الحلقة الخامسة والستون
#ليلة_من_فبراير
الئ عينيكِ اعلنت انتمائي
فأزهى بالهوئ حائي وبائي
كأني ذبت من الف اشتياقي
علئ معناكِ حتئ فاح يائي
❤️
ياسر ـ اكيد جوعانين
نهاوند ـ لا
ـ اذا مو انتي
البنات اكيد جوعانات
ـ ياسر
ـ نضر عينة
ـ اني اعشقك مو بس احبك
ـ هلاهلاهلااا
واخيرااا كلتيهه
ـ ومستعدة اتزوجك
وشيريد يصير خلي يصير
ـ واثقة من كلامج
ـ اول مرة احجي شي متاكدة منة بحياتي مجنت هيج واثقة
ـ لادينج ولاديني يسمح
ـ كلمن يفسر الدين علئ هواه
اني ميهمني دين
اني اريد بشر
انسان عندة ضمير مثلك
يخاف عليه ويحميني ومياذني
يعاشرني بالمعروف ويخاف عليه اني وخواتي
ميأذيني ميظلمني ميخليني اتندم علئ الساعه الشفته بيهه
ميجي يوم يخيرني بيني وبين خواتي
صارلي سنتين وياك
ماشفت منك الا كل خير
مافد يوم طابت شي مني الله ميرضة عنة..
ولا ساومتني بشرفي من عرفتني مطلقة ولا هنتني من كلتلك اني مسجونة
اي مصيبة تصير عليه
الكاك اول واحد واكفلي
ماتخليت عني بكل اوقاتي
لافكرت بنفسك ولا كلت معلية بيهن
بالعكس ذبيت نفسك بالموت علمودي
وبدون اي مقابل
شنوو اريد بعد اكثر من هيج
ـ انتي مندفعه
لان المريتي بي مو قليل
ـ لا ابد مو مندفعه
ـ اذا اتزوجتج
يتبرون مني اهلي
واهلج نفس الشي
ـ اني ماعندي اهل
منو اهلي
وينهم
لاتكلي اهل
خلي يتبرون مني طبهم مرض
ـ اهدئي اهدئي
ماريد نسوي شي تتندمين عليه بعدين
هدئي اعصابج وارتاحي وفكري
ماريد تاخذين قرارج بأندفاع
ـ اسفة لان فكرت بانانية
اكيد ما اقبل اهلك يتبرون منك
ـ علئ شنو تتأسفين
لو اريد امشي بكلام اهلي جان بقيت يمهم واتزوجت
ـ باوعت عليه بنضرة غضب..
ـ هههه
تغارين
ـ لا ما اغار
ليش اغار عود
ـ فدوة للعصبي ..
نونة تحبيني مثل ما احبج؟
ـ واكثر
لانك الرجال الشهم الوحــيد الشفته بحياتي
ـ بس اني ما اترك ديني
ـ ولا اني اترك ديني
ـ ماعدنة حل غير الزواج المدني
ـ يعني شنو مدني
ـ يعني كل شخص يبقئ علئ دينة ونتزوج بالمحكمة
ـ واني مستعدة
ـ الافضل نطلع لدولة اوربية ونتزوج
ـ واني همين ماريد ابقئ هنا
لان قريبة من العراق
ياريت نطلع منا بسرعه
ـ هي هم مترهم نبقئ هنا
لان جنت محسب نقدم علئ الـ un
بس كالو ممكن انتن تسافرن قبلي او اني اسافر قبلجن
واني ماكدر اتركجن وحدجن
ـ اريد تحجي الصدك..
انت تحبني لو تحس بمسؤلية تجاهي
ـ الاثنين سوية
حبج بكلبي يومية يزيد
والمسؤلية حملتهه
قبل حتئ لا اعرفكم انتو منو وشنو قصتكم
ـ متحس نفسك متورط وياية
ـ واحلئ ورطة.. طالما انتي ويايه وبامن ماريد شي
ـ كلامه يخبل
هو هذا السند والزلمة الاريد اخلص حياتي وياه ..
حضنتة بكل قوتي
الله لا يحرمني منك ياسر
ـ ولا منج حبيبتي ..
خلص طالما قررنة لجوء لاوربا
مترهم نبقئ بتركيا هواي
حتئ لانصرف كل الفلوس العدنة
ـ اي عادي يلة هسة اجيب الجنط
ـ وج ياجنط
لا مو لهلدرجة
نرتاح فد يومين ونطلع
ـ تمام لعد..
ـ يلة اروح اجيب شي ناكلة
ـ الله وياك
دخلت للغرفة لكيت خواتي متمددات ونايمات علئ الفراش
غرفة صغيرة بيهه جربايتين وحمام ومراية علئ الحايط وتلفزيون وثلاجة صغيرة فتحتهه لكيت بيهه قواطي بيبسي وبطاله مي ..
اتقربت يم الشباك وفتحت البردة شوي
المنظر منا يخبل
بنايات مرتبة وحلوة
هواي ناس كاعد يتمشون بالشوارع رغم البرد ممهتمين
الاضوية بكل مكان منورة هالمدينة
كلش باردة برة
الجو مغيم واكو هوئ مو كلش عالي
بس رغم هذا البرد
الفندق دافي
والغرفة بعد ادفئ
زين شلون هيج دافي
اشو ماكو صوبة ولا هيتر
بقيت صافنة علئ الغرفة
اريد اشوفلي صوبة هيتر
يجوز معلكة بالسكف
لا والله ماكو
لعد الغرفة شلون دافية
اشو حتئ الشباك ميدخل هوئ منة
مو مثل بيوتنة يلعب الهوئ بيهه لعب
يا الله شنو هاي الفانوس السحري هنا
كمت انفخ علئ الشباك
واكتب بايدي
اي كلمة تجي ابالي اكتبهه
نغم ـ شدسوين نونة
ـ العب
ـ احنة هسة وين
ـ بتركية
ـ اي ادري بتركية بس يعني وين
ـ والله مادري وين
المهم خلصنة من العراق
ـ يعني بعد محد يلحكنة وياذينة
ـ ماعاش الياذينة
لاتخافين ..
