الحلقة السادسة والعشرون
#ليلة_من_فبراير
علّمتني الحياة
أنّني عندما أفرح أظهر فرحتي لأسعد بها من حولي،
وعندما أحزن أواري حزني كما يخفي الربيع آثار الخريف،
وعلمتني أيضاً أن أكون مثلها وأن أرتدي ثوب الطهر والعفاف،
وعلمتني الحياة أن أكون ناعمة مثل أوراقها وصلبة كالجذور،
وخشنة كالساق، وطيبة كالعطر،
وعلّمتني أن أكون كالتربة الخصبة أعطي من يزرع ثمر
دون انتظار المقابل
❤️
نهاوند ـ صار تقريبا شهر ماشفت الشارع
احس نفسي ضايعه وتايهه
اريد ابجي
بس ماعندي دموع
ولا بية حيل ابجي اصلا
وين اروح وشسوي
مادري
طلعت برة المركز
اباوع علئ الناس بالشوارع
احس نفسي هواي تغيرت
مو ذيج نهاوند الجبانة والمرعوبة من كلشي
احس نفسي صرت شخصية جديدة
اني نفسي ماعرفهه
ولامقابلة هالشخصية بيوم من الايام
بديت اتمشئ بالشارع لوحدي
اول مرة امشي لوحدي
احس ماعندي ثقة بنفسي
حتئ مشيتي اتلعوج بيهه
حاطة هالعباية علئ راسي
وحايرة شلون اشيلهه وامشي
خلف الله علئ البنات الي بالسجن
نطوني هالعباية
لو تبقئ علئ اهلي لو اهل صباح
اضل بالدشداشة تايهه..
وصلت راس الفرع مال المركز
وطلعت علئ الشارع
سيارات كلش هواي موجودة تقريبا ازدحام والسير يمشي بطيئ
حايرة بنفسي وعندي شوي خوف من المجهول
افكر وين اروح وشلون اتصرف
ماعندي فلوس
بس هالخمسين الف
ووياية ورقة طلاقي
واوراقي الثبوتية
مشيت علئ الرصيف
اتفرج علئ هالناس
شكد حلوين
الشايل ابنة ويمشي
واللازمهه بناتهه وتريد تعبر الشارع
واليمشي وية زوجته ويضحكون
والحاير يبيع للناس لفات فلافل
اووف والله جوعانة بس ماريد اصرف خاف تخلص الفلوس واتورط ومادري شسوي
خففت يمي سيارة وفتح الباب
ـ تعالي اصعدي
ـ باوعت عليه ما عرفته
ماشايفته من قبل
زين ليش يريدني اصعد وياه
ابتعدت شوي عنة
ورحت بعيد علئ الرصيف امشي
متلفلفة بعباتي واباوع
هذا شبي ابو السيارة لزكلي
شيريد مني خاف مشبه عليه
معقولة يعرف عمامي لو يعرف صباح
يجوز شايفني وية صباح امشي
والله مادري ..
اكلك انت شتريد ؟
ـ دتعاي صعدي وبعدين نتفاهم
ـ ليش انت تعرفني
ـ أ أي أي شلون ماعرفج
ذاك اليوم وصلتج بالسيارة
ـ شوكت ذاك اليوم؟
ـ قبل جم يوم شبيج متتذكرين شدعو هيج تنسين جنتي انتي ومرة جبيرة وياج
ـ باوعت عليه بأستغراب ..
بس اني قبل جم يوم جنت بالسجن مو بالشارع
ـ شلوووت سجننن .. ااالله
ـ اخترع من كتلة جنت بالسجن
عاط وصرخ االله
وسد الباب وراح يمشي بين السيارات
اعرف الناس تخاف من تسمع سيرة السجن..
محد يهتم بريئة لو لا
المهم دخلت سجن وتلوثت سمعتهه
بقيت اتمشئ ماعرف وين اروح
بس رجلية هية تاخذني وتمشيني
امشي بية ..
ااباوع بالوجوه
بلكي اشوف احد اعرفة
لالا ان شالله ماشوف احد اعرفة ماريد ارجع تحت رحمة عمامي ومنال..
ياربي وين اولي
اريد اسبح كلش وصخة
من يوم الدخلت السجن ماسبحت
اريد اكل اريد اشتهيت الاكل ميتة جوع اكل السجن يلعب النفس
اريد انام وابدل هدومي الوصخة هاي صارلي كومة بيهه
ماعرف وين وصلت يمكن نص السوك
ماجاية لهيج مكان قبل
اكو هواي محلات ومطاعم وناس خبصة
حاولت اركز معرفت هالمكان
مو نفس المكان الذبوني بي عمامي اني وخواتي هذا يختلف عن هذاك المكان
شتميت ريحه الاكل ردت ابجي
لا بعد ماكدر متت جوع
كفخت بخشمي ريحه الفلافل
متت عليهه عبالك كص لحم لو همبركر مو فلافل
رحت وكفت يم المحل واباوع
ـ ها خير ليش واكفه هنا
ـ أ أ عمو جوعانة
ـ اذا دتجدين ياعمو
ترة اني مجدي اكثر منج وفلس ماعندي روحي لغيري رووحي
ـ لا مو
ـ روحي عمو روحي لخاطر الله
روحي بعيد مناااا
كافي جدية مامليتوو
ـ متت خجل من الناس الواكفين
كلهم كامو يباوعون عليه
راسا ابتعدت عنة حتئ مانطاني مجال اكلة عندي فلوس اني ماجدي
اسمعه يحجي وية الواكفين يمة يكلهم
المجادي ترسو الشوارع ..
اذا واحد تنطي لفة لوجه الله يلتمون عليك مثل الذبان ماعرف مين يطلعولك وهو اقل واحد بيهم يوميته اكثر من يوميتي
دنكت راسي من الفشلة وبقيت امشي احس الدنية كلهه عرفت شكلي وتباوع عليه ويكولون هاي المجداية..
وصلت ترفك لايك ومفترق طرق منا سيارات راايحه ومنا سيارات جاية ومناك سيارات تريد تعبر وصايرة الناس هوسة
كل سيارة تريد هية تمشي وصاير السير ازدحام
ماكو شرطي يمشيهم
ولا اشارات المرور تشتغل
بقيت واكفة بمكاني
زين اني وين رايحه
خلص الشارع واني اتمشئ
مادري شسوي ..
