الحلقة الثامنة والستون
#ليلة_من_فبراير
ذهب الزمن
الذي يخاف فيه أهلنا من الاغتراب،
وجاء زمنٌ
نحن وفي غربتنا نخاف عليهم من الوطنِ
#الكاتب الروسي ديستوفسكي
❤️
ياسر ـ حضرت نفسي لموعد طيارتي
تقريبا بعد اقل من 3 ساعات
واتصلت عليه نغم ..
الوو
ـ هلوووو عموووو ارريد البشارة
ـ شنو يابشارة
ـ معلييية اريد البشارة يلة اكلك
ـ يابة شتريدين اني حاضر
ـ بكيفك انت كريم واني استاهل
ـ هسة غير اعرف شنو البشارة
ـ نونةة حامل عموو حاامل
ـ حامل؟!
ـ اااي والله
هسة اجتي هية ونادين من الطبيب
ـ بقيت ساكت مستغرب الاسمعه
شمعنئ بهالوقت حبلت
ـ عمو وينك اشو ساكت
صارلي ساعه احجي وانت متجاوبني
ـ هية وين هسة
ـ ابيتنة بالشقة
ـ اوك فد ربع ساعه وامر عليكم
ـ يلةة نننتضرك بس لاتنسئ البشاارة
ـ اي حبيبتي صار..
سديت التلفون وكعدت شوي وية نفسي
بس ماحاس بفرحه
ولا كأنو قبل كم يوم من شفت عائلة وياهه اطفال صارت غصة بكلبي واتمنتيهم اطفالي ..
زين ليش هسة عندي برود
لا فرحان ولا حاس بأي شعور
شنو القصة شصايرلي
انتبهت باقي ساعتين ونص علئ موعد الطيارة... يعني ماضل وقت
لازم اروح وارجع بسرعه..
ماحاولت افكر بشي بالطريق
كلت اوصل وافتهم ..
وصلت للشقة ودكيت الباب وفتحتهه نغم
ـ هلااااوو عمووو اجئئ همو ياسرر
ـ ياهلا بيج عمو ..
ـ ووين البشارة
ـ غير يوم خليهه اجيبلج التريدي
ـ اتشاقة وياك عمو هاي شبيك
تعال تعال ادخل
ـ جرتني من ايدي ودخلتني للهول
لكيت نادين ونونة كاعدات
نادين ـ الف الف الف مبروك
يتربئ بعزكن ودلالكن ان شالله
ـ تسلمين
ـ يلة انا استأزن اتاخرت ع بيتي
ـ سلميلي علئ جاد
ـ ان شالله
نونة ـ جنت متلهفة لشوفته
وكعدت احسب الثواني شوكت يجي ويمر علينة
مدعرف اتخيل شكله
راح يكون فرحان او لا
بس اعرف بي يحب الاطفال وجان يتمنئ يصير عندة ولد
ولو مو دائما يذكر كدامي هالامر ..
من اندكت االباب كلبي كمز مكانة
واخيرا راح اشوفة واشوف لهفته بهالخبر...
دخل للهول يباوع بالوجوه
نادين باركتله ورد عليهه ببرود
متخيلت هيج راح تكون ردة فعلة
كأنو متيه شي
اوضايع منة شي
شكلة كلش حزين
لا يضحك
لا فرحان
ولا اي تعبير بوجهه
طلعت نادين وبقينة لوحدنة
ويمنة نغم والحان
بس صبا بالغرفة ماطلعت
جنت انتضرة يحجي
بس ماحجئ اي كلمة ...
ليش احسك ما فرحان
ـ مستغرب الخبر ..
ـ من شنو تستغرب !
ـ ما ادري ما اعرف
ـ معقولة تشك بية
ـ لا تحجين شي اني ماحاجي
ـ جانت بيدي ورقة السونار
مكتوب عليهه عمر الجنين..
هاي الورقة كدامك
اقراهه واتاكد حتئ ترتاح
ـ شالت الورقة وخلتهه يم وجهي
قريت عمر الجنين 3 اشهر ...
يعني صارلج 3 اشهر حامل
ـ اي اي صح
ـ لعد ليش ماكلتي
وليش اطلكنة
وليش كلتلي اريد طفل وانتي حامل مدفهم تصرفج شنو معناه
ـ لا انت فاهم غلط
ما جنت ادري بنفسي حامل
يعني ما اعرف الاعراض ولا حاسبة شي
ـ شلون متعرفين
كل البنات من يحملن تتخربط امورهن ويتعبن
ـ اي صح اني همين هيج جنت
بس مادري حامل
عبالي لان مقهورة ومكتئبة هيج وضعي
ـ يعني 3 اشهر حامل ومتدرين !