راح نروح لمكان بعيد عنهم
نعيش بامان واذا احد منهم اجئ ورانة
الحكومة تحبسة واطيح حظة ويجوز تعدمة همين
ـ تدرين المن اشتاقيت
ـ لبيت خاله ام برهوم مو
ـ اي والله
مكانهم يخبل
نياله العندة بيت هناك وعندة خروف ودجاج يربيهن
ـ هههههه حبيبتي
ـ نونة
صدك راح تتزوجين عمو ياسر
ـ اي ليش
ـ لا بس سمعتكم تحجون كلت اتاكد
ـ هو الوحيد الحافظ علينة وعاف كلشي وراه واجئ ويانه شقتي شكد صرف من جيبة علمودنة
منو سواهه
لا عمام ولا خوال..
فـ ما الكة احسن منة
ائمنة علئ نفسي وعليكم
ـ ميتعوض عمو ياسر
الله يخلي النة ويخليكم سوية
ـ ان شالله يارب ..
ليش متنامين شوي
ـ لا ماريد نمت بالطريق
ـ يلة براحتج..
امشي غيري ملابسج وسبحي او غسلي ايدج ورجلج حتئ اغسل هدومج
ـ اوك
ـ كعدت خواتي وغيرت هدومهن وغسلت الهن
شكد حلو حتئ المي هنا يختلف
اشو هذا مو مثل دوشنة
عبالك كلش جبير
شنو هالشامبوات اللي بالحمام
خرب ههههه
هاي علئ الريحة تنضف
شحال لو نسبح بيهه
اول مرة اشوف شامبو
غلافة مثل المصقولة
يمة شلون عطرر هذا
لزك بية
لعبنة لعب بالمي والشامبوات يسوون واهس واحد يبقئ يسبح ميطلع من الحمام
خلصت ووطلعتهن
وكعدن يتفرجن علئ التلفزيون
ودخلت سبحت علئ السريع وغسلت ملابسنة وعلكتهه بالحمام
وين اشرهن اكيد الفندق
مابي سطح ومابي حبال ..
مشطت الخواتي ومشطت شعري وبعدة ياسر مارجع ..
شنو هاي وين راح..
طلعت رحت لغرفتة دكيت الباب ماكو احد..
عزة وين صار
ـ وراج لا تخافين ماعفتكم
ـ لاعيني اعرف بيك متكدر تعوفني
ـ لازمتني من ايدي التوجعني
ـ لا اسم الله عليك
ـ تخافين علية
ـ لعد عليمن اخاف اذا ماخاف عليك
ـ الله الله ..
شكد تحبيني بداعتي
ـ اممم تريد تحجيني يعني ..
بكد هالاكل البيدك
ـ ايا ام بطن بكد الاكل تحبني
ـ لا جذب شوي اكثر
ـ لعد اخذي هذا الكم قبل لاتاكليني
ـ شنو هاي وانت
ـ بغرفتي اكعد اكل
ـ ليش منكعد سوية
ـ متخافين مني
ـ ههههههههههه عبرت وياك حدود شطولهه وعشت سنتين وياك وتالي تكلي متخافين مني حتئ عيب تحجيهه
ـ اذا انتي ضامنة نفسج اني ماضامن نفسي خليني استر علئ روحي واكعد اكل بغرفتي عود من نتزوج نكعد علئ الفراش ناكل
ـ يحجي ويضحك واني اضحك وياه ..
لعد خليك بمكانك حتئ اخذ راحتي بالاكل
ـ اي عفية هيج اريدج اتربعي وكعدي ثردي ماوصيج
ـ وبالعشرة ادوس همين
ـ ماريد تسوين نفسج اتكيت ترة ماحب هالسوالف
ـ لا تخاف اصلا ما اعرف شنو اتكيت
ـ هههههههه ..
ـ اوكف لحظة ماكلتلي وين جنت ليش اتاخرت
ـ ها من هسة بدت المحاسبة
ـ اي طبعا لعد شلون
ـ والله التقيت بالمطعم بجماعه عرب همين مهاجرين مثلنة
بين ماخلص الاكل كعدنة نسولف وين احسن مكان للهجرة
ـ غير راح نروح لالمانية مو هناك صديقك اميل واهلك
ـ متفيدني المانية اهلي بيهه عمي وكرايبي ..
بس لكيت خوش دولة بيهه هواي مميزات اذا الله سهل النة نروح الهه
ـ يادولة هاي
ـ لوكسمبورغ
ـ عزا هاي وين صايرة
ـ باوربا حدوية وية فرنسا والمانيا
ـ وين اكو هيج دولة باوربا
ـ ههههههههه اكو موجودة وداعتج
ـ الاعرفة المانيا فرنسا ايطاليا اسبانية
ـ من توصليلهه راح تعرفيهه
ـ زين صدك احنة وين
يعني وين بتركيا
ـ هاي المحافظة اسمه وان او فان
حسب اللفظ ..
محافظة جنوب شرق تركيا
ـ ها..
بس حلوة من الشباك شفتهه تخبل
ـ كل دول العالم حلوة
الله ماخلق شي مو حلو حاشاه
بس تتبع الانسان العايش بهالدول
اكو اليحافظ علئ هاي النعمة ويداريهه ويطورهه
واكو لا يخربهه ويدمرهه
كلة من ايد الانسان
ـ صح والله للاسف ..
يلة الله كريم
ـ يلة اني ادخل ارتاح يمكن راح انام شوي مو تطلعون ترة اتيهون
ـ لا وين نطلع ...
يلة باي
اخذت الاكل منة ودخلت لخواتي
اكلنة وخلصنة وبقة بعد اكل
لميت كل شي وحطيته بالثلاجة مال الغرفة..
التلفون هنا ميشتغل لان الشريحه عراقية ..
باوعت من الشباك الجو تغير
الهوئ صار عالي والغيوم اتجمعت يمكن راح تمطر
نغم ـ هسة تنكطع الكهرباء من تمطر
ـ عدنة لايت بالتلفون وبعدين الفندق اكيد عدهم سحب خو مو يبقوهه ظلمة
ـ كعدت اني والحان علئ الجرباية ونغم وصبا علئ الثانية
خواتي طول الوكت ساكتات ويتفرجن علئ التلفزيون
رغم المسلسلات والاخبار كلهه باللغة التركية
ورة نص ساعه كامت تمطر مطر قوي وحضرت التلفون بيدي خاف تطفئ الكهرباء بس ماطفت
هاي لو عدنة جان انفجرت المحولة
مر يومين احنة بالفندق
الاحوال الجوية كلش مضطربة
هوئ عالي ومطر مستمر ابد ماوكف
بدت من الليلة الاجينة بيهه وبقئ لثاني يوم
ورغم هذا ماطفت الكهرباء
ولا غركت الشوارع
ولا اكو طين ولا مجاري فايضة
السيارات تمشي بشوارع يابسة
والناس يطلعون بالشارع يتمشون عادي
لعد ليش احنة بس تمطر شوي نفيض ونسبح بالطين
هاي العالم شلون عايشين شكد حلو
اتمنيت اطلع اتمشئ بنص هالمطر والبرد بس خفت لا احد يلزمنة من الحكومة
او خواتي يتمرضن ..
