الحلقة السبعون
#ليلة_من_فبراير
سلام علئ الدنيا اذا لم يكن بها
صديق صدوق صادق الوعد والوفا
#بشار_بن_برد
❤️
ياسر ـ ورة يومين اتوفئ فرج
صديقنة الصابئي
وترك بكلوبنة غصة متنسي ابد
علي جان اقرب واحد لفرج الله يرحمه وهواي اتاثر بأستشهادة
كابلة وضل ينوح ويبجي
حاله حال شهداء هالوطن
ترك وراه زوجة واوﻻد وبنات
حتئ لو اولادة كبار يبقون بحاجته ..
واكيد راح يبقئ مكانة خالي بيناتنة وميسدة احد
خصوصا من جان من ينعزل عننا
ويكعد يدخن لوحدة
جنت احسه مهموم بشي بس ميحجي لان جان كلش كتوم
اغلب اسرارة يم علي هو يعرف عنة كلشي
اتفقنة منوصل خبر لعبد القادر ولا لشلال
اثنينهم بنفس المستشفئ يتعالجون وية فرج الله يرحمه ..
جانو من يسألون عنة
نكللهم تعافئ وهو بخير ينتضركم ترجعولنة ..
مر الوقت ورجعنة لمواقعنة
ماضل شي علئ اجازتنة وننزل استراحه لبيوتنة ..
هذيج الفترة ما نطونة اجازة كاملة
نزلنة يومين وردو دزو علينة لان الاشتباكات جانت كلش قوية
يعني جيش الرسمي
والشرطة الاتحادية
وجهاز مكافحه الارهاب
والحشد الشعبي
والبيشمركة
كلنة سوية متعاونين علئ هالقذرين
ورغم هذا بعدهم منتشرين مثل العثة والارضة ميخلصون ..
من جنت انزل اجازة ماروح لكردستان
ارجع لكركوك أجر غرفة
بفندق بسيط مو غالي
لو اروح يم واحد من اصدقائي
من اكون ضايج من الوحدة ومكتئب وماريد ابقئ لوحدي
صارلي شهرين ماشايف اطفالي
عندي صورة الهم من جان عمرهم 3 اشهر…
وصلت للفندف ارتاحيت واتصلت علئ رسلان ..
رسلان ـ شوكت نزلت اجازة
ـ اليوم رجعت ..
بشرني شكو ماكو
ـ عندي خبر حلو وخبر مؤلم
ـ اوكف ..
اخذت جكارة ودخنتهه وكلتلة احجي
ـ اثيل ودانا وداليا اولاد رغداء
ـ كمت علئ حيلي من سمعت باسمائهم.. شبيهم ؟
ـ بالكوة مخلصين نفسهم وواصلين تركيا ولان ماوياهم تلفون ولا اي مستمسك وحتئ فلوس مو هواي عدهم
باقين بتركيا فترة طويلة
خطية ميعرفون ارقامنة لان محافضيهه
عاد بالصدفة عرفت بيهم كاعدين بكمب باليونان هو وخواته وكدرت اتواصل وياهم
ـ وباقي اهلنة
ـ محد طلع منهم
حيدر وبركات وهافال وفنر و سلمان وباقي اولاد اخوتنة واخواتنة عادميهم اثيل شافهم
و رغداء ذابة روحه عليهم
وهمين عادميهه وياهم
اما البنات والاطفال محد يعرفهم بيهم وين راحو
يكول مشينة متختلين بين بالخرفان حتئ لايشوفونة الدواعش
وطلعو لتركيا وبعدين مهاجرين بالبحر ..
وورة كم يوم راسلني سامان ابن عمتي كوجين
ـ صدك
ـ اي والله
هو و هافين وبريار وعوائلهم كلهم طالعين الالمانيا
ـ وكوركين وزوجته
ـ وية الخسائر لان بقت يم اهله
ـ جريت حسرة شكبرهه حركت كلبي حرك
ـ لاتبقئ متأمل
كل الزلم عدموهم ميبقون احد
والجهال والنسوان مالهم اثر
ـ مابيدي شي غير اقاتلهم وية الجيش
ـ ميفيد ياسر
الجيش دينباع
و يومية نكعد علئ مصيبة جديدة
ارجع لايصير شي يمعود يكفي الخدمة الخدمتهه ويكفي الخسرناه
ـ علئ شنو ارجع..
