الحلقة الرابعه والثلاثون
#ليلة_من_فبراير
❤️
نهاوند ـ جنت خايفة لااتكلي محتاجة فلوس
كل الاملكة بس 75 الف ..
صاير شي خاله
ـ ان شالله كل خيرر
ـ ان شالله..
زين انطيني احجي وية خواتي عفية
ـ لحظة نهاوند ..
اني خابرتج حتئ اكلج
راح ارجع خواتج لعمامج
ماكدر بعد ابقيهم يمي
ـ عزاااا لالالا خاله ليشش شنوو سوون
ـ ماسون شي
بس راح ارجع لزوجي
ـ احس ادنية اظلمت بوجهي من كلتلي راح ترجع لزوجهه
ما اعرف شنو احجي انعكد لساني ..
بس خاله ليش
ـ الي بحالتي متسأليهه ليش
ماكدر بعد اعيش هنا
انهانيت من الصغير قبل الجبير
اني اصلااا اطلكت بسبب خواتج
جنت عايشة ومدبرة نفسي وية هالكواد
جان حاير بالملاهي والبنات والدياحه واخلاقة زززفت وساقط
بس جنت عايشة احسن من هسة
علئ الاقل مكفيني وينطيني مصرف يكفيني وعندي بيت جبيير عايشة اني وجهالي معززين مكرمين مناقصنة شيي اطب اطلع براحتي
ماكو جلاب توكف بالباب تنبح عليه
علئ الطالعه والنازله
شنو استفاديت من اطلكت منة
بالعكسس اتبهذلت
وانلعب بيية طووبة
بس صوجي مو صوج احد
لان صرت ام كلب الحنين
وفضلت بنات اختي علئ نفسي وعلئ ااطفالي
محد يفيدنيي بشي
بااجر عكبة يكبررن خواتج ويتزوجن وززين اذا ذكرني بكلمة حلوة مو عاد يذكرن فضلي عليهن
ـ مستغربة من الاسمعه
معقولة هاي خاله وداد الجانت تحن علئ خواتي هيج صارت..
مستحيل هاي منال او كميلة لو ام محمد مو خاله وداد
ـ ما اكدر بعد اتحمل نبيل ونعيم وقذاراتهم يكفي الصار بية هواي تبهذلت
الردت اكولة يانهاوند
انتي ابقي اشتغلي ابيت عمي
وخواتج خليهن يم عمامهن وصرفي عليهن
ـ لالالا .. لاتوديهن اني اخذهن
ـ وين تاخذيهن ؟
منو يكول ام مهند تقبل تبقي خواتج يمج
ـ خواتي ميروحن يم عمامي
ممستعدة اخسر وحدة منهن
اني احير بيهن اني اختهن الجبيرة وهذا واجبي
ـ يا واجب خاله متكدرين ترة مسؤلية تكسر الضهرر
ـ حتئ لو ان شالله اكدرر
ـ ولج اني كاعدة ابيت اهلي لا ايجار ولا شي ومكدرت اتحمل شحاال انتي كلشي ماعندج ااايدج واالكااع شلون تحافضين علئ 3 بنات صغار
ـ ان شاالله اكدرر ان شالله
ـ متررهم اابد متررهم
ـ خاله اللله يخليج معليج بينة
الله يخليج عوفي خواتي لا توديهن
كلتلج اني احير بيهن اني مسؤلة عنهن
ـ اوووف استغفر الله .. براحتج
ـ زين شوكت راح ترجعين لزوجج
ـ هاليومين
اتصلت عليه قبل كم يوم وتراضينة وبقينة نحجي ورتبنة امورنة
خاله بعد ماكدر اضل هنا
اخوتي سفلة وبناتهم ساقطات وامهاتهم اكثر
لا اني مرتاحه ولا جهالي ولا حتئ خواتج
اتمنئ تسامحني ازدهار
لان هواي اتاذن بناتهه بسببي
والاذية متنغفر بس شسووي هذا الله وهاي حكمته
بس والله العظيم
اقسم بجهالي
اذا ماخلي نبيل يندم علئ تصرفاته ويايه فلا اني وداد
ـ الله كريم
ـ بس ارجع لزوجي اروح ارفع دعوة بالمحكمة علمود ورثي والا اططلعه واشلعه من عيونة هو وعصابتة النذل الناقص
ـ ان شالله
ـ حضري نفسج خاله اذا تريدين خواتج اجيبهن الج باجر لو بعد باجر
ـ خلي بس احجي وية. خاله واردلج خبر
ـ اوك .. انتضرج لا تتاخرين لان دة الم بأغراضي هاليومين نعقد مرة ثانية وارجع
ـ الله يسهلج
ـ ويسهلج خاله .. يلة مع السلامة
ـ سديت التلفون وخليته يمي
بس الله يعرف بحالتي بهاللحظة شلونهه
اباوع بحيرة علئ خاله ام مهند
بس هية جانت ملتهية بالتلفون دتخابر
شلون افتح الموضوع وياهه
زين اذا ماقبلت وين اروح اني وخواتي
وين نعيش
نرجع لعمامي وللظيم والاذية
بس ممعقولة متقبل
خواتي مبيهن اذية والله
جانت تخابر وتتمشة بين الهول والمطبخ
وعيني عليهه
خلصت واجتي كعدت يمي
ـ ها وج شبيج
اشو دائما وجهج مخطوف
ـ شسوي خاله المصايب ترف علئ راسي
ـ يااستار شصاير هالمرة
ـ خاله وداد ..
ـ شبيهه؟
ـ راح ترجع لزوجهه
ـ شنو هاي؟ صدك
ـ اي والله خاله
ـ من البداية منو كلهه تطلك
شلون رجال عدهه طول وعرض وهيبة بين الزلم وفلوس خير من الله عندة شكو طلكته ودفرة نعمتهه
وهسة رجعت تفر بذيلهه اله
خوب من البداية اكعد واسكت
ـ يا هاي ام مهند كلشي متدري
ليش خاله انتي متدرين شنو سوة زوجهه
ـ لا .. شنو سوة؟
ـ بطارف لساني درت اسولفلهه عن السواه بخواتي وراسا اتراجعت ما اعرف ليش سكتت ونعكد لساني ..
