الحلقة الواحدة والعشرون
#ليلة_من_فبراير
" كان موقف صغير، ولكنه كان كافيًا لحسم حيرةٍ ما."
❤️
ابو صباح ـ شفتي شلون بهذلتج ..
وبعد وبعد ياما راح تشوفين
اليوكف بوجهي امحي
فكري عدل ورديلي الجواب
ترة كلهه يومين
وتنرفع قضيتج فوگ
وصعب بعد تطلعين
ويصير عندج ارشيف بالسجن
من غير الشرطة هنا راح يقومون بالواجب وياج
اذا. جنت اني واحد اطلب منج
هنا عشرة عشرة يغتصبووح غصبا عنج
من غير التعذيب الراح تشوفي
لاني موصي عليج ودافع فلوس بيج
اتخيلي اني ادفع فلوووس ..
فكرري لان بكلمة مني اطلعج
بس الثمن تعرفي شنو
سلام...
نهاوند ـ عافني وراح
و جرني الشرطي ومشينة
حالي حال العمية
كلشي ماشوف كدامي
احس الناس اختفت من حوالية
شكد جانو اكو متهمين
وناس وشرطة واصواتهم العالية
بس كلهم اختفو من كدامي
صار كل تفكيري بكلام ابو صباح
هذا صدك يحجي
معقولة لهل درجة حقير ونفسه وصخة
اني زوجة ابنة شلون هيج يفكر بية
اتذكرت كلمة عشرة عشرة يغتصبوج ويعذبوج احس رجلية وكفت بمكانهه
الشرطي ـ امشي شبيج
ـ رجلية مدتشيلني
ـ وين ماخذج للاعدام ..
كوومي بسرررعه وبلا دلع لا اخذج دفرات للسجن
ـ جبرت نفسي ووكفت
كمت اسحل بروحي سحل
رجليه مثل الخدرت مدحس بيهه..
عفية عمو وين ماخذني
ـ يرادلجن كلب شكبرة
اذا كل وحدة من عدجن سؤال
يخلص اليوم وانتن ممخلصات حجي
ـ عفية الله يخليك عمو وين ماخذني ابوس ايدك لاتاذوني
ـ ماخذيج سياحه للزوراء
اكيد تعرفين الزوراء مو بلة ..
لان امثالج هناك يتربن
ـ سكتت معرفت شجاوبة ..
اخذني للسجن وقفلو الباب علية
دخلت ابجي معرفت شسوي
لابسة عباية كلش طويلة
اتلفلفت بيهه وكعدت علئ صفحة
عيني علئ الباب وكل شوي اكول
هسة يجي صباح يطلعني
لو يجون عمامي
يمكن امي همين تجي
يجوز تسمع بيه هنا ويحن كلبهه عليهه
كومة افكار اجتي براسي
بس اريد اخلص الوكت والهي نفسي
التفكير راح يموتني
اريد احد اعرفة يجي يطلعني منا
اشكال النسوان شفت بهالسجن
هو مو جبير صغير
بس احنة هواي بي وحاشرينة حشر
كلهن يسولفن سوية ومندمجات
الا اني مدعرف اندمج وياهن
ولا اعرف اسولف مثلهن
كاعدة ابحدي وداكتهه بجي
اشو محد اجاني ولا سأل عليه
معقولة عمامي هيج نسوني فد مرة
صباح ليش اتاخر
معقولة عرف وماقبل يجيني
تفلفت بالعباية وغطيت وجهي وتقرفصت وكعدت مدنكة راسي ودايخه من وضعي
فجاأة النسوان الي بالسجن تعاركن
ما اعرف علئ شنو عركتهن
يمكن غفيت شوي من التعب
يمكن اني اصلا ماسمعت
لان جنت شاردة بتفكيري
رفعت راسي شفت وحدة لابسة بنطلون وقميص ضعيفة شوي
تتعارك وية وحدة لابسة دشداشة اكصر منهه ومتروسة
اثنينهن متكافشات من شعرهن والنسوان الكبار ملتمات عليهن
كل النسوان البسجن كامت علئ حيلهه تتفرج
خفت اضل كاعدة خاف يدوسوني بالرجلين لان روجه تاخذهن وروجة ترجعهن
اريد افتهم عن شنو عركتهن مدفتهم
وكفت بالزاوية بعيدة عنهن واراقبهن
سمعت ام البنطلون تكلهه انتي كتلتيهه مو اني وتضرب بيهه
رجعت يمي وكفت بنية شابة
مو كلش جبيرة
كامت تهز بأيدهة وتتفل عليهن..
خفت احجي لو اتحرك من مكاني
ـ دتشوفين هالحيوانات الديتعاركن
ـ اي
ـ هذني قتلن امهن
ـ روحي راحت من هالحجي تخشبت بمكاني وفتحت عيني .. امهن
ـ اي
ـ انقهرت علئ روحي اني وين داخلة وين جابوني بنص المجرمين راسا كمت ابجي متحملت
ـ حقج تبجين الام الزززينة متتعوض بس هالكحاب يقتلنهه
ـ زين ليش
ـ متعرفين صدكهن من جذبهن
بس العرفناه وحدة منهن متفقة وية عشيقهه ضد امهه
لان امهه عدهه ذهب وفلوس
كلش غنية المرة وقاتلاتهه..
كافي شبيج انسبيتي بالبجي
ـ مقهورة علئ نفسي والله مسويت شي وهنا شمروني وية المجرمات
ـ كلهن يجن هنا هيج يحجن كلجن بريئات طلعتن لعد منو المصخم صخامجن
ـ والله العظيم ممسوية شي
ـ هذني همين كالن ممسويات شي بس باجر يترحلن خلص تحقيقهن اليوم وثبتت التهمة عليهن
ـ وانتي شمدريج
ـ هاي ثالث مرة انسجن
مو جديدة عليه هالسوالف
ـ عزاااا ليش ثالث مرة
ـ ابيع حب
ـ حب كرزات
ـ هههههههه كعدي كعدي خلي نسولف انتي مبين عليج ثولة وفطيرة كلشي متعرفين ..
كعدي نسولف
ـ جرتني من ايدي وكعدنة نسولف .. انتي شتبيعين؟
ـ اني مابيع كرزات ..
ابيع حبوب مخدرة
ـ يعني شلون
ـ هاي سوالف ماعتقد تعرفيهه ..
عوفج مني انتي شمسوية
ـ يعني هاي الحبوب مو زينة
ـ هاا انتي من النوع الليلطش..
