وماتناديني ؟
أنهار سكتت وماردت وتقدم بهاج يناظر شعرها ورفع ذراعه يزيحه عن شعرها ورجفت من لمس ظهرها هي كانت تخاف تناديه عشان هالموقف
رفع نظره لعنقها وكتوفها ونزل نظره يفك لها الفستان اللي لمته بيدينها الثنتين وابتعدت ترتبك:شكراً
رجع خطوه لورا من لفت عليه تنتظر يخرج وتكلم بهدوء:هم برا بفتح لهم
هزت راسها ومشى يخرج وقفل الباب خلفه واخذت نفس تشد فستانها عليها
غيرت ملابسها ومسحت مكياجها وخرجت مشت للصاله تسمعهم تحت بالمطبخ وانسدحت على الكنبه بتعب
كانت تحاول تقاوم ما تنام لكنها تعجز صاحيه اكثر من ٢٤ ساعه بسبب حماسها وسعادتها والحين طفت من نعاسها وغمضت عيونها تنام على الكنبه
،
قفل الباب خلفهم وهو يسمع أذان المغرب ودخل يدورها
عقد حاجبه يفتح الغرف ونادها والتفت من شاف رجلينها من على ذراع الكنبه وتقدم لين شافها نايمه
كانت لابسه تيشيرت وبنطلون وناثره شعرها ونايمه
تقدم وهو أكثر منها نعاس وجلس على الارض قدام كنبتها ورفع يده يلمس وجهها وشعرها
كان مغلوب عند هالة الحسن ، مترفة الدلال ، نرجسية الحجاز ، يناظر وجهها تعب يبوس الصور يبي يبوسها بدون قيود بدون خوف بدون توقف
رفع كفه يمسك كفها ويهمس:أنهار
ماردت عليه من فرط تعبها وسهرها واخذ نفس يوقف
اخذ عبايتها بيده وتقدم لها يشيلها بذراعينه كان يشيلها وبنفس الوقت يحضنها ويشدها لحضنه يمشي معها ويفتح الباب بصعوبه ويشم ريحة عطرها مع كل خطوه ويشوفها تعقد حجاجها وتتمسك فيه بكل خفه
ركبها بالسياره ونزل لها مقعدتها للخلف وحط عبايتها بحضنها وقفل بابها
لف يناظر البيت خلفه ومشى يركب جنبها
شغل سيارته يمشي لطريق الرجعه قلبه مقبوض يخاف الرجعه
لف يناظرها نايمه وكمل طريقه اللي تلون بالظلمه واخذ نفس بتعب يحاول ما ينام ما ينعس
فتح اللمبه اللي بينهم يحاول يفتح عيونه ولف من فتحت عيونها هي بإنزعاج وتلفتت بتعب
همس:ازعجتك ؟
جلست ولفت عليه:ماحسيت
بهاج:تعبانه واجد ؟
أنهار ناظرت عبايتها وشنطتها بحضنها:خليت فستاني ومكياجي بالبيت بهاج
بهاج؛عادي تاخذينه بعدين
سحبت عبايتها تلبسها وتنهدت:نعسانه بهاج
بهاج:ارجعي نامي
رجعت شنطتها للخلف وتقدمت لذراعه وتحط براسها على صدره ، رفع ذراعه يشدها لصدره ويسوق بيد وحده
نزل انظاره لكفها اللي ماسكه فيها ثوبه ونزل راسه يشم ريحة عطرها بشعرها وغمض عيونه ثواني ورجع رفع راسه يناظر الطريق
-
دخل بسيارته واخذ نفس من اشتدت ضيقة صدره وناظر أنوار الدكه من بعيد ووقف بالمواقف وفزت من طفى السياره والتفت عليها:اسم الله عليك
ناظرت حوالينها بنعاس وتعب وهمس:انتظري اساعدك
نزل من السياره يناظر الدكه من بعيد ومشى يفتح بابها مد ذراعه لها ومسكته تستند عليه وشدها من كتفها لحضنه وهو يقفل السياره ويمشي للبيت
شدت على ثوبه بخوف من شافت البيت قدامهم
كانت تحس انه بيختفي كل هذا التقارب بينهم وتخاف يختفي تخاف تنحرم
فتح الباب ودخلت معاه ووقفت من شافت حليمه جالسه بالصاله وبلع ريقه بهاج يناظرها
ابتسمت ريوف:حمدلله على السلامه
اخذت نفس أنهار تبعد عن ذراعه ومشت تصد عنهم ووقفت من نادتها حليمه:أنهار
