انثنى غيم نجد لخد الحجاز النرجسيه

٦٤

لفت عليه وهي تشرب قهوتها الحارّه:بس انا بشرب لحالي ؟
سلطان:قلت لك ماتجوز لي الا الشقرا
صدت تناظر المباني قدامهم:كان قلت لبهاج وأنهار يجون معانا
سلطان:عندهم موضوع خليهم يصفون لوحدهم
لفت له وعقدت حاجبها:موضوع ايش ؟
سلطان لف عليها واخذ نفس:والله الشيبه ماهو تاركهم
لفت عليه:صار شي جديد ؟
سلطان:ما اعرف الموضوع يمكن تعلمك أنهار ان قالها بهاج بس الامور مكركبه
نورا:تصدق حسيت ببهاج حاجه بس ما تكلمت
تنهد سلطان يناظر أمامه:تهقين هذا حالنا يسرّ ؟ جميع ماهو أنا وإنتي ، بهاج وأنهار وفهد وريوف
لف عليها:من فينا مرتاح ؟
نزلت انظارها لقهوتها نورا وابتسمت:كل ما بتجيبني هنا بتبكيني ؟
سلطان التفت لها:نورا والله اني مدري وش جايني مطرود من بيت أبوي ولا ادري عن حزن أمي ولا ادري كيف بمشي أموري لوحدي ولا ادري كيف بتزين وتصيرين حليلتي
ناظرته ولف لها:ما اقول ان هذا كله صار من بعد جيّتكم بأبوكم عشنا من الشيبه من قبلكم شرّ أعماله لكن ماكانت تعور حيل
عقد حاجبينه يرف كفه لصدره:الحين هذا يعورني واجد
نورا رفعت ذراعها تمسك كفه اللي على صدره:مستحيل يطول الزعل بينك وبين أهلك
سلطان:بس طال مع أبوك
سكتت ومسك كفها من حسّ باختلافها وهمست
:ما اسولف عنه
سلطان:ليه ؟
نورا رفعت كتفها وبلعت ريقها وكفها بكفه:اخاف اكتشف اني اشتقت له
ميلت راسها من بكت بدون صوت واخذ نفس يتقدم لها وناظرته:يعور سلطان كل ما اتذكره قبل معانا يعورني قلبي انا ليله وحده بحياتي معه ما بكيت لوحدي كل ما حسيت ببكاي جمعته ورحت لحضنه بس الحين جمعت دموعي مالقيت حضنه
سكتت تناظره بعد مانطقت بأخر جمله وتغير صوتها
وظل يناظرها سلطان تبكي بدون صوت وأوجعه قلبه قلبه اللي هي تسكنه
وهمس سلطان بقل حيله:ماودي أخطي بك
لكنه أخطى وتقدم يحضنها لصدره ومن حست في ذراعينه لفت عليه بجسمها تحضنه بقوه وهذا كان أول حضن تجربه نورا من بعد طول جفاف صدرها
كانت اول مره تحس بقلب ينبض مع قلبها رفعت راسها على كتفه وغمضت عيونها تبلل بمدامعها كتفه وعقد حاجبينه من اختلاف حال قلبه بعد حضنها من شعوره كركبة حاله صوت نبض قلبه العالي وهمس:انتي نبضه وانتي هواه وانتي دليله وأنا بسد عنك شمس قيظ الوجع بظلالي ، والله ياما تمنيته والله ياما تمنيت حضنك يا أول عناقيد البنات
نورا عضت شفتها تمنع بكاها وشدت عليه:لا تخيّب ظني خاب بما فيه التعب
سلطان:انا جاهدتك وماجيتي بهالحضن بالساهل ظنك اللي تطوله صعب يسهل مفارقه ؟
ماردت عليه وغمضت عيونه تتحسس بيدينها اكتافه وتميل براسها على كتفه كان حضنه احتياجها كان حضنه نهاية تعبها ومكابرتها وبحضنه واخيراً استراحت
