اركض بشكل سريع ونفسي يقل اكثر واكثر واني مستمرة اركض والخوف مسيطر على رجلي اكثر من عقلي..والظلام الأسود بعدة يلاحكني
كلما التفت الكا يقترب مني واحسة يريد يحاوطني واني كل ما بية اختنك اكثر...
لحد ما وصلت لحافة الجبل الي اني بي، اباوع ع ارتفاعة عالي بشكل مو طبيعي ويخوف والتفتت وراي اشوف الظلام ديقترب..
نفسي بدة ينقطع لحد ما استسلمت رجلي وكعت من أعلى الجبل..
كعدت مفزوعة ومختنكة حيل نفسي كوة آخذه وكلبي مامرتاح هاذ الاحساس اتعودت عليه بس يبقى يأذيني .. يارب شوكت اخلص من هلكوابيس؟! دخل ضوة الشمس بعيوني من الشباك الغرفة...
سمعت صوت خالة ام اسعد يم غرفتي..
_جلمود يمة كعدتي لو بعدج؟
جاوبتها بصوت يبين اني بخير:
_ايي خالة كعدت
راحت بعد ماأتاكدت واني اخذت نفس احاول اهدئ نفسي حتى يبدي يومي بشكل ايجابي..
شفت الساعة بلستة وخمسة راحت علية صلاة الصبح رحت غسلت واتوضيت وصليت
كملت ورحت سويت عناية يومية لبشرتي وبدلت ملابس للمدرسة؛ فتحت جهازي اخابر على أماني صديقتي ماكو متشيلة اكيد غاطة بلنوم هسة..
مشطت وشلت شعري وشديته بلسكارف وخلصت اخذت جنطتي ونزلت جوة، شفت خالة ام أسعد بلمطبخ
_صباح الخير خالة شلونج؟
_هلا يمة صباحج خير وعافية الحمدلله
_دومج انشالله، اليوم جاية من وكت؟
_اي والله خطية ابوج كال اليوم عندة شغل مهم وكالي اجي من وكت علمودج
_ميخالف حروح اني لمدرسة انتي هم خطية ارتاحي شوية
_يمة اني كبرتج بأيدي ترديني اتعاجز منج بنتي انتي
_فدوة لكلبج خالة يلا اني اروح اشوف أماني هاي اكيد ماخذتها نومة
_وين يمة خل احطلج ريوك تبقين هيج!
_ يووو خالة تعرفين شنو علاقتي بالريوك بهيج وقت ، يلا اني اروح مع السلامة
_يحفظج الرحمن بنيتي.
طلعت من بيتنا واتوجهت لبيت اماني الي يبعد على بيتنا كم بيت ، وجان اشوف هاذ لعكرة طلع من بيتهم رايح يشغل سيارتة.. بس شافني أتوجه عليه
محمد: صباح الخير جلمود
جلمود: صباح لنور
ماانطيته مجال وكملت طريقي حتى بدون مااباوعلة شكد غثيث، دكيت الباب والجرس كم مرة يلا طلعلي رحمن اخو أماني الي اصغر منها
_يمعودة دنطي مجال نفتح الباب
_اني شايفة الي ينطي مجال دقيقة دقيقتين مو ساعتين
_يبوو اشتغل لسان جلمود وتعال شيطفي ونبي حتى هاي الي تذيع الاخبار هسة ابوية الي يسمعها مو مثل ازعاجج
_دوخر عني خل اشوف هاي لمصخمة اختك
_ذبيت عليها طاستين مي وماكو دكول مفعلة وضع عدم الاحساس
طبيت جوة شفت ام أماني بلمطبخ
_يمة همزين اجيتي بس انتي دواها لهاي الي داخلة بغيبوبة
_ههه خالة يعني هاي اماني متعلمتي شنو دواها
صعدت لغرفتها لكيتها مخبوصة وتجي وتروح منا وكفشتها وهية ومسوية الغرفة بسطية مال ملابس بالة
_يعني انتي بلا تبقين هيج صارت امنيتي انتي تكعدين قبلي حتى لو بلغلط
_ اوف جلمود مو وكتج هسة شوفي بيش لساعة هسة يجي عمار ويخبصنة
_لا ميكول شي يلا بسرعة بسرعة خفي ايدج اني حنزل انتظرج بلباب
طلعت بلباب اخذت جهازي من جطتني حتى اتصل على بابا..
