الحلقة الثالة والاربعون
#ليلة_من_فبراير
❤️
نهاوند ـ جنت كاعدة ادرس خواتي والجو بي برودة متلفات بالبطانية وكاعدة اشرح لنغومة رياضيات
اتصل عليه رقم غريب مابي اسم
اتعودت اجاوب الارقام الجديدة لان يخابروني علمود شغل
كلت ايه يالله بلكي شغل ..
الو
ـ هلو نونة شلونج اخبارج
ـ هالصوت مو غريب عليه
ماعرف وين سامعته..
اهلا بيك ..منو حضرتك؟
ـ شنو نسيتيني يابذاات
ـ ماعرفتك ولا صغرا بيك
ـ اني مازن حبيبج الاولي
ـ مازن؟
ـ اي مازن ..
ليش استغربتي
ـ مين جبت تلفوني ؟
ـ اليسأل ميتوه ياحلوة
ـ وليش تسأل!
وشتريد مني؟
ـ بلة هذا سؤال؟
هسة علئ الاقل سلمي عليه
رحبي بية
اطمني علئ صحتي
سأليني شلونهه ضروفي
شسويت ماسويت بغيابج
شنو تكولين شتريد مني ؟
بلة هذا حجي ...
ـ ميحتاج اسأل
لان كل اللي بينة انتهه
اني اتزوجت.. وانت رحت لحال سبيلك فماكو داعي تعيد العلاقة
ـ انتهت من جانبج انتي مو من جانبي
اتزوجتي وبالجذب مانطيتيني خبر
شنو لعبة بيدج ااني
علئ غفلة اسمع من الناس متزوجه وراايحة لا اندل عنوان ولا اعرف وين
ـ ماكو دااعي تصيح
وبعدين اللي يسمعك يكول جنت خاطبني
ترة انت ماردت تخطبني خاف ناسي اذكرك ..
فـ عادي اصير لغيرك
قابل ابقئ انتضرك
ـ اسمعي ووولج
هذا الاسلوب مو ويايه
اعرف اهلج واااعرف كل عشيررتج
وبكلمتين مني ادمررج فتهتتييي
ـ وشتسووي بلة؟
يلة احجي اطرربني
ـ هااااا
صاير عندج لسان يا ام نص لسااان
ـ حالي حالك
وعندي لسااان وونص بعد
شتريد مثلااا تسوي يا افندي
كلتلك اتقدمليي
بقييت تتحجج ويويمة عذر شكل
ـ احجي عدل نهاوند
ـ اكثر من هيج ما اكدر والله
ـ بسيييطة اصبرييلي واشوفج مازن منوو
ـ اسمع ولك
ترة مو انت التخووفتي
الاكبر منك هزيت وشوااربهم وطيحت حظهم
مو عااد انت يالافنديي
جايني هسة تريد تبعيهن علييه
ـ ووووولج عليييمن هالللحجي
شنووو هالالسوووب
لج نسيتيي حبي ااالج
نسيييتي شكد صررفت ررصيد علييييج نسيتي شكد سولفنة وحجييينة وشنو جاان بيناتنةة
تررريدين اذكررج بالرررسااايل
تريدين اطلعهن لعمااامج يشوفون بنتهم شحجت وياييه
ـ رررووح واعلئ مااابخيلك اصعدة وطررربك علييه همين
اولا الرقم مو رقمي
هذا رقم دعاااء
وبإأسمم قيسس
واااالكل يعررف جان قيس يريد دعااء يعني ااني بالسلللليم
وواذا طلعت هالمسجاات
راح تنكلب عللليك انت وبنت عمي فتهمت يولي لو افهمك بعدد
ـ لج نهاوند ممعقولة هيج تحجين ويايه
ـ لا كلش معقوولة
لان شبعت من تفاهتكم
شبعت من ظيييم هالدنية
ماعاد بعد عندي قابلية اتحمل سخاافاتكم
الدنية هواااااي لطشتني وخلتني اااكبر قبل وقتي
واهم شي خلتني اعرف اتعامل وية اشكالك
ـ لج بعدني ااحبج افتهمي ااحبج
ـ سمعت هالكلمة اااكثر من اسمي
اسمع عيوني
اني مطلكةةةة
وانسجنت شهررر بالتووقيف
بجريمة قتـــــــل
وهسة اشتغل خداامة بالبيوت
هاا بعدك تحبني؟
ـ شنو هالحجي
ـ من اكلك الدنية لطشتني وخلتني ااكبر قبل وقتي
وكلاواتكم متشمي علييه
ما دشاقة وياك
ـ كافي اهدئي
اني احبج والله
وبعدني اذكر العشرة البيناتنة
مانشيتج يوم واحد ولا غبتي عن بالي
ـ اوك .. وهسة شتريد
ـ عجيب يابرودج ..
ييعني شريد
اريد اشوفج واحجي وياج
ـ ميحتاج
عندك تلفون واحجي كل التريدة هسة
ـ شنو هالقساوة؟
ما اكدر اصدك انتي نهاوندد
االا مستحيل
نهاوند جانت مغمضة بريئة هادئة
شلون هيج صرتي
ـ واتعس من هيج صرت
روح يامازن اني مانفعك ولا افيدك
ـ لا تسوين هيج ترة بعدني احبج
ـ اوك
اذا تحبني صدك
تعال اخطبني باجر شتنتضر؟
ـ هههههههه كلشي تغير بييج
الا هالجملة ماغيريتهه ابد
ـ لعد شتريد ؟
نهاية الحبجيات شنو!
