الحلقة الثلاثون
#ليلة_من_فبراير
غضب أبيك، تأنيب أمك،
عتاب اخيك، عبث أختك بِأشيائك،
كلها كالوطن
لا تعرف أنه جميل إلا إذا غادرته💔
❤️
نهاوند ـ ضحكت بوجه خاله وطلعت…
صعدت السيارة و مشينه شوي
وبدة يعاتبني علاء
علاء ـ هذا كارت رصيد الج
ـ منو كلك محتاجة رصيد
ـ لعد ليش كل هالايام انتضرج تراسلين لو تتصلين وولو مسكول ادكين عليه
وكلشي ماكو منج
ـ حسيت نفسي صرت بنص هدومي من الفشلة نسيت تماما ان علاء ناطيني رقمة وينتضر اتصال مني ..
ـ ماكو داعي تسكتين اذا متريدين علاقة ويايه ليش اخذتي رقمي
ـ ومنو طلب رقمك اصلا؟
ومنو كلك اني قابلة اسوي علاقة وياك
انت نطيتنياه علمود من احتاج توصلني لمكان اتصل عليك
ما انطيتنياه لغير شي
ـ يمعودة علئ كيفج
اكلتيني وشربتيني
هو اني شحجيت غير من لهفتي عليج عاتبتج
ـ وشصير منك حتئ تتلهف عليه
ـ متصيرين مني شي
بس الكلوب وماتهوئ
ـ اكلك وين هذا محل الكيك تندلة
ـ اني وين احجي
وهية وين تحجي
شبيج حايرة ابطنج لاتخافين هسة نوصلة للمحل
ـ ترة ماحايرة ابطني بس لان ما اندل المحل وين سألتك
ـ اكلج انتي ماعندج مشاعر ابد
ـ شنو هالسؤال بلة
ـ وج والله محترك هالايام كلهه
ليل مانامة مثل البشر
مكابل التلفوون وانتضر تتصلين
ويا رقم جديد يتصل
مثل المخبل اجاوبة
ليش هيج سويتي بية نهاوند
ليش ولج والله احبج
ـ تحبني؟
شوكت عرفتني
وين شفتني حتئ تحبني
ـ ماسامعه الحب من اول نظرة
ـ لا ماسامعه
ـ سمعيهه مني لعد
ـ ارتبكت من هالحجي ماعرف شنو اجاوبة كلبي صار يدك سريع
ايدي ترجف رجف
احس كلبي راح يطلع من مكانه
راسا التفتت علئ الشباك
وكمت اباوع علئ الناس البشارع
ياربي شوكت اوصل واخلص من هذا وحجية الماصخ..
ـ اشو سكتي احجي يمعودة
ـ بقيت ساكته ابد ماجاوبته
بقئ يحجي ومن شافني ساكته هو هم سكت ..
دقايق وطبك سيارته يم الرصيف
ـ هذا هو المحل مال الكيك..
نزلي استلميهه وانتضرج هنا
ـ اول مرة راح ادخل محل فخم لوحدي
فتحت الباب وعيني علئ المحل
واجهته جامة جبيرة بيهه اشكال الكيك يخبل ويشهي
كمت اتسحب شوي شوي
خجلانة ادخل
الف سالفة اجتي براسي
يمكن هسة اكلهم خاله مو صية علئ الكيكة ويجوز ميعرفوهه
لو يكولون دفعي فلوس وتطلع الكيكة اكثر من فلوسي
خرب
يعني حرامات ادفع فلوس وخاله دافعه
زين شلون يصدكون خاله دافعه
لو يجوز يطلع غير محل وهذا الاثول جايبني عليه
وصلت يم الباب ادفع بيه اشو مينتفتح
اشوف 3 ولد جوة كاعدين وياشرون
عزة شبيهم هذول ليش يأشرون
ثواني وطلع واحد منهم
ـ اختي الباب مكتوب عليه اسحب مو ادفع
ـ عزة صخام ..
ياكاع انشكي وطميني
من فشلتي اريد ارجع للسيارة حتئ كيكة ماريد بعد
ـ تفضلي اختي جوة
ـ مادري شلون كملت طريقي ودخلت
احس نفسي صخنت من الخجل…
أأ اريد كيكة
ـ اي تدللين يانوع تريدين اختاري الشكل والحجم..
ـ اباوع علئ الكيك كلة يشهي و يبجي
صارلي شكــــــــد مماكلة كيكة جاهزة
خجلت من روحي لان اباوع ومدعرف شنو اريد ..
ها اتذكرت هية خاله موصيتكم عليهه
ـ شنو اسم خالتج ؟
ـ ام مهند
ـ اها انتي من طرف ميسون ام مهند ..
ـ اي
ـ اهلا وسهلاا بيج
هذه الكيكة الطلبتوهه ..
ـ جاب صندوك جبير خاص للكيك وفتحه كدامي
كيكة تخبل
مدورة وجبـيرة
كريمتهه بيضه وبيهه ورد لونه وردي
واوراق لونهه اخضر
ومكتوب عليه بلون جوزي
عيد ميلاد سعيد نهاوند
احس رجلية من الفرحه بعد متشيلني
هالفرحه غابت عني من زمان ورجعت بهالكيكة البسيطة
ـ تحبين نضيف عليهه شي
ـ ها .. لالا .. مادري هية حلوة شنو تضيف عليهه بعد
ـ اذا عجبتج خلص ..