شوي واندكت الباب وراحت نغم تفتحهه
ـ هلو عمو ياسر
ـ هلو حبيبتي عمو
.. وين نونة
ـ اجيت هياتني .. ها هلو ياسر
ـ هلو نونة ..
حضري نفسكم
اليوم الفجر نطلع لغير محافظة
ـ وين نروح
ـ لمحافظة سامسون
ـ ها يعني هنا بتركيا
ـ اي بتركيا
ـ لعد شوكت نسافر للخارج
ـ يراد وكت شوي مو بهالسرعه
ـ بالسيارة نروح مو؟
ـ حافلة جبيرة يسموهه تيرمينال نروح بيهه احنة وكم عائلة عراقية وعربية كلنة نروح سوية ..
ـ ان شالله
ـ يلة اخليكم تحضرون نفسكم
ـ عافنة وراح لغرفتة
دخلت لميت كل شي وحضرت الجنطتين مالتنة ولبست خواتي من الليل هواي هدوم لان باردة ..
احسن حتئ لو نامن هنة مبدلات ما اخذ وكت
بقيت كاعدة وانتضر شوكت نروح
صدك وية الفجر اجئ علينة وطلعنة
هوئ الفجر بارد يأذي الوجه
صعدنة سيارة صغيرة وبعدين وصلنة للحافلات
لكينة هواي ناس ويانة صعدنة الحافلة اني وخواتي وياسر والناس البقية
ومشت بينة
الاماكن تخوف و ملعوجة
بس الشارع عدل مو مثل المنطقة
مشينة هواي بالحافلة
كلش هواي
بعدين وصلنة منطقة ثانية وكلنة نزلنة وردينة اخذنة حافلة ومشينة
ووكفنة بهواي اماكن استراحه
كل فترة توكف الحافلة بينة وننزل نستراح ونرد نصعد
بس همين من الكعدة تكسرنة
الئ ان وصلنة مكان كالو عليه محافظة سامسون
طول الطريق ما احتكيت باحد
بس ياسر هواي سوة صداقات وية الشباب بالسيارة ..
بالطريق كل شوي اهل ياسر يتصلون عليه ..
ماعرف ليش من يجاوبهم اخاف
خايفة يعرفون بينة ويحجون عليه
وصلنة منطقة كلهة بيوت صغار وحلوة ململة وشوارع نضيفة كلهه زرع
بس همين باردة ثلج
احنة وخمس عوائل رحنة لفندق بهالمنطقة
جانت ويانة وحدة بيدهه طفل تمشي ورة صديق ياسر مبينة زوجته لهلولد
ما انتبهت عليهه بالطريق ابد
يمكن جانت كاعدة ليورة ما ادري
بس هنا صارت كدامي
كلش ضعيفة هالبنية
شكلهه حزينة ولابسة اسود
من التقيت بيهه هنا ابد ماضحكت
حتئ زوجهه همين حزين
بس مو مثلهه
مرات يسولف وية الولد ويضحك وياهم
شايلة طفل مكمط بيدهه كلش صغير ولافتة لف من البرد
وتمشي ورة وزوجهه وهوة شايل الجنط
صار عندي فضول اتعرف عليهه
هية مدنكة وتمشي ابد مارفعت راسهه
من وصلنة للفندق واخذنة غرف صارت غرفتهة هية وزوجهه مقابل غرفتي اني وخواتي
وياسر شوي غرفتة ابعد من عدنة
دخلنة للغرفة وشوي استراحينة
واجئ ياسر
ـ يكولون لازم نراجع علئ اوراقنة حتئ نسافر وطبعا مترهم اني اروح بمكانكم لازم انتو تحضرون
ـ يعني شنو مفتهمت شنو اسوي
ـ ما اعرف بعدني حاير
بس اريد اسأل بعد بلكي الكة جواب هواي نصحوني ماقدم هجرة منا اروح للدولة الاريد اقدم بيهه هجرة واطلب لجوء
ـ ماعرف سوف شنو الاحسن والله كريم..
اني همين تعبت واريد استقر
ـ يراد وقت وتعب مو بهيج سهولة
ـ دنحجي واتصلو عليه اهله مرة ثانية…
ابتعد عني وحجة وياهم بلغتهم
ياسر ـ اسمعك هافال
ـ انت ليش ماتريد تروح الـ المانيا؟
ـ ماحبهه عاجبني اجرب غير دولة
ـ اشنو تجرب غير دوولة
اشنو ماحبهه
روح يم اهلك وناسسك ليش تريد تعيش لوحدك
ـ انا عاجبني افتر باوربا انتو ليش ضايجين
ـ بهالحاله تخلص فلوسك وانت كلشي مامحصل
ـ لاتخاف اعرف اتصرف احد كلك طفل واضيع الفلوس
ـ صارحني ياسر .. منو وياك؟
ـ منو وياية محد ويايه
ـ وين البنت الجانت عايشة وياك بالبيت
ـ هاي مستاجرة
مو عايشة ويايه
اكو فرق
ـ اي .. وينها
ـ راحت لحال سبيلهة
ـ ليش ماعد اقدر اقتنع بكلامك
ـ هافال مافايق الك
تعبان وهسة وصلت اتريد شي مني
ـ ليش وين جنت
ـ عفت وان واجيت لسامسون
ـ اها.. يلة الحمد لله علئ سلامتك
ـ رايد شي
ـ لا بس حبيت اطمن عليك ..
ـ الله يسلمك .. يلة اخابرك غير وقت..
ـ وليش مستعجل اصبر دنسولف
ـ انا تعبان يارجال رجلي وكعت من الفرة
ـ ليش اشنو متيه
ـ ما متيه شي الجية من وان لهنا صعدة نزلة
ـ لك لايكون داخل تهريب وانا ما اعرف
ـ لا مو تهريب
ـ لعد ليش صعدة ونزلة؟
ـ يعني غير علمود اسأل واعرف الدول الاوربية شنو نظامهه..