ـ شبيج يولي
نطلع نتونس نشتري نفتر بالاسواق نتواعد
لا كل كلمة وكلتي تعال اخطبني
ـ ترة اني مو من هذا النوع
ـ كلجننن من نفس الطيينة
لاتسوين نفسج برييئة
اولااا بنت عمج دعاء
وثانيا انتي مطلكة
يعني تعرفين هالسوالف
ـ ياسوالف يابة؟
ـ لج شبيج يعني الرجال شيريد من المرة
انتي مطلكة وماراح يبين علينة اذا تونسنة اريح وتريحيني منفعه متبادلة
ـ ااااحد كلك اني كحبة؟
لك انت مستحيي هيج تحجي وياية
ـ اااهو نمتي شهر بالسجن
شتريدين تطلعين يعني
المؤمنة التقييةةة يروح امج
ـ لا اكيد ماراح اطلعم المؤمنه التقية
ـ عفية بديتي هسة تفهمين
ـ طبعا افهم
لان راح اطلع اشبه امك
وبالضبط نفس اخلاقهه
ـ احتررررمي نفسسسج وولج
لا اعلمج اواادمج
امي تشرررفج يا ساقطة
علئ الاقل مو مطلكة ولا نايمة بالحبوس
ـ ميحتاج تعلمني اوادمي
لان اعرفهم
بس انت يحتاجلك تعرف اوادمك منو
وحتئ لو امك مو مطلكة ونايمة بالحبوس يكفي خلفت عاهه مثلك
شوف الذنب المسويته شنو وهيج جازاهه بخلفتهه..
يلة وولي لان عندي شغل هسة
ردت اسد الخط بوجهه بس سمعته جاب سيرة خواتي
ـ ترة خواتج الحلوات
يومية اشوفهن رايحات رادات للمدرسة
ـ فـــــــكررررر تتقرررب علئ خوااااتي يامازن وشوف شسوووي بيك
ـ والله بصراحة نغم حلوة
تخش العقل والكلب
ـ والله العظيم يا مازن اقتلك اذا تفكر تقترب من خواتي
ـ هههههه
انتي بس سيرة القتل علئ لسانج
ماعندج غير سيرة
ـ استغربت من حجيه ..
شلون عرف بس سيرة القتل علئ لساني
معناهه احد موصلة حجي عني..
اكلك انت جبت رقمي من دعاء مو بلة ؟
ـ شنو هاي!
هسة يلة عرفتي؟
ـ اثنينكم نفس القذارة
وووصخين
اكيد تتعاونون سوية
ـ اسمعي ولج باجر تطلعين اريد اشوفج
ـ واذا ما اجي ... شتسوي؟
ـ متلومين غير نفسج
لان راح تشوفين وجه مازن الثاني
ذاك الوكت
ـ سد التلفون بوجهي وراح
شهالورطة يربي
شهالمصايب التوكع فوك راسي
مين ما اسدهه تنفتك
نغم ـ منو هذا ؟
ـ واحد حيوان مسوي نفسة بشر
ـ شيريد منج
ـ معليج حبيبتي
ركزي بدروسج
هذني اهم من هالخرابيط..
رجعت ادرس خواتي بس ابد ممركزة بشي وياهن
مادري شلون حفظن دروسهن وخلصن .. سويتلهن العشة وعشيتهن طلعت
اريد اغسل المواعين
ظلمة فد مرة
حتئ لو افتح باب الغرفة
همين ميضوي عليه
واصلا الجو بارد ماكدر افتح الباب واخلي خواتي يجمدن
اعتمدت علئ الاضوية الباهتة الي من بيوت الجوارين ..
حسيت اكو شي بشباك بيت ناصر
باوعت ركزت ماكدرت اشوف شي بس حسيت عبالك احد يباوع عليه
انرعبت لان اعرف ماكو
احد شنو هالاحساس الغريب
اخذت المواعين ودخلت للغرفة..
بنات منو تريد حمام خلي هسة تروح لبيت عمة كميلة قبل لاتقفل بابهه
صبا ـ ماريد مابية
ـ لحونة كومي
الحان ـ والله ماابية ماريد اروح
ـ هاي شلون ورطة
نغم ـ اذا ينحصرن هنة يروحن شكو متعبة نفسج
ـ مو…
ماكملت كلامي وسكتت
ماجبت سيرة بالاحساس الحسيتة برة ..
يجوز جنت اتوهم
لو اني اخوف بروحي
اي اكيد اخوف بروحي لان ظلمة
اكيد يتراوالي هواي اشياء
ماكو شي عشت هواي بهالبيت ماشفت شي ..
فتحت راديو بالتلفون لخواتي وطلعت الهن اذاعات يسمعنهه ويتسلن شوي
نغم والحان نامن
بس بقت صبا كاعدة ويايه ..
كل شوي الحايط مال غرفتنة يندك
عبالك اطراف اصابع لو اضافر ويدكون بي
الحايط سندوج بنل مو حايط يبين بي الصوت ..
صبا ـ شنو هذا الصوت
ـ يمعودة قابل شنو
اكيد بزونة دتلعب بالحايط لاتخافين
بقيت اقرة قران من الخوف
ماريد ابين لصبا اني خايفة ..
نامت صباوي يلة كدرت اغفي
ولو نمت بقلق
كل شوي اكعد وافز من نومتي لو احلم بكوابيس ..
صار الصبح راسي يوجعني
منايمة عدل وكلش دايخه
سويت ريوك وبدلتلهن واني هم بدلت
نغم ـ شنو هاي وين رايحه
ـ اخذكم للمدرسة
ـ ليش مو يويمة انروح وحدنة
ـ لا من اليوم اني اخذكم وواني ارجعكم بيدي احسن..
اخذت خواتي للمدرسة وحذرتهن يطلعن لوحدهن لو وية احد
الا اني اجي بيدي اخذهن
بهاليومين ..
جنت اشوف مازن يوكف براس الشارع مالتنة
بس يشوفني اني وخواتي
يمشي ورانة
جنت ميتة خوف منة
ولازمة خواتي بايدي وكابسة عليهن
اخاف لا يسوي شي لو ياخذ وحدة من ايدي ...
جنت كل شوي اعيط بوحدة منهن
حتئ تمشي سريع
بس اريد اوصل من الخوف
ولو الشارع متروس طلاب بس الخوف مسيطر عليه..