رجعهه للصندوك ابني وغلفهه زين
ـ اجئ ولد ثاني واخذهه يغلفهه
ـ تحبين تاخذين نشرات نفاخات شموع
ـ اي اي عفية اريد منهن
ـ يالون تريدين وشكد عمر صاحب الميلاد
ـ 15
واريد نفاخات الوانهن حلوات
ـ تعال ابني اخذهه تشوف النشرات والشموع وباقي التجهيزات
ـ رحت وية الولد لنهاية المحل
موجود ميز وبي هالامور
احتاريت شنو اختار
لووبيدي كل شي اخذه
شنو هالاشياء الحلوة
والله حيرة شنو اشتري
بمساعدت الولد يلة كدرت اختار نشرات
دفعت فلوس الاغراض واخذتهن بعلاكة والكيكة بعلاكة ثانية
قبل لا اطلع كلي ابو المحل انتبهي لا توكع منج حرصت عليهه ولزمتهه بايدي الاثنين
شافني علاء ونزل فتحلي الصندوك
لالا ماريد اخليهن بالصندوك يمي احسن
ـ لاتخافين عمي ما اخدهن
ـ اعرف بس ماريد
ـ عنيدة .. براحتج
ـ فتحلي باب السيارة وصعدت
خليت النشرات يمي والكيكة بحضني
خايفة عليهه لا توكع لو تتفلش بالطريق
متلهفة اوصل لخواتي واحتفل وياهن
اول مرة بحياتي احس عندي استقلالية
عندي فلوس واشتري اليعجني
واصرف علئ خواتي
الله يا الله شكد حلو هالشعور
ـ ليش ساكت الحلو
ـ مابية شي
ـ عمي لا ادلغمين بوجهي والله اني خطية
ـ انت شتريد مني
ـ كل خير ..
شريد منج يعني
تصيرين ام بيتي
ـ صفنت عليه ..
يعني شنو اصير ام بيتك
ـ اسهلهه عليج يابة..
يعني نتزوج
تصيرين ام جهالي
ويجمعنة بيت واحد وغرفة وحدة
وتصيرين حلالي
ـ انت صدك تحجي
ـ ترة اني عندي خوات ومستحيل العب علئ بنات الناس
مثل ماخاف علئ خواتي اخاف علئ اعراض العالم
لان اعرف الحياة ديــن
ـ اذا صدك هذا حجيك
ومدور سوالف تعبانة
تعال اخطبني
ـ اي ليش لا ..
دليني علئ اهلج وباجر اروح اخطبج
ـ سكتت مكدرت احجي
عليمن ادليه
علئ عمامي الحقراء الشمروني
لو علئ خوالي الماشايفتهم
لو علئ علئ اهل امي ازدهار
بقيت ساكته من الصدمة متصورت راح يقبل يجي يخطب
لان هاي ثاني مرة اشوفة
شوكت لحك يحبني
لازم اكول لخالة ام مهند
اكيد هية تعرفه
ـ ماجاوبتيني وين اهلج
ـ مو وكت هالحجي علاء
خلي اوصل وبعدين افكر بهالموضوع
ـ يابة براحتج
المهم اثبتلج حسن نيتي تجاهج
لو اني العب مثل باقي الولد الموجودين جان ماقبلت اتقدملج وكلتلج خلي نتعارف اول شي
بس من كلتيلي هيج قبلت وما اعترضت
ـ كلامة ذكرني بمازن
من كلي خلينة نتعرف بالبداية
وبعدين اجي اخطبج
وتالي لا اجئ ولا شفت شكلة
ماعرف اوصف احساسي بهالكلام
فرحانة .. خايفة… مترددة ويمكن ماعندي ثقة بأحد بعد
بس مادري احس اكو شي بداخلي اتحرك ماعرف شنو هو
وصلنة ولبيت جدي
نسيت كل الحجي واخذت الاغراض ونزلت
متلهفة اشوف خواتي وافرحهن
دكيت الجرس وطلعت خاله وداد سلمت عليهه ودخلت
قبل لا تسد الباب
انتبهت ماكو سيارة علاء
خرب بالحظ شلون نسيت مانطيته فلوس اجرة التكسي شكد عيب
شفت سيارتة واصله لنهاية الفرع
ماكدرت الحكة
وداد ـ ها شبيج خاله شو صافنة.
ـ شكد عيب خاله مانطيته فلوس التكسي
ـ اكيد تعرفة ام مهند لاتخافين هسة يرجع عليج.. تعاي تعاي دخلي
ـ وين خواتي
ـ.ما كلتلهن راح تجين غير يخبصوني حتئ الليل مينامنه بعد..
دخلي وفاجئيهن
ـ شلنة الغراض ودخلنة
شفت زوجه خالو نبيل وزوجه خالو نعيم
ردت اوكف اسلم عليهم بس خاله ماقبلت..
ـ لاتوكفين لهل زبايل
كولي سلام عليكم وصعدي
ـ بالبداية خجلت هيج اتصرف وياهن
بس دنكت راسي ورميت السلام وركضت ورة خاله
الدرج يهلك من التعب طابقين نصعد شكبرة البيت وخطية شامريهم بالسطح
ماصدكت وصلنة للغرفة
و فتحت الباب خاله
شافوني خواتي وبدت الهوسة
ذبيت الاغراض علئ جهه وحضنتهن
ااالله شكد مشتاقة الجن
نغم ـ شنو هاي شجايبة النة
ـ جبتلكم كيكة جبيرة وشموع ونشرات وكلشي
صباح ـ عيدد ميلاادي
نغم ـ انجبي هذا عيد ميلادي اني
الحان ـ اني مالتي
ـ خواتي اتعاركن بيناتهن علئ الكيكة ..