خليني هنا بنص اخوتي
وشيصير خلي يصير عود الراحو مو احسن مني …
هواي حاول يقنعني بس ماسمعتلة نهيت الاتصال وياه
واتصلت بنونة جنت كلش متلهف للجهال
ــــــــــــــــــــــــــــ
شهاب ـ جانت الاوضاع كلش مخربطة بكركوك
يوم يكولون راح يدخلون الدواعش
ويوم يكولون مسيطرين الجيش ولانخافون امان..
حسينة نفسنة مثل الموصل علئ ساعه ونشوفهم كبالنة وبنص بيوتنة
ابوية هواي اتاثر وراد ياخذنة ويطلع نهاجر بس فلوسة متكفي
عرض البيت للبيع بس بهالفترة العقارات متوقفة وبالنازل ومتجيب سعر
امي جانت معارضة نسافر تكول ما اطلع من العراق وشيريد يصير خلي يصير
اركان عايش يومة لروحه ابد مامهتم بشي
اهم شي عندة فلوس بجيبة وانترنت بتلفونة واكلة يجي ليمة..
رغم عمرة صار 20 سنة وهو اكبرنة المفروض يكون قدوتنة بس للاسف هذا حالة
واني جنت اشتغل وية عمي الئ ان توفئ الله يرحمة
حاولت اشتغل لوحدي واعتمد علئ نفسي بس هالفترة كلش صعبة حتئ الشغل توقف وميتحصل بسهولة
اما سلطان صار عمرة 18 سنة
وشيبنة واذانة بتصرفاتة
كل افعالة غلط بغلط
ميتقبل نصيحه من احد
كل كلمة والثانية
يهدد امي وابوية بترك البيت
مرات جان ينطوي علئ نفسة
ويكعد بغرفتة لساعات طويلة لوحدة
امي ما اهتمتلة
تكول اهم شي هو كبال عيني شريد منة..
و ابوية بالشغل و يرجع تعبان ياكل ويلف راسة وينام
ميدري بسلطان شنو ديصير وياه لان معتمد علئ امي بهالامر
اما اشرف ورافع واصيل فـ بعدهم بمرحلة المراهقة
حاولت اتقربلهم واصير صديقهم وكدرت امنعهم يحتكون بسلطان
وخليتهم يمي
جنت حاس تصرفات سلطان مو صحيحه
طول لحيتة وشعر راسه
وصارت افكارة كارثية بالنسبة لديننة…
وبيوم ..بدلت ملابسي وردت اطلع ادور شغل..
وكفلي اباب البيت ميخليني اطلع
اضاهر جان طالع ورجع ..
سلطان ـ شنو هالخرابيط اللابسهه امشي امشيي انزعهه والبس هذني
ـ باوعت لنفسي ورديت باوعتله..
شنو قابل لابس ملابس بنات حتئ هيج تحجي شبيهه ملابسي
ـ يا اخي نصيحتي الك لاتلبس هالجينز لانة من دول الشيطان
البس من هالملابس ارتب وارجل
ـ شايل بيدة علاكة جبيرة طلع ملابس قطعتين مثل ملابس داعش او الافغانيين بجامة والقطعه الفوك كأنو نص دشداشة..
ولك انت شجايب ووياك
مين جبت هالملابس
منو نطااكيااهن
ـ يعني مين اجيبهن
خيطتهن يم الخياط
ـ وولك ياخياط خيط هالملابس تدري لو يشوفوك الشرطة لو الجيش لو اي احد هنا يصلخون جلد من جلدك
ـ ياابة دروح لاتضل خواف عيب انت زلمة
اخذ البس هالملابس وانزع هالمهزلة اللابسهه لان تنتقص من رجولتك
ـ اولا مو الملابس التحدد الرجولة
وملابسي كل شباب العراق الطبيعي يلبسه
وثانيا هاي ملابسك تابعه لدااعش
ليش تريد تلبسهه ؟
ـ عجبتني
ـ ليش حاسك انتميت الهم
رحمة ـ شبيكم صدك رويسية
ليش دائما تتناكرون
ـ تعاي شوفي ابنج شجايب
ملابس داعشية ويريدنة نلبسهن
سلطان ـ هاي مو ملابس داعش هاي ملابس الناس الي تكون علئ حق هذه هية ملابسنة الحقيقة
ملابس ديننا واجب نلبسهه
رحمة ـ لك شنو واجب؟
مين جبتهه واجب تلبسوهه
شهاب ـ هذا مو زينة يويل هذا زي الافغان طالبان باكستان مدري شسمهم
