أنارت عتمة قلبي

المقدمه

#أنارت_عتمة_قلبي🤍

المقدمة

----------------------------------
-----------------------------------------

" هناك رسائل يبعتها الله لك
من أشخاص لايعرفونك ولاتعرفهم حتى ..
وكأنهم أستجابة لدعواتك ..
.
.
.
يريد الله أن يمنّ عليك ويعلمك ..
يريد أن يطمئِن قلبك وبالك ..
ويأكد لك أن همومك مهما كبرت ستمر بإذن الله وكأنها لم تكن 🧡 "
.
.
.
فقط
.
.
.
#أبتسم_ماخلقك_الله_لتعبس😊
.
.
.
.
.
.
سكر اللاب توب ووخر بكرسيه للخلف وهوا يدلك في جبهته بإيديه الإثنين محاوله منه لتخفيف الصداع اللي صابه من كثر العمل والتركيز المستمر لساعات طويله،

تنهد بملل ونزل إيديه لما حس أنه مافيش فايده من اللي يدير فيه،
قام التليفون وطلب قهوه ساده ونزل السماعه وهو يزفر بضيق،

مرر نظره حواليه ووخر بكرسيه وناض وقف
وقدم لواحد من الرواشن اللي كانت مطله على أحدى الطرق الرئيسيه للعاصمة
حط إيديه في جيوب بنطلونه وقعد يشوف بنظرات مشتته وعدم إنتباه للطريق اللي كانت باديه تزدحم مع إقتراب وقت الذروه،

💫💫💫💫💫

وغصبآ عنه ذاكرته رفعاته لنفس تاريخ هاليوم من خمسة سنوات،
ومرت في مخيلته الأحداث اللي صارت فيه بوضوح وكأنها قاعده تصير قدامه حالا،
.
.
.

صار كل شي بلمح البصر
وفي ثواني معدوده أنتهي كل شي،
توتر، خوف، هلع، صدمه، عياط،
دوشة أصوات ناس مختلطه،
صوت سيارات الشرطة والإسعاف أخر شي قدر يسمعه لحظتها،
وأخر شي قاله بتعب وبصوت ياذوبك طالع للي قدمو بيسعفوه " خلوني وأنقذوه هوا ماتقتلونيش مرتين باللهِ عليكم " قبل مايغيب عن الوعي ويمشي في غيبوبه دامت 40 يوم،
.
.
.
كان حاط في باله أنه هاليوم أصعب وأسوء وأتعس يوم في حياته
لكن الأسوء والأمر هو اللي صار بعد هاليوم
واللي كان بمثابة نقطه فارقه في حياته كلها وقلبها قلب،
.
.
.
أول مافتح عيونه بعد ماصارع الموت لفتره مش بسيطه وقدر ينتصر ويرجع للحياه من ثاني،

أبتسم وهو يشوف فيها واقفه جنبه ومعاه في هاللحظه،
ضحكو عيونه وهو فرحان من قلبه بالرغم من كل المشاكل اللي كانت بينهم والأحداث والمواقف السيئه اللي عاشوها قبل الحادث، وكل المشاعر المضطربه اللي فيه من ناحيتها،

وقبل ماينطق بأول حرف من أسمها ويناديها قعد فمه مفتوح ولسانه إنشل وهو يسمع في صوت الحطام الداخلي لكل مافيه،
من قوة اللي سمعه منها
وهيا تحكي مع أختها في التليفون وعلى بالها أنه قاعد في غيبوبته ومش سامعها،

