انثنى غيم نجد لخد الحجاز النرجسيه

٥٧

فتح عيونه بتعب يحس ان جسمه تخدر من وضعيته ولف رقبته يناظرها نايمه على الكرسي نايمه على يدها وابتسم بهدوء
لف للممرضه اللي تشبك له مغذي ونطقت:بنجيب لك فطور
هز راسه بهاج ومسكت ذراعه:والدكتور بيزورك بعد ما تفطر ان شاء الله اهم شي تاكل عشان تقوم على حيلك
بهاج:انا ان بغيت اقوم على حيلي بقوم عشانها
رفعت نظرها الممرضه لأنهار اللي نايمه وابتسمت مشت وخرجت وابتسم بهاج يناظرها
صقعت الطاوله عند الباب وفزت أنهار بخوف ولف بهاج:لعنه
دخلت ممرضه ومعاها طاولة الاكل وهمس:استغفر الله
جلست أنهار بتعب ولفت عليه:صحيت ؟
هز راسه لها ولفت للاكل:شكراً انا اخذه
وقفت وقدمت الطاوله لين عنده:دقايق بهاج بروح الحمام وجايه
مشت تدخل الحمام وناظرت تعبها بوجهها ورفعت شعرها وغسلت وجهها ورفعت شعرها تلمه جديله فتحت شنطتها وناظرت عطرها وابتسمت وبخت منه وخرجت
ابتسمت له وجلست على طرف السرير:كيف صرت؟
بهاج:أكليني من يدينك وأصير أحسن
فتحت الاكل قدامه:اعدل جلستك ؟
بهاج هز راسه وتقدمت تساعده وناظرته من قريب وابتسمت وهي تشوفه يحاول يشم
ورفع انظاره لإبتسامتها:شتتيني
ضحكت وابتعدت عنه وناظرها:انا ان ابتليت بكسر يدي قولي مرده يطيب لكني ابتليت بريحة هالعطر
أنهار مدت له من الملعقه فطوره:عشان تستوعب اني جنبك مو بعيده
ابتسم لها وهو ياكل من يدها ولفت من دخل يسلم
:سلام عليكم
همس بهاج:وعليكم السلام
سلطان حط الشنطه على الكرسي وناظره:كيف صرت؟
بهاج:زين
رجعت تأكله أنهار وحك جبينه سلطان وهو يناظره
أنهار:ماجات نورا ؟
سلطان:خرجت قبل تقوم
أنهار ناظرت بهاج وهو ياكل:نمت هناك ؟
سلطان:اي
سكتت وهي تتذكر كلام حليمه ورفع نظره بهاج يناظر سلطان اللي مرتبك ورجع يناظر أنهار:لا تزيدين شبعت
أنهار:بس بفتح لك العصير تشربه اوكيه ؟
هز راسه لها ووقفت وناظر سلطان بهاج بهدوء وبلع ريقه سلطان:راجعت المرور وعطوني ورقة تالف السياره معوض خير
أنهار لفت لسلطان:اش يعني ؟
بهاج:ما تتصلح السياره
أنهار لفت تناظره بخوف وابتسم لها:كانت نيتي ابدلها اصلاً جات من الله
سلطان:ارسلوا لي الصور لو تبي تشوفها
بهاج رفع حاجبينه يردّه ماوريهم عشان أنهار ولفت أنهار وجلست وهي ماسكه رجولها برعب ورجعت تناظر بهاج
سلطان لف يناظر أنهار ورجع ناظر بهاج
لف سلطان يناظر الدكتور والمتدربين اللي معاه يدخلون ووقف
لفت أنهار عليهم وتوترت تجلس بأعتدال
ابتسم الدكتور:صباح الخير بهاج
بهاج:ياهلا
الدكتور:ماشاء الله ماشاء الله بتقوم بسرعه ان شاء الله ، غلبت الطب كله
أنهار ابتسمت تناظر بهاج اللي نطق:غلبته بدواي وطبي