كان الليل يعيش اخر ربع ظلامه وقدامهم مباني شامخات تشهد على حضنهم الأول بالسياره ينكتب في هذا التاريخ هذي المشاعر وتتوسد أحضان تاريخهم سوا ، مستحيل تنسى انها تخطت جميع الخيبات وآمنت به وسكنها اليقين بوسط حضنه ولو انها كانت تشوفه بعيد عن عيونها ولا يطول عيونها الا انها الحين بوسط حضنه
'
ناظر الشمس تدخل الغرفه وأنهار بحضنه نايمه ولف ياخذ جواله وارسل لسلطان:صحيت ؟
وانتظر منه رد ولف يناظرها نايمه بجانبه ورد سلطان:صاحي
قام من محله واخذ جواله معاه وخرج من الغرفه نزل ودخل غرفة سلطان بالاسفل والتفت سلطان
:عسى خير
بهاج تقدم له وعطاه جواله:هاك
جلس بإعتدال سلطان وناظر الرساله وجمد ووقف وناظره:صادق ؟
بهاج ناظره بغضب:طالع قدام عينك طالع
ناظر النياق بالصوره سلطان وقرا الرساله وعقد حاجبه يناظر الرقم وفتح جواله
اخذ نفس بغضب بهاج:ذبحها كلها كل اللي بقى من ابويه اعز ما ربى على يدينه ذبحهم
التفت لسلطان:يبي يكويني يعني ؟ ليه ليه دخل امي بيننا وزوّجها غصب عنها والحين يدخل حلال ابوي يبي يلوي ذراعي ؟
سلطان ناظر الرقم المسجل بجواله وعرف انه رقم شموخ ورفع راسه لبهاج:يبيك تروح له مكسور ظهرك تترجاه
بهاج اخذ نفس:لو علي وانا اللي بنسجن والله ما يشوف وجهي ولاخذ خمس سنين ولا اروح له عند رجلينه لكن الشغله فيها أنهار
سلطان:علمتها ؟
هز راسه بهاج:بروح عنده
سلطان:متى ؟
بهاج:بعد شوي
قفل جواله سلطان:بجي معك
بهاج:سلطان لا تتدخل اطلع منها
سلطان:والله ما اخليك ورجلي على رجلك
بهاج:يا ادمي تخسر امك وابوك بسبتي ما يسوى انا احلها لوحدي
سلطان:انت مرساي الاخير ان خسرتك خسرت الجميع
سكت بهاج وكمل سلطان:وين انت ناوي ودنّي
بهاج:ماودي يا سلطان ماودي
سلطان:لا تشيل همي بس ماني مخليك
تنهد بهاج وصد يعض شفته ومشى سلطان:تعال افطر وعيّن من الله خير وقل يارب
مشى معه بهاج:يارب
خرج وناظر نورا بالصاله ولفت لهم:احد يقولي اشبها
تقدم يناظر أنهار اللي تبكي ولفت تناظره وصدت وهي تبكي وناظرته نورا:اشبها أنهار ؟
سلطان:اقعدي ونتكلم اقعدي
نورا:بهاج اش صاير ؟
رفعت راسها أنهار تتكلم وسط بكاها:ماله شغل بهاج
لفت نورا:اجل اشبك صحيتي وجيتي عندي تبكين وتحضنيني اشبك من صباح الله
مارد بهاج وناظرها سلطان:نورا
لفت عليه واشر لها تقعد وقعدت وناظرته:مصيبه جديده ؟
سلطان:مامن مصايب ان شاء الله الشيبه فتح موضوع جديد ويحوم فيه يبي يرجعنا للمزرعه مسكوره ظهورنا
نورا:اش سوا كمان ؟ ناوي على جنان انا بطلع الجنان كله عليه
سلطان:رافع شكوى ضد أنهار عشان حريق المستودع
نزلت راسها أنهار تبكي ولفت نورا بصدمه لبهاج ورجعت ناظرت سلطان:هذا صاحي والا مخرف ؟ اش دخل أنهار بحريق مستودعه عساه الحريق اللي ما ينطفي اش دخلها ؟
سكت سلطان وناظر بهاج ولفت نورا لأنهار ورجعت ناظرت بهاج وميلت راسها:قولي انه مو انتي أنهار !
