الحلقة الثالثة والثلاثون
#ليلة_من_فبراير
.
.
نهاوند ـ دگ عليه علاء ماجاوبت
اكثر من خمس مرات اتصل
مارديت عليه
شلون اتخلص منه هالولد
لا اكدر اغلق التلفون خاف يتصل عليه انمار
ولا علاء ديبطل
ثواني ودز مسج
علاء ـ ردي نهاوند ضروررري تردين
ـ تعبانة اريد انام
ـ جاااااوبييي
ـ استغفر الله
رن عليه وشلته
ها علاء شتريد
ـ انتي صدك مطلقة
وجنتي مسجونة لمدة شهر؟
ـ كلبي وكع واتفاجئت بكلامة
أ أ
ـ احجي لاتضمين شي ترة كلشي عرفت
اول مرة من وصلتج جنتي رايحه تشوفين زوجج ؟ موو
ـ قويت نفسي واتشجعت خلي يعرف وشنو يعني ليش اظم هالشي
اني مغلطانة ولا سويت شي عيب
ـ طالما ساكته يعني صح هالحجي
ـ اي صح
لا راح استحي ولا اخجل من الصار
رحت هناك حتئ اشوف طليقي مو زوجي
ـ ليش ظميتي عليه هالشي
ـ وشنو بيني وبينك حتئ اكلك
ـ مو كلتلج احبج ونيتي زواج وياج
ـ واني الحد هسة ممصدكة بيك
وين اكو هيج شي
شفتني مرة وثاني مرة تريد تخطبني
ـ والله نيتي جانت هيج تجاهج
ـ واذا نيتك هيج
ليش ضايج من العرفته
ـ شلون ماضوج
تعرفين شنو سجن
تعرفين شنو يعني تبقين شهر كامل بالسجن
ـ والي نقلك هالحجي
ماكلك ليش جنت بالسجن وشنو الاسباب
ـ جريمة قتل عمج ابو زوجج
ـ لا مو بس هيج..
ـ هااا يعني ااكو بعدد
شنو بعد؟ احجي لاتضمين علية شي
ـ اول شي انت كلي مين عرفت هالمعلومات عني ؟
ـ النسوان متظم حجاية بحلكهه
ـ منو هنة يانسوان تقصد؟
ـ اتصور تعرفين خواتي شنو يشتغلن
ووبحكم شغلهن هواي يحتكن بالنسوان
فماكو داعي تظمين علية
ـ منو خواتك؟
وين اعرفهن وشمدريني شنو يشتغلن
ـ معقووولة متعرفين خواتي سنية وهنية
ـ انصدمت من كلي هذني خواته
هـذني خواتك؟
صدك والله
ـ اي ليش مستغربة
اتصورت تعرفين هنة خواتي من زمان
ـ مين اعرف محد كلي
ـ يعني ام مهند ما كلتلج ؟
ـ اشو تحقق ويايه
واسلوبك مدري شلونة
وبعدين خاله مكلتلي هذني خواتك
وترة هنة يدرن بية مطلقة
اجني لهنا وشافني وعرفني
شعجب ماكالن الك هالحجي من البداية
ـ ماحجن كدامي شي
واني هم جنت ساكت هذيج الفترة
ماسولفت وياهن عنج
ولا جبت سيرة
وهنة بحكم شغلهن بهذا المحل المطلعي من البيت ميتواجدن بكل الاوقات الاكون بيهه متواجد بالبيت..
فـ بس بالليل نلتم
وهسة من قررت احجيلهن
صدمني بهالخبر
ـ ليش يصدمنك
اذا صدك تحبني المفروض هيج خبر مياثر عليك
لو صدك تحبني تجي تسألني شنو صار
ـ لعد اني شسوويت مو اااجييت دسألج شنوو صاررر
ـ اول شي لاتعييط عليه
وثاني شي مو بهالطرييقة تسأأألني
عبالك دتتحقق ويايه ومشمأز من هالخبر ومحتقررني
تجي تسالني بخووف عليه مو باحتقار
ـ لاتكبرين الموضوع
ماجاوبتيني ليش انسجنتي
ـ راح احجيلك مو علمود ابررلك لو عندي غاية وياك لاا
بس علمود تشوف نفسك شكد ظلمتني بدون سبب
انسجنت مرتين
اول مرة لان ابو زوجي اتحرش بية ودافعت عن نفسي وضربته سجينة بيدة
ـ ياساتر يارب شكد ناقص غيرة
ـ اي بايدة ضربته جريت السجينة بدون وعي وشكيت ايدة شگ
ـ والله ياعمي حتئ بنت محمد علي كلاي ماسوت مثلج
ـ منو هذا انوب
ـ هاي بنية تخوف لان مهنتهه ملامكمة
ـ الي ادافع عن شرفهه صارت تخوف بهالزمن ؟ هو هذا منطق بلة
ـ لا بالعكس عاشت ايدج زين سويتي بس متصورت يطلع هيج شي منج يعني مبين عليج نازكة ومايعه مو هيج عنيفة
ـ والله طالما مووشريف وساقط يستاهل هيج اسوي بي
ـ زين وشنو سالفة القتل
ـ طليقي جان مسافر ومن رجع ابوه استغله وخلاه يوقع علئ ورقة ضدي وتالي عرف ابوه متحرش بية وانكشف كلشي كدامة متحمل السمعه كام
قتل ابوه واخوه سوية
ـ لالا وحدة وحدة فهميني شنو ورقة شنو توقيع وليش كتل اخوه
علئ كيفج ويايه وسولفي بهدااوة
ـ كعدت سولفلته عن كلشي صار بذاك اليوم..
