الحلقة الستون
#ليلة_من_فبراير
وتراه يصمت گي يواري حبه
وبقدر ما تخفي المحبة تعلمُ
عبثا يخفي سره في صمتهِ
من قال ان الصمت لا يتكلمو
❤️
ياسر ـ ماكو غير المووت يخلصني من هالوجع الاحس بي
اني يوومية الف موتة اموت
والله
بس انتي متحسين بية
ياريت الله ياخذني
يارريت
اني ماريد اقطع قسمتج
واوكف بطريق سعادتج
بس ما اكدرر والله ما اكدرر
نهاوند ـ وگ شبيك
انت مناقصك شيي
معقوولة عندك عادي تحب بنية عمامهه شامريهه بالشارع بفترة من فترات عمرهه
ـ هذا الامر اعرفة من زمان
لا اثر علئ حبي الج ولا قل
بالعكس ززاد مانقص انتي مالج ذنبج بهالشي
ـ انهاريت من البجي
من شفته يبجي ومنهار ..
لازم اخلي يكرهني او علئ الاقل يبتعد عني ..
يعني راح تبقئ تحبني وتريدني
حتئ لو تعرف بية
اني ..
اني
مطلقة
ومسجونة بتهمة جريمة قتل
ـ تراجعت خطوتين وصفنت بكلامهه
جريمة قتل؟!!
ـ من شفته ابتعد حسيت من صدك ادمرت وخسرتة..
حقه هوة حاله حال هالناس
صعب يقبلون بهيج مواصفات…
دنكت راسي وكلتلة .. اي
ـ انعكد لساني ماحجيت بعد
بس صافن عليهه و اسمعلهه
اريدهه تحجي كلشي
بلكي الكة خيط امل اتعلق بي
ـ شفت..
انت متعرف عني شي
يعني حبك الي غلط..
بس وكفتك وياية مستحيل انساهه
كلتلك اني لا الك
ولا لغيرك
لان محد يقبل بهيج بنية مثلي
اترخص منگ ..
دخلت للبيت وقفلت الباب
اتمنيته يصيحلي او يحجي كلمة
اويكلي اوكفي فهميني
اتمنيت ينطق اي حرف بس مانطق من الصدمة..
سديت الباب وصعدت للغرفة
شكد اتونست اليوم وغيرت جو
وشكد هسة طلعت من عيني هالفرحة
كعدت بمكاني اشهگ وابجي
ليش ما مكتوبلي اعيش مثل البشر ليش
نغم ـ شبيج نونة
ـ مابية شي
ـ شجنتو تحجين انتي وعمو ياسر جوة
ـ ماكو شي..
اتفرجي واسكتي
ـ لعد ليش تبجين شبيج
ـ كااافي تلحيين
التهي بروحج وعوفيني
ـ لاتصيرين عصبية بعد ما الح والله..
زين انزل اسويلج حليب وجاي
ـ لا ماريد
ـ اجيبلج مي تغسلين وجهج
ـ هوووووف
ـ اوك اوك .. يلة بعد ما احجي…
ياسر ــ دخلت لبيتهه وعافتني واني كلشي ممفتهم منهه
بس المشكلة
ما كدرت احجي وياهه ولا كلمة
من الصدمة لساني انعكد
وبس اتصفن
شلون مسجونة ومطلقا ومتهومة بجريمة قتل
وهي من اجتي لهنا جان عمرهه 16 سنة
زين اشوكت اتزوجت حتئ تطلك
والمن قتلت ..
شنو السر الوراهه
شنو مسوية هالبنت
لا ماصدك مسوية شي
ممعقولة هالبنت البريئة يطلع كل هذا منهه
فوكاهه عافتني ودخلت
بدون متنطيني ااي تفسير
ما كدرت اتحرك من مكاني
احس انشليت وخدرت رجليه
حتئ مابية حيل اطلع مفاتيح بيتي
تربعت وكعدت بمكاني بالطرمة
الجو بارد يضرب العظام
والغيوم تجمعت بالسما
كأنو تريد تبجي علئ حالي
وتشاركني هالهموم
معقولة هاي الطفلة البريئة
العيونهه كلهه برائة وطفولية
مجرمــة
لا لا ماريد اصدك هالشي
ولك هاي طفلة يامجرمة
اذا توشف دجاجة تنذبح يمكن تبقئ تبجي مو عاد جريمة قتل
ولك لا تغشك المضاهر
ياما تحت السواهي دواهي
وخلف المراعي ذياب
البنية اجتي بحاله غريبة هية وخواتهه
اكيد مسوية شي
والا ليش تنهزم وهية بهالعمر
وگ شبيك اشنو هالغباء
يعني معقولة من ذاك الوقت الشرطة مامسكته ..
يمكن حجت هيج
حتئ تخليني ابتعد عنهه
معقولة تتهم روحهه بهيج تهمة
حتئ بس ابتعد عنهه!
اختلط دمعي وية دمع الغيوم
اتمنيت هالرعد والبرق ينزل عليه يصعقني ويخلصني من هالدنية
زين هية ليش ماوضحتلي شي
ليش ما حجت
ليش ذبت هالكلام ودخلت
ليش مادافعت عن نفسهه
نهاوند ـ بقيت الوب بالغرفة
ماعرف شسوي
اتمنيت يخابرني ويكلي تعالي فهميني شنو سالفتج
بس لا اتصل ولاسأل
الدنية تمطر برة مطر قوي
هوئ كلش عالي
والاشجار صوتهه يخوف
وصوت الكراكيع فزز خواتي
والتمن يمي من خوفهن
وحتئ الي فززني
هالصوت يذكرني باب السجن
من جانت تنفتح وتنسد
كل مصايب السجن اجتي ابالي ومر عليه مثل شريط الاخبار اشوفهه واقراهه
اخذت التلفون وردت اخابرة
بس تراجعت ..
شمرته علئ الفراش وكعدت بمكاني
حضرت لايت يمي
خفت لاتنكطع الكهرباء
لان المطر صار كلش قوي ويضرب علئ الشباك
ياسر ـ رغم المطر والبرد القوي
بس احس روحي بعالم ثاني
ما حاس بشي ابد
ماعرف شكد صارلي كاعد بمكاني ما اعرف
ماكمت احس بالوقت
الاسئلة براسي دوختني
ولازم اسمع الاجابة منهه ..
وكفت علئ حيلي ودكيت الباب
لو بيدي اصيح باسمهه بعالي صوتي
بس الجوارين ما راح تسكت
وتفسرهه بغير تفاسير
اضطريت الزم اعصابي…
دكيت الباب مرتين بقوة شوي
نغم ـ الباب .. يمكن عمو ياسر يريد شي
نهاوند ـ روحي شوفي شيريد
ـ اوك ...
هلو عمو
ياسر ـ نغم وين نونة
ـ فوك تريدهه..