يلة هافال لازم اروح باجر اتصل عليك
ـ دير بالك علئ روحك الجو هسة. بارد
ـ عادي متعود علئ البرودة..
نونة ـ سد التلفون ونفث هوئ بقلق
ـ الله يستر من اخوتي ..
ـ ليش شبيهم
ـ عدهم حس ااستخباراتي يشتغل دائما
ـ ماريد اسببلك مشاكل وياهم
ـ اني متوقع المشاكل لان اهلي متعصبين بس ماريدهه هسة
اريد استقر وبعدين يعرفون
بلكي اكدر اقنعهم او الزمن يكول كفيل باقناعهم
ـ دنحجي واجتي البنية الحزينة لغرفتهه
راسا قطعت الكلام وسألت ياسر
ااكلك ياسر هاي البنية وزوجهه تعرفهم
ـ اي هذا الولد صادقته بمدينة فان شبيهم؟
ـ هو اني دسئلك شبيهم ليش هيج زوجته بس تبجي
ـ قصتهم قصة هذول خطية
جانو عايشين ابغداد
وانخطفو اطفالهم اثنين
كلبو الدنية يدورون عليهم
تالي لكوهم مقتولين ومثلين بيهم وشامريهم ببناية دتنبني بعدهه مكاملة ومكتوب علئ اجسام اطفالهم اطلعو الدور الكم وللطفل الثالث
ـ عزااااا
ـ اي والله خطية من حجئ الولد كلنة بجينة عليه لان اطفاله بعدهم صغار خطية
ـ العراق بي مصايب صارت ابد مينعاش بي ..
ـ الله يساعدهم ..
محتاجة شي
ـ لالا سلامتك
ـ اوك ديري بالج علئ البنات لايطلعون
ـ اكيد ..
راح ياسر ودخلت للغرفة
نغم ـ نونة وصلنة
ـ اي لعد بعدنة بالسيارة
ـ لااا يعني بعد منغير مكانة نبقئ كاعدين هنا
ـ لا
بعد كدامنة هواي اماكن نروحلهه
ـ شوكت نرتاح تعبت من السيارات
ـ حقج والله.. الله كريم حبيبتي فرجت اهم شي انتن ويايه
ابتسمتلي وراحت بفراشهه..
مـــــرة الايام
واحنة نراجع لان داخلين قجق شوي اتشددو ويانة
بقينة رايحين راجعين
اشكال الاوراق طلبو من عندي
لحونة تمرضت من البرد اختلف الجو عليهه ..
بس بقيت اراقب هالبنية ام الطفل
ابد متحجي ولا حتئ تبتسم
وبيوم انجمعنة سوية بالفندق مالتنة
هية جانت كاعدة بالرسبشن واني وخواتي اجيت وكعدت يمهه..
مساء الخير
ـ مساء النور
ـ هذا الحلو شنو اسمة
ـ هاية بنية درة اسمهه
ـ الله يحفظهه الج ام درة
ـ اني ام طه وابقئ ام طه
ـ أ.. الله يرحمهم
طيور بالجنة
ـ صغار..
طه عمرة اربع سنين
ومصطفئ سنتين
اني مو مهملة والله
همة بس جانوو يلعبون يم باب بيتنة
بس دخلت اجيبلهم كلاص مي
طلعت ماشفتهم
ماشفتهم
كومة جهال جانو بالشارع
يلعبون ويركضون
بس جهالي جانو اباب بيتي مو وياهم
من اسألهم وين جهالي
محد يجابوني
معقولة كلهم ماشافو منو اخذ جهالي
ـ البنية فاقدة من تحجي
فاتحة عيونهه وتسولف والدمع ينزل مثل المطر.. متت قهر عليهه وبجيت وياهه
ـ همة اطفال ليش هيج ماذيهم
لو موتيهم بدون ميمثلون بيهم ماجان احترك كلبي هيج
ماكدر انسئ اشكالهم ابد اتمنئ اموت وراهم .. اني كلتلة لهذا الحقير رجلي من اموت ادفني يم جهالي بس ماقبل نبقئ هناك وجابني غصبا عليه
ـ لان يخاف عليكم
ـ لا ميخاف علينة
هذا التشوفي كدامج ميخاف علينة
مرتين ذبولنة تهديد بالبيت
وهو ماحاجي ولا كايل
ـ ليش انتي وين جنتي
شلون ماعرفتي مهدديكم
ـ هو يشوف التهديدات وميحجي يضمهن عني واني ثولة و ما ادري بشي ..
بشارعنة اكو عائلة همين ذابيلهم تهديد
وابوهم همين ممهتم
وتالي كتلو بنتة الجبيرة ومرتة
جانن رايحات بالسوك
يجهزن لعرس بنتهه
وكاتلين العروسة هية وامهه
واحنة وراهم بيوم صار هيج بينة
ـ يعني ماحجة ولا كال رجلج معقولة ميخاف
ـ اني همين مستغربة منة
شنو جان ينتضر يقتلونة كلنة
لو ممهتم بالموت
ليش ماطلعنة ليش ما نقذ جهالي ليش هيج سوة ما اكدر افهمة ابد
ـ حقدت علئ هالولد
شلون مااهتم للتهديدات
شنو من بشر هذا
ولدة الصغار شلون ميخاف عليهم
ما اعرف شلون اواسيج
بس الله يصبرج ..
اطفال طيور بالجنة
خلصو من هاي الدنية الموزينة
ـ اخذو صحتي وياهم
ياريت الحكهم اني وبنتي ويبقئ هوة عايش لوحدة ..