غطت وجهها تبكي ومسكت راسها نورا بصدمه
سلطان:هو بس يبي يخوفنا جميع بنحلها ان شاء الله
نورا ماردت وهي ماسكه راسها وصد بهاج وهو عاقد حجاجه وكمل سلطان:بنروح سوا ونبوس رجلينه ونطيب خاطره وبيرضى وبيطخ
نورا لفت لأنهار تناظرها:ليش يا أنهار ليش ؟
بهاج:صار اللي صار واذا يبي اعوضه عن الحريق عوضته
نورا:وبيعديها ؟ متأكد أنهار ما بيجيها شي ؟
بهاج ناظر سلطان وتكلم سلطان:ان شاء الله نقول ان شاء الله
بهاج:أنهار قومي معي
نورا:بجي معاكم
سلطان:اقعدي نخلص منهم ونرجع ما بنبطي
نورا:والله ما أخلي اختي لحالها والله
بهاج:نورا مانبي مشاكل زياده
نورا:محد له صلاح ما بتودوني بروح لحالي اعرف
سلطان:وراسك العنيد ذا متى بيطخ ؟
ماردت نورا ومسكت ذراع أنهار:قومي أنهار قومي ولا تبكين تفهمين
وقفت معاها ودخلت الغرفه نورا وجلست أنهار على السرير وناظرت نورا اللي تاخذ جوالها وشنطتها:لا تبكين فاهمه
أنهار:اخاف يسجنوني نورا
لفت نورا بحده:انكتمي محد يقدر يمد يده عليك يذبحوني بعدين ياخذونك
بكت أنهار واخذت شنطتها نورا ومشت معاها ومسكت ذراعها:امشي معاي
خرجوا وناظروا ريوف اللي واقفه مع فهد وجامد وجهها ولفت لهم:اشبكم ؟
نورا:ليش جايه ؟
ريوف:اشبك نورا اشبها أنهار
بهاج:بنقعد نتكلم بالموضوع كل شوي ؟
فهد:اذا عرفنا العلم بالاول !
سلطان:الشيبه مشتكي أنهار وبنروح نهجده لين يتنازل
ريوف لفت بصدمه تناظرهم:مشتكيها ليش ؟
نورا:حرقت المستودع ويبغى يذلنا نرجع لمزرعته لكن يحلم نرجع لهذاك المكان
بهاج:نورا انتي ناويه شرّ اقعدي محلك
نورا:قلت ماراح اخلي أنهار خلاص عاد سكتنا لهم لين متى ؟ لين ياخذون اختي بالسجن ؟
ريوف:بسم الله عليها ، أنهار
تمسكت بكفوف ريوف بخوف:خايفه ريوف
ريوف:بجي معاك
بهاج صد وناظرهم سلطان:تجون جميع ليه ؟ تبونهم يقعدونا بالمزرعه طرق !