لفت أنهار عليها ورفع كفها:يرحم أهلك تعبانه مابقدر اتكلم ، اتركيها لبكره
حليمه:كل اللي بغيت اقوله سلامات
لفت أنهار تناظر بهاج اللي حط مفتاحه بجيبه وهزت راسها ودخلت الغرفه
وقفت نورا:كيف اسنانها شقال الدكتور ؟
هز راسه بهاج يناظر حليمه اللي تناظره ومشت نورا تدخل لأنهار
اخذ نفس بهاج:تعبان بدخل انام
حليمه:قالت لي شموخ جيت ودورتني لكن يوم جيتك مالقيتك
بهاج هز راسه:اي بتكلم معك لاصحيت
ريوف:كلكم تعبانين كأنكم رحتوا جِده وجيتوا
بهاج التفت لريوف:كنت مواصل عشان كذا
ابتسم لريوف اللي تناظره وغمضت عيونها تطمنه والتفت لأمه:تصبحون على خير
دخل الغرفه وانسدح بتعب يغمض عيونه كان من فرط تعبه يخيّل له انه بحضنها انه ببيتهم يسمع صوتها وصوت ضحكتها وحتى يشتم ريحتها من فرط تعبه لكنه كان يحلم يحلم بعمق
،
صحت وفتحت عيونها تناظر السقف كان عندها أمل صغير انها بتصحى ببيتها ، ببيتها اللي حلمت فيه طول الليل كل شي عاشته مع بهاج حلمت فيه كل شي قالته وتخيلته حلمت فيه وصحت بالمكان اللي تتعور فيه اللي يخليها بين حيره ومخاوف كثيره
اخذت نفس وقامت من فراشها واخذت روبها معها وخرجت ولقت حليمه بالصاله ورفعت حاجبينها وتقدمت وضحكت بسخريه:انتي شكلك مانمتي من امس تنتظريني
حليمه ابتسمت:قبل شوي جيت
هزت راسها أنهار ولفت نورا:كيف ضرسك ؟
أنهار:حمدلله أحسن،باخذ شاور واجي
حليمه: بس البسي بالحمام لا تطلعين بروبك ماهي حلوه قدام اخوك
ظلت تناظر الفراغ قدامها أنهار ولفت تناظر حليمه اللي صدت وماردت تدخل الحمام
قفلت الباب واخذت نفس تهدي نفسها
ولفت حليمه من فتح باب غرفته بهاج:اخيراً
خرج وعقد حاجبه وتقدم لهم:سلام
حليمه:صباح الخير يانظر عيني ، نمت زين ؟
هز راسه بهاج:انتي من امس هنا ؟
ضحكت ريوف بصوت عالي:نفس كلام أنهار
لفت حليمه تناظرها بحده ورفعت كتفها ريوف
بهاج لف على ريوف:أنهار صحت؟
نورا:بالحمام
حليمه:تعال اجلس خل نسمع وش سويتوا امس ؟
بهاج:وش سوينا ؟ عالجنا ضرسها ورجعنا
حليمه:لكن ابطيتوا ! كل هذا ضرس !
بهاج:كان عندي شغل غيره
حليمه:ما ادري ان عندك شغل بالرياض ، من متى ؟
نورا لفت عليها:بهاج رجال كبير
حليمه التفتت عليها:ياليت محد يدخل بيني وبين ولدي
ريوف:قبل شوي تقولين بالصريح لأنهار انه اخوها ، والحين مالنا شغل فيه !
صد بهاج من كلام ريوف والتفت لأمه:امشي نخرج
حليمه:ليه نجلس سوا ونسولف ونسمع سوالف أنهار بعد
بهاج:أمي
ناظرته واقف ينتظرها واخذت نفس:طيب أمر وقت ثاني عليها
خرجت وخرج خلفها وقفل الباب ولفت عليه
تقدم لها:انشحنتي بغيابنا والحين جيتي تطلعين كل شي ؟ وش فيك ؟
حليمه:شعندك بالرياض معها ؟
بهاج:مابعيد كلامي مو شغلي اذا ماصدقتي
حليمه مسكته من ذراعه:بهاج ! لا تلعب بالنار زواج أمك مهدد
بهاج:مهدد من من ؟ مو من رجالك ؟
حليمه:لانه ما يبيك لبنته خلاص تقبل رغبة ابوها ما يبيك بهاج ، وماتلوق عليها ولاهي تلوق عليك
بهاج:قولي هالكلام لي ما يحتاج تطلعين وتدخلين تغثينهم
حليمه رفعت حاجبها:زعلنا الدلوعه ؟
بهاج:امي !