رجعت للبيت وشفت ناصر وارشد واكفين سوية يحجون
استغربت اشو محد منهم سألني ليش تاخذين خواتج وليش تطلعين وياهن
حسيت عدهم شي بس ميريدون يحجو
ما اعرف احسهم ملتهين بشي
بس ما ادري شنو هو ..
كميلة ـ ها نهاوند استلمتي الحصة
ـ هلو عمة
لا ما استلمت ليش شنو اجتي الحصة
ـ اي البارحه اجتي ..
هاي اول حصة راح تستلميهه مو
ـ اي اول حصة ..
صار شهر من خالة جابت البطاقة التموينية وكملوهه
ـ جابو طحين وتمن وزيت ..
ـ انعم الله
اكول عمة
شبيهم بيت ناصر احس عدهم شي
ـ اي ارشد عندة خطوبة بنته جيداء هالايام
و بسام رجل دعاء طلك بنتهم
ـ صدك؟
شلون خبرين واحد حلو وواحد مر
ـ اي هذول فرحانين وهذول داكين لطم
ـ المن راح تنخطب جيداء
ـ واحد وياهه بالجامعه
يكولون خوش قسمة يعني الولد بعمرهه وزين من عائلة زينة
ـ نيالهه
ـ اي والله يفتهمن
بهالايد شهادة
وبهالايد رجال
ههههه سحلته واجئ يخطبهه
ـ بزود اهلهه
لو ما اهلهه زنين وياهه ومسانديهه ووصلوهه لهيج مستوئ بالدراسة
ماجان اجتهه هيج قسمة
ـ اي عيني
العرمات الله ينطيهن اب وام تفصال عليهن ..
والا هنة بنات ارشد رب العرامة
ودعيوة بعد اعرم منهن
ـ يعني ماراح يكملون الزواج بسام ودعاء
ـ لا اكلج طلكهه خلص
يكولون عمته قافلة فد مرة
وابو بسام يمشي بكلام اخته
ـ صارلهم هواي
شعجب هسة اتذكرو
ـ والله الفهمته وسام رايد دعاء بس اهله مقابلين وهذا الاخرهم لهلوكت
ـ الله يعوضهه
ـ يا ..ميتة بجي عليه
تبجي دم كل دمعهه هالكبرهه
خوب منال لا تسولفين
كل دمعه بكد راسهه تبجيهه
ـ كل واحد ياخذ نصيبة
ـ لا همة ناس واصلين
ماشفتي من اجو عليهة مشية زلم
يمكن 14 سيارة كلهن يلهثن لهثث جديدات بالباكيت
دخلن ووسدن الشارع سد طول بعرض
الناس كلهه تعجبت عليهم
شلون ناس ثكال
وجايين يخطبون دعاء
ـ بالعافية عليه
ـ الناس متكدر تحجي تخاف
والا كلهم يعرفون دعيوة منو
ما مبقية واحد بالمنطقة يعتب عليهه
كلـــهم مرقمتهم
ودك مصايب للصبح
سبحان الله الكل يعرف بيهه
عداا ابوهه وامهه واخوتهه ميدرون
ـ هههههههه
ـ اي لاتضحكين
اكو هواي عوائل تبيع الشرف براس الناس وهمة يدرون شرفهم معيوب بس يتغاضون
ـ لو بس اعرف ليش هيج يسوون
ـ اكيد يسوون هيج واكثر همين
يحاولون يعوضون النقص العدهم
فـ بيعون شرف براس العالم لان همة معيوبين و عرضهم تلفان
ـ ورغم هذا يجون يخطبوهه
واحس قسمة تجيهه
واني شي صار خارج ارادتي
مو بيدي انغصبت عليه
و الكل يعيبوني
حتئ الجنت اتصورهم مو مثل البقية همين طلع هذا كلامهم
ـ لان حظ القبايح بالسما لايح
وربج يمهل ولا يهمل
ـ بس انتي تعبت عمة
تعبت من نظرات العالم الي
تعبت من حمل مسؤلية ذنب اني ممسويته وانجبرت عليه
تعبت من نظرات اقرب الناس الي
تعبت من هالعيشة
عايشة علئ صدقات الناس
لا اعرف اشتغل شغلة بيهه خير
ولا عندي شهادة
تعبت من كلشي بهالدنية
اتمنئ اخذ خواتي واهج منا بس ماعرف وين اولي
ـ حقج والله
ومالومج بس شسوين
هاي حياة ومجبورة تعيشيهه..
ـ من عمري يوم انجبرت علئ هالحياة وما اختاريتهه
ـ الله يذكرهه بالخير رحمة
مدري الله يرحمهه
هية هم راحت وكالت عدولي
ـ اتمنئ اشوفهه واسألهه شلون نطاهه كلبهه تعوفني
ـ ليش يبقئ السؤال بنفسج ..
روحيلهه
ـ باوعت عليهه مستغربة من كلامهه واضحك ..
وين الكاهه؟
ـ عمج عماد كال راحو لكركوگ
ـ وين بكركوك ..
اني خارج بغداد ماطالعه
ـ بيت اهل امج معروفين
والمحافظات مو مثل بغداد
هنا عاصمة وجبيرة هواي ناس اكو
مو بسهولة توصلين للشخص التريدي
بس المحافظات سكانهه اقل
روحي واسألي عن بيت اهل امج عن اسم جدج خوالج اسم امج الكامل
اكيد يوصلوج الناس
ـ عمة الي يروح هيج روحات يكون بيدة كومة فلوس ..
يحسب يكعد بفندق واكل وشرب
وينزل يدور علئ كيفة
مو اني ياعمة
المالاكية اكل حتئ اوكل خواتي
ـ عوفي خواتج وروحي
ـ شنوووو
اعووووف خواتي واروح
ليشش
ويم منو اعوفهن
وعلئ شنو اعوفهن
علمود ارووح ادور عن وحدة عافتني ارادتهه واني عمري جم يوم
لا مستحيل
ماسويهه
اذا هية نفسهه ما اجتي
ولا وصلت هالسنين كلهه حتئ تسأل عنيي.. و اني بنتهه
طالعه منهه
لا ذكرتني ولا مرت عليه و شافتني
ـ اي هم صح
ـ وياريت سبب الطلاق يسوةة
ياريت لو ابوية خاينهه ضاربهه شو شمسوي بيهه ..