اليحرك كلبي جاي هسة يطلب لجوء براس جهالي يكلهم اعمال ارهابية
ليش وين جان قبل معقولة جان ينتضرهم يقتلونة حتئ يجي يطلب لجوء
ـ يجوز جان ماعندة فلوس
ـ اي صح ماجان عندة فلوس
بس هسة كدر يدبر فلوس
لعد ليش مادبر قبل لايقتلون جهالي
وبعدين حتئ لو ماعندة فلوس
جان يكدر ياخدنة لغير بيت
بيت اهله
بيت اخوتة
بيت كرايبة
باي مكان المهم منبقئ بالبيت
او علئ الاقل يبقئ ويانة بنفس البيت
موو يعوفنة ويطلع
واني كلشي مادري
لو يخاف علينة صدك
جان كابلنة وكعد
واليصير علينة يصير عليه
بس عبالك ماصدك ولدة قتلوهم
ماعرف مين جاب فلوس وطلع يركض يدور هجرة
شكد توسلت بي ماريد اهاجر
اريد ابقئ يم ولدي
بس هددني يعوفني ويهاجر
ـ جان عفتي يهاجر لوحدة
ـ ووين اروح اني وهالطفلة
ـ اهلج
ـ اهلي منو
لو عندي اهل مثل البشر
ماجان هذا حالي
ـ يااا انتي يتمية مثلي
ـ ياريت لو يتيمة
جان كلت امر الله
بس عندي اب وام واخوة واخوات
بس كل واحد حاير بروحه
ابوية اناني وعايش لنفسة
ميقبل بناته يجن زعلانات
لان ماعندة بنات يزعلن ويكسرن وجهه بين الناس
اذا نجي نشتكيلة
يضربنة ويطردنة ويذلنة كدام زلمنة حتئ تنكسر عينة كدامهم
واخوتي كلهم مثله ونفس طبعه
بس ويانة احنة خواتهم هيج يتصرفون
بس وية نسوانهم غير شكل
يعبدونهن عبادة
وياويلة اليحجي وياهن
اخوية الوسطاني ضرب امي لخاطر مرتة
ـ ها صدك
ـ اي والله علمود مرتة ضرب امي
وامي حايرة بروحهه
تخاف منهم وتريد ترضي جناينهه حتئ لو علئ حسابهه وحسابنة
ماعندي اهل ابقئ يمهم
اضطريت اجي وياه واسمع كلامة
ـ كولي يالله
اكيد الله ضاملج الاحسن
ـ والنعم بالله
ان شالله
بس حركة كلبي شلون تنطفي ..
ـ الله ذب علينة نعمة النسيان
ـ مستحيل انسئ جهالي الحملت بيهم وجبتهم وربيتهم جنت اشمهم شم من يضيق بية الوكت وارتاح
هسة المن اشم حتئ هدومهم الجانو لابسية من قتلوهم اخذوهه مني
لان بيهه دمهم ميصير تعبر حدود
وبقت بس هدومهم المغسولة
ـ بقتلج هالبنية الحلوة تعوضج
ـ هية بس هاي
علمودهه بعدني عايشة
لان ادري تتبهذل وراية
بس ماكدر انسئ الراحو
ـ متت قهر عليهه
كمت ابجي واشهك وياهه
خطية لان عدهه امومه تحب ولدهه
هواي متاذية
لو كلبهه قاسي مثل امي جان ما انقهرت هيج.. بس القهر بعينهه يوجع..
حاولت الهيهه بغير سوالف
وكعدنة شوي نسولف عن غير مواضيع
وبعدين كل وحدة راحت لغرفتهه
تقريبا هالفترة صارت بيناتنة صداقة وكلمة حلوة..
ياسر بعدة مصمم علئ لوكسمبورغ وميريد يقدم هجرة من تركيا
ولان طلعنة قجق طولوهه ويانة
ياسر ـ بالنسبة الي احسن دولة لوكسمبورغ
ابو طه ـ يرادلهه خلك هالدولة
مو مثل المانيا هسة فاتحه الهجرة واللجوء راسا تدخل يمهم
ـ وانت ليش متنتضر الunعندك اسباب قاهرة ويطلعوك
ـ لا راح اطلع وية الجماعه تهريب اني اريد المانية ماريد يذبوني بكندا لو مدري وين بتلفات الدنية
ـ اهم شي تأمن علئ عائلتك ونفسك كندا او غيرهه ميضر
ـ لا اني مستعجل
اريد اخلص اليوم كبل باجر
ـ وشوكت راح تطلع
ـ هاليومين ان شالله
ـ بس ليش تجازف وياك مرة وطفلة رضيعه شلون تطلع هيج
ـ تخلص و تصير سوالف يمعود
ماكو شي يجي بالساهل
ـ اي صح..
علئ العموم الله يسهلك
نونة ـ مر اسبوع وبعدنة هنا
ام طه سافرت هية وزوجهه وودعناهم
وبقئ مكانهه فارغ
واحنة بقينة نراجع ورايحين راجعين
لان عندي اضبارة بالشرطة ارتابو مني
بس اوراقي كلهه كاملة وتثبت برائتي
بس ميمنع هذا قانونهم ولازم يطبق
جنة مرات نطلع للسوك
نفتر شوي ونرفه عن نفسنة
وبكل مكان اوكف اسأل عن شغل بس ماعدهم لان ماعرف لغتهم
ياسر. ـ ليش تريدين شغل
ـ لعد شلون ابقئ هيج
ـ ناقصج شي
ـ لا بس ماريد ابقئ معتمدة عليك
ـ ليش .. صرفتي نضر عن زواجنه
ـ لااا اااصرف نضر عن كلشي ااالا زواجنة
بس همين ماريد ابقئ معتمدة عليك
ـ واجب الرجال يكفي مرتة
ـ يكفي مرتة بس مو اهلهه همين
خواتي بمسؤليتي ميكفي الصرف الصرفتة علينة
ـ دة اسكتي وامشي
ـ لابلة .. شنو يعني هالحجي
ـ يعني متشتغلين
ـ لا اوكف لحظة
شنو ما اشتغل؟
خواتي بركبتي
ـ نونة اذا طلعنة لجوء ينطوكم رواتب
ـ وشكد الراتب
ـ حسب
اني ليش اريد اطلع لوكسمبورغ
هية صح غاليه
بس ينطون بيهه خوش رواتب وسكن يعني خوش عيشة
ـ وافرض ماصارت
ماقبلو بينة
خصوصا اني لان عندي اضبارة جنائيية بالشرطة وشفت هنا شلون تعقيدات
ـ لاتسبقين الاحداث ممكن نكلهم بسبب هالاضبارة اهلهه يريدون يقتلوهه
ـ هو صح هالحجي
بس شنو اليثبت الهم
هذول مو غشمة
ـ تؤ هوووووف
ـ لا تتأفأف
ياسر اني احبك
بس لاتكلي لاتشتغلين
ـ اكو وحدة تحب التعب
ـ اي
الي يحس بالمسؤلية مثل حالي يدور علئ التعب دوارة لان خواتي يرادلهن مصرف وان شالله ارجعهن مدارس يعني يراد مصاريف اكثر
ـ لاتضلين تحجين وامشي
لان دنتناقش بشي سابق لاوانة…
ـ حتئ لو سابق لاوانة بس خليهه براسك ادور شغل حتئ اصرف علئ خواتي
ـ امشيييي
ـ رجعنة للفندق متعاركين
هو ضايج مني وراح لغرفتة راسا
واني هم عفتة ودخلت بغرفتي اني وخواتي
بس منكدر نبقئ زعلانين هواي
ثاني يوم الصبح اتصالحنة..