ـ احجي شبي
ـ أ أ أخلاقة اابد مزينة
ـ زوجهه؟ شبي يمة
ـ شافته يتحرش بالجهال
ـ شــــــــنو .. عزة صخام شنوو شهالحـــجي
ـ اي والله خاله
ـ ترة هيج حجيي جبيير
مو لعب نهاوند
هذا طعن بالشررف
انتي متاكدة من كلامج
ـ اي خاله متاكدة.. وكلش متاكدة
ـ شلون اتاكدتي؟
ـ ها ..يعني خواتي حجن الي ..
كالن شافته خاله يتحرش بالجهال
وخاله وداد من شافته بعينهه وراسا عافته وطلبت الطلاك
ـ وياجهال تقصدين؟ خواتج
ـ ها لالا مو خواتي
يخاف من خواتي يخاف ينفضح..
بس كالت جهال من منطقتهم ما اعرفهم
ـ شنو هاي ..
لو صدك جان اهل الجهال ماسكتو وسوهه محاكم لو عشاير جذب عيني كلسي مابي
ـ مو اهل الجهال ميدرون وهية لان خافت علئ خواتي واطفالهه طلبت الطلاق
ـ ها ..
وشلون لعد ترجع لزوجهه اذا هيج حاله
منو يكول مو بعدة يسوي هاللعبان نفس وج عيني تشوفي تكولين ايباااخ نيالهه علئ هالرجال
شوفته عيشة
خوب بيتهه ادكيلة يركص كلشي عدهه ماشالله
بس ااااابدد متخيلت زوجهه يطلع شاذ
ـ عفية خاله لاتكولين الهه اني حجيتلج هية ما تقبل تحجي لاحد علمود جهالهه
ـ لالا
هيج سالفة صخام وجه متنحجي لاحد
لاتخافين ..
ـ احس روحي ابد مو طبيعية
اريد اكلهه اجيب خواتي هنا
وخايفة انصدم بكلام ماريد اتوقعه ولا افكر بي
ـ شنو سالفتج شبيج..
واذا وداد ترجع لزوجهه ليش هيج حالج
ـ خاله..
أ .. لان ماعرف وين اروح اني وخواتي
ـ ميرادلهه تفكير
تاخذهم وياهه
ـ لالا شلون تاخذهم
ـ ليش ؟
ـ لا كمت اخاف علئ خواتي من زوجهه
ـ اي هم صدك والله حقج تخافين
ـ و هية هم متريدهم تكول تعبت بعد مابية حيل اربي
ـ زين يروحن يم عمامج وانتي هنا ابقي
ـ لالالالا ابد
مستحيل ارجعهم لعمامي لو اعرف اخذهم واجدي بيهم بالشارع ماخليهم يرجعون هناك
ـ يمعودةة ليش؟
ـ لان ذبونة بالشارع يومين بلياليهن
مرة عمي ناصر متريدنة
يابة ليش لان احنة الجهال اتعاركنة بيناتنة
بقينة بالشارع ومن الجوع حتئ من الزباله اكلنة
وتالي الناس الخيرة رجعتنة
وثاني مرة باعو خواتي لماعرف منو كعدت من النوم مالكيتهن يمي
ولو ما الله ستر ورجعن جان هسة ما اعرف وين هنة وشصاير بيهن
ووراهه مرة عمي عذبتني وحركت ايدي لان رجعت خواتي وطلعت اصيح واعيط بالشارع هاج شوفي خاله ..
ـ هاا
ـ اي والله شوفي
كشفتله ايدي وكمت أشوفهه الحروك ..
وردت كصت شعري لان كلتله تعبانة مبية بعد اشتغل
ويومية جانت تموتتني كلتي ودفرات
ولا واحد من عمامي اهتم لو اتحرك وكلهه خطية طفلة عوفيهه
وتالي اخر شي باعوني لابو صباح ومحد منهم سأل عني عبالك ماصدكو يشمروني وهاي نتيجتهه صرت خريجة سجون ومطلقة ومحد يريد يباوع بوجهي ومالي اي ذنب بالصارلي كل هذا وعمري 15 سنة اذا ارجعلهم اني وخواتي شيسوون بينة بعد
ـ دخيييلك ربي شنو هاي
ـ اي واكثر
خاله وداد تعرف وجيرانة ام عمر تعرف بالجان يصيرلي حتئ الاكل جانت تضمة عني وخاله ام عمر تجيبلي الاكل ريوك وغدة وعشة
ـ ليش هالكره شنو سويتو
ـ عمري جان اقل من 15 سنة شنو ممكن اكون سويت؟
بس هية جانت تحب ابوية وتالي ماقبل ياخذهه وانتقمت بينة ..
من وداد اخذت خواتي فرحت كلت ميخالف اضل اني اتحمل بس ماكدر اشوف خواتي الاصغر مني يتعذبن كدامي مستحيل خاله مستحيل ارجع وارجعهن لبيت عمامي
ـ لعد وين توديهم ياخاله؟
ـ احس لساني انعكد
لا اكدر اطلب منهه اجيب خواتي يمي لان واضح متريدهن..
ولا اكدر اطلب منهه فلوس حتئ اشوفلي مكان نكعد بي
ـ نهاوند .. صح تشوفين البيت جبير
بس مااكدر استقبل خواتج يمي
اني عندي اربع جهال وانتي خواتج 3 تصير هوسة وكأنو روضة اطفال
واني ما اتحمل هيج شي
وتعرفين ياخاله
الانسان اذا ميرتاح ابيته
وين يرتاح
ـ أ اي اكيد حقج..
لا ماجيبهم هنا
اني اخذهم واشوف وين اكعد بيهم
ـ وين تروحين بهالاوضاع الخربانة
ـ ماعرف .. بس اكيد راح الكة حل
ـ زين هية شوكت ترجع لزوجهه
ـ كالت هاليومين ..
