الحلقة التاسعه والثلاثون
#ليلة_من_فبراير
❤️
نهاوند ـ ابد ماحبيت الموقف النحطيت بي
كل شوي الكة تبرير شكل
يمكن ازدحامات
يمكن الطريق سدوه الامريكان
يمكن هسة وصلو راس الشارع
مليت من الانتظار
خابرت علئ خالة ام مهند مرتين ادك عليهه مشغول بالثالثة جاوبتني ..
شنو صاير خاله فهميني
ـ والله ياخاله ماعرف شكلج..
ـ من الاخير الله يخليج
ـ صار عدهم وفاة..
ـ وفاة ؟
ـ اي والله
ـ عزة منوو
ـ خطية خالهم ابو مثنئ
عود جان متحضر يريد يجي للخطوبة مم تاخر رايحيلة للبيت
لاكي باخر انفاسة بين ماشايلي للمستشفئ وازدحامات مسلمهه بالطريق
ـ خطية الله يرحمة
يكولون جان خوش رجال
ـ اي والله خوش ادمي
وحتئ مرته وولدة بناته كلهم خوش اوادم.. بس هاي الدنية
ـ الله يرحمة
بس ليش ماخابرني
ليش مانطاني خبر
يعني الكل كاعد ينتضر علئ الاقل يدزون مسج
ـ هسة من خابرت ابو مهند يكول والله انخبصنة اني غريب عنهم ونخبصت وياهم
ـ خطية
ـ اي فـ يكول ابو مهند التهينة
واني همين التهيت وياهم ..
شايلي وراحين واهلة خطية متخبلين عليه لان مجانو موجودين حاضرين مناسبة ابيت اهل امهم وعايفي خطية
ـ خطية الله يرحمة
ـ كل تأخيرة بيهه خيرة لايضل بالج يانهاوند
ـ الحمد لله علئ كل حال..
يلة مع السلامة خاله خلي اكول لاهلي..
ـ يلة خاله الله وياج
ـ سديت التلفون وبداخلي مكسورة
اني من البداية ما راغبة هالزواج
زين ليش هسة مقهورة وبس اريد ابجي
ام عمر ـ ها بشري شنو صار
كميلة ـ والله وجهه ميبشر بخير
ارشد ـ اظاهر تراجعو عن كلامهم
اكدر اكاومهم عشائريا
شنو ينطون موعد ويخلفون بي وحتئ ما اعتذرو شنو زعاطيط كدامهم جهال
ـ اباوع عليه بلة هذا شديحجي
وهذني المشعوذات هية وبنتهه غاصات بالضحك
طلعن من الهول وتصيح حوبتي بينت سبحان الله ما عدت عليهه..
نعصر كلبي
يعني صدك هذني بيهن حوبة واني لا؟
ام عمر ـ خلي نفتهم منهه اشو ساكته ولونهه مخطوف..
ولج احجي خاله شبيج
ـ مكدرو يجيون لان خال علاء خطية متخربط واتوفئ
ام عمر ـ يااا ييمة خطية
ـ اي والله خالة
ـ زين شبي من شنو اتخربط
ـ مادري ماكالت
ـ زين شكد عمرة جبير لو بعدة شاب
ـ لا هو جبير بس ماعرف شبي
بعدين يخابرني علاء وافتهم منه
كميلة ـ الله يرحمة..
ها شفت ابو محمد
ما تراجعو العالم عن كلمتهم
بس صارت عدهم مصيبة والتهو بيهه الله يعين الناس علئ مصايبهه
هالوكت الموت صاير عادي
اصلا النسمعه ميت موت الله نكول نياله لا متفجر لا متطشر وميلكو
و لا مقتول غدر
ام عمر ـ اي والله ..الله يرحمة
يلة ياخاله لا تنقهرين
عسئ ان تكرهو شيئا وهو خير لكم
كلشي بي صالح
خليج قوية
ـ لاتخافين عليه خاله
مبية شي ..
بس مقهورة علئ الرجال ابو مثنئ
خطية جان دائما علاء يذكرة بخير
ارشد ـ ههه والله وكت
لا مستحة ولاخجل ولا عين التنكسر
كاعدة كدامي وتسولف بحبيبهه وشجانو يسولفون سوية
ـ باوعت عليه بلة هذا شحجي وياه هسة
ام عمر ـ الولد شايفهه ابيت ام مهند اكيد يصير بينهم حجي ابو محمد انت ابو عقل الجبير ليش تحجي هيج
ـ ترة كل بناتكم مثلي
و اذا مو اتعس مني
كلهن عدهن علاقات وية الولد
ويحجن وجه لوجهه وياهم
مو بس تلفونات
ـ لاتجميعين وولج ..
لان بناتي مو هيج
منال ـ هاااا لعد منوو تقصدد مثلاا بنتتي ؟
وبناتك يمة ملائكمة!
كميلة ـ يبووو ترة محد يشوف عيوبة
ارشد ـ عيوب شنوو مرة اخوية؟
وضحي كلامج ولاتشمرين حجي
شنو شبيهن بناتي
انطوني دليل من تحجن مو بس لغوة زايدة لا اعرف شلون ارد عليكم
منال ـ والله اليجيب سيرة بنتي اكص لسااانة وكأأن من يكون ورااه لو مو عصابة لو دوولة وراه تسندة اكص لساانة واذبة للجلاب
ام عمر ـ كافي ام وسام يمعود ابو محمد استهدو بالله لاتتعصبون متسوة طفلة وغلطت
ـ لا والله خاله ماغلطت
كلهم يعرفون بناتهم يحجون وية ولد ويصادقوهم ودك سوالف
وعدهم عادي
اشو تجي يمي
والكل تصير مدتينة وتبيع شرف براسي
ارشد ـ لج منو يبيع شرف براسج
شنو انتي مابعينج احــــد
ـ ترة ماخاف من اسلوب العياط والصياح
شتريد مثلا تضربني ؟
اني ماحجيت شي غلط
التقبلو علئ بناتكم
مجبورين تقبلو عليه اني وخواتي ..