والتفت لها يقصدها وضحكت وابتسم الدكتور وضحك سلطان يصد عنهم
الدكتور:يالله كويس يعني نشيل ايادينا ؟
ضحك بهاج وتقدم الدكتور:راح تقوم على حيلك تمشي عشان نشوف أمورك وتساعدك طبك ودواك
ابتسم بهاج:ان شاء الله
قرأ الملف بيده وتناقش مع المتدربين بالغرفه ولف بهاج لها وهي سانده دقنها على كفها وتناظره مبتسمه
لف الدكتور:أجر وعافيه بيزورك الطبيب المناوب بالشفت الثاني تحتاج شي ؟
بهاج:مشكور
خرجوا تاركينه وضحكت أنهار والتفت:أنا أطيب وأصير بخير اذا صرتي كذا
ابتسمت له وتنحنح سلطان يقطع حبل تواصلهم بالنظر:كلمتني أمك
لف وعقد حاجبينه بهاج وتلاشت ابتسامة أنهار
بهاج:امي ؟ وش دراها ؟
سلطان:مدري كانت تبي اخذها تزورك
بهاج:غريب من قالها ؟
سلطان:يمكن انه فهد
بهاج:مايمسك لسانه تلقاه قال لامه والا لوحده من خواته ، ومحد كلمك غيرها؟
سلطان:لا
اخذ نفس بهاج:مايجون ليه يجون
أنهار:تهاوشت معهم قبل تجي ؟
بهاج:والله مدري ان كان ينقال عنها هوشه
أنهار:قالوا لك شي ؟
بهاج لف يناظرها وتنهد:لا تطرينهم خليني ارتاح
سكتت أنهار ورفعت عيونها لسلطان اللي يناظرهم
نزلت نظرها من دق جوالها واخذته وهمست:نورا
سلطان رجع ظهره يستند ووقفت أنهار وانحنت له بإهتمام وهمست بهدوء
:دقايق ياحبيبي واجيك
عقد حاجبينه بذهول ونطق:منهو ؟
ضحك سلطان وعض شفته من التفت بحده عليه بهاج وابتعدت بتخرج أنهار وهي ترد:ايوا نورا
قام بظهره يبي يمسك ذراعها:بنت
لكنها خرجت تاركته وهي تكلم ونطق سلطان
:قالت حبيبي وفزيت والله انها طب ودواء
لف بهاج عليه يرجع يرتاح واخفى ابتسامته عنه وضحك سلطان وهو يلعب بشاربه
ولف بهاج يناظر محلها ومسك صدره اللي أوجعه وابتسم تاخذه يمين وشمال ولا يدري وين لكنها تنتشله من مكانه لعالم ثاني ما يسمع فيه الا تنهيدة صدره ، تسرقه من نفسه يغوص سبع بحور دون ما يغرق هو يجنّ بمشاعر مايدري كيف حدته تهزمه وتبعثره وتنثره
تنهد بهدوء يريح نفسه
'
نورا:يعني طلع بدون ما ينتظرني ؟ ماني فاهمه حركاته سلطان هذا
كانت تحرك قهوتها بالملعقه وتسمع أنهار تبرر له:مو انتي طولتي بالنومه صار له اكثر من نص ساعه هنا عندنا اكيد قام بدري
نورا:الغرفه خيال ماخلتني اقوم بدري
ابتسمت أنهار:وصلوا ؟
نورا:ايوا ماحكيتك اش صار اصلاً اذا تقابلنا لازم اسولف لك
أنهار:اوكيه بتجين مع فهد وريوف؟
نورا:كلمت ريوف تقول عندها كلاس ما ادري يمكن اجي عالظهر معاهم
أنهار:لا تطلعين من البيت قبل تكلميني ابغى اغراض
نورا:جهزت اغراض بهاج مع سلطان ما جابها؟
أنهار:لا الاغراض لي انا
نورا:بتجلسين اليوم كمان عنده؟
أنهار؛اكيد ماراح اخليه
سكتت نورا لثواني:براحتك