لو باجر لو عكبة لازم اخذ خواتي
ـ تؤ استغفر الله
ـ اخذت التلفون وطلعت برة الهول تتصل
ماعرف عليمن..
جسمي كلة يرجف
ماعندي فكرة وين اخذهن ووين اروح
عزة همين راح نرجع للشارع الله يستر يارب..
ضليت ادعي ربي يسهل اموري وامور خواتي ويلمنة بمكان واحد سوية
مر اكثر من ثلث ساعه
وخاله تخابر
كل شوي تجيهه مكالمة لو هية تتصل
ايدي علئ كلبي لا متشوفلي جارة واضل هيج تايهه
خلصت واجتي يمي ..
ـ خابرت علئ هواي ناس جنت اعرفهم محتاجين شغالات
وعدهم مكان يلمج انتي وخواتج
بس للاسف كلهم ماعدهم شاغر
وجايبين شغالات
فـ مكدرت الكالج مكان
ـ دنكت راسي وكمت ابجي حسيت بنفسي تايهه
ـ زين خواتج شكبرهن؟
ـ نغم 8 سنين
وصبا 7 سنين
والحان 6 سنين
ـ ها .. زين يعني يفتهمن
ـ اي والله حبابات ويفتهمن وميأدين
ـ اوك .. لحضة هسة اجي
ـ راحت خاله تخابر ما اعرف عليمن
دقايق ورجعت
ـ خلص لاتبقين تبجين دبرت
ـ شلون يعني
ـ هسة خابرت ابو مهند
وتناقشت وياه
بصراحه انتي حبابة وامينة وماريد اخسرج
شوفي خاله تكدرين تجيبين خواتج هنا بين مانلكالج غير مكان تروحين بي
ـ صددك
ـ اي .. بس من هسة اكلج
ماريد هوسة
ماريد مشاكل بين الجهال
ماريد خواتج يكسرن شي بالبيت لو يلعبن ويركضن منا ومنا
غرفتج فوك من هذيج الجهه
لازم يبقن بمكانهن
ـ فرحتي متنوصف من كلتلي هالخبر
من فرحتي كمت ابجي واشهك واخيرا راح انجمع بخواتي
ـ هاي شنوو هالبجي عبالي راح افرحج تضحكين اشو كلبتيهه مناحه
ـ كمت ورحت شبكت خاله
والله خاله ممصدكة عبالي راح ننشمر بالشارع مرة لخ
ـ لا اسم الله
الله لايكولهه..
يلة كافي بجي ..
افرحي راح تنجمعين بخواتج
مسحي دموعج وكافي بجي
ـ ان شالله يارب ...
كلتلي خاله روحي حضري الغرفة من هسة حتئ من ييجن كلشي جاهز
ماكذبت خبر
صعدت وحضرت باب كنتور كامل الهن وحضرت الفرش الينامن عليهه وكمت انتضرهن دقيقة دقيقة ييجن
مر يومين وجابتهم خالة وداد
جايبة ملابسهم ومستمسكاتهم وشهاداتهم ناجحات من المدرسة
حسيت نفسي اني ناجحة مو خواتي
حضنتهن بفرحه متنوصف
لزمتني العبرة وراسا دمعت عيوني
واخيرا الله حقق حلمي و انجمعت بخواتي ابمكان بي خير
كعدت وداد وام مهند يسولفن سوية
االتمو سارة ومهند وسماور وماهر علئ خواتي
سارة راسا صادقت نغم وكامن يلعبن سوية
ماعرف شنو اسوي بهيج حاله
امنع اختي لو ابقيهه تلعب وية سارة
عزة خاف خاله متقبل يلعبن سوية
التفتت شوي خاله عليهن
وردت رجعت تسولف وية خاله وداد
زين مهتمت يعني عادي
وداد ـ ديري بالج علئ خواتج
نونة والله لو ما الشديد القوي ما اعوفهن
ام مهند ـ الله يساعدج
ـ والله ولا بخاطري ارجع الة
بس الله يعلم بحالي
حسبي الله ونعم الوكيل
ام مهند ـ اخذي حصتج من اهلج ليش ساكته
ـ منو يخليني اخذ حصتي ؟
تدرين نبيل نفوذة قوي هو دلال عقارات وعندة عرف بالمحاكم ومخلي بمكان المحامي تلاثة
ـ شنو القصة هو بكيفة قابل بابا هذا ورثج من اهلج مو فلوسة
ـ لعد ازدهار الله يرحمهه شرادت تسوي
مو رادت حصتهه وتالي شصار بيهه راحت جوة التراب وعاففت هالكوم اللحم مطشر وراهه
ـ انتي دائما تجيبين هالسيرة
معقولة تلمحين لنبيل هو مسوي شي
ـ وليش مو معقولة؟
شنو قابل نبي وميسويهه
اشو بالنذاله محد يلحكة
واحد ساقط وسافل هو وزوجته وبناته وحتئ نعيم همين مثلة
اكلة اريد حصتي يكلي ماعندج شي يمي اكلة بيناتنة المحاكم يكلي روحي واذا وصلتي عود عاتبيني
ـ هاااا
ـ شتفسرين هالحجي ام مهند
هو ورة قتل ازدهار ماكو غيرة
ـ قدمي بي شكوة ووكلي محامي هو يمشيلج بيهه
ـ خلي اشوف دربي وية ابو الجهال
والله كريم يصير خير
بس وربج تطلع بيه وبعافيتة هو وبناته وولده وخصوصا ليلئ الساقطة
ـ هواي حاقدة علئ بنتة
ـ انتي كولي يا ام مهند
الاخ اليسمح لبنتة تضرب عمتهه شتسمي ؟
مدت ايدهه عليه بوجود ابوهه وامهه ولا كال ولا حجة بالعكس بقئ واكف بمكانة ويباوع
ـ زين ليش مدت ايدهه عليج
ـ لان ضربت اختهه الصغيرة
الادبسزز غلطت عليه كدامي
كالت لابني انعل ابوك لابو امك ياكواد اتخيلي بنته الصغيرة هيج تحجي ولازم نسكت ومحد يردهه
ـ ليش ماحجيتي لابو مهند يحجي وية اخوتج
ـ يااا انتي ويين نايمة
جم مرة بمررة اخابرة ويجي عليهم ويحجي وياهم بس مااكو فايدة حتئ عمي ميكدر عليهم
ـ ها .. اشو ماحجالي
يلة علئ العموم .. الله يسهلج رجعتج وتعيشين مستقرة ومتحتاجين منية احد
ـ ان شالله
نهاوند ـ خلصت حجي وطلعت خاله وداد
اخذت خواتي للغرفة فوك
صبا ـ الله نياالج شلون غررفة حلووة
ـ هاي هسة صارت غرفتكم
حافضو عليه ولا تسوون شي مؤذي يالغرفة افتهمتو
كلولي حاضر
ااخذت ملابسهن وخليتتهه بالكنتور
اسمعوني حبابات
انتن هسة مو كلش صغار يعني تفتهمن حجي حبابات ماريد هوسة هنا ولا تركضن وتلعبن وتعيطن وتكمزن
ترة خاله تطردنة ونرجع انام بالشارع
تتذكرون
نغم ـ ليش اصلا نسيت!
