الحلقة العاشرة
#ليلة_من_فبراير
بالك تسوي احساس للينكر الخير
الشمعة عد عميان مااله تقدير
❤️
منال ـ ماكو داعي ؟
لعد من لعب عليه اكثر من 3 سنين شتسميهه
دمرني بهالسنين
ضحك عليه
من يكعد يلزم ويحضن بية
واني مأمنة بي
ولج جنت مستعدة
انطي شرفي وماكول لا
جنت ابوك فلوس من ابوية
وانطي
جنت اجمع فلس فلس من مصروفي واحرم نفسي من كلشي وانطي
وهو يضحك عليه بأالحالنة الفاشلة
ماكدر انسئ كلامة وغزلة وحبة الي جنت متأملة زواج منة
تالي يكلي اني ماوعدتج بشي انتي عجــــــــوز بالنسبة الــــي ماااريددج
اريد شابة بعمري لو اصغر منييي
ااااني عجوووز ااانــــي
ختام ـ لا حبيبتي حشاج قابل بشكد اكبر منه هية 5 سنين بيناتكم
ـ ويشووفني عجووز هي 5 سنين وهيج حجة
ولج لووو بيدي اطلعة من كبرة واثرمة ثررم وهم ميبرد كلبي
متتصورين شكد فرحت من شفته هيج متعذب ومكسرر ونايم بمكانة
الله ..كعدت يم راسة واباوعله بشماته
يباوعلي بخزي وكسرة عين
احلئ احساس من اشوف عينة تغرك بالدمــــــع وميكدر يحجي ويعبر عن نفسة
الله ..
مي باااارد نزل علئ كلبي من شفته هيج حاله ..بس لا والله ما طفت ناري
لالا مااطفت ولا راح تطفئ ابد
ختام ـ ادري مو اخذتي اخو
مو جنتي دائما تحركين ناصر عليه
مو بقيتي تسوين مشاكل بيناتهم وحركتي اهلهه عليه
ولج خليتي حتئ عمي حمزة الله يرحمة وعمتي حورية يتعاركون وياه
ـ ميكفي ..
واذا علئ عركاتهم وياه
فهو هم جان اعوج وياهم
مو خش ولد وصارو ضدة
يعني مااخذت بثاري كلة منه
ولا انتصرت عليه
ليش تنسون شكد وكف ضد ناصر حتئ لايخطبني نسيتن شكد سوة مشاكل وية اخو علمود مياخذني
ماكدر انسة شي
شنسة منة ومن مصايبة
انسة من خطب بنت عبدالله
شلون جان يباوعلي
ويكول اصغر مني بنت شيخ هاي مؤدبة
طفلة واربيهه علئ ايدي
عود يذبلي حجي ..
ااااااخ غل بكلبي ميروح ابــــــد
ختام ـ عيني هيام
احجي وية اختج عقليه
بابا حيري بروحج بعيشتج
عوفيهم ورة ضهرج يولون
الي مات منهم مات
والي مدري وين راح واختفة
بعد علئ شنو هالحقد
هيام ـ اذا هي لحد هسة تتذكر فؤاد شسوة بيهه ورحمة شلون جانت تكايدهه جاية هسة تريديهه تنسئ كل عقلج؟
منال ـ جانت تكيد بية عود هي عروس صغيرة عمرهه 17 سنة وبنت شيخ وصديق عمي ويجوز جان حاجيلهه عني وهي تحقرر ويايه ..
اووف يانار كلبي.. حرامات
ماضلت هواي وية الحقير الله لايرحمة
جنت محضرة الهه مصايب شكبرهه تغطيهه وتغطي اهلهه
بس المعفنة خلصتهه ابيت ابوهه تتزعل ويسحلون بيهه يراضوهه
ختام ـ وتالي اطلكتتت ورااحت عوفيهةةة يابة حيري بحيااتج
هيام ـ هسة مو بنتهه صارت جوة ايدج ..
ولاعبة بيهه طوبة
اي كافي يا اختي تحركين بروحج
محد يسووة هيج تسوين بروحج علمودة
نهاوند ـ اسمع حجيهه وارجف
يعني ابوية جان يحبهه ويريد يتزوجهه وبعدين عافهه ..