وتعرفون بية
اني اشرف من الشرف نفسة
نيمتوني يومين بالشارع اني وخواتي محد كدر يطخني
فماكو داعي هالكلام عليه يا... عـمي
راسا اجتي ام عمر وخلت ايدهه علية وصكت علئ سنونهه وهمستلي
ـ سكتي كافي تراددين
ـ بعد هالحجي راسا عافنة وطلع ارشد حتئ ماعرف يجاوب
بقينة اني وام عمر وكميلة ومنال وبنتهه
منال ـ سبحان الله
الحوبة تبطي بس ماتخطي
ـ تؤ ههه
قابل عافني لو مستعر مني مثل رجل بنتج
ترة خاله اخو امة توفئ
شتريدي يعوفهم ويجي يخطبني
ترة كلش عادي يمر جم شهر ويرجعلي لان الولد كاتل روحه عليه
ويحبني ووكف بوجه اهله كلهم لخاطري
مو مثل الطلي امه سحبته وفرضت رأيهه عليه لا علاء رجال
دعاء ـ اي واالله صدك
بسام مثل الطلي امه وعمتة كايداته
لا وكف بعينة حبي اله
ولا ولااهتم لمشاعري وكسرة كلبي
منال ـ ويطبهم مرض
يروح نعال يجي احسن منه
ام عمر ـ يا شلون تشبهين الرجال بالنعال
ترة مو اكل اصابعج سوية يا ام وسام
اذا بسام هيج حالته
فـ اكيد مو الكل مثلهم
اكو زلم يهدون الكاع بكلمتهم
ـ هالعار الكدامج
اثرت علئ بنتي
هية بسببهه خربت حياتهه وشوفي الله شسوة بيهه
كميلة ـ عاد لا كلشي تذبي براس الطفلة
هالعار التحجين عنهه لكت رجال حارب الدنية علمودهه حتئ ياخذهه
وبسام لو رايد بنتج صدك جان ماقبل يطلع من البيت وكمل مراسم المهر
بس جنة ماصدك
لكف بنطلونة بسنونة وشرد
خلينة ساكتين ام وسام لان السالفة واضحة
ـ تعبت من الكعدة والهووسة
منال عدهه استعداد تبقئ لباجر تحجي
واني مالي خلك بعد
كمت من مكاني ولزمتني خاله ام عمر
ام عمر ـ ها وين
ـ اروح ابدل خاله
وابدل لخواتي
ام عمر ـ لاتنقهرين بنتي
ـ شلون ما انقهر خاله
هذا خال علاء خطية
علئ الاقل احترام اله
ـ ياعيني والله انتي الياخذج يفوز ونياله بعد شكد اصيلة وبنت اصول
منال ـ ليش تنافقن وتجذبن
اذا الياخذهه يفوززز مثل متكولين
شكو متاخذيهه لولدج
عندج خير من الله يسدون عين الشمس
اخذيهه جنة الج اذا هيج مكيفة عليهة
ام عمر ـ لو اعرف واحد من ولدي ماعندة حبيبة ويريد يتزوجهه جان اخذتهه لنهاوند ليش لا اتمنئ تصير جنتي شبيهه البنية
حلوة تخبل
وحسب ونسب
حفيدة حجي حمزة وحورية بعد وماخذة كل اوصافهم الحلوة
وذكية ومؤدبة وشاطرة
شيريد الرجال اكثر من هيج مواصفات
ـ ابتسمت الهه وكلتله شكرا خاله
عفتهم وصعدت فوك
بدلت ملابسي بالحمام وصحت لخواتي حتئ ابدللهم
الحان ـ جوعانة
ـ هسة اصبلج حبيبتي
ـ لا مااريد اااكل مااريد
ـ لعد شنو تريدين
هو الجوعان شياكل مثلا
صبا ـ تريد تشتري
ترة نهاوند من يوم الاجينة لهل بيت انتي ابد مشتريتيلنة حلويات
ـ شلت هم بكد شعر راسي
شلون افهم هالصغار الفلوس دتخلص وما اكدر اجيب حلويات
اخذت جنطتي وحسبت الفلوس العندي
ماضل منهن هواي
اقل من 100 الف
لان هذيج الايام كلهه جانت الحقيرة اتلف بالاكل
وارد اشتري ويصير المصرف مصرفين عليه
لزمت الجنطة وكعدت حايرة
خواتي عينهن عليه
ماعدهن غيري يطلبن منة
عزلت الفين من الفلوس واخذت الجنطة ونزلت اني وخواتي
شفت ناصر كاعد ويتفرج تلفزيون عفته وطلعت
ناصر ـ ووووين
ـ رايحين لعمة كميلة
منال ـ هه صايرين ولف هالحياية
ناصر ـ روحو من المطبخ لاتطلعون منا
ـ اخذت خواتي ورجعت
مابية حيل حجي ولا الي خلك مشاكل
فتحت باب المطبخ ودكيت باب عمة كميلة
ـ نهاوند مو
ـ اي عمة اني
ـ تعالي فوتي الباب مفتوحة
ـ دخلت اني وخواتي ..
عمة ميروحون الجهال يشترون
ـ قبل شوي راحو ..
ليش تريدون تشترون
ـ اي خواتي يريدن يشترن وناصر ميخلينة نطلع
ـ هو يصير زلمة بس علئ الجهال
بس يم الزلم حاله حال الزعاطيط..
حتئ حجي ميعرف يحجي
تعالو ماما اخذو بنات عمو فؤاد واطلعو اشترو من بيت ام مها
لا تروحون بعيد
اذا ساده المحل
دكو الباب عليهه
ـ هاي الفين لاتضيعوهن
خلوهن بيد نغم هي تشتريلكم تعرف تحسب صبا والحان لا تعوفون ايد نغم ابد فتهمتو ..
اخذو الجهال خواتي وراحو
بقيت كاعدة يم عمة كميلة وساكته
ـ اشو ساكته
ـ ما عندي حجي
ـ لاتهتمين يمعودة
غمضي فتحي تخلص السنة ويجون يخطبوج
ـ لا عادي مو كلش مهتمة
ـ زين بلة بيت ام مهند حلو؟
ـ اي مااشالله يخبل كلش حلو وبيت اختهه حكيمة بعد احلئ شكد جبيرر وبي حديقة شكبرررهه والغرف شكد كبار
ـ بالعافية عليهم
هية هاي البيوت الحلوة..
عاد عدهه بزر لو ماعدهه
ـ اي عدهه تلث ولد وبنيتين
وخالة ام مهند عدهه بنيتين وولدين
ـ نيالهم اكيد جهالهم كل واحد اله غرفة
خو مو مثلنة لحم فوك لحم
هية هاي الزواجه الي المرة ترتاح بيهه
خو مو مثلي ملزكتهه يمنة ويسرة حتئ اعيش هالجهال
ـ اي والله عمة العيشة هواي صعبة..
ـ عاد انتي الله يساعدج اني هالكبرني وكوة متحملة مسؤلية جهالي شحال انتي والله عمي بطله
ـ كاعدين نسولف واجوي خواتي
خطية مشتريات وفرحانات
كميلة ـ لا تبقين تصرفين علئ هالسوالف ترة هجيمة
ـ خاله من يوم الاجيت لهنا مشترتلهم شي
ـ خطية.. بس سويلهم حلويات بالبيت احسن
اشتري نشا حليب وشكر وسويلكم محلبي بركة يصير
احسن من هاي السوالف
ترة الربع والخمسمية همين يجمعن
ـ اي صح والله خاله
ـ بعدهه منال تخرب اكلكم
ـ البارحة واليوم ماسوت شي
الاكل عادي مبي شي
ـ نصيحة عمة اطبخي وكملي وشيلي الجدر لاتعوفي جوة حطي يمج بالغرفة
اني كبلج شبعت ظيم منهه هالعكربة
ـ والله عمة مابية حيل مشاكل بعد
اخاف اشيلة واخلي بالغرفة تسويلي مصايب
ـ خلي تولي لا تهتميلهه ترة هاي تتفرعن من تشوف احد يكبر راسهه
ـ هم صدك ..