ويا قداش تمنى لحظتها أنه فارق هالحياه ولاسمع اللي سمعه، تمنى أنه مشي وهو عنده فكره حلوه عليها،
مشي وهو قلبه نظيف من ناحيتها،
لأنه مش عارف كيف راح يكرهها أو يزهد فيها طول ماهو عايش وقلبه فيه نبض وهو اللي عشش فيه فكرة حبها بكل قوة حتى بالرغم من كل عيوبها اللي أكتشفها بعد ماأرتبط بيها،
كان مقتنع بقوة أنه مجبور بيها وهلبا مش شويه لأنها إختياره اللي كان بكامل رغبته بغض النظر عن كل شي بدر منها ناحيته
هيا اللي عارض عليها أهلها وماهماش رأيهم فيها وتحدى كل شي ووفي بوعده معاها وياريتها غير تستاهل💔
.
.
.
وزادت عليه بعدها الفاجعه اللي تلقاها في تؤامه، صدمتين في وقت واحد كانو كافيات بأنهم يخلوه ينهار إنهيار كامل ويكره كل شي في هالحياة
.
.
.
دوامه خشلها بكابوس مؤلم وبشع وطلع منها بكابوس أمر وأكثر بشاعه وأكبر ألم،
.
.
.
.
.

💫💫💫💫

الأحداث اللي صارت والكلام اللي سمعه كان أكبر من حجم إداركه، فقدانه لأعز الناس على قلبه وصدمته فيه وفيها عقله بكل قواه وخلاياه وكبره ووعيه قاعد ماقدرش يستوعبهم،
ولا قادر يقبل اللي صار ويقتنع بيه ويصدقه لحد الأن،

حتى بعد مرور هالسنوات والتغيير اللي طري على حياته للحظه هذه قاعد في داخله شك من أنه ممكن يكون حلم أو كابوس مزعج ويفيق منه في أي وقت،

سكر عيونه وهو ضاغط عليهم بقوة لما حس روحه أنه على حافة الإنهيار وقريب هلبا من السقوط وفقدان القوة اللي قاعد متصنعها بسبب هالذكريات المأسويه اللي عاشها،
.
.
.
شد رأسه بإيديه الإثنين وهو يحاول يطلع من هالذكرى اللي مافارقتش خياله ولا لحظه،

يهز في رأسه يحاول ينفض منه كل شي يتعلق بيهم،
وهو قاعد في حالة اللاواعي اللي كانت واخذاته لعالم ثاني ماقدرش ينتبه لطقة الباب ولا لخشة الموظف اللي جابله القهوه وحطها على المكتب وقعد واقف يشوفله بإستغراب،

الموظف ماكانش مستني منه الشكر أو الثناء لأنهم متعودوش منه على هالأشياء طول سنوات خدمتهم عنده، كان في نظرهم المدير الجاحد والمستبد والمغرور،
بس اللي خلاه يوقف في مكانه وعلامات التوتر والإرتباك طاغيه عليه هو إستغربه من شروده وخوفه من أنه يطلع من غير مايعطيه إذن لهالشي

الموظف بتوتر: تأمر على شي ثاني ياباش مهندس
.......، انتبه من سرحانه وتلفت للموظف بإستغراب، ويقول في نفسه' معقوله كنت شارد وماأستاقظت لدخوله'، هز رأسه بثبات وأشرله بإيده بعدم إهتمام أنه يطلع ورجع لف جهة الروشن،

على صوت تسكيرة الباب من إيد الموظف اللي تنهد براحه طالعه من القلب لما طلع
رن تليفونه،
تلفت وزفر بضيق
قدم وخذه من على المكتب ولما شاف المتصل فتح الخط وهو يقول بغضب مصطنع: مافيش حد قالك من قبل أنك واحد عش ونفاخ
عماد ضحك😁: لا وحياتك أنت أول واحد تقولها، بس مقبوله منك ياولد الخاله، أني وراك وراك لين توافق
........: أسمعني ياعماد بدخلني في مواضيع وقصص مش ليا، بتورطني في حاجات دماغي في غنى عنها، فكني من هالجو مايمش.... وقبل مايكمل كلامه سكت وتنهد لما قص عليه عماد وهو مش عاطيه مجال نهائي للرفض