خطية من يوم وفاه امي محد سوالهن عيد ميلاد
وداد ـ بدوون صياح هسة نخلي الكيك والكل ياكل
بس خلي ترتاح اختجن ستوهه اجتي
جيبيهه خاله احطهه بالثلاجة بين مترتاحين
ـ نطيتهه الكيك وطلعت الاغراض الجايبتهن.. شوفوو اشتريتلكم هدددوم
وداد ـ اااي والله عاشت ايدج صدك يحتاجون ملابس صيفية بلة لحونة وصباوي وية بناتي يتلابسن
بس نغم ماعندي حجمهه لازم اشتريلهه دائما
ـ لاتشيلين هم خاله
اعرف ثكلت المسؤليه عليج
بس ان شالله منا وهيج اني اشتري لخواتي
ـ صلوات واالله وكبرتي يبنت ازدهار
وكمتي تصرفين علئ خواتج
ـ ماعرف شلون اشكرك ياخاله لان لكيتيلي شغل
ـ الله يقدرنة علئ الخير
احجيلي شلونهه ميسون وياج
ـ حبابة كلش خوش مرية
ـ الحمد لله اهم شي مو تضوجج لو تاذيج لو تاكل حقج
ـ لا بالعكس خاله ام مهند كلش حبابة ويايه ومداريتني
ـ اي الحمد لله
كومي بدلي هدومج ارتاحي حتئ نصب الغدة
ـ اي ..
غيرت هدومي وكعدت بين خواتي
التطلعلي دفترهه وتشوفني الاملاء
والي تكلي درسيني
و الي تريد تسولف
حضنتهن وكعدت
شوكت التم اني وياهن ابيت واحد
ومافاركهن بعد..
حاولت ادرسهن شوي
بس الغرفة صغيرة والجهال هواي والهوسة متنجرع تسطر سطر
الله يساعد خاله وداد والله خلف الله عليهه حاملة خواتي وية جهالهه
ربي يهديهه دائما عليهن
خلت الغدة واكلنة
وكمت اني غسلت المواعين
ـ اي شلونج اخبارج شلونة الشغل
ـ الحمد لله بخير والشغل زين حلو
ـ متغيرة ماشالله العافية. مبينة بوجهح
ـ اي خاله كلش زينة ويايه هية وجهالهه
ـ لا مبين من الهدوم والترتيب وحتئ المكياج
ـ هههه اي كمت شوي وشي اتعلم
ـ هية هاي سوالف البنات..
اي نونة شكد تنطيج ام مهند بالشهر
ـ اليوم انطتني اول راتب 50 الف
ـ شنوووو
ترة انتي صارلج اكثر من شهر ونص يمهة شنو 50 الف ترة متسوة
ـ ميخالف خاله نعمة
ـ ياخاله الغبن مو حلو
بيت عمي جبير ويرادلة تعب ويهد الحيل يعني مدتنطيج حقج هيج
ـ لالا والله تنطيني
دائما اطلعني وياهه للسوك وتشتريلي وللمطاعم تاخذني وياهم وكلشي ممقصرة ويايه بالعكس خطية تكلي اشتري اليعجبج وتطلبلي اكل مثل اكلهم
ـ اممم
ـ والله خاله حتئ علمتني اكل بالجطل والسجين مثلهم
ـ قابل يومية انتو طالعين للسوك
ويومية رايحين لمطاعم
تدرين اليجن ينظفن البيوت بالاسبوع ياخذن 25 لو 30 الف مو بالشهر
وبعدين بيت جبير مثل بيت عمي تنضيفة يكسر الضهر
لا خاله هذا مو حقج ولا استحقاقج
حتئ لو هالخراكين هية اشترتهه
قابل شكد تريد تطلع الفلوس
متوصل حك تعبج بشي
ـ بس ممقصرة عليه بشي خاله ام مهند
ناطيتني غرفة وفراش وصوبة وحتئ نطتني هدوم ومكياج وولدهه انطوني اتاريات العب بيهن
ـ اي بالعافية ياخاله هذا حكج ما ماخذته جدية منهم
بس الحك ينكال مغببون حكج هواي
وانتي ياخاله خليج سبعه
لمي ايدج شدعوة هالصرف كلة
ـ مو مني الهدوم والكيكة من خاله
اني بس اشتريت النشرات والنفاخات
ـ اي ياخاله همين هذا صرف شدعوة انتي محتاجة وخواتج محتاجين
واني مدلحك الجهال يكبرون وتكبر مسؤلياتهم واحتياجاتهم
والبنات مو مثل الولد
كلشي يريدن ويطلبن
و هالسوالف جايبتهن متفيد
ساعه ساعتين وتروح الفلوس بالشط عليمن بعد اشتريتيهن
ضمي فلوسج ولا اطلعيهن الا للاشياء الضرورية الج ولخواتج
حتئ يخف الحمل عني ياخاله
والله من اتزوجتي مافتحت حلكي ولا كلتلج شوفي احتياجات خواتج
لان اكول مسؤلة من رجال
بس هسة لا اختلف كلشي
اشتغلتي وصار عندج راتب
ضمي منهن للزمن
وجيبي احتياجات خواتج الضرورية
شوي تخففين حمل عني..
