#جملت أخلاقها
✍️كاتبة الجنوب
سمر:_ اي احبك
سالم: إبتسمت وأباوع لعيونها تلمع واخيراً صار عندي خيط أمل هي تبادلني نفس الشعور خجلت ودخلت بالبيت كملت طريقي كلمة احبك تردد بعقلي يبووي مو كلمة هي اربع احرف بس هل اربع احرف دمرت ناس وسعدت ناس الها معنى الشخص يكولها يتربع بنص الگلب ومستحيل يطلع منه موش كلمة يهل وادم اطك بالكاع سطرتني سطر وانا اتلفت بلكت تطلع مرة ثانيه وارجع هم أسألها احتمال ما سمعتها عدل خاف كالت ما احبك وانا ما سمعت ال ما ضربت على أذني لا ذاني ما تخطيني هي تحبني العيون يلمعن سبحان الخلقهن، أخذني طمع يابه شلون حس وهي ادكول احبك، من كون الله ما خلق بس انتِ هسه اروح وانا طاير من فرح لو ادري هيج العسكرية تفيد جان هجيت قبل عمري
وصلت للبيت وگبل للنوم وانا سارح بالحب نازكه وحليوة وصغيرونه اربيها على ايدي بت 15 عام سلبت حياتي ودوهنتني وانا عمري 18 من هل لحظة حسيت خلص لازم اعتمد على نفسي كبرت بس طلع وراي عمر
ما حاسبله حساب الواحد بينه يوصل ل 18 يحس هو كبران بس بعدها يعرف هو بداية عمره، كعدت الصبح لكيت نرجس محضرتلي الاكل اكلت ولبست ملابسي وتوجهت سلمت على نرجس وهي بيدها ماي
_الله وياك سلوم ترجع سالم غانم يارب
رفعت ايدي ورحت وهي تشمر وراي الماي هاي عاداتنا عودحتى يرجع سالم لأن الماي خير ومن يشمر او ايطيح على احد يكولون عنه خير خير ف كل واحد دربه طويل ينشمر ورا الماي حتى يرجع سالم، جنت فرحان وانا احس خلص كبرت ولازم اعتمد على نفسي وصرت رجال حالي حال البقيه فرحان راح اواجه ناس وجوه جدد وفرحان راح الزم سلاح واحس برجوله خشونة الزلم انا اكدر اصير مثل هذول يحاربون اي انا قوي ومحد يمتلك قوتي، جنت فرحان وخايف بنفس الوقت مثل طالب مدرسة اول يوم اله بالدوام ميعرف شنو راح يصير وشنو الي واجه بس كل الي اعرفة رايح حتى يتعلم العسكرية نفس الشي بس تتصور الكلام الي ينقلونه الك بس بعد ما جرب هذا كلام راح تحس مو نفس الي متخيله بعقلك.
قندة: فزيت فزعة مخروعة ذكرت اليوم سلوم يروح لكيت مرت ابوي بوجهي هاا راح سلوم
نرجس:ولج الواحد من يكعد ايكول صباح الخير وبعدين يسأل
قندة: اوو والله نسيت صباح الخير
نرجس:_صباح النور اي سلوم توكل على الله وراح ان شاءلله ايام ويرجعنه سالم
قندة: 🤦♀️هاي عود اريد اودعة واشمر عليه ماي
نرجس:بعد انتي اذا نمتي منو كعدج القعقاع
قندة:اي والله🥺
نرجس: روحي روحي غسلي وجهج انا موجودة سويتله اكل وشمرت الماي
قندة: هاا زين سوين
نرجس: انتم جهالي من جبير لزغير مجاي افرق بينكم
قندة:اي صدك
نرجس:يلا روحي مجهزة اكل
قندة:شهل دلال 😅
نرجس: لعد شلون انتم بحسبة جهالي وبلا حجي زايد يلا روحي
قندة:اي
ابد معرف ارد على كلام الحلو انثول 😢
حياتنا بهاي فترة ماشيه زينة الحمدلله الصبح دوام نبقى بس انا ونرجس وهاي زغيرة تعلمت عليه وصرت امها الثانية حيل تعلقت بيها وهي هم دخلت بهجه بحياتنا والكل ملتم عليها ونضحك على ضحكتها ومر زمن وسلوم بلعسكريه يبقى 23 يوم وينزل الوضع