خلي اعبر والله كريم
وين متاخذني رجلي امشي وياهه
عبرت الشارع بالكوة السيارات واكفات بشكل مخربط والهورنات كل شوي تفززني
حسيت نفسي راح اندعم بهالسيارات الواكفة
اشكال الحجي سمعت منهم
اليغلط عليه ويكلي ثولة انتبهي
والي يكلي مبين عليج عاشكة وهيج صاعد الثول عندج
والي يذبلي كلام مو حلو كلة غلط وفشار وعيب ينحجي اصلا
ماعرف هالناس ليش هيج تفكر
شمدريهم شنو ضروفي حتئ يحجون هالحجي عني
عفتهم وعبرت
وكمت امشي سريع بس اريد ابتعد عن عيونهم
الجو بارد
ومستحيل انسة هاليوم بحياتي
8/1/2007 الجمعه
ولو هية هواي ايام بحياتي
ماكدر انساهه
اتلفلفت بالعباية من البرد
شفت من بعيد اكو محلات وناس ملتمين
يمكن همين اكو سوك هناك
ما اعرف ..
مشيت سريع ووصلت يم مطعم بي كراسي وطاولات جوة واكو عائلتين كاعدين ياكلون ..
اووووف الرريحة اجتي بخمشي يمكن هذا همبركر يمكن لحم مادري ..
وكفت يم المطعم بس جنت متحضرة بس يحجي اكولة عندي فلوس اني مو مجداية
ـ تفضللي
ـ عندي فلوس والله مو مجدية اني
ـ ياستار يارب منو جاب سيرة الجداوة.. شبيج عمو
ـ عمو جوعانة واريد لفات منك
ـ تريدين تدخلين جوة تاكلين
لو تريدين لفات وتروحين
ـ حسيت بنفسي تعبانة مبية بعد اوكف وامشي ..
زين يعني هو نفس السعر لو اغلئ
ـ ههههه لا الج نفس السعر ..
تعاي دخلي علئ هذيج الطاولة كعدي
ـ ابتسمت ولفيت عباتي ودخلت
جنت مرتبكة كلش
هاي اول مرة ادخل مطعم
خجلانة ومستحية وخايفة وشايلة هم شلون راح اكل كدام هالناس ..
بس انجبرت شسوي
جلبت بالعلاكة مالتي بايدي الثنين
خاف تضيع لان كل ثروتي بيهه..
رحت كعدت بأخر طاولة موجودة
استحي اكل كدام الناس
احس الدنية كلهه تباوع عليه..
اجئ ولد شاب غير هذا الحجة وياية ووكف يمي
ـ تفضلي تشريدين تاكلين
ـ مادري انتو شعدكم اكل
ـ كلشي عدنة شتريدين انتي
ـ اريد اكل مو غالي بس بي لحم
ـ يعني مثل شنو بالضبط
ـ مادري لان ماعرف شنو عدكم
عافني الولد وراح وكف يم هذاك الرجال حجئ وياه ..
رد رجعلي وكلي
اكو كبد وتكة وهمبركر واكو كص واكو فلافل اسويلج منهم تشكيلة تكلفج 15 الف
ـ اي اي ميخالف جيبلي
ما استوعبت الحجي
بس ردت يجي الاكل
تقريبا عشر دقايق اتأخر
احس نفسي راح يغمئ عليه من الجوع يريبي ولو خبزة وينكم
اايه واخيرا اجئ بيدة ماعونين ولفتين وخبز وجطل وبطل مي وقوطية سفن ومدري شنو بعد
خلة المواعين يمي وراح
كعدت اريد اكل الناس كلهه بوجهي صايرة..
كمت من مكاني وكعدت علئ الكرسي المقابيلي
صار ضهري عليهم ووجهي للحايط ..
رغم اعرف ايدي وصخة بس ما اهتميت مديت ايدي وككت ااكل ..
اكلت اكل مو طبيعي فوك طاقتي
كلت حرامات يبقئ واعوفه هنا يذبو
خلصت كل المواعين والخبز وكمت ..
رحت وكفت يم الولد وكلتلهم ..
المن انطي الفلوس
ـ 15 حسابج
ـ اي.. طلعت 25 ونطيته ورجعلي 10
ـ اذا تريدين اكو مغسلة هناك ورة البردة
ـ بيهه تواليت
ـ لا ماعدنة
ـ عفته ورحت ورة البردة لكيت صابونه اخذتهه و غسلت وجهي وايدي يمكن 10 مرات افرك وجهي وايدي واشوف نفسي وصخة بعدني..
طلعت برة المطعم
ووكمت اباوع ماعرف وين اروح
يلة خلي امشي من هالاتجاه وااله كريم
ماضل عندي غير 35 الف ..
شسوي بيهن وشنو يكفن
اني صوجي هواي طلبت واكلت
لو ماخذتلي لفة فلافل ب500 دينار مو احسن من هالصرف
بس والله جنت مشتهية بي لحم شسوي اوووف يالله شوكت تفرج
طلعت التلفون وكمت افرفر بي
عليمن اخابر مادري
هو اصلا مابي ارقام هواي
بس رقم خالة وداد وماوية وريتال
حتئ رقم خاله ام حسين مادزته الي وداد بس ماعندي احد غيرهه ..
منو يلفيني
كلش مترردة اخابرهه
مادري ليش
لا والله ادري علئ شنو اجذب علئ روحي ..
كلش زين اعرف خالو نبيل ميريدني واكيد راح يسويلهه هوسة من يشوفني
خلي هسة خواتي عايشات وياهه
علئ الاقل احسن مني اني لايجة بالشوارع هيج مادري وين اولي ..
بقيت اتمشئ واتفرج علئ محلات الهدوم
يالله شكد حلوات
شيصير لو اني البس منهن
شلون الوان شلون موديلات تكعد علئ جسمي
ويمهه محل جنط واحذية
اباوع ومتعجبة علئ الاشوفة
حتئ من جنت اطلع وية صباح
ما اشوف بهيج تركيز
اخاف لايسويلي مشكلة
او ينقهر لان ماعندة فلوس يشتريلي
بس هسة اباوع بحرية محد فوك راسي يحاسبني
من الشفتة حسيت بنفسي صدك معايشة ولا اشايفة دنيا
الوكت شتة والعصرية تبدي من ساعه 2 ماكو ضهر راسا صبح ووراه عصر
الجو يخبل صح بارد بس حلو
والناس بدت تكثر بالسوك وتطلع تفتر
خايفة اضل بالشارع هيج وحدي
وكارهه ارجع لاحد من الناس الاعرفهم
كارهه ادخل بيت احد وانذل مرة ثانية
اريد ابقئ افتر واشوف هالناس شلون عايشين وشلون يشترون كلشي يريدو وييتمنو وحياتهم حلوة
مو مثلي خلصتهه من ظيم لظيم واني بهالعمر بعدني..