هسة عرفت ليش انسجنت
لان الشرطة عدهه ورقة تعهد ضدي قايمهه ابو صباح وبهالفترة هو انقتل فماصدكو ابنة قتله اتصورو اني مشتركة والحمد لله طلعت برائة ..
ـ واهلج ووين من هذا كلة
ـ يا اهل ..
اني يتيمة ووماعندي احد
والي تسميهن اهل
هذول عمامي وهمة باعوني بايدهم لابو صباح
ـ باعوج؟
ـ اي...
باعوني وبلاش هم
حجيتلة شلون باعوني وليش هيج سوو
ومن يومهه لا اتصلو عليه ولا مرو عليه وشافوني عايشة ميته
شلون عيتشي ابيت هالرجال الغريب
ولا واحد منهم مر وذكرني
هسة عرفت ليش دخلت السجن
ـ كملي كلشي لاتضمين
ـ شنو اضم؟
ـ شنو صار وياج بالسجن احلفج بالقران لا تضيمين شيي
ـ يعني شيصير قابل وياية
بس حققوو وذبوني بسجن النساء
ـ بيا طريقة حققو وياج
ـ كعدت يمهم والضابط يسألني
ـ خليج صريحه نهاوند شنو سوو وياج
ـ ماسوو ويايه شي حتئ ماضربوني
ـ نهااوند لاتسوووين نفسج متفتهمييين كلامي لااان كلامي وااضح
ـ وووين تررريد توصل بحجييك فهمني
ـ ولج مستحييل انتي بنص الشرررطة وماوااحد منهم سواالج شي
ـ شتقصد سوالي شي وضح
ـ لا تقنعيني ماواحد منهم نام وووياج لو اغتصبج
ـ نام ويايه؟
ـ احنة الشبااب كلنة نعرف شنو يصير داخل السجون بهالوكت
واصلا هالسالفة حتئ بذااك الوكت همين جانت ماشية
معقولة يطلعووج وممسوين شي وياج
ماكو وحدة تنسجن وتطلع شرريفة مملعووب بيهه مستحيل
ـ شكد كرهتهه من هيج حجة
اذا جان اكو ذرة ود بكلبي تجاهه
هسة حتئ هالذرة همين طيرهه..
ماعندي حجاية وياك
واصلا ماحجيت هالحجي حتئ ابررلك لو اقنعك
بالعكس ..
حجيت حتئ اشوفك شكد انت غلطان بس اظاهر الحجي وياك مابي فايدة..
راسا سديت التلفون بوجهه
خليت التلفون يمي وكعدت
ماعرف شسوي
احس شي بداخلي مكسور
بس ماريد ابجي
ماريد دكوعي تنزل علمود هيج واحد قذر وتفكيرة قذر
طاح حظة شلون هيج يحجي
شوف انمار اليسوة راسك
ماجاب سيرة هالموضوع ولا مهتم
خلي يولي
علئ شنو مضوجة نفس
عندي انمار يسوة راسة واحسن منة بالف مرة
مال وجمال واخلاق وحسب ونسب
ولا اهتملة ولا يمهني اصلا
خلي يولي حسبي الله ونعم الوكيل عليك
ضل يتصل عليه واني لابسته وابد ماجاوبته
كل شوي يرسل رساله واقراهه
نوبة يكتب حقي اشك بيج ماكو واخد ميشگ بهيج سالفة
ونوبة يكتب اسف الله يخليج لاتزعلين
ونوبة يكول موقصدي بس رفعي التلفون خلي افهمج
ومن هالخربطة مالته
سويته صامت بس رجاج
خاف يتصل انمار حتئ اسمعه
لكن ما كدرت انام بهالليلة
كاعدة وافكر بالحجي
ليش هالنظرة ياخذوهه عن البنية التنسجن
قابل بيدهه تدخل للسجن
غير ضروفهه الزباله جبرتهه تروح لهيج مكان
كل شوي عيني تدمع وامسحهه واشجع نفسي
ولا اهتم لهلحقير
اهم شي انمار بحياتي
هو الامل بي ان شالله
من البداية جنت ممرتاحة لعلاء
وصدك بين وجهه الحقيقي
خليت راسي علئ المخدة وحاولت انام لان اكيد باجر وراية شغل صارلي جم يوم عايفة البيت ويحتاجلة تنضيف
بقيت افكر الئ ان تعبت ونمت
صحيت ثاني يوم اشتغل بالبيت كلتلي خاله نضفي الاستقبال الجمعه عدنة جمعه نسوان
نضفت وخلصت اجوي الجهال من المدرسة وكعدت ادرسهم لليل اجئ عمو ابو مهند
ام مهند ـ يمة اجئ شيخ الشباب وتاجهم
يمة هل هلااال العيد بجيته عليية
يمةة ارروح فدوة ونذرر الغالي
فدووة نوور بيتي مرة ثاانية بجيتك
والله شوفة شلون جان اظلم يلعب النفس بدونك
فددددوة لطووولك الحلوو ااااروح
لو تدري شكد مشتاقتلك يمةةة ليلي مانامة لانك مو يمي
ابو مهند ـ والله مو كد هالحجي اني
وج عمي فقير موحمل هيج دلال ودلع
ـ يمةةة اذا ميسوون ام مهندد
مدلعك وتنغشنشك
منووو يدلعك مدكلي
ـ والله وربج صحراء بدونج
من اجي يمج ترد الروح بية واحس بروحي شباب
ـ يمةةةةة ولكم سمعوو تاج الشباب شلون يغاازلني ارووح فددووة وونذرر اني وعشيييرتي الك
نهاوند ـ خجلت من غزلهم كدامي وكدام الجهال اخذتهم وصعدت فوك رغم جانو مجلبين بابوهم خطية
بس مادري ليش فشلت من يمي
وصرت بنص هدومي
يالله مين تجيب هالحجي وتتغزل برجلهه بس شكد حلوين اثنينهن صدك لايكين لبعض..