من هاي تكرهني
مادري شبيهه ايدي كامت تختض
خفت لاتوكع الصينية من ايدي
اتقدمت خطوتين وكحيت ودكيت الباب
هيام ـ يا هاي بنت فؤاد هنا
ـ عمة هاي الكليجة والـ
ختام ـ خاف سمعت حجينة
ـ كلبي كام يدك من الرعب
راسا كلتلهه عمة ستوني اجيت من المطبخ
منال ـ ويطبهه طوب
سمعت او لا
منو ياخذ بحجي هالخبلة
تعالي جيبي الصينية هنا
ـ دخلت خليت الصينية علئ الفراش وطلعت اركض
ماعرف شلون رجلية مشت
هيام ـ خطية الطفلة ..
ترة كلنة جنة نعرف فؤاد ميحب بنته بسبب امهه
و شمروهه علئ عماد حالهه حال اليتيمة
يعني مالهه ذنب بسوالف امهه وابوهه
ختام ـ بس سبحان الله شكد تشبه فؤاد نسخة منة بالضبط
هيام ـ وهمين بيهه لمحة من امهة
منال ـ اي مبينة بنت رحمة العرمة
وفؤاد النكس
متشوفين ماكدر اباوع بوجهه الخايس ماخذة منهم الله ياخذهه يمهم..
اكول كافي عاد ومعليجن بهالسوللف
ادري انتن خواتي لو خواتهه
اكلن اكلن لاتضلن تسولفن
اي سولفيلي شلونهه حماتج شسويتي وياهه
ـ عفتهم ورجعت للمطبخ
كعدت بالكاع شوي ارتاح من السمعته
هو حجي طبيعي
بس الاسلوب الجانت تحجي بي منال يخوف
شفت صينية مال بيت خاله ام عمر علئ المجمدة
كمت فتحت الجدرية
شفت تشريب وقطعه لحم وخضرة وماعون تمن وخبزة
واني جوعانة لان ماشبعت من الريوك
كلت هسة يشوفون اللحم وياكلو
كعدت اكلت اللحمة والتمن والتشريب والخضرة علئ السريع قبل لا يجون ..
خلصت وغسلت الجدرية وكلشي كملت بس بقت الخبزة ماكلته خليتهه وية الصمون
سمعت صوت ولد عمامي يلعبون ويهوسون ..
اتقربت من الشباك اشوف عليهم بالطرمة يلعبون
كلش اشتاقيت لخواتي بهاللحظة
يارب يكونن بخير عايشات وشبعانات ومحد يضربهن..
نزلت منال ورحت اركض للغرفة
شافتني وصاحتني حتئ اساعدهه
تصب بالاكل وتحجي عليه ..
غير افتهم شنو تريد وليش تحجي وتغلط بس بعد السمعته ميحتاج احد يوضحلي شي بعد ..
سوت الغدة ومدت السفرة
جانت مسوية دولمة وتمن احمر وسمج
وزلاطة وطرشي ومقبلات وكاستر ومادري شنو ..
رحت وبقيت بالغرفة مالت بيبي كاعدة وهمة هم محد منهم صاحلي علئ الغدة
همزين اتغديت ..
جان اخذو اللحمة مني والتشريب وكتلني الجوع
كل شوي الرياجيل صوتهم يعله بالسوالف بس ما افتهم عليهم شنو يحجون ..
خلص النهار تقريبا وراحو بيت اهل منال
مر كم يوم وعمو ارشد تقريبا خلص بيته
جان يصيحلي امسح الكاع لو اكنسهه من الحديد الناعم البيهه
محد ماذيني بهالبيت بكد منال
متحب تشوفني اضحك لو متمددة لو اريد انام راسا اطلعلي شغلة من جوة الكاع وتكومني
جروحي طابت الي بوجهي بقة اثر قليل
ودكت رجل خاله ام عمر الا تشوفني ..
لان كلما تجينة منال اطلع الهه عذر
ام عمر ـ وينهه لازم اليوم اشوفه
منال ـ وين تقبل تطلع كدام احد ..
