الحلقة الرابعه عشر
#ليلة_من_فبراير
وشفادها
ظلت مثل حظي الشمس
تنطي ضوة
بَس ماكو واحد رادها
❤️
منال ـ سالفة تحبيي
ومن هالخراابيط موو عليية ..
احجيييي شمصخمةة ويااه
وانتي كل هالاياام مو علئ بعضج
وحتئ اكلج قليـــــل
لـــــــج اااحجي لا اذبحج هناااا والله العظيم
دعاء ـ هاي شبيج ماما
والله ممسوية شي
والله العظيم ممسوية شي
ـ هاي اخر فرصة الج
تحجيين لو اخلص عليييج
وحق ابوية بتربته
اشنقج
واكول شنقت نفسهه وانتحررت وماتت لج ااحجي لا تصخميين وجهــي
نهاوند ـ منال متكدر تصيح
بس لاوية ايد دعاء
وتحجي وصاكه علئ سنونهه
من يمي خفت منهه
وردت اعترف عدنة تلفون ضامي هنا
وبس نخابر بي ممسوين شي ..
بس جنت مرعوبة خاف ترجع تعذبني مثل قبل
دعاء كامت تبجي وتحلف ماعدهه شي بس امهه مدتصدك
منال ـ و انتيي حيوانة اللخ..
احجـــي
هاي عدهه شي وووية المعزززة قيس
لو لاا احجيي شنو تعرفين عنهه
ـ فتحتلي عينهه بغضب وخزرتني
خلتني ارجف معرفت شنو احجي
باوعت لدعاء فتحت عينهه تكلي لاتحجين ..
عـ عمة والله ماعدهه شي
اني وياهه نروح ونرجع بدربنة
ماعدهه شي وية قيس والله العظيم
ـ لـــج يالررعنةة لعدد ليشش متتتزقنبيين مثل الاوااادم
ليشش حالج مخرربط من يوم الحادث
لج احجيي
ـ ماكو شي اني مقهورة
ـ لج لــيش مقهوورة شنوو صاير وانقهرتي عليه هيـــج
مو دكولين ماااحبة ولا اعرررفة
شنو هالقهرر لعد
لااا ماكدرر اصددك ماعندج شيي ويااه
روحي احجييهه لغيري قنعي غيري مو تقنعيين امج مناال
مستحيل ماعندج شي وياااه ماصدك
اني اعرف هالسوالف واعرف هالحالات وادري شنو وراهه مصايب
لج احجي شمسووويلج خليني اتلاحك اذا اكو شــي
ـ عووفيني عاااد ياا ااامي
ممسويلي شــــي
ممسووييي شــــي وااالله
ـ تعاااي
ـ وووخررري عنيييي
ـ منال ماصدكت كلامنة وتعصبت علئ دعاء ولزمتهه من شعرهه وتفر بيهه بالغرفة
طلعت دعاء تركض مهزومة
ومنال وراهه
واني ركضت وراهم
وصلت دعاء يم الدرج ودتنزل
ومن نص الدرج اتزحلكت وكعت وكامت تبجي وتصرخ
نزلنة نركض عليهه
ماعرف ايدهه شلون هييج صارت ملوية
منال كامت ادك وتلطم
واني ارجف ماعرف شسوي
طلعت منال تركض لبيت ام عمر تستنجد بيهم واجوي الولد واخذوهه بسيارتهم
منال ـ ديري بالج تحجين شي لاحد ترة اكص لسانج
ـ لا عمة ما احجي شي والله..
ـ دخلي للبيت يم الولد وديري بالج تطلعين
ـ هزيت راسي يعني اي
مادري شبية اخاف احجي
ضليت بالبيت لوحدي وية ولد عمي ناصر..
شوي وعافوني وطلعو بالشارع يلعبون ..
كعدت لوحدي بالهول دقايق والباب الداخلية اندكت عرفت هاي ام محمد ..
ام محمد ـ ها نهاوند ..
شنو صاير شبيهه دعاء
ـ وكعت من الدرج وايدهه كامت توجعهه
ـ ليش وكعت ؟
قابل اول مرة تنزلون منه لو مصاعدين عليه؟
وبعدين هو درج صبابة وقديم
هسة لو كاشي نكول اتزحلكت
ـ مادري عمة
ـ متدرين لو متريدين تحجين
ارشد ـ ها شكو خير
ام محمد ـ بنت ناصر واكعه من الدرج وايدهه يمكن انكسرت واخذوهه بيت ام عمر بسيارتهم
ـ ادري ليش ماكلتولي اني مو موجود هنا ليش رحتو للجوارين
ام محمد ـ عادي يمعود
انت او بيت ام عمر نفس الشي ..