اي حبيبة مو زينة
تخلي البشر يفقد عقلة ويصير خبل رسمي
ـ زين ليش
ـ العيشة تحكم ..
مين نعيش
اشو بزمن صدام كاتلنة الفكر
وهسة كلنة هاااه راح نجرر نفس
ونفس الحاله همين كتلنة الفكر
بزمن صدام البعثي عايش عيشة الملوك والمو بعثي علئ جف عفريت باقي
وهالزمن لازم تصيرين وية هذا لو وية ذاك يله تكدرين تعيشين
ماعدنة واسطة
حتئ نصير وية هذا وذاك
فـ بقينة بالنص ناخذ دفرات من الجهتين
يمعودة شهالعيشة الخرا
انعل ابوهم لابو اساسهم
ـ انتي متزوجه
ـ لا وليش اتزوج اني نفسي ملاكية اوكلهه انوب اخلف جهال ..
هسة عرفتي عني التردي
احجيلي عنج
ـ شحجيلج
ـ ليش دخلتي السجن
ـ ابو زوجي يتحرش بيه وضربته سجينة بايدة
ـ همم .. هواي هيج يحجن من يجن للسجن تالي يطلع غير شي
ـ يعني شنو
ـ مو كلشي نسمعه نصدكة
ـ بس والله العظيم اني ممسوية شي هو عال بية
ـ ورجلج يدري
ـ مجان موجود بالبيت
ـ وشكال من سمع؟
ـ يمكن بعدة ميدري
ـ اشو يمكن ؟ ليش وين هوة
ـ رايح لاربيل
ـ طاح حظة رايح يتونس وعايفج
ـ لا لاتغلطين غليه رايح يتعالج
ـ واذا يتعالج غير ياخذج وياه لعد منو يداري هناك
ـ كعدت سولفتلهه عن حالة صباح وسالفة جرة سالفة وحجيتلهه عن عمامي وعن حياتي
ـ شكد عمرج انتي ؟
ـ ارباطعش
ـ وكل هالمصايب شايفتهن بحياتج ..والله عمي انتي بطلة
ـ بكلشي قبلت بس الدنية متريدني ارتاح
ـ تفرج وتصير سوالف .. شسمج انتي
ـ نهاوند . . وانتي
ـ كافي
ـ اسفة مو قصدي اضوجج
ـ ههههههه اسمي كافي
ـ يا صدك؟
عبالي متريدني اسالج
ـ لا هذا اسمي
ـ سكتت معرفت شجاوبهه بس علامات الاستغراب علئ وجهي
ـ ليش مستغربة ..
امي وابوية جانو يخلفون ويشمرون
اغلب خلفتهم بنات
وسموني كافي لان بزعو من البنات
وهمين اجني ورراية بنات
مابطلو يخلفون لااا
استمرو
عبالهم الاسم الة دور بالخلفة شوفي العقول
المهم ..من صارت النكسة مالت التسعينات والحصار اشتد وطيح حضنة
انتي جنتي بعدج طفلة متتذكرين شي بس كتلنة الجوع خبزة بالبيت ماعدنة
ابوية شال خواتي الصغار وطلع
جانن تلاثة اكبرهن عمرهه سنتين ونص والصغيرة عمرهه جم شهر
طلع وياهن ..ومابجيبة فلس احمر
رجع بدونهن بس وياه مسواك
كونيتين طحين ومخضر
كمنة نبجي نريد نعرف وين اخذهن
وين وداهن ..
تالي كال بعتهن وقبضت فلوسهن
ـ عزااااااا
ـ اااي واتصوري امي كامت طبخت من المسواك وخبزت من الطحين الجابة ابوي..
يخلفون وميفكرون مين يزقنبوهم
عدهم اسهل شي خلفو وشمرو
الحياة قذرة اي صح
بس الام والاب بهيج حاله
اقذررررر منهه
الموكد الخلفة لا يخلف
الموكد الخبزة لا يخلف
بس ويامن تحجين
تلث بنات راحن بعمر الورد
وينهن عند منو
منو اخذهن ..
شلون عايشات ميتات عدلات ..
محد يعرف ..
وهذني لان امهن غنية وعدهه فلوس يقتلنهه ناس بطرانة علئ ربهه..
اتصوري احنة خواتهن لهل لاطفال
وهيج نفكر بيهن
وامي ابوية ياكلون بفلوسهن
ماكو بشر يستحق نسويلة خير
كمت اجيب حبوب وابيع حتئ اعيش
وطززز بالناس كلهه
ـ ماعرف ليش خفت منهه بقيت ساكتة ماحجيت ولا كلمة وهية مستمرة تسولف عن السجينات
سويت نفسي دايخة وخليت راسي علئ رجلي وهية بعدهه تحجي
ــــــــــــــــــــــــــــــــــــــــــ
ريتال ـ ترة كلنة نعرف نهاوند متسويهه لا تبوك ولا تمد ايدهه
ادري يايمة ليش متوكفين وية الحگ ليش دائما توكفين وية الباطل
ليش ماحجيتيي
ام خزام ـ ايا ادبسز هاي تاليتج هيج تحجين عن امج
ـ يمة والله البنية ممسوية شي وتعرفين ابوية كلش زين شنو من طبع وصخ عندة
ـ اريد اشوف وين مكانج بجهنم
لج ابوج هذا ااابوج
شلون هيج تحجين عنة علمود وحدة غريبة اهلهه باعوهه
ـ يمعودة خاله ام هناء احجي كلمة كولي ترة البنية طفلة والله بعدهه عمرهه 14 سنة يعني مو جبيرة ولاتفتهم
ام هناء ـ منو يكدر يوكف بوجه ابوج ياخاله ..
اني هم اخاف منة
واخاف علئ بناتي
خاف يأذينة لو يطلكني مثل القبلي
وين اولي اني وهالبنات
ريتال ـ لعد نضل ساكتات؟
مرة صباح فقيرة ماشفنة منهه شي
ام هناء ـ انتو اعرف اني ممحتكة بيهه
ام خزام ـ وانتي شكو حاركة دمج اشو علئ اختج ماهيج فرفحتي
ـ اني صوجي كاعدة واحجي يمجن
لازم اشوف صرفة ما اعتمد عليجن ..
عفتهن وصعدت لغرفتي
سديت الباب وجريت التلفون خابرت ماوية ..