ـ اي عمو صيحيلهه
ـ عمو تعال ادخل جوة هدومك مبللة
ـ لا خليني هيج احسن
ـ صعدت طايرة لنونة ..
وج نوونة خطية عمو ياسر مبلل من فووك ليجوة ويريدج كال صيحيهه
ـ سكتت شوي
جنت خايفة من ردة فعله
خايفة يكلي طلعي من البيت
لو يهيني
لو يتصرف تصرف اني ممحسبة اله
كعدي هنا انتي وخواتج
هذا اللايت يمكم خاف تطفئ..
ـ يلة. نزلي عمو جوة شبع برد
ـ هسة انزل..
لبست روب فوك البجامة لان الجو بارد
نزلت شفتة واكف بالباب وينكث مي من شعرة لرجليه
وعيونة حمرة
ما اعرف جان يبجي
لو لان بردان وواكف جوة المطر وهيج حاله..
ـ عفتيني ودخلتي لبيتج بدون متفسرين ولا كلمة من الحجيتي
ـ انت ماطلبت افسرلك
ـ وهسة طلبت ..
فهميني
ـ ادخل جوة ياسر لاتبقئ بالباب هيج
ـ لا خليني برة
ـ لزمتة من ايدة وجريته للمطبخ وسديت الباب..
جبتلة الكرسي وكعدت وقربت عليه الصوبة ..
علئ شنو خايف
ومن شنو
احنة طول هالفترة نقشمر علئ نفسنة
نعرف الناس شتحجي وشتكول وخصوصا عليه
اغلبهم ديحجون بكعدتي هنا
سمعتهم بأذني النسوان يحجوهه يكولون اليلل يستر العيوب
وهمة باب علئ باب
ومن رديتهم طلعت اني فاهمة غلط..
ـ مو هذا موضوعنة
ـ كل المواضيع تصب بنفس الحلقة…
اللي هية سمعتي
محد منهم كال هالبنات شنو جابرهن تعيشن هيج عيشة
وين البقية عنهن
شنو صار وياهن
شنو شافن بحياتهن وهنة بهالعمر
بحيث اتخذن هيج قرار مرعب
يعيشن لوحدهن بهالضروف الصعبة
محد يحجي هيج حجي
بس كل حجيهم تهجم وطعن بالشرف
مهزومات
مو خوش بنات
مسويات مكسورة
كاسرات وجوه اهلهن
معقولة لا عمام ولا خوال عدهن
وغيرهه من الحجي والسب والقذف
هالناس ولاعبالك عايشين بالعراق
كل الاعرفهم عدهم عداوة وية كرايبهم ويكرهون اقاربهم من الجبيررر لاخرر طفل
حتئ لو عمرة يوم واحد ومابي اذية علئ بشر همين يكرهو لان يكرهون اهله
بس من يشوفون بنات مثل حالتنة
ويسمعون بقصتنة
الكل يسووي نفسه مستغرب ومتعجب
وكأنو عايشين بالمريخ والنشوفة كلة. جذب بجذب
والكل يصير محلل سياسي براسي
شعجب هيج عمامكم
وليش هيج خوالهم
ووين عشيرتكم
اعرف انت انصدمت من عرفت بية مطلكة ومسجونة واني بهالعمر
ومو اي تهمة بسيطة لا
جريمة قتل
التفتت عليه وكلتلة
تعرف شنو يعني جريمة قتل
واني بهالعمر ..
يعني خلص
بعد ما الي حق بأأي شي بهالدنية
مالي حق اضحك مثل البنات الي بعمري
ولا ادرس
ولا اعيش حياة اتمناهه
ولاززم اانسة فكرة يكون عندي بيت وزوج واطفال
مثل اي بنت طبيعية عايشة بهالدنية
كل اليعرف بية مطلكة
ابالهم شي واحد بس
شلون يستغلون هالشي لصالحهم
وبدون ميبين عليهم
كل كلمة والثانية وكلولي انتي مطلكة وخرريجة سجون
شتريدين منو ياخذج مثلا
لازم ارضئ باي واحد زايعته الكاع ولعبانة نفسهه منهه
فقط لان بية هالخلصتين
وياااااريت اني السببب بالصاار
يارريت اتزوجت بارادتييي واختارريتة جان كلت
انجبييي واتحمليي هذا سؤؤ اختياارج
بس كل المصااايب المرت علية ورحمةةة امي ازدهار الماعندي اغلهه منههه جوة التراب
وحق خواتي الماعندي ااغلئ منهنن
مو بسببي
ـ تفطر كلبي عليه
تبجي وتحجي من حركة كلب
شكلهه بريئ
وعيونهه صادقة
مستحيل دتكذب..
ورغم هذا مانطقت ولا حجيت
ما اعرف شبية
كل اموري تخربطت وبقيت صامت
ـ من اجيت لهنا جنت خايفة اكلكم اني مطلكة ومسجونة
لان اكيدددد راح تتركوني مثل ماسوو البعض
وحقكم اني مالومكم
حقكم تخافون
بس والله مو قصدي اظم عليك لغاية بنفسي لا ابد ..
اني حجيتلك عن فترة حياتي الاولئ وهاي اعتبرهه فترة طفولة
لان جنت اقل من 13 سنة
اتخيل اقل اني من 13 سنة ونغم سبع سنين وصبا ستة والحان خمسة
بهالعمر وشفنه كل هالمصايب بحياتنة
من خاله وداد اخت امي ازدهار اخذت خواتي
بقيت لوحدي يم بيت عمامي
شفت انواع التعذيب والكتل والجوع والاذية النفسية والجسدية
حجيتلك عن جيرانة ام اعمر الله يذكرهه بالخير جانت تذكرني يومية بتلث وجبات
حتئ لا اثكل علئ بيت عمامي ويمشروني بالشارع
ورغم هذا جانت منال تبوك الاكل وتعوفلي الفضالة
وجنت اكول ميخالف
اهم شي ما شامريني بالشارع
وفوكاية سكف يحميني
اتحملت وسكتت اشكال المصايب
واني طفلة كلشي ما افهم
البكدي حايرات يلعبن بيت بيوت
ويلعبن باللعابات
ويحيرن شيسوون بتسريحة لشعرهن
ويبجن اذا تعاركن وية اخوانننهن
بس اني غير شكل عنهن
كبرت قبل وقتي بهواي
كبرت لدرجة
لازم اتحمل مسؤلية نفسي وخواتي
كبرت لدرجة اتحمل ظلم والم واذية واسكتتت
وبيوم صار انفجار كلش قوي بالاعظمية صادف وية طلعت عمامي وعماتي
مات عمي توفيق وعمتي شفاء وبنتهة
واتصوب ناصر .. عمي
وراحت سيارته بالانفجار والمحلات الجان ماخذ فلوسهن بالفايز من واحد اسمه ابو صباح ادمرت ..