شوي وصاحتلي اسوي العشة حضرته وكملته وتعشو لوحدهم وكعدت اتعشئ بغرفتي
طول اليوم حاولت احاجيهه بموضوع علاء بس مالكيت فرصة من شغله لشغلة وماكو وكت
مر اكثر من يومين علئ هالحال
علاء ابد ما مل من الاتصال
وكل شوي يدز رسالة شكل حتئ كمت اضوج من رسايله وما افتحهن الا تالي وكت اقراهن وامسحهن
انمار نفس حالته
يتصل مرتين باليوم او تلاثة
يسولف او يغازلني وندردش شوي ويروح
راح عمو ابو مهند وكعدنة اني وخاله ندرس الجهال بالليل
خلصنة تدريسهم
سماور نامت يمنة بالهول
والبقية صعدو يلعبون بغرفهم
ام مهند ـ نونة شيلي سمورة وديهه بغرفتهه حبابة واخذي كتبهه همين
ـ ها .. اي .. هسة
ـ شبيج نونة ..
صارلج يومين مو علئ بعضج
صاير شي .. سامعه حجاية من ابو مهند
ـ عزة لالا عمو معليه
ـ مو من يوم الاجئ ابو مهند وانتي متغيرة
دائما شاردة وتتصفنين
ـ هو…
اكو موضوع اريد اكلج بي ومدصير فرصة
ـ اكعدي .. احجيلي شنو صاير
ـ خلي اصعد سمورة واجي اسولفلج
ـ يلة انتضرج لاتتاخرين
ـ صعدتهه وغطيتهه ونزلت
طول الوكت افكر احجيلهه لخاله عن انمار همين لو بس علاء
لالا انمار كال لاتحجين..
خلص بس علاء احجيلهه عنة
نزلت وكعدت يمهه
ـ احجي شنو صاير لاتضمين شي
ـ خاله ..
اكو سالفة اني مو قصدي اضمهه عليج بس ماصار وكت احجيلج
ـ وج احجي عاد وكعتي كلبي
ـ علاء
ـ علاء! ياعلاء
ـ السايق الوصلني نوبتين
مرة لصباح ومرة لبيت جدو
ـ هااا اخو هنية وسنية ..
اي شنو شبي؟
ـ اخر مرة وصلني بيهه لبيت جدو يم خواتي ..
كلي ..احبج
ـ شنو هاي بهالسرعه ؟
شوكت لحك يحبج
ـ حجيتلهه الصار بالتفصيل شلون حصل رقمي وشلون ضل يدك عليه ويرسل مسجات
ـ ولو السالفة سريعه صارت
بس ميخالف
بلكي نكول خوووش بشاارة
يالله شكوو بيهه ولج تتزوجين وتنسترين ابيت رجال بي خير احسن من هالمرمطة يم هذا وذاك وتخدمين
ـ خاله مو بس هيج
ـ بعد شنو شصاير
ـ اني ابد منطيته وجهه
حتئ كلي اجي اخطبج من اهلج
بس اني مجنت مصدكة بي
وبصراحه اكثر علئ منو ادزة ياعم بيه خير حتئ يروح يخطبني منة
ـ وليش ماحجيتي بوقتهه جان كلتلة يجي يخطبج من ابو مهند
ـ ما صار مجال احجيلج خاله وكلتلج ممصدكته ابد..