اباوع علئ الجهال الوية اهلهم شلون يددلون عليهم اتذكرت خواتي خطية عليمن يدللوون بعد
اكيد ميكدرون يدللون علئ خاله وداد هية هم خطية وعدهه مسؤليات كومة براسهه ..
عيني اجتي علئ هالناس التوكف يم محلات الهدوم ووياهه بناتهه وتختارلهه وتعامل وتشتري ..
اباوع واتحسر شكد حلو العدهه ام واب خيمة علئ راسهه ويدللوهه..
ماكدر اوخر عيني عنهم مادري ليش اضل اباوع عليهم..
ـ هييي انتي شبييج
ـ مـ مـ مابية شي
ـ ترة مبيين عليج ناووية تبووكين
من بهذلتج وعبايتج الوصخة وكلهه تراب وولاعباالج اني فقيرةة وما افتهم هالسوالف و هالحركات..
ووخري من يمنةة لا اجيب عليج الشررطة واخليج بالحبووس تنامين
ـ سمعت تريد تجيبلي شرطة
كمت اركض بس اريد ابتعد عنهم
شبيهم هالناس شدعوة عليهم
الي يكلي مجداية
والي تكلي حرامية تريدين تبوكين
ليش هيج يحجون ويايه
شنو شافو مني وهيج يتهموني
مشيت الئ ان رجلية اتكسرت
التفتت علئ محل هدوم كلش جبير
وهواي ناس داخلين بي
ماعرف ليش اخذتني رجلي ودخلت بي
اول ماوكفت يم ملابس مالت طلعه قمصان وتيشيرتات وتنورات وبناطيل
صارت مراية كدامي بطولي
باوعت عليهه واتفاجئت من شكلي
صدك طالعه اخوف حقهم يكولون هيج عني
العباية تسحل بالكاع ومتربة وصايرة كلش وصخة..
اشوف هالناس شلون مرتبين ويمشون واني بينهم مسحسله واخزي
خجلت من روحي
وانقهرت علئ نفسي
لميت عباتي وطلعت اركض منهم
راح يصير الغروب
لازم اخابر علئ خاله وداد
وين اروح
اخذت التلفون ودكيت عليهه
طلع ماعندي رصيد..
يلة هسة اشتري شسوي
قبل لا اتحرك سمعت صوت مو غريب عليه عبالك سامعتهم واعرفهم
التفتت علئ هالاصوات ..
شفت خمس بنات ووياهم طفل
وامهم وابوهم واكفين يم محل الاحذية والجنط ..
عزة هذول بيت عمي ارشد كلبي وكع للكاع خفت لايشوفوني ويرجعوني وياهم وارجع للعذاب
بس شنو هالصدفة الغريبة الجمعتني بيهم ..
راسا غطيت وجهي بالعباية
وبقيت بس عيني طالعه
ماكدرت اتحرك من مكاني
عيني راحت عليهم
اشوف ارشد شلون يدلل بناته وشلون يعاملهن..
خصوصا هاي همسة الحقيرة المنانة
الي أتمن عليه بهدومهه وتتنكس مني لان لبستهن..
شوف يالله شلون واكفة وتتعزز علئ ابوهه وامهه
ردت اروح وابتعد عنهم بس رجلية ماساعدتني ..
بقيت واكفة بمكاني اريد اسمع واشوف شنو راح يشترون
ماعرف ليش
بس رغبة بداخلي تدفعني اوكف وماروح…
لفيت نفسي بالعباية ووكفت وراهم
اباوع عليهن واتحسر
كلهن شلون جمال واناقة طالعات
لابسات بناطيل وتيشيرتات
جيداء لابسة سترة وبنطلون
والبقية لابسات قماصل وية البنطلون
حمودي شفته يلعب بيناتهم
ورف كلبي عليه
لابس كابوي وكلاو من البرد
اتمنيت احضنه وابقئ اشم وابوس بي
فدوة الـ الله شكد حلو ومحبوب
مرة عمي طالعه كمر
لابسة جبة وحجاب وجنطتهه بيدهه
شلون حلوين
صافنة عليهم وسمعت همسة تحجي وية ابوهه
همسة ـ بابا اريد هالجنطة انت وعدتني قبل العيد تشتريهه وماجبتهه بحجة كلشي صار غالي لان عيد..
معليية هسة اريدهه
ام محمد ـ لج ماما والله هاي غالية اذا نشتريلج لازم نشتري لبقية خواتج مين نجيب يراد بالمية الف دينار
ارشد ـ اختاري غيرهه ليش اشتريهه وتشيلهه بالمدرسة وتالي جم يوم وتتلف
ـ والله معلييية
لو هيةة لو مااريــــدد شنو تقشمرون علييـــة معليية معليية
ـ صفنت عليهه شلون تحجي وتعاند وادفر بايدهه مثل الجهال..
مادري اني كبرت كبل وگتي
لو هية تصغر بروحهه ..
بس حسيت نفسي
لو اني بمكانهه
استحي هيج اتصرف واسوي
ماعرف يجوز اني مگبرة ورحي زيادة عن اللزوم ..
ارشد ـ لالا يابة شنو اقشمر عليج
يايوم قشمرت عليج وولج ..
امشي اخذيهه امري لـ الله
جيداء ـ بابا واني اريد هذاك الحذاء وهذييج الجنطة للجامعه حباب
ـ روحي اخذيهه بنتي
ام محمد ـ لا ادللهن هيج
راح تفتح باب لبقية البنات يتعززن وميقبلن باي شي
ـ ميخالف اني قابل
ـ شنوو قابل..
متكلي امين تجيب وتصرف عليهن راح نفلس علئ سوايتهن وسوايتك هاي
ـ عوفيهن..
اذا بجال ابوهن ميدللن ويشترن ويشبعن عينهن
بجال منو يدللن ويعيشن لعد؟
عوفيهن ووطز بالفلوس
التخلي بناتي عينهن علئ الناس
ـ هالحجاية خلتني ابجي ..