بالعراق يوميه تهديدات من امريكا تشن علينا الحرب والكل متحضر خاف اصير هجوم بليله ظلمة گلوبنه ويه شبابنا ورا سنة من التحاق سالم التحق عماد لأن هما فرق العمر قليل بينهم الوضع اقتصادي مدمر بهاي فترة حصار والمواطن حسرة عليه يلبس لبسه حلوةهاي الفترة الدمرت البلد وانهكت كل قواه وبناه التحتيه، بعد ما كان اجمل بلد بالعالم فترة حروبات وبعدها حصار ومجاعة سببها دول الطمعانة بخيرنه الى أن ستغلت الوضع امريكا وخربت ودمرت وأخذت كل خيراتنا،
عام 1999 شهر السابع صيف والدنيا حار بسه كبرت طبعاً الكل بقى دلعها بسه بسبب آمنه وألغى اسمها لأن الكل يكول عنه صعب ،كبرت وصار عمرها 3 سنوات تمشي وكلامها متقطع بلكوا تنفهم الكلمة والكل يحبها ابوي شايلها ويفتر بيها لأن الجو صيف وحارة واحنه ما مقصرين شط يجمعنا كلنا الظهر ندخل بي وياا حلاته ويه مغربية من نلتم يمه ونكعد نسولف ويعبرون يمنه ام ضاري وبناتها،آمنه حبيت گلبي كبرت وصارت اجمل من قبل العيون كله عليها وحالياً هي بالصف الثالث لسانها طويل والكل يسميها ام لسان ومتخلص عركاتها هي وسليم،سليم كلش عصبي وميتحملها سليم شاطر وصل لخامس ما شاءلله صاير طويل بس اعصابه نار واحد ميتحمل الثاني هو وآمنه، وبيوم انجمعنا كلنا يم نهر وحتى ام ضاري وبناتها ولتهينه بسوالف وما نسمع اله صوت طب الكل لتفت ويه صرخت مرت ابوي ولكم لحكو وما نشوف غير بسه طايحة بنص النهر غركانه وبس جزء من شعرها طالع لفوك
_عزاا يمه بتي راحت
جمدنه وصافنين عليها وما اشوف اله آمنه شمرت روحها عليها، وبدت تسبح وصلت يمها جرتها وأجت صوبنه احنه مسوين مكان ناصي مثل درجات نكدر ننزل للنهر وبسهولة، سبحت وهي رافعه راس بسه ليفوك حتى تكدر تتنفس وصلت يمنه ولزمناها منها وأخذتها نرجس ضربتها على ظهرها الحمدلله طلعت الماي من خشمها وتنفست، أخذتها منها ورحت ابدلها وهي أخذت آمنه باستها ولج لو ما انتِ جان راحت بتي،وهي تضحك وادكول نقذتها،روحي غيري ملابسج لا تتمرضين يمه
آمنه من كثر ما تسبح بالنهر صارت سباحة ماهرة يوميه تسابق هي وسليم منو يوصل اول للجهة مقابيلنه، وهي سريعة ما شاءلله واليوم اذا فازت على سليم يطلعها من نهر وتشبع ضرب تبقى تبجي تقهرني من تبجي بس هي قوية ترجع تاخذ حقها،وميهمها احد لسانها سليط ومتحب الظلم، يا ويله الي طيح بلسانها الكل يسميها ام لسان،وبيوم كلنا كاعدين ودخل علينا سالم كلنا فرحنه بي ما متوقعينه يجي لأن بعد نزوله ايام وفرحنه اكثر من طلع دفتر الخدمة وكال لهنا وتنتهي مهمه وبعد ماكو جيش
آمنه: لك هلا بأخوي ولك اليوم شبعني حلويات
سالم: واحلى حويات للحلوة
حور: وانا هنا شنوو
سالم: عمي انتِ الأصل حتى عسل اجيبلج ومن نحله
هيج هيج اضل اضرب عليها لحد ما طلعلي عسل واجيبه واجي
قندة:_جا وبيت عمي خطيه مالهم حصه هذيج الجهه ينتظرونك على النار