فهد:اجل اقعد هنا وش اسوي افصفص واشرب شاهي رجلي على رجلكم ماني مخليكم
ريوف:ماراح اخلي أنهار
بهاج ناظرهم ولف لسلطان اللي تنهد وخرج
مشوا يخرجون ولف فهد:ريوف امشي معي
لفت ريوف لأنهار:وراكم بالسياره اوكيه ؟ لا تخافين
هزت راسها أنهار ومشت ريوف تركب مع فهد
وتقدم سلطان يدق ذراع نورا ولفت له واشر براسه لسيارته ولفت لأنهار اللي ركبت جنب بهاج وناظرت بهاج
لفت أنهار عليها وهمست نورا:وراك بالسياره مع سلطان طيب ؟
هزت راسها وقفلت الباب نورا ومشت مع سلطان
وشغل السياره بهدوء بهاج والتفت يناظرها تفرك يدينها ببعض وحرك خلف سيارة فهد
ناظرت البيت بإنعكاس المرايه ونزلت دموعها بخوف رجفت رجلينها ببعض تتماسك لكن كانت خايفه تنحط ورا حديد وتعيش شي اكبر منها واثقل ونزلت راسها تبكي
وبلع ريقه بهاج بخوف خوف انه ما يقدر يردّ عنها الأذى والتفت يمد ذراعه لكتوفها يسحبها لحضنه وهو يسوق وتمسكت بثوبه وشد ذراعها لحضنه
وهمس:لا تعورين صدري بسكاكين والله ان دموعك ماهي شوي
أنهار:اخاف ما يوافق اخاف يحبسني
بهاج:يحبسني ولا يحبسك تفهمين ؟ نرميها عليّ قولي بهاج فعل
رفعت عيونها له وهي تبكي وهزت راسها بالنفي
:بهاج
ناظرها بحده:والله ان ما تنازل لأقول أنا وأخلي فهد وسلطان يشهدون واخذها انا
أنهار:لا بهاج لا تكفى
بهاج:اجل اشوفك بمكان ما تشبهينه ؟ انتي اللي تعودتي الدلال تدخلينه ؟ أعقب ويعقب فيهم أطول شارب وأطول لِحى
أنهار:خذني منهم بهاج ، خذني من كل شي تعبت
رجعت تحضنه تبكي وناظر مراياته بهاج بضيق وهو حاضنها وتأفف وهو يفكر
'
لف لها يشوفها ساهيه تاكل اظافرها وتكلم بهدوء
:هالمره بتسوين نفسك قويه بعد ؟ والا صادقه بإنك قويه ؟
لفت نورا عليه:انا وصلت أخر حدّي سلطان ، خسرت حياتنا قبل بسببهم وخسرت أبوي بسببهم وماراح اسكت واخليهم يخسروني اغلى شي عندي
تجمعت دموعها بعيونها بخوف ورجفت وهي تتكلم
:الا خواتي خواتي خط أحمر وسبعين خط
سلطان:مابيصير شي لا تخافين بنطيب خاطره ونترجاه ونطيح عند رجلينه وتنحل
نورا لفت له:ماراح اطيح عند رجلين احد
سلطان:نورا ماهو قدنا ماهو قدنا لا تسوين شي ما انتي قده
نورا:واذا رجعنا لعشّه ؟ حبسنا من جديد بمزرعته وزوّج وطلّق ولعب بحياتنا لعب الورق ؟
سلطان:بنحلها نفس ما حليناها ونقلنا للرياض
نورا:سلطان ! لا تستسهل الموضوع وصلت فيه يشتكي اختي
سلطان:ما استسهله بس لا تصعبينها انتي بعد
نورا:ماراح يصير اكثر من كذا خلاص ماراح اسكت
سلطان تنهد:انا ‏متعبني الراس العنيد المشقَّى
ماردت عليه ولفت تناظر الطريق وهي متكتفه
'
لفت ريوف له تشرح له:بنحفر بيدينا ورجولنا فهد بنطلعه بنخلص ابوي منهم هو اللي يقدر يوقفهم هو اللي يقدر ياخذنا من عندهم
عض شفته بتوتر فهد يناظر الطريق:تحسبين مزرعة الشيبه شبر بشبر ؟ ريوف انتي تتكلمين عن مزرعه سبعين عشّ والفين نخله وخمس ميه حيوان يرعى وسطها يمكن بعير ماكله من أيام وش ادراك