مكدرت اتحمل وراسا دموعي نزلت
صدك بجال منو يدللن البنات
اذا علئ ابوهن ميدللن ..
واني لاحظيت بـ أب بي خير يدللني ويشبعني
ولا بزواجة بيهه خير تترس عيني وتكفيني
من هاي الكلمة
كلت بعد ماكو عتب علئ احد ..
عفتهم ومشيت سريع
حتئ ابتعد عنهم
وصلت يم بسطية حاط كارتات ومحفظات ومداليات
اشتريت منة رصيد وخليته بتلفوني وراسا دكيت علئ خاله وداد
دكات كلبي صارت سريعه
خفت لا متقبل تاخذني يمهه
ـ الووو ياهلاا بنوونة حبيبتي
ووين هالغيبة شلونج اخبارج صباح شلونة
ـ هلو خالة زينة خواتي شلونهم
ـ يابذات حتئ ما سألتي عني ..
يابة زينات خواتج جنهن قرودة يكمزون وية جهالي انتو شلونكم اخباركم ليش متتصلين علية صار كومة مسامعين صوتج…
ـ مو
ـ شكد اتصلت عليج بالعيد رادن يعيدنج البنات خطية بس تلفونج جان مغلق وين جنتو رايحين وغالقين تلفونكم
ـ بـ بـ بالسجن
ـ عزااااااااا العزاااج بالسجن شنووو شدتحجيين
ـ خالة أ أ أني بالشارع هسة ما اعرف وين اروح
ـ لج شنووو بالشاارع شنو بالسجن شصااير وياج
ـ خاله سالفة طويلة مادري مين ابدي واحجيهه الج
ـ زززين صباح ووينة ليش عاييفج بالشاارع
ـ صـ صباح كتل ابو
ـ دخيل اااسمك رربي ..
شنو كتل ابوو يعني ضرربة وابوو اشتكئ علييه
ـ دمعتي طفرت من عيني وخنكتني العبرة ..ماعرفت شحجي وياهه
ـ لج خاله انتي وين هسة
ـ والله ما اعرف اني وين بس اني اليوم طلعت من السجن وماعندي احد اروحله
ملكيت احد غيرج اخابرة
ـ اهل صباح وين اخته ماوية وووين عمااامج الغماان ووين
ـ خاله تاخذيني يمج هالجم يوم لو لا
ـ خاله وين تجيين مو تدرين ابو ايوب ميقبل ميريدج وين اخليج شلون اجيبج
ـ شكرا خاله تعبتج ويايه
ـ ووووج ااوكفيي ياخاله ووين رااح تروحين
ـ مادري بس اضل بالشارع ولا ارجع لبيت عمامي كل اذيتي ومصايبي من وراهم ..
لا تهتمين بية اكيد الله راح يحلهه..
ـ لا اله الا الله .. خاله ارجعي لعمامج ماعندج غيرهم وين تروحين
ـ زين دزيلي رقم خاله ام حسين عفية بلكي تجي تاخذني
ـ ياااا ووين تحجين ااانتي ووين تلكيهه ..
ـ شنو صاير خاله شبيهه خاله ام حسين
ـ قبل اكثر من شهرين ذبولهم تهديد اباب بيتهم خطية وشالو من المنطقة كلهه
ـ حسيت ابواب الدنية كلهه انسدت بوجهي..
ماكمت اشوف بشر بس اشوف ظلام
راسا كمت ابجي واشهك ..
شكرا خاله مع السلامة ..
مانطيتهه مجال تحجي
راسا سديت التلفون
تعبت من الفرة بالسوك
شفت كارتونة بالكاع يم الزبل اباب وحدة من المحلات..
اخذتهه وكعدت عليهه
امسح بدموعي ماعرف شسوي
اكلب بالتلفون بلكي الكة رقم احد ينقذني..
هذا رقم ماوية
وهاي رقم ريتال
لو يريدوني جان اجوي عليه بالسجن وزاروني
اصلا حتئ ماوية مادري شبيهه مو علئ بعضهه من اجتي عليه ..
بس شسوي ماعندي غيرهن وين اروح
دكيت علئ ماوية متشيل التلفون
رديت دكيت عليهه اكثر من 8 مرات ماكو مترد
عفتهه ودكيت علئ ريتال
الوو الوو ريتال
ـ الو منو
ـ استغربت هذا رجال رد عليه..
يلة. يجوز خزام لو واحد من اخوتهه الما شايفتهم ..
ااني نهاوند زوجة صباح عفية وين ريتال
ـ منعرف احد بهالاسم منو نهاوند
ـ عفية ريتال وين
ـ اختي هالرقم مالتي واشتريته قبل فترة
ـ صدك .. اسفة اسفة..
يعني متعرف منو ريتال
ـ اي اعتقد الرقم بهيج اسم اي صح يمكن اسمهه ريتال
ـ زين عفية متعرف رقمهه الجديد لو مكانهه وين
ـ لا ما اعرف .. كولي اختي محتاجة شي
ـ ها .. لالا شكرا
راسا سديت التلفون
وهاي ريتال وماوية راحن وية اليرحون مابيهم فايدة بعد..
كعدت بمكاني متلفلفة بعباتي وعيني علئ الناس
يمكن راح يصير منع تجوال بعد شوي واضل لوحدي مثل هذيج الليلة
بس الفرق خواتي مو ويايه
عزة بعيني وين اولي
مشت من يمي مرة جبيرة وحطتلي ربع بحضني وراحت..
انقهرت علئ نفسي
لان عبالهم اني مجدية وكاعدة هنا..
متت قهر علئ نفسي
وين اروح المن انطي وجهي
اباوع بالوجوه بلكي اشوف امي رحمة
بس وين اشوفهه
هو حتئ شكلهه ماعرفة
وج يمة ووينج
يمة مو يكولون كلب الام يعلم بجهالهه
يمة كلبج ماعلم بحالي
ماحس بية اني واكعه بهيج مصيبة ومحتاجتج
معقولة امي متحس بية ابد
الا اذا ماتت
يجوز والله ماتت
اي والله يمكن
ممعقولة تضل طول هالفترة متسأل عني ولا تحاول تلكاني
ولا تحس بية
واني كل يوم من مصيبة لمصيبة
كاعدة وصافنة بحالي ودك التلفون
شفت الرقم هاي ماوية راسا جاوبت..
الوووو ماوية عفية اني بالشاررع وميتة خووف ماعرف شسوي
ـ سودة عليه صددك تحجين…
اي ليش مارحتي لعمامج
ـ يكفي الاجاني منهم ..