ـ ااابد لاتلعبون باي شي بهالبيت ولا تدخلون ااي غرفة اااابد
تبقون بهاي الغررفة وابد لاتسون وكاحة
صبا ـ اهووو هناا همين منكدرر نلعبب والله ضجنةة ااريد العب ااركض اتوونس ووين نلعببب بكل مكان ميقبلون نلعب لعد شلوون
ـ كافي صوتج حبيبتي نصيي
لا تضلين تعيطين والله يطردوونة ونروح بالشارع
نغم ـ اتعودنة وين منروح لازم منسوي هوسة وبس اصحاب البيت يهوسون مسموح الهم كلشي يسون
بس احنة محاسبينة بشر
اكعدي صبا كافي لاتتصيرين زعطوطة
ـ كاعدة اسولف وية خواتي وسمعت خاله تصيحلي
عفتهن ونزلت اركض
نعم خاله
ـ تعالي شوي احجي وياج..
هسة صرتو 4 نفرات ويانة
يعني اكل وشرب بيت كامل تستخدمو ويانة وكذا ..تعرفين هاي كلهه مصرف وفلوس
ـ اي صح خاله
ـ فـ الراتب مالتج راح يقل مو تكولين ليش وتحجين
ـ اي خاله حقج لا ما اكول ولا احجي
ـ اي عفية ..
اهم شي لا يشخبطون علئ الحايط
ولا يسوون فد اذية وهوسة وتكسر تعرفين اغراضي عزيزة كلش عليه
وغرفة الجهال همين ماريد يدخلوهه كل شوي وملاعيبهم ترة غاليه كلش
انتي جبيرة عادي تدخلين
بس هنة صغار خاف يكسرن شي وماحب هيج شي
ـ حاصر خاله
ـ تمام عود من اتذكر شي بعد اكلج
يلة حضريلنة العشئ حبابة
ـ ان شالله خاله
وكفت بالمطبخ وكمت احضر العشة نزلن يمي خواتي راسا اخذتهن وكعدتهن بالكاع يمي ..
اااش ابد لاتتحركون
صبا ـ يعني شلون نضل هيج والله ضوجة
ـ حبيبتي والله ادري تضوجين
بس هسة اخلص شغل واصعد العب وياكم
نغم ـ اوووف
ـ كافي يابنات اتحملو شوي هسة اخلص العشة ماضل شي
الحان ـ اني جوعانة
ـ اي ياعمري هسة يخلص العشة بس اكعدي هنا وعدي للعشرة راح تشوفين الاكل كدامج
كوة كعدت خواتي بمكانهن
شلت هم شلون راح نضل هنا
وشلون راح اكدر اتعامل وية خواتي وخاله ام مهند
بدون متزعل مني ومن خواتي
خليت العشة ورجعت عشيت خواتي ونضفت المطبخ وصعدنة فوك
انطيت اغراضي لخواتي يلعبن بيهه المكياج والاتاريات وشغلتلهن راديو بالتلفون
ماعرف شلون الهيهن وماخليهن يلعبن بأغراض ام مهند
شفت نغومة ذهنهه شارد ومو طبيعية
بيدهه اتاري بس متلعب بي صافنة..
شبيج نغومة حبيبتي ليش هيج شاردة وتتصفنين
ـ مابية شي
ـ زين ليش عصبية هيج شنو صاير
ـ مابية شي
ـ زين شنو تريدين اسويلج تريدين اجيبلج اكل لو شي ..
باوعت عليه بطرف عينهه ودارت وجهه عني… نغم ليش عصبية شنو صاير
ـ ماصاير شــي
صبا ـ هسة انتي متعرفيهه
هية دائما عصبية ومعاجبهه شي
ـ حضنتهه وردت اجرهه و اكعدهه بحضني راسا دفرتني وابتعدت عني ..
نغم ـ وووخرري عنييي
ـ شبيج نغومة ليش هيج دفرتيني
ـ ماريد ااكعد بحضن احد
ـ عرفت بعدهه متأثرة من اعتداء زوج وداد عليهه ..
دمعتي طفرت من عيني ماكدرت اتماسك ..
وين اخذهه شلون احير بيه
منو يكدر يعالجهه ويطلعهه من حالتهه
احيانا اشوفهه تلعب وتضحك مبيهه شي واحيانا منطوية علئ روحهه وتبجي ومتريد بشر تصير عدائية كلش
جنت منتبهه عليهه من زمان مو طبيعيه
بس هسة اتأكدت ..