عماد، برجاء: ورحمة الغاليه فكنا من الجو اللي إدير فيه، هو هالطلب اللي قصدناك فيه، أشي هالحاجه الكبيره اللي بنورطك فيها كلها محاضره واحده في الإسبوع ساعتين أو ثلاثه ناقصات، ماكنتش متوقعك إتردني هكي وتحشمني بعد ماعطيت علم لعميد الكليه ونزلت إسمك في جدول القسم وعممت الخبر في المجموعه اللي بتعطيهم الماده
........، خبط على المكتب بقبضة إيده بغضب😠: ومني اللي قالك تتصرف من رأسك أني ماوفقتش على إقتراحك قتلك أعطيني وقت نفكر
عماد، بنرفزه: وتفكيرك هذا قداش يأخذ باش تعطيني رد، تي ليا إسبوعين مكلمك على الموضوع راحو محاضرتين من السمستر هذا، عالعموم خلاص خلاص فوت الموضوع، مقبوله منك تصغرني وطلعني ماعنديش كلمه بعد مافتحت فمي ياريته إنقص وقتها مانحسابكش بتخذلني الزفت
....... زفر بضيق: عيل وبتقعد طول عمرك عيل
راك تكبر وتبطل هالحركات، تنهد وقال بإستسلام: أي يوم المحاضره هيا!!
عماد، بفرحه😍: قصدك وافقت خلاص!! يوم الإربعاء من 1 إلي 4، بعد ماتكمل عملك من الشركه باش مانأخروكش على شي، عالعموم أني بعتلك التفاصيل والشيت متاع المنهج على الماسنجر شوفهم، خلاص معناها أني خلي نمشي نخبر العميد بموافقتك وإنزل إسمك في جدول القسم، نتلاقو موعدنا الإربعاء بإذن الله سلامات،
عماد قال كلامه كله دفعه واحده وسكر عليه بسرعه من غير مايعطيه مجال يتكلم خوفا من أنه يغير رأيه

...... نزل التليفون وشاف للمكالمه اللي إنتهت وهز رأسه بقلة حيله، ' قدر يضحك عليا هالمحتال توا طلع لا خبر العميد ولا نزل جدول ولاشي، هذا حاله لما يبي حاجه مايعطيكش فرصه تتكلم يحطك قدام الأمر الواقع ويسكر عليك'،

حط التليفون وقعمز على الكرسي وقرب فنجان القهوه منه وفتح اللاب من جديد بعد مارشف من الفنجان وحطه لوطه، فتح الماسنجر وشاف الوارد لقاه باعتله الموعد ومكان القاعه وعدد الطلاب والمنهج اللي المفروض يعطيه ومعلومات عامه موجوده في الصفحه الرئيسيه للقسم اللي عماد ولد خالته وراجل أخته مسؤول عليه،

بعد ما أطلع بنظره سريعه على كل شي يخص الشي المفروض أنه يأديه..
طلع من الصفحه وقعد يتصفح في الفيس بشكل عام لحد ماقابله منشور من إحدى الشركات الهندسية اللي تعتبر منافسه ليه في هالمجال
شركة جديده
عندها كفاءات وخبرات عالميه
وحققت نجاح باهر في أقصر وقت
وقدرت تكون لنفسها مكانه ممتازه في السوق
بس زادت من حجم الثقل عليه
وضيقت عليه الخناق في مجال عمله
زاد تعكر جوه وضاقت بيه وهو مش عارف إذا راح يقدر يحافظ على هالنجاح والتفوق اللي وصله بشركته أو راح ينسلب منه

قام إيده وكان ناوي يسكر اللاب بس لفت إنتباهه المنشور اللي بعد منشور الشركه واللي كان لصفحه عامه

" 💙لا تعبس فقط إبتسم😊💙 "
.
.

نزل إيده تلقائيا وحط على المنشور اللي كان
.
.

" ‏كلَّما كنتَ راضياً عن نفسك، كلَّما زادَ رضى النَّاس عنك، اختصرِ الموضوع وكُن كمَا أنت ❤️ "

#وأبتسم_ماخلقك_الله_لتعبس😊

عجبه الكلام اللي حس بيه وكأنه عطاه باور كبير
وزاد من ثقته في نفسه وفي كفائته اللي قدر يحقق نجاحه ويبني بيها مستقبل باهر في وقت قصير جدا
وهالكلام اللي قراه ولد داخله فضول قوي أنه يخش على الصفحه ويطلع بشكل أوسع على المنشورات،

وماترددش ولا فكر بالعكس نفذه طول وأستسلم لفضوله القوي إتجاه هالصفحه ومحتواها

واللي كان مكتوب في السيره الذاتيه ليها....