بس السؤال اليطرح نفسة
ليش وكعت من الدرج!
ـ شنو ليش وكعت من الدرج بلة هذا سؤال؟
ـ اي يعني درج صبة وقديم
قابل كاشي موزاييك لو سيراميك حتئ يزحلك وتوكع هيج
ـ هو لان درج صبة وقديم ومحفر يعثر ويوكع .. متتذكرين شكد بناتنة وكعن منه
ـ اهوو دائما توكفلي سجينة خاصرة وبعدين اي صح بناتي وكعن منة بس محتاجن طبيب لو مستشفئ يوكعن منا يكومن منا ..
بس شوف شنو صاير
وليش هيج واكعه هالوكعه
ارشد ـ عاد انتن النسوان بكل شغلة تخلن أن بالموضوع امشي يمعودة صعدي لابنج لا يوكع من الدرج..
ـ اوووف رايحه ما استر اسويلي شغله تعرضلي بيهه..
ـ عمو نهاوند وين راحو
يعني وين اخذوهه ..ماكالو
ـ لا عمو مادري
ـ هسة اخابر واشوفهم وين
ـ طلع بالكراج وخابرهم ماسمعت شنو حجئ وياهم بس شوي ورد صعد فوك البيته
كعدت بالهول لوحدي ..
مادري شبيه ضايجة ومقهورة واريد ابجي
سمعت صوت عمة كميلة تضحك وية جهالهه وديلعبون
اخذني الفضول ورحت وكفت يم الباب مالتهم
جانت باب غرفتنة سابقا وهسة سدتهه وخلت كنتور عليهه
اتصنت عليهم شلون يلعبون وهي تلعب وياهم وماعرف ويامن تحجي
بس جانت كلش فرحانة وخربانة ضحك
اتذكرت امي من بابا مات
ابد ماكامت تضحك بصوت عالي ويانة
اتذكرت الكياكات الجانت تسويهه الي ولاخواتي وتعلك النة شموع وتقشمرنة عود يوم عيد ميلادنة واحنة فرحانات
اتمنيت ادخل يمهم واعيش وياهم
حسيت حياتهم حلوة مو مثل هنا عبالك حياة بدون روح
كلش مفتقدة للجو الاسري الجنت عايشة بي وية امي وخواتي
عفتهم وصعدت للغرفة فوك
اتمددت بفراشي بالكاع يم الحايط وهمين سمعت اصوات بيت عمو ارشد
ابوهم يضحك وية بناته وابنة
اصواتهم عالية بالضحك يمكن ديلعبون
خليت اذني علئ الحايط وبقيت اسمع
سمعت عمو ارشد يكول ميع ميع وحمودي يكركر من الضحك
اتذكرت بابا من جان يشيل الحان ويلعبهه حمال باجي
ولو يزحف علئ رجليه وايديه بالكاع ويكول ميع
وخواتي صاعدات علئ ضهرة
كمت اشهك وابجي
والله اشتاقيت لبابا وماما وخواتي
ليش اتفرقنة هيج
هسة لو بس ماما باقية
جنة عايشين بنعمة جبيرة وياهه ماحاسين بيهه
بس هسة حسيت بهاي النعمة
مسحت دموعي وبقيت كاعدة بمكاني
احس بيت عمو ارشد
وبيت عمة كميلة
دافي وكله حيوية واللوان وحلو اكيد الكعدة وياهم حلوة
بس بيت عمو ناصر عبالك مابي الوان بي ابيض واسود مابي روحلا عدهم جو اسري بيناتهم ابد موحلو ابد
سمعت باب البيت انفتحت
كمت من مكاني ونزلت اركض
شفت دعاء ايدهه لافيهه
وعيونهه مورمة بجي
كعدت خاله ام عمر بالهول
ونزل عمو ارشد وعمة ام محمد
كعدو يمهه
ارشد ـ ها عمو سلامات شبيج
منال ـ والله الدرج صاير كلش تعبان لو عندي فلوس الا افلشة واسوي غيرة
ام عمر ـ ديري بالج عليهه ام وسام لا تضغطين عليهه بالاكل
ـ لعد شلون يا ام عمر تقبلين تشوفين ولدج مياكلون غير من خوفي عليهه هيج حجيت وياهه
ارشد ـ هاي كلة لان ما اكلت ؟
ـ اي صيحت علييهه حتئ تاكل
بس هية المضروبة زعلت ونزلت تركض واتكربست من الدرج انوب ..