ـ انت شاك بشي؟
ـ لا
لا شاك بيج ولا عمري راح اشك بيج
ـ لعد شنو معنئ برودك
ـ لان مقهور ومستغرب
اذا جنتي حامل
ليش ماحجيتي
وليش اطلكنة
وشلون ماحاسة اكو بطفل بداخلج
شي ممترابط بشي
ـ والله مادري اني حامل
ـ ما اعرف
مدكدر حتئ اجمع افكاري
لو بعدنة متزوجين
جان اختلف الوضع
والفرحه صارت متنوصف
بس هسة ماحاس بشي
كل الاعرفة خسرتج علمود طفل
علمود تصيرين ام
وهسة جاية تكليلي حامل
ـ يعني مافرحان؟
ـ شلون مافرحان
صار عمري 37 سنة وبعدني ماصرت اب
فما معقولة اكو شخص بوضعي ميفرح بهيج موضوع
ـ لعد شنو معنئ ردة فعلك
ـ ماراح تفهميني
ولا تفهمين قصدي
ـ زين اخذني علئ عقلي و فهمني
ـ طالما تحقق حلمج والله رزقنة طفل
معناهه ماكو داعي نبقئ منفصلين
ـ اتنمئ ارجع علئ ذمتة
بس ماعرف ليش بقيت ساكته
رغم شفت حالتة ماتغيرت
حتئ من رجعت علاقتة بأهلة
بقئ مثل ماهو كئيب ومياكل وذبلان
ـ ماحجيتي؟
ـ خليني افكر شوي
ـ تفكرين!
اوك علئ راحتج
كدامج شهر كامل
فكري بي مثل متريدين...
نغم ـ لا شدعوة شهر
ـ خليهه علئ راحتهه
وهسة لازم اروح لان اتاخرت عن موعد الطيارة
نغم ـ الله الله راح يساافر عموو
ااي هييج سافر اتونس اطلع غير جو لاتبقئ كئيب وتعبان بالبيت
نونة ـ وين مسافر ياسر
ـ للعراق
ـ عزااااااا العزاااااني
ياعراااااق بهالاوضااع
انت صددك تحجيي
ـ اي ليش لا
اريد اشروح اشوف اهلي
ـ زين ليش ماكلتلي
ليش ماحجيت
شنو ناوي تروح سكتة
علئ الاقل انطينة خبر
ـ ليش انتي كلتي حجيتي نطيتيني خبر من رحتي وقدمتي ع اوراق طلاك
اعتبرتي اكو رجال بالبيت
لا
عبرتي كلشي
ورحتي اتصرفتي من راسج
ـ لاتقيس هاي بهاي
ـ نفس الشي
نغم ـ عمو العراق اخبارة موزينة شلون تروح
ـ اهلي هنلك ولاازم اروح اطمئن عليهم
نونة ـ شوف خلي اكلك
اني قابلة هسة نروح نتزوج
امشي نغم جيبي اجنطة مالتي والــ
ـ بس اني ممستعد
طلبتي مهلة تفكرين
ولازم تاخذين المهلة
مارييد تاخذين قرار سريع وبعدين تتندمين عليه
نغم ـ عمو لاتخلي الصوج بيهه
ترة نونة معليهه
نونة ـ ااانجبي نغم
ياسر ـ شنو ظامين عني
احجو لاتبقون ساكتين
نغم ـ ليش اسكتيني
خلي عمو يعرف
ماكو داعي بعد نظم شي
ـ دكول اسكتتتتي
ـ احجي نغم معليج باختج
ـ عمو عندك اخ اسمة بركات
طلب من نونة تتركك حتئ يرجعون يحجون وياك
نونة ـ بقيت ساكتة
ما انكر اتمنيت نغم تحجي
رغم جنت اعارضهه واسكتهه
بس بداخلي ردت يعرف اني ماتركته علمود شي يخصني
لو انانية مني
بقيت اباوع عليه اريد اشوف شنو ردة فعلة ..
بس مافهمته
لان ما استغرب ولا انصدم ردة فعلة همين باردة
ـ هسة فهمت ليش اخوتي خابروني بنفس يوم طلاكنة
رغم جنت شاك بس مالكيت دليل
لاهمة بينو ولا انتو حجيتو
نغم ـ اهدء عمو لاتصير عصبي
زين علئ الاقل اكعد ليش واكف
ـ اريد تحجيلي بالضبط الحجي الصار بينج وبين بركات
نونة ـ سويت هيج لان شفتك تذبل كدامي ومتحملت اسكت...
وبلشت احجيلة كل شي من راسلته اول مرة الئ ان دزيتلة اوراق الطلاق ..
ـ ليش ماكلتيلي جان علئ الاقل اعرف السبب الحقيقي للطلاق
ـ لان اكيد ماجنت حتقبل اطلكني
ـ بس مو من حقج تضمين عليه
خليتيني اعيش اتعس ايامي
حسستيني بنقص
طعنتيني برجولتي
كل هذا مافكرتي بي
ـ اطعنك برجولتك؟
وتحس بنقص!
ـ اتخيلي اني كلتلج اريد اتزوج لان اريد طفل ومن حقي اكون اب
شنو راح يكون ردة فعلج
ـ انصدمت بكلامة من عكس الكلام عليه
صدك كرهت نفسي
ـ شفتي ..