فــلاتبقين اتلفسين منا ومنا
ـ دنكت راسي وسكتت
انقهرت من حجيهه شكد جنت فرحانة بس احس تنغصت
هية ماحجت شي خطأ بس اني صايرة ما اتحمل شي مو مثل قبل
ـ لا تزعلين خاله اني احجي لمصلحتج
ـ خاله اني ادري هذا صرف ميفيد غير ساعه لو ساعتين
بس اني بحياتي ممحتفلة بعيد ميلادي الحقيقي
دائما جانت امي تسوي بالصيف
علمود بنتهه نور الله يرحمهه
هذا اول عيد ميلاد الي اسوي بنفس الشهر ولو مو بنفس الليوم
بس حبيت اتشارك وية خواتي ووياكم
واول عيدي ميلاد اسوي من فلوسي
ويا خاله اني اكثر وحدة تعرف قيمة الفلوس
لان تلطمنة اني وخواتي بسببهن
ـ راحت لدار حقهه الله يرحمهه
ماكو داعي تحجين هالحجي عليهه
ـ ماحجيت شي خاله
ـ للعد شنو تكولين تسوي عيد ميلادج بيوم ميلاد بنتهه..
تر كل هالسوالف شكليات متوكل خبز
يعني ان جان بالشتة لو بالصيف صار ميلادج شنو يفرق
ماجانت تلبسج احسن هدوم
لو متشتريلج كيكة وتحتفل بيج
شنو قابل ماجانت تحبج
ـ خاله اني مو قصدي احجي عليهه بالعكس هية امي واحبهه اكثر من امي
ـ اي لعد كافي تعيدين وتصقلين بهالسالفة
لا انتي اول وحدة ولا اخر وحدة هيج يصير وياهه
لعد شحال اكو بنات اصلا ميسوولهن عيد ميلاد
انني شايفة الحصار شلعب بينة لعب
يمعودة حمدي ربج ولا تبقين تحجين هالحجي بعد
و خلي ابالج اني اتضايق اذا ااحد جاب سيرة ازدهار الله يرحمهه بشي موخوش
ـ حبست دمعتي بعيني وسكتت..
كمت اتضاهر بالضحك وية الصغار واني بداخلي غصة
ماقصدت احجي علئ امي
بس هية فهمتني خطأ
مكتبولي ما فرح مثل البشر
لازم تطلعلي شغلة صفح تنغصني
اخذت خواتي غسلت الهن وبدلت ملابسهن بالهدوم الجبتهه
ومشطت شعرهن وكعدن
ـ ها نهاوند نخلي كيكتج هسة لو غير وكت
ـ كيفج خاله
ـ كومي بدلي غسلي حتئ نسويلج عيد الميلاد
ـ لا خاله خليني هيج هية الهوسة للجهال مو الي
ـ يلة براحتج
ـ كمت وياهه نحضر الكيكة وعلكت النشرة وحضرنة المواعين والشموع
جنت ابد مفرحانة وواهسي كلش خربان
شكد حاولت اطلع من هالحالة مكدرت
كوة ارسم الضحكة علئ وجهي حتئ لا يبين عليه
بس الهون عليه ضحكة خواتي وفرحتهن بالنشرات والهدوم والكيكة
هو هذا الاريدة اشوفهن فرحانات
مو مهم اني
خلص صرت جبيرة واصلا عيد ميلادي مبين نحس كلما اريد اسوي تصير سالفة وتنغصني
علئ صوت خواتي وولد خالتي صعدو بنات خالي نبيل ونعيم
فتحت الباب خاله وداد
وحجت وية ليلئ بنت نبيل
وكل خواتي وواولاد خالة وداد التمو يم الباب
وداد ـ ها خير شعدكم صاعدين اليوم
ليلئ ـ سمعنة هوستكم وامي كالت مسوين عيد ميلاد وجايبين كيكة
ـ اي صح عدنة كيكة ومسوين عيد ميلاد ليش خير شتريدون؟
ـ عمة خلي ندخل وياكم
ـ هسة صرت عمة؟
هسة كمتي تصيحيلي عمة؟
ماشالله والله تطور
ـ ليش عمة
ـ عمة العمتج ان شالله
لعد منو هاي الادبسزز
الكلما تشوفني تكول لو شايفة قرد ولاشايفة هالوجه
منو هاي القذرة اذا تشوف بناتي وبنات ازدهار نازلات جوة يريدن يلعبن بالحديقة تتخبل وتطرد بيهن
منو هاي الادبسزز الممترباية
الي تكول تفو علئ العمات شكد غمات
نهاوند ـ حسيت خاله وداد دتاخذ بثارهه من بنت اخوهه ليلئ بنت نبيل
والجهال يأيدوهه بكل كلمة تكولهه خاله
ويتعاركون وياهه هية وخواتهه والبقية
ليلئ تقريبا بكدي بالعمر
بس اعرفهه من زمان كلش حقيرة ومتكبرة هية وخواتهه وبنات خالو نعيم نفس الطبع
والله اني لو بمكان ليلئ مستحيل اصعد اذا مسوية هالسوالف
وداد ـ تتذكرين من طردتو بناتي وبنات ازدهار من عيد ميلاد اختج
تتذكرون شلون هنتوهن وصعدتوهن والدمعه بعينهن
ـ هنة وكحات وطردناهن
ـ شووف الصلافةة
زين اذا وكحات شجابكم علينة ومنو دز عليكم اصلااا
يلة ولن منا انزلن لامهاتجن ولا تجن بعد
ليلئ ـ اوي وطز
امشي تبارك امشي هسة اروح احجي لامي وهية تشوف شغلهه وياهن
ـ ويطبجنن مرررض انعل ابوج لا ابو امج
نهاوند ـ خليت ايدي علئ كلبي حسيت راح انجلط من الخوف
اكيد راح يصير شي
لان هالبنية كلش شرانية
عفية خاله ليش ماخليتهه تدخل
ـ خلي تاكل تبن هالادبسزز
ادخلهه شنو
فوك شينهه كواة عينهه
حقج خاله ماعايشة ويانه وشايفة هالصلفات شيسوون وشيعملن
ولا الهن صداد ولا رداد
كله تعلوم امهاتهن الساقطات
لا عندي اخ بي خير ويربي بزرته الخايسة
ولا قابل ينطيني فلوسي واطلع وبعد ماشوف هالوجوه القذرة
ـ كمت ارجف كل شوي اتخيل الباب راح
تتفلش ويدخل علينة خالو نبيل ويتعارك
ياعيد ميلاد المصخم
شجاني وسويته هنا
لو كايلة لخالة ام مهند تاخذني اني وخواتي نحتفل شوي وين ماجان صار هيج
دقايق وصعد نبيل علينة
كلت خلص راح ننطرد بالشارع
نغم ـ نهاوند شووكت ناكل الكيكة ونطفي الشموع
ـ طفي واكلي وكلشي سوي يمعودة بس اسكتو
خليت الجهال يلتمون علئ الكيكة ورحت يم خاله وداد
نبيل ـ شبيج حاطة عقلج بعقل الزعط متستحين
ـ لا والله ما استحي لان انتو متستحووون واني من الميستحون ما استحي
ـ عيب بابا مرة شكبرج شعرضج تتلاكفين هيج وية طفلة بعمر بنتج
ـ لو هاي بنتي
اذبحهه علئ بلوعه واذبهه للجلاب ..