كلتلج مريضة مو صاحية
ـ لالا لازم اشوفهه نهاااوند وينج خاااله تعاالي
ـ سمعت خاله ام عمر تصيحلي ماعرف ليش خفت
راسا وراهه صاحتلي منال...
خليت الحجاب براسي وطلعت
نعم خاله
ام عمر ـ ياعيني ماشاالله
هيانهه مثل الوردة المفتحه شبيهه عين الله تحرسهه..
تعالي ياخاله وينج كل هالفترة اجي وماكدر اشوفج
منال ـ مو كلتلج متقبل تطلع تحبس روحهه بالغرفة
ـ واكفة واسمع حجيهم اشرتلي خاله ام عمر واتقدمت عليهه كعدت يمهه
ـ تعالي والله اشتاقيتلج فدوة لهل وجه
…شوفي شجبتلج ..هاي كلهه الج
منال ـ شنو هاي العلاكة
ـ شوي ملابس دشاديش وملابس داخليه غيارات البنية تحتاج مو مثل الوالد
ـ يا ليش كلفتي نفسج عمامهه موجودين
ـ لا اني بعد اتكفلتهه وهذا اتفاقنة ..
هاج خاله شوفي هالملابس علئ كدج روحي جربيهن خلي اشوفهن حتئ اذا صغار ارجعهن اجيب غيرهن..
ـ اخذت العلاكة ودخلت للغرفة شافتني دعاء واجتي تركض
دعاء ـ هاي شنوووو
ـ هدوم جابتهه خاله ام عمر
كلبت العلاكة وكامت تفتش
رحت ورة الكنتور لبست الدشداشة وطلعت يمهم..
ام عمر ـ اااي والله نفس القياس اعرف قياسج.. الف عافية عليج بنتي
منال ـ اي .. حلوة
ـ وبقية الهدوم نفس قياسج لو لا
ـ استحيت اكلهه ماكدرتهن
كلتلهه اي وسكتت
ـ اي خوش تلبسيهن بالهنا خاله
دخلت للغرفة شفت بيد دعاء حلويات مادري حاطتلي حلويات بالعلاكة
تحجي وياية دعاء وتضحك تمول اكلت حلوياتج ابتسمت وماحجيت شي ..
نزعت الدشداشة وخليتهه بالعلاكة
باوعت شو هاي الملابس قليلة وين راحن البقية ..
اكلج دعاء وين باقي الهدوم
ـ هيانهن خلي اني اكدرهن حلوات
ـ سكتت ماحجيت شي ..
ردت صاحتلي خاله ام عمر وطلعتلهه
ـ تعالي ما كلتيلي طيب اكلي لا
ـ اي خاله طيب عاشت ايدج
ـ الف عافية مشتهية اسويلج اكل معين شي ابالح
ـ لا خاله شكرا
ـ المدارس بعد شهر ونص تقريبا يرادلج كسوة للمدرسة
منال ـ اااي اني راح اخذهه هي وبنتي واشتريلهن اذا تحبين انطيني الفلوس اني اجيبلهه
ـ لالا اني اعرف حجمهه واشتريلهه
ـ لااا ليش يمعودة لاتتعبين
وينج وين فرة السوك
متخافين علئ روحج كله مفخخات وعبوات
جيبي الفلوس اني اشتريلهة عيوني ام عمر
ـ الله الحافظ ام وسام
وبعدين ماراح اطلع للسوك
لان زوج اختي عندة محل تجهيزات ملابس بس اخابرة يجيبلي الاريدة
ـ ها .. اي .. براحتج بعد
نهاوند ـ ضاجت منال وتباوع صفح لخاله ام عمر ..
اريد احجي واخاف مادري شبيه ..
اريد اكولهه محد نقلني من مدرستي
شلون اداوم .. بس معكود لساني
ام عمر ـ شبيج خاله احجي
ـ ها
منال ـ شبيهه كاعدة وساكته شتريدين تحجين
ـ خاله بعدهم عمامي مانقلوني من المدرسة ..