المحلات ادمرت والبضاعه احتركت
يعني بوكتهه موت خراب ديار صار عدنة
ناصر خسر كلشي
لابضاعه ولا سيولة بعد عندة
ماكدر يوفي الدين العليه
لان الربا صار يتضاعف يوم عن يوم
وبعد ميكدر يسددة وصار الفايز اضعاف
باعوني لابو زوجي بصفقة خسرانة..
يباوعلي ياسر وعيونة كلهه تسأئلات وحزن
اتمنيته يحجي كلمة وحدة يواسيني بيهه بس ابد مانطق
لكن نظرات كلش غريبة
ما اعرف مين جاب هالقسوة
ما اكدر اخلي عيني بعينة
دنكت راسي وكملت كلامي
تعرف شنو ييعني باعوني تحت مسمئ اسمة زواج
يعني ما الي اي حقوق
بضاعه واخذوهه بدون ميدفعون ولا فلس
الفلوس راحت لمنال ودعاء يتمتعون بيهه واني بقالي الظيم والاذية
زوجوني لواحد اسمة صباح
اكبر مني بهواي سنين
ومعقد نفسيا ومريض
ورغم هذا ماحجيت
وكلت ميخالف الحمد لله
اهم شي سكف فوكايه ومو نايمة بالشارع
اتخيل عمي ارشد جان وكيلي من عقدلي يم الشيخ
هذا عندة كومة بنات ويحبهن يموت عليهن
جنت اكول ليش مانطة وحدة من بناته
ليش ماناصر زوج بنته دعاء لصباح
بس هذني عدهن اهل
مو مثل اهلي جوة التراب
حركة بكلبي جانت وغصة
ليش اني بالنار يذبوني هيج ويضحون بية ليش ميداروني مثل بناتهم
شراح يأثر عليهم
كل هذا لان ماعندي ام واب يدافعولي انسلب حقي بكل شي
اخذوني بالهدوم العلية
وخلوني ابيت صباح واهلهه
والله حتئ العريس ابد مشايفته ولا اعرف شكلة
ولا اعرف شكد عمرة
كل الاعرفة اسمه صباح وبس
سألني الشيخ موافقة
كرصتني مرة عمي منال وكلتلي كولي موافقة
وحجيت مثل ماطلبو مني
دقايق وكلشي انتهئ
راحو وعافوني يمهم
بيت غريب عليه اول مرة بحياتي اشوفه
رجال ابد ماعرفة ومشايفته ومطلوب مني اعتبرة زوج واطيعه واعيش تحت ظلة
تدري هسة اتذكرت شغله
من دة اطلع من بيت عمي ناصر عود عروس ودياخذوهه لبيت رجلهه
شفت ناصر كاعد ومقهور ووجهه ميتفسر
كل عقلي جان مقهور عليه لان بهيج طريقة اتزوجت
بس طلع مقهور علئ حاله لان بعدلة مطلوب دفتر وحاير مين يدبرهن ..
اما صباح
جان رجال جبير بالعمر مواليد 1974 بس مريض
هو جان زين نوعا ما بس مرات يفقد ويمشي بحجي اهله ويأذيني
ابوه جان واحد نذل وخبيث
بقئ يتحرش بية واني اصدة
يكلي المفروض انتي تصيرين عروستي مو عروسة صباح
لان تزوجتي بفلوسي مو بفلوسة
بس زوجته ماقبلت ووكفت بوجهه
بقئ يطاردني ووين ماروح
جنت ابتعد عنة بكل الطرق واتختل منة
حـ حتئ جان مضيق علينة فد مرة
لا فلوس ولا تلفزيون لا مصرف كلشي ماكو
مثل الخدم عايشن
نخدم بلاش مقابل لكمة ناكلهه يمهم
جان صباح يشتغل وياخذ فلوس شغله
رغم جان صباح مريض بس مو مؤذي هواي الا اذا فقد اعصابة
جنت اخاف اكلة ابوك يتحرش بية
اخاف لا ينخرب بيتي وانشمر بالشارع مرة ثانية
الئ ان بيوم من الايام سافر صباح للشمال حتئ يتعالج ويرجع رجل طبيعي ونعيش حياتنة بهدوء
كعدنة الفجر وودعته وطلع
رحت اشرب مي بالمطبخ ولحكني واستفرد بية ابوه…
اباوع لياسر فتح عيونة وملامح وجهه مشمئزة ..
ماعرف مشمئز مني لو من الموقف الحجيته…
ورغم هذا ماحجئ ويايه
ـ فتحت عيوني لان ممستوعب هالقذارة الاسمعهه وين عاشت هالبنية بيا مستنقع
ـ لا تخاف ..
اني مو ضعيفة مثل متتصور
ساعة الساعه اكدر ادافع عن نفسي ..
من تقرب عليه جريت سجين وضربته بيدة
بس النكس
سوالي محضر يم الشرطة
وتهمني بايكة فلوس ااوراق منة
واني بحياتي مشايفة الاوراق والدولار..
انسجنت ليلة واني ميتة رعب
الله لايرحمة كلي
انتي ما خليتيني اتونس وياج
واني بس واحد
شوفي هنا راح يغتصبوج عشرة عشرة ويطيحون حظج..
متتخيل الليلة السودة المرت عليه بالسجن نوم معرفت انام
كل شوي اتخيل راح يدخلون علية ويسوولي شي
بس ماعرف شلون قنعتهم ماوية اخت صباح وخلت ابوهه يطلعوني ثاني يوم بتعهد خطي مني ان ما اتهجم عليه بعد
من طلعت من السجن ماوية ماخلتني ارجع لبيت ابوهه ووكفتلي وكفة مستحيل انساهه
اتصور حتئ صباح ماخلوه يروح لبيت ابو
بس وراهه بفترة بسيطة طلع صباح يشتغل كهربائي ابيت واحد
ومن مسأوء الصدف
يكون هالشخص بيتة قريب علئ بيت اهله
اخذة الحنين وراح يتمشة لاهلة
وشايف جيرانهم ومسلم عليه
بس جيرانهم مارادلة السلام ومسمعه حجي
لان متصورين احنة اللي بالبيت كلنة مثل ابو صباح هو مرابي ياخذ بالفايز
واحنة بغايا وعاهرات وسارقات..
راح يستفسر من ابو عن هالحجي وعرف كلشي لان ابوه خلاه يوقع علئ اوراق ضدي ومن عرف شنو هالاوراق وعرف ابوه شمسوي تعارك وياه
خابرونة اني وماوية حتئ نجي نوكف صباح
اول ماوصلنة لزمني ابوه وضربني
بس بثوانني كلشي انتهه
والئ هسة ما اتذكر شنو صار بهاي الثواني
كل الاتذكرة
جان بيدي كسرة كزاز جبيرة
وايدي مجروحة جرح جبير
كشفتلة ايدي حتئ يشوفهه ..
هذا الجرح..