يلة عمة اني اروح
ـ وين مو كاعدة
ـ لا خاله اريد اسويلهم عشئ ويجوز علاء
يخابرني لو اني اخابرة خطية اريد افتهم شصاير
ـ اي هم حقج
اخذي راحتج عمة وشتحتاجين اني موجودة
ـ شكرا عمة ..
طلعت اني وخواتي وورحنة للبيت
عشيتهن وخلصت وكعدت انتضر
علاء اشو ابد متصل اليوم شنو قصتة
دعاء عينهه عليه
حسيت بفشلة منهه
اكيد راح تروح تكول لامهه ويكعدن يضحكن
اخذت التلفون ودكيت عليه
اكثر من خمس مرات اتصل ماكو ميجاوب
عجيب شبي هذا ليش ميجاوب
عود شنو معناهه هيج يسوي...
خلي انتضر شوي يجوز مو يم تلفونة
.. مر اكثر من عشر دقايق
ورديت اتصلت مرة ثانية
اشو راسا غلقة بوجهي وطلع مشغول
يجوز سدة حتئ هو يتصل عليه
اي يجوز لان يدري بية ماعندي رصيد
بقيت انتضر ماكو
لا دك عليه ولا شي
عجيب شنو القصة
هاي اخر مرة ادك عليه
جاوب جاوب ماجاوب طز شسويلة
ــــــــــــــــــــــــــــــــــــــــ
علاء ـ اخذنة خالي من المستشفئ
وراسا طلعنة للنجف حتئ ندفنة
الطريق طويل
والنهار كلة هلكان
كل عقلي اليوم يوم فرحتي
راح انجمع وية نهاوند بشكل رسمي
تالي القدر غلبنة وكال كلمتة
امي ويانه بالكوستر
دكت رجل الا تجي واهلهه يحترموهه ميكسرون كلمتهه
كلما اطلع تلفوني اريد اخابر نهاوند امي تسألني ومن اكلهه علئ نهاوند تخزرني بعينهه وتكلي هو هذا وكته واعوف التلفون
مهما يكون هية امي
وماريد اعق بيهه
ولا اكسرلهه كلمة
الطريق خطر هيج وقت
خصوصا راح يليل الليل
طريقنة علئ المحمودية واللطيفة والاسكندرية
يسموه مثلث الموتت من كد الجرايم الترتكب بي
هواي سيارات اخذوهه منا وبعد مالكوهه ولا لكو اصحابهه
كيات كاملة بناسهه انفقدو
كل ما نوصل سيطرة نخلي ايدنة علئ كلبنة
نخاف لا تطلع وهمية ونروح بيهه
وصلنة للنجف بالموت
مشاهدين الف مرة
وخاتمين القران عشرتالاف مرة
دخلنة المقبرة بالليل دفنة خالي ورحنة نشوفلنة فندق
مو مال نرجع هيج وكت
هم تعبانين وهمين الاوضاع تلفانة
اخذت امي وابوية ورحت اجرت غرفة بفندق ..
ارتاحي يمة كافي بجي
ترة البجي ميرجع ميت
ام علاء ـ غير اخوية قابل دبجي علئ ابوك
ابو علاء ـ عوفهه يمعود اجتني احجاية من وراك
ـ ههه ... الله يهديج يمة شجاب ابوية بالنص
ابو علاء ـ حظي
ـ كاعدين نحجي
ودك تلفوني باوعت هاي نونة ..
ام علا ـ منو اتصل عليك؟
ـ هـ هاي نونة
ابو علاء ـ رد عليهه
ـ عليييمن يررد
علئ اام كصة الفكر؟
فكرتنة بعدهه ماعتبت بابننة وموتت اخوية من تدخل بيتنة شتسوي بينة
ـ شالقصة يمة شنو هالحجي هذا قضا وقدر
ـ اسكت اسكت ابو القدر
وبعدين شعدهه ادك عليك
شنو هالقلية حيااء
و الماعدهه خجل حتئ ترن عليك ولك
ـ يمة هية شمسوية قابل
غير خطيبتي ودكت عليه
ـ انجبب خطيبته خاف صدكت بنفسك
ـ خلي ارد عليه
ميكفي مقبلتي اروح اعتذر منهم ولا اخابرهه وافهمهه علئ الصار
اكيد لازم تتصل عليه حتئ تعرف شنو صاير
خليني اجاوبهه يا حبيبتي
ـ والله العظيم اذا تجاوبهه بحضووري لو ورايه اتبره منك وانعل يوومك ويووم البطن الحملتك
ـ يابة احجي شي يمعود
ـ الحجي يم. امك مو يمي
ـ شيحجي؟
من البداية اني مارايدتهه
ولك متتكلي شنو العجبك بيهه
شنوو مميزاتهه ؟
همييين مطلكه
و خريجة سجوون
وتشتغل خدامة
ولك شعجبك بيييهه متكلييي
ـ يمة مو حجينه بهالمووضوع
اني وابو مهند وام مهند وقبلتي وكلتي ميخالف
ـ لاا ذاك زمن وهذاا زمن ثااني
بلحظة كلشي يتغير بهالوكت
ـ يعني شلون
ـ يعني خلص ام السجون تولي عساهه لا رجعت
انت تتزوج بنت خالك ابو مثنئ
البنية صفت وحيدة هسة خطية بنص اخوتهه
وامهه عوبة بين النسوان كلشي مدبر
اخذهه واستر عليهه تكسب ثواب بيهه
ـ ياثواب ستونة دفنه ابوهه
جايه هسسة تفكرين بزواجه بنتة
ـ كلنة نموت ونروح لرحمة الله
الموت ميوكف الحياة
تاخذ زهراء بنت خالك ورجلك فوك راسك
وراح ابدي من الشهر الجاي اجهزلهه
هية هاي الاريدهه تصير جنتي مو المطلكة ام السجون
ـ مو تدرين بية اشوفهه مثل اختي ماكددر اشوفهه غير شي بابا ماريدهه
ـ انجب وولك
هالحجي المخربط مو عليه
شنو مثل اختك راضعه وياك رابية وياك لا تضل تمخرط اعرف احجي يويل شكدك تصير
ـ يمعوود يابة احجيي شي وية ااامي
ـ معلية يمعود
لا ادخلني بيناتكم
ـ شوفي خابرت نهاوند
خليني اجاوبهه فدوة
ـ هااا همين اتصلت هالادبسزز الصلفة
ولكم شكد قبيحة هاي شكد لززكة لاااخجل ولا مستحةةة
ـ اي مو لان كل شوي دتتصل
وماجاوبهه اكيد يضل باالهه
خليني هسة احجي وياهه يا امي
مترهم هيج فدوة اروحلج
ـ وشتريد تكلهة؟
ـ راح احجي وياهه كدامج ووشوفي الحجي..