جلمود: صباح الخير حبيبي
احمد: يا هلا بهلصوت الحلو صباح الخير يروحي شلونج؟
جلمود: والله يعني زينة بس ضجت لان لصبح مشفتك ليش هيج طلعت من وكت بدون مااشوفك؟
احمد : بابا بعد تعرفين شغلي؛ انشالله العصر او بليل من اخلص اجي واجيبلج الي تحبي
جلمود: هههه تعرف تقشمر علية بااشياء الي احبها بسيطة ياأحمد صباح
احمد: يربي شلون بلسانها..
يلا حبيبتي اني اروح وانتي دير بالج على نفسج مااوصيج تمام؟
جلمود: تمام، وانت هم
_الله وياج
_هاي جلمود؟!
_احمد: اي احسها مختنكة بس مثل عادتها تبقى تكتم بداخلها
_وراح تبقى هيج مراح تتغير الا بمغير..
_احمد: اووف منها، المهم لازم نتحركك بشكل اسرع هاذ الحيوان اذا حاول يتقرب منها يمكن انسى الي سوينا هاي السنين واطلع بروحه
_ميخالف سيدي كلة حيمشي مثل مخططنة انت بعد عفتها على الجبل
_هوة هاذ الي مطمني
"جلمود"
سديتة منة والتفتت شفت هاذ لغثة محمد كاعد بسيارتة ويباوعلي بلا هاذ الواحد شيحجي ويا؟ مدري عليمن هاي لثولة حتموت عليه!
اجة عمار الخط مالتنا رحت اشوف هاي النايمة هستوني طبيت شفتها تركض
_اجييت اجييت
_ ديلا الحمدلله متقصرين والله
صعدنا وصبحنا على عمار واني بعدني شي بداخلي خانكني واحس بهاذا الشعور الي دائما يصير وياية بس عبالك اول مرة يصير شكد مااحاول اتعود مااكدر.. باوعت على اماني الصافنة على الطريق والنوم مبين على وجها حجيت وياها بحس ناصي:
_جلمود:بعدج تسهرين علمود هذاك الغثة؟
اخذت نفس قوي وزفرت
أماني:مني لو اعرف ليش هيج كلبي يحبة وعقلي مامتقبلة؟
_جلمود:وهاي الحرب الي بين عقلج وكلبج شوكت تنهيها؟
_اماني:جلمود تعبت لا من اني اصدك كلبي اني احبة حب حقيقي ومو هوس ... ولا من اني امشي ورا عقلي وادوس على كلبي !
_جلمود:هسة الي يسمعج يكول هوة يعرف بيج حتموتين عليه!
_اماني:اني مااموت علموده بس كلبي الي يريده شسوي حب لطفولة صعب تخلينة ينسي بسهولة
_جلمود:ايي اماني وشلون احنا نبقى هيج شوكت الله يفرجها وتنسي وتعرفين هلاانسان مو صالح الج؟
_أماني:وانتي ليش هلكد متأكدة هوة مو صالح الية؟
اجيت اجاوبها وااجانة صوت عمار:
_عمار:ها ها اشو بسبسة من الصباحيات اذا اكو أسرار احجوا سركم بكهوة ترة
ابتسمت على كلامة طبعا عمار شكد خلوق وانسان مؤدب ومعتبرنة خواتة خطية اختة معوقة من الولادة وتقريبا يجي عمرها بعمرنا ودائما يكول تذكروني بااختي واحسة يتحسر من يشوف الطالبات الي بعمرنا ويشوفنا يتمنى لو اختة هم تصير حالها من حالنا وتدرس.