الحجي سهل لليحجي
بس يذبح الماقبيلة
ـ اني مافكرت هيج
مافكرت انتقص منك لا والله ابد
ـ علئ العموم صار اللي صار
و هسة انتي حامل
وان شالله اثنينكم تكونون بالف سلامة
باوعت لساعتي وكمت..
لازم اروح هسة لان اتاخرت
ـ عزا وين تروح
اني حجيتلك حتئ تبقئ هنا ومتروح للعراق
ـ لا لازم اروح لاهلي
لان اولا كلش مشتاقلهم
وثانيا احاول احجي وياهم بلكي يفيد كلامي...
ـ يعني هسة انت فرحان
ـ اي اكيد
ـ لعد ليش متضحك ليش متبتسم
ـ هاج هاي ضحكة.. شوفي
فتحت حلكي عود دة اضحك بلكي تقتنع
ـ هذه مو ضحكة حقيقية هاي مصطنعه
ـ وين صبا اشو ماشفتهه
يلة خلي اودعكم ماضل وقت
نونة ـ يعني مصمم
ـ صبااا صبا ووينج
صبا ـ نعم عمو
ـ تعالي خلي اشوفج عمو ورايه طريق
يلة اني اودعكم
من اوصل ان شالله اخابركم مناك
ديرو بالكم علئ نونة حبابات
نغم ـ بعيونة نونة شعدنه غيرهه
نونة ـ ارجع بسرعه لا تتاخر
ـ شهر راح ابقئ يم اهلي
و سالار همين وعدته اروح يمة مشتاقلة ومشتاق لسوالفة وتحشيشة
ديري بالج علئ نفسج لاتشيلين وتحطين بهالغراض عبالك عماله تشغتلين
ـ ان شالله لاتخاف علية..
بس الله عليك لاتتاخر
ـ ان شالله ..
ودعتهم وطلعت
احساس بداخلي غريب
فرحان بهالخبر
بس عندي غصة بكلبي
اخذت تكسي وللبيت عدل اخذت الجنطة واغراضي وللمطار راسا رحت...
مر الوكت وصعدت الطيارة وكعدت يم الشباك
فرحان لان راح اشوف اهلي
بس عندي غصة سممتني
اريد اتخلص منهه ما اكدر
كعد يمي رجل انيق مرتب
وبيدة جنطة دبلوماسية ..
قلعت الطيارة واستقرينة وورة فترة اجتي المضيفة وقدمت النة الاكل
ماحبيت اكلة لان ما اشتهي
فـ بقيتة بغلافة وخليته كدامي ..
الطيارة هدوء
الا كم نفر يسولفون بينهم
وبصوت ناصي
ملل بين ما اوصل شيخلص الوكت
اجتي المضيفة ولمت الاكل الموجود
الرجل البصفي حجئ وية المضيفة وبعدين راحت
وهمهم وراهه بصوت ناصي
عرفتة عربي لان همهم بأحرف عربية
ههه شبيهه وياك
ـ ياه حضرتك عربي
ـ اي
ـ كنت بقول لنفسي انا الوحيد هنا بعرف اتكلم عربي
ـ محسوبك من العراق
ـ يعني خالي
ـ خالك شنو
ـ اه .. ههههه امي من العراق
فتبقئ انت خالي
ـ هههههه اهلا وسهلا بيك ابن اختي
ـ ربنا يخليك
الحمد لله متكلمتش بحاجة وحشة قدامك
ـ لا ماسمعتك بس انتبهت همهمت بأحرف عربية
ـ انا جلال .. امي عراقية وابوية مصري
ـ اتشرفنة .. واني ياسر ابوية وامي عراقيين
ـ هههههه اتشرفنا يسدي
ـ حلو التنوع
ـ اه طبعا
كلنة عرب و اجمل مافينا التنوع
ـ اي اكيد ..
كعد يحجيلي عن اهله وحياته وبعض الامور من خصوصياتة
وعرفت جاي للعراق ياخذ حصة امة من الارث مالتهه من اهلهه
بالحجي جبناهه عن الاوضاع الدتصير بالعراق
ـ انت مسمعتش بتنظيم اسمو بوكو حرام
ـ بوكو حرام شنو
ـ تنظيم اراهابي بافريقيا
افعالو كلها دموية بيقتلو بالناس الابرياء بدون ذنب
تقريبا زي جبهه النصرة في سوريا
ـ مثل الارهابيين العدنة
ـ كلهم جماعات ارهابية متسترين بالدين اتصور حتئ الطفل ماسلمش منهم وبيقتلو
ـ اطفال هم
ـ انت متابعش الي بيحصل بالعراق وببقية الدول؟
ـ اكيد شلون ماتابع
بس مرات مامدر اشوف كل الاخبار بسبب الشغل
ـ لا دي مصايب ربنا يبعدنة عنهة..
ـ سرحت بتفكيري وية هالكلام
فعلا الشي الديصير بالعراق مو طبيعي
هو يحجي واني مو يمة ابد بالي يم اهلي ..