ماحسيت بوكتهه بالم ولا شي
بس ايدي متروسة دم
وصباح بيدة سجينة
حاطهه بكلب اخوه فلاح
لان جان هواي يتجاوز علية
ويطبك وية ابوه علئ الباطل ضد صباح
بعدين عرفت اني ضربت ابو صباح بهالكزازة البيدي
بس جان بعد بي روح ويتحرك مميت
ثواني واجئ صباح خلص عليه وقتلة
وحذر اهله يحجون شي
كلهم اذا حجيتو وجبتو سيرة نهاوند اخلص عليكم واحد واحد
حتئ لو اني بالسجن
هالموقف مستحيل انساه لصباح
قتل ابو حتئ لا يجيب سيرتي وانسجن
وبنفس الوكت ياخذ ثار نفسة وثاري منهم
ـ مكدرت استوعب كمية المصيايب الشافتهه هالبنية تحجي واتخيل المنضر كدامي وارسمة بعقلي شي مقزز و بنفس الوقت مرعب
هيج موقف يهد جبال
دم وذبح وقتل
زين منهه بعدهه عايشة وتحجي ومحافضة علئ عقلهه
ـ رغم صباح اعترف بالجريمة
بس بقوني محبوسة لمدة شهر كامل
لان بوقتهه صادف اعدام صدام حسين
والناس مخبوصين وكلشي متوقف ..
بهالفترة عمامي
لا اجو ولا ذكرو عدهم بنت اخ وين صفئ بيهه الدهر رغم خبر الجريمة انتشر بالاعظمية
قبل لا اطلع من السجن بكم يوم صباح طلكني
من طلكني عرفت صدك صفيت بالشارع
طلعت من السجن هايمة علئ وجهي ماعرف وين اروح
اخاف ارجعلهم لا يقتلوني لو ياذوني مثل قبل
خابرت اخته ماوية بس متريدني اروح يمهه
بقيت من الصبح للمغرب بالشارع
وراهه الله سهلهه عليه
وجابلي خاله وداد
هية تعرف ناس واخذتني يمهم اشتغل خدامة ابيتهم
اي لاتباوع هيج و تنصدم
اشتغلت خدامة بالبيوت انظف وامسح واكنس
مقابل اجر بسيط
ـ صافن ما اعرف شسوي
كل الكلاام اختفئ مني
وما كمت اعرف اعبر عن دهشتي واستغرابي غير بالنظرات
ـ الئ ان صار الي صار وحجيتلكم شصار
واجيت لكركوك حتئ الكئ امي ..
وبدل ما الكاهه لامي
لكيتكم والتقيت بيكم
اكيد الله خلاكم بطريقي اني وخواتي لان والله مظلومات وماعددنة احد ولا مأذين بشر
بس بوكتهه خفت احجيلكم
لان شفت الفندق ميقبل يلفينة ويدخلنة لان احنة بنات صغار وقاصرين
وشفت اميل الله يذكرة بالخير شكد جان متزمت تجاهنة
والله خفت احجيلكم حتئ لا تتخلون عنة واحنة ماعدنة احد
فـ اضطريت اظم عنكم هالمعلومات
واتمنيت يندفن الماضي وية صباح الله يرحمة..
اي لا تباوعلي بأستغراب
قبل فترة اخته خابرتني وكالت مات
لان راد ينهزم وية جماعه من السجن ناس مهزومين وناس باقين
والشرطة كاتلين منهم الكاتلي ولازمين البقية وهو من ضمن الماتو خطية ..
عفته كاعد علئ الكرسي
وكمت للسنك عيوني من الدموع انعمت غسلت وجهي ونشفتة ..
الكتلي علئ الصوبة بقئ يفور
اخذت منة مي وخليته بالقوري
وحطيت بي جاي ورجعته للصوبة
رحت للثلاجة طلعت جبن ولبنة وصمون وخليتة يمه علئ الكاونتر ..
اشتغل واحجي وياه
هسة عرفت ليش اكلك
اني لا الك
ولا الغيرك
لان محد يقبل بية
كل الاعرفهم ورادو يخطبوني من يعرفون بية هيج حالتي يعوفوني
وكلهم استحسفو هواي اشياء بية
لاني مطلكة ومسجونة
معليهم اني بريئة او لا هذا الشي اخر همهم ولا يسألون عنة
المهم هالصفتين راح تبقئ لازكة بية طول العمر…
طالما مطلكة ومسجونة
يعني اني عاهرة
والشرطة نايمة ويايه
ومباقية بنفس احد
من وجهه نضر الناس
كلهم نفس الشي تفكيرهم
زلم ونسوان
اذا خطبوني لازم ارضئ بأقل من القليل وابقئ خدامة جوة رجل اليسوة والمسيوة
واتحمل انواع الاهانية وقلة القيمة لان سوو فضل عليه وزوجوني لابنهم ..
لو بيهم يطلبون مني علاقة خارج الزواج
ـ متحملت اسمع هالكلام كلة
تركتهه وكمت اريد اطلع
ـ حسيت بي كام من مكانة يريد يطلع ..
ما التفتت عليه
بقيت اخلي حليب وشكر بالكوابة ومستمرة بالحجي..
يتصورون اني متزوجه وسهل يتلاعبون بية لان عود ميبين عليه
بس ميدرون اني بعدني بنت
وممتزوجه بالواقع
ـ فتحت الباب وقبل لا اطلع سمعت هالكلمة منهه
راسا التفتت عليهة مفهمت شنو بنت وهية مطلكة ..
ـ ضليت واكفة بمكاني ابد ما التفتت عليه ..
اي لا تستغرب ..
كلتلك صباح الله يرحمة جان مريض
وما لحك يتعالج ..
وبعدني بينة ما لمسني بشر..
جنت متأملة يحجي ويايه
ينطق اي كلمة
والله قابلة حتئ لو عيط عليه
بس المهم اسمع صوته
لكن خاب ضني
طلع وسد الباب وراه وراح بالشارع بهالمطرة
ماتحركت من مكاني ولا كدرت الحكة واكلة وين رايح بهالجو
كعدت بمكاني وشبعت بجي
نغم ـ ليش نونة
ليش حجيتي كلشي لعمو
ـ احسن ..يسمع مني ولا من غييري
ـ هسة وين راح نروح
وين نكعد بيا بيت
ـ ارض الله واسعه لاتخافين
ـ واذا طلع بيت مسكون شلون
ـ انتي بس هذا هامج..
لا تخافين مو كل البيوت مسكونة
مثل ماهذا البيت مابي شي
نلكة مثلة ونعيش ..
تعالي اخذي صينية العشة فوك واتعشو
ـ وانتي
ـ ماريد .. اريد ابقئ كاعدة هنا
ـ امشي ويانة ليش لوحدج
ـ روحي نغم لاتلحين…
ـ يلة رايحه .. اذا تريدين شي صيحيلي
ـ صعدت نغم وبقيت كاعدة بمكاني
المطبخ دافي من الصوبة
المطر صار كلش غزير
انفجرت المحولة الي بالشارع وطفت الكهرباء ..