سبب طلاقهه تافهه
فرطت بيهه علمود موسيقئ والحان؟
مستحيل ادور عليهه
واذا في يوم لكيتهه مستحيل اسامحهه
ـ تبقئ امج
ـ بالجنسية مو اكثر ..
امي الحقيقية ازدهار الله يرحمهه
ـ الله كريم ..
الدنية دوارة ..
جبل وية جبل ميتلاكة
بس بشر وية بشر يتلاكة
ـ اكلج عمة
اريد اشتري كلوب اصفر اخلي برة بالطرمة ..
الليل يجي من وكت
وهاي متقبل تشغل الفلورسن البرة
ــ حقارتهه متتسولف هالنذلة
ـ هو كلت اشتري كلوب صغير
لان الظلمة صارت تخوف ..
ـ اي وحشة ووضوجة الظلمة
شكو بيهه كلوب وسيار منا نمدة ليبرة ميكلف
ـ لا مو مال سيار
خواتي طابات طالعات ميكعدن
ـ لعد منو يسوي ؟
ـ بلكي بيت خاله ام عمر يسوولياه
ـ اي هم صدك ..
ولدهم يعرفون بهالسوالف
ـ الله لايعوزنة لاحد من هذول
طول هالفترة ارشد ما اجئ علية ولا سألني شتحتاجون متحتاجون
ـ وميجي لو تأذنين لان كل افعاله رياء
ـ اي والله صح
بلة ناصر متجاهر بحقارته ويانه
بس ارشد مسوي نفسة زين وخوش انسان
من اشوفه ياخذ بناته ويطلعون انقهر
شيصير لو يمر علينة وياخذنة احنة همين
شنو راح نأثر عليهم اذا ياخذونه نتونس وياهم
ـ يخافون لا يصرفون عليكم
ناس تتعامل بوجهين ومتخذة الدين غطاء لمصايبهه
ـ عادي
اذا هو ابوية جان هاييني وممسويلي اعتبار يمهم اعتب علئ هذول
ـ الله يرحمه ..
اكول شعجب هاليومين دتروحين وية خواتج للمدرسة
ـ اي اني اخذهم وارجعهم احسن ..
ـ ليش شنو صاير
ـ خايفة عليهم
وشايلة هم اذا صار عندي شغل منو ياخدهم
ـ شنو صاير؟
ـ سالفة طويلة عمة
ـ اي احجيهه شنو شصار
ـ كعدت اسولفلهه عن مازن وسوالفه وشلون حجئ ويايه..
ـ هذا ااكيد بنت ناصر دازته
ـ ماكو غيرهه
لان بالاخير كشف نفسة
اثاري يعرف كلشي عني ..
ـ زين انتي مو عود تعرفين عصابة ومدري شنو جيبهم عليه
ـ أ.. أي اعرف
واعرف هواي هم
بس غير اني ماريد مشاكل
متسوة اشوه سمعتي
والا اني اكدر اجيبهم عليه يموتو كتل ويكسرو تكسر
بس عليمن هالهوسة وهو نعال ميسوة
ـ اذا عصابة تلزمة وتكسرة
شلون الناس تدري انتي دازتهم؟
ـ يعني ياعمة والله همين اخاف الله يعني اكدر ادزهم اني بس شنو اكول الـ الله
ـ كليلة تحرش بية ويريد ياذيني
ـ الله كريم اذا انسدت الطرق بوجهي اكيد ادز الناس الاعرفهم عليه..
ـ زين كولي لبيت ام عمر
احجي لام عمر وخلي تكول لولدهه يروحون علئ مازن ويدبجو
ـ ماناقصني كلام مو حلو بحقي عمة
هو ابو عمر ميطيقني انوب يسمع هيج عني
ـ ليش منو كلج ميطيقج؟
ـ هيج حجي مينظم عمة كلشي سمعت
ـ يعني عرفتي جان خالد رايدج
ـ اي سمعت خاله ام تحجي ومقهورة .. تكول ابو عمر ماقبل
ـ لاتزعلين نهاوند ..
انتي هسة جبيرة مو طفلة
بس لرجل الشرقي ميكدر يتقبل هيج مواصفات ..كلش صعب
ـ حظي المصخم يجيبهم عليهة
شسوي
و واحد يريد ياخذني حتئ يكسب اجر بية ويسترني
لو واحد يريدني بس يخاف من امة
لوواحد ادبسز وعينة طالعه وعبالة اني مثلة
ـ ليش شنو
علاء يخاف من امة؟
ـ كل الولد بهالزمن يخافون من امهاتهم
ـ ههههه ومن نسوان اخوتهم وخواتهم همين مثل توفيق
ـ والله مو زلم عبالك نسوان
ـ لا حتئ النسوان مو مثلهم
علئ الاقل عدهه كلمة وتمشيهه علئ اكبر شارب مثل شارب توفيق
ـ انتي هواي تكرهين عمو توفيق
ـ فوك متتخيلين
كلش اكرهه
ولا يوم ثوبتلة وقريتله فاتحة ..
حتئ بفاتحته جنت كاعدة رياء من العالم
ـ عزة عمة صدك
ـ جرح المرة مو سهل يا نهاوند
وانتي جنتي بيوم من الايام متزوجه وعندج رجال ..
ولو ما اعرف ضروفج
وشلون جان وياج طليقج..
بس المرة المتزوجه متتحمل زوجهه يحجي وية غيرهه لويفضل غيرهه عليهه ويضربهه ويهينهه ومقصر عليهه
ـ شفت حقد بعيونهه وغصة بحجيهه راسا اتذكرت صباح من جان محتفظ بملابس سجئ وضامهن
وشلون ضربني من نضفت غرفته
وشلون هداء من شاف ملابسهه
ورد جمعهن وخلاهن فوك الكنتور ما قبل يذبهن ..