مرة فترة وبعدنة بسامسون
كلش اتضايقت
لا شغل لا عمل محد يقبل يشغلنة..
بديت اندل هالمنطقة شوي
واخذ خواتي للسوك ونرجع بدون ياسر
من اختنك نطلع شوي نفتر بس منبقئ هواي خاف يلزمونة
رجعنة للفندق وتلاكيت وياه جان واكف اباب الفندق يحجي بالتلفون
بس عصبي
تقربت عليه اريد اشوفه شبي
مفتهمت كلامة عرفت اهله ديخابرو
ياسر ـ جنت طالع ادور شغل وبنفس الوكت اسأل عن الهجرة وطرقهه للوكسمبورغ
خابرتني اختي رغداء
اتصورت اتصال عادي مثل كل مرة وجاوبتهه
رغداء ـ طلعت رايح وياهه هية وخواتهه وماحاجي ولاا كايل النة
ـ شنو القصة حتئ ماسلمتي علية
ـ ليش اااسلم انت عبرتنةة اهتمييت النةة وانة ااكول ليش واشنو السبب هيج قرار ضرب براسك وتريد السفر فجأة
حيدر ـ انطيني التلفوون خلي احجي وياه..
لك اشلوون هيج تسووي بينا
ـ شسويت بيكم
ـ والك عين تحجيي
لك انت شبيك هيج متغيررر
ـ ما متغير ولا شي
بس انتو تحسستو من المووضوع
ـ خوش باااجر اانااا يمك
ـ ووين تجي خلي استقر وتعال
ـ مايحتاج .. راح اجي انة وهافال احنة مو غربة
ـ سمعت رغدا تصيح وتعيط انقبض كلبي شبيهه رغداء ليش عصبية
ـ لان سألنة عليك بكركوك
كالو اخذ البنات ومحد يدري بي وين
ـ والمطلوب
ـ يوولوو يعني صدك هالحجي
ـ اي .. البنت احبهه ورايدهه
ـ لك اتحبهةةةه شنوووو مخبللل انتتت تااخذ من غيرر ديناا
ـ الكلب وميريد
ـ لك ادوس علئ الكلب بقندرااا
لك يااكلب هذاااا الي يخليك تعووف دينك واهلك
ـ ما عايف ديني بعدني ايزيدي ولا عايف اهلي بعدني اتواصل وياكم
ـ ليش انت مااتعررف ديناا
ـ اعرف ..
بس اني ايززيدي وماغير ديني
لكن احب هالبنت ماكدرر اعوفهه
ـ اانجب لك
حبتك الحيااا
ارجع لسنجارررر
لو باجر الصبح تلكانة بوجهك
والله اشتكي عليك واذبك بتهمة واخليهم يقبضون عليك ويجيبوك سحل
ـ تمون علية ..
بس ماريد ارجع للعراق
ـ وانا اكول ليش متريد تروح لالمانية
اثاري علموود هالمصايب الوياك
ـ لا توكف بطريقي حيدر محد اله سلطة علية
ـ اسمع وولك
اقسم بالله اذا تزوجت هالمسربتاا
الي ماعندهه اهل
لا انتت اخووية ولا ااعرفك
وديرر بالك تمشي بجنازتي
ـ مالو داعي هالحجي
هافال ـ مو هيج ينحل المشاكل ..
جيب التلفون ..
الو ياسر
ـ نعم هافال
ـ انتضرنا نجيك ونحجي ونتفاهم
ـ حتئ لو تجيني ماغير قراري
ـ ولك تبيعنة احنة عشيرتك واهلك ودينك علمودهه؟!
ـ منو كال بعتكم
ليش هالحجي المالو معنئ
ـ وين تدينك وين التزامك اشنو تضحك علئ ربنااا انت
ـ لا ابداااا
دينا فوق رااااسي
ربنا فوك راااسي
لكن ما اكدر اتخلئ عنهه
احبهه واريدهه بالحلال
وهية هاي الاريد اكمل حياتي وياههه
ـ لك ياحلااال ميصيرر
ـ انت مو ربنا حتئ تحكم
ـ تماااام يصير خير..
نونة ـ بقيت صافنة عليه
ها ياسر شنو صار
ـ طبكو التلفون بوجهي
ـ ليش شبيهم
ـ عرفو بيج انتي ويايه
ـ عزاا بعيني
ـ ماريد ابقئ هنا امشي لمي اغراضج بين ما اخابر الولد
ـ وين نروح
ـ معليج امشي بسرعه
ـ صعدت اني وخواتي لمينة ملابسنة وحضرت الجنط شفتة راح لغرفتة تقريبا نص ساعه واجئ علينة
ـ يلة امشو
ـ ياسر وين رايحين
ـ اريد اهاجر باي طريقة كانت
اريد ارتاح
ـ نزلنة واخذنة سيارة لغير فندق
اغلب الفنادق الناخذهه مو فاخرة عادية بس حلوة ونضيفة وسعر مناسب مو غالية
بهالفترة
جان ياسر يتصل علئ اهلة بس ميجاوبوه
او مرات يجاوبو بس يتعاركون وياه وميسمعو وهمين يسدون التلفون بوجهه
اكيد يزعلون منة لان عرفو اني وياه راح نتزوج
اقل من اسبوع وكال راح نسافر لمينة اغراضنة وطلعنة
من سيارة لسيارة ننزل ونصعد
كلبي يدك وخايفة ننكمش ويصير شي ويرجعونة
قطعنة تكت طيارة وجان موعد طيارتنة الخميس
تحضرنة و رحنة للمطار
واتفاجئت بضخامتة
بناية كلش ضخمة وجبيرة
اول مرة اشو مطار بحياتي
فتشونة وسمحولنة ندخل
نقلتنة حافلات جبيرة لداخل المطار
نزلنة وردو فتشونة وكعدنة ننتضر الطيارة
تقريبا ربع ساعه ونادو علئ رحلتنة
وصلنة للطيارة
كلش ضخمة وجبيرة
شكله يخوف
صعدنة بيهه وكعدنة كلنة سوية
ماعرف ليش هيج خايفة
بس بنفس الوكت فرحانة راح ابتعد عن العراق
كعد ياسر علئ جهة شباك الطيارة
واني علئ جهتة
والبنات وياية بالكراسي الوسطانية
من دة تقلع حسيت بخوف مو طبيعي لزمت الكرسي وضغطت عليه..