كل همي اوصل لبيت اهلي واطلعهم
خلصت الرحلة وسلمنة علئ بعض وافترقنة اني وجلال
بدون ما ارتاح
من الطيارة للسيارة راسا بدون راحه
اريد بس اوصل لاهلي
ورديت نزلت وصعدت سيارة ثانية
طلعت يوم 29/ شهر السادس
ووصلت يوم 30 بالشهر
اسمع الناس مخبوصين ويحجون عن تنظيم اسمة داعش
شاب كاعد يمي بالسيارة سألتة..
شنو صاير عن شنو دتحجون
ـ شنو ماسمعت بالمصيبة الوكعت علئ راسنة
ـ احجي يمعود وكعت كلبي
ـ تنظيم ارهابي ضهر بالعراق اسمو تنظيم الدولة في العراق والشام او دولة العراق والشام هكذ شي ولقبو داعش
ـ داعش اشنو
ـ خوية الله يستر من الجاي
الجيش انهزم والاوضاع تعبانة
ـ رد عليه واحد ثاني كاعد ويانة بالسيارة
ـ لاتكول انهزم الجيش
شيسوون يعني هالكم نفر
اذا همة قياداتهم شررردت بليلة ظلمة
ما دكلي شيسوون لوحدهم
لاتوجيه ولا سند وياهم لاقيادة ترأسهم
عمي الموصل مبيوعه من روسهه الكبار والحكومة
كلهم سلموهه بيد داعش وطفروو
ـ هالاخبار وترتني
صرت احسب الثواني حتئ اوصل
الدنية ليل والاوضاع تخوف
السايق يمشي بينة علئ الترابي واماكن منقطعه نوعا ما
الاجرة كلش غالية مقارنة بالسابق
الكل يكول الموصل انتهت
احتلوهه الدواعش وانسحب الجيش منهه
والي يكول الجيش سلمهه بيدهم
ومنعرف الصدك من الجذب وتاهت علينة
بس الكل متفق علئ كلمة وحدة
الله يستر من الجاي
لان حتئ تلعفر وكعت بيدهم
دخيلك ربي يعني سنجار بالنص صارت
بين سورية والحضر والموصل والبعاج وتلعفر
ماكو منفذ بيهه
بقيت ساكت واسمع الناس وتوقعاتهم
صار عندي احباط ويأس من كلامهم
الطريق كله حاطين اسواء الاحتمالات كدامنة
كل شوي نتخيل الدواعش طلعو النة واخذونة...
ما ارتاحينة الا من دخلنة حدود سنجار
لان البيشمركة جانت لازمة الامن بيهه مو الجيش العراقي فما دخلوهه
مر الوقت ووصلت لبيت اخوية
الشارع هادئ وماكو احد
دكيت الباب علئ كيفي ماريد احد يسمع..
دكيت الباب بالمرة الثانية يلة طلع فنر..
تسالمنة وتحاضنة ..
دخلت لكيت اهله نايمين وعادية الاوضاع عدهم..
شنو القصة اشو ممهتمين
فنر ـ بشنو نهتم
ـ بشنو تهتم
ماسمعتو علنو عن تنظيم بالموصل اسمو داعش
ـ اي سمعنة بس لاتخاف
هنا ماكو شي
لان الاوضاع مسيطيرين عليهه البيشمركة
ـ يابيشمركة ..
الاوضاع تعبانة وخارج حدود السيطرة
تلعفر سقطت بيدهم والموصل ولاقي الاقضية بيديهم شتنتضرون
كعد اهلك خلي نطلع منا
ـ تعال ياعمي ارتاح
اكعد واطمئن لاتخاف
الصار بالموصل لعبة بين الحكومة المحلية والارهابين
صارت سلم واستلم
هنا ماكو شي صدكني ..
تعال لغرفتي نكعد ونسولف
ـ خلي اشوف ابوك
ـ خليهه الصبح لان هسة نايم
خطية علئ الادوية و كوة نام هواي تعب اليوم
ـ عندة خبر سقطت الموصل وتلعفر؟
ـ يدري بالاحداث الصارت بداية الشهر
بس اعلانهم سيطرتهم علئ الموصل
لا ميدري بيه..
ـ لازم نحجيلة
ـ ابوية تعبان ياعمي ..
وهيج خبر اكيد راح ياثر عليه
ـ اني اريدة. يأثر عليه حتئ يقبل نطلع منا
ـ دتعال هسةة بالغرفة مالتي مشتاق لكعداتنة سوية سوالفنة مدكلي شصاير بيك ليش هيج ضعفان
ـ ماحجيت شي وياه ولاجاوبتة
الدنية ليل والكل نايم من الصغير للجبير
كعدت يمة بالغرفة وسوالي استكان جاي شربتة وكعدنة سولفنة ببعض الامور
بس انهديت من التعب
الطريق هواي تعبني
والتفكير تعبني اكثر
ماعرف شلون غفت عيني ونمت
كعدت علئ صوت مرة اخوية ام فنر
طلعت من غرفة ابن اخوي وسلمت عليهه
ام فنر ـ هاي شنو ياسر ابيتنا
ياهلااا والله شوكت جيت شنو هالمفاجئة
ـ البارحه اجيت بالليل
ـ نحمد الله علئ سلامتك
بس شنو هاي
اشصاير بيك ليش هيج متغير
ـ الله يسلمج ام فنر
هي هاي حال الدنية ..