راسا خزرتني منال ودنكت راسي ..
عزة بعيني اليوم شنو راح تسوي بيه
ام عمر ـ اي زين حجيتي والله اني هم فاتتني هالسالفة..
ميخالف نكول لعمج ارشد ينقلج لاتهتمين
منال ـ ديبني بيته عمهه مفارغ
ـ زين خلي ناصر او توفيق ينقلوهه
ـ والله مادري عود من يجيون الله كريم
ـ لا تهتمين خاله اذا ماكدرو عمامج ينقلوج اشوف ابو عمر بلكي يكدر يسويهه عده هواي معارف بالمدارس ..
ـ طلعت ام عمر واستلمتني رزايل وراشديات منال
لان حجيت هيج لخاله ام عمر
اخر شي دفرتني وراحت للغرفة تكلب بالهدوم
ـ لج دعاء هاي الملابس الداخلية مو علئ كدج
ـ اي تلبسني نفس قياسي
ـ اي اخذيهن وانطيهه القديمات مالتج
ـ نفسي لعبت من حجيهه
امي ممعودتنة ناخذ ملابس داخليه مستعملة من احد..
حتئ خواتي متلبسهن من بعض رغم احنة خوات جانت تشتري جديد النة
بس الهدوم الخارجية عادي ملبوسات
بس ماكدر احجي يكفي الضرب الاخذته هسة ..
كامت دعاء طلعت هدومهه القديمة وذبتهن عليه..
وهية اخذت الجديدات
شلتهن خليتهن بالعلاكة
بعدني ماعندي
لاكنتور ولا مكان اخلي هدومي بي
بنهاية الاسبوع كمل عمو ارشد بيته وسوالهة درج خارج البيت وعزلهه تماما
رجعت عمة ام محمد بس محد شافهه راسا راحت لبيتهه فوك
وبقو جوة بيت عمو ناصر وعمو توفيق الهم غرفة فوك والباقي جوة
اتكابلن سوية وضلن يحجن عليهه
كميلة ومنال..
عفتهم ودخلت لغرفة بيبي شفت دعاء كاعدة وبيدهه تفاحه حمرة تفتحهه تطلع منهه موسيقئ ووحدة تركص ..
حلوة احب هيج شغلات رحت يمهه ..
الله شكد حلوة
دعاء ـ صدك
ـ اي والله تخبل وشلون موسيقئ حلوة
ـ هاي حبيبي جابهه الي صار يومين
ـ باوعت عليهه .. حبيبي شنو
ـ يعني الولد الاحبة ياغبية
ـ عزا وانتي تحبين ولد؟
ـ لعد احب بنية .. شنو هالغباء
ـ اذا عمة منال تدري بيج تموتج
ـ منو يكولهه؟
مو الا تعرف كلشي عني ..
ـ غير هية امج ولازم تعرف
ـ لا مو لازم تعرف
ها واخاااف ابالج شي
ترة محد يصدك بيج يعرفوج المخبلة
ـ لا اني شعليه .. معليه اني
جذبتني هالتفاحة وبقيت اباوع عليهه البنية التركص كلش حلوة ...
شنو مكتوب هنا
ـ قيس ..
اسم حبيبي قيس
ـ ها.. بكدج يعني
ـ لا يابكدي عمرة جبير بس ماعرف شكد يمكن 22 سنة
ـ وانتي عمرج 16 مو هواي جبير
ـ لا ابد مو جبير نفس الفرق بين خالاتي ورياجيلهن
هو ابن جيرانة ..
هذول بيت ام حنان تعرفيهم
ـ لا منو هذول
ـ جيرانة هذول ثالث بيت منا
عدهم سيارتين يخبلن
وقيس هو اخوهم الرابع
ـ ها
ـ احبة من زمان
من جنت بالثاني متوسط
كلما اروح للمدرسة هو يمشي ورايه ويوصلني للمدر
ومن اطلع يوكفلي براس الشارع
ـ ماعرف شنو احجي وياهه
بس مبين عليهه فرحانه ووجهه يضحك من تحجي عنه فبقيت اسمعلهه وهي تحجي ..