ها ماوية شلونج
ـ ياهلا واخيرا ذكرتييني
ـ مو وكت هالحجي مرة صباح بالتوقيف
ـ ياصباح؟
ـ لج اخووج يعني ياصباح
ـ عــــــزة صخااام ليشش بالتوقيف
ـ كعدنة علئ صوت ابوية يصرخ ويكول باكتني وذبحتني نزلنة نركض شفنة ابوية ايده مدماية نهاوند ضاربته بالسجين بايدة
ـ شنووو هالحجييي يمعوددددة فهميني وووحدة وحدة
ـ ولج ااابوج متحررش بيهه ومدافعه عن نفسهه
ـ ابوية؟
ـ اي
ـ اكلج رغم اعرف ابوية شكد زباله
بس ممسويهه ومتحرش بوحدة من محارمة قبل
ـ اني هم كلتلهه ممتحرش باحد
يعني لا مرة فلاح لا مرة خزام
ولا بقية الجناين بس مادري حسيتهه صدك تحجي متعرف تكذب هالبنية والله
ـ اي هية فقيرة مو مكحونة ولا تعرف هالسوالف..
زين هسة هية وين؟
ـ بالتوقيف اكلهـــه خابري صباح لو زوجج خلي يرجعوون ..
ـ لالالا لاتتصلين ولا تحجين
لان اذا يرجع صباح بعد منكدر ندبر فلوس المعاينة
خلي يمشي بفاله واني جاية احل المشكلة
ـ اكلج يمكن ابوية والولد اجوي خلي اروح افتهم
ـ هسة البس واجيكم
ما اتاخر عنكم
ـ يلة انتضرج..
سديت التلفون ونزلت جوة . .
ها شسويتو
ابوصباح ـ انشمرت توقيف ووراهه سجن وانعل ابوهه لابو الشريف البيهم
خزام ـ يابة تصرفك ابدد مو خوش
مهما يكوون البنية انحسبت علينة شلون تذبهه سجن
فلاح ـ لعد ننتضرهه تذبحه مثلا ؟
ـ شهالحجي بنية صغيرة ترة وينهه وين القتل .. وبعدين يا يابة انت شعندك وياهه بالمطبخ
ام خزام ـ ااااي شعندددك بالمطبخ يالعجووز
ابو صباح ـ الف مرة اعيد الحجي
مو كلت باكت مني خمس اوراق ولحكتهه عليهن
ريتال ـ زين ليش شكيت دشداشتهه
ـ حطت الفلوس بصدرهه
شلون اخذهن ياابة
اكلهه من رخصتج طلعيهن اكيد اجررهه منهه وانعل اهلهه
خزام ـ يابة ..
انت بحياتك مامبقي فلوس هنا لو بأي مكان ..
اما بجيبك او بغرفتك بالقاصه شعجب بقيتهن هناا وفوكاهه رحت لغير مكان
ـ بعدددد صارت انحصرررت ورحت للمرافق شلون ادخل والفلوس بيدي
ام خزام ـ دوم تسويهه شنو الستجد؟
ابو صباح ـ عرررفت حررام
نعمة الله هاااي حراام تدخل مكان نكس
ريتال ـ ههه ومن شوكت ادور حلال وحرام
ـ بنــــــــت الكلــــــــب تراددييينيي تضحكييين عليية اشووو اعرف الله اكثررر منج ومن الخلفج بنت الكلبب نسيتييي نفسجج انتي منووو وكاعدة تحجين وية منوو
خزام. ـ الا هيج ترزلتي ..
اسكتي اني احجي وياه
ـ يحجي بهمس خزام يخاف يرفع صوتة .. ما مصدكة ولا كلمة منة
ـ ولا اني مصدك ..
فلاح ـ خليههه تعفن بالسجن هالادبسز
ريتال ـ تقبلهه علئ زوجتك تدخل سجن
ـ لو مسوية مثلهه اي اقبلهه
تبوكني بنص بيتي شبقت للكحاب ؟
يعني ابيتي وما أئمن علئ مالي وين صايرة هاي
خزام ـ لخاطر صباح يابة صباح مماذينة
واذا غلطت زوجته اكيد هسة اتعلمت لان صغيرة وتاخذ تعلوم
فلاح. ـ لك ياصغيرة تاخذك للبحر وترجعك عطشانة
ابو صباح ـ وهالخصي شنو حتئ اسويلة خاطر؟
هية لان ماشافت رجال بهالبيت
شافت بس هالخصي ووعبالهه كلنة مثلة
ريتال ـ ليش شبي صباح
بالعكس تحبة وتقدرة البنية
ـ كدامكم هالسوالف ..
المرة من تشوف زوجهه ممكفيهه..
تلبس الوضع كلة
ام خزام ـ هااا..
وانت اضاهر ردت تكفيهه بطريقتك الخاصة مو
ابو صباح ـ مو بس جسمج عجز
حتئ عقلج همين خرف
فلاح ـ شتقصدون ؟ فهموني
خزام ـ ميجوز هالحجي ترة هية مرة ابنك
ابو صباح. ـ وليش متاكل نعل شطالب منهه خاف صدكتووو حجيهه للقذررة
فلاح ـ اكيد لا
هاي شيماء صارلنة سنين متزوجين اشو ماكالت ابوك يتحرش بية؟
انت مرتك ساجدة فد يوم اشتكت من ابوك باقي اخواني محد منهم جاب هيج سيرة شعجب هية من دونهن..
ام خزام ـ هم صدك
خزام ـ بنية وغلطت بمكان منسجنهه نخلي صباح ياخذهه وياجرون ونخلص منهم هاي بنية خطية يصير عدهه اضبارة بالاحداث
ريتال ـ اي والله يابة خطية
طلعوهه من السجن وذا متريد صباح ياخذهه ويروح ..
طلكوهه منه..
بس مو مال تبقئ بالسجن
ابو صباح ـ هاي ملعبة اذا تبقئ علئ ذمة صباح واطلعهم من البيت
تنام وية الف واحد غيرة
متعرفون هيج نماذج شنو
بابا هاي عمامهه شمروهه بالشارع تربت بالشارع تعرفون شنو شارع
فلاح ـ خلي اخابر صباح واخابر عمامهه همين
ابو صباح ـ اكــــعد.. لاتخابر احد
فلاح ـ غير رجلهه العار يعرف بسوالف مرتة
ـ عوفة لو اريد جان انني اتصلت عليه .. وعمامهه بايعيهه بيع شنو فائدة وجودهم اصلا؟
ريتال ـ تقربت علئ خزام وهمست.. ميقبل نتصل علئ صباح
ـ اكو أنة بالمووضوع بس ماريد افكر بهيج تفكير
ـ هسة تجي ماوية ونشوف ..