أنهار؛بقفل الحين نتكلم بعدين
نورا:اوكيه
قفلت منها وشربت من قهوته وهي تخرج مشت للبلكونه وطلعت وهي تشرب من كوبها وتناظر الحيّ من مكانها
لفت تناظر السياره اللي طلعت من الفله اللي جنبهم ولمحته هو نفسه نفس الشخص اللي امس كان موجود بنص الفله وردّها يعتذر عن تخويفها
عقدت حاجبينها وهي تناظر الفله اللي جنبهم بإستغراب
'
دخلت أنهار ووقف سلطان:اجل بروح انا واشوف العلم هناك
بهاج:بتجيبها ؟
سلطان؛ان كان ودها
بهاج مارد ومشى سلطان:تبين شي أنهار ؟
أنهار:لا سلامتك
خرج من الغرفه ومشت أنهار:بتقوم بهاج؟
بهاج:تعالي وقفنا في مكان ماعطينا نهايته
عقدت حاجبينها وتقدمت له:قالك شي سلطان؟
بهاج هز راسه بالنفي ورفع جسده يجلس بإعتدال
أنهار:اعتذر والا ايش ؟
بهاج:إنطقي بحبيبي مره ثانيه ودمريني زود
ابتسمت بصدمه من استوعبت كلامه وضحكت بعد ثواني :خوفتني !
بهاج ناظرها بجديّه:كل ماجيت أرتب دنياي حستيها
نزلت عيونها بهدوء وهي تبتسم:ماكنت أدري تميزها
بهاج:صاحيه إنتي ؟ أميز ألوانك اللي تلبسينها كيف ما أميز كلامك
رفعت نظرها له ومد كفه لها:قربي مني
كانت تشوف بعيونه هلاكه وتدري برغبته ولهفته ووين بتوديها مشاعرها لو قربت منه
ومسكت كفه واقترب منها يجلس يناظر عيونها
: أنا أعرف كيف كان يميل خصرك وأنا أعرف كيف فلّيتي الجديلة
ناظر شعرها ورجع يناظر عيونها: أنا أعرف كل عُمرك طال عمرك وناسي كُل تاريخ القبيلة
ابتسمت له وصدت بوجهها عنه ورفع كفه يلف وجهها له وحط بإبهامه على ثغرها ولفت تناظره
كان ممتلي وجهه بخدوشه وهلاكه منها ويوضح لها من نظراته وصوت انفاسه ولمساته على وجهها
بدّل نظراته لثغرها:من هِنا يتدفق الربيع الخضر والنار وضو القمر ولمعة بوارق الشتاء ، من هِنا محد يردني عن عذابي
كانت تناظره وتسمع صوته اللي يبدله كل ما طغى عليه الحب وتبدل حاله قدامها وهي تعشق صوته ونبرة صوته اللي تميزها وتفهمها:قادر صوتك يحضني بدون ما تحضني ذراعينك ، حتى لو يدينك تعورك وماتقدر تحضني
مسك بين يدينه نفسها الناعم اللي يلامس ثغرها وحمله من ثغرها الى ثغره
تكرر عليه شعور نشوة القُبله الأولى وكيف كان مشتعل نيران عشان يتقدم ويبوسها وسواها
ضاعت بين شعورها وشعوره كل اللي تحسه انها تقاوم مشاعر صاعقه على جسدها على كل لمسه من كفه على مقاومته لها رغماً عن جروحه وخدوشه هزله وضعفه الا انه أقوى مشاعره كانت تقويه
كانت دقيقه بينهم تركتها تحط بجبينها على جبينه تسمع لفيح أنفاسه وكأنه خرج من جهاد مقاومتها
ورفعت عيونها لعيونه وهمست:حبيبي
رفع ذراعه يحطها خلف خصرها:قوميني