زين عاجبج اجيبلج شي
ـ اي
ـ شنو كولي وهسة اجيبلجياه
ـ اريد امي وابوية تكدرين تجيبيهم
ـ اطلبي شي معقول نغم
ـ شنو المعقول يا نهاوند؟
يلة وديني مدينة العاب
اريد البس مثل البنات البعمري وادلع علئ امي وابوية
اريد بيت مثل هالجهال العب بي واكمز وادبج ومحد يعاقبني لو يصيح عليه اني وخواتي
اااريد اانسئ الصااار وياية بسبب هذاك الحقير
تدرين من جنت اكعد وابجي ابيت جدو تكلي خاله وداد شترريدين بعد طلااك وطلكته علئ شنو تبجيين
وهسة رجعتله عااادي
وجهالهه راح يصير عدهم ااب وام ويعيشون عادي
واحنة نرجع بالشارع ننشمر ويجوز يصير بينة اكثر من الصار وياية
ااي ليش ليش بس احنة هيج يصير بينة
ليش بس احنة مات ابونة وماتت امنة
ليش محد يريدنة والكل يأذينة شنو مسووين والله ممسوين شي
ـ راساا حضنتهه
متحملت اشوفهه تنهار وتبجي كدامي متحملت اشوف دموعهه واسمع حجيه..
لاالالااا ووولج شنو هالحجيي
اني موجوودة وما اسمح لاحد يأذيكم والله العظيم اقتلة وامووته ولاا احد يتقرب منكم و ياذيكم
حضنتني وكامت تشهك وتبجي حسيتهه كلش هالسالفة مأثرة بيهه
صبا ممهتمة مو مثلهه
بس من شافتهه تبجي اجتي تبجي ويانه وكابلتنة لحونة همين تبجي علئ الواهس
كوةة هدائتهن
خليتهن يحطن راسهن بحضني وكعدت امسح بشعرهن
واسولفهن قصة عن البنية الشافت هواي اذية بحياتهه ومن كبرت صارت قوية واخذت حقهه من الظلموهه والاذوهه
بقيت اسولف الهن الئ ان نامن
خليتهن بمكانهن وكعدت يمهن
مكدرت انام بهذيج الليلة من التفكير
شصاير بنغم اكيد هية متاذية اكثر من صبا لان نفستهه تعبانة…
بس مجنت اشوفهه هيج حالهه من رحت ابيت جدو
ولو اني ماضليت يمهم هواي
بس صح جنت اشوفهه تنطوي علئ نفسهه وتكعد لوحدهه متشارك الاطفال باللعب
مر تقريبا اربع ايام ابيت خاله ام مهند واني علئ اعصابي
كل شوي اريد اضرب خواتي لان شوي وكحات
هنة مو وكحات خطية
بس يريدن يلعبن وياخذن راحتهن مديفهمن هذا مو بيتنة ولازم يكعدن ويسكتن
اني كلش مقيدتهن اخاف من خاله لا تطردنة
احس بهالايام اعصابي ادمرت من الضغط العلية وشد الاعصاب
وحتئ خواتي همين تعبن من الضغط عليهن ..
راح تصير بيهن حاله نفسية من الكبت
يشوفن الجهال بعمرهم اشكال يسوون ويلعبون وهنة محرومات اي حركة محسوبة عليهن
كلش تعبت اريد اي امل اتعلك بي واخلص ..واخلص خواتي من هالعيشة
بس ماكو اي امل
حتئ انمار الجنت متأملة بي يطلعني من هالعيشة
اختفئ
طول هالوقت منتضرة تلفون منة وكلشي ماكو
مرات اأيأس واكول نساني وين بعد يتذكرني
هو بنص الامارات واكيد شاف بنات يخبلن مال وجمال وفلوس وراح وياهن
اني شنو يشوف مني وعلئ شنو يفكر بية..
وارجع واكول هو من زمان عايش هناك قابل ماجان يشوفهن
قابل هسة علئ حظي صارن كدامة
اوووف عقلي راح ينفجر شسووي ياربي
مر كم يوم علئ هالحال
تقريبا وية الـ 11 ونص بالليل خلصت شغلي وصعدت
ذبيت نفسي علئ فراشي هلكانة من التعب لان المطبخ نضفته اليوم كلة
خواتي الله هاديهن و كل وحدة لازمة اتاري
كاعدة بمكاني و مابية حيل اشيل ايدي من الهلاك والتعب
رن تلفوني شلتة حتئ اشوف منو بلكي انمار ذكرني
شفت الرقم هذا علاء متصل عليه
هذيج الايام يتصل باوقات اني مموجودة بالغرفة فمارد عليه ..
اتذكرت كلام خاله ام مهند من تكول جاوبي وكسبي بلكي يصير نصيبج ويشيل مسؤليتج..
يئست من انمار
اكيد جان يلعب عليه
خلي اجاوب علاء بلكي صدك يتزوجني ويحير بية اني وخواتي ...
فتحت الخط واني مترددة ..الو
ـ ليش ياظالمة
ليش طوول هالفترة متردين عليه
ـ لان خواتك اذني هواي بحيجهن
ـ واني شنو ذنبي
ـ انت هم اذيتني بحجيك
لو متتذكر شنوو حجيت
ـ مو بيدي والله العظيم
كل الناس هيج يحجون علئ اي بنية تدخل السجن
ـ بس هذا ظلم والله العظيم محد لمسني ولا سوو وياية شي
ـ مصدكج والله لاتحلفين
بس شسوي العقلية التافهه العايشين بيهه
ـ و شتريد مني متصل عليه
ـ يعني شأريد
رايدج يابنت الناس
ـ انت شكيت بية يا علاء كلتلي حجي عيب ينحجي لبينة
ـ اسف واعتذر والله العظيم غصبا عني
ـ الله اليسامح ..
ـ والنعم بالله
ـ زين وخواتك شلون؟
ـ الكارثة مو بس خواتي معارضات
حتئ امي وابوية وعمامي وخوالي كلهم رافضيج ..