يلة الحمد لله رض بالعضام ولا كسر
ام عمر ـ اي بس الله ستر شوي ويصير كسر ترة ايدهه كلش متأذية
ام محمد ـ هو منو اله نفس ياكل يا ام وسام صدك تحجين انتي ؟
هذني بناتي كفليج الله من يوم المصيبة لكمه ميخلن بحلكهن
ممرودات مرد علئ عمتهن شفاء وبنتهه وعمهن توفيق وولد عمتهن سهير ..
ليش الراحو قليل
وفوكاهه كلهم بيوم واحد
خليهه علئ راحتهه تاكل لا تضغطين عليهه خطية
ام عمر ـ اي والله صدك ترة حتئ احنة نفس الشي والحمد لله احنة ماراح من عدنة احد بس الشهية مسدودة
والله الاكل يبقئ يومين تلاثة يلة يخلص
نهاوند ـ كلنة ملتمين بالهول
وكاعدين يسولفون بيناتهم
وصاح عمو ارشد ..
ارشد ـ بلة هاي كل عقلهه
اسمعو شلون واصل صوت ضحكتهه ليمنة…
منال ـ ديلة بلة العالم مخبوصة ومتشتهي تاكل ومخلصتهه بجي وهاي ولاجن رايحلهه رجال شطولة وشعرضة منهه وميتم ولدهه ..
نهاوند ـ محد حجئ من الموجودين
بقو واحد يباوع علئ اللاخ..
منال ـ بشرفكم بضميركم اذا عدكم ضمير
هاي شكول وحدة لازمة عده؟
ارشد ـ لا اصلا بالعكس ميكفة وفرحانة مات اخوية خلصت منه
ام عمر ـ شكلبهه كميلة ماجانت هيج
ام محمد ـ كثر الدك علئ الحديد يفك لحامة ام عمر ..
ترة السواه المرحوم وياهه مو قليل
ارشد ـ شسووة؟ راد يتزوج وهذا حلال الله حلله الة تجن انتن تحرمنه!
ام محمد ـ منحرمة يابة بس من تكفييني اني وبناتي وابني وتعيشنة خوش عيشة ابيت مال اوادم ملك الي ولجهالي ومستورين
عود روح دور الثانية..
محد لازمك
ام عمر ـ شنو هاي
انوب انتو راح تتعاركون
ارشد ـ شبيج اخذتي علئ نفسج منو كلج اتزوج عليج
ـ ومنو كلك اني دحجي عليك؟
كاعدة احجي بشكل عام
منال ـ حتئ لو متزوج عليهة مو هيج تسوي كدام جهالهه
ترة مابقت حرمة لابوهم
و ولدهه كبار مو صغار وكلشي يفتهمون يعني ابوهم ماصارلة شهر وهي مخلصتهه تگهگهه وضحگ شنو دافنين راس بصل
ارشد ـ اي والله
منال ـ عمي علئ الاقل تحترم البيت الكاعدة بي ترة هذا بييت ابو مو بيته هو يعني لازم تقدر احنة وخوته مقهورين عليه ..
مو بلة ابو محمد ؟
الجوارين التسمع شدكول
ماصدكت مات اخوكم حتئ تلعب بذيلهه
ام محمد ـ عوفي ابو محمد علئ جهة حبابة… عود من يطلع ناصر بالسلامة احجيلة وخلي يروح يوكف بوجهه ليش تريدين تخلين ارشد بوجه المدفع
ـ لان يكولون هو الجبير بهالبيت بعد عماد ..
مادري يمكن جذب ويطلع صغير الگوم رجلج
ارشد ـ ادري هسة انتن دتمدحن بيه لو تحجن عليه ؟ اني شدخلني بالنص
منال ـ كيفك بعد شلون يفسرهه عقلك
ام محمد ـ دروب منال كلهه اعرفهه
دائما تريد تحشم الناس ضد التكرهم ..
بس عيني ام وسام
حبيت اكلج شغلة
ترة اني وكميلة مابينة شي
والبارحه دزيتلهه طبخ
ونزلت تعللت يمهه بالليل
وبالنسبة الي ماشوف شي غلط بتصرفاتهه
يعني واذا زوجهه مات لازم تدفن نفسهه هية هم؟
ارشد ـ ها؟ هيج الحجي
ـ اي عيني هيج الحجي
اشو انتو بالفاتحه وادورون بحجة متكدرون تعيشون بدون المرة لان عدكم جهال ..