ام فنر شلونة حيدر اريد اشوفه
ـ بالغرفة متمدد وكلش تعبان
ـ راح ادخل عليه
ـ اي عادي ..
هسة اسويلك ريوك انت والولد واخابر خواتك واخوتك ونسوانهم ييجون يشوفوك
ـ مشكورة وردة ..
رحت اركض لغرفة حيدر
دخلت وانصدمت بشوفتو
هذا الطويل والضخم والقلافة
اطول واحد بينة واضخمنة
هيج صاير حالو
الكاميرا جانت خداعة
من افتح كام واحجي وياهم مو هيج يبين هسة فد مرة ضعيف هزيل
الشيب احتل شعرو
ماضل مكان اسود بيه..
اتقربت عليه وكلتله
ابو فنر
فتح عينو وبقئ يباوعلي
حسيتو زعلان مني وماخذ علئ خاطرو
حضنتو وبقيت ابجي
جنت كلش مشتاق لحضنو
ماكدر يحجي وياية بس عيونو سولفت كلشي ..
ابو فنر خليني اخذكم وواطلع من سنجار
الاوضاع حيل تعبانة وابد مو صحيحة ا
ام فنر ـ يا وين نروح
ـ لاتعارضيني ام فنر الاوضاع كلش تعبانة شنو مدتسمعون الاخبار
ام فنر ـ شوف حتئ اخوك مقابل نطلع رمش بعيونة
ـ خابرتي اخوتي وخواتي
ـ اي اي كالو هسة ييجون
ـ خلي نلتم عليكم ونقنعكم..
بلكي تسمعون الكلام
خلتلي ريوك واتريكت
واجوي الولد ونسوانهم واولادهم وخواتي همين اجوي
حاولو يقلبوهه لجلسة عتاب بس سكتتهم ..
هسة ماكو داعي لهذا الكلام
البنية طلكتته وكل راح لحال سبيلو
المهم بالمصيبة الانتو بيهه
ليششش متطلعووون من سنجااار
هافال ـ البيشمركة مسيطرة علئ الاوضاع هنا لاتخاف أمن...
ـ تدروون شلون اجيت
الطريق كلة ملغم ارهابيين
وعلئ الترابي مشينة خايفين يطلعون النة
تعرف شنو يعني هذا
معناهه انو احتمالية احتلالهم لسنجار كلش وارررد
لان احنة حدوديين وية سورية ياناس افهموو احنة مطاوقين بيهم وبنصهم من كل مكان معقوولة مدتفهمون الحجيي
رغداء ـ بيت عمتي ماطلعو بعدهم كلهم بالبيت
ـ انتو بيا عقل تفكرون
انطوني تلفون اخابرهم واحجي وياهم
امشو حضرو نفسكم خلونة نروح نطلع منا احنة صايرين بنص الارهابيين افتهمووو داير مدايرنة الدواعش
محد اقتنع منهم بس شيرين ونيرمين ورسلان كالو احنة همين هيج دنفكر نريد نطلع
رسلان ـ عندي نية اطلع بس مو هسة
ـ شتنتضر
ـ احنة كلنة عائلة وحدة شلون افكر بروحي واعوف اخوتي وخواتي
كلت اخذ عائلتي لكوردستان
وارجع اخذ البقية بالسيارة
ـ وتبقئ رايح راد؟
اكلك الطريق ملغم
ماخذين الموصل و تلعفر واحنة صايرين بنصهم ماعدنة منفذ غيرهم مين نروح علئ سوريا مثلا
ـ وشنو الحل
الي عندو سيارة يروح بيهه والماعندو يستأجر
رغداء ـ احنة عدنة بس منطلع
اني وزوجي واولادي ونسوانهم واحفادي وين نروح
تدري احنة لوحدونة 25 نفر
نبقئ هنا واليجري علئ اهلنة يجري علينة..
ـ لاااا الححييي وياكم متععب
زينب ـتدري قبل فترة رادت لارا تجس بس ماخليتهه
ـ علمود تكمل
هو انتو وحاير بيكم
انتي زينب ماقنعتي زوجج
ـ ميقبل لان اهلو ميقبلون يطلعون
حنان ـ كلنة هيج ياسر
احنة محكومين بزلمنة منكدر نتحرك بدون موافقتهم
ونكول ان شالله ماكو شي
ـ كرهت نفسي وكرهت اهلي
لان محد فاهمني منهم
اخذت شريحه من هافال عده وحدة زايدة ونطانياهه
راسا دخلت الرقم وخابرت نونة وطمنتهه علية
نونة ـ جنت كلش مقهورة من ردة فعلة
طلع وعافني وراح
سافر للعراق
ماعرف شصار بية حالتي اتازمت اكثر
صار ثاني يوم وماخابرني ياسر
كال بس يوصل يتصل
شعحب ما اتصل معقولة ماوصل ..