ـ احترمي نفسج وداز
ـ كول لبنتك ومرتك يحترمون نفسهم وتعال علمني الاحترام عود
وهسة شتريد صاعد يمنة
ـ بيتي وافتر بكيفي
ـ خاف صدكت هذا بيتك
ترة هذا بيت ابوية خاف نسيت اذكرك
ـ هالبنية شعدهه هنا
ـ جاية تشوف خواتهه وجايبتلهن كيكة ليش عندك مانع
ـ اشو لا حجيتي لا كلتي لانطيتي خبر
ـ ليش يابة احجي وانطي خبر ؟
ـ اول مرة جبتيهه سكتت عنج
بس هاي ثاني مرة تجيبيهه بدون اذن
شنو
وكالة من غير بواب
بيت تايه ماله اصحاب
لا اذن اخذتي لا نطيتي خبر
ـ هالبيت بيتــي لا تنسه روحك
ـ ههههههه
ـ بيييت ابووية يعني بيتي واجيب اليعجبني بي
ميكفي محرومة من لمة صديقاتي و معارفي لان استحي يجن يشوفني كاعدة فوك سطح بيت ابوية
ـ اي اي ود ميخالف ..
هاي شوكت ترجع
ـ شعلييك بيهه شايلهه فوك راسك
ـ خلص اشوف ارقام عمامهه وين وواخليهم يجيون ياخذوهه
ـ وبشنو ضارتك؟
نهاوند ـ سمعت هيج كلبي وكف ..
هسة راح ارجع ميحتاج تخابر احد
نبيل ـ منو يجي ياخذج؟
ـ السايق يجي ياخذني
اتفقت وياه بس اسوي العيد ميلاد وارجع
وداد ـ صار الليل خاله وين تروحين
ـ لا خاله عادي اني مو كلتلج ماناوية ابات بس اجيت اشوف خواتي وانطيهن الاغراض
نبيل ـ اي جيد وفرتي عليه ادور ارقام ودوخه الحجي وياهم..
ومرة ثانية ياوداد احترمي نفسج
ـ علم مرتك وجهالك الاحترام وتعال عليه
ـ بيج بخت مستعجل اريد اطلع
جان خبزتج خبز
ـ جرب تمد ايدك عليه والقانون بيناتنة ذاك الوكت
ـ عافنة ونزل نبيل
مكدرت اتحمل راسا كمت ابجي
جنت مشتاقة ابات وية خواتي وانام يمهن بس ممكتوبتلي
ـ وج خاله وين تروحين
ـ خليني ارجع خاله فدوة خاف يمشركم بالشارع مثل امي ازدهار
ـ ميكدر لان يعرفني اسويهه محاكم وهو الخسران تالي
ـ حضنتهه وكمت اشهك بالبجي
اتذكرت امي من جانت تروح للمحكمة وتالي انقتلت
فدوة خاله ستري علئ خواتي وجهالج ماعدهم غيرج
واني بعدني ممجمعه شي بيدي وين اخذهم..
ـ لا تخافين خاله لاتخافين اهدئي
ـ بدلت ملابسي وحضنت خواتي وبقيت ابوس بيهن
لحونة ـ اكلي كيكة
ـ جبتهه الج حبيبتي
انتو اكلوهه وشبعو
ولا تتعاركون وية احد ابد
واي شي تحتاجو كولو لخاله تخابرني واني اجيبة الكم
زين نغم فتهمتي حبيبتي
وداد ـ شالقصة خاله خاف زعلتي من كلامي
ـ لا والله خاله ابد
انتي هم الله يساعدج
حمل ثكيل بركبتج
جديات خاله اي شي يريدو خواتي كوليلي واني اجيبة
ـ الله كريم خاله الله كريم
هسة شلون راح تروحين
ـ لا تخافين عليه اكدر ادبر نفسي
اخذت التلفون وطلعت رقم علاء
راسا اتصلت بي ..
الو
ـ الو نعم
ـ اني نهاوند
ـ نهاوند واخيرراا حن كلبج
ـ تكدر تجيني هسة تاخذني لبيت خاله ام مهند
ـ بعد ساعة ويصير حضر تجوال
ـ عفية حاول تجي باي طريقة
ـ صدك جذب اجيج مشي واني الممنون
حضري نفسج وجاي عليج ما اتاخر من اوصل البيت ادكلج مسكول
ـ ان شالله..
