اسفة للتاخير لكن الواتباد كان متوقف وستوة اشتغل
الحلقة الثامنة والعشرون
#ليلة_من_فبراير
لاتنطي السنين رخاص
باليتعوض و فدوه
ينباع العمر بس.. ها
كون اليشتريه يسوه
❤️
ام مهند ـ وداعتج ياعيني
وداعت هذاا المي اليغسل حي وميت
اذا ماخلي مثل الحلقة باصبعج
اذا ماخلي يسحل روحه علييج سحل ويبجي دم
فلا اني ميسون ام مهند
ـ النذل يريد يتزوج عليه وحدة بكد بنته والله تعبت منة ومن علاقاته
ـ انتي بس ورقي
وجيبلي سلاباته يمي
والا افرلجياه فررر
واخلي يتيه اسم امة
وداعت عيونج الحلوة
ـ عرفت بيهه تسوي سحر
ماكو غير السحر اليفر الناس فر
خفت هواي منهه
جنت دائما اتخيل السحارات
مثل افلام الكارتون
خشمهن طويل وبي شامة ولابسات شفقة سودة ويخوفن
بس اشو هاي حلوة مو مثل خيالي
حاولت ما ارتبك وابين هادئة
لان هيـة كلتلي
اي شي تسمعي تنسي
وجنج مسمعتي
وخفت تشوفني مرتبكة
وتعرف سمعت شي
وتطردني ..تالي وين اروح
بقيت واكفة يم الباب
وعيني علئ النسوان
ماريد تشوفني اباوع عليهة
خاف تعرف سمعتهة
صافنة علئ النسوان بالاستقبال
من اجني لابسات شكل
وهسة صارن شكل ثاني
وحدة صابغه شعرهه اصفر
ولابسة كوستم تلث قطع
تنورة طويلة وسترة وجواه بدي مابي ردن (سترابلس)
اجتي لابسة حجاب وهنا نزعته
المكياج الحاطته يضحك كلش طوخ
مثل بطلات المسلسلات الخليجية
فوك عيونهه حاطة وردي طوخ
وحمرتهه وردي
طووخ وخدودهه وردي طووخ
ولو اني ما افتهم بالمكياج
يجوز هيج حلو عدهن
بس والله شكلة يضحك
اني ببساطة هدومي طالعه ارتب منهه
انوب هاي الثانية
لازمة جكارة وتسحب
واطلع الدخان من خشمهه
مبين عليهه صايرة عصبية
لان دتحجي وية وحدة وياهه
وتعابير وجهه وحركات ايدهه مبين صايرة كلش عصبية نار
حتئ من طفت الجكارة
جعصتهه جعص بالنفاضة
تحجي وتصفگ بيدهه
اتمنيت اسمع مشكلتهه صار عندي فضول اعرف ليش هيج عصبية
زين هذيج المرية ليش كاعدة وحده
شعجب متسولف وية احد
اشو منزوية وكاعدة وتفتل بشعرهه
عفتهه وكمت اباوع علئ البقية
بيهن كلش مرتبات وانيقات يخبلن
وبيهن مخربطات مدري شلونهن
بس لابسات ذهب كومة
يفتح محل صياغة ويترسهه ترس
ام مهند ـ هاا ولج شو صافنة
ـ ها .. هه لا هيج ماكووشي
ـ وجهج ينطي الوان ياماكو شي
احجي شبيج
ـ خاله لا تزعلين مني
بس اول مرة اشوف هلكد ذهب
ـ هههههههه خرب عرضج بنت ازدهار وين تباوعين ولج