وكميلة دتضحك ابيتهه
ماطالعه بالشارع
كاعدة ولازمة عدة المرية وممدخلة غريب عليهه ولا طالعه يم غريب هي حتئ يمنة متجي تكعد علمود ارشد تكثل عيب
يعني شتريدون منهه
الا تدفن نفسهه وتبقئ تبجي وتنوح وتورم عينهه يلة تسموهه ذاك الوكت وفية؟
ارشد ـ لعد شلون يصير الوفاء من وجهه نضرج؟
ـ هسة عاد انتو شلونكم
وخصوصا توفيق الله يرحمة
وو منريد نحجي تذكرو محاسن موتاكم بس بخطية علئ عينهه وجان ديتزوج عليهه وهية وحارك كللبهه وماذيهه هي وجهالهه وترة المرة مابيهه قصور
حلوة وشابة وجايبتلة جهال ولد وبنات شيريد بعد اكثر الرجال من هيج
وكل هاي وراح شاف علئ غيرهه
صدك بعض الزلم متملي عينهم غير التراب
منال ـ ههههه منو حلوة
هاي ام اربع عيون .. عودة المطيرجي شلون تشوفيهه حلوة
ام عمر ـ لا اني هيج غيبة ونميمة ما اتحملهه..
شنو هالحجي ياجماعه اشو حتئ الميت ماخلص منكم..
اعذروني ماكدر اضل اكثر اترخص منكم اروح لبيتي لان عفت ابو عمر بالببيت وحدة
ام. محمد ـ اي والله شوفي شلون خلتنة نشيل بهالغيبة هسة احنة ناقصين ذنوب
منال ـ هااا اني شيلتج غيبة
عشتو منو كلج سمعي
نهاوند ـ راحت ام عمر
وضلو كلهم كاعدين
وكل شوي تتعلك عيطة بين منال والبقية
عافتهم دعاء وصعدت فوك وصعدت وراهه
شلونهه ايدج هسة
ـ كلش توجعني عندي رض من المفصل بس هواي اذتني
ـ زين كعدي ليش واكفة
ـ اكلج وين التلفون
ـ هنا بين الهدوم خليته
ـ ادري شبيج هيج غبية
لو وسام لاكيه غير تذبحنة امة وتذبنة للجلاب ..
قفلي الباب وجيبي
ـ طلعت التلفون وقفلت الباب ورجعت يمهه .. شتريدين تسوين عليمن تخابرين
ـ اني الهه الا اخليهه تندم علئ السوتة بية
ـ عزا هاي عليمن تحجين
ـ علئ منال يعني عليمن ..
تريد تصير براسي شريفة واني اعرف كل خيستهه
ـ عزاااا هاي امج
وج شلون هيج تحجين عليهه
ـ حرام مرة ابوج ازدهار احسن منهه
امي شنو..
بس تعرف تتأمر وتضرب
ـ ليش مو متخليج تشتغلين بالبيت وتخاف عليج وتريدج تاكلين وكلشي تجيبلج وتتشريلج
ـ اي وشنو يعني قابل مسوية فضل عليه غير هية امي ..
وبعدين مو هيج تسوي بية
تتهمني عندي شي وية قيس
وتضربني وتفرني من شعري
وتالي تركض ورايه وتخليني هيج اتاذة
هسة لوعندي شي جان اللطمت وسكت بس ماعندي شي وتذب تهمه عليه ومتصدكني فوك القهر ..
شوفي بنات عمو ارشد شلون امهم تعاملهن ..
والله نيالهن احسدهن من عقلي وج ابد متضربهن ولا تكتلهن ومددلتهن فد مرة
ـ اي صدك هية هواي تكتل وتضرب
وحتئ تجوي بالنار ..
رفعت ايدي وفركتهه حسيت بجوياتهه انعادت عليه
ـ اي شفتي ..
تريد تحرمني من الحب وهية نفسهه حبت خمستالاف مرة حبت واحد جيرانهم وماقبل يتزوجهه
تحلل علئ نفسهه وتحرم علينه
ـ جيرانهم ؟
استغربت من كالت جيرانهم..
الاعرفة بيت منال بغير منطقة
يعني بعيدة مو جيران بيت جدو ..