بس كلبي معلك يمج
ـ لعد ماكو نصيب بيناتنة لا اتعب نفسك
ـ مو بيدي ما اكدر ..
شكد حاولت ابتعد عنج مكدرت
ـ ترة انت ما شفتني غير بس مرتين شوكت لحكت تحبني؟
ـ وبهاي المرتين عشكتج
انتي الوحيدة المانطيتيني وجه
الوحيدة الثكلت عليه
ـ لعد شكد عندك علاقات
ـ اي اعترف عندي علاقات وكلهن بسهولة ييجن للطريق بس انتي غير شكل
ـ اكو مثل يكول الممنوع مرغوب
ـ اني رايدج مو راغبج اكو فرق
ـ والحل شنو
ـ مادري ..
ما اعرف الحل شنو لا تسأليني
ـ لعد ليش اتصلت عليه اذا ماعندك حل.. شتريد مني ؟ عبالك اني للعب لو للونسة! ؟
ـ لا هيج ولا هيج
بس ااريد اسمع صوتج مو اكثر
تدرين هذيج الايام الراحت
احس روحي مضيع شي
ما اعرف شنو هوة
وابد ممرتاح ابدد
لا ليلي ولا نهاري اشوف راحه
ـ وشنو تريد هسة
ـ اريد انجمع اني وياج ابيت واحد
ـ شلون اذا اهلك مارايديني
ـ مو بكيفهم
اني وحيدهم وميكدرون يكسرولي كلمة
ـ اذا صدك رايدني خلــ
ـ ااااذا صدك ؟
يعني ممصدكة بية
ممصدكة اني رايدج وكلبي متعلك بيج
ولج اسالي ام مهند شسويت بأهلي علمودج
ـ شسويت؟
ـ تعاركت وية اهلي كلهم وعفتهم طلعت بقيت يم صديقي وهمة يدورون عليه وميدرون بية وين
امي رادت تتخبل شنو ام مهند ماحجتلج
ـ لا كلشي ماحجت
ـ مو خابروهه يسألون عني عبالهم اني يمج
ـ عزة
ـ اي والله العظيم
ـ وتالي… وين هسة انت ؟
ـ لا رجعت لاهلي صار فترة
ـ زين اسمعني يا علاء
اذا نيتك وياية صدك صافية
وادور زواج بالحلال
فـ لازم تعرف اني عندي 3 خوات ومستحيل اعوفهن
ـ اي عادي بس غير خواتج يم خالتهن
ـ اي هاي قبل
بس هسة خالة وداد رجعت لزوجهه وجبت خواتي يمي
ـ وشيسوون يمج خلي يروحن لبيت جدهن مو هذاك بيت اهل امهن
ـ هنة صغار وماعدهن احد يعتني بيهن هناك
ـ وانتي تعتنين بيهن عود ؟
ـ اشو كلامك مدري شلونة
شنو مو بعينك اني لو شايفني موكد المسؤلية
ـ مو هذا قصدي
ـ ااكيد ااني اعتني بيهن
ليش انت مو اصغر من خواتك وتصرف عليهن؟
شحال اني جبيرة خواتي وهنة كلش صغار وفوكاهه ماعدنة لا اب ولا ام يحتوينة اكيد اني مسؤلة عنهن
ـ بس بيتنة مو جبير يانهاوند
وين تجيبين خواتج
ـ الميقبل بخواتي اني هم ما اقبل بي
ولا اريدة ..
خواتي ماعدهن غيري بهالدنية ومستحيل اعوفهن لو اعرف اجدي بالشوارع لخاطرهن
ـ وديهن لعمامج همة لازم يحيرون بيهم غير اهلهن
ـ ااني اهلهن ..
ومحد يحمل احد بهالوكت
وخواتي مسؤليتي مو مسؤلية احد
ـ حبيت اهتمامج بخواتج
وهواي كبرتي بعيني ..
ـ هذا واجبي تجاه خواتي وان شالله اكدر اسوي واجبي وياهن
ـ يابة صار وتدللين انتي و خواتج
يضلن وياج ومستحيل ابعدج عنهم
ـ اليسمعك يكول خلص راح تجي باجر تخطبني
ـ اي اسويهه عبالج ماسويهه
ـ سكتت ماجاوبته
لان ممصدكة الاسمعه الا اشوفة بعيني صدك جاي يخطبني
ـ ترة انتي الية ميحتاج افهمج اكثر
ـ لا تستعجل وتإملني علئ الخالي بلاش
ـ اني كوول وفعل افتهمتي
مو علاء اليحجي ومينفذ
ووج شنو مو بعينج اني
ـ وخواتك .. لو سامعهن شحجن عليه وشنو كالن ماجان حجيت هالحجي
ـ معلييج بيهن اني اعرف شلون اتصرف وياهم .. واخليهن يييجن ويعتذرن منج همين
ـ ما اعتقد يسوونهه هنية وسنية
ـ اهوو لاا تشككيين بكلمتي من اكوول كلمة متصييير اثنين اابد
ـ مو قصدي اشكك بكلمتك بس هنة صدك ميحبني ويستصغرني
ـ وطز .. المهم اني احبج وهذا كلش كافي
ـ زين شلون راح تقنعهم
ـ ام مهند الهه تأثير قوي علئ امي
واذا امي قبلت يعني ابوية وعمامي صارو بالجيب
ـ كاعدة اسولف وية علاء واجتي لحونة بحضني تريد تنام ..
لكيتهه حجة حتئ اسد التلفون وياه
ماعرف ليش كلبي ممرتاح وخايفة منه
مرة الايام علئ هالحال ..
شد اعصاب علئ خواتي خايفة لا يسوون شي وتغضب خاله
وخايفة عليهن لا هوااااي اضغط عليهن علمود لا يتحركن
نغم ابد مو علئ بعضهه ودائما كئيبة وتبجي صبا شوي اقل منهه بس نغم هواي حالتهه النفسية تعبانة
جنت احاول اخلص شغلي من وكت حتئ اكعد اسولف وياهه واطلعلهه اغراضي وتلعب بلكي تنسئ ..