فدوة عيوني قبلي خلي ارد عليهه
ـ زين ..شوفهه شتريد
بس ياكلمة متعجبني اسمطك واسمطهه
ـ قابل عادي ميخالف ..
الو ..هلو نونة
ـ البقية بحياتك علاء
ـ بحياتج الباقية..
تسلمين الله يحفظج ياغلية
ام علاء ـ ااانجب ..غالية.. لاتضل تتلوك
ـ سمعت صوت مرة تحجي يمة
بس مفتهمت شنو تكول ..
مهتميت اكيد بالفاتحه هوسة تصير واشكال الاصوات ..
ليش ادك عليك متشيله علاء
ـ احم أ ..جنت بالمغاسل وازدحام هواي زلم مكدرت اشيلة
ـ ليش مغاسلكم ازدحام؟
ـ هه لا مو مغاسل بيتنة ..
مغاسل النجف هاي
ـ بالنجف؟
ـ اي هسة احنة بالنجف
غير اجينة حتئ ندفن خالي
ـ يا خطية .. يعني دفنتو الله يرحمه
ـ اي والله .. دفناه
وكت صيف مترهم يبقئ لثاني يوم
ـ خطية الله يرحمة..
ـ يرحم والديج..
ـ زين شنو شبي ليش مات
ـ ييعني هو رجال جبير بالعمر مو صغير كالو الاطباء جلطة صارت بي
ـ خطية الله يرحمة برحمته الواسعه..
زين هسة راح ترجعون لبغداد؟
ـ لاا مستحيل مو اليوم..
منكدر نرجع هيج ووكت
باجر ان شالله نطلع وية الناس
ـ ليش متكدرون ترجعون؟
يعني راح تباتون هناك
ـ اي نبات هنا بالنجف شلون نرجع جايزين من روحنة
ـ ليش شعجب شنو صاير
ـ الطريق يخوف
خصوصا اللطيفية والمحمودية والاسكندرية يسموهن مثلث الموت
اليدخل بهالمناطق 99% ميطلع عايش
ـ عزاا ياستار
ليش شنو هاي المناطق شبيهه
ام علاء ـ تسووين نفسج متعررفين ام السجوون
ـ بعدين اخاابرج نهاوند روحي هسة
ـ شنو هالصووت اليمك منو هاي
ـ تسوين روحج فقيررة
يعني متدررين
االمجرميين القذررين الساافلين السااقطين يذبحوون بسس الشيعه بهااي الاماكن
ـ يمة شبيج شنو معنئ هالحجي
ـ ااانجب انته المن دتغطي مصايبهم واجرامهم
ـ مفتهمت هالمرية شكاعد تحجي
شنو معنئ كلامهه شتقصد ..
علاء منو هاي ؟
ـ امي امي هااي امــي
ـ شنو معنئ حجيهه
يامصايب شنو سويت اني
علاء ـ شنو القصة يمة
نسيتيي ابوية همين من ذااك الصووب
يمعود يابة احجي اسمعهه شدكتوول
ـ خلي تحجي التريدة
بس تجفيني شرهه
واذا تريد اسلم نفسي للسلطات واكلهم اني ارهابي همين ماعندي بس خلي اخلص
ام علاء ـ جيب جيييب
ابو حلك الفاهي
يالاثول
حجاية متعرف تحجي وية ام السجوون..
الوو عيني يالخبرة بالسجوون
هو انتي ووحدة منهم داخلة سجوون وقاتلة عمج ابو رجلج
بس البخت طلعج
جايية هسة مسوية روحج بزونة بريئة
ـ دعاء جانت موجودة مكدرت ارد علئ ام علاء ماريد يتشمتون بية اكثر
الدمعه صارت بطرف عيني
خليت ايدي علئ التلفون حتئ الصوت لايصير واضح وينسمع
ام علاء ـ ها اااشو خرسيتي
يعني معقولة متعرفين جماعتكم الارهااابيين الطالعين من نصكمم
نازليين دك كتل بيينة
لج سوالف الشيطنة متمشي علئ ام علاء
اعرفج واعرف الف وحدة نكسة مثلج
ـ عفت خواتي وطلعت برة الغرفة
احس روحي اغلي نار من حجيهه وتعيوراته عليه
مكدرت اسكت اكثر
الكلام الدار براسي راسا حيجته بدون تفكير..
اولا احنة مو ارهابيين
وعيب هالحجي تحجي وانتي مرة جبيرة
اني همين ابوية انقتل
وامي انقتلت بس ماكلت جماعتكم قتلوهم ولا تهمت احد
وثانيا سوالف الشيطنة والنكاسة التهتميني بيهه
انتي اكيد اعرف بيهن مني
لان هذا ثوبج مو ثوبي يا ام علاء ..
راسا سديت التلفون
ماردت اسمع حجي اكثر من هالحجي
احس كلبي راح ينفجر من كد الدك
كمت ارجف رجف
ماعرف مين اجتني القوة و هيج جاوبتهه
راسي راسا لزمني وكام يوجعني
واحس روحي كلش دخت
خلص علاء صار ورقة محروكة
وكفت يم باب الحمام حايرة بروحي
والدمعه بطرف عيني
شسوي يالله
وين ما اذبهه عوجه ومتضبط ويايه
شمسوية بدنيتي وهيج تعاقبني يالله
دعاء ـ ها شبيج نهاوند
اشو راح تبجين
شنو متعاركين سمعتج تحجين بنترة وعصبية
ـ معرفت شجاوبهه بالبداية بس اذا افضح روحي واكلهم علاء بعد ميجي راح يستفردون بية
خلي اكسب وكت وفاه خاله
بلكي يصير شي بي خير ويعدل حياتنة اني وخواتي
ـ شبيج شنو كلج علاء سمعت
صوت صياح بالتلفون
ـ لا متوهمة لا نتر ولا صياح
بس خطية همة هواي متاثرين علئ وفاه خالهم ومنهارين بس يبجون
وشوي صوتهم ارتفع لان كلش تعبانين علئ فراكة خطية ستوهم دفنوه ورجعو
ـ ها خطية ..
ـ اي خطية ...