ـ اي جيرانهم وجان متزوج وعندة جهال بس بعدين اجتي مرتة لهذا الرجال وسوتلهه مشكلة جبيرة وبيبي كتلتهه وكعدت
ـ عزا هاي هية حجتلج؟
ـ لا هي تحجيلي شنو
بس اسمعهن من هي وخالااتي يكعدن يسولفن وعبالهن احنة نايمات ..
اصلا لعلمج هية مو بس هذا حبت
حتئ حبت ابوج همين وماقبل يتزوجهه لان هية اكبر منه
ـ سويت نفسي متفاجئة من الخبر بس انعكد لساني معرفت شحجي وياهه
ـ والله هية وخالاتي خلصنهه حبيات بشبابهن وجاية هسة تبعيهن عليه وتحجي بالشرف وكسرة الوجه والله الا اكسر وجهه والا انتقم منهه من صدك علئ هالضرب
ـ عزا دعاء شتريدين تسوين يمعودة وج والله تموتج
ـ خلي تموت اوي علئ اساس فد عيشة حلوة. احنة عايشين..
والله لو قيس اتزوج لو ما اخذ غيرة
ـ انتي ليش مجلبة بي هيج
ـ شنو ليش مجلبة بي غير احبة
ـ اي بس تتذكرين بعرس اخو ام محمد مو حجيتي وية غيرة صديق العريس يعني عادي عندج تاخذين غير قيس
ـ ولج ياغبية عصفور باليد احسن من الف علئ الشجرة
ـ يعني شلون
ـ قيس راح يسفرو خارج العراق
اختة حنان راسلتني قبل يومين واذا اتزوجنة هالفترة راح اسافر وياه واااخلص
ـ تسافرين وياه؟
ـ اي ولج اسافر
واتفرج علئ الناس شلون عايـــــشة واطلع واتوونس واتشرري وافترر
واخللص من منال وضربهه الي
ـ بس هو قيس منو يكول يكدر يتزوج هسة يعني خطية ماعندة رجلينات
ـ اووف اي ..
وبعدني ما اكدر احجي وياه
كلتلهه لحنين بس يطلع من المستشفئ تخابرني حتئ احجي وياه
واكلة نتزوج شلون ماجان
واسافر وياه…
الله نهاوند
اسافر واطلع اتونس
اروح افتر بسوريا واشوف سوگ الحميدية وجبل قاسيون وجرمانة وهالاماكن المادري شسمهن بعد
ـ هاي مين تعرفيهن هالاسماء ؟
ـ غير من الحقيرة روان
خابصتني بيهن عود هية رايحه ومسافرة وتفتر هناك وتتفيك عليية
ـ منو روان
ـ لج بنت خالي رووان
هذاك اليوم بالفاتحه اجتي ماشفتيهه
ـ لا مادري مانتبهت
ـ احسن لاتشوفيهه شكلهه مثل القردة شكد اكرهه الجلبة الحقيرة ..
بس احسدهه علئ ابوهه وامهه
شكد حلو اخذوهم وسافرو لسوريا يتونسون سنتين بقو هناك وهسة رجعو
وبقت تتفيك علية
اني مسافرة واني مفترة بالسوك واني رايحه واني احجي سوري واني مدري شنو ..
الله ياخذهه مبخته
قابل مثل حظي المصخم
عدهه اب مثل ابوية
لو عدهه ام مثل امي
حابسينة هنا مثل الجلاب
سفرة مثل البشر ميعرفون يطلعونة ويرفهونة
ـ ليش مو ذاك اليوم اخذوكم وطلعوكم بالسيارة
ـ اي وشنو يعني طلعونة بالسيارة
قابل سفرونة بفد مكان حلو مثل البشر
بابا انتي كلشي ماشايفة بهالدنية
ولج هاي روان شوفتني اشكال الصور
رايحه للشمال وللبنان مفترين فر
وهسة عود يريد ابوهم ياخذهم لتركيا ..
اوووف شكد اكرررهه اموت منهه
ولج ابويه خارج بغداد ممطلعنة ملطومين هنا ومحبوسين
واضاهر راح نندفن هنا همين
شوكت نعيش مثل باقي البشرر شوووكت
ـ اي هم صدك…
منال ـ ويـــــنج دعاااء نهاااوند انزلو جوة ليش مطمورات فوك
دعاء ـ اوووف شوكت اخلص عاد والله ملييت
ـ امشي امشي خلي ننزل لاتجينة
ـ روحي انتي
اني دزت مسج لحنان بس ماردت علية بعدهه ..