خلصت شغل وكملت وكعدت وية خواتي فتحت النت
وكعدت اتصفح بي
وشفت بكوكل بوست شكبرة
سقوط الموصل بيد داعش واعلانهه ولاية من ولاياته..
اتخبلت من هالحجي
عزا بعيني شنو يعني هالكلام
راسا خابرت شهاب اخوية...
ولك شهاب شنو صاير يمكم
ـ سقطت محافظة الموصل بيدهم والله يستر من الجاي
ـ عزااا بعييني عزاااا بعيييني
ـ شنو شبيج
ـ يعني شنو الاوضاع بالضبط
كلهه الموصل اخذوهه لو نصهه فهمني
ـ محد يعرف كل واحد يحجي شكل بس الموصل انباعت..
ـ عزاا بعيييني شهالخظ الاغبر عليج يانهاوند
ـ شبيج فهميني
ـ ياسر راح للعرااق البارحه
شلون شسوووي
ـ هو وين بالموصل يعني وين اهله
ـ بسنجار
ـ يكولون سنجار ماعليهه شي
ـ ما اعرف اشو ممطمنة
خليني اادك عليه يلة بعدين اخابرك
راسا دكيت علئ رقمة لكيته مغلق
اراسله فيس ماكو كل مواقع التواصل مسدودة عندة
عندي حساب بركات راسا راسلته كلتلة.
شلونك بركات اريد اطمئن عليكم
سمعت الاوضاع يمكم مو زينة انتو شلونكم اخوتك خواتك خو ماكورشي ياريت اطمنة
انتضرته يجاوبني بس ماجاوبني
ورة اكثر من ساعتين يوم يلة رد عليه
ـ احنة بخير
ـ هاي الجملة شوي بردت ناري
بس بقيت خايفة
ممعقولة صاير شي ويكول بخير
ان شالله همة صدك بخير
ردت اسألة عن يسار بس خفت
مر يومين خلصتهه بجي
اباوع لاخبار العراق واكول خلص ياسر قتلو لان ما اتصل عليث
الئ ان خابرني رقم غريب رديت عليه طلع ياسر
انهاريت بعد متحملت
وووووينك ليشش ماخابرتني
الاوضاااع مو زينة اااارجع الله يخليك يكولون مصايب صايرة بالمووصل اررجع
ـ لاتخافين الاعلام يهول هيج مواضيع ماكو شي
ـ لاا شنو يهوول شفتهم بالنت
محتلين الموصل ومحد باقي بيهه
الله يخليييك اررررجع
ـ شنو متصدكين بكلامي مو دكلج ماكو شي اني واخوتي وخواتي موجودين وان شالله نطلع سوية لاتخافين سياراتنة جوة ايدنة ونندل الطرق
ـ انت صدك تحجييي يمــ
قاطعني وماخلاني اكمل كلامب
ـ البنات شلونهن
ـ كلنة زينين بس ارجع
ـ اوك ميخالف عن قريب ان شالله ارجع.. يلة سلامي للبنات وديري بالج علئ نفسج ..
ـ وين
ـ غير وكت اخابرج نونة .. يلة باي
بقيت هالفترة احاول وية اخوتي يطلعون
ما ادري شبيهم هيج مطمئنين ومامهتمين
رغم هواي ناس من جوارينة تركو بيوتهم وطلعو
بس بقت شريحة لفقراء الماعدهم فلوس يدفعون الاجرة لان كلش غالية
وشريحه العقولهم يابسة مثل اهلي
انو هذه ارضهم ويندفنون بيهه ولا يتركوهه ويهونون عن نفسهم انو ماكو شي
خلص صبري منهم ومليت
طلعت شيرين ونرمين وعوائلهم
اما زينب ورغداء وحنان وملك
بقو بسنجار
لان ازواجهم ماقبلو يطلعون
اما بقية اخوتي عدا رسلان فرفضو يطلعون ..
كلبي بين نارين
ماريد اتركهم هنا
بس اعرف وجودي وياهم مالو معنئ
وبيوم1 بشهر الثامن اجئ رسلان وكال راح اطلع بالليل
منو يجي وياية السيارة فارغة
حاولت اخر محاولة وية اخوتي وخواتي لكن لا حياة لمن تنادي
رسلان ـ اليوم بالليل نطلع
اصلا رجعت علمودكم
كلت بلكي تقتنعون وتجون ويانة
بس يلة. براحتكم..
يلة. ياسر
جيب جنطتك وامشي وياية
ـ ماعندي شي هسة اجيبهه
ودعت خواتي واخوتي
ماعرف ليش كمت ابجي واشهك
حضنتهم وكأنو اخر مرة راح اشوفهم
وهمة يهونون عليه
يجوز بالطريق راح يصيرلنة شي
او يجوز همة راح يصيرلهم شي
عقلي واكف من الافكار السوداوية
بس خليتهه علئ الله وطلعت اني و رسلان
بالطريق هواي سيارات جانت ويانة
بس مطفين الاضوية ونمشي يطيئ
رغم ليل بس نخاف لا يشوفونة
وصلنة كوردستان بالكوة ثاني يوم الصبح
خابرت اهلي بسنجار كالو ماكو شي لاتضل قلق وتتفاول علينا
اني هم كلت يالله ان شالله ماكو شي هم صدك ليش اتفاول عليهم
التقيت بنرمين وشيرين وعوائلهم
لكيتهم متحضرين يريدون يطلعون تهريب..