ـ اووف نيالج
والله احسدج
ـ مدكليلي علئ ياصخام وجه تحسديني
ـ لان سالفتج سهلة
مو مثلي
شوفي شلون يخابرج ومتلهف عليج
مو مثل حظي يحجي ببرود ويايه
لاتخافين كلهه جم شهر ويفكون حزنهم
ويجون يخطبوج وياخذوج
بس اني شلون
لا بيهه امل
ولا بيهه جارة سالفتي
ـ عفتهه ودخلت للغرفة
مالي خلك احجي وياهه
ولا الي خلك نفسي
كلام ام علاء يدك براسي وكلبي
ـ يعني فوكاهه اسولف وياج وانتي لابستني
ـ ما لابستج يمعودة
بس تعبانة
ـ وليش اتعبين
هيج هيج راح تتزوجين
ماشالله حظج من سابع سما كاعد
ـ اني الحظي كاعد!
لو انتي
علئ الاقل عندج اب وام علئ راسج
لا عمامج اشترو بيج ولا باعوج
ولا ذلوج وهانوج
مدكليلي علئ شنو حاسدتني
ـ عندج حظ عيني لا اطمطمين
شنو تخافين تنحسدين
ـ ههه اطمطم شنوو
وعلئ شنو انحسد بلة
وينة هالحظ الخابصتني بي دليني عليه خلي اشوفة
ـ يووه اروح اخابر بسام بلكي الله سوة جارة النة
ـ الدجاجة تموت وعينهه علئ الزبل
بس استغربت عليهه ليش هالكد متمسكة ببسام
هية متهتم يروح واحد يجي الثاني
دائما عدهه هواي ولد مصادقتهم جوة ايدهه وتخابرهم ليش هذا مجلبة بي
اكيد عندة فلوس ومواصفاته توب وهيج مجلبة بي ومتريد تفوتة ..
ماحطيت عقلي وياهه لان مبية حيل
نيمت خواتي وخليت راسي علئ المخدة
مجاييني نوم
افكر بمستقبلنة
شراح نسوي وشلون راح تفض وية عمامي
هسة شيصير لو يعاملونة زين ويخافون الله بينة
يعني عايشين هنا لا مثكلين عليهم باكل ولا لبس
ليش هيج برعب معيشينة
لزمت تلفوني وكعدت اكلب
كومة اتصالات ورسايل من انمار
بس ابد ما ارد عليه لان اخاف منة..
ثواني واجتني رساله من علاء
فتحتهه دشوف هذا شكاتب ..
اانتي شلون هيج تحجين وية امي متستحين متخجلين من نفسج مرة بكد امج اكبر منج بكومة سنين هيج ت*** جزء من النص مفقود***
كمت اضحك هذا كل عقلة هيج يحجي
لا وفوكاهه الرساله ماكاملة
يلة هسة ادزلة رزاله مو رساله..
هو اني الما استحي لو امك ليش تكول ارهابيين اشو ابوية وامي انقتلو ما تهمنة احد وفوكاهه تغلط عليه وتريدني اسكت وبعدين رسالتك مكاملة مفتهمت بالاخير شتريد .. دقايق واجتني رسالته
ـ لج ابوية من عدكم واني اتبع ابوية وسكتنة واتحملنة حجيهه مرة مفجوعة بموت اخوهه اكيد كلشي تحجي شنو نكعدلهه علئ الكلمة
ـ والله انتو اهلهه انت ابنهه وهذاك زوجهه مجبورين تتحملون حجيهه بس اني شصير منهه وعلئ اي اساس تغلط عليه اني ام السجون اني قاتلة عمي ابو زوجي وفوكاهه توصفني بهالاوصاف وتكلي ارهابية ممجبورة ترة اتحمل هيج كلام فتهمت
ـ اشو لسانج كلش طويل شنو جنتي تمثلين عليه عود انتي هادئة وفقيرة
لو شنو صاير فهميني
ـ لا صاير ولا جنت امثل عليك
بس اليدوسلي علئ طرف اردة بعد ليش اتحمل هالحجي الماصخ والجارح علئ شنو ولخاطر منو اتحملة
ـ تتحمليهه وغصبا عليج وانتي الممنونة
هاي ام خطيبج اذا مو لخاطرهه لخاطري اني
ـ واني خاطري الينكسر منو يجبره؟
شبيك علاء صدك تحجي انت لو شنو
تقبل علئ خواتك هيج حجي ينحجي
ـ لاتجيبين سيرة خواتي لان شيرفنج
الحمد لله لا مسجونات ولا مطلكات ولا يشتغلن خدامات بالبيوت يفرفرن
ـ ها هيح الحجي ..
ـ اي كلت خاف نسيتي اذكرج
ـ ميحتاج تذكرني
بس اذا اني خدامة
فـ هنة حفافات ترة
وهمين من بيت لبيت يفرفرن
اشايفين نفسكم بيت الباشا مثلا
ومحد يكدر يحجي وياكم
بابا انت خلك سواق تكسي
وهنة حفافات للنسوان
وتعرف كلش زين سمعه الحفافات شنو
ـ لا انتي ساقطة وميفيد وياج الحجي
الحمد لله الله كشفج وبين معدنج القذر اعتبري كلشي بيناتنة انتهئ
ـ طز..
دزيتله هاللكمة ونهاريت بالبجي
الحركة الي بكلبي متنطفي
حاطة راسي علئ حايط بيت ارشد
واسمعهم يتشاقون ويضحكون بيناتهم
زادت كئابتي
اريد حياتي تعدل اني وخواتي شسوي
اريد نعيش مثل هذول
ليش كلشي صعب نحصلة
ليش كلشي مستحيل ولازم بي اذية النة
دعاء ـ همين تبجين؟
مدكليلي شبيج قابل خالج المات
ـ مسحت دموعي وعدلت كعدتي ..
اكثر من خالي..