سالم:_اياا ملعونه شوف شتحجي اصلاً انتي ما الج أي حصة واله اكلكم انتم كلكم ما الكم ولا حصة الحصص كلها ال عمي حبيبي يا يابه شكد مشتاقله
قندة: ايا ملعون على هاي سالفه اشو نسيتنه
سالم:ليش انتم منو منو بلى ذكروني
آمنه: اي صرنه كخخ مو حلوين هو هذا حظي حتى اخوي تبدل عليه
سالم:ولج انتي ام لسان اليوم انا اعلمج
وبقى يركض وراها اليوم اله اعضج من خدودج
خرب إنت صايرة سريعه كل هل تدريب وانتي تقلبيني اوكفي ولج لزمها من ورا وجتف ايديها اعضج اعضج وهي بس تضحك،عضها وهي صرخت اخخخخخ عوفني هههههه
سالم:هسه يلا ارتاحيت يلا ولي بعد حتى ما تطاولين على اخوج الجبير
آمنه:لك خرب صاير قوي مثل هذول مجرمين
سالم:لعد شعبالج هاي عسكرية مو شويه باعي عضلات يابه حضرولي ملابس دللوني بعد محسوبكم تسرح لا عسكريه ولا بطيخ هسه حتى اكدر اسب رييس
آمنه:لك اشش يجولك من جوا الكاع
سالم: اهووو فكونه من هل سالفة ملابسي ولج حورو
حور: هاا بلشنه حور كومي حور تعاي
سالم:ليش احبج مو انتي ضعيفة وترحين طيارة بلى اشوف منو اسرع انتي لو آمنه
حور:اووف كايمه ولوو ما توا جاي اله ولا اكوم
تغيرن ملامح سالم من فرحة الى غضب
سالم:وغصباً عليج لج اخوج واكبر منج تحترمين وهسه شكايلج يا استاذه وهيج تنرفزتي
أشرت على حور بس حتى تسكت وتروح راحت وهي ساكته
حور دومها فقيرة وساكته الكل يشوفوها يكولون عنها هادئه فقيرة هي صح فقيرة بس الي يكرب منها ياويله ويا سواد ليله هاي سنة رسبت ومقبلت داوم لأن صديقاتها قسم تركن دراسة وقسم انتقلن مرحلة جديدة مرت ابوي ما قبلت تترك بس هي مالها رغبه بالدراسة اصلاً زين من وصلت الصف الخامس لأن كل سنة ترسب اكبر وحدة يمكن بالصف،بقيت صافنة اباوع على بسه ذكرت شلون لكيناها غركانه بالماي يا الله لو هسه صاير بيها شي يمه اسم الله الحمدلله تعدت سلامات، شوي وصاح عليه سالم
سالم: راح انام لا تخليني نايم للمغرب كعديني
قندة:صار يخوي
وبقينا ملتمين العصر يم نهر هاي صارت عادة عدنه صار الغروب ذكرت سالم كعدته وطلع اكيد بيت عمي
سالم:رحت بيت عمي اول ما رحت الغرفة عمي اكيد هسه الكاها هناك بقيت كاعد ورحبو بيه وسولفتلهم على الجيش وما كو سالفه ما سطرتها الهم وهي ماكو كلت اروح على زهير بلكت اشوفها تتمشى طبعاً بيت عمي بيت جبير ضخم وكل واحد اله غرفة رحت على زهير وعيوني دورها بكل مكان بلكت اشوفها طاك گلبي على شوفتها بقينا سوالف وضحك وتأخر الوقت ومكدرت اشوفها وين تروح طير يوم ثاني رحت الهم العصر سألت على ضحى بت عمي كالو بلبستان ورحت للبستان بنات كلهم موجودات شفتها من بعيد عرفتها هي
سالم:يابه سلام عليكم كل عام وانتم بخير
ضحى:لك هذا منو وعليكم السلام خو انت ما تبطل من كل عام وانتم بخير هو اعتقد العالم ايكولوها بس بالعيد انت ليكون ايامك كلها اعياد
سالم: هلا بت عمي ام لسان بعدين وين لكيتي واحد يتمنالج الخير بكل عام هاا كليلي هسه عوفج من هاي سوالف وكليلي شلونج يحلوة