وانت رسلان
ـ لا انة ابقئ بكردستان ماريد اطلع
ـ روح يمعود طالما هسة باب الهجرة انفتح
ـ لا ماعوف العراق ما اكدر ..
ـ براحتك
لعد اني باجر اروح احجز حتئ ارجع
ـ شعندك راجع مو طلقتهه بعد شكو راجع
ـ اي صح
بس اني مستقر هناك وطالب لجوء وعايش حياتي
ـ الغربة مرة ولك
ـ ترة الغربة بوطنة
الوطن اليوفرلك امان تنام ليلك
ومكان تعيش بي
مو تبقئ قلق دائما ..
ـ هم صح .. الله يوفقك ..
ـ خابرت سالار وسلمت عليه وكلتلة اني بكوردستان
كلي باجر العصر اجي يمك اشوفك...
صار ثاني يوم ورحت حجزت حتئ ارجع
والعصر اتلاكينة اني وسالار
وخلصنة اليوم كلة سوية
سألتة عن الاوضاع وشنو هالمهزلة
كلي محد ديعرف شنو الفلم
بس لاتخاف
سنجار بيد البيشمركة الاشاوس ماعليهم شي ..
كلتلة الله يطمن بالك
خلصنة اليوم نفتر ومطاعم ونسولف بالاوضاع ماضلت سالفة ماحجينة بيهه..
مر يوم والثاني
وكعدنة علئ اتعس خبر بحياتي كلهه خبر دخــول داعـــش لســـنجار
صرت مثل المخبل وفقدت
اتهسرتنة اني وخواتي ورسلان
خابرت علئ اهلي ماكو جواب
كلهم خابرناهم بس محد يررد منهم
رسلاااان امشي نروح االهمم
اكيددد صار شي عليييهم
ممعقولة محد يرد منهم وووين صارووو
ـ ولك وين نرووح
اذا قبل اكو طريق تهرب منوو
هسة كلشي ماكو
يعني تووكع بيدهم تووكع ويقتلووك
ـ ووولك شننسوووي كلييي شننسووي
ـ ما اعررف مااعرف
خلييني افكرر
يجوز همة يتصلون عليناا يجوز همة غالقين تلفوناتهم لا تضل قلق
ـ هذووول اخوتك
لايااخذوون حجاية
لا يسمعون كلمةة احدد
البراااسهم يسوو وهاي النتااايج
اخذت تلفوني وخابرت
مرة ثانية وثالثة
وكل شوي اتصل بس ماكو فايدة مغلق
كلنة مانمنة
بقينة للصبح سهرانين نتابع اخبار سنجار
هواي ناس قتلوهم الدواعش
هواي بنات اغتصبوهن
اخذو الام من اطفالهه
هذا كلة بيوم واحد سووه
لعد شلون بالايام الجاية
شنو شراح يسوون بعد
شنو هالبشاعه عدهم
مر يومين يلة خابرت حنان علئ رسلان
ماصدكت احد خابر منهم..
وكفت يمه اريد اسمع شنو ديحجون
رسلان ـ اانتي ووين باقي اخوتج خواتج ووين
ــ ما اعرف لا تسألني
دخلو علئ الناس لبيوتهم
واخذو الزلم والنسوان حتئ الجهال اخذوهم كلهم
حيدر واعائلتو ماعرف وينهم
هافال وبركات وسلمان وعوائلهم كلهم اخذووهم بيوتهم فارغة مابيهه احدد
ياسر ـ شلووون اخذووهم منو كللكمم
ـ جيرانهم التقينة بيهم همين هربانين ويانة
وهسة احنة رايحين للمجهول مانعرف وين نروح وماعرف شنو مصيرنة ومصير اطفالنة
ـ وخواتج وين
ـ ماكو ماشفت احد منهم
بلكي اشوفهم بالطريق ويانة يارب ادعولنة
ـ تلفوناتكم ليش مغلقة
ـ ماكو شبكة
هسة كوة اجتي
دمار ياخوتي دمار
الاطفال يتباجون من التعب والعطش واحنة نبجي من الخوف
الطريق مسدود
مادري شنو مصيرنة
داعش منتشرين بكل مكان
شجانة وماسمعنة كلامكم وماطلعنة
ـ انتي وين هسة بالضبط فهميني
ـ ماعرف .. والله ماعرف
طلعنة احنة وهواي ناس ويانة ونمشي هربانين بس ماعرف وين راح نروح
ـ دتحجي ونقطع الاتصال وياهه
رديت خابرت عليهه
ماكو خارج التغطية
اشتريت رصيد وحولتة لرقمهه
بلكي من تجي شبكة تخابرنة
ـ بقيت الوب علئ اخوتي
اخابر وماحصل احد منهم
ماعرف شسوي
خابرت سالار سألتة شنو صار وين البيشمركة
يكول ما ادري حالي حالك
صبحنة علئ هيج خبر
ماعرف شنو القضية خلي اسل واشوف بلكي يجاوبون.. ومن افتهم اكلك..