لان خوش انسان
ـ عمي بوفاة عمتج شفاء وبنتهه وعمج توفيق ماهيج بجيبتي
ـ هالرجال مماذيني عادي ابجي عليه
بس الذكرتيهم اذوني
ـ لالا ليش تجذبين عمة شفاء ما اذتج
ـ الله يرحمه
ـ اووف تدرين قبل لاتجينة بجم يوم رحنة لبيت عمة سهير
ـ شذكركم بيهه
ـ مو سمعنة زوجهه اتخربط ورحنة
ـ اي شلونهه بعدهه نفس حقارتهه
ـ لاا وين يووو شلون صايرة فد مرة تخوف
كلش ضعفانة وابد متحف وجهه
وصايرة معزولة عن الناس
وفد متدييينة تصلي الفروض كل وكت بوكته وتقرا قران وتوهبة لجهالهه الماتو بالانفجار
ـ هو هذا البشر
عينة كوية ومتنكسر الا من يموتلة واحد عزيز علئ كلبة
ـ شو عبالك انتي متشمته بيهه
ـ لا ما اتشمت بيهه ياستار وليش اتشمت
بس اذيتهه وحجيهه اليدك بالعظم واستهزائهه بيه ما اكدر انساه
ـ عزةة شهالحقد عليح
ـ اي حقودة اني
حقودة علئ الاذانة وعذبنة وشمرنة بالشارع وباعنة وحلق شعري
بس لان كلت اني تعبانة مبية اكوم
ـ ترة امي حتئ اني هيج تعاملني
ـ لا والله صدك
ههه ضحكتيني
عليمن تقمشرين
ـ احنة مو جنة صديقات قبل لاتتزوجين صباح
مو جنتي تكولين انتي احسن من بنات ارشد
ـ اي صح شوي احسن منهن بس همين ضربتيني هذاك اليوم
ـ اي غير من حركة كلبي ضربتج
يعني اهل خطيبي عافونة وطلعو وخلونة بنص هدومنة بين الناس
شتريدني اتصرف
ـ ترجعين علئ اهلج مو عليه
همة هيج سوو بيج مو اني ..
ـ شمدريني بعد هذا الصار
ـ اذية الناس عدكم مثل شمرة اللعابة
عبالكم المقابيلكم ميحس ولا يتأذة.
اني هسة مابية حيل احجي هواي
اريد انام لان راسي يوجعني ..
عفتهه ودرت راسي
ردت انام مكدرت
جان التلفون كل شوي يرن
شفت الاسم هذا انمار
هذيج الايام يومية يتصل ويدز رساله واني تاركته ..
اشكال العتاب عاتبني ومارديت عليه
شنوو يريد مني هالانمار مادري
لا يكدر يتزوجني
ولا قابل يعوفني
شنو بعد فايدة علاقتنة
ثواني واجاني مسج منة
انمار ـ لـــج جاااوبي عااد
ـ شتريد انمار
ـ واااخيرااا جاوبتي يراد هلولهه
ـ لان اخر مرة كلتلي متكدر تتزوجني
واني متاكدة اهلك ماراح يقبلون
مدكلي شتريد مني
ـ بهالسهولة تنسين كلشي وتعوفيني
ـ ليش هو اصلا شنو صار بيناتنة؟
ليش محسسني جنة بقصة حب مثل قيس وليلئ
ـ ها هيج تحجين
ـ اي لعد كذب
ـ راح اخابرج جاوبي
ـ لالا ماكدر عمامي يمي
ـ اهوووو اشتغلت الحجج
ـ بنص عمامي كاعدة شلون اجاوبك
ـ يعني تريدين تقنعيني علاء ميخابرج؟
ـ لاتقارن نفسك بعلاء
هذا ناطي خبر يريد يخطبني
وجان المفروض اليوم المشية بس صار عدهم وفاة ومكدرو يجون
يعني مو مثلك يا انمار
ـ لج مشتاقلج
اريد اسمع صوتج
حني عليه شوي وخليني اسمع هالنغمة العذبة
ـ تعال اخطبني وراح تشبع من هالنغمة
ـ يبوووو كل كلمة وكالت تعاال اخطبني
ـ لعد شتريد ليش دتراسلني
ـ كلتلج اقنع اهلي واجي اخذج
ـ وبعدك ماقنعتهم؟
ـ انتي مو راح تنخطبين لعلاء؟
ـ احتمال اي واحتمال لا متصير القسمة
ـ اي عفييية هذا الخبر الززين
يلة يلة جاوبي راح اخابرج بعد فترة راح اسافر لتركيا شلون تقبلين اسافر وماسامع صوتج
ـ راسا طفيت التلفون وخليتة جوة راسي
لا مرتاحلة لانمار ولا لعلاء وهذا يرادلة كلب واني مالي خلك
صار ثاني يوم وكمت اسوي ريوك للبنات شفت ماعندي جبن ولا بيض دزيت نغم تشتري من بيت ام مها
سويتلهم الريوك وطبخت وطفيت الطباخ وصعدت الجدر بالغرفة
دعاء ـ هاااي شنوو ليش جايبة الجدر هنا
ـ علمود الاكل لا يتلف
ـ نزلي جوة شنو جدرية بغرفة نوم هاي وين صايرة بلة شنو همج معدان احنة
منال ـ شبيج حبيبتي
اشو صوتج واصل ليجوة
ـ تعالي يمة شوفي هاي جايبة جدر الاكل بالغرفة
ـ ليش يابة ؟
شنو همج احنة
ـ الاكل مرات الكة بي زباله لو شطة لو ملح لو نفط كلت اجيبة هنا حتئ متصير هيج اشياء بي
ـ هههه اي ليش لا هم صدك
عوفيهه ماما خليهه شتريد تسوي تسوي
ـ وررريحة الاكل شلوون
ـ بعد هية مسؤله عن هالشي
اذا الهدوم تصير بيهه ريحة اكل
غصبا عنهة تغسلهن وتنضف الغرفة همين
ـ عفتهم ماجاوبتهم ..
لفيت الجدر بمنشفة زايدة عندي
ووكت الغدة صبيتلهم
طبخت قليل وخلصو خواتي
لان ماسوي هواي خاف يتلف وماعندي ثلاجة
نزلت غسلت الجدورة والمواعين وصعدت
كعدت يم خواتي العب وياهن واسولف ودعاء همين شوي كعدت تحجي ويايه
ماعرف هالبنية ماعدهه كرامة وهيج طبعهه لو براسهه شي تجاهي
الله يجفيني شرهه
خلص النهار وعلاء ما اتصل لادز مسج
قطعت الامل منة تماما
اكيد ميريدني بعد الصار
اوع اني هم ماريدهم
فكر وشايفين روحهم احسن من الناس
خواته حفافات ويعيرني بخدمة البيوت
هيج قسمة متنراد ..
الله يعوضني بالاحسن ان شالله...
صار المغرب ونزلت اسوي العشة
جنت مشترية كيلو عدس وكيلوين تمن وفاصولية وماش
وحاطتهن بقواطي مال نشا وحليب فراغة جابتهن الي خالة ام عمر
مصفطتهن بالكاع يم الطباخ
ردت اسوي تمن عدس عشة سريع
فتحت القواطي مالكيت المواد
من كل شي عايفتلي خاشو لو خاشوكتين
استغربت وين راحت المواد
معقولة كلهن يختفن سوية!
بس عرفت هالسالفة منال وراهه ماكو غيرهه اكيد هية ماخذتهن ومفرغة القواطي
اجتي للمطبخ تجر بروحهه وتتعيقل وتتفيك براسي وتغني وتددنن ..