ـ زين اذا كالت ليش ما اجتي
ـ كليلهه نامت تعبانة
وج تعاي تعاي هذا مازن راسلج
ـ لالا عفية مو وكتهه
ـ راح اطفي التلفون عود شوفيلة حجة من تحجين وياه ..
هاج ضمي التلفون بالكنتور بسرعة
منال ـ وويـــــنجننن
نهاوند ـ اي عمة اجيت ..
شمرت التلفون بالكنتور ونزلت اركض
ـ وينهه ؟
ـ نامت عمة خطية تعبانة
ـ استغفر الله ماردت أئذيهه غير خايفة عليهه..
امشي وياية ساعديني
عندي هدوم متلتله راح اغسل وانتي شريهن
ـ اي ..
ـ والمواعين ليش ماغسلتيهن من طلعنة ؟
ـ ها .. مادري نسيت
ـ نستج العافية بنت الكلب تبقين خايسة علئ امج .. امشي يلة جلفيهن ..
ـ اي هسة
ـ ورتبي الهول ومسحي الكاع عمج الافندي مينزع قندرتة قبل لايدخل
لا لازم يدخل هو صخامة وترابة للبيت شوفي التراب والطين من رجليه
ـ اي عمة ..
رادت تروح تغسل الملابس بالغسالة بس ماعرف منو خابرهه وكلتلي روحي انتي غسليهن ..
حرت مين ابدي..
رحت للغساله فتحت المي عليهه
ورجعت للمطبخ غسلت المواعين ورحت للهول نضفت حسيت ضهري انكسر ..
جنت افكر بكلام دعاء
شلون تفكير حلو
تتريد تتزوج وتسافر
وتخلص حتئ تطلع تتونس
الله نيالهه
شوكت اني هم يتقدملي مازن واسافر اني وياه من دولة لدولة والبس احلئ لبس ونفتر بالسوك وكلشي نشتري
اووف ..
سمعت صوت الغسالة صار عالي رحت اركض ..
عزا هاي اني شسويت
الغسالة تفايضت بالمي
هسة تجي تموتني والله ..
انكسر ضهري يلة كملت شغل
صعدت للغرفة خليت نفسي علئ الفراش وخمدت..
مر كم يوم وطلعو عمو ناصر من المستشفئ ..
وسمعت عمة سهير همين طلعت واخذهه زوجهه
منال انخبصت بي حطلته الجرباية مالت دعاء بالهول حتئ ينام عليهه
ودعاء كامت تكمز متقبل ياخذون جربايتهه ..
بس ماهتمت الهه فتحتهه هية وسام ونزلوهه
تكول حتئ الناس اليجون يشوفو هنا خو ميروحون لغرفته
جابو شايلي ودخلو للبيت
اشوفه ملفلف ومتأذي ..
اتذكرت ابوية من جابوه من المستشفئ
همين هيج حاله
كلش حنيت عليه ورحت كعدت يمه
بس هو ماهتملي جان يون
انكسر ضهري بهالفترة
هواي ناس اجو يشوفو
كومة خطار يجون وكلهم زلم كبار
بيهم اصدقاء وبيهم كرايب
واحنة شايلين صينة
وحاطين صينية
وكل هاي المواعين علية
والتنضيف وغسل الهدوم همين عليه
لان منال التهت وية ناصر متسوي شي بس تطبخ وتصب الاكل..
حسيت جسمي اتفلش بعد مبية حيل ستوني خلصت غسل المواعين وصعدت اتمددت بفراشي ..
صعدت منال جايبة اكل لدعاء ودفرتني
ـ كوومي اكو حمار هالوكت يخمد..
كومي مسحي الهول طلعو الخطار
ـ عمة والله تعبانة
جسمي تفلش وراسي يوجعني
خلي باجر الصبح امسحه
بعد مبية حيل هسة
عاطت بية عيطة قوية وكلتلي كومي راسا كمت ابجي
منال ـ شبيج تعوين انوب ؟
ـ عمة والله تعبت جسمي كلش يوجعني وايدي ورجلي متشنجات
ـ وطبج مرررض فوك مررض
ترة كاعدة تشتغلين بلكمتج هنا
قابل فاتحة ملجأ ايتام حتئ اصرف علييج بلوشي ..