سديت التلفون منة وخابرت علئ خاله ام مهند
ـ ها نونة شلونج
ـ هلو خاله بخير
ـ والله البيت فارغ علينة
تعودنة عليج
كلت بس اوصل البيت اخابرج
ـ خاله اني خابرت علاء السايق وراح اجيكم
ـ ها زين عندج رقمة
ـ اي انطانيا
ـ خو ماصاير شي ؟
ـ ها لالا ماكو شي بس راح ارجع
ـ همم مبين اكو شي ..
يلة انتضرج تجين ماراح اقفل الباب
ـ سديت التلفون ولميت اغراضي وكعدت انتضر
بقيت اداهر وية خواتي ماريدهن يضوجن لان شافني بدلت عرفن راح اروح
نغم ـ ليش متاخذينة وياج
ـ اني رايحه اشتغل حتئ اعيش واعيشكم وين اخذكم وياية
وداد ـ ليش خاله متريدين تبقين يمي
ـ اي اريد .. بس اريد نهاوند همين
ـ اوووف الله لا يوفقك يا نبيل
فرقت ام عن بناتهه
وهسة تفرق اخت عن خواتهة
يكون بعزيز كلبك تطلع
ربي هالجهال مابيهن حوبة
ليش الناقص يسرح ويمرح
والمظلوم شابع ظيم لو جوة التراب مطمور
ـ الله كريم خاله ان شالله تفرج
ـ خاله اخذي من كيكتج وياج
لا اكلتيهه لا ضكيتهه وهو عود
عيد ميلادج
ـ ابد ما اشتهي
هو اني جبتهه حتئ افرح الجهال بيهه…
كاعدة اسولف وية خاله وداد ودك تلفوني رقم علاء
راسا سديته واخذت جنطتي بوست خواتي وسلمت عليهم
ماخليت خاله وداد تنزل ويايه خفت لاتصير مشكلة جبيرة بينهم
نزلت الدرج وسمعت صوت ام ايوب وبناتهه يضحكن
مبين ضحكة شماته هية وزوجه خالو نعيم
ابد ما انتبهت الهن ولا سلمت عليهن
رحت فتحت الباب وطلعت
سديت الباب الخارجية وصعدت السيارة
ـ ها نهاوند خيرج خو ماكو شي
ـ لاا ماكو شي
ـ لعد مو كلتي راح تباتين
ـ عادي ..ماصارت
مالي خلك احجي وية احد
اريد اصفن وية نفسي
حاول علاء يحجي ويايه بس ماجاوبته
ـ يلة ميخالف اضاهر كلش تعبانة ومقهورة..
بس طالما رقمج صار يمي اكدر اطمئن عليج بعدين
ـ جان الشارع شوي ازدحام
ليل وكل المحلات منورة
علاء فاتح راديو قناة اسمهه اور fm
وطلعت اغنية حاتم العراقي
اشـوفـگ ويـن يـمـهـاجـر
خلص انتهيت وماكدرت الزم نفسي بعد
كل كلمة من كلماتهه تحفر بية وتعيدلي شريط حياتي المصخم كلة
اشوفگ وين يمهاجر
كلي بـ اي بلد صاير
غيابك علة العلة
عقل بالراس ماخله
يوم الهاجرت والله
انفطر كلبي وصرت شاعر
مثل طير بقفص وحدة
تبرة الشجر من عندة
غصب عنة رضئ بوعدة
زمانة شجاب وشودة
عليمن ابجي
علئ حالي لان الاسمهه امي شمرتني
لو علئ ابوية لان امي اتبهذلت وراه
لو علئ موت امي وتالي اطشرنة وراهه
لو ابجي علئ نفسي اني وخواتي من نشمرنه بالشارع
لو ابجي علئ زواجي من صباح
علئ شنو ابجي ياربي
ـ كافي تبجين والله تحفرين بكلبي حفر
ـ ماجاوبته بس امسح بدموعي
طبك السيارة ونزل يم محل
ماهتميت ولا باوعت عليه
دقايق وجابلي بطل مي وقوطية ببسي وعلاكة بيهه جبس ونساتل وحلويات
شنو هاي
ـ اعرف البنات يحبن هالسوالف ومتفرحهن غير هالسوالف
ـ صفنت عليه وعلئ العلاكة
ـ شوفي هاي علاكة لخواتي اشتريت وياح
ـ بالعافية
ـ متدرين شكد يحبن الجبس والنساتل يبووو كل خرجيتي اذبهه عليهن
ـ همست بكلبي نيالهن عليك
ـ وحدتهن حتئ لو ميتة ببجي وتشوف هالعلاكة تنكلب جهرتهه 180 درجه وضحكتهه تصير من الاذن للاذن
ـ الله يحفظهن
ـ ويحفظج غاليتي
ـ غاليتك شنو
ـ اي غاليتي واحبج
ـ عفية بلا هالكلام وصلني للبيت
ـ مناوية تحجيلي شي
ـ لا
ـ بعدج معتبرتني غريب
ـ بقيت ساكتة
رغم شكد جنت محتاجة احجي وافضض وابجي لاحد
بس مادري ليش ماحجيت شي وياه
يجوز عقلي كبر وكبرت عن قبل