" خُلِقتُ إِنْسانَه بِرُوحٍ مرِحَه وقلبً لا يُؤذِي أَحد، أَطِيرُ كَالفَراشَةٍ وأُحاولُ أَنْ أَنْشُر السَّعادةٌ بين ثنايا الوجُوهِ العَابِسَه🦋🧡 "

بانت على وجهه شبه إبتسامه خفيفه بس بسرعه مانفضها ورجع للجمود اللي مسيطر أغلب الوقت على ملامحه،
كمل إستكشاف في الصفحه نزل شويه وقابله منشور مثبت كان مكتوب بصيغة المخاطبه

" أنت🤚!!
أنت اللي خاش صفحتي🤝 !!
أنت إيه🤷‍♀️ !!
ماتشوفش حواليك ولاتشوف لروحك شوفلي أني 🙋‍♀️🥺!! "

هز رأسه وأبتسم على الكلام لما شاف أنه فعلا قعد يشوف حواليه ويشوف لنفسه لما حس وكأنه في حد يخاطب فيه فعليا، رجع بنظره لشاشة اللاب وكمل يقرأ

" أنت اللي فايت من إهنايا خوذ مني هالكلمتين لوجه الله👌
- لاتزعل ولاتكدر خاطرك راهو الدنيا واللي فيها كله فاني ومافيش حاجه تستاهل، مادامه قلبك ساكنه رضا الله معناها أنت في أحسن حال؛ ف أطمئن💙

- ماتيأسش لو واجهك مطب من مطبات الحياه، إذكر إنك أنت مش بروحك ربك اللي خلقك وصورك وسواك في أحسن صوره، رحمته ماتكملش وقادر على فك كربتك وتسهيل صعبك وتغير حالك لأفضل حال، مافيش شي قادر على أنه يضرك أو يكسرك مادام الله معك؛ ف أطمئن💙
.
.
وأخيرا
.
.
خليك دائما على يقين: أن فيه شيء قاعد ينتظرك بعد الصبر ليُبهرك ويُنسيك مرارة الألم ،هذا مش كلامي راهو!! هذا وعد ربي
"وبشر الصابرين💖 "
وتوا لو أنت منهم ورينا طاقم اللؤلؤ اللي عندك😁

#وأبتسم_ماخلقك_الله_لتعبس😊

أبتسم تلقائيا 😊 على الكلام اللي واضح أنه طالع من شخصيه عندها روح مرحه فعلا حسدها من غير مايعرفها جي على باله لو كان زيها كيف كانت راح تختلف حياته كليا، وقبل مايرجع ويكمل في الصفحه بعد مازادت رغبته في إستكشافها أكثر وأكثر، فجأة أنتبه على روحه واللي قاعد يدير فيه!!
من أمتى كانت تهمه هالأشياء التافهه أو يلفت نظره كلمتين مكتوبات على الفيس، هز رأسه بأسف وأبتسم بتهكم على الحركات اللي قاعد يدير فيهم واللي في نظره انها حركات مراهقين ومش ليه أبدا،
سكر اللاب بغضب <بس بعد شني! ؟
بعد ماعقله بصم أسم الصفحه وكل كلمه قرأها فيها>
.
.
.
قام فنجان القهوه اللي صقع شربه كله مره واحده، وشاف لساعة تليفونه لقاها فاتت الواحد، حط اللاب توب في شنطته وخذي تليفونه ومفتاحه وناض طلع من المكتب

وماعنداش علم بأنه هناك من يتسللون لداخل القلوب من خلال مخارج الحروف💞

***********************************

في نفس هالوقت..
كانت مقعمزه في وسط الحوش وقدامها صونية العجينه متاع المعمول اللي تخدم فيه لإحدى الطلبيات اللي المفروض تسلمها العشيه،