حليمه:بهاج هالزواج ما بيتم صدقني وما بتطول مع هالبنت ، وبتتزوج شموخ قريب
بهاج:بتزوجيني غصب وانا هذا كبري ؟ علامك ؟
حليمه:ما انت تزوجت أنهار غصب وغصبوك ؟
بهاج:محد غصبني انا وقفت قدامهم وقلت بتزوجها ولو مابغيتها ما كان تزوجتها
حليمه:هالزواج ماراح يتم ، ابوها بيوقف بطريقها وانا بوقف بطريقك وحطها براسك العنيد ذا
مشت بتمشي ولحقها:امي
لفت عليه بحده وناظرها:لا تحديني
حليمه:بتنهي زواج امك ؟
بهاج:على الأقل لا تخرجيني عن طوري دام ساكت وبالع موس ، لا تزودينها
حليمه ناظرته وماردت ومشت تاركته وعض شفته يغمض عيونه ويصبر نفسه ويستغفر بالهمس
رجع يدخل البيت ورفع انظاره لأنهار اللي واقفه تسألهم لفت عليه وناظرته ودخلت الغرفه
جففت شعرها وهي تسمعهم
نورا:مافطرت بهاج
جلس:مالي نفس
نورا:قالت لك شي زعلك؟
هز راسه بالنفي وهو يحس بالإختناق ورفع راسه لريوف:ريوف قبلوك مشوا امورك وان شاء الله الاسبوع الجاي تداومين
ريوف جلست بإعتدال:منجد ؟
هز راسه وابتسم بهدوء:قلت لك بتدرسين
نورا:طيب مين بيروح معاها ؟ والا بتداوم من هنا كل يوم ؟
بهاج لف وناظر ريوف:انا قلت لك الحل وانا لو مكانك ما قعدت هنا دقيقه ، كنت اخذت كل عفشي وهجيت من يقعد عندهم هذول بالله ؟
لفت وهي تسمعه وخرجت من الغرفه تناظره
وبكل الخوف نطقت ريوف:بهاج !
بهاج:لا تستصعبينها ، ماني معطيك لواحد بالشارع فهد رابي معي عشرته ماهي عسره ، روحي ريوف روحي ادرسي بعيد عنهم كلهم ارتاحي بعيد عنهم
بلعت ريقها وهي تشوفه وحاسه فيه هي تحس ان اليوم اللي عاشته بعيد عنهم كانت مرتاحه وودها تهرب الان من هالمكان
نورا:بهاج والله صعبه ، ماراح يرضون
بهاج:ان قالت ريوف اي وقال فهد ابي محد بيوقف بطريقهم
تنهدت نورا تلف تناظر ريوف ولف بهاج لريوف:شقلتي ؟
ريوف بلعت ريقها ونطقت أنهار من باب الغرفه:روحي ريوف
لف عليها يناظرها وكملت أنهار:روحي تكفين
ريوف:وانتوا ؟
نورا:نجيك ريوف وتجينا انتي كمان مو بعيدين عن بعض وبنكلم بعض كل يوم
ريوف ناظرتهم وناظرت بهاج:تجيبهم لي ؟
هز راسه بهاج واخذت نفس ريوف تناظره وهزت راسها:طيب
بهاج وقف وخرج من البيت بدون كلمه وفتح زرار ثوبه بضيق ومشى لمكان سلطان وفهد
التفت سلطان من لمحه:وصل
فهد ضحك:حيّه معد شفناك
وقف قدامهم وناظر فهد وتنهد:تبي تهج ؟
لف سلطان يناظر فهد اللي عقد حاجبه:وش العلم؟
بهاج:تبي تهج من عندهم والا لا ؟ اخلص
سلطان:وش جاك انت ؟
بهاج:احس بالضيقه مابي القعده هنا وما ابي احد يقعد
فهد:بسم الله الرحمن الرحيم
بهاج ناظر فهد:بتاخذ ريوف وتروحون للرياض هي تدرس وانت تشتغل ووظيفتك عندي
فهد ناظره بصدمه:مجنون انت ؟
سلطان:بهاج علامك انت ؟
بهاج:يا أوادم لحد يجنني أكثر ، فهد بتتزوج ريوف وتروحون للرياض وش اللي ماتفهمه !