استغفر الله ربي شهالمصيبة هاي
رحت للمطبخ غسلت الدم ونضفت مادري وين صارت ماوية احس الوقت ميمشي ابد كل تفكيري يم نهاوند شدسوي هسة وشديسوون بيهه بس لا ديضربوهه لو ياذوهه
ـــــــــــــــــــــــــــــــــــــــــــــــ
نهاوند ـ بقيت كاعدة ابد ماتحركت اراقب هالنسوان وقصصهن ...
سمعت وحدة تكول
تهموني بقتل زوجي وتبجي بحركة وتنشغ من البجي
تكول مو اني قتلته صح مشاكل بيناتنة بس ماسويتهه
والثانية متهومة ببوكة جبيرة
والثالثة تهمتهه امجدة بالبعث كدام شخص وجاريهه هنا..
اشكال التهم موجودة بهالسجن
استلسمت لقدري وكعدت..
ـ نهاوند فؤاد حمزةة
ـ جمد كلبي وكلت راح ياخذوني يغتصبوني ويعذبوني اريد اوكف ما اكدر
ـ ويــــــــنج نهاااوند فؤااااد
كافي ـ هذا مو اسمج
ـ اريد احجي حسيت روحي تخربطت هزيت براسي يعني اي
ـ وج كومي يجوز الضابط يريدج
ـ راح يغتصبوني ويعذبوني
ـ.بعد انتي وحظج الله يستر
ـ لالالا عفية. وين راح تاخذوني
الشرطي ـ ااامشي عاااد ينتضروج
ـ ماحجئ شي الشرطي كلبجني بايدي واخذني كوة اسحل بروحي تالي شفت هاي غرفة الضابط اتخيلت بيهه زناجيل وادوات تعذيب وكيبلات
جسمي يرجف ويختض من الرعب ..
فتح الباب الشرطي ودخلني جوة
عيني علئ الضابط ابد ما انتبهت منو يمة
ـ لج نهاوي
ـ ماااااوية ..
ركضت عليهه ماسيطرت بمشيتي ونجفيت علئ وجهي
الضابط ـ االله الله ..
هاي المقابلة علئ مسؤليتي
كدامكم بس خمس دقايق
لايصير تفتيش مباغت علينة
بسرعه احجو العدكم وفضوهه
ماوية ـ حاضر سيدي فدوة لكلبك الله يوكف ولد الحلال بطريقك.. تعالي ولج
ـ بقئ الضابط كاعد واخذتني ماوية علئ زاوية الباب تحجي وياية بهمس
ـ احجي علئ السريع شنو صار
ـ ساعه 5 الفجر طلع صباح ذبيت مي وراه ورجعت ارجع الطاسة للمطبخ شفتة. ورايه وساد الباب ويكلي ديري بالج تحجين لو طلعين صوت
ـ من شوكت هيج يسوي وياج
ـ من اول متزوجت اخوج يكلي اني اشتريتج بفلوسي صباح مادافع بيج ولا فلس
ـ ليش ماحجيتي شهالغباء
اني من الناس كوة صدكت بيج لان ابوية ممسويهه قبل
ـ خفت والله خفت
صباح كال اقتل ابوية اذا سوالج شي
ـ شنو هالحجي ياستار..
زين هسة الحل شنو
ـ الحل بيد ابوج
ـ شلون؟
ـ كلي اقبلي بالاريدة منج واطلعج تدرين دافع فلوس للشرطة حتئ يغتصبوني ويعذبوني
ـ شنووو؟ سوولج شي الشرطة!
ـ لا بعدهم
ـ كافي تبجين خليني افتهم ..
وبعدين بابا ابو صباح مستحيل يصررررف فلووس
مستحيييل يدددفع فلس احمر
تعرفين شنو يعني مستحيل
هذا بخيل حجئ هيج حتئ يخوفج مو اكثر
ـ مرعووبة ماوية لاتعوفيني
ـ ماعوفج .. بس ماعدنة غير تقبلين بشرطة
ـ شنو؟ شلون اقبل بشرطة
ـ اقبليي ومعليييج خلي نطلعج مناا ونسد اضبارتج
ـ يعني تقبلين انام وية ابوج ..
شلون تقبليهه علئ صباح وعليه
ـ لا طبعا ما اقبل بزنا المحارم هذا
ولا اقبل بهاللعبان نفس
بس انتي ماابيدج دليل ضدة
وكلشي هنا ضدج صاير ...
اقبلي بشرطة وكليلة موافقة والباقي عليه
الضابط ـ خلصت الدقايق خوية يلة فضوهه
ماوية ـ زين سيدي مابيهه امل تطلع كفالة شي
ـ ابوج الوحيد القادر يطلعهه من يتنازل عن القضية
ـ يعني عادي ..
ـ اي هو الوحيد يكدر ..
ولعلمج
اني لو ما اعرف ابوج
واعرفة بالمنطقة هو شنو وشلون ياخذ بالفايز
جان تعاملت وياهه غير شكل
لان الحق كلة وية ابوج للاسف
بس ابوج شخص معروف بمواقفة وسمعته الزفت مع احترامي الج طبعا ..
فبقيتهه لبنية
لاسمحت يأذوهه
ولا سمحت تتخلئ باماكن مو اماكنهه اصلا اختاريت الهه سجن السنوان بي جرايمهن مو كلش قوية
ومو متوحشات مثل باقي السجون
ماوية ـ مشكور اخوية
زين اكدر انطيهه فلوس مصرف لو ممنوع
ـ لا عادي انطيهه اكو عاملة تجيب طلباتهم بس تطلع مرة وحدة باليوم فقط
ماوية. ـ رحم الله والديك..
هاج هاي خمسين الف خليهه جوة ايدج اكل شرب شي
ماجبت الج شي من برة اجيت جفت من برة لهنا
مو تصرفيهن كلهن ترة ماعندي غيرهن والله العظيم
نهاوند ـ تسلمين ان شالله ماصرفهن والله بس طليعني ..
ـ لاتخافين ان شالله هانت ..
راح اروح لبيت اهلي ..