وهمني جنت بوكتهه مقهورة من خالو نبيل
وصادف ثاني يوم رحت لبيت خاله حكيمة وصارت كل هالمواقف ويايه
ونسيت تماما احجيلج
عاد قبل يومين خابرني عصبي يكلي انتي مطلكة ومسجونة ليش ماحجيتي ليش ماكلتي اكيد بالسجن لعبو بيج
ـ شنوو هالحجي هذاا كل عقلة هيج يحجي ويااج
لالا هسة اخاابر امة واخليهه اطيح حظة
ـ لا خاله لاتسوين شي
اني لابستة وابد ماجاوبة
بس حزت بكلبي لان هيج حجئ
ـ ياخاله خليج واقعية
انتي هسة شوي كبرتي مو مثل قبل جم شهر كلسي متعرفين
ترة هذا واقع اغلب الناس هيج تفكيرهم بالنسوان
فـ لاتضوجين منة
كلهم يتصورون البنية التدخل السجن يعني سوت شي وية الضباط والبقية
ـ والله خاله ابد ماسوولي شي
ـ اعرف خاله
هية خو مو ياهي التدخل يستلموهه الا التنطي نفسهه لو مشبوهه
وبعدين لاتضوجين
يجوز الولد صدك يحبج وحجئ هالحجي بدون وعي منة
ـ بس اني كرهته وماريدة بعد
ـ لا اسمعيني مو هيح الحجي
فكري بنفسج شوي
ترة انتي مالج احد بهالدنية
اذا خواتج عدهن خاله وحدة زينة لمتهن من بين اربع خالات مدري شكد هنة
بس انتي ماعندج احد
وعادي ياخاله تسمعين هالحجي
الدنية بيهه اشكال مو كلشي لازم يعجبنة
ـ بس خاله هذا تهمني بشرفي بدون ميعرف ضرروفي
ـ زين ليش ما وضحتيلة ليش ماحجيتي
ـ لا خاله اني حجيت وفهمته بس كرهته والله يكلي ممعقولة تدخلين سجن وممسويلج شي راسا سديت بوجهه التلفون
ـ لاتضوجين خلي هالسالفة عليه اني افتهم من خواته وامة
ـ خاله ماريد تحجبن الهن
خاف عبالة ذابحه روحي عليه واني اصلا ممعبرتة
ـ ههههههه لالا لاتخافين اعرف شلون اتصرف قابل تعلميني ولج
ـ زين خاله ..
هو انتي كلتيلهم اني جنت بالسجن
ـ لا والله ابد
يشهد الله لاحاجية ولا كايلة
بس اعتقد الحجالهم مو غريب
ويمكن عرفتة منو
يمعودة مو صعب اعرف منو كلهم
بكلمتين يوكعن بلسانهن خواته وكلشي يحجن
ـ منو خااله منو تتصورين حجئ
ـ شبيج فتحي عقلج..
هنية وسنية حفافات ويطلعن للبيوت
الي ولبيت حكيمة يروحن كل فترة
أحتمال سمعن مناك جنتي بالسجن
بس لاتهتمين اني احجي وياه ووية امة واشوف شنو مية هالولد
ـ خاله والله اني ماريدة
ـ لا ليش خاله ضاهريا هو خوش ولد جادود وشاغول ومناقصة شي شكو بيهه اذا صار نصيبج
ـ اذا هو من بدايتهه تهمني هيج تهمة
شنو اترجة منة بعد
ـ لالا معليج اني ادبرهه اصبري
ـ كلبي انقبض
خاف تروح تحجي
وعبالة هالحقير اني رايدته وكاتلة روحي عليه
زين ليش هالكد دتلح عليه
والله اني ابد ماطايقته ولا ابالي
زين خلي اكلهه عن انمار يجوز تتراجع ومتروح لهلحقير
لا ما اكدر احجي هو حذرني
ميصير اجيب سيرة لاحد
اوووف ربي حلهه من يمك عفية والله تعبت
اترخصت من خاله وصعدت فوك
حسبة تجيبني وحسبة توديني
احس كلبي مقبوض وممرتاحة..
صار يوم الجمعه
بقيت طول هالايام ماجاوب علاء ولا ارد علئ رسايلة ابد
اليوم هوة يوم كعدة السنوان
اجتي سنية وهنية يباوعولي بنضرات مدري شلونهه ..
واني هم ماطايقة اباوع بوجهن مادري شبية هيج كارهتهم
يشتغلن لخاله ويباوعنلي تك عين ..
يلة لا اني طايقتهن ولا هنة طايقاتني عادي.. خلصت خالة ام مهند وكامت من مكانهه
ام مهند ـ تعالي كعدي نونة
حفو وجههه ومكيجوهه مثل هذاك اليوم
سنية ـ تدللين
لجل عين تكرم مدينة
هنية ـ والله لخاطرج وبس راح نشتغلهه
ام مهند ـ شدعوةة يابة
ليش شنو بدر منهه حتئ هيج تسوون وياهه
سنية ـ هية تعرف نفسهه شنو سووت
ـ مكدرت اسكت اكثر ...