مر يومين والثالث وماكو اخبار
ماعدنة غير البجي والنوح علئ الفقدناهم
مدتخيل عوائل كاملة انمحت ومالهه اثر
اخوية حيدر عائلة 20 نفر
هافال عائلتة سبع نفرات
بركات عشرة
سلمان ثمانية
رغداء 25 نفر
ملك خمس نفرات
حنان تسع نفرات
وزينب اربعه
عوائل اخوتي بين اولادهم واحفادهم
اكثر من 80 نفر محد يعرف اراضيهم سنجار جبيرة
بيهه كل الطوائف
بس احنة 80 نفر
لعد شكد ماخذين هذول
وشنو نوع قوتهم بحيث هجمو علئ كل المحافضات
ماعرف صدك سلموهه بيدهم لو صدك ماعدنة جيش
ايام تمر وماكو خبر منهم خبر ولا نعرف وين صارو
نونة دائما تخابرني تريديني ارجع
بس جنت ارفض تماما
كلتلهه اذا ما اعرف وين اخوتي وخواتي ما اطلع من العراق
ادري بيهه تبجي ومتاذية
بس علئ الاقل مأمن عليهه ببلد امين يعرف حقوق الانسان
كرهت نفسي لان مابية فايدة
مدعرف شلون انقذ اهلي وناسي
رسلان اتمرض من ورة قهر اهلي
عندة صمام بالقلب انسد بسبب الجكاير جان ليل ونهار يدخن من القهر
حرت بيه بمستشفيات اربيل
ومنعو منع بات يدخن وكالو يحتاج قسطرة
جنت مأمن عليه يمة ولدة وبناتة وزوجته
بهالفترة سمعت الجيش العراقي فاتح باب التطوع لمحاربة هالقذارة
كلت الكعدة هيج متفيد حاط ايدي علئ خدي وابجي ..
والبجي والقهر ميجيب نتيجة
جنت اتمنئ اكو قوة مسلحة تدخل سنجار وادخل وياهم
بس مالكيت احد
ومن سمعت الجيش فاتح للتوطع رحت اركض
لان ماكو غير ناخذ ثارنة بأيدنة
ودعت خواتي ورسلان وطلعت
ما كلتلهم رايح اتطوع
من اربيل علئ السليمانية ودخلت لكركوك ..
اخذت اورااقي ورحت قدمت علئ الجيش
ماكو غير الجيش يردلنة اعتبارنة وشرفنة
بلكي يذبونة بمواجهه مباشرة وياهم ونشوفهم منو احنة
نسيت كلشي بهالايام
حتئ نونة نسيتهه لان ما اخابرهه هي تخابرني وابد ماجبتلهه سيرة راح اتطوع
كل بالي يم اخوتي وخواتي وعوائلهم
بس اريد اعرف شنو مصيرهم
بعد مدة قصيرة قبلونة بالجيش
واخذونة تدريب
خابروني نرمين وشيرين يسلمون عليه لان راح يطلعون تهريب الصبح وية عوائلهم عن طريق البحر بالزورق لليونان
وفعلا الصبح عرفت بيهم رايحين بس كل وحدة بقارب شكل
رغم خطورة البحر بس ماعدهم غير منفذ
دعيتلهم يوصلون بالسلامة
لان هذا البيدي اسويه الهم
هالايام كلهه نتدرب تدريبات قوية
الساعدني عندي خبرة بالجيش واعرف اتعامل وية السلاح
لان خدمت بالتجنيد الالزامي بزمن صدام فجانت التدريبات نوعا ما سهلة عليه مابيهه صعوبة
خلصنة تدريبات وذبونة بقواطع تحت ايد الضباط نخدم بيهه
مر اكثر من شهر
بس الجيش نوعا ما حذر بالتعامل وية الارهابيين
اتكاتف الجيش والحشد والبيشمركة
علئ مخطط معين حتئ لا نتاذة
لان المعارك كر وفر
نقصفهم ويقصفونة
مو تنظيهم ارهابي لا هذول دولة كاملة
عدهم معدات وتجهيزات
افضل من معداتنة
والاهم عدهم امدادات مين مندري
مرة الايام ظلمة عليه
ما كو اي خبر عن اهلي بسنجار ابد عبالك فص ملح وذابو ومالهم وجود بهالدنية
الئ ان اجاني خبر يكسر ضهري مرة ثانية
بيوم 27 بشهر الـ 12
خابرني رسلان يبجي
كلي شيرين واولادهه التلاثة
وزوجهه ام زوجهه
واخواتهم واطفالهم
غركو بالبحر ولاكيهم علئ الجرف
وللحكاية بقية......... 🥀
بارت يحرك الاعصاب 💔
الله يساعدكم يا اهل الموصل اشفتو من مصايب
والله يساعد كل الاتاذو من التنظيم الارهابي القذر
حسبي الله ونعم الوكيل
والله يرحم الشهداء