يمكن هو هذا الشعور التقصدة..
ـ اكرهه واموت منة
وبيوم الانفجار
رغم هواي ابرياء راحو خطية
بس جنت اني اسعددد وحدة
مات واطشرر ولموه من الشارع بسبب دعواتي علييه
بس اهم شي ما اتزوج عليه وجابهه يمي
ـ بس هو جان كاطع مهر علئ نداء
ـ اي ميخالف بس المهم ماكملت
الرجال بيدة يصنع مرة حقوودة وانتقامية
او يخليهه رحيمة وعطوفة عليه
ـ هيج متاذية منه
ـ الكتل الاخذتهه منة علمود يرضي هاي وذيج من نسوان حمويني
خلاني انفرة وماريدة ..
بس تعرفين المرة بمجتمعنه متكدر تحجي وتشتكي
كل كلمة وكلولهه اصبري
باجر يتغير
اصبري هاي نزوة وتروح ويرجعلج
اصبرري هذا حقة يتزوج الشرع حللة ياخذ اربعه مو اثنين
والعدهه جهال بعد خلص تدفن نفسهه علمودهم..
ـ يعني معقولة مادنة شي زين تتذكري
ـ حتئ لو عندة
سيئاتة غلبت حسناته
وشتذكرلة؟ شي بي خير
اتذكرلة من جان يضربني
ويكلي ام اربع اعيوون
ويعرني بضعفي لان كلش ضعيفة
يكلي معصعصة مفججة مابيج لحمة مثل النسوان
ويغيضني يكلي شوفي فلانة شوفي علانة شلون تترس حظن الرجال
انتي شنو الزم منج
حديدة وكاعدة يمي
هذا الحجي كلة دمرني
الحد ماخلاني افقد الثقئ بنفسي
واشوف نفسي بشعه مو مرة
صرت استحي اختلط بالنسوان
لان احس بنقص ..
ـ الاعرفة الرياجيل يحبون الرشيقة
ـ اغلب الزلم ميعرفون شيريدون
يكلج اريد هيج مواصفات ومن تصير المرة بيدة ويتمكن منهه وظمنهه اله
راسا يروح ويباوع لغيرهه
ولج بيهم تندئ نفسهم حتئ علئ الجلبة
ـ لا ممعقولة مو كلهم
ـ كلهم واني واثقئ من كلامي
عندي خواتي مشكل يالوز
وحدة متينة وحدة مربربة
وحدة سمينة وحدة رشيقة وجسمهه يخبل
وكل نسباانة عينهم برة
لعلمج حتئ عمامج عينهم بررة
ـ هههههه عاد كلهم الا ناصر اذا يباوع برة يمكن تقتلة
ـ وربج يباوع لغيرهه ..
بس من جوة لجوة لان يخاف منهه ويحترمهه
مو مثل توفيق جان بالعلن يهيني ويأذني ورخصني كدام اليسوة والميسوة
تالي كملهه علية وراح خطب وكطع مهر
وربج اخذة ما خلاه اخذ عزيز مقتدر
ـ يلة بعد مات
و متجوز عليه غير الرحمة
ـ الف لعنة علئ روحه وين ماحط راسة
ـ ما ادري بيج هيج شايلة بكلبج عليه
ـ كلتلج اني حقودة
لان لو اني الهاينته علمود اهلي
جان ماسكتلي
مرة وحدة كلتله لا تجيب سيرة ابوية عيب عليك تغلط عليه رجال اكبر منك ..
ضل يتمادة ويسب ويشتم
عاد مكدرت اسكت
كلتلة ابوية واخوتي يشرفوك
راسا منعني اروح لاهلي
وضليت اكثر من ست اشهر ما اعرف اخبارهم وميقبل يجون عليه ولا يوصلون الي وممنوع اخابرهم
ـ واهلج ليش سكتو وقبلو عليه؟
ـ يكولون منريد نسويلج مشاكل
حالهم حال اغلب الاهالي هيج يسوون وية بناتهم يتصورون من يبتعدون راح يتعدل الرجال ..
ـ زين ليش ماحاقدة علئ اهلج
ـ يبقون اهلي
وبلياهم اضيع
بس توفيق لا غير شكل
جان زوجي ولو مطلكني بذاك الوكت يصير غريب عني
فماقارنة بأهلي مستحيل
اذاني وسمح لنسوان اخوته واخته يضحكن عليه ويعيرني من ايدة
اني زوجته وصرت بذمته
الي يستهزء بيه يعني يستهزء بي
بس هو جان جاهل بهيج امور
ويسمح للكل يتجاوز عليه بحيث سمع كلام منال وراح خطب نداء لاني عودة مطيرجي وام اربع عيون حسب كلامهه
ـ كلامهه يوضح الجرح البداخلهه
رغم شكد صارله متوفي توفيق
بس بعدهه شايلة بكلبهة عليه
ـ يلة اني اروح تريدين شي
ـ لا عمة ممحتاجة شي شكرا..
راحت وبقيت بالغرفة
عيني علئ التلفون
بلكي تتصل ام مهند
ولو كل فترة ياخذوني الناس انضف بيت بيتين وينطوني فتافيت الفلوس
بس همين احسن من ماكو
خواتي يحتاجلهن قرطاسية ولفات الصبح ومصرف
خو مو كلة من بيت خاله ام عمر
جنت كلما اكول اشتري ضوة للطرمة
لو فلوسي تخلص لو شو شيصير وماجيب ضوة ..
بس هالايام شحت الفلوس فد مرة وشفت الضوة مو وقته رغم نخاف خابرتني خاله ام مهند واخذتني انضف بيتهه شفتهه المنقذ هالجم فلس امشي اموري بيهن
ورة كم يوم همين خابرتني مرة ثانية حتئ انضف بيوت صديقاتهه
جان حبابات وكريمات نطوني خوش مبلغ تقريبا جمعت كل الفلوس صارن 150 الف
فـ كلت لازم اشتري ضوة بعد خلص مابيهه مجال
لان بدينة اني وخواتي يتهيئ النة اشياء بالظلمة ..