وانتي شنو يطلب منج وافقييي لاتخافين
ـ شلون اذا راد ينام ويايه
ـ لج غبررة قابل راح ينام وياج بالمركز؟ اكيد ينتضرج تتطلعين وشو وين ياخذج مناك اني وريتال نتصرف فتهمتييي
ـ الله يستر .. زين وين صباح ماخابرتي
ـ عوفي يمشي بفاله الولد
ماحجيتلة ولا اريدة يعرف
ومن يرجع نشوفلكم بيت شقة صغيرة نأجرهه الكم
ـ ماناقشت ماوية بس ردت اطلع والله كريم علئ الباقي ..
رجعوني للسجن ورديت رجعت لمكاني اراقب هالنسوان
صدمني من كال الضابط جرائم هالسجن مووقوية ..
بنت قاتلة امهه والثانية متهومة بقتل زوجهه والثالثة حبوب
كل هاي وومو قوية
لعد شنو اكو ببقية السجون !!
ــــــــــــــــــــــــــــــــــ
ماوية ـ وديني لبيت جدك وليدي
همام ـ شنو صاير يمة شبيهه مرة خالي
ـ مابيهه شي
بس جدك مادري شيريد من هالدنية بعد هيج البشر يضل عينة فارغة
ـ شبي جدي؟
ـ أ أ علمود فلوس مختلفين هية دتنضف وشايلتهن وهو يكول باكتهن واتطورت السالفة
ـ بس شلون هيج تتجاوز وتضربة لجدي جان استحت بكد ابوهه
بكد جدهه شلون تضربه بسجين
عمي هاي مرة خالي مو راحه
خالي صباح فقير مو مثلهه
ـ لاتحكم ابني انت مشافت ولا سمعت ماكو داعي تحجي هالحجي والبنية بكد اختك الصغيرة يعني اختك عدهه عقل من تتصرف جهال اثنينهن
ـ هاي وحد ..
هاي اسمهه صلافة يا امي لا اطمطميلهه
ـ الحجي ضايع وياك ..
امشي دنروح لا نتاخر...
المركز مو بعيد عن بيت اهلي تكسي دقايق ذبني ابابهم ..
انزل افتح الباب مبية اوكف ولگ
نهاوند ـ اندك الجرس وطلع خزام فتح الباب لمحت ماوية وهمام ابنهه
عفت كلشي ورحت اركض
ماويةـ هاا ياابة سلاامات سلااامات شنوو صاير
ابو صباح ـ مرة اخوج الادبسزز هيج سوت
ـ يااا شوف
الا اخلي صباح يطلكهة وينعل سلفة سلفاهه هالادبسزززز الساقطة ..
بس كليي انت بخييرر
ـ اي الحمد لله مابية شي
ـ والفلوس وينهه الباكتهه هالقندرة الحراامية
ام خزام ـ هيناهه خمس اوراق ماخذة منة
ـ يااااع صدك خمسس اورااق
ريتال ـ اي شگ دشداشتهه وجرهه من صدرهه
ماوية ـ لعد اشو جديدات يطكطكن ممبين عليهن مجرورات من الصدر كوة
ابو صباح ـ شتقصدين ماوية
ـ وعيونك يابة ما اقصد شي بس استغربت من شكلهن اشو ممعقجات غير جريتهه غصب عنهه لو شلون
ابو صباح ـ اي ولا يهمج
هااا اهاااا
هسة تعقجن مثل متريدين
ريتال ـ اتاكدت نهاوند بريئة من هالحركة ..
حسبي الله عليك شنو من بشر انت
ماوية ـ الادبسزز الا اطلكهه من اخووية وگ عيني صباح وردة من الله هيج يوكعلة بوحدة ادبسزز وحرامية ومجرمة شلون ضيم ..
ابو صباح ـ يطبهةة مررض الساقطةة
ـ اي يطبهه مرض حتئ من شفتهه تبجي وتلطم ماهتميت الهه
بهذلتهه وردت الا شوي اضربهه واطيح حظهه
بس الضابط ماقبل
بس شنو سطرررتني سطررر
تلهج باسمك وتكول بس اريد السماح من ابو صباح بس يكون اشوووفة بس اررريد استسمح منة
كلتله تخسين يالادبسزز ميسامحج ولا يباوع بوجهج
ابو صباح ـ هية هيج حجت
ـ اذا ممصدك روح اساأل الضابط استغربت من بجيهه مبينة كاتلهه الندم
ريتال ـ هاي شبيهه ماوية اشو كلبت علئ نهاوند شنو القصة اباوع بوجهه متباوع عليه ادير وجهه عني ..
عجيب شبسرعه صدكت بابوهه وهية تعرفة شنو من ملة ..
هسة هالحجي ميوكل خبز ياجماعه
طالما تبجي يعني حست بغلطهه
متروح تتنازل واطلعهه والله خطية يابة بعدهه طفلة
خزام ـ والله العالم راح تاكل وجوهنة شراح تحجي علينة بعد هالمصيبة
ابو صباح ـ لا تضلون تستشرفون براسي
ماوية ـ يعني راح تبقيهه بالتوقيف
ـ لا...
اتنازل مهما يكون هية جنتي مرة ابني بس خليهه شوي تنكرص اذنهه حتئ بعد متعيدهه
ريتال ـ يعني لشوكت
ـ باجر اطلعهه وكافي لغوة اي حجاية اطيح حظكم كومو حضرولنة الغدة خلي نتسمم
ريتال ـ طبخت وكملت هسة اصبلكم ..
رحت للمطبخ وعفتهم ..
اكو واحد يتزقنب بهيج وضع
استغفر الله ويكولون عقوق الوالدين
ماوية ـ شبيج تدرمين
ـ مابية شي عمي صايرة متنعرفين
ـ لج شبيج ليكون صدكتي الحجيته
ـ والله شمدريني صايرين متنحزرون بهالبيت
ـ مو وكت حجي بعدين افهمج
ـ شلونهه نهاوند
ـ ترجف المكرودة ..
بس تريدين الصدك بالبداية ماصدكت بيهه بس ربج يريد يكشف البشر
ـ خطية راح تبات بالتوقيف هالطفلة .. الله لاينطي عمامهة شمروهه هالشمرة
ـ هاي حال الدنية
ـ لازم تنطين خبر لصباح لان اكيب من يجي ويعرف راح يكلب الدنية ويسوي هوسة
ـ ميخالف يكلب الدنية ولا يقطع علاجة
.. همة اصلا بعد يومين يرجعون
ابو صباح ـ منو كلج بعد يومين يرجعون
ـ ياااستار يارب جفللتني ابو صباااح
ـ ليش همة وين رايحين؟
ماوية ـ أ أ غير لاربيل
ـ لعد شنو سالفة علاجة؟ اني سمعتجج كلتي ولا يقطع علاااجة .. علاج منو؟
ـ اني كلت علااجة!!