ريوف عقدت حاجبينها بخوف:فهد تكفى
فهد:انا مابيك تاخذينها بالسهاله
ريوف:توصل فيني اروح لجمعه اهدّ فيها تطلعه ، فهد خلاص كفايه كفايه اللي قاعد يصير
التفت عليها وكملت ريوف:ماراح اسمح زياده يعيش بينهم ابويه
تمسكت بذراعه:فهد تكفى ندوره سوا تكفى
فهد تنهد:استغفر الله
ريوف:يمكن نلاقيه يمكن ماتدري ربي ينولنا البصيره ونلقاه نفكّه ويطيب ابويه
فهد:نشوف وش يصير معنا
ريوف سكتت ولف فهد لها:وان منعوك عن دراستك؟ ليه تجين ريوف ليه ؟
ريوف لفت تناظره بخوف وكمل فهد:مابقي لك الا قليل الشهور ان حبسوك بالمزرعه وش نسوي
ريوف صدت بخوف وهي ساكته وتنهد فهد
مسح وجهه يناظر الطريق بتوتر ويلف يناظر سيارات بهاج وسلطان خلفه
'
تمسكت بثوبه من شافت بوابة المزرعه وسيارة فهد قدامهم وانفتحت البوابه البوابه اللي اول مره شافتها كان حالها غير كانت مع ابوها واخواتها وكانت تجهله ، تجهل درب الأمان اللي متمسكه في ثوبه الان
لفت تناظر بهاج بعيون فيّاضه بالدموع وناظرها بهاج ولأول مره تحتم عليه السكوت
دخل المزرعه وسلطان خلفه ودخلت كل سياراتهم للمزرعه لفت تناظر نخل المزرعه من ممرّ النوير وملحقه وبيوته والمستودع المحروق بنهايته
لفت ريوف لفهد تمسك ذراعه:ما ابغى اشوفه
فهد:ماتبينا ندخل لهم ؟
هزت راسها بالنفي وناظر بهاج وسلطان من المرايه وهز راسه لها
لفت تناظره من وقف وتمسكت بثوبه ورجع ظهره للخلف بقل حيله وهمست:بهاج
لف يناظرها وهمس:لا تبكين ان كان تبيني قوي قدامهم
أنهار ناظرته ورفع انظاره بهاج من فتحت الباب نورا:أنهار
ناظرت بهاج أنهار وفلتت يدها من ثوبه ولفت لنورا ونزلت من السياره
نزل بهاج وناظر سلطان ومشى معه
بلع ريقه وهو يتقدم معهم جميع للدَكه ، المكان اللي عاش فيه الكثير من صغره بحضن ابوه لعزاء ابوه لخطبته لأنهار لأخر يوم كان يتحدى فيها الشيبه وأعمامه
والحين راجع راجع عشان يطيح عند رجلينهم ويتركونها بحالها ، الخوف ياكل من صدره واصوات عقله تصدى بكل جسده
لف لأنهار اللي تمشي مع نورا ومد كفه وهو يمشي وتقدمت تمسك كفه بقوه وخوف ويد راجفه وكفها الثانيه بنورا ووقفوا عند باب الدَكه
رفع عيونه رَده عن فنجانه وناظرهم وقوف قدامه
ابتسم لانه يدري يدري ان مابعد الطغيان والعناد الا الخضوع
التفت عُمر اللي تآكل من حياته اللي تلونت بالسواد بالكوابيس بالكثير من السهر للقليل من الراحه والعافيه
شد على كفها يناظرهم وهز راسه رَده:كنت ادري
تقدم سلطان:سلام عليكم
ناظره زيد:وش جابك معه ؟
سلطان:صلّ على النبي جينا نتكلم ونهدي النفوس
رَده:تهدي النفوس يا سلطان ؟ طاردك قبل ايام لان صوتك اعتلى وش صار بالنفوس ؟
بهاج ناظر عمر اللي يناظره وهمس:علامك؟
رَده:اتركك منه ما ظنتي جاي له
بهاج:جيت عشانكم جميع وعشاننا
دخلت حليمه وجمعه معها وباقي حريمهم ووقفوا يناظرونهم
اخذ نفس بهاج:بنقعد ونتكلم لاننا اهل ولا نفع اللي صار ولا بينفع اللي بيصير
رَده ضحك:اي يا بهاج !