وكان مقعمز على يمينها ولد خوها أدم اللي يحل في واجب الرياضيات وهيا معاه خطوه بخطوه،
وفي جنبه أخته رغد اللي غابت اليوم عن مدرستها لأنها مش حافظه السوره اللي المفروض تسمعها على أبلتها
مقعمزه وتزفر بملل وهيا تستني في دورها باش عمتها تحفظهالها

وقدام التلفزيون كانو مقعمزين ولاد عمهم عبد الوهاب وعبد الله التؤام اللي ماتعدوش 5 سنوات وهما يتعاركو على الريموت مني يشده وكل واحد منهم يبي رسوم مختلفه عن الثاني،
وبحداهم أختهم رفيف اللي تناغي ومساندتهم في الدوشه وتجري بينهم في الجراي

أمها كانت متكيه جنبهم..
ناضت قعمزت وهيا مضايقه وتتأفف ومش عاجبتها الدوشه، بضيق: قاعدين إماليكم ماروحوش أنتم؟؟
أدم: مازال ياحنينه قاعده الساعه 1 ونص تلقيهم قاعدين ماتغذوش أصلا

رغد، بغباء: ولازم قصدك يتغذو هما شني ماعندهمش ماياكلو في الحوش باش يمشو يتغذو عند الناس؟؟
.......، أبتسمت: لا ياحبيبتي مش هكي بس هيا العزومه على الغذي معناها لازم يتغذو غاذي، وتلفتت لأمها وقاعده الإبتسامة مافارقتش وجهها: وأنتي شني اللي مضايقك ياست الكل؟؟

سليمه، بضيق: دوشة هالصغار سلامتهم مايخلوش الواحد يحط راسه بكل
.....، ضحكت😅: خلاص عاد ياأمي حلك تعودتي عليهم توا هما طول الوقت إهنايا أمتي روحو أصلا، وبعدين هالوقت مش وقت نوم غير رأسك بيوجعك، وتلفتت للصغار: خلاص وهاب عبدو هاتو الريموت جاي أني نحطلكم حاجه تتفرجو عليها وياسر دوشه حنينه وجعتولها رأسها،
قدم عبدو مدلها الريموت ورجع قعمز في جنب خوه وطرمو شواربهم في نفس الوقت
أبتسمت على حركتهم وخذت الريموت حطتلهم إم بي سي 3 وحطت الريموت جنبها، وتلفتت لأمها وغمزتلها😉: هيا عاد فكيها الكشره وصحصحي وتوا إنوض إنديرلك طاسة شاهي خضراء منعنعه تروقلك أعصابك ياسلومه
سليمه، بإعتراض: لا لا والله ماخاطري حتى في العسل قعمزي سلم بنتي كملي اللي في إيدك سيبتي جامعتك على خاطره إن شاءالله غير تلحقي وتكمليه قبل ماتجيك المرأه اللي تبيه،
......، بإبتسامه: ماتخافيش نلحق بإذن الله، ومعاش مازال هلبا وبعدين محاضرة اليوم مش مهمه هلبا، توا نأخذها من هنادي، بس أنتي خيرك ياغاليه شكلك مش عاجبني، وبنبرة معبيه قلق كملت: تحسي في شي، فيه حاجه توجع فيك؟؟
سليمه: لا ورأس بنيتي مافيا حاجه، غير نحس في خلوقي مضايقات شويه وزادو هالصغار بدوشتهم طبقولي قلبي
.......، حتي أنتي ربي يهديك كان مشيتي معاهم للعزومه راك هدرزتي وغيرتي حتي جوك شويه

سليمه: ماعندي عليهم عيلة عمك هاذم تعرفيني وهما ماعندهم إلا الطواقه وقيمة الخشم مايمشوش معاي ولا نبيلهم شوفة وجه