ـ لعد وين تروحين متكليلي
ـ عرفت ماوية همين متريديني ..
ادري شبية محد يريدني بية جرب
ارض الله واسعه ان شالله ما احتاج احد
ـ والنعم بالله.. شفتج متصلة عليه وجنت طالعه وعايفتة بالبيت..
انتي وين بالضبط
ـ مادري وين بس بنص السوك
ـ استغفر الله ماعرف شكلج بس والله يانهاوند ماعندج غير عمامج
ـ لا مارجع كل المصايب الاني بيهه بسببهم وهمة كلهم عايشين حياتهم ولا مهتمين بية
ـ اريد اكلج شغلة ومستحية منج
ـ كولي ماوية شنو عندج..
لان اني كلش مستغربة منج ومن تصرفاتج ويايه..
مو هاي ماوية الجانت ادافع عني وتحبني
ـ كلتلج ابو همام وكع وتمرض ومكدرت اجي.. بس والله هو ميقبل تجين للبيت يمنة
ـ ميقبل!
ليش شسويت اني شنو بدر مني
ـ افهميني الله يخليج..
يكول صباح وطلكهه
شعدهه تبقئ يمنة
خلي تروح لاهلهه احسن
خاف يصير عليهه شي ويبلونه
ـ بشنو يبلوكم
همة اصلا ماواحد منهم مهتم الي ولا معبرني شوفة عينج طول فترة السجن محد منهم ذكرني..
يعني معقولة محد نطاهم خبر لو ما سمعو اني هيج صار بيه
ـ وج نهاوند ارجعي لعمامج مهما يكون هذول اهلج
ـ عمت عين هيج اهل..
نيموني بالشارع اني وخواتي
وردو باعو خواتي وكوة رجعتهن
وتالي باعوني الكم برخص التراب وقبضو الثمن
وهاي النتائج
صفت كل هالمصايب بية واني عمري ماصاير 15 سنة
شنو بعد اشوف منهم ماضل غير يقتلوني ويفضوهه..
احجي وياهه ودكت عليه خاله وداد
بدون تفكير كلتلهه بيباي وسديته وراسا جاوبت وداد.. الو
وداد ـ انتي وين ياخاله
ـ هنا بالسوك
ـ وين ياسوك اني وعمي خلدون جايين عليج ..
اسألي اي احد يمج كليلة اني وين شنو اسم السوك هذا
ـ طــرت من الفرحه واخيررا اخد راح يلمني من الشارع
سالت رجال ديمشي وين اني ونطاني الاسم الكامل للسوك وكلت لخاله وداد
كلتلي ابقي كاعدة بمكانج لاتتحركين
هسة نجي
كعدت علئ الرصيف مقابيل المحل النطيتهم اسمة وضليت انتضر
تقريبا ثلث ساعه مرت
بس احس الوكت ميمشي ابد
جنت خايفة لا يعوفوني وميجون
او يكذبون عليه
هواي افكار سلبيه مرت براسي ..
طبكت يمي سيارة جديدة تخبل
لونهه زيتوني
وفتحت الباب خاله وداد
ركضت عليهه حضنتهه وكمت ابجي
ـ اووووف يابنات ازدهار شسووة بيجن الوكت..
امشي خاله صعدي مو وكت حجي سدينة الشارع..
ـ صعدت السيارة لكيت رجال جبير يسوق واولاد خاله وداد وخواتي كاعدات ورة ..
سلمت عليهم وراسا حضنتهن وكمت ابجي
سدت الباب عليه خاله وصعدت ومشينة
بقيت حاضنة خواتي واشم بيهن
كلش اشتاقيتلهن فوك ميتصورن
حطيت لحونة وصباوي بحضني
ونغم كعدت يمي تحضن بية
يالله شكد مشتاقتلهن
نغم ـ وين جنتي و ليش هيج لابسة
وداد ـ مو وكت حجي نغومة خلي نوصل للبيت ونسولف
نهاوند ـ ليش وين راح نروح
وداد ـ نبيل وزوجته وجهاله راحو يباتون ابيت اختهه
عدهن حفلة باجر حنة بنت اختهه وراهه العرس وتريدهه يمهه
الحقراء
محد كال من عدهم ولا حجئ
جان من الصبح جبتج يمي
بس هسة عرفت حگ الطلعو
روحه بلا ردة ان شالله
خلدون ـ لاتدعين ابوية انتي ميصير يبقئ اخوج
ـ لا عمي الله يخليك لاتسكتني
كلش زين تعرف حقارته ونذالته وياية
ـ هو هذا طبعه شسويله
ـ اي طالما حضينة لمرته صاير ويلعب بفلوسنة لعب عساه راح ومارجع ان شالله اريد اخذ حصتي اريد اشوف نفسي اني وجهالي
شنو ذنبي اني وهالجهال محبوسة بالغرفة الفوك ومرتة تسرح وتمرح بالبيت وفلوسنه
خلدون ـ نعيم احسن منة بس امرة موبيدة
ـ لا مو امرة مو بيدة..
بس مسكته شوف شناطي ومخلي ساكت
والله لو اريد احقر اسوي مثل سوايه ازدهار الله يرحمهه
بس اخاف علئ هالجهال
هذيج انكتلت ومحد يعرف منو متورط بدمهه
وخاف اني هم يصيبني نفس المصير
ـ كلامج يخوف .. معناهه تتهمين اخوتج بدم اختج
ـ الله اعلم مابري احد ..
ازدهار ماتت مكتولة برصاصه ومتقصديهه بيهه
لا مفخخه ولا عبوة ولا اجتهه التايهه
ـ صدك جذب ياعمي كافي مو لهلدرجه صعدو او نزلو يبقون اخوتج ومن نفس الظهر طالعين..
استغفري ربج وكافي حجي اذا مقتولهه عن قصد ان شالله دمهه ميروح
ـ استغفر الله ربي ..
ان شالله ميروح
ان شالله تطلع بعزيز كلب القتلهه والحرض علئ قتلهه..
نهاوند ـ كلام خاله وداد اثر بيه
وخلاني خايفة
وين راح توديني من يرجع نبيل من حفلته
وصلنة بيتهم ونزلنة
صارلي هواااي ماشايفه بيت جدو..
وداد ـ لاتحجين اي شي ..
ومن يسالوج كولي جاية تباتين يومين وترجعين
ـ هزيت راسي يعني اي..