ريتال ـ ماسمعتهه كالت علاج
ـ ولجن كحااب تضحكن علييية فهمنيي وين رايح صبيح
ريتال ـ غيررر رايح لاربيل
ماوية ـ ماكلت علاجة
كلت حاااجة يمعوود
علااجة ووين حااجة وين
ابو صباح ـ الحجي ممتراابط
ماوية ـ اني افهمك يابة
ابو همام خطية رايح لاربيل عـ علمود يدور شغل تعرف الحاجة ام الاختراع
ـ وشراح يخترع بأربيل ؟
لج بومة شايفتني بزر البارحه وتضحكين عليه
ماوية ـ لا ما اضحك عليك ..
بس الحاجة دكت بالعظم ورايح يدور رزقة هناك يعني شسويلك انت تسمع تلاطيش حجي وتفسر بكيفك
ابو صباح ـ همممم...
دجري الصينية من يمج حطي المواعين كتلني الجوع يلة جيبو الغدة للهول
ريتال ـ همزين راح جان رحنة بالرجلين
ماوية ـ والله علست تعليس خرب بالحظ ماعرف شلون طلع الحجي من حلكي ..
يكون تعدي سلامات
يلة ودي الصينية يمهم
خلي نكعد لوحدنة ناكل هنا
اخذت الصينية ريتال وكعدو ابوية والولد يتغدون واني ريتال صبينة بالمطبخ وكعدنة
خطية المسكينة مدري اكلت لو لا
ـ يكون مأيذوهه لو يضربوهه
ـ الضابط جان شوي متعاطف وياهه
ـ قابل ضابط واحد يلزمهم اكيد اكو غيرة خفر
ـ يكون يحن كلبة ويروح يطلعهه قبل لايرجع صباح
ريتال ـ ليش متكليلة صباح راح يتعالج
ـ لا عزا غير يخبصهم تلفونات ويرجعهم جفي
ـ مو هو عباله صباح رايح يتونس يعني راح يبقئ جم يوم ويجوز يستغلهه ويبقئ حابس الطفلة حتئ تخاف وتنرعب
ـ اني هم هيج فكرت بس شنسوي مضطرين نصبر
ـ خابري زوجج يغلق تلفونة وابد ميفتحه ورحي كليلة هناك لكو علاج لصباح
ـ لااا غير يسبينة سباية
ـ خلي يسبينة شيريد يسوي خلي يسوي اهم شي الطفلة متبقه بالحجز ..
اكيد ابوج راح يضل يتصل علئ زوجج من يشوف مكدرر يحصله يروح يطلعهه حتئ يصير عندة. وقت وياهه
ـ خاف تلاص وكلشي بنيناه ينهدم
ـ البنية مترهم تبات هناك لاتفكرين بشي بس فكري بيهه
ـ هناك أئمن الهه ابوج مساومهه اذا يتنازل عن القضية لازم ينام وياهه
ـ عزاا
ـ اي شعبالج
بس هاي المشكلة سهلة
اكدر اخذهه يمي واكلة مادري وين راحت بين ميجي صباح بس همين تخوف السالفة
ـ استغفر الله والله حتئ صلاتي وصيامي بهالبيت ماحسة ينقبل علئ كد القذارة البي شهالنفسيات
ـ مادري احس عقلي وكف
ريتال ـ خزام متعاطف وياهه ليش منحجيلة
ـ مو هسة بعدين
منريد ندخل هواي اطراف وننفضح
ـ والحل ؟
ـ نصبر لليل اذا ماطلعهه نحجي الاتفقنة عليه..
ـ بس شوفيلج عذر معقول لان هو سمعنة نحجي وتيهناه..
ـ لاتخافين اعرف شلون اطلع منهه..
رييتال ـ مر الوقت وكلهم كاعدين محد منهم طلع ولا اتحرك
صار المغرب ونفس الوضع ابوية بس ياكل وينام ولا عبالك شامرلة طفلة. بالحجز
لج ماوية راح يصيرر الليل
ـ هسة اكيد وصلو خلي اطلع اخابر ابو همام دقيقة
ـ طلعت بالطرمة تخابر زوجهه
كمت احضر العشة لان اكيد شوي لخ يريد ياكل
ابو صباح ـ ريتااال جيبي مي وجااي
ـ اي هسة ياابة..
ماوية ـ خابرتة ..
عزة كوة افتهم شلع كلبيي
ـ شكلتيلة وشنو كال احجيلي
ـ مو كلشي بالتفصيل حجيت
لان ستوهم وصلو
يكول هواي سيطرات بالطريق و كوة وصلو
بس كلتلة اغلقة لو غير الشريحة ولا تنطي رقمك لاحد بين مترجع وكلتلة بعدين افهمك
ـ خلي اوديلة الجاي لحظة بعدين نرجع نحجي
ـ راح ادخل وراج اكول جاي وفد لكردستان يداوي حالات مثل صباح
ـ يلة لعد امشي لاتتاخرين
راح يصير الليل بلكي يتحرك
دخلت للهول نطيته مي والجاي
وكعدت يمهم اتفرج علئ التلفزيون
ابو صباح ـ اليوم الانفجارات عالكة ابغداد شنو السالفة
خزام ـ بيناتهم واحنة واكعين بيهه
ام خزام ـ شوكت تفرج مندري من طركاعه لطركاعه خلص كلبنة بهالجم سنة
ماوية ـ اااااان شالله راااح تفرج عن قررريب جبتلكم بشاااارة
ام خزام ـ خير شنو صرتي بالحكومة
ـ لا وهية هااي هم بشاارة
خزام ـ كولي يالله شنو
ـ صديق ابو همام كردي هناك بأربيل
كال اكو وفد اجبني بكردستان يداوي حالات مثل صباااح ونسبة النجاح زينة
خزام ـ يااالله احلئ بشاارة
ابو صباح ـ شنو هاللغوة
خزام ـ ليش يابة ؟
تكره ابنك يتعالج ويصير عندة ضنة ويعيش حياتة طبيعي مثلنة وحاله حالنة
ـ يعنـــــي راااايح علاااج ومااكلتوو ياااماوووية
ماوية ـ لا ودااعت ولدي بس حجايتك خيررر
شوف شلون انت خيررر وو بركةة
بس تحجي شيي يصيررر
اليوم سمت حجينه
وعبالك كلنة علاج
وربنا سهلهه لابنك وان شالله يلكة علاج
ـ انطوني التلفووون
ماوية ـ اااي ااي ولج ريتال وين التلفوون
ـ هسة اجيبة ديشحن
رحت ركض للتليفون فصلتة من الشحن ونطيته لابوية
بقئ يدك اكثر من خمس مرات ماحصل
خلانة كلنة ندك علئ ابو همام ويطلع مغلق
ابو صباح ـ ليشش ميجاوب؟
ماوية. ـ يمكن نايمين لو خلصان شحن مادري
ام خزام ـ يعني معقوولة هيج صدفة راحو ولكو علاج
ابو صباح ـ لاتصدكين بهالكواويد مرتبيهه من زمان للسالفة
ماوية ـ علئ نياتكم ترزقون ياعيني انت رايحين سفرة
وابو همام رايح يدور شغل
وهناك عرفو اكو وفد اجنبي جاي يعالج هالسوالف..