اكول عمة
انتي ماخذة المواد من هالقواطي
ـ شنو يمة شنوو
ـ اشو فارغات وين راحن جانن بالقواطي حاطتهن
ـ لج بنننت المجاديي
عااايزة علئ قزررقطكمم
شنوو معنئ كلامــــج
تاالي عمرري تتهميني ببوكة زقنبوووت
ـ ماكو معنئ ولا شي
بس سالتج وانتي جاوبتي
لان انتو جوة واني فوك
فـ مو قصدي شي
ـ لالالا
هالسالفة متعدي عليج
نااااصر ناااصر
تعاال شوف توالي البخت
ششووف ابيش تتهمنني بنت اخووك
ناصر ـ شكووووو خيررررر
ـ تكلي بايكة المواد من االقواااطي تررضاههه
ـ ينكص لسانهه شنوو تتهمج ببوكة
غير ادفنهه حية والله العظيم
ـ مااحجيت هييج
ساالتهه وجاوبت
لا تهمتهه ولا شي ..
راسا عفتهم وصعدت فوك
خفت لا يجون ورايه ويضربوني
لو يسوون هوسة
اوووف يالله شوكت تفض
شلون راح يخلص هالعمر وياهم كله هبطات وعركات
عبالك اني جنة و ابيت العيال
مو ابيت عمي اخوة ابوية
خبصني خواتي جوعانات جوعانات
مالكيت حل غير اخذهن يم عمة كميلة
كميلة ـ ها شبيج عمة
اشو وجهج ميتفسر شبيج
ـ سولفتلهه علئ الصار ..
مالكيت غير بس خاشوكتين عدس وخاشوكة تمن
ـ صدك تحجين
ولكم هاي مووطبيعيه هالمنال
اريد اشوووف الله شلون راح يضربهه شلون راح ينتقم منهه عجيييب هالبشررر
تعالي عمة تعالي اتعشو ويانة
ـ طلعت فلوس ودزيت الجهال يشترون صوصج وبيض وسويتة الهم وخبز من عمة كميلة وكعدنة وياهم اتعشينة
مر اكثر من شهر ونفس الحال
كمت اضم المواد يم عمة كيملة واذا احتاج شي احطة بالثلاجة مالتهم
دائما تجمد النة بطل مي بارد لان الصيف حار مينجرع
اما منال فـ يومية تسويلي سالفة علمود الجدر بالغرفة
اخر شي كلتلي عمة كميلة
طبخي وكملي وجيبي الجدر يمي هية بقت علئ هاي خلي نشوف تاليتهه وين توصل وية هاي ام المشاكل
اني همين كمت اطبخ واخلي يم عمة كميلة
الفلوس فد مرة شحت عندي
وكامت خاله ام عمر تساعدني بالمسواك
بهالفترة رجعت علاقتي شوي بأنمار زينة
وعلاء انقطعت اخبارة تماما
بس محد يدري
ولا حاجية حتئ لعمة كميلة
كلهم متصورين يفكون حزنهم ويجون يخطبوني
بشهر الثامن خابرتني خالة ام مهند تريد تجي تاخذني حتئ انضف بيتهه
اتفاهمت وية عمة كميلة يبقون خواتي يمهه وحلفتهه متخليهم يروحون لبيت ناصر لو ارشد خاف يسوون شي بيهم
وقبلت المرة
شافتني دعاء احضر نفسي وسالتني وين رايحه كلتلهه باجر اروح لبيت ام مهند انضف ..
راسا نزلت جوة
ورة ثواني صاحني ناصر ونزلت..
نعم
ـ وين مولية باجر؟
ـ رايحه اشتغل لان فلوسي خلصت
ـ مااكو متطلعين من باب البيت اااكسر رجلج
ـ صارلي يمكم اكثر من شهر
منو منكم شالف الف دينار ونطانة
ـ يطبكم مرررض
شوفيلج غير شغله بيهه خير
مو خدامة
يكفي الفضايح والمصايب الجتي من وراج لبنتي
ـ واكفة منال وراه وتهزلي برجلهه وتباوعلي بخزرة عين
ـ ماكو شي اسمة غصبا عليه
يعني شلون ميين اوكل خواتي
مين اصرف عليهن
نموت علمود نرضيكم
ـ مشكلتج والله
ـ شنووو مشكلتتيي
لا هااي مشكلتكم انتو مو مشكلتي المفروض انتو تصرفون عليينة
بس اني قبلت اتحمل المسؤلية وماطلبت منكم فلس احمر
اي مدكلي شتريد من عدنة تريد تموتنة جوع حتئ الناس ميحجون عليك
ارشد ـ شكووو اشوو صوتكم واصل لراس الشارع
الله شالكم بليلة ظلمة فضحتوونة خزيتوونة
منال ـ بنت اخوك تريد تروح تخدم بالبيوت
ارشد ـ وين يابيت
نهاوند ـ بيت ام مهند
ـ اي عادي خلي تروح
مو جانت تشتغل يمهم شنو الاستجد؟
ناصر ـ يعني عادي عندك تروح تخدم ببيوت العالم؟
لك. ناقص الغيرة شيحجون علينة الناس
ارشد ـ لا تضل تحجي هالحجي اثنينه طابخيهه ونعرفهه لاتغشم روحك ويايه
ـ صارلي شكد هنا
محد من عدكم نطانة الف دينار
عدئ الطباخ والقنينة من عمي ارشد
غيرهه كلشي ماكو
وخواتي صغار وكلشي يريدن حالهن حال جهالكم
ليش دتسوون هيج بينة
هسة اني شطالبة منكم
كلشي ماريد منكم بس خلوني اشتغل واصرف علئ خواتي
لان الفلوس العندي خلصت
مين اصرف بعد عليهن
ارشد ـ اكلك انت خو مو بس تخالف وهاي هية
عوفهه البنية شايلة حمولتهه وحمولة خواته ..
لا تصير ابو زيد الهلالي وتكوم تبيع عنتريات ومثاليات ..
حضري نفسج وروحي
بس هااا ترة الج وكت وتجين مو تتاخرين توالي الليل
ـ اي تجي عليه الصبح تاخذني
وترجعني العصر
ـ خلص لعد ..
امشي يمعود وكافي هوسة علئ الخالي بلاش ترة صدعتونة
منال ـ بسبب هالشغله تحطم مستقبل بنتي وانتو عدكم عادي
ارشد ـ اذا عندج تصرفين علئ هالبنات
االله وايدج
متطلع تشتغل وانتو صرفو عليهن
ـ وليش يابة. اصرف عليهن بنك الخلفوهن
ـ اي خللص يابوية
يعني موت وخراب ديار
لانرحم ولانخلي رحمة الله تنزل
روحي نهاوند اخذي خواتج وصعدي فوك
ـ اخذت خواتي وصعدت
حضرت ملابسي ونيمت خواتي من وكت
كعدت ثاني يوم من الصبح حضرت الريوك الخواتي واخذتهن ابيت عمة كميلة خابرتني ام مهند وطلعت لباب البيت وصعدت وياهه
خلصنة الطريق كلة اسولفلهه شصار وية عمامي من جابوني وراحو ..