بس بقيت بحيرة
وين اروح من تخلص هاليومين
سلمت علئ خالو نعيم وزوجته
نعيم ـ هاااا نهاووند شلوون كبراانة ماشالله خالوو شلوونج اخباارج عماامج شلونهم
ـ الحمد لله زينين
ـ ياماشالله صايرة عرووس عفتج طفلة هالكدج
وداد ـ لا شدعوة هي عروس قبل لا تنقتل ازدهار الله يرحمهه
ـ الله يرحمهه
ـ اجتي يمنة يومين تشوف خواتهه وترجع
ـ كل الهلا بيهه هذا همين بيت جدهه الام التربي مو التخلف مو صحيح خالو نهاوند
ـ اي طبعا اكيد خالو ..
ماما ازدهار محد يعوضني عنهه
ـ اي والله الله يرحمهه..
جانت هواي تحبج
وداد ـ يلة خلي نصعد خطية تريد تكعد وية خواتهه
نعيم ـ اي اخذو راحتكم
ـ صعدنة طابقين وطلعنة السطح يلة دخلنة بغرفة خاله وداد
شفت حالتهه استغربت
غرفة وحمام وتواليت
كلش صغيرة الغرفة
بيهه بس كنتور والفرش بالكاع مطشرة مالاميهه ..
وتلفزيون وثلاجة وصوبة نفطية وهيتر كهربائي..
خاله لعد وين مطبخج
ـ ماعندي مطبخ يا خاله ..
هذاك الطباخ هناك حاطته
ـ باوعت حاطته بصف الحمام بالضبط مادري وين حاطة المواعين والخواشيك
غرفتهه صغيرة والغراض شكد قليلة بس تارستهه ترس وماعدهه مكان
ـ يلة خاله هاي ملابس ودخلي للحمام اسبحي وذبي هالهدوم بالزبل
عندي هواي هدوم انطيج بعدين..
بين ماسوي العشة
ـ اي خاله
نغم ـ سبحينة ويااج اشتاقيت لذيج الايام من جنتي تسبحيني اني وخواتي وتلعبينة بالحمام
وداد ـ لالا خاله هسة صارت الدنية ليل والجو بارد تتمرضون
باجر عود تسبحكم ..
وروحي كتبي الواجب عندج حل تمارين
نهاوند ـ اي باجر اسبحكم ..
حلي التمارين واجي ادرسج بعدين
اقتنعت نغومة وعافتني وراحت
دخلت للحمام نزعت ملابسي وسبحت
سمطت جلدي بمي حار
احس بية كومة وصخ واريد انضف
حتئ بالتايت غسلت شعري وجلفت جسمي ورديت بالصابون والشامبو
سبع مرات غسلت شعري وجسمي واحس نفسي بعدني وصخه
ايع الله لايعيد هذيج الايام
نشفت نفسي ولبست دشداشة قديفة وردية شكد حلوة
حتئ بيهه عطر يخبل ولفيت شعري بالخاولي
ولميت ملابسي بايدي وطلعت
وداد ـ هاج خاله هاي العلاكة ذبي بيهه هدومج القديمة خلي تولي ..
مشطي شعرج حتئ انصب العشئ
نغم ـ نهاوند هااي قراصاتنة خاله هواي تشتريلنة اخذي شدي شعرج بيهه
ـ اي ياخله انتن جوكة بنات تنفع وياجن قراصة قراصتين لازم اشتري درازن درازن وهمين تضيعوهن..
ـ الله يساعدج خاله..
مشطت ولميت شعري بقراصة وردية مثل دشداشتي الوردية..
خلت العشة خاله وتعشينة كعدت لحونة صباوي بحضني حتئ اعشيهن
وداد ـ عوفيهن خاله يعرفن ياكلن
ـ لالا خاله عوفين اني عاجبني اوكلهن
بقيت الف لخواتي واوكلهن الئ ان شبعن كمت رتبت الفرش للجهال
وخلو راسهم ونامو
خاله وداد معلمهتم هيج نضام يتعشون وينامون
ـ صفينة لوحدنة ..
تعالي احجيلي شنو الفلم شوداج للمصخم السجن ليش دخلتي وين رجلج المن كتل
ـ راح احجيلج من البداية
وليش وشلون اتزوجت صباح
كعدت احجيلهه كلشي مابقيت شي بكلبي ماحجيته ..
خانتني عيوني وكمت ابجي
ـ يعني انتي بعدج عذراااء ولج متنحسبين علئ المتزوجات
ـ اي بعدني كلتلج صباح مجان يكدر يسوي شي
ـ هم زيين يمعودة لو متزوجج ومحبلج شلون ادبريهه تحيرين بنفسج لو بطفلج
ـ يمكن لو جان شخص طبيعي ومتزوجين ماجان صار الصار..
بس هو تقريبا صايرة بية حالة نفسية من حالته وحقارة اهله..
ويمكن لو عندي طفل من صباح جان ماكدرو يطردوني و يتخلون عني
همة عدهم بيت وعدهم املاك جان انطوني حصة علئ الاقل
ـ هالاملاك كلهه حرام ياخذ بالفايز متشوفين هيج صار بيهم هذا مال الحرام يحركهم بالدنية وبلااخرة
الله يجفينة شرة ..
اوووف سودة عليه يانونة
شهالمصايب الوكعت فوك راسج
ـ والله ياخاله اتبهذلت ورة امي ازدهار الله يرحمهه..
صرت ملطشة بيد الميرحمون و مادري وين اروح
ـ احاول ادبرلج مكان هاليومين
بلكي الله ترهم
ـ ابوس ايدج خاله
والله تعبت واريد ارتاح
اي شغله اشتغلهه واعيش منهه
حتئ لو خدامة بالبيوت ميخالف بس مارجع لبيت عمامي
ـ خلي اشوف ياخاله
هسة اخابر علئ جماعتي والله كريم..
ـ بقت خاله لوكت متاخر تخابر علئ الناس تكول هذول اصدقاء
كلش تعبت وراسي ثكل اريد انام بعد ماكدر عيوني طبكت بس استحي من خاله وداد
ـ نامي نونة نامي خاله يم خواتج معليج بية ..
ـ خليت راسي علئ المخدة وماحسيت بالدنية بعد..