جاوبتة_لا أسرار ولا هم يحزنون بس هاي المسعدة هسة كاعدة ومنريد نوجعلها راسها ونحجي بصوت عالي
_عمار: لج أماني شوكت بلا تضبطين نومتج؟ مو الامتحانات قربت شلون بيج
_أماني: يمعودين دعوفوني هوة اني بدون لسهر شسوة..؟
_جلمود:اي صح اماني بدون سهر مترهم
كامت تتثاوب بنعس هزيت ايدي عليها...
ولو اني هم لو يدرون انام بليوم كم ساعة جان انصدموا بس الحمدلله أكدر أبين اني نايمة ومرتاحة ومابية شي بس اماني تعرفني بدون مااحجي وبلمدرسة دائما تسأل شبيج وشبيج آلى ان جزعت وبعد كامت متسأل بس تبقى علامات القلق بوجها واضحة
بلمدرسة نفس الروتين العادي وهليام دنراجع حتى نتحضر للامتحانات نصف السنة وهوة الي يحدد دخول البكلوريا بديت اقرا للسادس من عطلة الصيفية مال لخامس واني اقرا دخلت اكثر من معهد وطبعا كوة قبل بابا لان كل معهد بمنطقة شكل وهوة خوفة كلش زايد عليه؛
وراد يجيبلي كم مدرسة للبيت أدرس خصوصي بس اني ردت بلمعاهد الي سمعت عنها ويا صديقاتي هم كلش مدحوا بيهن المهم عندي اخلص رحلة السادس بسلام واجيب معدل الي يرفع راس بابا..
جنت صافنة على الساحة وحجت أماني..
_أماني: جلمودتي
ضيكت عيوني عليها..
_جلمود: وراج شي انتي احجي
_أماني: تعاليلي اليوم بربج والله ضوجة ومكضيها بس قراية قراية واليوم ماكو محاضرات ماكو حجة
_جلمود: بلا شسوي جايتج يعني مكابلتج بلمدرسة والبيت هم؟!
_أماني: اني بالنسبة الية عندي استعداد اكابلج لحد متملين مني واكيد مراح تملين
_جلمود: باع الغرور؛ بس يلا عود افكر اذا ماعندي شي
_أماني: يوووه والله احرك الفون عليج وها هم رحمن ميقصر
_جلمود: هوة اني شمطيح حظي غيركم؟
_أماني: والله هوة أخوية الأعوج يحبج اكثر مني شنسوي
_جلمود: حبيبي رحمن بس لو يبطل يحشش حتى ابطل اقصفة ويتفشل
_أماني: هههههه خرب يومكم تموتوني من تنجمعون سوة
_جلمود: ديلا خل نكوم شيخلص هلدرس ونروح للبيت؟!
خلص الدوام ورجعت شفت خالة ام أسعد خطية منظفة البيت ومسوية غدة وكاعدة تسبح بلسبحة مالتها
_السلام عليكم
_هلا يمة وعليكم السلام شلونه الدوام اليوم؟!
_والله يخالة نفس التعب شنسوي كلة يخلص ماكو شي يبقى على حالة
_اخخ يمة لو كلها تصير مثل صبرج تعالي شوفي الي عندي بعدهن مشايفات الاعدادية ويدكن ويلطمن ولا فد يوم شفتهن متفائلاات وقويات مثلج
ابتسمت ع كلامها ومشيت..
_ يلا خل اصعد ابدل
_عود نزلي يمة حتى اصبلج مو تكولين مااشتهى ترة اتزاعل وياج!
_والله جنت مقررة اكلج انتظر بابا بس مااكدر ازعلج يلا هسة ابدل وارتاح وانزل ...
رحت حتى اسبح وأصلي ارتاحيت شوية وكفت امشط شعري واباوع على نفسي وعلى ملامحي..