علكت شموع وطفيت الثلاجة والهيترات خاف يعلك السحب
نزلن خواتي يمي يكملن عشاهن
بقيت كاعدة انتضرة شوكت يرجع للبيت
بس ماكو مارجع
وكف المطر واجئ السحب
صعدن خواتي ينامن فوك
واني بقيت جوة
صارت تقريبا ساعه وحدة وربع
نص الليل وبعدة ماكو
هواي اتاخر وين راح
دكيت عليه مغلق تلفونة
عزة بعيني وين صار وين راح هالولد
بقيت سهرانة انتضرة
ليل الشتا طوويل شيخلصة
الكهرباء تجي وتنكطع ممستقرة
وابو السحب طفئ المولد من ساعه ثنتين بالليل
بقيت كاعدة علئ الشموع العندي لان اللايت يم البنات فوك
اكيد ياسر صرف نضر عني
زين ليش مقهورة يا نهاوند
مو هو هذا الردتي
هو هذا الصح
لا اني الة
ولا هو الي
ومستحيل ننجمع..
صارت ساعه ستة الصبح
بعدة النهار ماطلع ولا الشمس بينت
وبعده ياسر مارجع
ماعرف شسوي غير البجي
وية طلعت الفجر طلعت بالطرمة
احب هالوقت واعشقة واتفائل بي
الجو بارررد بـــرد مو طبيعي
الغيوم ضامة الشمس وراهه
ماشوف سما بس غيوم
لابسة بجامة وبانتوف وروب وارجف من البرد
سمعت صوت برة يم الباب
صوت كحة كلش قوية
فتحت الباب وطلعت اركض
لكيت ياسر متقرفص
وكاعد اباب البيت
ردت الطم من شفته
عزااااا انت من شووكت هنااا
ياسر ـ من عفتهه وطعلت من البيت اتذكرت اميل مو هنا
اني متعود من اختنك اروح لاميل لان هو صديقي المقرب
ويعرف كلشي عني
البقية اصدقاء بس مو مثل اميل
احتاريت وين اروح بهالليل
بقية اصدقائي بعيدين هواي عن بيتي
واني ماريد اعوفهن وحدهن
وما اريد ارجع للبيت لان يخنكني
كلبي مقبووض وين اروح
اشتد المطر صرت ماكدر افتح عيني من المي الينزل علئ وجهي
القمارة مال بيت جيرانة طالعه شوي علئ باب بيتي
كعدت جواهه وتقرفصت بمكاني وكعدت يم الباب
ماعرف شلون طلع عليه الصبح
خلصتة تفكير
اشكال الافكار اجتي ابالي
افكار رفضتهه وافكار تقبلتهه
ما كدرت انام
عظامي كلهه توجعني
وية طلعه الفجر حسيت بنفسي حرارتي مرتفعه وكمت اعطس واكح
الكحة كلش قوية
راسي كلش يوجعني
هدومي بعدهه مايبست من طلعت من بيت نونة
ورديت رجعت للشارع جوة المطر ورجعن تبللن وجسمي شبع برد
ولو الالم البية ميخليني احس بشي
بس اكيد اتمرض علئ هالحال
من كحيت طلعت نهاوند وشافتني هيج حالي
راسا كامت تبجي
ـ ليش هيج سوويت بنفسسك
ليش مادخلت البيتك
طول الليل انتضرك تالي تطلع اباب البيت كاعد
اتقربت عليه ولزمته من ايدة
رفض يكوم بالبداية
بس كوة جريته من ايدة
ودخل لبيتة
ركضت حتئ اسويلة شي دافي
بعدني ما صبيت الحليب والجاي ولمحتة طلع من بيتة
تركته علئ راحتة
ما حبيت اضغط عليه
بس عرفت
ياسر بعد ميريد يشوفني
وقررت بعد ما اشوفة
ولا اخلي يشوفني
عفت كلشي من ايدي وصعدت لغرفتي
خليت راسي ونمت
كعدت وية ساعه عشرة الصبح لكيت نغم مسوية ريوك لخواتي ومرتبة البيت ومنظفة بس الطبخ باقي
طبخت تمن ومرك وحضرت الملابس والمواعين والاغراض لان جانت مخربطة
..وينج نغم
ـ وين راح تطلعين
ـ رايحة للصالونات اخذلهن هالغراض ام محمد كالت عدهه وجبة من صبغ الشعر اشوف اذا اخذنة مني بي خوش مبلغ
ـ نجي وياج
ـ لا الجو مطر وباردة تكص كص
ابقو هنا ولا تفتحون الباب الاحد
الاكل يمكم تجوعون صبو واكلو بس لاتطشرون
يلة اني رايحة
اخذت الجنطة وطلعت
وصلت الصالونات وكمت ابيع بالاغراض ووصيت البنات صديقاتي يشوفولي بيت صغير مو غالي
بس يكون مابي شي لا مسكون ولا صخام كلولي ندور ونشوف ..
رجعت للبيت لكيت هواي ولد اباب البيت اتخبلت عبالي خواتي بيهن شي رحت اركض مثل المخبلة ..
بس من وصلت عرفت هذول اصدقاء ياسر وجايبي من المحل لان متخربط وواكع
شنو شبي ياسر
ـ اخذناه للطبيب كال فلاونزة قوية بعظامة ونازلة لمعدتة ..
ـ خطية ميستاهل
الف سلامة عليه
ـ انتي شتصيرين منة؟!
ـ ماصير منة شي
اني مأجرة مشتمل من بيته
ـ همم..
ياسر كلش مريض ووكع بالمحل وجبناه هنا ..
ما اعرف اذا تكدرين تنطي ادويته بالوقت وتسويلة شي دافي لان ميقبل يجي وياية للبيت
جان اخذته يمي اداري بس هو عنيد ماقبل وما اعرف رقم اهله ولا هو يقبل يتصل بيهم
ـ عادي هو مثل اخوية
خلو هنا اني وخواتي نداري
ـ عندج خوات همين
ـ صغار ..
باوعت عليه من الطول للطول وعفتة ودخلت للبيت ..
عمت عينكم كلشي يخلون بي إن
يشوفون نفسهم كواويد عبالهم الناس كلهه مثلهم..
راقبتهم من المطبخ الئ ان طلعو
سويت شوربة عدس وكملتهه ودزيت نغم وصبا عليه..
اخذولة هالصينية بلكي ياكل وسألو اذا مشتهي شي ..
راحت نغم دكت الباب عليه ورة خمس دقايق يلة فتحهه اخذ الصينية ونطاهم المفاتتيح واجني يمي ..
نغم ـ يكول مابية حيل كل شوي اكوم خلو المفاتيح يمكم
ـ خوش خليهن هنا علئ الكاونتر ..
مر يومين وياسر نفس حالته
ماتحسن بس نايم
لا شايفته ولا شايفني
اجتي ام سنان هية والمرة الاسمهه ام مروان..