شنو بابة شبيجن
ترة جايات بفلووس تشتغلن هناا مو بلااش
هنية ـ شفتي ام مهند شفتتي لساانهه
ام مهند ـ مو انتن مدري شبيجن وياهه
هنية ـ هية كلشش زين تعرف شبينة
ام مهند ـ يابة اذا علئ اخوج فـ هية شعليهه ترة اصلا مارايدته
سنية ـ شنو شعليهه
ام مهند رحمة الـ الله
هذا وحيدنة واشكال خطبناله
تالي بطلعتين ووياه تفر راسه فرر ويجي يصيح بالبيت احبهه واريددهةة
ـ اااافر رراسهه شنوووو
بابا عيييب علييج هاللحجي
اصلاا ااخووج مو بعيــني ولا مهتمتلةةة
ـ هوو انتي اتطوولين يبااوع علاء بوجهج شنو انتي نسيتي نفسج انتي منوو
ام مهند ـ لالالالا اضااهر ااابدا ماعدكمم احتررام الي شنوو هالحجــي
سنية ـ لاتزعلين من عدنة ام مهند احنة عشرة عمر لا اليوم ولا البارحه نعرفج بس هاي لا غيرر شكل
ـ ونهاوند همين حبابة متتخير عنكم
والبنية يشهد الله ماعدهه هيج سوالف
لو عدهه مستحيل الفيهه ابيتي
هنية ـ يمعودة ام مهند
اخوية ااابد مو علئ بعضة
ممعقولة شلون انكلب حاله
جان ميهتم للبنات
يصادق وحدة ورة شهر يعوفهه
ويروح للثانية
اشو هاي جلب بيهه ويريد زواج انوب والله امي راح تنجلط من وراه ووراهه
ـ نفسي لعبت منة بهالحجي
يعني صاحب علاقات الافندي ومسويلي نفسه شيخ
لا وفوكاهه اخته تتباهه بي
اووع شنو هالعائلة
اني عائلتي زباله وهذا هو واهله زباله
اذا نتزوج شنخلف زبايل صغار اكيد
ام مهند ـ اذا اخوج يحبهه فهذا مو ذنبهه روحي لاخوج احجي وياه يكف عنهه
هنية ـ الهه ذنب وونص
بس فهيمني ام مهند
اخذيني علئ كد عقلي
شلون من اول مرة حبهه ورادهه اذا ممسويتله شي
ام مهند ـ ههههههه شتسويلة مثلا تذبلة سحر
ـ اي ليش لاا كلشي يطلع من هيج شكول
نهاوند ـ ومنو اخوج حتئ اذبلة سحر اشو لا خلة لا اخلاق لا مال لا جمال لاحسب لانسب ااشاايفين رروحكم
هنية. ـ اااحترمي نفسج احنة لا حسب ولا نسبب لعد انتي شنووو بنت الشورااع حتئ ااهلج شامرييج وميريدووج
ام مهند ـ كااااافي اااحترموو وجوودي عييب عليجن هالحجيي
وبعديين انتن تبقن بهالعقول
وين تعرفة حتئ تسحرة واشاافت منة حتئ تسويلة سحرر
سنية ـ طالعه من السجن ومطلكة منو يكلبهه شافت اخوية كدامهه كامل مكمل
ذبت بلاهها عليه
نهاوند ـ يلة يابة علئ اساسس اخووج فد مندللة
اصلا اااني ماريدة ولا هوو بعييني و اشوفة واحد تااافه ووملطلط ولعلمممج عندي اليسوة رااااسه ونعااالة احسن منة
هنية ـ لااتجااوزين لا اااعررف شلووون اتصرف وياج
سنية ـ طبعا مطلكة وام السجون مينكدر علييج
ام مهند ـ ووولجن ااااسكتن عاااد
غضب الله علئ رااسجن
شنو هااالحجي استحن
كاافي عييب قابل بيدهه دخلت السجن غير من الظيم الوكع فوك راسهه
ـ كلبي احترك من حجيهن ولزمتني العبرة
اريد ابجي بس اتماسكت ومابجيت حرامات تنزل دمعتي كدام هذني الحقيرات
خاله ادافع عني وهنة يحجن عليه
عينهن ابد متنكسر
مكدرت اسكت اكثر
الله يبلاجن بالي بلاني بيه
ان شالله الله يسلط عليجن مثل سلط عليه عمامي واهل صباح
وان شالله تشوفن الظيم والظلم بعينجن واان شالله تدخلن سجن ويصير بيجن كل الذكرتنة انتن واخوجن عليه
وان شالله حوبتي ماتتعداجن
حسبي الله ونعم الوكييل عليييجن
ام مهند ـ روحن روحن يابنات هاي فلويجن والله وياجن بعدين نتفاهم
ـ لمن اغراضهن وطلعن الحقيرات
متحملت راسا بجيت كرامتي هواي انهانت ليش هيج ديصير وياية ربي
والله ما اذيت بشر
والله ماسويت شي غلط ليش هيج يحجن عليه قابل بيدي دخلت السجن
ـ كافي نونة لاتهتمين
لازم تتعودين علئ هيج حجي
الناس هاي طبعهه مترحم احد وتبقئ تسولف بالسالفة وتجلب بيهه
وبعدين يابنت انتي لازم تصيرين اقووئ من هيج وتلبسن الحجي باكبر حجم
اذا كل كلمة وراهه تنهارين معناهه راح تبقين بمكانج ومتتقدمين
لاتخلين شي يكسرج ابد
لا انتي اول ولا اخر وحدة صار هالضرف وياهه
صح مجتمعنه شرقي ميتقبل هيج امور بس لابد اكو شخص راح يتقبلج
خليهه ابالج بنتي الله ميظلم بشر ابد
ـ والنعم بالله
وبعدين تعالي احجييلي منو هذا اليسوة راسه ونعاله احسن منه ..
منو هذاا ولج من ورااية عندج احباب
ـ ارتبكت بالبداية معرفت شحجي متصورت ركزت علئ كلامي
اتماسكت وحاولت ما انفعل…
لـ لا خاله هاي شبيج .. صدكتي انتي
غير اريد اسكتهن ملكيت احسن من هيج طريقة شكد حقيرات شايفات نفسهن وهنة خلك حفافات واخوهن سايق تكسي
ـ ياا هههههه طلعتي مو هينة والله
يلة لعد امشي بدلي وتعالي اني امكيجج ماضل وكت راح يجون الناس
ـ حاضر خاله..