ـ شوفي راح اشوفج شنو جابلي بعد
بس مو تحجين…
ـ لالا ابد
ـ اني ماعندي خوات
وراح اعتبرج اختي
ـ هزيتله براسي وابتسمت ..
الله يهديهه عليه هي وامهه ..
كامت وطلعت صندوك جبير بي قفل
فتحتة وطلعت منة هواي رسايل
بيهه شريط احمر ووردي
وطلعت الوان مائية وزيتيه عدهه يخبلن
وجرت علبة مال مكياج تخبل شكد حلوة وعدهه كومة مداليات وكلايد ومحابس ..
الله شكد حلواات
ـ اي يخبلن ..
شكد يشتريلي اشكال
عنده هواي فلوس حبيبي ويصرف عليه
ـ ها
ـ اي ..
جنت اشوفه فوك السطح واشرلة ويأشرلي ههههه
شوفي .. هذا الحذاء هو اشتراليا
ـ وعمة منال ..
ـ لا امي متنتبه لهليج امور
كلتلهه اتبادلت وية بنات خالاتي
هي تعرف بيه اني وبنات خالاتي دائما نتبادل الاحذية والكلايد والمكياج وحتئ الهدوم
تعرفين تحطين مكياج؟
ـ لا ابد
ـ انتي امج متحبج
مجابتلج مكياج..
شوفي هذا باودر من تخلي بوجهج يروح هذا البوجهج كله
ـ يعني شلون يروح
ـ شوفي شوفي هذا مو جرح يم حلكج
ـ اي
ـ هسة اخليلج ويروح الجرح بعد ميبين وهاي الكحلة تسوي عيونج كباااار يخبلن
وهاي اسمهه مسكارة تسوي رموشج هيج واكفات تخلي الولد يحبوج
واذا خليتي حمرة يبوو يكومون يركضون وراج ويموتون عليج والله يجون يخطبوج من باجر
ـ يخطبوني
ـ اي ..
تتزوجين ويصير عندج بيت وحدج ورجال يصرف عليج ويحبج وياخذج لاربيل ويسفرج برة العراق ويومية بمطعم يوديج
ـ ها
ـ اي شوفي امي متخلي حمرة ولا كحلة ابوية ميسفرهه ولا ياخذهه للمطعم
ـ يعني من اخلي هاي الحمرة هيج يصير
ـ اي بس لازم تخليهه وتطلعين برة بالشارع..
بس انتي مو تسويهه ترة امي تموتج
ـ ها .. اي اي اعرف ..
لثواني حلمت حلم وردي
اخلي حمرة وكحلة واتزوج واحد يحبني ويموت عليه ويسفرني برة العراق ..
واخلص من منال ومن هالبيت..
بس بعدين ذكرتني بأمهه ورجعت لوعيي
ـ اخليلج مكياج؟
ـ لالا اخااف
ـ لا والله امي ملتهيه وية عمة كميلة برة
قفلي الباب وتعالي
ـ مو اخاف امج تشوفني
ـ متدري منو يكلهه دتعالي
ـ الشيطان لعب براسي
وعجبني اجرب هالمكياج
رحت قفلت الباب واجيت كعدت يم دعاء
وطلعت اسفنجاتهه ومكياجهه وهي تشتغل بوجهي مدري شسوي وتخط
ـ هاج شوفي شكلج شلونة؟
ـ باوعت بالمراية الصغيرة اتفاجئت.. ماصدكت نفسي وكمت اركض للمراية الجبيرة ..
شكلي كلة اتغير
الجروح راحت وجهي صار حلو بي لمعه
عيوني كبار صارن والحمرة بشفايفي كالبة وجهي كله
هاي مو اني
عبالك وحدة ثانية بس حلوة احلئ مني بهواي
ـ وهذا شعرج تخلين باروكه عليه بين ميطول تصيرين تخبلين تجننين
ـ ضليت اتمعن بالمكياج ..
شكد حلو تعرفين تخلين مكياج
ـ اذا صرتي صديقتي اعلمج عليه ميرادلة شي
ـ زين انتي امج تقبل تخلين مكياج
ـ لا مو داأئما تقبل
بس بالمناسبات
بس اتعلمت من بنات خوالي وخلاتي كلهن يعرفن..