سلطان ـ اسكت اسكت
وانتي همين ي
لازم تلبسين خمار وتغطين وجهج ميصير هيج تمشين
ـ بس اني لابسة عباية ومستورة
ـ من الييوم القوانين كلهه تتغير بهالبيت
شهاب ـ وانت منو حتئ تحط قوانين وابوية عايش منوو انت حتئ تخلي قوانين نسيت روحك لو شنوو ولك
ـ لاااا تغللط علييية شهاااب لا ااااندمك
ـ تلازمنة اني وياه
ان هواي تمادة علينة
ويريد يفرض روحه وكلمته
وهو كل تصرفاته خطأ
رحمة ـ انوب تتلازمووون كدااامي شووو يلةةة كل واحد لغرفتة يجي ابووكم واخلي يتصرف وياكم
شهاب ـ وااني شكوو
طالع ادور شغل وهذا عرضلي بكلامة السخييف
مابقئ غير الدواعش يفرضون كلمتهم عليية
ـ لااتكول علئ اخووك داعشييي احتررم نفسك
ـ ليش جذبت بشي
دشوفي شلون شايف روحه عليينة
بشنو مستقووي مدكليلي
مين جاب فلوس هالملابس
اشو لا سألتي لا حجيتي وياه وفوكاهه جاية تلومين بية
ـ ترة بعدة صغير يادوب عمرة 18
انت اكبر منة المفروض تنصحة
ـ وبشكد اكبر منه
ترة اقل من سنة بيني بينة
بس كولي عقلي اكبر من عقلة بالف مرة لان تربيت يم عمي الله يرحمة اكلج اي
ـ تبقئ ناقص وحيوان
تنكر فضلي وتذكر عمك
ليش هو الداراك وغسلك و نيمك وشبع بطنك يانذل
ـ ماناكر فضلج بمداراتي واكلتي وشربتيي
بس عقلي لا مو الج الفضل
الفضل بثقافتي وعقلي الجبير لعمي الله يرحمة ..
شوفي دلالج شسوة بي
طول وعرض وعقل ماعندة
يمشي مسيوك ورة هذا وذاك
رأي مثل البشر ميعرف ياخذ
سلطان ـ هواي دتجاوز عليه وساكتلك لخاطر امي
ـ هذا واقعك عجبك ماعجبك طز بيك ممجبور اضحك علئ روحي واضحك عليكم..
ومن هذا الشارب يا امي
اذا ميطلع سلطان منتمي لجماعه ارهابية داعشية فلا اسمي شهاب ..
خلصت كلامي وعفتهم وطلعت
يوم عن يوم سلطان تصير تصرفاته غامضة مكدرت اسكت اكثر انتضرت ابوية لليل يجي حتئ احجي وياه…
رحت للهول ووكفت يم التلفزيون
ابو اركان ـ تعال شهاب اكعد يمي ليش واكف
رحمة ـ لا هسة يروح لغرفتة شعندة كاعد هنا
ـ شبيج ام اركان ابني واريدة يكعد ويايه تعال تعال..
وانتي كومي سويلنة استكان جاي ..
تعال اكعد يمي مدشوفكم لا بالنهار ولا بالليل
ـ اجيت وكعدت يمة..
وامي راحت للمطبخ
يابة اريد احجي وياك بموضوع
ـ اي ابني كول ..
ـ سلطان مديعجبني هالفترة ابد مو طبيعي
ـ شلون يعني مو طبيعي شبي
شهاب ـ افكارة المتطرفة يوم عن يوم تزيد..
يابة معقولة امي متحجيلك الديسوي لان قبل جم هية يوم هددتنة بيك
ـ شتحجيلي
اكعد سولف شديصير وراية
ـ حجيتلة كلشي عن سلطان وتصرفاته واسلوبة ويانه وشلون امي اطمطم عليه ومتقبل احد يحاجي ..
ابو اركان. ـ اااام ارركااان..
رررحمةةةة رحمةةةة
ـ ها ها ابو اركان اجيت عيوني
ـ شبي سلطان احجيلي
شهاب ـ باوعت علية بنضرة مستحيل انساهه نضرة غضب وتوعد
رحمة ـ كلشي مابي عين الله ترعاه المكرود نايم بغرفته ليل ونهار شيسووي بعد حتئ ترضون عليه
شهاب ـ ما سكتت لامي وحجيت كلشي راسا ابوية عافنة وصعد لغرفة سلطان واحنة نركض وراه وامي تدعي عليه تكلي شيشت ابوك عليه الله لاينطيك
فتح الباب وانصدم من الشافة
جان سلطان لابس ملابس داعش وكاعد بالغرفة يتابع فيدواتهم..