رحت للحمام غسلت وجهي
حجيهه انطاني قوة و امل
انو راح توكف ويانة اني وانمار
اكيد توكف ويانة لان هواي دافعت عني ضد هالحقيرات
اووع ليش هيج مهتمة بهالهمجيات
رشيت مي علئ وجهي واخذت عهد علئ نفسي مافكر بيهن بعد
طلعت ورحت لغرفتي وبدلت ملابس
لبست فستان قصير جوة الركبة مخصر
ردانة مو طويلة وفتحة الرقبة علئ شكل سبعه
قماشة يخبل عبالك حرير كلش ناعم وترف
ابيض وبي ورد مو كلش جبير لونين وردي وسمائي
كلش حلو اشو عجبني البسة
مشطت وشلت شعري ورحت لخاله تخليلي مكياج
ـ الله شلون حلو عليج كاعد علئ جسمج كعود
ـ صدك.. اني هم عجبني البسة
ـ تعالي امكيجج كعدي
ـ شعجب خاله هيج مهتمة بية
ـ ترة هذا طبعي وية كل الاجن اتشغلن عندي
احب يكونن مهندمات مرتبات مو مبهذلات
هواي اروح لبيوت اشوف خداماتهن مبهذلات
يابة شنو حتئ تبين خدامة وتتميز عن اهل البيت
ـ ها
ـ اي والله هيج تفكير الناس شعبالج لعد
ماكو رحمة بينهم..
بس تريدين الصدك انتي اول وحدة امكيجهه بيدي قبلج ماسويتهه ههههههه
ـ هههه..
حبيت اهتمامهه بيهه
معناهه هواي ارتاحتلي
اكيد راح توكف وياية وتساندنة اني وانمار مستحيل تصير ضدنة
مر الوكت واجن النسوان
مو نفسهن مال هذاك اليوم
اكو بيهن اول مرة اشوفهن
اجتي خاله حكيمة وبناتهه
شلون انيقات ومرتبات عزة يخبلن طالعات
اتلكيتهن من الباب بلكي انمار جايبهن بس اضاهر جايات بسيارتهن ماوياهن ولد ..
ضحكت الهن
وابتسمن بوجهي ودخلن بنص النسوان
قدمت وكملت ووكفت بالباب
كل تفكيري يم انمار
تلفوني بيدي وانتضر مكالمته
صرت مدمنة علئ صوتة وكلامة
بس للاسف ما اتصل عليه
يلة اكيد يعرف بية مخبوصة
خلصت الحفلة والكل راح
غيرت هدومي وبديت انضف
لكيت كلادة ذهب بالاستقبال واكعة اخذتهة ورحت لخاله ...
خاله لكيت هاي الكلادة بالاستقبال واكعه
ـ ياكلادة شو ..
ههههه لج هذا حجل مو كلادة
ـ والله عبالي كلادة ماعرفة
ـ لا حجل ..
بس مال منو .. مادري
ماشفت منو منهن لابسة حجل
يلة..
هسة الضايع منهه هية تخابر عليه لاندوخ نفسننه
ـ خليته ورجعت خلصت تنضيف وصعدت لغرفتي
تقريبا ساعه11 بالليل خابرني انمار
ـ اليوم اكيد تعبانة مو
ـ اي عادي هو هذا الشغل
ـ من تجين يمي الا اخليج تصيرين اميرة والخدم جوة ايدج
ـ الله عليك صدك تحجي
ـ لج عيب اني ابن عشاير ميلوك الي الجذب
ـ لا حشاك
زين انت فاتحت امك بالموضوع
ـ لمحت الهه ماحجيت
بصريح العبارة
ـ وشنو كالت
ـ تريدني اخطب وحدة هية تعرفهه وكلتله اني احب وماريد غير الاحبهه
ـ منو هاي .. المن تريد تاخذلك
ـ وحدة متعرفيهه
ـ يعني انت كلت الهه اريد نهاوند؟
ـ شلون هيج اكلله بوجهه
صدك تحجين انتي
كل عقلج امي تقبل بهيج زواج
ـ بس هية تحبني اليوم هية وخواتك ضحكن بوجهي
ـ واذا ضحكن بوجهج؟
لان يعرفنج ضحكن بوجهج
بس مستحيل تقبل تكونين زوجتي
ـ لعد ليش تخابرني وتخليني اتامل بيك
الله يخليك اني مابية حيل بعد صدمات واذية
هواي اتاذيت بحياتي والله بعد مابية حيل
ـ ولا اني اريد ااذيج ولا ناوي اذيتج
بس بعد 3 ايام اسافر لدبي
راح ابقئ هناك شهر وارجع
وما اعرف شلون راح افاركج
ـ ليش تبقئ شهر شعندك
ـ شغلي هناك ولازم اضل
لان هالفترة السوك عليه طلب ولازم استغله
ـ هووووف
ـ اوويلي تجيرين حسرة واني موجودة الله ياخذني
ـ لا اسم الله عليك.. بس شسوي احسهه مسدودة بوجهي
ـ زين تكدرين تطلعين من بيت خالتي فد ساعه زمان؟
ـ وين اطلع؟
ـ اني وياج نطلع نفتر لاتخافين
ـ وشنو اكول لخاله وين رايحه
ـ الكي الهه اي حجة
ـ مطالعه لوحدي
واذا اطلع خاله تخابر علئ علاء هو ياخذني
ـ هاا علاء
ـ اي هو سايق تكسي ..