حاوطت ظهره تقوم معاه كانت حاضنته عشان يتقوّى بنهوضه وفعلاً وقف وهو حاضنها بذراع وحده وعقد حجاجه بألم:اهخ
ابتعدت عنه تناظره وهمست:تمشي ؟
هز راسه واستند عليها ولفت تمشي معه لخارج الغرفه يمشي معها بهدوء
ناظر العالم اللي بالممر اللي فيه كان يتسائل معقوله كل هالعالم موجود وهم داخل؟ ليه ما حس بوجودهم ليه اختلى شعوره معها ناكر وجود العالم
لفت تناظره من قريب وهي تمشي معه تناظر جروحه وخدوشه بوجهه
التفت عليها يشوف نظراتها الهاديه له وهي تسنده وتمسك كفه وذراعه
لف عنها ونزل راسه لخطواته وهو مبتسم
يمشي بهدوء معها وهي تسنده وابتسمت من شافت ابتسامته ونزلت نظرها لخطواته معاه
رفع راسه يناظر الممر ووقف بخطواته من شافهم جايين
لفت من وقف وشافتهم مع فهد حست ان بهاج بيفلت يده عنها لكنها شدته وابتسمت لهم وحطت يده على صدره ويدها الثانيه خلف ظهره وهو ساند على كتوفها
تقدمت نورا وهي تناظرهم وابتسم فهد
:ماشاء الله ماشاء الله غلبت القط ابو سبع ارواح
عقدت حاجبينها أنهار:تخوف !
فهد:ذكرت الله لا تخافين
لف لبهاج:كيفك ابو سعود ؟
ابتسم بهاج:زي ماتشوف
تقدمت ريوف مع نورا:حمدلله على سلامتك بهاج
ناظرتهم أنهار:مو على اساس بتتأخرون للظهر ؟
نورا:فجأه نزلوني قالوا احنا تحت ما امداني حتى اجيب اغراضك
ريوف:سحبت على محاضرتي بس عشان الحق اشوفك
بهاج:ليه ليه
ريوف:مافي شي أهم منك
فهد تنحنح ولفت عليه ريوف:شتبي ؟ اي مافي أهم من بهاج عندي
فهد:افا ! ياما عطينا يالجحوده
ريوف؛كلها ٣٠ حبه ايسكريم
ضحك بهاج وكح بتعب ولفت عليه أنهار:نرجع؟
هز راسه وهمس:خلي فهد يساعدني
أنهار:لا أنا ودي
ناظر البنات بهاج ورجع معها للغرفه وجلس على السرير وشالت كفها ومسكه فهد يجلسه
ولفت أنهار عليهم تناظر نظراتهم لها وبلعت ريقها بإرتباك
جلست وهي تتصدد عنهم مو فاهمه من نظراتهم شي غير انها محتوى لحديثهم الان
تسمعهم يتهامسون وتشوف فهد يسولف مع بهاح وهي هاديه ساكنه محلها
بتساؤل وحيد ! هم شموا ريحة الحُب ؟ ، بدأ ينتشر بالجو ويتطاير ويفضحهم ؟
نزلت نظرها لصدرها وهي تتسائل ! يخرج شي من حشاها يفضح أمرها ؟
ماقدرت تخبي أكثر وتناثر على وجهها يزيّن ملامحها ؟
انرسم على عيونها حُب بهاج وفضح أمرها ؟ والا انكتب فوق جبينها إسمه ، ناظرت بهاج اللي يتكلم مع فهد مستحيل تقدر تخبيه أكثر هو مفضوح بنظراتها بإهتمامها بإنجذابها هي طفحت من حُبه وغرق الحُب داخلها وتوسط حشاها وجوفها
توالفه وتأمنه وتتشفق عليه ، تخجل منه وتبادر إليه ، تتلذذ معه بكل لحظه تمر معاه وتذوق معه نشوة الحُب الممزوجه باللهفه
هي تذوب من الدلال اللي تعشيه من بهاج ومستحيله فكرة فقدانها لدلاله اللي تذوقه منه ، من زود حبها له تشك بإنه نور فقط نور