صارت مشكلة جبيرة
وسلطان اتجاوز علئ ابوية وراد يضربة وكلة لابوية انت كافر لان افكارك هيج
متحملناه اتكابلنة عليه اني والولد الصغار واركان وابوية
وبسطناه بسطة قوية كسرنة ايدة
وابوية قفل الباب عليه وغير رمز الراوتر وحذرنة ننطي لسلطان…
طول هالفترة الباب متنفتح لسلطان الا احنة موجودين
المفتاح جان وية ابوية
امي اكلت كلبي وضلت تحجي عليه وتلوم بية تكلي الصار لاخوك بسببك
ماعرف شلون تفكر بس هية شافتة بعينهه شلون يحجي ويانة وشلابس علئ شنو بعد تحملني الذنب
بس جنت اسكت وماجاوبهه حتئ لاتكبر المشكلة اكثر
الئ صار الي مو بالحسبان
بنهاية شهر الثالث سنة 2015
ماعرف شلون امي قنعت ابوية واخذت منه مفاتيح غرفة سلطان
لان جانت مقهورة عليه
طول النهار مقفولة باب غرفتة
وامي تناوشة النساتل والبسكت
من جوة الباب يتكضئ بيهه
بين ميرجع ابوية ويفتحله الباب و
تنطي اكل ومي ..
جان نهار يوم عادي
وجنت متواعد بشغل وطلعت علئ باب الله
وخابرني اركان كلي الحكنة امي ماتت..
رجعت اركض للبيت لكيت امي علئ القنفة راسهه كلة دم ومتخشبة
ماعرف شبيهه
لا نفس ولاحركة شلناهه نركض للمستشفئ
وهاي الطامة الجبيرة
جان لازم منشيلهه ونتركهه بمكانهه ويجون من المستشفئ متخصصين يشيلوهه
بس شيلتنة الخطأ الهه انهت حركتهه تماما فوك كسرة ضهرهه واتضح هدهه كسر بفقرات الرقبة همين..
يعني التمت عليهه وصارت شلل رباعي
سلطان ماكو مندري بي وين اختفئ
راسا ابوية راح للمركز وخبر عنة وكلهم هيج سوة بامي
بس خاف يكللهم منتمي لداعش
خاف علينة احنة الولد وعلئ نفسة لاياخذونة ويختلط اليابس بالاخضر…
مرة ايام سودة
امي بين الحياة والموت والشلل بيهه كامل
وبس اني واشرف نداريهه
اركان ورافع ميقبلون يساعدونة
واصيل اشوفة صغير ميكدر يساعدنة
هالفترة ابد ماخابرت نهاوند ولا اعرف شنو اخبارهه التهيت وية امي
ابوية افتر علئ اصدقاء سلطان يسأل عنة بس محد يدري بي وين
او يمكن يعرفون مكانة وميريدون يحجون
ـــــــــــــــــــــــــــــــــ
نونة ـ من عرفت ياسر بالجيش بقيت مكابلة النشرات الاخبارية
القنوات العراقية تنقل اخبار ايجابية وتخليني اطمئن
بس القنوات الباقية تصورلي كل العراقيين استشهدو
وداعش منتشر ووصل بغداد
والجيش والحشد كلهم اسرئ وشهداء
ردت اتخبل من هالاخبار
كل واحد يحجي شكل وماعرف وين الصدك
ومن ياسر يتأخر باجازة ويبقئ اكثر من شهر او شهرين اشكال الافكار السودة تجي ابالي
الاطفال كبرو شوي
وصار عمرهم خمس اشهر ونص
جانت نغم يومية تاخذلهم صور بتلفونهه
رغم تدرس وملتهيه بدراستهه بس وقت فراغهه تكرسه الهم
تبدل الهم وتعدلهم وتصورهم
جانت كلش مهتمة بيهم …
هالصور كلهه ترسلهه لايميل ياسر وهو من يصير عندة نت يفتحهم ويشوفهم
جنت بالمطبخ وخابرني شهاب سكايبي…
استغربت صارلة فوك الشهرين عايفني راسا جاوبته ..
ها هلو شهاب شلونك
ووينك اشو صارلك فترة لا تخابر لا تسأل اخابرك متجاوب كلت اكيد ام اركان منعتك
ـ مو زين نونة
والله تعبان وهلكان متدرين بالصار
ـ خير شصار
ـ اخ يانونة صارت عدنة مصيبة جبيرة متنحل
ـ ياستار ..
شنو صاير احجي
ـ سلطان الله لايوفقه ..
ـ شبي سلطان
ليش تبجي يمعود
احجي شبيك مو نشفت دمي ..