فهد:على كيفك هو ؟
بهاج:تبي تقعد هنا يالثور ؟
سلطان:بهاج ! علامك ؟
بهاج:فهد
فهد ناظره بصدمه:وليه انا ؟ ليه مو سلطان ؟ تنشبها فيني
بهاج:سلطان يهوجس بوحده ماهو يمّ ريوف
لف سلطان يناظره وجمد وجهه ورفع حاجبه لبهاج اللي صاد عنه
ولف فهد عليه:وش العلم؟
بهاج:اتركنا ، توقف قدامهم وتصير رجال وتقول ابيها وتاخذها تخلي البنت تكمل دراستها والا لا ؟
فهد:بهاج ما انت صاحي
بهاج:صاحي صاحي لان الحمار اللي جابهم على هالدنيا ماهو قدّ الشي ، لان الحمار قاعد مع امي بملحق وموقف قدام بناته الف باب ، خذ البنت خلها تكمل دراستها فهد ، وروح انت ابتعد روح عيش بالرياض
فهد؛ماتبيني بهاج
بهاج؛قالت تبيك
فهد:عشان دراستها ماهو عشاني كيف بعيش معها ؟ والا تدرس واطلقها ؟ والا وش بتدبسني فيه يابهاج
بهاج:تتوالفون تجي بينكم موده وتصير ماودك تفارقها ، الغربه تلمكم ، وان ماتوالفتم تطلق
فهد سكت ولف سلطان يناظر بهاج ولف فهد على سلطان:بيجيك الدور وبيدبسك بالبنت الثالثه
بهاج:ماظنتي يتدبس ظنتي يطلب
لف سلطان يناظره ورفع حاجبه بهاج له وسكت سلطان
فهد:بتبلشني مع الشايب ومع ابوهم ليه يابهاج؟
بهاج ضرب كتفه:لانك رجال تدخل وتتكلم وانا معك ماني مخليك ، البنت بتخرج من عندي ماهو من احد
سلطان:بتصير مصايب بهاج بنفرع بينكم من جديد
بهاج:يبي ينثر الدم أنثر الدم ونفتك
فهد:والله ما انت بعقلك
بهاج؛فهد !
اخذ نفس فهد:وامي وخواتي ؟
بهاج:ابوك ماهو ميت
فهد سكت ولف يناطرهم وشد على كتفه بهاج وتكلم بهدوء:وانا اجيك بعدها وأهج من هنا
فهد:تترك أمك ؟
بهاج:هي ودها ، لكن ماني رايح لحالي
فهد سكت وتنهد بهاج:تكلم الليله فهد
فهد:ماني جاهز
بهاج؛انا بظهرك فهد بس خلصنا تكفى البنت الاسبوع الجاي بتداوم
فهد:ياليل يابهاج ياليل ياليل
بهاج:تكفى
مسك دقنه وسحب كفه فهد:لا ترجاني
اخذ نفس:طيب الله يستر
مشى راجع البيت منزل راسه يفكر ووقف من سمعها تناديه والتفت
تقدمت له تناظره وعقد حاجبه:هلا
شموخ:بغيت اتكلم معاك بموضوع
بهاج:بيني وبينك مواضيع ؟
شموخ:اسمعني
بهاج:طيب وش العلم ؟
شموخ:خلنا نبعد عن هنا طيب ماودي يشوفني سلطان
عقد حاجبه بهاج؛ليه ؟
شموخ:بعدين اقولك
التفت بهاج يبتعد ووقفت:من هنا
ناظر ممر النوير قدامه ومشى مبتعد عنه ودخل يده بجيبه يطلع دخانه
وناظرته شموخ:يمكن خالتي قالت لك الموضوع بس ترا بهاج انا مالي شغل
بهاج نفث دخانه:اي موضوع ؟ امي عندها مواضيع كثيره
شموخ:موضوع يخصني انا
بهاج رفع راسه:طيب ؟
شموخ:ماودي تفهمني غلط هي حطتني قدام الأمر الواقع انا ماطالبت بشي
بهاج:داري لو ماتكلمتي كنت فهمت بعد
شموخ:لو حصل شي او سمعت شي لا تصدقه ، خالتي كان ودها ويوم تزوجت أنهار يمكن زعلت بس انا مالي ذنب