ـ ها..
ـ هاج هذا الج قلم حمرة احمر
وكحلة سودة تخبل
ـ صدك هذا الي
ـ اي الج بس ضميي مو اطلعي كدام امي ترة تموتج واالله
ـ طرت من الفرح من انطتنياهن
حسيت صارت عندي صديقة بهالبيت
اخذتهن وضميتهن بهدومي بالعلاكة
ـ امشي نروح فوك يم بيت عمو ارشد بناته نكعد نسولف وية البنات
ـ لالا شلون اطلع وهذا بوجهي
ـ ها اي صدك هاج مسحي وجهج
ـ انطيتني كلينس مرطب وكمت امسح وجهي جلفته جلف وكل وشي اباوع عزاا هاي الكحلة مدتروح
ـ اوكفي خلي نيڤيا وهسة يروح
ـ خليت نيفيا علئ عيوني ومسحته بالخاولي مالتي يلة راح
سمة كلبي وكف من الخوف
ـ يلة امشي دنروح
ـ لا روحي انتي ماريد
ـ دمشي وياية هاي شبيج تعالي
ـ جرتني من ايدي واخذتني فوك دكينة الباب ودخلنة يمهم
كعدن بنات عمو ارشد ودعاء يتهامسن ويضحكن واني يمهن مدعرف عن شنو يحجن بس ابتسم وياهن..
شفت حمودي كاعد يلعب كلش حنيت اله رحت شلته وبوسته حضنته ودمعت عيوني والله هواي اشتاقتيت لخواتي بس شلون اشوفهن وين الكاهن ..
ام. محمد ـ ها نهاوند عمة شبيج
ـ اشتاقيت لخواتي عمة
ـ خطية الله يساعدج
ان شالله مابيهن شي يم خالتهن كاعدات مو غريبة عنهن..
ـ اي ان شالله مرتاحات
ـ تدرين عمج ارشد يريد ينقل مدرستج هنا
ـ صددك عمة
ـ اي والله يمكن باجر يروح يمشي بأجرائات نقلج
ـ ركضت عليهه وحضنتهه لعمة ام محمد حسيت بفرحه جبيرة
واخيرا اكو شي يفرحني بهالبيت..
كمت اشتغل مثل الساعه حتئ عمة منال متاذيني او تحاول تحرمني من دراستي
اجة شهر الثامن وسوو سنوية بابا بس ثوابات وزعو للجوارين..
جابتلي خالة ام عمر الملابس المدرسية ووياهه جنطة جديدة وحذاء جديد ..
واني عندي مالاتي القديمات صدرياتي وقمصاني يعني ما احتاج بعد
ولاني رسبت مارحت امتحنت بوفاة امي اعتبرو الوزارة اي شخص ماامتحمن بهذيج الفترة مكمل بسبب الضروف النعيشهه والازدحامات
وكالو تكدر تمتحن وية الاكمالية
جنت ممصدكة
يعني ماراح اعيد سنة كاملة
ولو اغلب الدروس ناسيتهن
بس ميخالف ..
ضغطت علئ روحي حتئ ادرس وامتحن
شدت ويايه منال بفترة مراجعه الدروس خبلتني بالصخرة والاوامر
جنت اعرف بكلمة منهه تكدر تبطلني ومتخليني اكمل دراستي
بس ماعرف ليش سكتت عني
يجوز لان هواي دعيت ربي يخليني ادرس واخذ شهادتي مثل مجانت امي تحلم ..ماعرف
من كد الضغط عليه بشغل البيت
كل مرة اكول ماراح اكدر امتحن ولا اكدر انجح .. وارد اتراجع
اول يوم امتحان جنت ما اندل المدرسة اخذني وسام ابن عمي ناصر وانتضرني اخلص واطلع ورجعنة سوية
المدرسات سمحن بالغش بالقاعه وهنة كامن يردن الاجوبة النة حتئ نخلص ونطلع من وكت
لان الناس خايفة من القتل والتفجيرات
امتحنت كل الدروس خلال اسبوع واحد
ولوما المدرسات وردهن النة
مستحيل انجح
هواي حاربتني منال تكلي فاشلة وينج وين النجاح ..