ـ بنهاية شهر الثالث دفع امي من الدرج
وانكسر ضهرهه وراسهة انلطم بزاوية الباية وصار عدهه نزيف
ـ من سمعت شصاير لرحمة ماهتميت
كل ضني شهاب متاذي ..
بس طلعت رحمة الماعدهه رحمة....
بنهاية شهر الثالث .. وهسة جاي تكلي
ـ بيا حال جنت حتئ ما اكدر احك راسي
ـ زين ليش دفع امة من الدرج شنو السبب
ـ اوووووف ..
ـ لاتجر حسرة احجي شصاير
ـ من دلالهه صار اعوج
النذل جان يريد ينتمي للدواعش ومن عرفنة منعناه يطلع..
ـ وام اركان همين منعته؟
ـ اي ماقبلت عليه
ـ ليش تمنعه
هية امك داعشية بأمتياز
ـ نهاوند لاتحجين علئ امي
ـ ماحاجية شي غلط لان هذا واقعهه
ـ مختنك نونة ومالكيت غيرج اخابرة
تعرفين ماعندي احد بعد وفاة عمي غيرج
ـ انت الوحيد الزين بيهم
من صغيرهم لجبيرهم
متشوفني متواصلة وياك لان ساعدتنة بهذيج الليله ومستحيل انسئ فضل احد عليه..
ـ اركان ورافع ممهتمين لامي
بس اني واشرف شايليهه
شلل رباعي نهاوند تعرفين شنو يعني شلل باعي يعني لا ايد ولا رجل تحرك
ـ الله ارحم الراحمين ..
بس هذا ذنبهه
هية الربت ابنهه علئ هالنهج
هي الخلتة يصير داعشي
وهيأئتة لهل شي ..
خلي تتحمل الزرعته ايدهه
ـ معقولة نهاوند
معقولة متحنين عليهه بذرة
ـ احن علئ منو؟
ـ امي رحمة
ـ انت كلتهه امك .. مو امي
امي ازدهار وبس ماعندي غيرهه
اما امك غريبة عني وماشفت منهه الا الاذية والظلم
واقامة الحدود بدون شهود
فـ شلون تريدني احن عليهه
ـ جنت متأمل تكولين جيبهه يمي اداريهه ونعالجهه لان الطب بالخارج متطور
ـ لا مستحيل احجي هيج شي ومستحيل تسمعه مني
اذا تريد انت احق بيهه
طلعهه للخارج وعالجهه
خصوصا هسة الهجرة مفتوحه
تكدرون تطلعون لالمانية او اي دولة اوربية بلكي تستقبلكم
ـ نونة ليش هيج كلبج قاسي
ـ اني مو قاسية
اني فقط حطيت كلشي بحجمة الطبيعي
امي الحملتني وخلفتني مارادتني ولا رادت تشوف وجهي ومن لكتني بعد سنين اسواء ايام العذاب اعتبرهه بشوفتهه
بس انتة حملتك وربتك ودارتك ونيمتك وحمتك من هالعالم الخارجي المرعب
شهاب انت فد يوم نمت بالسطح من جنت صغير
ـ اي طبعا دائما ننام بالسطح لان ماكو كهرباء
ـ همين جنت طفل تخاف من الليل والسما السودة والظلمة
ـ كل طفل يخاف بي تتغير القناعات والافكار من نكبر
ـ صح جنت طفل
بس يبقئ الولد مو مثل البنت
انت جنت نايم بالسطح بنص بيت اهلك وتخاف
لعد اني وخواتي نمنة بالشارع
وبليلة حمرررة مو بس ظلمة شايف الرعب..
ماريد اتذكر هالامور لان تتعب نفسيتي
ـ بس صار عندج اطفال
المفروض غريزة الامومة تحركج شوي
ـ لان صار عندي اطفال
ولان عرفت شنو امومة
صرت اقسئ عليهه
وما اهتم بقسوتي
لان ام اركان متهمني
تدري شكد تجيني ايام اتمنئ ماعرفتهه ولا التقيت بيهه وبقيت راسمه الهه الصورة القديمة بخيالي ..
ـ يعني مانقهرتي عليهه
ـ لا والله ليش اكذب عليك
الغريب لو اسمعه هيج صاير بي انقهر بس ام اركان لا
ـ ميصير تكونين قاسية القلب
طبيعه البنت تتسم بالرحمة والرأفة
لا تتخلين عن طبيعتج الانسانية
بسبب ضروف خارجة عن ارادتج
ـ شكد حلو حجيك
شيصير لوجنت اخوية الجبير
وحميتنة من مصايب الزمن
ـ كلشي مقدر و ومكتوب علئ البشر
كل النمر بي ونعيشة وشفناه مكتوب علئ جبينة
ـ وهسة شراح تسوي
ـ ماعندي حل ثاني
ابقئ يمهه الئ ان الله يعاين حالهه
ـ مو جانت ابالك الهجرة
ـ اي بس وين اهاجر
ماكدر اعوف امي بهيج وضع
لان محد يداريهه
ـ نيالهه عليك ياريت يطلعون جهالي مثلك..