ينعكس عليها ويظللها ويشرق بوجهها وبروحها من شدة مكانته بجوفها
لفت من دخل الدكتور واعتدلت تناظره يتقدم لبهاج
الدكتور:كيف وضعك الان بهاج؟
بهاج:حمدلله
الدكتور ابتسم:زوجتك قامت بعمل طاقم الطب كله ؟
لفت نورا تناظر أنهار اللي ابتسمت له
وابتسم بهاج:ماودي أطول
الدكتور:لا ان شاء الله بتخرج وبترتاح في بيتك أوضاعك سليمه لكن هذي اليومين تحت المعاينه ولراحتك
بهاج:ماني مرتاح والله هنا ابي اخرج وارتاح في بيتي
الدكتور:ممكن بكره لو تبي لكن الأفضل لك بهاج تكون تحت أعينا
بهاج:انا بخير
الدكتور هز راسه:تحافظ على أدويتك وما تهمل نفسك؟
بهاج:ان شاء الله
فهد:عندنا يادكتور
ابتسم الدكتور:ماشاء الله محتوينك بتقوم على حيلك ان شاء الله
بهاج:ان شاء الله
خرج الدكتور وعمّ الصمت بين نظراتهم لبعضهم كلهم لي تنحنح فهد:خل يكتبون لك اجازه تقدمها لجامعتك
بهاج:ذكرني والا قم خذها انت الحين
فهد وقف:ابشر الان طال عمرك
ابتسم بهاج له ومشى فهد بيخرج ووقف:هلا أبو مهنا
ميل راسه بهاج وعقد حاجبينه وابتسم ابراهيم وصافحه:كيف الحال ؟
فهد:حمدلله من عطاك الخبر ؟
ابراهيم:خبيته علي بس عرفت
ابتسم فهد:حيّاك
ابتعد فهد ودخل ابراهيم وناظرها جالسه هو عرفها وتذكرها وميّزها وهي عرفته
ظلت تراقبه يدخل وابتسم بهاج:السموحه
ابراهيم:ارتاح ارتاح بس
بهاج جلس وتقدم له ابراهيم يسلم عليه:أجر وسلامه
بهاج:كيف الحال ؟
ابراهيم:الحمدلله
لف ابراهيم لأنهار من عرفها وابتسم:شلونك أم سعود
بلعت ريقها بربكه ولف بهاج يناظرها ويناظر البنات ورجع ناظر ابراهيم
فهد:استريح
ابراهيم:لا والله مستعجل واهلك موجودين جيت اطمن عليك وأتحمد لك بالسلامه
بهاج:ماني ناسيك وكنت بمرّ عليك لكن سبقنا شي ثاني
ضحك ابراهيم:اهم شي سلامتك الامور كلها عندي
بهاج:ماتقصر
ابراهيم:اذا احتجت شي كلمني انا موجود بالخدمه
بهاج:ماتقصر ابو مهنا
ابراهيم:سلام عليكم
خرج من عندهم مع فهد ولفت نورا تناظره لين خرج ولف لبهاج:مين هذا ؟
بهاج:صاحبي
ريوف:يعرف أنهار؟
بهاج:اي ساعدنا بمستشفى يعرف فيه دكتور يوم تعور سنّ أنهار
ناظرته أنهار يتدارك الموقف وهي هاديه مافكرت حتى ترد كان الفهم يكفيهم
ريوف:ام سعود !
نورا:وتناديه ابو مهنا كذا والا في مهنا؟
بهاج:في مهنا واثنين غيره
سكتت نورا وكمل بهاج:متزوج
ريوف:ماشاء الله مره مو باين كأنه بعمرك
بهاج:يشتغل وعنده شركه يشتغل فيها فهد ودكتور بالجامعه
ريوف:هذا مدير فهد ؟ ماشاء الله مره صغير
نورا رفعت حاجبينها بذهول:من فين عرفته؟
بهاج:صدفه
رفعت عيونها ريوف لأنهار اللي ساهيه:أنهار !