احس شي بداخلي مكسور
والله تعبت من هالاحساس
شوكت تفرج واعيش اني وخواتي مثل بقية الناس شوووكت
وصلنة الفرع مال بيت ام مهند
حضرت اغراضي وطلعت الكروة
تفضل علاء
ـ شنو هاي
ـ الكروة مال الروحه والردة
ـ واصل
ـ ماكو واصل هذا حقك وشغلك
والله ترة اليوم نسيت انطيك لان ممتعودة اصعد تكسيات لوحدي
ـ ليش علئ منو جنتي معتمدة
ـ ماحبيت اجاوبة
هو غريب ميصير يعرف كلشي عني
خليت يمة الفلوس ونزلت
ـ تعااالي وووين هذاا هواااي اصبري اخذي الباقي
ـ ماعرف ليش خجلت من وكفت انتضرة نزل ونطاني الباقي ورد صعد
دكيت الباب وطلعت خاله فتحتهه
من دخلت البيت يلة راح علاء
ـ هاا ولج شصاير
ـ عادي اتعودت علئ هيج سوالف
ـ تعاي تعاي احجيلي شصاير
ـ خليت جنطتي وبعدني ماكعدت
نزلت سارة من فوك شافتني واجتي تركض
سارة ـ نهاوووند ااجتييي مهند عاامر سماوور اجتي نوونة
ـ نزلو عليه الجهال وحضنوني
ياعمري اول مرة اشوفهم هيج متلهفين عليه
مجنت اتصور يحبوني حضنتهم وبوستهم ونطيتهم علاكة النساتل اخذوهه ووضلو واكفين يمي
ـ سولفيلي شصار
ـ والله خاله ماعرف شحجيلج
بس الصار مو غريب عليه…
كعدت وبديت احجيلهه الصار هناك
ـ شووووف بلة هاي سالفة
والله هالنبيل مو سهل
مينجرع وميخاف الله
ـ ماعرف ليش يكرهني والله ما اذيته
ـ لا خاله مو يكرهج
تلكي حتئ ميعرف ملامح وجهج زين واذا يشوفج بالشارع ميعرفج
بس هيج يسوي حقارة مو اكثر
جان يحاول يضغط علئ ازدهار بيج
وهسة نفس الشي وية خواتج وخالتج
عين بني ادم متنترس ابد
بس التراب يترسهه
ـ اتمنيت ابات يمهن والله كلش مشتاقتلهن
ـ سودة عليه تريدين احجيلج وية ابو مهند يحجي وية نبيل ونعيم
ـ لالا خاله خاف ياذون خواتي لو خاله وداد ومالي خلك مشاكل خلي من بعيد اطمن عليهن..
ماريد تخرب علاقتي بخاله وداد لان هية اصلا اليوم اخذت علئ خاطرهه مني
ـ ليش شسويتي
ـ حجيتلهه الصار بالتفصيل
والله خاله ماقصدت احجي علئ امي ازدهار اصلا احبهه اكثر من امي الجابتني
بس اني جنت اتمنئ اسوي عيد ميلاد بيوم ميلادي ماطلبت شي مستحيل
بس سبحان الله كلما اريد اسوي ميصير وتطلعلي مشكلة
ام مهند ـ شدعوة عليهه هيج صايرة حساسة ماحجيتي شي غلط
ـ مييخالف ارجع واكول حقهه هية اختهه ..
اني هم ما اقبل احد يحجي علئ خواتي
بس اني مادري شبية
صايرة ابد ما اتحمل كلمة وراسا انقهر وانغث
هية صح نصحتني بس شوي بطريقة قاسية
واني عبالك ماصدكت وكلبتهه مناحه ووراهه صار اليصار
ـ شنو صار بشنو نصحتج
ـ كلامهه صح مو خطأ
كلتلي لااتلفسين فلوسج
وضمي من الراتب وجيبي الضروريات لخواتج حتئ تعينيني
بس كلتلج اني الخلل بية صايرة ما اتحمل كلمة
ـ ليش ما كلتيلهه هذا من ام مهند
ـ كلتلهه.. بس لان اشتريت نشرات وشموع ونفاخات هيج حجت
ـ علئ هذني؟
ـ اي والله خاله علئ هذني
اني اعرف هالسوالف تضيع الفلوس
بس اني مو يومية محتفلة ومشتريتهن
وكلتلج اتمتنيت اسوي هالعيد ميلاد..
يلة اهم شي خواتي فرحن مو مشكلة
ـ شفتي مو كتلج اهم شي الفلوس
هو هذا البشر
ميكول بالعافية للفقير
لا راسا يكلة مينلك
وشدعوة هالكد تصرف وانت ماعندك ولازم ينغصة
بس لو غني ويصرف مليار
الكل يكلة الف عافية هني ومري
يلة علئ العموم لا تهتمين خاله
اهم شي شفتي خواتج واطمنتني عليهن
ـ اي الحمد لله..
اسويلكم عشئ خالع
ـ احنة تعشينة ابيت صديقتي
اذا جوعانة شوفيلج شي الثلاجه
بيهة خير من الله شوفي شيعجبج واكلي
ـ لا ابد ما اشتهي ..