وداااعتك انت كلشي صار صدفة التساهيل من الله ابوصباح النيتة صافية
الله يسهلهه عليه
ـ كواويد حسابكم وياية بعدين ..
ماحصلتـوووو الجحش
خزام ـ الرقم مغلق يجوز ماعدهم شبكة او نايمين يريدون يرتاحون
ـ كووم كووم خلي نروح
ام خزام ـ وين بهاليل طالع
ـ معليييج
ووووينك فلااااح تعال سوق السيارة
خزام. ـ اني اسوق يابة..
ريتال ناوليني السويج بسرعه ..
ـ اااي هاك
ابو صباح ـ لاا ماريدك انت ..
وووينك فلاااح
فلاح ـ اجيت اجيت .. خير شكو
ابو صباح ـ امشي ويايه
ماوية ـ الله وياكم بس وين
ريتال ـ شراح تسوين
ـ لحظة خلي يطلعون
خلي اخابر همام اشوفة وين
ريتال ـ متلحكين اخذي خزام وروحي
خزام. ـ شبيكم ممرتاح الكم شصاير اكو شي جديد اني ماعرف بي
ماوية ـ امشي اخوية اني افهمك بالطريق
اخذلنة سيارة تمشي وراهم
ـ شعندج وراهم امن عامة صايرة
ـ بعدين افهممك
اخذ سيارة تكسي وصعدنة ومشينة وراهم مكدرت احجي وياه بالطريق لان سايق التكسي غريب دزيتلة رساله بالتلفون كوة كتبتهه من خظة الطريق
راسا التفتت عليه وخزرني
خزام ـ شنو هالحجي
ـ هذا الصار
ـ شلون اتاكدتي
ـ بعدين اكلك خلي نوصل..
شوف والله ماخاب ضني
اجئ للمركز من عرف بهالخبر
ـ ياخبر
ـ بعدين احجيلك امشي خلي ننزل...
نزلنة سوية احنة وهمة
ابو صباح ـ شجابكم
ماوية ـ اجيت اشوف مكصوفة الركبة خاف تسوي شي
ـ ارجعو هسة اطلعهه ونجي
ـ لا ماا ارجع خااااف تسوي بيك شيي جاايزة منك ياياابة
ـ طفل كداامج ماعرف ادافع عن نفسي
ـ ليش هالحجي يايابة
موضربتك سجينة هالعار
امشي امشي ياعيني ماعوفك جم اب عندي هو واحد
ـ حنينة معرفتج
ـ فدوة لكلبك شكد حنين غير طالعه عليك
جاي اطلع مرة ابنك من الحبس والله لو عليه ابقيهه بالحبوس بس شنسوي محسوبة جنة علينة
خزام ـ مفتهمتج
ـ معليك بس امشي
دخلنة المركز لكينة الشرطة متغيرين والضابط الشفناه الصبح مموجود
دخل ابوية وحجئ وياه
بس ماقبل الضابط يطلعهه يكول خلوهه 24 ساعه متطلع
حاولنة وياه يمعود عدل بدل قافل هالضابط ابد مقبل يطلعهه الا باجر الصبح
الضابط ـ احنة ناوين باجر نمشي اضبارتهه للقاضي
ابو صباح ـ لا ميحتاج احنة اهل بيت وساعه شيطان وهية صارلهه هنا من الصبح اكيد هسة انكرصت اذنهه
ـ الله يهديكم بس هاي اجرائات روتينية اطلعهه باجر الصبح ان شالله وكل الهلا بيكم...
ماوية ـ جر 50 الف خزام من جيبة ونطاهه للضابط
خزام. ـ خوية هاي الك حگ تعبك وسهرك وياهم شدكول لو هسة اطلعهه
ابو صباح. ـ ماااكو دااعي للتبذيرر ماراح تموووت اذا بقت بالتوقيف ليلة وحدة عليمن هالفلوووس يعني فوك دكتهه الناقصة ننطي فلوس
الضابط ـ ها هيجي يعني اني ما استاهل ؟
ابو صباح ـ لا اكيد تستاهل بسـ
خزام ـ اخذهه خوية بالعافية عليك ..
ماوية ـ يابة لخاطر صباح مو لخاطرهه
ـ وشنو هالخصي اخليله خاطر
خزام ـ يابة اذا مخايف عليهه لان هية طفلة وميصير تبقئ بنص هالبشر ..
خاف من الناس شدكول علينة شمرنة بنتنة جنتنة بالحبوس مترهم يا ابوو صباح
ـ حسابك بعدين تشمر بالفلوس يمنة ويسرة
وبعدين خلي يحجون الناس
شداخل بجيبي منهم
امي ابوية خايف من حجيهم ...
الضابط ـ متطلع باجر تطلع
ماوية ـ الضابط اخذ الفلوس وكال متطلع... يعني راح تبقئ هنا ؟
ابو صباح ـ اي خلص الصبح نجي عليهه
ماضل شي للصبح
وبعدين خليهه تتادب اكثر
وتعرف ابو صباح منو
ماوية ـ عافنة وطلع بقيت اني وخزام بالمركز مادري شسوي احس نفسي ضايعه البنية خطية تبقئ هنا وهالعجوز ماناوي ييجبهه لبر مثل البشر والضابط همين عند ويانة من شاف هيج اسلوب
اضطرينة نستسلم للامر الواقع ..