ارتبك من شاف ضحكته وفلت كفها يتقدم لهم بنص الدَكه:اللي تبيه بيجيك ان كان تبي أعوضك عن اللي انحرق واللي بظنك انسرق ، اطلب ويجيك مستعد
رَده رفع راسه له:ظنك انا ابي قروش يا الفصعون ؟
تقدمت حليمه تناظر بهاج وبلعت ريقها أنهار تناظر عُمر اللي جالس يمين رَده حاله متغير للاسوأ وكأنه مشرد ما غطى جسمه الماء من شهور ، مسوّد متفحم من الهالات والسهاد
شدت على ذراع نورا تسمع بهاج يكمل:السموحه زلّه وعقلنا وراجعين نصلحها اللي تبيه بيجيك
رفع كفه:ابعد ابعد خل اشوفها
لف بهاج لأنهار ووقف رَده ومشى لها
رجفت بخوف وهي تشوفه يتقدم لها وتوتر بهاج يمشي خلفه بحذر
وناظرها رَده:جربتي حرارة يديني من قبل
مسك ذراعه سلطان:صلّ على النبي ياجدي
نورا ناظرته:ولا بتجربها مره ثانيه
بهاج:نورا !
نورا:ماراح تخليه يضربها صح ؟
بهاج:ما بيضربها
رَده التفت له:من بيردني ؟ انت ؟
بهاج:جدي !
رَده تجاهله ولف لأنهار:انا ماعصاني أحد من قبل الا وأخذ جزاه وانت بتاخذين جزاتك بالسجون وش لك جايه ؟
بكت بخوف وتقدم بهاج يوقف قدامها:داخل على الله ثم عليك خارجنا منها
رَده:انا ينوقف قدامي ؟ انا أنعصى ياولد سعود ؟
صرخ بغضب يهزّ مكانهم جميع:من يوقف قدام وجهي؟
بهاج سكت يناظره وبلع ريقه سلطان وكمل رَده:تنسجن وتخيس بنت أبوها وتربيته ، لو انها تعرف لصوت الرجال ما قوَت
سمعها تبكي خلفه وارتبك يتنفس بسرعه من صوت رَده وعصبيته وتهديده ولف يناظر عُمر اللي ساكت
كل اللي بعقله وش جاه غير حاله ؟ وكيف صار حاله كأنه مريض كأن في شي يصيبه أكبر منه ؟
ورجع ناظر رده اللي رفع اصبعه:جلطتني وبجلطها
غمض عيونه يجلس على الارض عند رجلينه وعض شفته سلطان يصد وبكت أنهار برعب من شافت بهاج جالس على ركبته
جلس عند رجلينه وتمسك بها:داخل على الله ثم عليك خارجنا منها ، انا رجال والشعر خاط شاربي وقاعد عند رجلينك
سكت رَده يناظرها تبكي قدامه ونزل انظاره لبهاج اللي عند رجلينه ولف يناظرهم كلهم متجمعين بالدَكه:هذا حال اللي يعصيني يحرق حلالي ويتمرد يخرج من مزرعتي يلعب بالبذخ
غمض عيونه بهاج يسمعه ومسكه سلطان بيقومه ورفض يوقف بهاج
وتقدم سلطان:جدي والله عيب احنا تملي وجيهنا شوارب
رَده:ورعان وانا اربيكم تفهم !