_شوكت ينتهي الكابوس الي اشوفة دائما؟!!
_اذا تنسين اكو ظلام بحياتج اكيد حتبطلين تشوفي
_زين شوكت انسى؟؟
_من يتحول هاذ الظلام إلى نور
_ وشوكت يتحول؟!
_مو هوة الي راح يتحول انتي الي لازم تحولينة
وانتي مو تكولين ماكو شي يبقى على حالة وتثقين بربج؟ هاهية امشي ورا هاذ المبدأ وكلشي يبقى من الذكريات؛ وهاذ يعتمد عليج اذا جانت ذكريات زينة او العكس ..
تنهدت ماخذة نفس قوي خلص جلمود يجي يوم وتنتهي هاي لكوابيس...
سمعت صوت خالة ام أسعد خطية نسيتها اكيد صبتلي غدة هسة
نزلت اتغديت واستأذنت منها وصعدت انام على الأقل نومة الظهر اشوفها متأذيني مثل نومة الليل!
للعصر وكعدت على صوت الاشعارات مال جهاز عرفتها هاي أماني
شفتها دازة ٢٥ رسالة ومكالمات كومة.. اووف منج من تعاند محد يكدرلها؛ كعدت واتصلت عليها بسرعة اجاني صوتها:
_لا حبيبي شعندك كاعد وعايف هاي لمصخمة ضايجة وحدها ؟
ضحكت على خبالها
_ولج انطي صبر خل احجي شبيج
والله نمت ومحسيت هسة يلا سمعت الاشعارات وخابرتج
_واني اكول هاي اختي متغدر بية وبس تصير العصرية بسرعة تجيني بس مو صوجج صوجي اني حتى كتاب مفتحت ومنتظرتج
_خوب ترديها حجة حتى متقرين وليش مقريتي ولج؟؟
باوعت على الساعة ب٧ ونص الليل رجعت كتلها
_عزا لج هاي هسة ليل واني عبالي عصر
_بعد وكت حبيبي ارجعي نامي هسة تجين لو لا ؟
_اوكفي خل اشوف بابا بلكت اجة مشتاقتلة وشعندي هسة اجيج
_يلا نشوف باي
_باي
تعجبت شعجب خالة ماكعدتني ومالها صوت اكيد متروح وبابا ماموجود رحت غسلت واتوضيت وصليت بسرعة ونزلت حتى اشوف بلكت بابا اجة..
لكيتة كاعد بالصالة على اللابتوب مالتة رحتلة ركض شبكتة وبست خدة وراسة
جلمود: حبيبي مشتاقتلك شلونك؟!
احمد: يعمر ابوج انتي وروحة الحمدلله شلونج انتي اليوم حسيت صوتج من خابرتيني مختنك احجيلي بابا شبيج؟
تنهدت محاولة ماابينلة مدري ليش ماأحب احجي بهاذ لموضوع حتى لاقرب الناس الي كتلة:
_ لا حمودي يتهيألك هياتني كلشي مابية
_ههه ولج حمودي شنو شوكت تكبرين؟
_شكد مااكبر ابقى بحضنك اصغر طفلة
ابتسم وهوة يباوع بعيوني وكال:
_بهاي صدكتي؛ اي كوليلي شلونها المراجعة دتقرين زين؟!
_افا عليك تشك بوعدي الك؟
_لااكيد اثق بيج اكثر من عيوني بس مااكدر اذا مااطمأن عليج
بست خدة وحطيت راسي على جتفة وكتلة
_ الله يحفظك الية يارب..