شفته تباوع عليه من فوك ليجوة
غلست عنهه وماحجيت
ام مروان ـ خاله انتي ليش عايشة وية هالولد وحدكم
ام سنان ـ شنو وحدهم هية مإجرة مشتمل منة
ـ اي حتئ او اكو بيوت لوحدهه مابيهه باب مشترك هيج تجيب السمعه
نونة ـ علئزكد فلوسي والبيت مرتاحه بي خاله
ـ زين وين اهلج عشيرتج
ـ احنة يتامة وماعدنة احد
ـ لعد مين نطلبج
مين نسأل عن اصلج فصلج
ـ يعني اليتيم مين يطلبو اذا اهله ميتين
ـ واليتيم طالع من زرف الحايط شنو ماعندة عمام خوال عشاير
ـ لا ماعندي
ام سنان. ـ البنية ماقصرة شاغولة جادودة تعيل خواتهه حلوة تخبل
مو كلتلج البارحه بالعرس هية يتيمة وخبصتي روحج بيهه
ـ اي يتيمة ماعدهه احد يعني
المن مرجعهه يا عشيرة
عيني البنية بدون اهل
مثل الحلويات المشمورة بالشارع
متعرفين منو مر عليه ومنو ضاك منهه
نهاوند ـ شنو هالحجي !!
جاية تخطبين لو تهينين حضرة جنابج
ـ يا فوكاهه لسانهه متبري منهه
عمي شسوي بحسنهه وجمالهه اذا طلعت هيج لسان وبعدين مبين تسوي مشاكل
شلون اخذهه هيج
غير الهه جبير يصدهه ويردهه
لا عمي شنو هالقسمة متخيلت هيج
راح تطلع
ـ الله وياج خاله…
مناك الباب خاف متندلي
راحت ام مروان ورجعت يمي ام سنان
ودخلن وياهه كم وحدة تريد تشتري
نغم التهت وية النسوان واني لزمتني ام سنان تحجي ويايه
ام سنان ـ نونة خاله وين اهلج
ـ ماعندي احد خاله
ـ عمام خوال
ـ عمام ماتو
وخوال شمروني من عمري يومين
مين اجيب اهل بعد
ـ لعد شلون
تدرين شكد اعرف ناس رادو يتقدمولج بس لان ماعندج احد وساكنة وحدج وية هالولد دارو ووجهم ورجعو
ـ همزين رجعو
ولا يجيون مثل هالمرية تجرح وتحجي بدون فهم
ـ خاله ميصير البنية ضروري عدهه اهل ولد عم ابوج عشيرة اي احد
ـ ماعندي خاله
ليش مصممين متصدكون
ـ تدرين انة قبل فترة جنت احجي بسيرتج وية ابو سنان
ـ اني؟
ـ اي والله .. حجيتلة كلشي عنج
وكلي البنية خطية مالهه ذنب اذا يتيمة شسوي يعني هذا قدرهه
فـ كلي راح يحجي وية شيخ عشيرتة ويدخلكم بعشيرة ابو سنان
ـ يدخلنة بعشيرة زوجج ابو سنان
ـ اي حتئ تصير الكم عشيرة
والناس ترجعلهم بيهه بخطبة بشي
تحتاجون احد وراكم لانكم بس بنات ماكو زلمة وياكم
ـ هاي شنو.. والله؟
ـ اي والله ..
اصبري هسة اخابر ابو سنان واحجي وياه..
ـ ياريت واخلص من هالسالفة الكالبة راسي وحجي الناس المينجرع..
خابرت زوجهه ونطتني التلفون احجي وياه.. الو هلو عمو
ابو سنان. ـ اهلا عمو اهلا بيج
شلونكم ان شالله بخير
ـ الحمد لله عمو بخير
ـ اي عمو احجيلي عنج
ـ شنو احجي عمو
ـ ياعمو انتي من يا عشيرة
ـ ليش عمو
ـ بنتي ااي عشيرة ادخل احد وياهه
لازم تعرف كل شي عن هالشخص
يعني اسمة الكامل مكانة وين جان عايش قبل
عشيرتة شنو خواله عمامة شنو سبب يريد يدخل بهالعشيرة ويعوف عشيرته
اني كتلة لشيخ عشيرتنة هنة ايتام وماعدهن احد وهالشي لله نسوي
بس تعرفين كل عشيرة الهه خطوط حمرة منتعداهه لان تضر بصالح العشيرة
فــ لازم نعرف انتي منو وشنو قصتج ومنو عشيرتج
او علئ الاقل منو عمامج
واقسم يابنتي وهذا كلام زلمة كدامج وداعت صحة اولادي وشكد عزيزين عليه
مستحيل سرج يطلع حتئ لام سنان شكد قريبة عليه وزوجتي مستحيل راح اخليهه تعرف شي عنج الا برضاج
ـ بقيت ساكته خايفة احجي اي كلمة
ـ شوفي عمو
الج حرية الاختيار تحجين او لا هذا شي راجعلج
بس اذا متقبلين تنطين معلومات صعب تدخلين بعشيرتنة
لان البنية مو مثل الولد بسالفة العشاير
خاف باجر عكبة يضهرون اهلج
ويكولون نهبتو البنات من عدنة
وتصير سالفة شرف
ويصير الدم للركب
واحنة منريد هيح يصير لان نيتنة صايفة تجاهكم
بس اذا تحجين انتي وتكولين منو اهلج عشيرتج ذاك الوكت ننطي خبر لعشيرتج ونتفاهم وياهه ويصير خير
ـ همست بكلبي ..
عزة بعيني
يعني بكل الاحوال يعرفون عمامي وعشيرتي..
ـ عمو ..
اذا مسوية شي يخل بالشرف منكدر نوكف بوجه عشيرتج ونخليكم ويانه
ـ لا عمو والله اني مو هيج
ـ ان شالله عمو ان شالله
العندي حجيتة وبقت يمج
ـ خليهه غير وكت عمو
ـ براحتج ..
اخذي وقتج والله كريم ..
ـ شكرا عمو…
نطيت التلفون لخالة ام سنان
جنت واكفة بصفهه وسمعتة يحجي وياهه
ابو سنان ـ هالبنية مهزومة وخايفة تحجي .. مبينة السالفة وواضحة
صرفي نظر عن الموضوع ام سنان
هيج سالفة وراهه دم وطلايب
كليلهه بعد يومين تلاثة شيخ العشيرة صرف نظر عن الموضوع وغلسي
عليمن نجيب المصايب لنفسنه
ام سنان ـ يا .. اي ...صدك
يلة الله وياك..
ـ سدت تلفونهه سلمت عليه
طلعت تركض ام سنان
ما استغربت عادي شنو الجديد قابل ..