.......، هزت رأسها بقلة حيله على تفكير أمها، وشافت لصغار خوها برفعة حاجب🤨: ياحلوين حنينه خلوقها مضايقات شني الحل زعما🤔، أنتبهو الصغار معاها وعلى وجوههم إرتسمت إبتسامه عريضه وهما عارفين تفكير عمتهم😃

أدم وقف بفرحه: أني اللي نفتحها هالمره، ومشي يجري للتلفزيون وغير توصيله على الفلاش وحط على أغنية ياماما ياماما، وقبل مايضغط عليها ضحك😁 وقال: واللهي حتى أحني ياحنينه خلوقنا ضايقات نفرهدوك ونفرهدو أرواحنا، أفردي وجهك وعلى قولتها

#أبتسم_ماخلقك_الله_لتعبس😊

.......، ضحكت😅 وهيا تشوف كيف حتى الصغار فرحو وكأنهم كانو يستنو في فرصه، وقفت بتغسل يديها، وغمزت لصغار خوتها😉: هيا أبدو قبل مانجي، وقبل ماتتلفت إنفتحت الأغنيه وتعالو إيديهم بالتصفيق👏 ورغد تحزمت وترقص مابينهم💃 وكأنهم ماصدقو خبر، خشت للمطبخ وهيا تضحك وتقول: حتى هما مخاطرهمش شوره، صدق اللي قال سبعه مجنانه وجتهم عمتهم زايره ،

<<لكن هاذم خمسة مجنانه وعمتهم أجن منهم😅،>>

غسلت إيديها ونقصت الغاز اللي كانت حاطه عليه الغذي، وطلعت بعد ماشافت الكوشه والطاجين اللي فيها وزادت توسعت إبتسامتها وهيا تشوف لملامح أمها اللي تغيرو، وهيا تصفق للصغار اللي ناضو يرقصو كلهم، وحتى رفيف تشاشي مابينهم في الجراي وتصفق،

قعدت تتفرج عليهم وإبتسامتها مزينه وجهها ومافطنتش على روحها إلا وهما جابدينها ويرقصو فيها بينهم

وأجواء الفرحه اللي صنعوها ببساطة نيتهم وبراءة قلوبهم وضحكاتهم اللي تعالت على حركات عمتهم اللي كانت متقصدتها باش إضحكهم وتغير جو أمها، وبروحها المرحه الحلوه وهيا ترقص في صغار خوتها وتقيم فيهم بالدور، ومره مره تقدم من أمها وتناشب فيها باش تضحك، قدرت تخلصهم من الطاقه السلبيه اللي متملكتهم، وأصوات ضحكاتهم وهما يتمايلو على الموسيقي ويرددو في كلمات الأغنيه وهما منسجمين معاها كانو زي ذبذبات السعاده اللي تطفلت منهم وقدرت توصل لقلب سليمه وتسعد خاطرها وتفك ضيقتها

ياماما ياماما ** ياماما ياماما 👏
ياماما نجك ليا ** ياماما ياماما 👏
نبي غير رضاك ** ياماما ياماما 👏
ديمه وأنتي تحسي بيا❤ ** ياماما ياماما 👏
هاللي نقوله فيك شويه ** ياروحي ياماما👏

""""""""""""""""""""""""""""""""""""""""'""

هناك أرواح راقيه من البشر يملكون طهارة النفس وجمال الروح يشاركون بها الجميع 🤍🤍
يملكون قلوب بيضاء تشع براءة، بمجرد الحديث معهم يزرعون بداخلنا التفاؤل وحب الحياة، أرواح خلقت لتعيش مبتسمه وتنشر السعاده في محيطها
أرواح مرحه نقيه بريئه جميله لن تتكرر أبدا💖

إن لم تجعلنا من هذه الأرواح يالله فلا تحرمنا من وجودها في حياتنا، إذا كانو على هيئة أحباب أو أصحاب أو أبناء أو حتى معارف أو أقرباء لتزهر أرواحنا معاهم وتغمرنا السعاده كل ماكنا بجوارهم😍😍

"""""""""""""""""""""""""""""""""""""""""

-------------------------------
--------------------------------------
#نتمنى_تنال_إعجابكم😍😍