كعدت الصبح علئ صوت الجهال يلعبون بالغرفة بس خاله وداد ماكو مموجودة
نغم ـ همزين كعدتي متنة جوع
ـ ليش وين خاله
ـ مادري طلعت وكالت خلي نهاوند تسويلكم ريوك
ـ اي هسة.. رحت للحمام غسلت وجهي ومشطت .. نغومة شنو اسوي ريوك
ـ اكو هنا بالثلاجة بيض وجبن طلعيهن وسويلنة جاي
ـ زين وين المواعين الطاوة وين
دلتني نغومة علئ المواعين والجداري والخواشيك..
حاطتهن خاله ابطن الفرن مال الطباخ
طلعت الطاوة وسويت بيض وجاي وجهزت الريوك وكعدت اريكهم واتريك وياهم
خلصو وكمت غسلت المواعين وبديت انضف وارتب بالغرفة
اتمنيت ابقئ عايشة وياهم
حسيت بدفو والفة محسيت بيهه باي بيت
يمكن لان خواتي وياية
وخاله وداد زينة ويانة
يارب لاتفرقني عن خواتي عفية
خلصت ترتيب وكنست وكعدت انتضر خاله
اتذكرت صورة امي رحمة
عايفتهه بغراضي يم ماوية
مادري ليش كلبي فز من مكانة
شبيج يالغبية شسوين بصورة امج
هية اصلا ذاكرتج حتئ تحتفظين بصورتهه
حاولت ما اهتم بس مكدرت
لا اريد صورة امي ..
اخذت تلفوني وخابرت عليهه..
الو هلو ام همام شلونج
ـ هلاهلاهلا شلونج نهاوي ووين انتي
ـ ابيت خالتي وداد
ـ ااااي الف الحمد لله والشكر
ـ عفية ماوية صورة امي باغراضي يمكم
ـ صورة امج ..
زين اخذي اغراضج تريدين نجيبهه الج
ـ لا ماريد اي شي من هالغراض انطيهه لاي واحد يحتاجهه
او اخذوهه بالعافية عليكم ..
بس اريد صورة امي
ـ زين وين حاطتهه
ـ اكو صندوك صغير مالت صباح اكيد من تشوفي تعرفي هو بيهه الصورة
ـ زين ميخالف
انطيني العنوان حتئ دزهه بيد احمد لو همام
ـ تجي خالتي واخذ العنوان منهه
بس من تلكيهه دكيلي مسكول
ـ صار ان شالله حبيبة
ـ سلمت عليهه وسديت التلفون ..
وكعدت اتاني خالة تجي حتئ اكلهه ..
تقريبا وية ساعه 11 الصبح اجتي
ـ هااي شنووو
عفية بالسباعية عاشت ايدج اول مرة ارجع الكة الغرفة نضيفة ومرتبة
ـ عادي خاله ممسوية شي..
اكلج خاله
ـ كولي خاله..
ـ أ ..ماوية اخت صباح خابرتهه علمود تجيبلي صورة امي
ـ اي شكو بيهه
ـ بس ماعرف انطيهه العنوان
ـ اي عادي خابريهه اني اوصفلهم المكان وييجبون غراضج
ـ لا ماريد اي شي من غراضي كلهه فكر
بس اريد صورة امي
ـ اوك خاله براحتج
ـ دكيت علئ ماوية وجاوبتني
حجت وياهه خاله وداد ووصفت الهه المكان وكلتلهه اليوم واحد من الولد يجيب الصورة ويجي ويخابركم علئ هالرقم..
ـ ها هسة ارتاحيتي
ـ اي شوي
ـ شوفي مبدأئيا اذا نبيل ماقبل تبقين هنا اخليج تروحين ابيت عمي خلدون
ـ كلبي انخمش من كالت ابيت عمي خلدون.. يمكن صايرة بية خوفة من الرياجيل الكبار
ـ تروحين هناك يمهم تساعدين زوجته بالبيت بيتهم جبير ويحتاجلة تنضيف انتي تروحين تساعديهه وتنطيج اجر
ـ زين وين اعيش
ـ والله مادري يابنتي ..
بس نشوف شكد ينطوج ومنهه نتصرف
ـ همست ..
همزين يعني مو ابات ابيتهم..
ان شالله خاله
بقيت اندعي بكلبي يارب خالو نبيل يقبل يارب حنن كلبة عليه
وخلي يقبل ابقئ يم خواتي
صار العصر ودك عليه همام راسا جاوبته وحجت وياه خاله وداد اخذت تلفوني وطلعت ورة شوي رجعت وبيدهه الصورة ..
ـ هاج خاله هية هاي صورة امج
ـ اي
ـ ممبين شي منهه
ـ اي قديمة الصورة
ـ تحنيلهه
ـ لا ابد ..
بس اريد، اعاتبهه واحجي حجي قاسي وياهه واعوفهه بعدين
بس اذا جانت ميتة ..
الله يرحمهه شبيدهه عليه
اترحملهه واسكت
ـ الله يعينج ياخالع
ـ هالليومين كعدت ادرس خواتي وادرس بنات خاله وداد وولدهه
حنيت لايام الدراسة
ياريت بعدني طالبة
واكبر همومي شلون انجح وشوكت تخلص الدراسة
احلئ يومين مرت بحياتي
مكابلة خواتي وكاعدة وياهن
اوكل واللعب وادرس وانيم
مارايدة اكثر من هيج عيشة
سمعت هورن اباب البيت وخاله وداد كالت لا هله..
منو هذول خاله؟
ـ اجئ غراب البين نبيل والحية مالته
شسوي للموت ياخذ الزين ويعوف العار
ـ راح تكليلة عني خاله
ـ والله انتي فطيرة عبالج هو ومرته ميدرون..
بوجود نعيم ومرته كل سالفة بهالبيت تصير توصلهم بكل امانه
ـ ملامح وجهي انكلبت..
خفت لايطردني بالشارع وين اروح
وراح يليل الليل عليه
ضلت خاله وداد كاعدة مانزلت
ولا احد منهم صعد
صار الليل وماكو شي
شوي ارتاحيت بلكي يسكت عني
ويقبل ابقئ يم خواتي ..
بقيت كاعدة وية الجهال واحجيلهم قصص شوي واندكت باب الغرفة
وداد ـ اجئ غراب البين
ـ كلبي رجف من دكة الباب..
منو خاله
ـ لاتحجين علئ كد السؤال وبس
ـ حاضر..
راحت خاله وفتحت الباب
نبيل ـ ها الله يكويج
ـ هلا ابو ايوب .. تفضل
ـ اي والله الجو بارد ..