مر تقريبا اسبوع وياسر بعدة نايم بالفراش
ابد ماخليته يشوفني
البنات من جانن يروحلة ويشوفو نايم اجي المحة من الباب وارجع بسرعه
من اشوفة كلش ذبلان وحالته تعبانة
روحي تنعصر عصر عليه
مرات يجون اصدقائة يمة
فما ادز خواتي ولا نطلع من البيت
يكفي الحجي الاجانة من هيج بشر. .
بس كلبي متكطع عليه
ادعيلة نهار وليل الله يشافي
الحزن بين عليه وحتئ النسوان انتبهن سألني شبيج ليش هيج حالج اكلتنوقلة نوم
بهالفترة اترددن عليه بنات ام تسنيم
لمياء و ونساء
وصرنة كلش صديقات..
لمياء اكبر مني مواليد 1990
محجوزة لابن عمهه
اخو مرة اخوهن
الزوجو هذاك اليوم
و ونساء اصغر مني مواليد 1994 طالبة…
بس حالهن حال بقية الناس
يسألن وين اهلج
ومنو اهلج
ومنو عندج هنا
وليش بس انتو
ونساء ـ عميي نيالج هيج عيشة عايشة
ـ نيالي؟
ـ اي والله احسدج
لاعندج اخ يتأمر عليج ولا عندج عمام يحكموج عايشة حياتج طول بعرض شكد حلو
ـ شنو الحلو بيهه
بالعكس احسدكم علئ لمة اهلكم
عندج اخ يسندج
اب يخاف عليج
عمام يحبوكم
لمياءـ والله بصراحه لو اني منج اسوي جوازات الي ولخواتي واهج من العراق اروح لدولة اوربية اعيش احلئ عيشة ولا اكبل هالبشر الميعرف يحجي وكل همة يجرح وياذي المقابل
ـ اسافر؟
ونساء ـ رنحي لفرررنسااا الله عليييج يبوووو يبووو زيدان اموت عليييه
ـ زيدان منو
ـ يمةة زين ادين زيدان متعرفي
ـ لا والله
لمياء. ـ لا روحي لدولة بيهه لجوء يلفوكم انتي وخواتج وينطوكم راتب وتعيشون بأمان
ـ يمة اطلع خارج العراق
هو اني بنص ناس اعرف لغتهم وخايفة انوب وية ناس ما اعرف شنو يحجون ووياية خواتي غير اموت
ـ لا تبقين خايبة يويلي شبيج
شعندج هنا اشو يتيمة وماعندج احد والناس تحشر روحهه بيج
لمي فلوس وسوي جوازات وسافري
هناك لا احد يسألج انتي منو ولا شنو عشيرتج ولا وين اهلج ولا هالخريط
ـ كلبن راسي بهالكلام هالبنات
صدك اني دائما اتهرب من اسئلة. الناس
بس من اصفن وية نفسي
اكول لشوكت ابقئ هيج اتهرب
والناس شراح تحجي بعد عني
معقولة اذا اسوي جوازات اكدر اسافر وية خواتي واعيش خوش عيشة! ؟
بلكي صدك
بس مين احيب فلوس ومين ابدي
ما ادري
ياسر ـــ طول هالفترة نونة لا اجتي ولا مرة عليه ولا شافتني
يخابروني اهلي اسوي نفسي زين واضحك ومتونس بحياتي
لان اعرف بس يحسون بشي يجون عليه خصوصا حيدر وهافال مستعدين يجيون مشي اذا عرفو بية شي
اميل جنت اتواصل وياه عبر الانترنت
بس هسة طلع لالمانية هو واهله وهناك دراسه وشغل ومشغول طول الوقت ما اكدر احجي وياه وافضفضلة
ماعرف المن اشكي همي
صدري ضاق
اتمنيت اغمض وافتح والكئ نفسي
بمزار لالش اكعد واشكي همي بيه
وازور وارتاح من هالغم والهم
ـ الووووو وووينك كاعد ناييم
ـ اللابتوب جان مفتوح
دكلي باز عمي نشوان علئ الايميل وراسلني
راسا جريته وجاوبته ..
موجود عمي شلونكم
ـ بخير نسأل عنك اشو فاتح ايميلك وماكو انت هاي ثالث باز ادكلك
ـ ما جنت منتبه اسف
ـ وين انت بالمحل لو وين
ـ لا بالبيت
ـ ليش ولك شعجب
ـ تعرف كركوك من تمطر بعد متكطع صارلهه اسبوع تمطر غركنة
ـ بضاعتك انضربت شي
ـ لا مابيهه شي بضاعتي المحل مرتفع والسكف سويتو
ـ ابشرك راح يجيني ولد ثالث
ـ ها مبروك
طلع ولد وانتو عبالكم بنت
ـ هية تريد بنت انة ماريد اريد كلهم ولد يشيلون اسمي
ـ هههه بالخير
ـ يلة شد حيلك ولگ خلي نفرح بيك
ـ تعرف رأئيي بهالموضوع ياعمي
ـ يولو اشو مو علئ بعضك اشبيك
ـ لا مابية شي ..
ـ كلولك لارا راح تجي يمي هية وزوجهه واولادهه
ـ صدك؟
لارا راح تسافر .. اشو ماقالتلي
ـ لانك بغير عالم عايش
ـ لا والله اتصلت عليهم قبل شوي ما حجو شي
ـ ياسر ..اعترف منو وياك بالبيت؟
ـ تريد تقنعني حيدر ورغداء ماحجولك شي
ـ سمعت منهم وهسة اريد اسمع منك
ـ وشذكرك هسة بهالسالفة
ـ انتضرت انت تحجيلي بس ناقص ماحجيت شي ..
وهسة حالك ما عد يعجبني
احجي اشنو بيك منو وياك بالبيت
ـ مثل ما حجولك مستأجرة هية وخواتهه وانطيتهم البيت
ـ شقد مديون
ـ سديت الدين من زمان
ـ خلص .. طلعهم من البيت
ـ ما يحتاج
ـ لا تجيب الطلايل لنفسك
ـ هلا بيهه
ـ جايز من روحك
ـ ما جايز من روحي
بس الطلايب التريد تجيني من وراهن هلا بيهه
ـ اشنو معنئ هالكلام
ـ مابي معنئ بس مليت
صارلهن سنتني عايشات ماشفت طلايب ولامصايب بس بخيالكم
ـ هممم .. اوك تمام ..
اروح لان صار وقت شغلي ..
نحجي غير وقت
ـ الله وياك سلملنة…
سديت الابتوب وطلعت بالطرمة اريد اشتم هوئ نضيف ..
نغم ـ شلون صرت اليوم عمو
ـ بخير حبيبتي عمو الحمد لله
صبا ـ نونة سوتلك تشريب ابيض
ـ هه .. ابتسمت ابتسامة خفيفة وكلتله مشكورة ..
هية وينهه اشو مختفية
نغم ـ بالهول جوة
ـ صيحيلهه خلي تجي
ـ هسة اكلهه..