بهاج وقف وناظره:اطلب من الريال للمليون والله ليجيك
رَده هز راسه يناظره يترجاه والتفت يرجع محله ويقعد
شد على قبضة يده بهاج بتوتر ولف رَده لعمر
:ماتبي تقول شي ؟
عمر رفع راسه لهم يناظرهم وعقدت حاجبينها نورا من نظراته وهمست:مايعرفنا
لفت حليمه تناظره ساكت وعقدت حاجبينها بخوف ونطقت:عمر
نزل راسه بهدوء وتقدمت نورا:تكلم قول شي ليش تسكت ؟ راضي تدخل السجن بنتك ؟ راضي وجالس وساكت ؟ ليش تغيرت ؟ وش جاك ؟
مارد عمر وتقدمت نورا له توقف قدامه:اسمعني طالع فيني
جلست عنده وهزته بقوه:طالع فيني اكبر بناتك طالع
بكت وهي تكلمه وتصرخ بأعلى صوتها من صمته
:تكلم قول شي ، لا تطالعنا كذا وكأنك تجهلنا ، طالعنا
لفت حليمه على أنهار اللي تبكي وناظرت بهاج
ولف رَده لبهاج:اتنازل
جمد وجه بهاج ووقف سلطان بإعتدال وسكتت أنهار تناظره برعب
ولفت نورا عليه وناظرهم:اتنازل ماهي صعبه لكن بشروطي
لفت بقل حيله نورا لعمر وتدري انه بيصعب كل شي وهزت راسها بالنفي بتكرار تناظر عيون عمر اللي تناظرها
وهز راسه وبلع ريقه بهاج:يصير
رَده مسك عكازه:أولاً ما اشوف لك ظلال لا انت ولا سلطان ولا فهد بهالمكان
لف عبدالله على زيد اللي ناظرهم وبلل شفايفه سلطان ينتظره يكمل
واخذ نفس بهاج:يصير
ورفع عيونه رَده يكمل:البنت اللي تدرس تنفصل
لفت نورا عليه بصدمه:مستحيل
بهاج مسكها من ذراعها بقوه:نورا ! اتركينا
ناظرته بصدمه:بهاج ! ريوف مالها ذنب
سلطان:نورا
لفت تناظره وسكتت ولف بهاج وبلع ريقه:يصير
رَده رفع راسه:ماخلتك تقعد عند رجولي الا من زودها عندك
سكت بهاج من طرى بأنهار وهمس:تكفى
وقف رَده على عكازه وناظر بهاج:تطلقها
رفعت راسها أنهار بصدمه وتقدمت نورا لها بسرعه
وناظره بهاج بهدوء كان يظن كل شي يصير الا انه يتشرط بهالشرط
رفعت كفها على فمها حليمه تناظرهم ولفت شموخ على بهاج اللي واقف وساكت
ورفع حاجبه رَده:مايصير ؟
بهاج:ليه ؟ ليه وانت تدري ان ما جابني عند رجلينك الا هي ليه ؟
رَده:اعورك بها ، تبي تشتري حريتها من الحبوس ؟ تطلقها الحين وقدام اهلك كلهم
أنهار بكت:بهاج
تقدم سلطان:جدي اسألك بالله توقف اللي يصير ان تبينا خدام عند رجلينك بس لا تحدنا على الردى
رَده ناظره:مامن اردى منك طاردك وتجي تحتمي بولد عمك
سلطان:ما احتميت بأحد جينا نصلح الامور
لف بهاج لأمه اللي واقفه ناظرته ولأول مره تشوفه بهذا الحال كانت عيونه تشتكي وتلومها وتناجيها
حس ان أيسر صدره ينحرق ولف لرَده اللي يرد على سلطان:يطلق الحين ويذلف وتذلف معه انت والورع اللي معكم ويقعدون عند ابوهم هنا
نورا:ماراح نقعد هنا مستحيل نقعد هنا ولا يصير اي شي من اللي تبغاه
سلطان لف لنورا وكملت وهي متمسكه بأنهار:يكفي جبروت يكفي طغيان خلاص وكأننا بحرب خلاص ارحمنا خل ربي يرحمك بعد موتك
رَده:مبطي عن موتي
ناظرته بصدمه نورا ورفعت انظارها أنهار لبهاج اللي معطيها ظهره وتقدمت تتمسك بثوب بهاج بخوف وناظرت رَده:تكفى
غمض عيونه بهاج من سمع صوتها وحس بكفها تتمسك بثوبه وبكت أنهار تترجاه:تكفى تكفى خلاص
رَده:وين قوتك يابنت عُمر تدخلين المجالس ولا يهابك أطول شارب ؟
بكت تشد بكفها على ثوب بهاج وتترجاه:تكفى
رَده ناظر بهاج وضحك:والله البنت تحبك ياولد
صد بهاج عنه وكل اللي يسمعه صوت بكاها ولف يناظرهم واقفين ويناظرونه ومن بينهم امه
ناظرها وهز راسه بالنفي وش قاعد يعيش بسببها وش قاعد يحس الحين وهي قدامه
وتقدمت من شافت نظراته وهمست:عمي
لفت أنهار تناظر حليمه اللي وقفت ورفع كفه رَده
:اقصري الشر ولا تدخلين
حليمه بلعت ريقها:طلبه وانا بحسبة بنتك ربيت تحت يدك وخدامتك ومارديت لك طلب ، طلبه وانا ماعمري رديتك
رَده:ولدك ردي ويستاهل الردى
حليمه:يعتذر ويقعد تحت عينك هنا واللي تبيه يسويه لك
رَده:قلتيها لي يوم كان هالطول يوم حرق المستودع اول مره وقلت طيب عشان راسك يا ام بهاج وهذا هو قدامك الحين اطول مني وعاصي فضّل عيشة المدن عن عيشة وخير جده طمع بنص ريال يحسب انه لوحده
حليمه:عشاني هالمره
رَده:اطلعي منها مانبي راي الحريم
لف بهاج عليه وناظره رَده:طلق
لفت نورا لأنهار تشدها من كتوفها بخوف وتمسكت أنهار بثوب بهاج وهي تبكي
ونزل راسه بهاج ونطق سلطان يرده:بهاج !
