صادق طلال يكول ؛
عادي تروح بس بكلبي مو عادي.
#جَلمُود الجَبل
"جبل"
"علي مهيب حسن الــ^^"
الملقب بــ جبل
ضابط بالأستخبارات العسكرية برتبة نقيب...
كبرت يتيم الام فتحت عيوني على مرت ابوية واختي الجبيرة "حور" الي هية امي الثانية
ومرت ابوية هم؛ عمري ماحسيتها غير امي من حسن تعاملها وحبها الي..
بس اختي جانت مختلفة عبالك امي الماتت من يوم وفاة والدتي بااثناء ما ولدتني اتوفت وكلولي جان عمر حور ميقل عن العشر سنوات!!
رغم صغر سنها بس جانت تخاف علية مثل عيونها استغنت عن طفولتها لخاطري وكبرت وكبرتني وياها وبحضنها الي مخلاني افتقد حنان الأم
عشت طفولة عادية حالي حال اي طفل وجنت مدلل عند اهلي وكلمتي متصير اثنين لان اول حفيد ابوي جان يحبني اكثر من نفسة حتى
كبرت وصار عمري 15 سنة...
بعد وفاة جدي الشركة مالتة الي يديرها هوة وابوي وعمي جاسر سجل 80% منها لأبوي لان هوة الي تعب عليها اكثر رغم عمي جاسر اكبر من ابوي بس صارت الشركة مو آلة
وجان مبين عليه مو مهتم وعادي عندة صار مدير عادي بالشركة وابوي هوة الأمر الناهي والمسؤل عن كلشي؛
رغم جدي عندة أملاك متنعد بس الشركة هية اكبر شي واسمها معروف حيل وخصوصا من استلمها ابوي انعرفت اكثر وصارت من أفضل شركات الانتاج بالعراق...
بيوم وليلة راح ابوي سفر على حساب شغلة وجنة احنا كاعدين ببيت جدي مجتمعين العائلة كلها
ما نحس غير اجانة خبر انفجرت سيارة ابوية الي راح سفر بيها!!
هاذ الخبر جان صدمة للكل وانهيار عصبي للبعض؛ وراها بكم ساعة اجة خبر وفاتة وحتى جثتة ما لاكين منها شي غير الرماد..
كلش أذاني خبر وفاة ابوي وجنت ما مستوعب وفاتة ولا مستوعب هوة خلص مات وعافنة وصرت اني يتيم الام والاب هم!!
مااعرف شلون مرت ايام الفاتحة مالتة جنت فاصل عنهم اباوع لأمي ولحور شلون فاقدات لو لبيبيتي الي كضتها نايمة بالفراش
ودموع عمي جاسر جنت اشوفة وكل البالي اكول لان هوة مو بس اخو لا جانوا أصدقاء هم علاقتهم كلش قريبة لان فرق العمر مو هواي بيناتهم...
ايام جانت سودة ومظلمة وكئيبة..!!
ابوية الي جنت اشوفة صديق قبل مااشوفة اب بالحظة اختفى من حياتي
يمكن بعمرة ما مد ايدة علية ولا قسة علينا حتى من جان يعاقبني بدون ما يأذيني
بوكتها جان عمر ملك ميتجاوز الــ5 سنين متتذكر شي منة هواي بس جان يحبها كلش ويسميها "ملاكي"
وراها بااسابيع سمعنة بالشركة فلست وخسرت كلشي وبيوم واحد شركة عملاقة تنسد وتفلس وتصير سمعتها على كل لسان...!!
أنت تقرأ
جَلمُود الجَبل
Romanceصوت الطلق بدة يقترب اكثر مكدرت ابقى واكفة ضليت اركض بدون مااعرف وين مثل المتاهى حسيت نفسي ضايعة شلون حخلص نفسي من هلكابوس؟!! اركض بدون حس لحد موصلت لجبل عالي وكفت واني اباوع علية واتذكرت الكوابيس الي اشوفها نفسة الي اشوفة بكوابيسي هم عالي هيج ويخ...