ـ ان شالله
ـ بعدك تشوف جان زواجي حرام
ـ ومازلت
وفهمتج ليش
ـ بس هسة احنة مطلقين
ـ واتمنئ مترجعين
ـ بس ياسر خوش انسان
ـ كل دين بي زين وبي مو زين
ـ اي صح
بس بحياتي شفت الموزين اكثر من الزين
ـ الشفتيهم بحياتج مو مسلمين
هذول مدعين الاسلام
ـ شوف شهاب لاتصير مثالي ويايه
كل واحد يحجي بهيج موضوع
ميكول مدعين
لا يكول مسلم مسيحي يهودي
هاي مسميات اتعودنة عليهه
ـ نونة يشهد الله اني احبج
واحب خواتج
وحتئ احب اطفالج واحب ياسر
بس لاتفكرين ترجعين اله
وهسة انتي عايشة حياتج بعيد عن الاذوج وممحتاجة احد بعد
ـ ياسر ماخليته راس حاجة
اني مو مصلحجية
ياسر انسان شهم وجان نعم السند الي بوقت الكل تخلة عني
ـ ما ناكر هالشي
واتزوجتو وصارت مشكلة واطلقتو
و افترقتو ..
وهسة صار غريب عنج
ـ يبقئ ابو اطفالي
وبعدين لاتخاف اصلا ياسر شال هالفكرة من راسه المسكين حاير بأهلة وين يلكاهم من هجمو الدواعش عليهم
ـ وانتي همين شيلي الفكرة من راسج
الله غفور رحيم نونة استغفري هواي وشوفي شلون ترتاحين نفسيا والكئابة تروح
ـ بقيت ساكتة ماجاوبتة
كلامة لامس كلبي
بس اكو شي بداخلي رافضة
ـ اني عاذرج لان اكيد بطفولتج مالكيتي اليوجهج
ـ جنت اقلد البقية بالصيام والصلاة
ومن اشوف سوالفهم التعبانة ويانة واحنة ايتام اكول هو هذا الدين
ـ تقليد بدون فهم ودرايه
ـ اي صح
ـ فاهمج ولهذا متعاطف وياج
اني جنت مثلج
تقليد مو فهم ولا درايه
ولو ما عمي الله يرحمة
لزمني وفهمني جان طلعت مثل اركان مطنش الدنية وممهتم وعايش بس لنفسي
او مثل سلطان متعصب ومتطرف
ـ همزين طلعت وسط ونقذتنة
ـ اكول نونة الكتب الدزيتهه الج قريتيهه
ـ سكتت ماجاوبته بس ابتسمت
ـ يعني ماقريتي شي
ـ ماحب اقرة شهاب
لو احب القراية جان كملت دراستي
ـ لعد ليش ماحجيتي جان دزيتلج مقاطع تسمعيهه
ـ كلما تتصل علية جنت تسولفلي عن امي وسوالفهه بيك وتفضيلهه لباقي،اخوتك وبر الابناء ومدري شنو .
ـ صح جنت ملهتي ومضغوط نفسيا لان عمي توفئ وبقيت وحيد
بس ميمنع جان حجيتي كلتي ليش سكتي
ـ شمدريني بعد صارت
ـ زين حاولي تقرين الدزيته الج
شوي اضغطي علئ نفسج
ـ ميخالف من اخلص شغلي ادخل للكوكل
ـ لا
لادخلين كوكل
اكو افكار غلط
ومتطرفة ومصايب سودة بي
اقري الادزة الج
واي سؤال عندج
دزي وارسلج جوابة ومصدرة
ـ اوك ميخالف
ـ يلة حبيبتي هسة لازم اروح
حتئ اغير ملابس امي
و اخابرج من يصير عندي مجال…
ـ اوك ان شالله لاتكطع بية
سديت التلفون ورجعت كملت طبخ
الجهال نايمين
والبنات بالغرفة
البيت هدوء
كعدت وفتحت الكتب الدزهة شهاب ..