وصينة الضابط عليهه وطلعنة
ماعرف شلون خلصت الليلة محد من عدنة نايم
ابوية كل شوي يتصل بأبو همام
وعيونة بنص راسه ويحجي ويفشر
عجيب شنو من اب
شلون ميريد يشوف ابنة ناجح بحياته وشايف اولادة مثل بقية اخوتة
وام خزام كل شوي تتعارك وياه وترد ترجع تتعارك وية ريتال
والبيت كلة متوتر ومحد نايم
ماصدكنة يطلع الصبح اني وخزام
حضرنة روحنة دنطلع وياهم
ابو صباح ـ شعدكم تجوووون ويايةة
ماوية ـ يابة رجلي علئ رجلك
اخاف عليك منهه وماريد اعوفك بعد يمهه هالبومة الادبسزز
فلاح ـ شنو مو بعينج احنة عود تكددر تلزمة بعد والله ابطشهه بالكاع واخلي ملامحهه مخربطة
ـ ميخالف ياعيني اني كلبي محرووك منهه يكون اشوفهه واملخهه سودة عليه يابة ايدك شصاير بيهه
خزام ـ امشو يمعودين ماكو داعي للتاخير يلة يا ياابة دنروح
ابو صباح ـ وشعندك مستعجل
ـ حتئ نلم السالفة لان مو حلوة بحقنة
ماوية ـ كوة. قنعنة هالعجوز يمشي للمركز دخلنة وكمل الاجرائات تقريبا اكثر من ساعه احنة هناك كاعدين ..
شفتهه جاية وية الشرطي من بعيد كوة تمشي
ذبلانة فد مرة وعيونهه مورمة من البجي
يلة هانت ميخالف ماضل شي ...
دخلو جوة يم الضابط وابوية اخذ تعهد خطي عليهه حتئ متتعرضلة ..
المابيدة اثبات
والماعندة ضهر مغدور حقة بهالبلد
خطية وقعت وطلعنة كلنة من المركز فتحنة الباب وصعدنة السيارة
ابو صباح ـ تعاااالي
ماوية. ـ ها يابة شبيك
ـ رووووحي انتي ووخري مناا مو وياج الحجي
خزام. ـ خير يابة ششبيك
ابو صباح ـ دكوول تعالي
نهاوند ـ اتقدمت عليه وعيوني تجدح نار شلون خلاني ليلة كاملة. بالحبس
ـ هاج وقعي هنا
ـ شنو هذا ؟
ـ ورقة ضدج
فلاح ـ شنو هاي ؟ ورقة شنو
ـ ااانجب اااانت
خزام ـ ليش توقع شنو صاير مو اخذت تعهد عليهه
ـ هيج كحاب ميتأمنن يابة ..
تعالي وقعي لاابليج بمصيبة ثانية واخليج تخيسين جوة
ماوية. ـ مالهه داعي يمعود صفو الكلوب
ـ والله العظيم اليوكف بطريقي اسحكة سحگ جوة هالسيارة
نهاوند ـ شفت ماوية ساكته وخزام وفلاح همين ساكتين معرفت شسوي خايفة ومرعوبة ..
ماريد ارجع للسجن جوة هالمركز..
اخذت القلم ووقعت بالورقة بدون ما اقرة ولا كلمة منهه
ماوية ـ عزة يابة شنو هاي حاطلهه مية الف دولار
ـ اي هذا اعتراف منهه خطي انو باكت مني 100 الف دولار ..
ولعلمج يم محامي سويتهه
حتئ خاف تريدين تلعبين بذيلج
اكصةة بهالورقة
هااي تخليج تروحين جوة الزفت مو بس جوة التراب
وااااذاااا فكرتي تبوكني لو تريدين تذبحني
لو سويتي شي ميعجبني ..
روحج صارت بيدي بعد
عود خلي تفيدج سجاجينج يا الدايحه...
ـ اسمع كلامة وماكدر ارد عليه بس ابجي ماعرف شكد 100 الف دولار
بس مبين هواي هالمبلغ ..
يعني شنو هالورقة ماوية
ـ هذا اعتراف صريح منج انو انتي بكتي منة هالفلوس
ـ سكت ماحجيت كلشي اتوقع منه بعد ماكو شي غريب
صعدت السيارة
وابو صباح يغلط ويسب ويتجاوز عليه وعلئ اهلي واني ساكته
ووصلنة البيت دموعي ناشفة وعيوني مورمة
ريتال ـ لج نهاوي شلونج حبيبتي شلون احوالج
ـ زفت
ـ تعالي تعالي اطبين تسبحين
ـ اريد اصعد لغرفتي
ماوية ـ روحي لغرفتج ارتاحي بعدين نسولف
نهاوند ـ صعدت بالغرفة وبقيت ابجي عمري 14 سنة ودخلت سجن وية المجرمين
من اكبر شراح يصير بية
والناس شراح تحجي عليه بعد
ماوية ـ سويتي غدة كملتي
ـ اي بس شوي يتهدر مبقئ شي
خلي اخذلهه ريوك هية الوحيدة مقبلت تاكل
ماوية ـ لا عوفيهه خليهه تستراح شوي
ريتال ـ عفت ماوية
وصعدت لنهاوند حاولت اخليهه تاكل قافلة متقبل
كلتلي تريد ترتاح بعدين نكعد نسولف سوية
خليتهه علئ راحتهه ورحنة اني وماوية لغرفتي كعدت ارتبهه وماوية يمي ..
وية الغدة نزلنة سوية حضرنة كلشي ونصبناه سويت صينية صغيرة وصعدت لغرفة نهاوند ادك الباب ماكو مترد
كلت يمكن نايمة
فتحت الباب شوي ماكو احد مموجودة عزا وينهه
وووج مااوية نهااوند ماكو
ماوية. ـ شنووو ماكوو ووين رااحت
وج خاف بالحمام
ـ ماكو احد مفتوح الحمام
نزلنة سوية ندور عليهه ماكو صعدنة يم. خاله ام هناء ندور همين ماكو
خزام ـ شكو؟
ـ نهاااوند مموجودة مااادري وين راحت
ابو صباح ـ وووووين ووولت اني كاااعد هنااا محد طلعع من البيييت
ريتال ـ عزاا وين صارت
ماوية ـ اوكفي خلي ااااتصل عليهه لحضة ..
ريتال. ـ كلنة واكفين عينة علئ ماوية ماعرف وين راحت نهاوند فص ملح وذاب... وين تروح حتئ فلوس ماعدهه.. هاا بشررري
ـ وولج تلفونهه مغلق طلعوو بالشاااررع دووروهه يمعوودين شنوو نكوول لصبااح طلعوووو
ولحكاية بقية........ 🥀
البارت 5500 كلمة مو قص