وبيوم خابرني علاء وكلي اريد عنوان اهلج
وشسوي بعنوانهم؟
ـ اريد اخطبج منهم يعني شسوي بيهم
ـ ليش شنو قنعت اهلك؟
ـ اكدر اجبرهم يجون يخطبوج مو صعبة
ـ اذا مجبورين راح نتعب اثنينة ومينجح زواجنة
ـ معليج اني اتعب وياهم
وانتي الج الصافي ..
مانطيتيني عنوان اهلج
ـ موجودين اهلي
بس يكون صدك تجي تخطبني
ـ احد كلج دة العب ..
انتضر ادزين عنوانهم حتئ اخذ اهلي واروح .. يلة هسة متواعد لازم اطلع
ـ ان شالله..
ـ ما سألتيني وين
ـ ليش اسألك
ـ لانج خطيبتي لازم تسأليني
ـ هه لاتستعجل
ـ رايح لاصدقاء اعرفهم يكدرون ياثرون علئ امي وابوية وراح اتصل علئ ام مهند همين تجي ويايه تحجي وياهم
ـ الله يسهلك.. الله كريم
ـ يلة. باي حبيبتي
ـ باي
سديت التلفون وخليته علئ جهه
ما اعرف شبية
لا متفائلة ولا فرحانة ولا متحمسة لهل شي
بس معقولة اخلي يروح يخطبني من عمامي
خاف مينطوني اله
اي يجوز منال متقبل تزوجني تريدني ابقئ خدامة الهه لان هالزواجة ماراح تستفيد منهه
ويجوز ياخذون خواتي مني ويبقن يمهم
عزااا لالا ماخليه يروح يخطبني من عمامي ..
خلي باجر احجي وية خاله وهية تفهمني شسووي
صار ثاني يوم وكعدت الصبح
حضرت ريوك وخاله بعدهه ماكعدت
الجهال كلهم ريكتهم سوية
دزيت خواتي للغرفة وكلتلهن لا اطلعن صوت خاله بعدهه نايمة..
صعدن وبديت انظف البيت
اليوم الهول لازم انظفة تنظيفة قوية
بلشت اشتغل وخلصتة وطلعت علئ باقي البيت
وية ساعه 11 ونص خلصت كل البيت
كل هالوقت وخاله ماكعدت من نومهه
دقايق ونزلت سارة يمي وكعدت بالمطبخ
ها حبيبتي سارة جوعانة
ـ لا بس اريد العب وية نغم وصبا وهنة ميقبلن
ـ ميخالف حبابة عوفيهن الله يخليج
ـ ليش
ـ مو خاف تلعبون سوية واطلعون صوت عالي وتصير هوسة وامج نايمة خطية
ـ بس امي مو بالبيت
ـ شلون مو بالبيت اني كعدت ساعه سبعه ونص شوكت طلعت
ـ يوو امي من الصبح طلعت
كعدت رحت للحمام وشفته طلعت راحت بالسيارة
ـ شنو هاي اشو ماحجت شعجب ..
يلة لعد لازم اني اطبخ
فتحت المجمدة وطلعت لحم حتئ اطبخة
طبخت تشريب وتمن تاجينة
تقريبا ورة ساعه ثنتين ونص يلة اجتي خاله
طلعت فتحت الباب ودخلت
ـ ها نونة شلونكم
ـ الحمد لله خاله
ـ غديتي الجهال طبختيلهم لو لا
ـ اي خاله طبخت وكملت
ـ عفية والله عاشت ايدج
ـ اصبلج غدة
ـ لا اتغديت ما اشتهي
جنت يم بيت حكيمة انمار والبقية رجعو
ـ احس كلبي وكف من كلتلي رجع
بقيت واكفة بمكاني وانتضرهه تحجي
ـ هواي اتأخر وشتلني وياه
لو ادري هالكد يتاخر عليمن اروح من وكت جان رحت متاخر
ـ اي خاله جان انتضرتي هو يجي عليج
ـ لا مو موصيته علئ شغلة مهمة
جنت متلهفة اخذهه حتئ اكمل شغلي المتوقف صارله اسابيع
ـ مفتهمت كلامهه شنو هالشغلة المهمة مادري
عفت خاله تسولف
وسرحت بتفكيري وية انمار
ليش ما خابرني
ليش هيج هانت عليه هذيج الايام
ـ بس شنو يا نهاوند
جايبين شكل هدووم وااغرااض منااك تخبل
ـ أ منو تقصدين
ـ انمار واخوتة .. واوس واياس
صدك اوس واياس جانو وياه
ـ ااي اخذهم راحو سوية
ـ ها
ـ بس عدهم شكل ذووق بالهدوم
هواااي احلئ من ذوق انمار
شنو جايبين غراض يصفنن صدك بضاعه لووووز
ـ ليش همة تلاثتهم سافرو سوية
ـ اي ياخاله لعد واحد ورة اللاخ...
همة ميبقون بيتهم فارغ مابي رجال
فـ زوج حكيمة رجع بقئ بالبيت وياهم وهمة سافرو تلاثتهم سوية ..
ـ اها
ـ جبت جنطة من الجنط ويايه بعدهه بصندوك السيارة نسيت انزلههه
والله مابية حيل حتئ اكوم
تعرفين تفتحين صندوك السيارة؟
ـ لا والله خاله ماعرف
ـ يلة اني اروح امري الـ الله ..
ـ طلعت خاله وفتحت صندوك السيارة ورحت اني نزلت الجنطة ودخلتهه للبيت
فتحتهه خاله والتمو الجهال
نزلن خواتي وراهم واجو وكفو يمي..
صعدو فووك ليش شعدكم نزلتو
نغم ـ ملينة وطلعت روحنة من الغرفة
ام مهند ـ قربي الجنطة عليه خاله
ـ راسا قربت الجنطة
فتحتهه وطلعت منهه هدوم والعاب
صبا والحان شافن الالعاب لو اتخبلن
مو العاب عادية كلهه علئ الباتري تشتغل وتتحرك واطلع اضوية
حرت شلون الزم خواتي وامنعهن
صبا ـ بس اشوووف بسس اشووف
الحان ـ انطووني العب وياكم
ـ كافي ااصعدن فووك نغمم صعديهن فووك ..