تحتاجين مني شي خاله اروح انام
ـ لا اخذي راحتج خاله
ـ اخذت غراضي وصعدو الجهال ويايه
رادو مني اروح لغرفتهم والعب وياهم بالاتاري بس مقبلت لان كلش تعبانة
رحت لغرفتي بدلت وشمرت هدومي
ورديت كعدت ابجي
احس مخنوكة وضايكة الدنية بعيني
كلبي ماخذني علئ خواتي اتخيل وجوهن وابجي
اخذت التلفون وخابرت خاله وداد طمنتهه وصلت وكلتله اريد احجي وية خواتي
حجيت وية نغم وصبا وصلت للحونة وغصيت بالبجي
لان صغيرتنة روحي رايحه وياهه
هية تحجي وتسولف متدري بية ابجي
ماطولت هواي بالحجي خاف الرصيد يخلص شلون بعد اسمع صوتهن
سلمت عليهن وسديت التلفون
اتمددت بالفراش احس جمسي مكسر انتبهت علئ التلفون جايتني رساله
فتحتهه لكيتهه من علاء كاتبلي
اجمل يوم بحياتي هو اليوم
واشكر الضروف السيئة الخلتج تتصلين علية واحصل رقمج
قريت الرساله واستغربت منه بلة هذا كل عقلة هيج يحجي يحمد الله علئ الضروف الزباله يابة ليش لان خابرته شكد فارغ هالولد
دقايق واتصل عليه
ماشلته مالي خلكة
اكثر من 5 مرات يتصل وما شيل التلفون
ااضاهر ضاج ودزلي مسج
ـ عمي ردي والله ما اكل بشر
ـ شتريد ليش تخابر
ـ يعني شأريد يمعودة اريد احجي وياج
ـ بشنو تحجي
ـ هسة رردي عليييه وتعرفين بعدين بشنو ارريد اااحجي
ثواني ورد اتصل
الو
ـ يراد هلولهه والله لو اعرف اهلهل جان هلهلت
ـ شتريد علاء
ـ صوتج يخبل بالتلفون
ـ يعني خابصني ادك بالتلفون علمود تكول هالكلمتين
ـ يابة ليش عصبية
ـ عفية علاء كلش تعبانة والله ومالي خلك روحي
ـ منو زعلج
احجي نونة ليش هيج حالج
ليش هالبجي
ليش دائما حزينة
اتمنئ اعرف كلشي عنج
ـ ضايجة وماطايقة روحي
ـ زين نبدي وحدة وحدة
هذا البيت الرحتيلة اليوم بيت منو
ـ بيت جدي اهل امي
ـ هاا هذا البيييت الجبييير الكشخةة اليخبل بيت جددج
ـ اي
ـ ياجد منهم
ـ امي..
ـ لعد ليش تتشتغلين عاملة ابيت ام مهند اذا هذا بيت جدج!
ـ اهل امي الربتني مو الخلفتني
ـ ليش ابوج ماخذ نسوان اثنين
ـ اي
ـ نچرررر والله
ـ تعتبرة نجر لان اخذ اثنين نسوان
ـ وج عمي منو يدبر اثنين نسوان هية وحدة وممحصليهه
ـ سكتت ماجاوبته
بلة شنو هالعقل هذا شكاعد يحجي
ـ اي وانتي من الثانية لو الاولئ
ـ الاولئ
ـ عندج اخوة خوات
ـ 3 خوات
ـ من ابوج وامج
ـ لا من ابوية
ـ يعني انتي وحيدة امج
ـ اي
ـ اشو كوة تحجين من ورة خشمج
ـ لا مابية شي
ـ اذا تعبانة نكمل حجي غير وكت
ـ ياريت كلش تعبانة والله
ـ اوك براحتج حبيبتي
تصبحين علئ خير
ـ تصبح علئ خير…
راساا سديته
ولفيت راسي ونمت
صار ثاني يوم وكعدت سويت ريوك للجهال طلعو بديت انظف مثل كل يوم
روتين ماكو شي جديد
ـ نوونة الحنوونة
ـ ها خاله
ـ عيوني حبابة
خابرت اختي حكيمة راح يجي ابنهه ياخذج تروحين تنضفين بيتهم بأجر
تنطيج 100 الف
ـ 100.. اغراني هالسعر احس رجع النشاط بية
ـ اي خاله بس شوي بيتهه وصخ يرادلة وكت
ـ يعني شلون يجوز مالحك
ـ اكيد متلحكني مستحيل يخلص بيت حكيمة بنفس اليوم تحتاجين اقل شي 3 ايام .. بس لاتخلين ابالج حكيمة كريمة وتمطر فلوس عليج مطر
يلة حضري نفسج حتئ تروحين
ـ حاضر
صعدت اخذت ملابسي خليته بجنطة صغيرة وبدلت
خليت شوي كحلة وحمرة
حضرت نفسي وكملت ونزلت
ـ اي زين كملتي هسة يجي ميتاخر ..
بس نونة انتبهي ترة حكيمة نحسسسسسسسسسسة كلش نحسة فـ انتبهي علئ الغراض علئ كييييفج وياهن
شكد متتاخرين مو مهم اهم شي متكسرين شي ولا تتلفين شي
ـ حاضر خاله
كاعدني نسولف ودك هورن
طلعنة اني وخاله للباب
ام مهند ـ ها ولگ انمار شبيك مستعجل انزل سلم عليه حقيير
انمار ـ ماعندي ووقت عندي موعد يابة يلة وين البنية
ـ يلة خاله يلة استعجلي
ـ طلعت للسيارة ردت افتح الباب الورة واصعد
انمار ـ لالا وووين تعال كعدي يمي
ـ استحي اكعد يمة خاله
ـ يمعودة ليش تستحين هذا مثل اخوج يضرج احد يكعد ورة وهو يسوق يحس بنفسة سايق ويتخبل ...
ـ فتحتلي الباب خاله وصعد بالصدر كعدت
سلمنة عليهه ومشينه..
طلعنة الفرع وداس بالسيارة احس كلبي وكع من الخوف
بس الكعدة بهيج سيارة تحسس الشخص صار هيبة واله قيمة ماعرف اشو هيج حسيت
لا نحس بطسة لا نسمع صوت برة
انمار ـ يابة الله بالخير
ـ معرفت شحجي ارتبكت منة وكلتله
... زينة الحمد لله
وللحكاية بقية………….. 🥀