ضحى: اي علي بعد علي ترا يسمعون بس هما مطفين وزينين مبيهم شي
عيوني عليها وكلت الحمدلله، تقربت مني ضحى
ضحى: شرايك هسه اطشرلك البنات وخليكم وحدكم سولفون براحتكم شدكول
سالم:فديت بت عمي تفتهمني
ضحى: جا شعبالك
سالم: اي وشنو مادة ايدج شتردين
ضحى:شكد تدفع وجم ساعة وهاا ترى ابقى وياكم هاي بت اخوي ما أمنها يمك
سالم: اي مو راح اكلها بت خوج وبعدين تعاي انتي جاي تاخذين عليها بخشيش ما كلتي هاي بت اخوي لو بس تردين مصلحتج
ضحى: والله بكيفك بعد خليك اطك نضرات وتتحسر
سالم:لا على شنو اسم الله اذا اكو قسمه أخذها
ضحى: هسه شنو ترى العرض اله مدة محدودة وينسد
سالم:امري الله بس مو هسه انطيج لأن توا جاي وماكو بجيبي فلس احمر عود من اشتغل
ضحى: اهووو يعني هم عرض ماكو منه وهم بالدين امداني
سالم: يلا ولي شوفي شغلج
ضحى: رايحة
ضحى أخذت البنات وراحن ودفعت سمر يمي
سالم: شلونج يل الحبيبه
سمر: زينه
سالم: لو تدرين شكد مشتاقلج ينظر عيني كل يوم من احط راسي بالمخدة اشوفج يمي بكل وقت براسي مطلعين
سمر:ترا انا اخجل لتحجي وياي هيج
سالم: فديت الخجول شسوي ولج انتي هنا متربعة بنص گلبي معرف شوكت دخلتي اكلج صدك
سمر: هاا شكو
سالم: انتي شوكت دخلتي بي اشو ما دكيتي الباب
سمر: ههههه شنو
سالم:گلبي
سمر: والله ما ادري
سالم: بلى انتي احجيلي اشو كتيلي هل اربع احرف ودوهنتيني سطرتيني سطر وعلي بس گليلي شوكت لحكتي تحبيني وانتي مكد نتفه
سمر: من انا وزغيرة
سالم:لا بربج هيج انا حلو وانحب
سمر: بنظري انت احلى واحد
سالم: عمي على كيفج احلى واحد لعد هذا الي تابعنه وميتات بي شنو هاا اذا انا احلى واحد عزا بعينك سالم هسه تخليني اشوف حالي يا طلابة متسولف
سمر: ترا ما احبه انا بگلبي واحد ماكو غيرا وهذا ممثل خالته الهن كلهن يموتن بي
سالم: وانتي تموتين بيه هاا
سمر: اي ههههه
سالم: اويلي يربي ما اتحمل هيج
ضحى: انا اجيت انا اجيت احم احم كلولي شنو حجيتو اعترفتو البعض صح
سالم: وانتي شجابج بالنص
ضحى: حسب اتفاق بدون تراجع سلوم اتذكر
سالم: سدت علينه الهوى بعد ما نكدر نتنفس مو سمورا
ضحى: وانا كاضتكم احجو لشوف اي كملو شبيكم
سالم:وين نكدر نحجي وابو لهب موجود
ضحى: و الله ما اتحرك منا احجو لشوف احجي سمر يلا
سمر: عوفك منها هاي لزكه
ضحى: صماً بكماً لا أرى ولا أتكلم
سالم:بعد احسن
سالم: اكول سمر معليج بيها كليلي شكد تحبيني
ضحى: مكد النخل والحشيش وصخول بيت ابو ايمن
بعد تريد اكثر
سالم: انتي مو على اساس متحجين
ضحى: مو هي فاهيه والله فاهيه وربي فاهيه متعرف تحجي
سالم: انتي مدخلج شلون ورطه هاي تعرف تحجي عدها لسان
سمر: اي والله عمه اعرف احجي اشبيه مو زغيرة
ضحى: امممم بعد بيها حبيب تعرفن تحجن
سالم: هسه شلون تعوفينه لو شنو
ضحى: ترا اروح اصيح للبنات شوف صوت واحد ي بناااا
سالم:اششش بس سكتي لا تحجين