ايي حمودي تعال كولنا اشو صاير تطلع من الصباحيات واحنا مندري؟؟
اخذ نفس وسد اللابتوب وكال
_والله يبنيتي صار اجتماع مهم ومستعجل وماانطاني كلبي اكعدج خابرت على ام اسعد تجي من وكت وخطية هي هم متقصر ومكالت لا؛ ومن اجيت هم لكيتج نايمة عفتج ترتاحين ماطول ماعندج محاضرات ليوم
_ايي صدكك ذكرتني حروح هسة يم اماني شوية؛ خبصتني لان ماعدنا محاضرات تريدني أسير يمها
_اي بابا روحي شوية غيري جو ومو تتأخرين حدج لل١٠
_صار حبيبي يلا اروح ابدل
رحت لبست تراك مال طلعة اسود وشديت شعري شون مجان وحطيت مرطب شفايف لان مالي خلك احط شي واخذت جهازي وطلعت؛
واول مدكيت لباب طلعتلي
_بسم الله منتظرتني بلباب لو شنو ؟
_لا جنت منتظرة غير وحدة لان أيست منج
باوعتلها بنظرة عدم تصديق
_ليش من شوكت صار عندج صديقة غيري بلا ؟
_هه اني ؟اصلا المدرسة كلها تريد تصادقني بس يخافون من لسانج لا يطلع
_احسن
دخلنا جوة وسلمت ع ام اماني وابوها كلش حبابين واني اصلا من فتحت عيوني على الدنيا اعرفهم وكبرت ويا اماني
بيتهم دائما يذكرني من جنى نلعب بالحوش مالتهم والشارع جان عبالك مالتنا بس احنا بي ونضل نفتر وكومة مغامرات عندي بهاي لمنطقة وخصوصا ويا اماني
صعدنا بغرفتها هية واخوها..
جان رحمن يلعب بالألعاب الإلكترونية مالتة ومندمج حبيت أخبث علية شوية؛
وكفت كبال الشاشة وكتلة...شلونك رحومي؟
رحمن: بربج جلمود وخري حخسر باللعبة
جلمود: شنو ماأسمعك؟ نصي صوت الجهاز
رحمن: لججج جلمود حخسررر وخخررري
جلمود: يمعود علي صوتكك شوي
رحمن: خرب بيج خسرتيني تعالي ونبي اليوم اموتج
كمت اركض وهوة وراية ولازم الواير مال اللعبة ويركض هوة كرشة واني ميتة ضحك عليه
وهاي اماني تهوس ع الجرباية وتصيح السبع يطلع دم
_لكك رحمن اني مو اختك على اساس ونبي مااعيدها ولي ولي مااريد أذيك
_تعالي تعالي واني اشوفج الأخوة شلون تصير ونوب تريد تأذيني فوكاها
_لجج أماني حموتج تعالي اخذي اخووج
رحمن بصف الرابع الابتدائي بس لسانة وعقلة عبالك رجال مشورب كلش احبة واحب من اشاقيه ومكضيها اني ويا بس مكافش
وهاي اماني تضل تهوس وتشجع ومن تشوفنة خالة ام اماني تغمها تكلها ماتفاككيهم كاعدة تهوسين
حرفيا من اروح يمهم اتونس ويا رحمن وبعدين نضل نطرد بي حتى نكعد نسولف اني وأماني براحتنا..
اماني: لج صدكك ماكتلج بعد شهر هيج ننقل الأثاث ونعدل بيتنا الجديد هاهية خلصنا
جلمود: ياا صدكك وأخير خطية ابوج شكد تعب بي
اماني.. اي سودة علية صارلة شكد يعدل ويبني بي بس لحمدلله خلص المهم حنكعد بي ورا امتحانات نصف السنة وقبل امتحانات النهائية احنا مكملين وكاعدين حتى التهي ادرس
باوعتلها بضوجة وقهر..
جلمود: اماني يعني صدكك هسة حتنتقلون وتعوفيني؟!!
اماني: لج اني شكد مافرحانة على بيتنا الجديد شكد ماضايجة احنا حنتفارق بلبعد والمنطقة هاي كضيت بيها طفولتي وبيت خالو هم جانو يطبون يطلعون لان بيتهم هم يمنة
جلمود: اي هنا الحجي كولي بيت خالو من البداية
اماني: لا انجبي اكيد اني اكثر شي ضايجة عليج لج بالعطلة ميمر يوم اذا منتشاوف هسة شلون حنكعد بمنطقة جديدة وغريبة بدون سوالفنة وطلعاتنة؟!