ياسر ـ لاتخافين هسة. تستعدل الطيارة هية بالاقلاع هيج تصير
ـ روحي راحت من الخوف
ـ ههههههه بلة وكعت شسوين
ـ لا يمة اسم الله ليش هيج تخوفني
ـ غير الواحد لكل شي يحسب
ـ اكلك بس اسكت كلشي ماريد منك
ـ غير اهدئج مو شفتج متوترة
ـ تهدائي تكلي راح توكع
ـ اي حتئ متخافين يصير كلبج جامد
ـ لا اذا ابقئ احجي وياك انجلط
غمضت عيني وصميت اذني وهو بقئ يضحك عليه
استعدلت الطيارة وبقينة طايرين بالجو
شعور يخوف
بس بنفس الوكت حلو
بقينة هواي بالطيارة
كل شوي انام وارد افز لان قلقة
الأ ان الركاب كالو دخلنة الاراضي اللكسمبوركية
احنة وكم عائلة ويانة
سألنة عن مكان طلب اللجوء بالمطار ودلونة عليه
قدمنة علئ لجوء انساني
واستقبلونة اخذو اوراقنة ونطونة استمارة نمليهه
طلعونة من المطار واخذونة كلنة لمكان مثل الكمب
بعدين قابلونة وسألونة عن اسباب اللجوء… وطبعا قبلهه فهمت خواتي شنو يحجن ويكولن حتئ لا نختلف بالكلام ..
ياسر ـ ها بشرري شسويتي
ـ حجيت اني وخواتي مثل متفقنة ونطيتهم اوراقي وكالو يدققون بيهه
ـ يعني كلتيلهم احنة مهزومين من العراق لان نريد نتزوج
ـ اي علئ اتفاقنة
اهلنة يريدون يقتلونة لان كل واحد من دين
ـ و اوراقج الثانية
ـ كلشي نطيتهم واستجوبوني وكعدت اسولفلهم
ـ هوووف .. تمام ..
يبقئ ننتضر قرارهم…
ـ ان شالله يقبلون كلولي البنات هيج امور يقبلوهه
ـ منتأمل لكن نكول ان شالله…
ـ ان شالله
ـ يلة ارجع يم الولد تحتاجين شي
ـ لا سلامتك
راح ياسر وية الولد
وبقينة اني وخواتي يم البنات الطالبين لجوء
هواي جنسيات هنا
مغربيات تونسيات لبنانيين اردنيين واحنة وبعد اكو عراقيين ويانة
تعرفت علئ بنية لبنانية اسمهه نادين هية وعائلتهه جاية هنة طالبة لجوء
بنية حبابة ولسانهه حلو وانيقة تصفن باناقتهه
مر اكثر من شهر واحنة بنفس المكان
كالو يدققون يلة يقبلون باللجوء
بهالفترة اشترينة خطوط للتلفونات مالتي ومالت ياسر
وكلما احتاج منة شي اخابرة او يخابرني
بهالفترة رفضو هواي ناس ويانه
وكلما يرفضون وجبة اكول راح يجينة الدور
بس الحمد لله
بعد عناء وتعب وتوتر
قبلونة لاجئين عدهم
اخذونة احنة وباقي العوائل القبلوهه وودونة لشقق بنص مدينة سكنية.. اسمهه ويلتز
هو شكلة مثل المجمع تقريبا
لان نفس الشكل كل البنايات
وويانة بنفس المجمع نادين وباقي الاصدقاء العرفناهم
دخلنة اني وخواتي للشقة
اقل مانكول عنهه خرافية
مرتبة وجاهزة وكلشي بيهه
وكلش حلوة
بناء جديد ومأثث من كلشي
بس نخلي ملابسنة وونكعد وهاي هية
واخيرا استقريت بهيج دولة
واخيرااا…
نغم ـ نونةة عموو ياسر يريدج
ـ تعال ادخل شنو مستحي
ـ هههههه لا يابة ما استحي من مرتي
ـ شنوو هاي شوكت تزوجنة
ـ ههههههه باجر لازم نروح للمحكمة ونتزوج لان اني وياج متشاركين بالسكن
ـ ليش مشتاركين
ـ همة عدهم قانون المساكنة عادي وبما انو احنة رايدين زواج نطونة سكن واحد
ـ اهااا.. صدك
ـ اي والله
ـ لعد امشي نروح هسة نتزوج
ـ يابوية مستعجلة اكثر مني
ـ مو علمود عيونك
بس ماريد يطردونة منا
ـ امممم يعني مصلحة
ـ اي طبعاا
ـ امري ال الله شسوي
ـ اصلا مقهورة عليك
شلون راح تنام بالشارع اليوم
ـ بعددد
راح تنيميني بالشارع
ـ اي لعد اني ليش كلتلك اليوم نروح نتزوج غير ماريدك تنام بالشارع
ـ ام كلب الابيض مو بيدج..
لعد خلي اروح اسأل أمن الشقق يدلونة علئ محكمة
ـ عزة. صدكت..
تعال وين يا زواج
غير احضر نفسي لعرسي
ـ صدك النسوان بالف راي
هسة شتريدين بالضبط يا انسة
ـ خليهه باجر
اليوم نرتاح ونحضر نفسنة باجر ونتزوج
ـ وشيفرق اليوم عن باجر
ـ سوالف نسوان غير اتحضرررر
ـ اوك اوك فهمت
راح اكعد بذيج الغرفة
وانتو اخذو راحتكم بالبيت
ـ قابل انت غريب
ـ باجر هيج وقت
ماكون غريب
ـ منتضرتة علئ احر من الجمر
ـ مو اكثر مني والله
ـ غمزلني ودخل للغرفة..
الله لا يحرمي منة يارب
اني ولا شي بدونة
لو لاه مستحيل اوصل للوصلت الة..