ما اعرف حقيقة لو خيال بس الرعب تملكني اني وياهن..
نطيت فلوس لخاله ام عمر وجابولي ولدهه الضوة بي واير طويل راسا شكلته بالطرمة من برة اكو بلك وشغلتة ..
جنت كاعدة ادرس خواتي بالغرفة
الجو كلش بارد علئ الهيتر كاعدين ندفئ
الباب اندكت علينة
تقريبا ساعه عشرة ونص بالليل
كلت اكيد هاي عمة كميلة لو ولدهه
كمت فتحت الباب مالكيت احد
الضوة معلوك ماشفت شي فارغة الطرمة ماكو احد ..
راسا سديت الباب
نغم ـ منو دك الباب
ـ ها ..يمكن لان الهوئ عالي الباب اتحركت
نغم ـ وين اكو هوئ عالي؟
صبا ـ البيت صاير يخوف والله العظيم
ـ رغم اعرف اكو اشياء دتصير بالظلمة بس جنت مضطرة اكلهن ماكو شي واكذب احساسي وعيوني .. ماكو شييي لاتخوفن بنفسجن
نغم ـ تتذكرين من سديتي البوري وطبينة جوة
وتالي سمعنة صوت مي وطلعنة لكيناه مفتوح
ـ عادي اكيد ناصر واهلة طلعو وفتحو
الحان ـ اني خايفة
ـ كافي ولجن
كوة تخوفن بروحجن ماكو شـــي ..
يلة كل وحدة تروح تنام بفراشهه
اصبر بيهن واني مرعوبة اكثر منهن
هسة لو اكو تلفزيون ابقي مشتغل والهيهن بي ....
مرت الايام وتكررت هالامور وكثرت
يومية تصير سالفة معينة
اما الكلوب الاجيبة لازم اكعد الصبح الكاه عاطل ...
اشتريت اكثر من عشر اضوية وخربن
كمت استحسف اشتري
صرف فلوس علئ الخالي بلاش ..
اني واثقة هاي حركات منال وولدهه بس ماعندي دليل عليهم ..
صبا ـ محصورة اريد حمام
ـ اهووو صباا ساعه 11ونص مو كلتلكم المحصورة ترووح للحمام
هسة حتئ عمة كميلة همين قفلت بابهه
ـ بطني اااسهاال ما اكدرر بعد ااخذيني
نغم ـ امشي نروح كلنة سوية خطية بطنهه
ـ امشوو امري الـ الله
اخذت خواتي وطلعت من الغرفة
كلنة خايفين من الظلمة
وبيت عمة كميلة ماحاطين انارة وبيت ارشد فوك الضوة مالتهم خافت عبالك كلوب مالت حصار كوة يضوي
دنمشي سوية وشفنة شي طويل اسود واكف يم شباك الغرفة مالت منال من جوة ابيتهم يعني
راسا الحان شافته وكامت تصرخ وخواتي يصرخن يتباجن
جنت ميتة خوف وابجي
بس ما اكدر احجي واكلهن اني همين خايفة بس اصرخ واكول والله جذب ماكو شي ركضنة سوية وكعنة. وحدة. فوك الثانية
ثواني واختفئ هالشي الاسود
اختي صبا من الخوف سوتهه علئ نفسهه لان بطنهه اسهال
نزل ارشد يركض وبيدة لايت
وطلعت عمة كميلة همين
ارشد ـ ها ها خيرر شنو صاير
ـ ركضن عليه خواتي يحضنن بي من خوفهن
نغم ـ هناا ابيت عمو نااصر اكو شبح
ـ تعاالي صبا لاتتحركيين ..
خفت يدفرهه ارشد لان موصخة علئ روحهه
كميلة ـ شنو شبح يمعودين
ارشد ـ ياعمو هاي خيالات شنو هالحجي موعيب تخافن
نغم ـ لا مو خيالات اني شفته اسود وطويل وواكف يم الشبااك جوة
ـ هسة. ادك. باب بيت ناصر واشوف ..
يابة. ناااصر ناااصر
ناصر ـ ها خير شبيكم
ـ يكولون اكو شبح ابيتكم واكف يم الشباك
الحان ـ وولونة اسود
نهاوند ـ كافي حبيبتي لاتبجين ماكو شي
ناصر ـ شبح شنو
شنو هالمزعطة
ارشد ـ شنو ماسمعت عيطتهن ؟
ـ جنت نايم شمدريني شديصير
كميلة ـ يابة ششغلو الفلورسن البرة الطرمة ظلمة واكيد يخافن
منال ـ خير شكو شهالصياح
ناصر. ـ هههه شايفات شبح اسود يم الشباك
منال. ـ مو جديدة عليهن هالعيارة
ارشد ـ يابة اني اجيبلكم فلورسن وشغلو
منال. ـ يا صدك تحجي
مو كلما نجيب واحد يخرررب واسال اخوك
ناصر ـ فلوسي خلصت علئ الاضوية
منال ـ عاد بكيفك بعد تريد تجيب
جيب قابل نمنع الخير احنة
نغم ـ والله شفناه ابيتكم لونة اسود وواكف يم الشباك هنااك
منال ـ ادخلي وروحي هناك وشوفي بعدة موجود
ناصر. ـ صارلنة سنين كاعدين بهالبيت كلشي مشفنة
ارشد ـ مو اني عرفتهه من الظلمة يتخيلن هيج امور
منال ـ ليش متعرفون اختهن الجبيرة بيهه حاله نفسيه وتتخيل وتصدك نفسهه
ـ اني مابية شي
والشي الجان واكف يم الشباك
كلنة سوة شفناه
اذا اني بية حاله نفسية وشفته
خواتي شلون شافنة
ارشد ـ عمو من خوفكم هيج امور تتخيلون لاتخوفون بنفسكم
ـ كومة كلوبات اشتريت واسأل عمة كميلة بس انام اكعد الصبح الكاه عاطل بقدرة قادر
منال ـ حااالج حالنة
لووهاا هاي همين راح تذبيهه براسنة؟
ـ منو جاب سيرتج ؟
ليش اخذتي علئ نفسج
ـ يمة يمةة يمةة شووف شلون اسلووب عدهه
ارشد ـ يابة خصم الحجي
هاج..