اول ماوصلت للبيت راسا اشتغلت ابيتهه ماريد اضيع وكت
من التسعه الصبح للخمسة ونص العصر
علئ وكفة وحدة
الاستقبال كلة نضفته تنضيفة زينة
والبيت همين
حملتني ام مهند هدوم الي ولخواتي واكل ونطتني 30 الف ورجعتني بسيارتهه
ام مهند ـ بنت عمج خطيبهه اسمة بسام مو؟
ـ اي .. وعمتة اسمهه ام واجد تعرفج وتعرفني
ـ اي ادري اجتي يمي وسولفتلي
لعبانة نفسهه من عمامج وجبرت اخوهه يضغط علئ ابنه حتئ يعوف بنت عمج
ـ ذبوهه براسي بيت ناصر
ـ لا مو قصة براسج
بس حجي المرة صحيح
عمامج ذابين لحمهم بالشارع
شلون الناس المحترمة تناسبهم
ترة الناس ادور القسمة بسابع ضهر
ـ لعد حقهم بيت ام علاء ميردوني
ـ صدك تعالي شلون نسيت
انتي شملووصة وية ام علاء
ـ ماملوصة ولا شي خاله
هية تهمتنة ارهابيين
بلة الحجي العليه سكتت عنة مطلكة وام السجون
بس تتهمنه ارهابيين ونكتل بيهم شنو معناهه اشو ابوية وامي انقتلو ماتهمت بشر هية علئ اي اساس هيج تحجي
ـ صـــــدك هيية هيج حجت
ـ اي والله لان كلتلة لعلاء ليش مترجعون باليل كلي اللطيفية والاسكندرية والمحمودية اسمهه مثلث الموت
اني استغربت لان مسامعه بهالاسماء ولا اندلهن
ـ اي صح بس اليتابع اخبار يعرفهن
ـ اشو هاي استلمتني دك حجي
وتالي تكلي انتي همين ارهابية ومنهم وفوكاهه كتلتي عمج ابو زوجج
عاد مكدرت اسكت ورديتهه
ـ لعد اني سمعت غير حجي
ـ شنو سمعتي؟
ـ علئ اساس انتي معيرة علاء بخواته لان حفافات
ـ لا والله جذب
هو عيرني كلي انتي خلك خدامة بالبيوت
واني رديتهه اله كلتله خواتك همين حفافات ويفترن بالبيوت
ـ ههههههههههه رراجمة مو لسان عليج
ـ ماكدر اسكت بعد خاله
هواي اذوني بحجيهم
ـ لا عمي اذا هيج تكول يطبهه الف مررض
ميكفي قدمنالهه كومة تنازلات حتئ تنجب وتسكت الساقطة
تالي تكول علينة ارهابيين
اني اعلمهه
الا اخلي معارفي كلهن يعوفن بناتهه السقاطات
هنة خلك حفافات وعايشات علينة
والله يطبهن حمس خلي تشبع ببنت اخوهه الاخذتهه
ـ منو بنت اخوهه
ـ اظاهر متدرين؟
ـ علئ شنو مفتهمت
ـ علاء خطب بنت خاله ابو مثنئ
اسمهه زهراء عود لان بقت اخر وحدة وهية الصغيرة لاهلهه وحالتهه النفسية تعبت اخذتهه ام علاء لعلاء
وورة السنة تزوجهم
ـ اي ..
الله يسعدهم ..
نعصر كلبي ومتت قهر
اني ماحبة والله ماحبة
ليش هيج مقهورة
اصلا جنت خايفة من هالقسمة ورافضتهه
بس ليش هيج حالي
تماسكت كدام خاله الئ ان وصلنة
سلمت عليهه ونزلت
دخلت البيت لكيت خواتي كاعدات يم بيت عمة كميلة يلعبن
كلش اشتاقيت الهن
حضنتهن وكمت ابجي
كميلة. ـ يااا شنووالقصة قابل وين رحتي ليش هالبجي
ـ اشتاقيت الهن عمة الله لا يحرمني منهن
ـ ياعيني الله يحفظكم لبعض
ـ يحفظلج احبابج عمة
حطيت الاكل يمهه بالثلاجه ورحت للغرفة سبحت وغسلت ملابسي وطلعت
نصبت العشة النطتنياه خاله ام مهند ابيت عمة كيملة
كبب مستوية ماعونين بس مكسرات شوي مو كاملات
و نص دجاجة مشوية مقبلات ولحم بعجين وحلويات
اتقاسمناه وية جهال عمو توفيق
جنت كلش تعبانة ونعسانة
اخذت خواتي ورحت للغرفة ونمنة
مر اسبوعين وبدت المدارس تقترب
جنت حايرة شلون انقل خواتي للمدارس اليمنة
يراد روحه وجية ومنو يحير بية
صرنة تقريبا بنهاية شهر الثامن
منغصات ناصر وزوجته متخلص
بس دائما اتحااشهم
وبيوم من الايام راحت عمة كيملة لاهلهه كالت تبقئ خمس ايام وترجع
وبقينة لوحدنة
طبخت مركة بتيتة وتمن
وجبت خاثر وسويتلهن لبن
عفت الاكل يتهدر علئ النار
وصعدت اسبح خواتي
خلصت ونزلت صبيتلهم وصعدت
كعدنة كلنة نتغدئ
بس اني مو كلش مشتهية نفسي غامة عليه
احس كلبي مقبوض وبس اريد ابجي
يمكن لان فلوسي خلصت ومابقئ غير القليل
اكلت كلش قليل وشربت كلاص لبن
اتغدن خواتي وخلصن ونزلت اغسل المواعين والجداري
سمعت نغم صرخت بصوت عالي
وسكتت
دعاء جوة بالهول مو فوك يعني محد يمهن
كلبي وكع بالكاع من الرعب
عفت كلشي من ايدي وصعدت اركض
لكيت الحان متمددة بالكاع ولونهه ازرك وعيونهه مكلوبة
وصبا ونغم لازمين بطنهن ويتلون من الالم ووجهم احمر وميكدرن يحجن
اتخبلت من شفتهن هيج
اخض بالحان متتحرك ابد
وخواتي بدن شوي شوي يفقدن الحركة
راسا صرخت بدون وعي وبعالي صوتي
خــــــووووووواتتييي مااااتــــن اااالحــــــكووووونييييي يااااناااس ...
وللحكاية بقية........ 🥀
صارلي ساعه اريد انشر مدينشر ونت قوي والله ماعرف ليش اعذروني للتاخير