زين وين نروح
ـ نفتر امي نفتر
مو شرط نروح لمكان
ـ مادري .. يجوز متقبل اطلع
ـ كليلهه اريد اشتري ملاابس
ـ هية تاخذني من نشتري ملابس لان ما اندل
ـ يعني سوك الكرادة متندلي؟
ـ لا
ـ خرررب لعد شلون اريد اشوفج
ـ مادري والله مادري منو يكول تخليني اطلع..
ـ خليهه اني ادبرهه وية خالتي
اكيد اكدر اقنعهه
ـ عزة خاف تعرف خاله
ـ لا تخافين شنو تعرف
اني اشوف شلون ارهمهه
واذاااا مادبررت
خلص ياعيني
يعني مالي نصيب التقي بيج هالايام
رغم راح اشتاقلج وادمر باشتياقي
بس شسيوي امري لـ الله
ـ سكتت مكدرت اجاوبة
راغبة اطلع وياه
وبنفس الوكت خايفة منه
سولفنة شوي وسدينة الخط
شكلت السماعه بالتلفون
وكعدت اسمع راديو
كل هالوقت علاء يخابر وابد ماجاوبة
احس روحي كرهته وكرهت كل شي يخصة
مرة الايام وطلعاتي وية خاله وونساتي جانت مالهه طعم
اتنغص بكل خطوة لانمار
اتمنيت يكون يمي
يوم السافر متت بجي
مابجيت هيج علئ امي ازدهار وابوية من توفو
هذا شبية انخبصت بيه مادري
رغم ممرتاحه لهل علاقة احس راح يصير شي ..بس استمريت بحبة
اباوع للتلفون وانتضر مكالمة منه
اتصل عليه يطلع مغلق
جنت كئيبة وكل شوي ابجي
وصادف هالشي وية امتحانات نهاية السنة
خاله التهت وية الجهال ادرسهم
واني بين التدريس وبين التنضيف
جنت كل يوم اخابر خواتي واسولف وياهن شوي خطية
ملتهيات بأمتحاناتهن ويدرسن لوحدهن
خاله وداد كامت كل فترة تتصل عليه وتطلب فلوس وتمر لبيت خابة ام مهند انطيهه الفلوس والهدوم اذا مشتريلة الهن او خاله جايبة هدوم لخواتي
احس بروحي متورطة ماعندي انطيهه كل فترة..
حتئ ال250 الحصلتهه من بيت خالة حكيمة نطيتهيا كلهن وبقن عندي بس 25 الف
خاله ام مهنددائما جانت تحجي علي لان انطيهه فلوس تكلي ضمي للزمن يفيدوج هالفلوس لاتبقين اطشرين بيهن
واكلهه خاله اذا خواتي محتاجات شسوي
خطية جانت متقصر ويايه ايدهه كلش كريمة متبخل بشي عليه
هالفترة هواي مشاكل صارت بين خاله وداد ونبيل ونعيم وزوجاتهم
وخطية محبوسات خواتي بالبيت وية خاله وداد وجهالهه
ميخليهم نبيل يطلعون ويتونسون ومضيق عليهم فد مرة
اخر شي سمعت ليلئ بنت نبيل نتحاوزة علئ وداد وضاربتهه
يعني بنت الاخ ضاربة عمتهه
عزة بعينهه ليلئ شكد صلفة
اشكال شفت من عملتي ماسويت مثلهه
وياريت عندي عمة مثل وداد
هية بس عمة شفاء جانت هيج وماتت
وبقت سهير الجانت تاذيني بحجيهه
بس من يوم الحادث اختفت ومامرت علينة..
خطية هيج يصير بيهه خالة وداد عود لان مطلقة ميصير تطلع واطب وتكضي شغلهه الا احد وياهه..
اجتي العطله وبعدة انمار مارجع
جنت مستغربة ليش ميخابرني مناك من الامارات ماعرف يجوز حتئ اهله ميخابرهم لازم اسأل خاله واشوف يخابر بيت خالة حكيمة لو لا ..
رجعت خاله ام مهند من يم صديقاتهه وطلعت طايرة عليهه اتلكيتهه
ام مهند ـ زين اجيتي تعالي شيلي هالجنطة
ـ حاضر خاله
ـ هاي ملابس علئ كد خواتج جبتهن من صديقاتي والله كلش حلوات حتئ بيهن من الخارج جايبيهن حرامات ينذبن
ـ دخلنة للهول وكعدت خاله جبتلهه كلاص مي وفتحت الجنطة وطلعت الملابس ..
شوفتني الهدوم شلون حلوات
بيهن صيفي وبيهن شتوي ..