نغم ـ ما اااكدر الهنن ميسمعن كلامي
ـ حسيت خاله ضاجت من خواتي
اخذتهن فوك ودخلتهن وعيطت عليهن ورزلتهن
هاي اول مرة اعيط عليهن وهنة يبجن
كلبي اتكطع وطفرت دمعتي من عيني بس شسوي لازم هيج اشد عليهن حتئ لا يعيدنهه وحذرتهن ينزلن جوة
الا اذا اني كلتلهن..
صاحتلي خاله وعفتهن ونزلت اركض
لميت الاغراض وصعدتهن لغرفته وصبيت غدة للجهال وكعدو ياكلون خلصو وغسلت المواعين واخذت باقي الغدة فوك بللغرفة اغدي خواتي
خليت الغدة بس ماقبلن ياكلن بس لحونة شوي اكلت
صبا ـ رجعينة لخاله وداد ماريد ابقئ هنا
نغم. ـ انجبي امداج
الحان ـ اريد العبب ليش ميصير نلعب
ـ يالله شحجي وياهن شلون افهمهن بوضعنه
بقن يشكن ويحجن واني اسمع منهن
الاكل بقئ علئ حاله ماقبلن ياكلنة
هدأئتهن شوي وضحكت وياهن
ووعدتهن راح اطلعهن للسوك بس يصير عندي مجال
نزلت الغدة وغسلت المواعين
دة اصعد وشفت خاله بالهول كاعدة تقرة كتاب..
كلت لازم احجيلهه عن علاء ما اكدر اتاخر اكثر..
رحت ووكفت يم الباب
ـ ها نهاوند شبيج
ـ خاله عندج مجال تسمعيني
ـ اي تعالي دخلي ..
شنو صاير شي؟
ـ علاء خابرني هذذيج الايام
ـ اها اي وشنو حجيتو
ـ حجيتلهه كل الحجي الصار بيناتنه..
هو كلي خاله ام مهند تساعدنة
ـ اي صح خابرني اليوم الضهر حجة شوي وكلتله بعدين نكمل لان هسة مشغولة..
تريدين الصدك السالفة مو سهلة
لان ام علاء مرية صعبة وبيدهه الامر والنهي وامراة شخصيتهه كلش قوية
اتصوري زوجهه واهل زوجهه واهلهه ياخذون بحجيهه
ـ شنو هاي
ـ اي من هذني الكويات مو سهلات
واهل زوجهه وزوجهة مو زلم خشنة يعني عادي تمشيهم مرة
ـ لعد علاء مثلهم
ـ لا علاء يختلف
مثل امة طالع همين حجايته وحدة ويامر وينهي
تدرين اني حجيت وياهه قبل يومين بس كلش رافضتج ومتتقبل سيرتج تنذكر يمهه اصلا
ـ لهل درجه
ـ شوي شوي تلين اكيد
بس تريدين الصدك
ترة علاء خوش علاء
وكلتلج اله كلمة مسموعه يم امه
اذا هو واني نكعد وياهه ونتكابل عليهة ممكن تلين لان هذا وحيدهه ومستحيل ترفضله كلمة
ـ زين خاله ..
شدكولين انطي خبر لعمامي يعني يروحون يخطبوني منهم
ـ لعد شلون خاله يبقون اهلج
ـ زين واذا ماقبلو يزوجوني
ـ ليش ميقبلون غير هذا اليردو
ـ مو اخاف ياخذون خواتي مني
ـ لعد شلون تريدين تتزوجين وخواتج وياج؟
ـ اي اني كلتله ماعوف خواتي
ـ انتي هيح راح تعمين علئ روحج
هسة احنة خلي نقنع امة وابو بيج لوحدج انوب عود نقنعهم بخواتج
ـ اذا ميقبلون بخواتي ما اقبل بعلاء شسوي بي
ـ صدك تحجين انتي ..
شبيج خاله قابل مطلكة لو ارملة حتئ ينجبر بجهالج
والله هسة حتئ المطلكة والارملة همين تعوف جهالهه وتروح تشوف حياتهه
ـ عزا مستحيل اعوف خواتي مستحيل
واذا ميقبلون خلي ننهي كلشي من هسة
لا اوصل خبر لعمامي ولا اخليهم يندلون مكاني ليش اخسر كلشي
ـ لعد شلون ياخاله تبقين هذا وضعج ؟
منو يقبل ياخذ وحدة وياهه 3 بنات
راح تبقين بالشارع ترة
ودتشوفين هنا الوضع صعب اني ماحب الهوسة وكلتلج وجودج انتي وياهن مؤقت مو علئ طول
فـ ليش تضيعين علاء من ايدج
علئ الاقل خليهن يم عمامج واتزوجي علاء وتكدرين كل فترة تروحين تشوفيهن وتشوفين احتياجاتهن
ولا تخسرين المشيتين بهالتصرفات
ـ بس اخاف عليهن يعذبوهن ويضربوهن
ـ كلنة اتاذينة بصغرنة
هواي هيج ترة يانهاوند
وهاي كدامج كبرنة ومشت حياتنة
انتي نفسج اتاذيتي وانجويتي بيدج وبالشارع بقيتي وانسجنتي وانلعب بيج طوبة وهسة الحمد لله احسن من قبل بهواي
لازم تضحين بشي
وتعوفين شي
حتئ تعرفين تعيشين بهالدنية الكشرة
اتوكلي علئ الله وخلي نقنع الاماية بيج بكلي الله يهديهه وتبدي تحبج وتالي تكدرين تجيبين خواتج يمج بعدين
هونيــــهه وتهـــون لا تعــقــديهه
فهمتي يا خاله
وللحكاية بقية………… 🥀