بس اجتي الشهادة ناجحة وانصدمت
وبدة العام الدراسي الجديد
وبدينة نداوم واني صف ثاني متوسط
شوي شعري طول ورتبته الي عمة ام محمد..
صار كلش قصير يادوب اخلي طاك عليه لو ماشة واروح
الاقلام والدفاتر اغلبهه من خاله ام عمر
وعمة ام محمد
بس كميلة تنطيني وتكول هاي صدقة اتصدق عليج
وهاي دفع بلة عن جهالي وزوجي
هواي جانت توجعني هالحجاية
ليش تكلي صدقة اتصدق عليج
عمة ام محمد ماحجتهه
لا هي ولا خاله ام عمر
جنت اتمنئ ما اخذ منهه شي
بس ماكدر احجي اخاف …
جنت اني ودعاء نروح سوية للمدرسة
بس مدرستهه اقرب من مدرستي
هي اعدادية واني متوسطة
جان يومية حبيبهه قيس يمشي ورانة
واني ميته خوف ورعب وهي ولا مهتمة
بس تشوفه تصير غير وحدة تماما
وجهه ينور
وتبتسم للهوه الطاير
وتصير تتمايل بمشيتهه..
اكلج هاي شلون هيج تتمايلين
ـ لعد شلون ..تريدين البنية تمشي مثل الرجال لازم تتمايل..
حلوة مشيتي مو
ـ اي حلوة
ـ امشي مثلي ولج
لاتصيرين مخبلة
ـ موو مخبلة اني
ـ اي امشي مثلي لعد
لاتمشين مثل الولد يشبخون منا لهنا يفتحون رجليهم
ـ عزا ماعرف امشي مثلج
ـ من نرجع للبيت عود ذكريني اعلمج مو هنا ..
يلة هسة اني وصلت للمدرسة
اجي وياج لمدرستج
ـ لالا هذيج مدرستي روحي باي باي ..
التفتت شفت قيس واكف يباوعلهه وبيدة يمكن سويج سيارته
عفتهم وضحكت ودخلت لمدرستي
مرات ارجع قبل دعاء
و مرات نتلاكة سوية
حسب الدروس الناخذهن..
كل هالفترة خواتي ماراحن من بالي
بس منو اسأل والمن احجي ..
وبيوم جنت كاعدة بالصف عدنة درس احياء واجتي المعاونة للصف
ـ وين نهاوند فؤاد حمزة
ـ وكفت علئ حيلي .. نعم ست
ـ تعالي خالتج اجتي عليج
ـ خالتي ؟
ـ اي زيارة تعالي ماما اطلعي من الصف لاتوقفين الدرس
ـ عفت كتبي وطلعت من الصف
اريد اشوف منو هاي خالتي ..
دخلت للادارة شفت خاله ام حسين
ركضت عليهه وحضنتهه ..
خااااله
ـ ياعيني يانونة
شلون كبرانة ماشالله
شلونج شخبارج ياخاله
بالمدرسة شلونج
ـ زينة خاله الحمد لله ..
خاله شلونهن خواتي متتصلين عليهن
ـ زينات الحمد لله لاتخافين عليهن
نغم صارت بالثاني
وصبا بالاول
والحان خلتهه بالروضة
ـ صددك واالله
ـ اي وداد نقلت نغم وخلتهه تمتحن
الله ماضيعلكم تعب
ـ اي اني هم عمو ارشد نقلني
ـ ارشد؟
هههه
لو ما ابو حسين يركض وراهم فلا ينقلوج
ـ صفنت عليهه من حجت معرفت شحجي
ـ شسوي خاله ماكدر امر عليكم
اخذي خاله هاي جبتلج اكل
وهذا مصرف خاف تشتهين شي
ـ لا خاله ماريد فلوس خاف منال تشوف عندي فلوس شيخلصني
ـ اووف الله يكطع بيهه مثل مكطعت بيج تدرين ردنة نجي نشوفج طردتنة
ـ شوكت
ـ اي خاله سالفة طويلة بس طردتنة وابو حسين ميقبل نوصل للبيت بعد
كلت هنا اجي اشوفج ..