نونةة .. تعالي عموو ياسر يريدج
ـ ووجع لاتعيطين..
روحي كليلة متكدر تجي
ـ عزة امشي عيب
ـ خزرتهه بعيني .. روحي وانجبي وكافي لغوة
نغم. ـ حاضر....
عمو... نونة نايمة
ـ لا سمعتهه تحجي جوة
ومتقبل تطلع ..
براحتهه
عفتهم ودخلت للبيت بدلت وطلعت
حاولت الهي روحي باي شي
بس مكدرت
هالبنية ساكنة عقلي وتفكيري
وشالة كل حركتي
مر اسبوعين ماشايفهه
ردت اختنك
ادك عليهه تلفون متشيلة
الايجار والاكل وكلشي
ادزة بيد خواتهه
المطبخ خلت بي بردة ثخينة
بحيث حتئ خيالهه بعد ماشوفة
احس روحي اتهسترت من هالوضع
اوقات طلعتهه من البيت ما اعرفهه
تطلع وترجع واني ماشوفهه ولا المحهه
لا ترد علئ تلفون
ولا تقبل تطلع من ادز خواتهه عليهه
اكتشفت نفسي احبهه من صدك
احبهه وااكع وغركان بيهه
بحيث اتخطيت كل الاشياء الحجتهه الي
نسيتهه مو بس اتناسيتهه
صرت اشوف السجن شي تافه
وجريمة القتل مجرد تهمة متأثر
طالما هية انجبرت علئ الصار يعني بريئة
مستحيل هالبنيت الشرطة لاعبين بشرفهه
لو مسويلهه شي
جان اتمادت وياية
او علئ الاقل وية غيري اذا مو وياية
بس هية ماطلع منهه شي
ولاشفت منهه شي
صراع بداخلي دمرني
صرت تقريبا مدمن ادوية
اخذ حبوب لراسي حتئ يهداء وانام
بدون الادوية مانام ولا تغفئ عيني
ايام بلياليهه اكعد ابجي
اشتاقيت اسمع صوتهه
اشتاقيت اسمع ضحكتهه
اشتاقيت لكل تفاصيلهه
حركتهه بسمتهه ضوجتهه فرحتهه
ماكو داعي اكابرر اكثررر
خلص بااااجر اعترفلهه
اني اااحبهه وما اكدر بلياهه
وشيريد يصير خلي يصيرر
نهاوند ـ نضفت البيت من الليل وصعدت نمت بوقت متأخر
بقينة نايمين تقويبا للعشرة ونص الصبح
كعدنة علئ صوت الجرس مال بيتنة
نزلت شفت ياسر فتح الباب ودخلن نسوان دك باب بيتنة ودخل لبيتة
غسلت وجهي وفتحت الباب ودخلن
دقايق واجتي ام اركان
هية وام تسنيم وبناتهه وجنتهه
جنتهه اول مرة تجيني وتدخل للبيت
ام اركان ـ جبتي ملابس ولادية خاله
ـ اي خاله هذي يمج كلهه مال ولد
ـ وج عيني هالملابس ادوووخ يراد خلك حتئ ادور
ام تسنيم ـ شنو تريدين تاخذين
ـ تراكسودات فنايل اي شي
ـ جم واحد
ـ كلهم ستتهم وابوهم وياهم سبعه صارو
ـ هسة انة اشوفلج لحظة
ام اركان ـ اكلج خاله
بحلكي كلمة واريد احجيه الج
ـ كولي خاله
ـ انتي ليش مو محجبة
ـ ماحب الحجاب
ـ لا شنو ماحبة
هذا امر من الله غصبا عن كل بينة تلبسة مو بلكيف هية
ـ ماراح تتحاسبين بمكاني خاله
ـ اني لو عندي بنية مستحيل اخليهه تمشي هيج
ـ اي عود من تصير عندج بنية لبسيهه منو لازمج ياعيني
ـ حرام عيني
لازم تاخذين النصيحه
انتي هسة واجب عليج الحجاااب انتي وكل خواتج ميصير هيج تمشن مطلعات راسج البسن شي علئ راسجن الدنية شباقي بيهه
ـ ماعاجبني خاله
ـ يااا مو دكوولج الشغلة مو بالكيف
ولا بمزاجج
انتي مكلفة وخواتج مكلفات
الدين يكول من رأئ منكم منكرا فليغيره بيديه فأن لم يستطيع فبلسانه فأن لم يستطع فبقلبه وذلك اضعف الايمان
ميصير الشباب تتفرج علئ شعرج هذا وشعرج حلو ولونة حلو ويطلعج حلوة من تفتحي
وهذا الشعر ترة من مفاتن المرة يغري الشباب المكبوتين ويوكعون بالرذيلة وتصير الجرايم بكل مكان مدتشوفين شديصير بينة يومية اغتصابات يومية. اعتدائات ومصايب
كلة من البنات السفور مثلج
تمشن هيج انتي وغيرج وتخلن الزلم تتخبل وهذا حرام
ـ يعني هسة شعري سوة كل هالمصايب
ـ اي طبعا
ـ وسبب احتلال العراق وتدميرة والتفجيرات التدصير همين سببهه شعر البنات مو
ـ شنو هاي تستهزئين عود
ـ تؤ هووووف
ام تسنيم ـ شبيييج رررحمةة
انتيي شعليييج بالبنيية
انتي شدخلللج
عاجبهه اطلع شعرررهه
اذا تتحاسب هية. تتحاسب مو ااانتي
نهاوند ـ رحمة!
ام اركان ـ يا قابل حجينة شي جذب غير نوعيهم علئ الحرام والحلال
ـ خاله .. انتي اسمج رحمة
ـ اي خاله ليش ؟
ـ همست بكلبي يجوز مشتبهه
هية كالت ماعندي بنات ..
بس مكدرت اسكت احس كلبي كام يدك مثل الطبل
ام. اركان ـ شبيج خاله اشو تباوعين عليه
ـ اسمج رحمة عبدالله؟
علامات الاستفهام بينت علئ وجهه
ـ مين تعرفين اسم ابوية؟!
ـ كمت كوة اجر النفس
جسمي كلة يرجف
ماكدر اتحكم برجفة جسمي من هالموقف
اسمج رحمة عبدالله
وعندج اخوة اسمهم ليث وقصي
ـ انتي منوو؟
ـ يعني عندج هيج اخوة
ـ احجي عااد انتي منو
ـ جنتي عايشة بالاعظمية
انتي بنت شيخ عبدالله
واتزوجتي فؤاد ابن شيخ حمزة..
فتحت عينهه ولزماني من جتفي وخضتني خظ
ـ لــــــج ااحجيي اانتييي منــــــووووو
وللحكاية بقية……….. 🥀
اسفة بس النت طلع روحي وكلش ضعيف صارلي ممةن ساعه 11 اريد انشر مينشر لا راوتر ولا شريحه لعب نفسي اعتذر منكم