دخلت للفرقة يم خواتي وكعدت اصفط الملابس بالكنتور وحضرت نفسي
خابرت نادين وحجيتلهه بموضوع زواجنة وكالت خلي الموضوع عليه..
باليوم الثاني مريت عليهه اني وخواتي لان هية تحجي فرنسي بطلاقة …
رحنة اني وياسر واتزوجنة زواج مدني
ياسر. ـ واخيرااا
ـ واخيرا
ـ الف مبروك حبيبتي يارب السعادة كلهه وياية
ـ انت البركة كلهه واكيد السعادة كله وياك واثقة من هالشي
ـ احلئ عروسة
ـ بعدني ممضبطة نفسي
ـ تبقين تخبلين بنضري
ـ الله يحفظك الي ولا يحرمني منك
ـ يلة نرجع للبيت
ـ للاا يا بيت
اريد اروح اضبط نفسي واخلي مكياج واسوي كلشي بنفسي
ـ اهاا
اوك ..
بس ما اندل هنا شي
نادين ـ خليها معي لاتشيل هم نسأل هدول العالم وديلونا
ـ لالا شلون ميصير لازم ابقئ وياكم
نادين ـ مابيصيرر فال مو منيح تشوفها بالبدلة خليهه اضبطهه واجيبهه الك
ـ زين تندلن ترجعن
ـ اي شو بيك الكارت معنا ونعرف نرجع لا تاكل هم..
ـ طيب خابروني اذا احتاجيتو شي
ولا تتاخرون
ـ نحتاج شي تلت ساعات ونرجع
ـ ها ..اوك .. زين اجي وياكم بس ابقئ بعيد
ـ يهيي عليناا ..
نونة ـ هههههه روح اخرتني ترة
ـ زين والبنات شلون
نادين ـ بيبئو معناا ماعليهُن شي
ـ غير يبقن وياية خواتي
ـ اوك انتضرج علئ احر من الجمرر
نادين ـ هالجمر عمرك فيية اركلية
وروح انت كمان ضبط نفسك
ولك انت اليوم عريس شو بنك
ـ وهو كذلك ..
يلة اشوفكم بعد تلث ساعات لاغير
ـ اي ياعمي لاغير ماتخاف
نونة ـ راح ياسر وبقينة اني وخواتي ونادين
..نادين ماريد شي غالي
اريد شي بسيط وسعرة مناسب وحلو
ـ تكرمي بنسأل ونشوف
ـ رحنة للسوك هية تسولف وياهم وتسألهم ويدلوهه افترينة هواي محلات يلة لكينة شي حلو ومناسب
اخذت فستان ابيض هادئ
لان كل البدلات غالية كلش غاليه
نادين ـ شو قولتك انا اعملك الميك اب
ـ تعرفين
ـ اي بعرف ومضبطوة كمان..
لانو هون كلشي غالي
ـ يلة لعد ياريت ماريد اصرف هواي
ـ اي تكرمي ..
والله لاخليكي احلئ عروسة
ـ خابرت ياسر وكلتلة يطلع من الشقة حتئ ارجع واضبط روحي
خطية كام يضحك ماحجة شي
وفعلا رجعنة لشقتنة مالكيت ياسر
قفلنة الباب وكعدت نادين تضبطتني علئ كولتهه لبست الفستان طلع يخبل علئ جسمي
مكشوف من الكتف
وبي ردن علئ الزند
ونايم علئ الجسم
وكلش طويل
بي جاكة كبيرة صفح
لبست وياه حذاء كعب مو كلش عالي اوف وايت
وشعري لمتة من الجوانب
بس مو سحبتة مجرد رفع بسيط وكذلة ومكياج خفيف…
اصدقائنة الي بالكمب والي همة نفسهم تقريبا بالشقق يمنة
اجوي ويانة وزفونة
جان احتفال كلش بسيط ومستعجل
لكن بنضري يخبل
طلعو الاصدقاء وبقينة لوحدنة
نغم ـ مبروك عمو
مبروك نونة حبيبتي
ـ حبيبتي يوم الافرح بيج
ـ لا ماريد
اريد اخلص دراستي
واصير فد شي جبير
ـ ان شالله يارب تصيرين طبيبة وافرح بيج
ـ اي اريد اصير طبيبة ان شالله
بس الله عليكم مو تعوفونة
عمو ياسر مو تعوفنة لو تاخذ نونة من عدنة
ـ لاتخافين عمو هالسالفة مستحيل تصير
نونة ـ لج شنو هالحجي وين اعوفج بعد كل هالحروب الخضتهه تكولين اعوفج شنو متعرفيني.. ركضن عليه كل خواتي وحضنني
ياسر ـ يلة حب
ـ يلة
صبا ـ وين رايحه وية عمو
ـ حبيبتي لغرفتنة
الحان ـ لاا نونة تنام يمنةةة
ياسر ـ لا بداااعتكمم لاتسوون هالمقلب بيه
صبا ـ نونة مالتنة يومية تنام يمنةة
ـ انتي كلتيهه يومية تنام يمكم
خلوهه اليوم يمي
الحان ـ ماا متعودة انام بحضنههه
ـ واكفة. بالنص وخواتي يحجن وياسر يحجي متت ضحك عليهم
شكل ياسر يضحك من يتوسل بيهن..
ـ اي ضحكي ضحكي شكوو علييج
ـ خلي انيمهن واجي
ـ شتنيمين بعدهه العصررر
ـ اي اصبر لليل لعدد
ـ لااا صدددك
ـ ااي والله
ـ لج نوونة
ـ خطية صغارر شلون غير اسايسهن
ـ واني مو خطيةةةة صارلي كومة صابرر
ـ اي صبرت سنين
اصبر شوي بعد
بس نص نهار مو هواي
ـ نص نهار
يعني اكثر من ست ساعات
روحي روحي لا اشمرج من البالكونة
ـ هههههههه..
خطية كعد وايدة علئ خدة ويباوعلي بتك عين
دخلت خواتي للغرفة وكعدت اسولف وياهن وقنعتهن انو يوم انام يمهن ويوم يم عمو ياسر لاني زوجته صرت
بالبداية ماقبلت الحان لان هواي متعلقة بية
بس بعدين اقتنعت
وعفتهن بالغرفة وطلعت
باوعت عليه
بعدة كاعد وحاط ايدة علئ خدة
ضحكت ووالتفتت عليه ودخلت لغرفتنة ولحكني…
وللحكاية بقية…………… 🥀