شفتها شوية وتبجي ادري بيها حساسة وشكد مااحفزها على القوة تبقى حساسة وتتأثر بكلشي
رغم الي يشوفها لسانها شطولة ومبينة مسيطرة وقوية؛ بس هية رقيقة وحساسة بشكل
حاولت اغيرلها لموضوع حتى لاتضوج اكثر؛
_ايي يمعودة قابل رح اكطع بيكم اني شمدريج بالعطلة مابقى يمكم فترة من بابا يسافر؟
_كولي والله جلمود؟؟
_والله ،يايوم اني مجذبة عليج؟
_ياايي ايي واني هم اخلي بابا يجبني بين فترة وفترة اني ورحمن
_اي شوفي مستحيل وحدة تخلص من الثانية انسيها هاي
_حتة بالشقة مااكدر اكول اريد اخلص منج لج انتي احلا نعمة الله عرفني عليها بعد ماشفتج تعوضت عن الأخوات والصديقات كلهن
لان انتي صرتيلي كل هذني واكتفيت بيج حتى صرت مااقتنع اصادق اي وحدة غيرج..
اجتي حضنتني بقوة واني بادلتها الحضن وبست خدها
_حياتي انتي شعندي غيرج اختي انتي؛ اي تعالي كوليلي شلون شكل غرفتج الجديدة؟
وخرت عني ومسحت عيونها المدمعة وابتسمت بتصنع
_حلوة بعدني مشايفتها بس بابا يكول اختاريتلج الي بيها بلكونة لان اني من زمان ألح علية يصير عندي بلكونة وحديقة بيها مرجوحة
_هلاا سمعت مرجوحة اني؟
_ايي علمودج حتة نكعد سوة اني وياج من تجين ادري بيج تموتين على المراجيح
_من زمان ؛تذكرين من جنة نتعارك علمودهن واني اكلج معلية اني اكعد قبلج وانتي تسوين روحج مريضة حتى تكعدين قبلي واني متمشي علية سوالفج فجنت اخليج تكعدين حتى اوكعج واكلج علمود بعد متجذبين علية
_هههههههه خرب يومج من زمان جنتي فطنة ولا فد يوم جذبت عليج وصدكتيني بسرعة
_الجذب اكثر شي اكرهه بهل دنيا؛ المهم ايي وبعد سولفيلي شراح تسوين بغرفتج لجديدة..؟
_اي صدكك؛ باعي كلت لبابا يصبغها الي ابيض وبنفسجي ماما كالت خلي من نكعد نصبغها بس عمج مقابل يكللها اريد من نكعد بلبيت كلة مخلص احنا تعبانين تعبانين
_والله يفتهم الصراحة؛ يعني الشغلة سويها مرة وحدة مو تماطل بيها لحد ماتتعب وتخلص كوة
_ايي فشنو رح نشتري جرابي جدد اني مردتت واحد جبير اريد حجمة متوسط حتة الغرفة اخذ راحتي بيها واشتري ميز تواليت وهواي اشياء بس خالتج كالت خل نكعد وهية الأغراض والأثاث تجي واني هم مو مستعجلة المهم صار عندي غرفة وحدي بدون رحمن المزعج
_ههه الحمدالله علمود من اجيج منضل نطرد بي
_خيولي والله يالله عود اختة الجبيرة غصبا ما على خشمة يسمع كلامي
_خليني ساكتة يحطج جوة ايديه ع كولة امج
_اهووو هسة ليش تطيرين الهيبة؟!