مارد عليه وبلع ريقه بهاج يناظر الارض وين يودي ذكرياته صوت بكاها خلفه كيف ينطقها ويكسر ما تعب يبنيه معها كل شي تكرر عليه بدقايق صمت من اول ماشافها ومن اول طلب طلبته من اول ما عرف انها بقلبه من اول ما تحداهم واخذها من اول شعور وطول المحارب معها ولأجلها للحين
بكت يكويها الصمت وظهره اللي قدامها ما توقعت انه بيطلب طلب أقوى من سجنها من انعدان حريتها ظنت ان اقسى شي هو حدود السجون لكن الحين تعيش موتها
وهمس رده:التفت التفت لها وطلق
قعد رَده ولفت شموخ لبنات عمها ورجعت تناظرهم وهي عاقده حجاجها
كان الكل ساكت ولا تجرأ احد يوقف شي كان يدري بهاج لو ان ابوه حيّ ما خلاه لكنه يتيم وتجبر عليه من قدر
مرّ على باله صورة ابوه اللي مالحق يعيش معه عمره كله كان يعرف ابوه ويعرف ان سعود كان ما يرضى الظلم وعادل ومجتهد وكلمته مسموعه ، سعود يقول ويطول سعود رجال الافعال ، كان يتمنى لو كان موجود ابوه الحين ماكان قدر احد يتجرأ عليه ولو كان من يكون
تقدمت نورا لعمر من جديد تجلس قدامه وهمست:تكفى اخر مره اترجاك تكفى
رفع عيونه عمر لها ولارد وتكلم رَده:ما بيردني احد من جُمعه امهم لعيالي لحريمهم لاصغر ورع بينكم محد يغير كلامي
لف بهاج لسلطان وناظره سلطان يردّه وسكت بهاج وهو يناظر سلطان هو بهاللحظه عرف ان محد قدّ الشيبه عياله سكوت والكل ساكت ما تجرأ احد الا سلطان وهذا هو بيخسر اهله
نورا لفت لبهاج من التفت وجمد وجهها تناظرهم وهي متمسكه بكفوف عمر اللي تترجاه
رفعت عيونها لعيونه وهي تبكي وتمسكت بثوبه من قدام وهزت راسها بالنفي ماكانت تقوى الكلام من صوت بكاها
ظل يناظر وجهها بكاها وتشكل قدام عيونه شكلها وسعادتها اللي قضتها معه اللي دفع ثمنها الحين وكأنها أثقل اخطائه وسيئاته
رَده:ابطيت وانا جدك
لف سلطان يناظر رَده اللي يشرب من فنجانه وناظر ابوه وعمه السكوت وشد على قبضة يده
ناظر نورا اللي تناظرهم بخوف وجمود ولفت تناظر سلطان وعض شفته من شافها تناظره
ماكان بيده يغير شي لين سمع بهاج ينطق ورفع راسه بصدمه
بهاج:إنتي طالق