هذا تورج علئ الشحن
اخذي مني الكم
وهسة انزللكم واير الشحن مالته
من تطلعون يضوي الطرمة كلهه ومتخافون بعد
صبا ـ نونة اخذيني للحمام كلش توصخت
ـ امشي حبيبتي ..
عفتهم و اخذتهه ورحت لحمام عمة كميلة
غسلت الهه ولميت ملابسهه ورحت للبيت جبتلهة ملابس ورجعت
غسلت ملابسهه بالحنفية البرة ..
وعيني علئ الشباك
متاكدة هاي سوالف منال
بس شلون الزمهه
ايدي جمدت من البرد والمي ثلج
دخلت وقفلت الباب
وكعدت ادفة
السندويج كلش بارد ثلج رغم الغرفة. صغيرة بس الهيتر مديدفي المكان
ورة فترة رن التلفون
باوعت مكالمة فائتة من انمار
ويمكن عشر رسايل وياهه ..
وعلاء همين داز مسجات ..
ماجاوبت ولا واحد منهم لان اصلا ماعندي رصيد ..
دقايق ورد اتصل عليه علاء ..
احس الدنية يومية تضيق عليه اني وخواتي
فزة اليوم خلتهن يرجف ومن كلشي يخافن
ماريد اجاوب لا علاء ولا انمار ولا مازن
بس اريد رجال اسند راسي عليه ويشاركني بشيلة الحمل عني
رغم اعرف هالسوالف دتسويهه منال حتئ تخوفنه
بس همين انزرع خوف بداخلي
خوف خواتي جان مقيدني
بحيث نغم وصبا وميقبلن يتحركن باليل ابد والحان صارت تتبول علئ نفسهه بالفراش ..
رغم ما مسويتهه بصغرهه ابد
هسة كامت تسويهه..
اجتي خاله ام عمر وسولفت الهه كميلة عن الصار وماصدكت
ام عمر. ـ لا مو لهل درجة ممعقولة منال تسوي هيج سوالف مال جهال
كميلة ـ البيت مابي شي سنين عايشين بي ليش هسة بدت تطلع هالسوالف وبس لهلجهال تظهر اشو متظهر لجهالي لو جهال ارشد
ـ لالا هنة يخافن ويتخيلن لان وحدهن خطية
يعني ممعقولة منال تعرف اوقات طلعتكم بالليل
قابل كاعدتلكم لا شغل ولا عمل وبس تراقب بيكم ؟
لا خالهه مو لهل درجه
وبعدين الله نطانة عقل ولازم نشغله
نهاوند ـ والله خاله شفناه بعيونة اربعتنة يعني قابل كلنة توهمنة
كميلة ـ يابة ااني مو بنت ابوية
ولا من ظهرة طالعه
اذا مو منال وولدهه ورة هالسالفة
ام عمر ـ يلة وياج منال وراهه هالسالفة
زين شلون تعرف اوكات طلعتهن من الغرفة
نهاوند ـ خاله احنة من نطلع مو دائما نشوف شي بس نحس احد واكف يباوع علينه بالظلمة
والباب دائماا تندك
لو حس ضرب بالاضافر علئ حايط الغرفة
وتعرفين الحايط سندويج مو طابوك يبين صوت كلش واضح
لو هذاك اليوم سديت الحنفية ودخلت للغرفة شوي وسمعت الحنفية تكت مي طلعت لكيتهه مفتوحه
ـ من خوفكم يتهيئ الكم ياخالهه
والله ماكو شي
ـ ميقبلون يصدكون بينة
الكل يكول تتخيلون
راحت خاله ام عمر ورجعت للغرقة
انتبهت الباب تصرج من افتحهه
وين جان عقلي قبل
ليش ما انتبهت علئ الباب اطلع صوت اخذت دهن مال طبخ وخليتة للباب وراح الصوت خلصت منه ..
كاعدين اني وخواتي ندرس
والشباك اندك
الشباك مالتنة صاير كدامنه بالضبط ومقابيل السياج مالت البيت
يعني اكو ضوة خافت كلش من الجوراين يجي..
البردة مو كلش ثخينة فيبين منهه الخيال
لمحنة شي طويل واكف ورة البردة خواتي كمزن علية يعيطن ويرجفن
واني جمدت بمكاني اقرة ايات وابجي
حاولت ما ابين خوفي بس مكدرت
ردت اكوم اطلع افتح الباب بس مرعوبة مكدرت اتحرك من مكاني
ثاني يوم الصبح راسا خليت بطانية فوك البردة حتئ منشوف شي
وهمين هالايام كلهه نحس الباب تتحرك والشباك والحايط يندك ..
مااكدر كول صرت شجاعه
بس تقريبا اتعودنة علئ هالسوالف
صارت ايام الكريسمس
وصار الطلب عليه من العوائل
يريدوني انضفلهم بيوتهم
تقريبا اكثر من 8 عوائل طلبوني
ومن بينهن ام مهند همين نضفت بيتهه..
بهالفترة بديت اعتمد علئ نفسي
جنت بالبداية اخاف اروح بالكيات لان ما اندل
جنت كلة تكسيات
ومن اصعد التكسي يبقئ عيني علئ الشارع والاماكن دائما اركز علئ الطريق واحفظ محلات لو شوارع
بس من شفت التكسيات غالية وتخلص فلوسي والكيات ارخص بهواي منهه يعني بمكان الخمستالاف اصرف خمسمية
اتجرأت وكمت اروح كيات
اول فترة جنت هواي اسأل الناس وابو الكية بحيث جنت ادوخهم لان ما اندل
الئ ان شوي شوي بديت اعرف الطريق وصار عندي سهل
هالامر خلاني اعرف شلون اتعامل وية الناس
وقبل لا ياخذوني اكلهم اشوف البيت ونوع الشغل يلة اكول شكد اخذ..