المهم باعي اول صورة حعلكها بغرفتي هية صورتنا من جنة بالابتدائية يااييي متحمسة وحيصير عندي مكتبة اترسها ترس كتب ترس
ابتسمت على حماس أماني شكد افرح من اشوفها هيج فرحانة ومتحمسة ضلينا فترة نسولف ونتذكر أيامنا القديمة وطفولتنا لحد مصارت الساعة ب١٠ رجعت لكيتة بابا على نفس حطتة كاعد ويشتغل بالابتوب اجيت كعدت يمة
جلمود: صدكك تحجي بابا؟ يعني بعدك على كعدتك صارلك كم ساعة وانت تشتغل ارحم نفسك شوي
احمد: بابا غير شغل هاذ شسوي قابل بكيفي؟
جلمود: اووف شوكت تتقاعد ونرتاح حتى من ورا شغلك تخاف يصير علية شي مو زين حتى طلعة متخليني دائما اطلع وحدي
مسح ع شعري وابتسم
_بابا خوفي عليج مو بس بسبب ظروف شغلي اني اخاف عليج من الهوا الطاير لج انتي عمري كلة لأن عمري ميسوة من دونج؛ والي يأذي رمش من عيونج اكسر ايدة قبل لايفكر بيج وانتي تعرفين كلش زين اني شنو معلمج وشنطيتج وشلون قويتج لحد هاذ اليوم حتى تواجهين الدنيا وحدج اذا صار بية شي بيوم..
_ بابا لاتكول هيج اسم الله شتحجي انت؛ مو تعرفني اكره هاي لسوالف؟
_بنتي هاي سنة الحياة محد متوقع شوكت يومه وانتي تعرفين اني اخذ احتياط لكلشي واعرف عد منو أمنج وادري شكد انتي كدها واثق بيج ثقة عمياء
_بابا هسة هاذ وقتة الكلام؟
وانت مو تعبان واجيت حتى مانمت واذا شغلك مهم صحتك أهم لاتخليني اروح اهدم المركز كلة واخلي الناس كلها تكول بنت المقدم جلمود احمد صباح هدمت الدنيا على راسنا من ورا ابوها
ضحك بصوت عالي وكال:
_ خرب بيومج ضحكتيني ولج انتي داهية منو يكدرلج يبنت المقدم؟
_ اي عيني لعد شنو بنت المقدم مو بعينك
_لا بعيني ونص هم؛ هسة اني مشتهي السلطة الي تسويها الي من ايدج هاي الحلوة
باوعلي بنظرتة الي متروسة حب الي وباس ايدي بحنية ورجع كال:
_يلا يلا اني جوعان وأريد من ايدج سلطة طيبة
_مو يدلل علينة حمودي
_ههههههههه يربي شلون بهل بنية
رحت طلعت اللهانة والكرفس والخيار والتونة والزيتون وسويتلها صوص وحطيتها بصحن حلو وديتها اله
_ هاي الايد الحلوة شتسوي يطلع طيب وشكلة احلا
_ بلعافية حبيبي
_يلا بابا لاتبقين كاعدة وراج دوام اذا أكدر لصبح اني اوديج
_اي انشالله بست خدة يلا تصبح على خير
..تلاكين الخير بنيتي.
صعدت فوك لبست بجامة نوم مريحة ورحت حتى افرش اسناني واسوي روتيني اليلي مال بشرة ..
طبعا كلش اهتم لبشرتي خصوصا لان نوع بشرتي حساسة وبسرعة تتأثر...
اجيت حتى اشوف الفون مالكيتة بالغرفة نزلت حتى اجيبة؛
سمعت بابا ديحجي بالتلفون ويا احد ومنصي صوتة بس أكدر اسمعة لان البيت هادئ والصالة مفتوحة
قبل لاادخل سمعتة يكول:
_شتكول انتة والله اذا يفكر يلمس بنتي اموتة؛ يريد يخطفها شنوو؟؟
وكفت لاأراديا والأفكار صارت تجيني من كل النواحي..
خطف؟اني انخطف؟؟ ومنو يريد يخطفني؟؟