لفت لها وعقدت حاجبينها ريوف:فيك حاجه؟
هزت راسها أنهار بالنفي:لا بس جلسة المستشفى أثرت علي شكلها
بهاج:ارجعي ، فهد يقعد عندي والا سلطان اذا وصل
أنهار:ليش ؟
بهاج:عشان ترتاحين
أنهار هزت راسها بالنفي وناظر نظراتها له وصد للبنات ولارد
دخل فهد وهو مبتسم:ابشر بالعذر
رفع الورقه وابتسم بهاج يناظره ولف فهد للبنات:نرجع ؟
ريوف:بهاج تبغانا نجلس معاك؟
بهاج:لا ارجعوا انا جايكم بكره ان شاء الله
ريوف ابتسمت له:ان شاء الله
ابتسم لإبتسامتها لانه يفهم الود اللي تحمله له وخرجوا ووقفت أنهار وخرجت معهم:نورا
لفت نورا لها وناظرتها أنهار:اذا بتمرين الليل ضروري تجيبين لي اغراضي
كانت تناظرها نورا بتأمل بدون رد وبلعت ريقها أنهار وهي تناظرها ورفعت كفها نورا تشد على ذراع أنهار وهزت راسها:راح نتكلم
ماردت أنهار ومشت نورا تتبع ريوف وفهد للخارج
كانوا طالعين مع باب المستشفى ووقفوا من شافوا سلطان داخل ومعه حليمه
رفع نظره سلطان عليهم وتقدمت حليمه تمرّ بدون سلام وتدخل
لف فهد لسلطان:جات لوحدها ؟
هز راسه سلطان وناظر نورا ثانيه ودخل خلف حليمه
لفت تناظرهم يدخلون ومشت مع ريوف اللي نطقت
:فيها خير بتزوره
'
كانت واقفه عند باب غرفته ساهيه ماتقدر تقطع حبل أفكارها وتدخل عليه
تناظر الممر وتتذكر نظرات نورا لها وفهمها وكفها اللي شدته على ذراعها
اخذت نفس تقوي نفسها وجات بتفتح الباب لكن لمحتهم جايين وقفت بإعتدال لين تقدموا لها
وناظرتها حليمه بقلق:وينه ؟
فتحت الباب أنهار من مكانها ولفت حليمه للباب ودخلت وقفلته خلفها ولف سلطان يناظر الباب ورجع ناظر أنهار:ليه كلمتيها ؟
لفت له أنهار وهزت راسها:علمتك وبتعلم بهاج اكيد
سلطان:تدرين انه بيزعل وتدرين انه ماوده احد يطلب منها تهتم فيه
أنهار:اشوفك صرت تهتم لزعل بهاج !
سلطان ناظرها وسكت وكملت أنهار:لا تتشاطر علي
دخلت وتقدمت لهم ولفت حليمه:خلينا لوحدنا
أنهار جلست:بينكم أسرار ؟
لف بهاج عليها يناظرها ونطقت حليمه:شكل ماعندك علم وما بغيتك تعرفين لكن انتي مصرّه
ناظرتها أنهار وهي متكتفه ونطقت حليمه
:جدك رَدّه بياخذ حقه
أنهار رفعت حاجبينها:والله حقه من مين ؟ من ولدك ؟
بهاج نزل انظاره وهو ساكت يسمع حوارهم وكملت حليمه:جدك بيرفع شكوى ضدك لانك حرقتي مستودعه
تغيرت ملامح أنهار من تذكرت ومن استوعبت وكملت حليمه:وابوك اللي جاحدينه هناك ! بياخذكم لبيته غصب وكل عقد نكاح توقع دون رضاه بينفسخ
ماردت وهي جامده ملامحها ولفت تناظر بهاج اللي ساكت يناظر كفه بهدوء
وكملت حليمه:قلت لك ان طريقكم مسدود ، اخذتم بزواجي من ابوكم ورميتوه بالجدار بدون اهتمام عبالك زواجك من بهاج حقيقه ؟ الكل ينكره الكل ينكر هذا الزواج
ماردت أنهار وهزت راسها حليمه وهي تغرق عيونها من مشاعرها:بيجي يوم ترجع كل الأيام نفس ماكانت قبلكم ، انا مع ولدي لوحدي بس الفرق مطلقه ماني أرمله ، وانتم في الحجاز مع ابوكم
رفع انظاره بهاج لامه من تغيرت نبرة صوتها ولفت حليمه عليه تناظره بدون ترمش بخوف انها تنهار دموعها
وشدت على قبضة يدها أنهار برعب سكنها ونطقت حليمه وعينها على بهاج:بيحاربونكم وماهم ضعاف
مارد عليها بهاج وصدت تستجمع نفسها ووقفت
:حمدلله على سلامتك
مشت تخرج من الغرفه ولف سلطان ومشت ومشى خلفها:ما بتقعدين اكثر ياعمه ؟
حليمه:لا ردني
'
بللت شفايفها وهي تناظر الفراغ وهمست:منجد؟
بهاج مارد عليها ولفت أنهار تناظره:بيسجني ؟
لف عليها وتكلم بهدوء:تدرين انه يعقب
أنهار تكلمت بحده:بيشتكيني بيشتكيني تقولي يعقب !