من اشوفه ثكيل اطلب مبلغ عليه حتئ لايروح حقي مثل كل مرة
وهواي ناس جانو كريمين ويايه
حتئ غدة ينطوني وميعاملوني علئ الفلوس راسا ينطوني تعبي
واكو بيهم لا والله يخلوني اشتغل واكمل وينطوني حقي ناقص واكلهم بذمتكم تبقئ لان تعاملنة بالبداية..
يعني من هالشغل تقريبا صار عندي خوش مبلغ ..
كل مرة اكول اشتري تلفزيون لو كنتور
بس احس اكو شي يمنعني وميخليني اشتري ..
ماكلت لنغم هالكد فلوس مجمعه عندي اعرفهه متذمرة
لان بس تدري عندي فلوس لازم نصرفهن
هية حقهه
طفلة و تريد تلفزيون
وتريد تعيش بشكل طبيعي
بس اني شغلي متذبذب
وخصوصا خالة ام عمر كلتلي بلكي نشوف احد زايدة عندة غراض كنتور تلفزيون بوفية اي شي وينطيكم
لاتصرفين هالفلوس تفيدج
اني همين ابد مالي واهس اشتري شي بهالغرفة
اكول الفلوس تفيدنة ناخذهه ونطلع اذا صار شي
بس اذا اغراض شلون اخذهن وبشنو تفيدني
خصوصا كعدتنة ممستقرة
كل فترة تطلعلي شغلة واحس كلبي ممطمن اببد..
مضايقات مازن متنتهي
تلفونات تهديدات
حتئ اشكال الحجي طلع عليه بالشارع بس جنت ممهتمة اله ابد
لان المبلل ميخاف من المطر..
خلصت شغلي وطبخت
وصار وقت ارجع خواتي من المدرسة لبست فتحت باب البيت
وصارت بوجهي سيارة تخبل ..
وكفت بالباب مالتنة
استغربت منو بالسيارة
ثواني ونزلت جيداء من السيارة
ماعرف ليش بقيت واكفة بمكاني وعيني عليهه شلون طالعه حلوة لابسة بنطلون كابوي وقميص قصير وحجاب ومطلعة نص شعرهه منه ومكياج كامل
ونزل وياهه شاب شلون انيق ووحلو ومبين مثقف وابن ناس راسا سألهه
ـ منو هاي البنت الطلعت من بيتكم؟
جيداء ـ ها .. وحدة ما اعرفهه
تعال سيف اصعد ااكيد هسة امي دتنتضرنه..
ـ اخذته ودخلت وهية تخزرني بنضرة اشمئزاز وتباوعلي بقرف
دخل البيت الولد وصعدو فوك
شفت لنفسي مابية شي يعني ملابسي تنورة وقميص ليش هيج باوعت عليه مالابسة شي مو مرتب ..
ما اهتميت صارت هيج امور عادي عندي ..
رحت للمدرسة لكيت الحان وصبا طالعات بس نغم بعدهه بالصف عدهم امتحان ومبقيهم
الشارع تقريبا فرغ
وبس اني وكم وحدة جاية تاخذ جهالهه
طلعت نغم ورجعنة نتمشئ
جنت شايلة خمستالاف دينار ويايه علمود الحان دائما تريد تشتري خطية
وكفت اشتريتلهة وصار بوجهي مازن
ماعرف مين طلعلي
حسيت نفسي تخربطت من الخوف
مازن ـ ليش ادك عليج متجاوبين
ـ وليش اجاوبك؟
ـ اوكفي لا انعل والدي
ـ وووخر اايدك عني لا افضحك بالمنطقة
ـ طبعا صار اختصاصج الفضايح
ـ امشن بنات
ـ راح تندددمين يااا نهاوند ااصبريلي
ـ صاح باسمي بصوت عالي اخذت خواتي وردت امشي راسا صرخ مازن ااخ التفت عليه لكيت عمر ابن خاله ام عمر
عمر ـ لككك المن تهدد ياناقص تعااال
مازن ـ وخرر عنيي لك لاتمد ايدك عليييه
ـ ووتكليي وولك دتعاال
ـ لزمة عمر ونزل بي دك ضرب
شفئ غليلي من مازن لان شفته يتوسل بس متت قهر
حسيت راح انفضح بالمنطقة بعد اكثر
جريت خواتي ورحت اركض للبيت
فتحت الباب ودخلت للغرفة بعد مطلعت
بس سمعت العصر من عمة كميلة وخاله ام عمر ...
عمر ماذي مازن بالضرب ومحذرة بعد يتقربلي ..الحمد لله
الله وكفلي ولد الحلال
بس سبحان الله الفضايح تلتم عليه
شكد احاول اتجنبهه بس ماكو فايدة تجيني ركض وين ماروح
وبيوم 4 بشهر الواحد سنة 2008
جنت كاعدة بالطرمة اغسل ملابسنة
اندكت الباب ..
كمت علئ حيلي شفت سيارة واكفة اباب بيتنة
شو جنهه سيارة علاء ..
لا عزة شيجيبة
لو يريد يجي جان خابرني وكلي ..
مافتحت الباب كلت يمكن خطار لبيت ناصر
كفيت الملابس علئ جهه
ورحت اشرهن
ردو دكو الباب وطلع ناصر فتحهه..
جنت واكفة بين الداير وحايط غرفتنة
اشر الملابس
وسمعت صوت علاء يحجي
استغربت
مستحيل علاء شيجيبة
تقدمت يم الباب
وشفتة متأنق ومبتسم وواكف ووياه رجال غريب ماشايفته وديسلم علئ ناصر
وللحكاية بقية…………… 🥀
كاتبة نص بارت اضافي
وحابة افاجئكم وافرحكم
بس انتو همين فاجئوني وفرحوني بتوصيت ولايك وتعليق رفعو الواتباد والبيج فديتتكم