سمر: عوفك من عمه اكول سالم اخر مرة غنيت النا صوتك كلش حلو عجبني اريد اغنيه بصوتك الحلو
ضحى: عاشت والله وطلعتي مو فاهيه من أول يلا غني عاد انا احب الاغاني اموت عليهن وخاصة اذا بصوتك
سالم: مو تدلل حبيبي انت يا طوايف سالم
ضحى: خف علينه يا عنتر ابن شداد
سالم: انتي مالج غرض
ضحى: غني ل عبله
سالم:والله على راحتنه اريد انغني لا
سمر: لا حباب غني،والله مشتاقتلك ومشتاقة سوالفك
ضحى: 😳 ولج شخليتي عمتج هنا موجودة استجني ثگلي
سمر: انت لو بس تدري شكد افكر بيك
سالم: ههههه مو تردين سمعين هاج ستلمي حبيبي شكد
ضحى: اكوملج هسه
سمر:هههههه عمه والله احبه
ضحى: حبتج حيه ام راسين اعلمج ولج وانا اكول فاهيه يلا امشي كدامي
سمر: لا بعد ما احجي بس خلي اغني
ضحى: غني لشوف خلي اروح بسرعة
سالم:حاضرين للطيبين
وبدا سالم يغني واكيد حتى ضحى سرحت بأحلامها ويه اغاني سلوم
سالم:
تعال لحبك أنا أشتاق ولشوفتك أتمنى
لاطير بجفاك صاح برياضي ولا غنى
تعذبني ليالي جفاك تلوعني وظل أهواك
***ويل خدك ورد.. ورد جنة***
لعيونك يهزني الشوق أضوي الشموع للملقى
يمر طيفك يناغيني أصيحن حيل وبحرقة
تعال هواك مرمرنا يل جيتك عيد ألنا
تعال ولا تخلي الروح مجروحة وتشمت أعداي
أباهي الناس بوصالك وقولن ريد ألي أهواي
تعال هواك مرمرنا ويل جيتك عيد ألنا
ضحى:الله على صوتك الحنين ابن عمي اتخبل
سمر:هاا عمه مو جنج جاي تغازلينه
ضحى: اهووو بدت سوالف الغيرة ولج هو هذا وجه واحد أغازله عيييع
سالم: ها اختلفنه اشووو والبخشيش
ضحى: لا تخبل عمي منين اكو مثلك
سالم: اي كلشي بفلوس حلو
ضحى: اكيد
سالم: يلا اودعناكم انا رايح ولو كعدة ما تنمل منكم ولا تبقن هنا واجد رجعن للبيت
ضحى: يلا روح الله وياك
سمر: راح اشتاقلك الله وياك
ضحى: ولج شنو تشتاقيله هسه بليل تلكينه فوك راسنه
سالم: مجاي بيتكم بيت عمي وبكيفي
ضحى: روووح روووح
رحت وانا فرحان هسه يلا گلبي ارتاح تكحلت عيني بشوفتها رجعنه نلتم بليل بيتنا لو بيت عمي اليوم جمعة يمي رجعت البيتنا لكيت الهوسه النسوان وصلت يمهن يابا السلام عليكم شهل تجمع الحلو خالة ام ضاري شلونج الولد شلونهم
_هلا بيك يمه والله بخير، والف مبروك على تسريح
بيج اكثر خالتي، وهاي انتن يوميه هيج
نرجس: جا يمه وين روح ملينه من البيت
سالم: اخذو راحتكم وشوي ودخلن قبل المغرب ودربالج على الجهال.
اليوم كعدنه الصبح والجو كلش حار ابوي سودة عليه يشتغل وسالم وطلع ويه زهير لصيد وعماد توا اجه من الجيش نزل مجاز ونايم على بطنه من كد تعب وحر وهو ابد ما يحس كاعدين احنه بنات ونرجس جاي تغسل ملابس وآمنه شايله بسه وكل شوي غاطينها بالماي، جاي اتناكر ويه حور ولج حورو هذا لسانج يرادله كص كلش صايرة ما تاخذين الحجي
حور:ليش شمسويه
وجان اشوف الباب الشارع اندفع ودخلو علينا المسلحين لازمين السلاح وصاحو صوت واحد
يتبع...
اثبت وجودك بتعليق اكملي
احبكم لا تنسوني من تفاعلات