وقفت ومسكت راسها بخوف وناظرها هو يدري انها ترتعب وتخاف ويسكنها الرعب من أدنى شي
بتصدق انها بتهلك في سجن مع انها مافكرت ان ماعنده دليل
هي بتضعف ورَدّه يهلك الضعفه بمره وحده بدون يجاهد
كان يتأمل رجفتها وهي تدور بالغرفه وتتكلم لكنه ما يسمع منها صوت كل اللي يشوفه خسارتهم
متأكد انها بتخسر هي ما تقوّت فيه للآن هي ماهي قويه به للآن
رجع ينزل نظراته لكفه بهدوء ولفت عليه
:وكيف يقدر ياخذنا ؟ مافهمت ، بيجرنا غصب معاه ؟ ريوف متزوجه وانا متزوجه ونورا مو صغيره كيف بيجبرنا نرجع معاه ؟
صدت وهي تهز راسها بالنفي ولفت عليه بغضب
:ردّ علي فهمني
رفع أنظاره لها وهو ساكت وناظرته بخوف:وش بيصير ؟
اخذ نفس:مدري
ناظرته وعضت شفتها:ماراح تخليني صح ؟
بهاج رفع عيونه من تجمعت الدموع بعيونها من خوفها وهمس:انتي تقررين
أنهار هزت راسها بالنفي:راح يخوفني راح يطلبني للشرطه
صدت تمشي بالغرفه:يسجنوني ؟ ممكن يطلب مقابل ؟ والا ليش يسوي كذا ليش
مارد عليها وهو هادي وهي لازالت تمشي بشكل دائري وتسأل نفسها برعب
جلست بتعب واستسلام في انها تستوعب حجم الخوف اللي يسكنها ولفت تناظر بهاج اللي ساكن محله وهمست:ليش ساكت ؟
بهاج رفع انظاره لها:تبين تسمعيني والا تسمعين ظنونك ؟
أنهار:ابغى احد يطمني
بهاج هز راسه وتقدمت له أنهار وجلست على السرير قدامه:بس طمني إن محد يقدر يسوي لي شي وإنت موجود
بهاج مارد وهو يناظر نظراته له ونزلت كفها لكفه تشده:طمني
بهاج اخذ كفها اللي بكفه وحطها على صدره بهدوء
ورفع عيونه لها بهدوء:تجين معي حفلة محمد عبده؟
عقدت حاجبينها وكمل بهاج:نسمع أغانيه سوا ؟ وهو قدامنا ؟
سكتت تتأمل طلبه وابتسم يناظر نظراته لانها تفهمه تفهم انه هذا الطلب جواب لطلبها هي بطمني
كان يطمنها بهالطريقه يعزمها على ليلة محمد عبده
ابتسمت له وناظرها تنزل راسها وهمس:انتي في وجهي مايجيك شي
رفعت راسها وهزت راسها له وابتسم
'