ويلة امشي مسحي الكاع كطف الجكاير وتراب متناثرة بكل مكان ااامشي عاد
ـ مسحت دموعي وردت اكوم
بس صدك مبية حيل
بقيت شوي كاعدة بمكاني مبية اتحرك
اتخبلت منال وعبالهه دة اعاندهه
لزمتني وملختني كتل وفرتني من شعري…
ـ لج ااااادبسزز اني تعاانديني
ـ مو اعاند بس والله تعبانة
ـ اليووم اااني ارربيج ااني ااالج
لج ميكفي متحملتج ومنيمتج بنص اولاددي
لج كلهم شمرووج عليية
محد يريدج منهـــــم
منوو بيهم يتحمــــلج مثلييي
ارشد افندي هو ومرتة
لو كميلة خااتون
لج لو ما انــــي تنشمرين بالشااااررع مثل الجلااااب يا ادبسززز ياساقطة
ـ خرسيت ماعرفت شحجي من الدفر والضرب
سحلتني من شعري واخذتني للحمام وهي تكفخ وتكتل بية
شالتني شيل من شعري خلتني اوكف علئ اطراف اصابعي
وشغلت مكينة وزينت شعري صفر
حاولت اوخر عنهه
بس لزمتني من رقبتي واضافرهه نبتتهن بلحمي
غمضت عيني من الوجع عبالك شعراية دخل بيههن
ـ عانديني بعد يبنت رحمة الخايسة
خااف نسيني ايام الشوراع الدحتي بييهه واكلتن من الزباااله
والله ارجعج الهه
لو اشنقج واكول انتحررت وانعل ابوج لابو اهلج يابنت الكلب
ـ شمرتني بالكاع وطلعت
اباوع لشعري بالكاع مطشر..
جسمي كلة يوجعني
راسي احسة يريد ينفجر
لزمت رجلي وايدي وكمت افرك بيهن
هاي شعدهه وية شعري ليش هيج تسوي بية
قبل فترة كصته ولادي
وكوة طول وصرت مثل باقي البنات
و هسة ردت زينتة صفر
اشوف لشعري وابجي
ماعرف علئ شنو ابجي
علئ وجع جسمي
لو علئ تعبي لو علئ شعري
لو ابجي علئ حظي
لو ابجي لان ماعندي اب وام يحموني من هالظلام..
الشعر كام يحكني من وكع علئ جسمي
سديت الباب وسبحت وطلعت
دعاء ـ ادري ليش تعانديهه شنو انتي ما اتعودتي علئ امي
ـ اباوع لدعاء كاعدة وتكلب بالستلايت
بايدهه الملفوفة ..
حقدت عليهه وكمت ابجي لان كلما امهه تكلهه سوي شغله تكلهه ايدي توجعني ماكدر وامهه تعوفهه وتجي براسي
بس هية عادي كاعدة تستعمل ايدهه مبيهه شي..
ادري مو ايدج مبيهه شي
كومي اشتغلي وياية بالبيت والله تعبت وهلكت وفوكاهه من احجي انضرب وتالي هيج سوت بية
ـ سمعي ولج
اذا تحجين شي لامي
اكوللهه عن مازن واخليهه تشوف شغلهه وياج
ـ عزاا هاي شبيج ليش تهدديني
ـ لعد شنو هيج تحجين وياية ؟
قابل انتي امي حتئ تكوليلي كومي اشتغلي..
وبعدين صدك
ترة انتي ساكنة ابيتنة وكاعدين نصرف عليج من فلوسنة
اقل شي تسويه النه تشتغلين بالبيت قابل الشغل يموت
شنو نستي شلون بقيتو بالشارع يومين متلطمين انتي وخواتج
هسة كمتي تتبطرين علئ نعمتج ..
ـ شبعت بجي من حجيهه..
خليت ربطة علئ راسي وعفتهه ونزلت جبت السطلة ووصلة المسح وكمت انضف ..
ادري الخطار اليجي ليش يشمر الزباله
ليش كطوف الجكاير وقواغد الجكليت بكل مكان
مو هاي نفاضات يمهم
وفوكاهه تراب بأحذيتهم اي ليش مينزعوهه بالباب ميكولون هذا الي ينضف خطية ..
شافني ناصر ابجي وعيوني حمرة بس ما اهتم ولا حجة ويايه..
كملت شغلي وصعدت فوك
نزلو جوة وسام واخوته وبقيت اني ودعاء
دعاء ـ تعالي شوفي مازن شدزلج
ـ ركضت شفت شنو دازلي ..
مسج مكتوب بي..
احبج اشتاقيتلج شوكت اشوفج خابريني مشتاق لصوتج
ـ باعي لاتكولين اله زينتج امي صفر ترة يعوفج
ـ لعد شلون اذا اجه خطبني اكيد راح يشوفني
ـ لالا ضمي نفسج لبسي ربطة بين ميطول ..