عزة هاي شكبرهه الكتب
شيقراهه
كمت اتصفح بيه واقرة مقتطفات منه
ماعرف شبيه ابد مالي واهس اقرة
عفت الكتب ورحت للفيس ودزلي رساله شهاب…
ـ ماعرف مواقيت الصلاة عدكم بس هسة طلعتهه بالنت
وهاي دزيتهه الج
هية خمس اوقات يا نونة
وكلش سهلة وقصيرة لاتفوتيهه حرامات
ـ عزا ومنو كلك اني ماصلي؟
ـ حلوو يعني تعرفين تصلين
ـ هههههه اي اصلي وحتئ نغم تصلي بس صبا والحان لا
ـ حلووووو
اتصورتج تاركتهه
ـ لا مو تاركتهه
بس ماكو داعي احجي بيهه
واكول للرايح والراد اني اصلي شوفوني
ـ زين تقرين قران
ـ ليش اجذب عليك صارلي فترة كلش طويلة عايفتة
ـ متشوفين انتي ما متعمقة بالصلاة
لان تصلين بشكل ببغاوي بدون فهم
ـ اي مامتعمقة صح
ـ تمام..
استمري بالصلاة
وبعدين ارسلج هواي فيدوات سمعيهه
ـ الله كريم
مرة الايام وخابرني ياسر
جان نازل من الاجازة
شاف صور الاطفال وراسا اتصل عليه فتحتلة كاميرا حتئ يشوفهم
جانو كاعدين يلعبون ويناغون
وهو مندمج وياهم ويلعب
باوعت عليه محروك من الشمس
شكد جان ابيض صاير برونزي علئ اسمر
فرحته بالجهال متنوصف نسئ اني كاعدة يمهم
ويسوي حركات تضحكهم بالكاميرة
ازدها خربانة ضحك عليه
بس حيدر مو مثل ازدها ميضحك بسرعه
هاي تضحك للهوئ الطاير وهذا وجهه معبس يباوع صفح
ماحجينة هواي
بس سلام وكلي لكيت تلاثة من ولد اختي رغداء
طالعين لالمانيا..
ما اعرف افرحلة بهالخبر
لو اواسي علئ البقية النعدمو ومحد يعرفهم وين
مبين متأثر بس كاتم بكلبة..
رديت رجعت الكاميرا علئ الجهال والتهه وياهم الئ ان خلص شحن الرصيد ووكف النت يمة يلة فصل..
بهالفترة كمت اهتم بصلاتي اكثر
اكو امور مفاهمتهه بالدين
بديت ابحث عنهه واسال شهاب
ولو خطية ورة فترة يلة جاوب لان
ام اركان كلش انتكست صحتهه واتاذت وهو المبتلش بيهه
يومية بصلاتي ادعي لياسر يرجع بالسلامة ويلكة اهلة موجودين
وتفض هالحرب
الئ ان بشهر الثامن من سنة 2015 خابرني شهاب كلي امة توفت
بس رغم هذا مانقهرت عليهه ولا بجيت
كلت الله يرحمهه وسكتت
بنفس الشهر شهاب طلع تهريب لاوربا
من جان بتركيا نتواصل وياه
بس من عبر البحر انقطعت اخبارة
بقة اكثر من شهرين ماكو
كلبي اكلني عليه
لا اكو تلفون واخابرة ولا هو يخابر
حسيت بحركة كلب ياسر علئ اهله
هالولد صارلي جم سنة اعرفة
وماعاشرتة بس يوم واحد
وهيج اتاذيت عليه
شحال ياسر خطية فقد اكثر من 80 شخص من عائلتة
بشهر ال11 يلة وصلني خبر من شهاب
متخطي حدود اليونان ومتجه تهريب وية البقية للوكسمبورغ علمودي اجة ماطلع وية البقية لالمانية
هم وانزاح من كلبي
واخيرا طلع عايش
بس بقئ فترة طويلة بالكمب
مرة الايام والاشهر ثكيلة
ماكو شي جديد
الحرب بالعراق مخلصت والاوضاع بيهه تحسن بس بعدهه تخوف
مشت الاشهر وصارت سنة 2016
يلة نطو لجوء لشهاب
وصار قريب مني
التقيت بيه اول مرة
من بعد هالسنين الطويلة
هواااي متغير ..