بس صدك حرامات ينذبن
عاشت ايدج خاله كلش حلوات بس شلون اوديهه لخواتي
ـ خلي وداد تجي مثل كل مرة
ـ لا وين خطية ليلئ ضاربتهه ونبيل ونعيم متكابلين عليهه
ـ هاااا صدك هيج صايرر
ـ اي والله
ـ ليش ماكالت لعمهه ابو مهند مو تعرف ميقبل علئ هيج سوالف
ـ ماعرف بعد ليش ماحجت
بس خطية هواي متاذين حتئ خواتي كلس متاذيات
ـ اوووف اللهي ساعدهن وداد والجهال شلون اجواء متوترة..
يلة ميخالف نشوفلج تكسي ياخذج تودين الغراض ويرجعج قابل بس علاء عندة تكسي
ـ بقيت ساكته وشايلة هم
ـ يابة لاتهتمين.. اذا كلش اني اخذج واوكفلج بداية الشارع اخذي لهدوم لخواتج وشوفيهن ورجعي
ـ ابتسمت وكلتله ان شالله
شكد حلوة خاله دائما تهون المشاكل عليه
ـ اليوم نفضتلج سنية وهنية وامهن شلون نفضة من هاي التعجبج
ـ ليش خاله شنو صار
ـ ادبسزيات يمعودة
كلتلهن متريدن البنية تصير مرة اخوجن
عادي هذا حقجن
بس مو معناهه وين متولن تحجن عليه
ونزلت عليهن دوسة ونص خليتهن ميعرفن يحجن..
ـ عاشت ايدج خاله ماقصرتي
ـ امهات الوصخ نسن نفسهن
هنة منو وخالتهن منو وشنو جانت ..
الله يرحم هذيج الايام شلون جانن يجدن اللكمة تجدي
ـ شبيهه خالتهن
ـ فضيحتهم فضيحه يمعودة
خالتهن بنهاية التسعينات عمرهه جان 20 سنة ابوهه ماقبل ينطيهه لواحد اتقدملهه 6 مرات
بالاخير انهزمت من بيت اهلهه وياه
وتالي اتونس بيهه وحبلهه وعافهه لازواج ولا عقد ولا صخام وين تروح متكدر ترجع لاهلهه
عاد سمعنة بيهه كامت تجدي بالتقاطعات بس ماشايفتهه بعيني بس سمعت ..
عاد ورة السقوط طكت احوالهة شلون مندري
ـ يعني ماكتلوهه اهلهه
ـ يكولون مندري بيهه وين لو نندلهه نكتلهه.. بس ام علاء تندلهه وتروحلهه قبل سنتين سمعت رايحة الهه ..
يمعودة يعيبون علئ الناس وهمة معيوبين وكل العبر بيهم ..
المهم رزلتهت وريحت كلبي بيهن
ـ تسلمين خاله هواي ادافعين عني انتي
ـ لانج حبابة يانهاوند
لو من ذني الملعبات لا والله مالفيج ابيتي عليمن اجيبلي طركاعه..
بس الشهادة الـ الله ياخاله
علاء صدك رايدج
ـ شلون عرفتي
ـ شافني وحجة ويايه
خطية يبجي ويحجي
ـ خاله ماصدكة
هو وين شافني بس مرتين وبعد ماشافته
ـ الكلب ومايهوئ ياخاله
هالسوالف مو بالايد
من نضرة يبدي الحب
ـ زين شنو كلتيلة
ـ حجيت وياه كلتلة شوف اهلك شديسوون البنية كافة عنكم بس اهلك ديأذوهه
خاله سمعي كلمتي واستوعبيهه
علاء حرامات تضيعيي من ايدج
المثل يكول ظل رجال ولا ظل حايط
ـ بس اني ماريدة
ـ لان هيج سوو اهله متريدي
بس هو خوش مواصفات عندة
توالمج
وبعدين ياخاله وين تلكين ابن حلال يلمج من هالبهذلة
ـ انقهرت من حجيهه حتئ معرفت شنو اريد
ـ لاتزعلين مني اني حاسبتج مثل بنتي يشهد الله وخايفة عليج من الزمن
ـ زين خاله واهله
ـ هنا بعد هو ورجولته وفرض كلمته علئ اهله..
اذا اخو خيتة ورجال يعرف شلون يقنع اهله
واذا لا خلي يولي الله يعوضج بغيرة.. بس نصيحه مني جاوبي عليه لاتبقي هيج يتصل ويراسل وانتي عايفته
ـ ماعرفت شنو احجي
اني بوادي تفكيري
وخاله بوادي ثاني
كاعدين ودك التلفون شفت هاي خاله وداد رراسا جاوبتهه..
الو هلو خاله شلونج
ـ ياهلا بيج خاله شلونج اخبارج
ـ الحمد لله بخير خواتي شلونهن
ـ زوينات الحمد لله ..
ـ جنت خايفة لااتكلي محتاجة فلوس
كل الاملكة بس 75 الف ..
صاير شي خاله
ـ ان شالله كل. خيرر
ـ ان شالله.. زين انطيني احجي وية خواتي عفية
ـ لحظة نهاوند ..
اني مخابرتج حتئ اكلج
راح ارجع خواتج لعمامج ماكدر بعد ابقيهم يمي
ـ عزاااا لالالا خاله ليشش شنووسون
ـ ماسون شي بس راح ارجع لزوجي
وللحكاية بقية…… 🥀