ها بنت فؤاد شلونج خالو
ـ هلو خالو الحمد لله زينة
ـ شلونهم عمامج اموركم شلونهه
ـ زينين الحمد لله
ـ شعجب ذكرتينة
اشو مافد يوم بينتي واجيتي تشوفين خواتج تشوفين بيت خوالج
ـ استغربت من حجيه وهمست بكلبي الله يهدي بلكي اتغير..
وداد ـ خطية منو يجيبهه كلمن حاير بروحه
نبيل ـ بيا صف صرتي
ـ أ أ .. معرفت شحجي وارتبكت
وداد ـ بطلت من المدرسة خطية بطلوهه عمامهه
ـ ليش شعجب ..
وداد ـ هذا حال اليتيم الماعندة ضهر
ـ اي خالو .. شنو صاير شي
وداد ـ لا شنو صاير ماكو شي
ـ هم لعد منو يجي ياخذج من عمامج لو وداد هية ترجعج
وداد ـ اني باجر اوديهه لا يضل ابالك
ـ همم .. اي زين ..
يلة اني انزل ..
اجيت اشوف نونة لان عبالي صاير شي
ـ لا ماكو شي اطمن
ـ طلع نبيل ونزل جوة
سدت الباب خاله واجتي كعدت يمي
خاله شعجب ماحجيتلية عن الصار ويايه
ـ لالالا يمعودة هذا خايس مندري شيسووي خلي يولي
ـ زين من اروح اشتغل ابيت جدو خلدون اكيد راح يعرفون وين جنت وشصار وياية
ـ عمي خلدون متزوج اثنين
الاولئ كرايبنة بنت عم ابوية
والثانية غريبة مو كرايبنة تسكن شوي بعيد عن بيته الاول
فمحد يزورهه
ـ ها
ـ لاتخافين ان شالله تتأقلمين وياهه هية هم حبابة مو لئيمة
ـ ان شالله
ـ كومي اتعشي خاله كومي
ـ لا ما اشتهي ..
حاولت تلح عليه بالاكل بس مكدرت اكل
ما اشتهيت بهالليلة شي ابد
ولا جاني نوم
مكابلة خواتي واحضن بيهن وابوس وابجي
مادري ليش هيج حزينة وخايفة
بس ليش خايفة ما اعرف
احس نفسي ممرتاحة وخايفة من المجهول
كلهم نامو وبقيت سهرانة
حاطة لحونة بحضني وصباوي راسهه بحضني وجسمهه علئ الفراش
رغم كبرن وصار عمر لحونة خمس سنين وصباوي 6 سنين بس احسهن بعدههن صغار ..
طلع الفجر
وكامت خاله وداد اتريد اتصلي
ـ شنو هاي مانمتي
ـ لا خاله ماجايني نوم
ـ لاتخافين خاله ربج كريم مينسئ عبدة ابد
ـ ان شالله والنعم بالله
راحت تصلي خاله وخلصت
كعدت يم كنتورهه اطلع ملابس وتعزلهن
اني شوي اكصر منهه مو هواي
خاله وداد ناعمة اضعف مني
طلعت ملابس كلش حلوة وكلتلي هذني الج .. ويبقئ ملابس داخليه اشتريلج من نطلع
ـ اي خاله شكرا
ـ ليش هيج حزينة .. نضرة الحزن تفتة لكلبي..
ـ مادري خاله خايفة
ـ اتفائلي يابنتي ميصير هيج
ـ ان شالله
راحت سوت ريوك وكعدت الجهال اخذت خواتي غسلتلهن وبدلتهن ملابس المدرسة ومشطت الهن ولبنات خالتي وداد
حضنتهن قوي وكمت ابجي ميدرن بية اليوم اعوفهن واروح
ابجي بحركة كلب وادعي الله ميفرقني عنهن..
بس شسوي مو بيدي
نزلت خاله وداد
لميت الغرفة وكعدت ارتب الملابس النطتنياهن وحطيتهن بالجنطة
مو كلش جبيرة بس بيهه خوش هدوم جديدة
كلبي معصور علئ فراك خواتي
مادري شسوي اتمنئ يصير عندي فلوس واشتري بيت وننجمع سوية
بس هذا حلم مستحيل يتحقق
اقل من ربع ساعه ورجعت خاله
هية طبخت واني نضفت
صارت ساعه عشرة وكلتلي يلة بدلي حتئ نروح
اقل من عشر دقايق وخلصت
هية دخلت للحمام وطلعت لكتني جاهزة
شلت الجنطة وطلعنة من الغرفة
عيني عليهه واشوف علئ مكان خواتي
نزلنة بس ماشفت احد بالبيت ماعرف يمكن نايمين لو طالعين
طلعنة الباب وتمشينة لراس الشارع واخذت تكسي وطلعت بيه
مادري وين ماخذتني ولا اندل
بس مشينة بالسيارة مو هواي المسافة قريبة مو بعيدة
نزلنة بنص السوك
اشترتلي ملابس داخليه كم قطعه وشوي شغلات بناتية حطيتهن بالعلاكة وتمشينة شوي ..
دخلنة فرع كلش حلو بيت ركن
بي اشجار عالية وبابة عريضة ومصبوغ جديد
دكت الباب خاله وداد
وطلعت مرية فتحت الباب شكلهه كلش حلو تخبل
ـ ودااد زارتنة البرركة يابة
وداد ـ حبيبة مرة عمي ام مهند شلونج اخبارج
ـ عمي بذاتين لاتجون لا تسألون شدعوة عليكم
وداد ـ هاي نهاوند بنت رجل ازدهار الله يرحمهم الحجيتلج عنهه ...
ـ يااعيني حبيبتي من ريحة المرحومة تعالي خاله تعالي شلونج اخبارج سودة عليه مبينة متعوبة هالبنية
ـ اي والله ام مهند كلش متعوبة ولا عبالك عمرهه 14 سنة عبالك 40 بالمصايب الشافتهه
ـ الله يعوضهه خطية هالطفلة
ـ عيني خاله نونة
هاي مرة عمي خلدون ام مهند
راح تعيشين وياهه هنا بهالبيت
وانتي شاطرة ومؤدبة وحبابة وتعرفين تتصرفين
ـ اتفاجئت من كلتلي اعيش وياهه
جان الاتفاق اشتغل عدهه مو اعيش وياهه
وللحكاية بقية………. 🥀