بهاج:فاهم ماعليك
مشى بيتركها ومشت خلفه
دقت الباب حليمه وفتحت الباب ريوف وابتسمت حليمه:نادي انهار
ريوف:ادخلي هي داخل
حليمه:لا ناديها عند الباب ابيها خليها تخرج لي
رفعت حاجبها ريوف ودخلت:أنهار
أنهار وقفت من سمعتها وتأففت ومشت تفتح الباب ووقفت قدام حليمه:نعم ؟
حليمه:ماقدرنا نتكلم تعالي نسولف سوا
أنهار:ماعندي سواليف بيني وبيـ
سكتت من رفعت راسها تشوفه جاي من ممر النوير وشموخ خلفه وجمد وجهها
ابتسمت حليمه ولفت:اوه بهاج هنا ؟ هاه شموخ تكلمتوا بالموضوع ؟
تقدم بهاج يناظر أنهار وحليمه ولف يناظر شموخ من فهم اللعبه والمقصد وناظرته شموخ:فهمني بهاج على طول
حليمه:تفاهمون انتم سوا من انتم صغار
ناظرتهم أنهار ورفعت نظرها له ودخلت
تقدم بهاج لحليمه يناظرها مبتسمه ودخل وقفل الباب خلفه
تقدم يناديها:أنهار
فتح باب الغرفه تحت نظرات ريوف ونورا ودخل وناظرها:أنهار بنت اكلمك انا
لفت عليه ناظرته وناظرها:امي قصدها يصير كذا
أنهار؛ايش يعني امك قالت لك خذها ممر النوير تمشوا سوا وتفاهموا ؟ اكيد تفاهمتوا على الزواج متى حددتوه ؟
بهاج:بلا جنان علامك انتي ؟
أنهار:انا مجنونه يعني ؟
بهاج:اقولك امي قاصدتها امي تبي هالمشاكل
أنهار:وامك ماتدري بعد اني ساكته عشانك ؟ بهاج انا الى الان ما نطقت بحرف لها وهي يومياً تحاول تستفزني وانا ساكته
بهاج؛ادري بها
أنهار؛دامك تدري ليش تسمع كلامها ؟ تمشي شموخ بممر النوير تتفاهمون سوا ، عن ايش تتفاهمون انتوا اصلاً ؟
بهاج:ماعندها سالفه قلت لك
سكتت أنهار تناظره وصدت من دخلت نورا:شعندكم ؟
بهاج:امي زودتها شوي
نورا:بهاج ترا امك مزودتها مره مو شوي !
بهاج اخذ نفس يناظر أنهار وهز راسه لف لنورا:داري
خرج من عندهم وتقدمت نورا لها:قالك انها خطبت امه شموخ ؟
لفت أنهار تناظرها وعقدت حاجبينها
نورا:تخيلي بدون ما يعرف بهاج كلمت اهل شموخ تقول بيتزوج ، هي ودها يتزوج ويتركنا لحالنا
أنهار؛ماتدري انه متزوج اصلاً ؟ والا لازم نذكرها زي ماتذكرني انه اخوي كل شوي
نورا:بالله أنهار احد حاط زواجك من بهاج بعين الإعتبار اصلاً ، مصخره محد مقتنع
تغيرت ملامحها أنهار تناظر نورا وصدت عنها تخفي رجفتها ونزلت انظارها تمنع دموعها
وخرجت نورا: بهاج لازم يعرف
غمضت عيونها بقوه أنهار ورفعت كفها على جبينها تستجمع نفسها
جلست على الارض تناظر حوالينها هي بتخسر ، بتخسر كل هذا ، اذا حليمه قدرت وبتقدر بتخسر بهاج مابتقدر تفصح عن مشاعرها مابتقدر توقف بوجه احد ، هي بتخسر
هزت راسها بالنفي بتكرار تمنع بكاها وتتذكر شكل شموخ خلف بهاج من كانت تبتسم لها من بعيد
ومسكت راسها بقوه واخذت نفس طويل