اكلج ليش هو شوكت كال يجي يخطبج
ـ لا ماكال .. هيج كاعدة احجي بكيفي
ـ يمعودة مثل حالي
شفتي حنان شدزتلي قبل شوي
ـ شنو شبيهه
ـ تكولي امي تكول مو وكتهه نزوج قيس احنة بيا حال
منا ابني الجبير مات ومنا قيس هيج حاله عود خلي يطيب والله كريم منا لسنة سنتين ..
شفتي حظي الفكر
ـ لعد شلون شراح تسوين
ـ شنو شنو اسوي ..
عشتو ..
قابل اضل عليهم انتضرهم كل هالسنين
عبالي راح اسافر وية قيس واعيش حياتي مثل البشر بس الافندية يريدون يسفرو وبعدين يفكرون يزوجو ..
وبعدين صدك شكو اخذ واحد رجليه مكطومة
ـ ذاك اليوم جان تفكيرج غير شكل وامج كتلتج لان بس تبجين
ـ اي يسمو حب مراهقة
خالتي حجت ويايه من تلفون امي تكلي هذا حب مراهقة مو حب من صدك ..
ـ يلة الله يعوضج بالاحسن منه
ـ اي ان شالله يعوضني ..
لان هسة خابرت علئ رشيد
ـ عزة رشيد منو
ـ لج صديق العريس اخوهه لام محمد الشفته بالقاعه
ـ عزا ليش انتي اخذتي رقمة
ـ هههههههه اي شفتي شلون نفعني بوكت العازة...
تعالي شوفي شرسلي
ـ اتقربت يمهه شفت دازلهه كارت رصيد اكلج يعني هذا راح يتزوجج لو لا
ـ اي اكيد يتزوجني لان كلي احبج
تدرين شنو يكلي
ـ شنو ؟
ـ يكلي شكد كبرتي بعيني ماخابرتيني بسرعه شكد صار للعرس وهسة خابرتي يعني انتي بنية ثكيلة
شفتي شكد كبرت بعينة اكيد راح يجي يتزوجني
ـ زين شوكت
ـ اكيد مو هسة
همين يحتاج وقت وفترة تعارف ويجي يخطبني بعدين ..
ـ صفنت عليهه
شكد فرحانة وتحجي مكيفة مدحهه رشيد ..
حجيت بكلبي دعاء جابت اثنين حتئ يخطبوهه
واني واحد ما دة اعرف اجرة
هالغبي مازن شوكت يخطبني مادري..
مرة الايام ورحنة للمدرسة نستلم النتايج
اني طلعت مكملة بالفيزياء والانكليزي
ودعاء طالعه باربع دروس
فيزياء وكمياء ورياضيات وقواعد
من عرفت اني مكملة دكيتهه بجي
حسيت ماراح انجح لان هالدرسين كلش ضعيفة بيهن جانت امي هية ادرسني هسة منو يدرسني ..
بهالايام عمو ناصر كام شوي يعتمد علئ نفسه يكدر يتوجة ويكوم يروح للحمام
بس الخطار ما انكطع عن البيت
وكلما يجون الناس
يسدون الباب الداخلية والباب الثانية حتئ منشوفهم
ما اسمعهم شيحجون
بس اسمع دوي سوالفهم واصواتهم
جنت واكفة بالنطبخ اغسل مواعين العشة
ويمي دعاء دتاكل فواكه
اجتي منال كعدت يم بنتهه واخذت موزة
منال ـ انتي مو تعبتي من الشغل وجسمج تفلش وبعد مبيج حيل تتشغلين يا نهاوند
ـ التفتتت عليهه اباوع بخوف ..
ها .. لا
ـ لا لاتخافين لا تخافين ..
قررت ازوجج حتئ ترتاحين
دعاء. ـ شنووو تزوجيهه قبلييي صدك تحجييين
ـ كلمن وقسمتهه لا تنجلبين…
ـ اني اكبرر منهه غير اني اتزووج
ـ هاي تصير بين الخوات مو بين بنات العم يالغمة الثوولة..
وبعدين هية مكملة
يعني خايبة بالدراسة وكلشي ماكو
وفوكاهه يتيمة
لا اب ولا ام ولا بيت مثل البشر يلمهه
خليهه تتزوج ونخلص منهه
نهاوند ـ اتزوج؟
ـ اي اتقدمولج ناس وراح ننطيج
وللحكاية بقية……….. 🥀