السفر بالبحر والهجرة هواي مأثرة عليه
و ضعفان فد مرة
وجود الاخ المتفهم والرحيم
بحياة البنات نعمة جبيرة
حسيت بأمان اكثر رغم يسكن غير بيت
بس علئ الاقل اكو شخص شوي جبير يمي
جان ميقبل يبقئ يمنة يكول خواتج غريبات عني
هنة همين ميطلعن بس يسلمن عليه ويرجعن للغرفة
هواي تعلمت شغلات منة
جان يحب جهالي بشكل
ويحب خواتي وكلش يحبني
عوضني عن حنان الام والاب سوية
بهالفترة هواي تعلقت بي
نصايحه جانت كلش حلوة بالنسبة الي
يحجي ويايه بالدين
بشكل سلسل مو متزمت ومتشنج
اكو هواي امور ماجنت اعرفهه عرفتهه عن طريقة…
يعرفني ماحب اقرة
ويكعد هو يقرالي
يسويلي الشرح علئ شكل قصة
يعجبني بطريقة كلامة
رغم ستوة عمرة عشرين سنة
بس عقلة هواي جبير
الاكبر منه ماعرفو يوصلون المعلومة مثلة بهالطريقة…
صرت كلش احب مجالستة والكعدة وياه
صح اكو امور بقيت مقتنعه بيهه
بس الجزء الاكبر من قناعاتي اتغيرت وصقلت نفسي
ـــــــــــــــــــــــــــــــــــ
ياسر ـ سنة 2016 بدت عمليات تحرير الموصل
الفرحة جانت متنوصف واخيرا راحي يكون القتال ميداني وندخل بالمدن بلكي الكة خواتي بنات خواتي نسوان اخوتي بناتهن ..
ما نقطع عني الامل ..
هواي من ابناء الموصل اطوعو بالجيش ويانة بهالفترة
ذبونة علئ غرب الموصل
هواي ايام تعرضنة لحصار من داعش و الاسناد يجينة علئ اخر لحضة
دخلنة بأحياء المنطقة
جانت عبارة عن خرابة وبيهه بيوت محطمة وواكعه علئ اهلهه او بداخلهه ارهابيين
المنطقة بيهه قناص محد يسلم من ايدة
ورغم هذا ساعدنة هواي عوائل تطلع من مكانهه
هواي شباب راحو بسبب القناص
مكدرنة نحدد موقعه يضرب ويختفي ويرد يغير مكانة
وصلت اخبارية للضابط اكو عوائل محاصرة واتجهنة عليهم
الناس بفترة الحصار كتلهه الجوع
بيهم ماتو من العطش والجوع
كونية الطحين صارت ب500 الف دينار
ومحد يكدر يشتريهه لان رواتب ماكو المي ماكو يعتمدون علئ مي البير رغم بي نسبة من الكبريت
بعض الناس اكلو اشياء العقل ميتخيلهه اوراق اشجار حشيش اي شي يجي كبالهم ياكلو في سبيل يبقون علئ قيد الحياة
كلنة الدخلنة بالجيش نحتاج تأهيل نفسي من المناضر البشعه الشفناهة
القذرين جانو يتفننون بالقتل
شي ميستوعبة العقل
يستخدمون العوائل والاطفال دروع الهم يحتمون بيهه الجبناء
اكيد يحتمون بالاسرئ الايزيديات همين لان يعتبروهم سبايا
من افكر بهيج افكار ينهد حيلي
مرات اشوفهم بمقاطع فيديو شلون مزنجليهن وملبسيهن ملابس سودة مثل وجوهم السودة ويسوكون بيهم مثل الحيوانات
حتئ اصدقائي من يشوفون هالمقاطع يتألمون وياية ويتوعدون اي داعشي يشوفو يقتلو
طلعنة اني وفاضل وعبدالقادر وعلي بالهمر وية البقية ..
صار هجوم علينة برمانات يدوية
وكعت علئ سيارتنة وواحتركت بينة
بدون وعي فتحنة الباب واطشرنة برة
انتبهنة علئ روحنة كلنة مصابين والدم من فوك ليجوة تارسنة وعلي جان يطفي بنفسة ملابسة اخذت ووياه فاضل يطفي بي
ردت اتحرك من مكاني مكدرت
الم كلش قوي بجسمي مادري مكانة وين بثواني صار الرمي علينة من كل مكان بشكل عشوائي
جرني عبدالقادر وبقية الشباب احتمينة ببناية واكعه
باوعت لنفسي اريد اعرف ليش ماكدر اتحرك وشنو هذا الالم
لكيت رجلي اليمنة مكطوعه من الساق وبعد متر ونص عني ..
وللحكاية بقية……… 🥀
بارت 71 راح يكون اما الاخير او قبل الاخير ان شالله
لان الاحداث المهمة خلصت تقريبا
وبقت يوميات عادية
بلكي اكدر اكبت باجر لان كلش تعبت واريد اختمهه
وياريت تركزون علئ كلام شهاب ووكلامة وكافي تسقطون بية وتحجون حجي غريب عجيب عني