سمعي خاله ..
ديري بالج تمشين بطريق اعوج لو تسوين شي يأذيج
كلنة مستغربين من منال ليش خلتج ادوامين اكيد اكو براسهه موال ..
ـ اني هم مستغربة بس يجوز كامت تحبني
ـ الله يهديهه ..
ولو ما اعتقد هالعكربة تحب احد..
يمة اني حسب صحتي امرلج واشوفج يعني مو دائما
ـ خاله اريد اشوف خواتي والله اتشاقيتلهن ولو بس اسمع صوتهن
ـ سودة عليه ..
حقج والله بس وداد متقبل تجيبهن وانتي اكيد ميقبلون ناخذج تروحين تشوفيهن
ـ زين خابريهن من التلفون
ـ هالوكت مموجودين كلهم بالدوام متفيد المخابرة
ـ اي صدك
ـ يجي يوم وارهمهه
شوف شلون ترهم يغيبن من المدرسة واجي هنا وانطيج تلفون تحجين وياهن
لايضل بالج بنتي ..
ـ ان شالله
ـ اهم شي ديري بالج علئ نفسج
ولا تسوين شي غلط ابد احذري خالة
ـ اي ان شالله خاله لاتخافين ..
اخذت منهه الاكل وراحت للحانوت اشترتلي ونطت رقمهه للمدرسات خاف يصير شي يتصلن عليهه ..
لان حجتلهن قصتي وشنو علاقتهه بيه
ارتاحيت من عرفت خواتي بخير وعايشات عيشة زينة
من يومهه كدرت شوي اركز بدروسي
دعاء كل هالفترة ممهتمة بدراستهه
كل وقتهه تكتب رسايل وتقرة رسايل قيس..
وج كافي كعدي اقري
ـ وشسوي بالقراية راح يجي يخطبني واتزوج واصير ام بيت ياقرايه هاي يابطيخ
ـ صدك يعني راح تعوفين المدرسة وتزوجين
ـ اي اعوفهه قابل شمحصلة منهه
اوع
يومية بوجه المدرسات اصبح
جيبو دفاتر
وحلو الواجب
ليش ممحضراات
ودك امتحانات ولعبان نفس
ـ زين شوكت يجي يخطبج ..
ـ خطية عندة ضروف بالبيت..
اخو الجبير اخذو الامريكان من شغلة وملتهي وية اهله
ـ لعد يومية اشوفه براس الشارع واكفلج شزون ملتهي
ـ ااااش لاتحجييين
بابا شبييج صوتج عالي
ـ يلة سكتتت بعد مااحجي ..
عفتهه والتهيت بدروسي بس عيني عليهه اشوفهه ملتهية ابد متقرة ..
ومنال نايمة براسي
جيبي وودي واخذي وخلي
بس حياتي شوي استقرت
احسن من قبل
صح انضرب هواي بس مو تحركني ولا اطلع دم مني من تضربني ..
مشت الايام وبدت الامتحانات الشهرية
اكو بعض الدروس شوي صعبة عليه ماعرف المن اروح ومنو يشرحلي ماكو غير اعتمد علئ نفسي ...
طلعت من المدرسة شفت دعاء واكفة يم مدرستهه تنتضرني ..
اشو اليوم من وكت طالعين شعجب
شوكت طلعتي؟
ـ صار عشر دقايق ..
يلة امشي دنروح
ـ شبيج تتلفتين منا ومنا
ـ قيس كلي اليوم يجيبلي تلفون مدري وين صار
ـ يمة تلفون
ـ اي شبيج مخترعه
ـ وج انتي متخافين شلون اذا شافتج امج
ـ يمعودة هية تدري بيه اصلا
عايفتنة اني واخوتي ولا تعرف شصار بينة..
ـ همست بكلبي
اي صدك الله هاديهه عليه هالايام
ـ بابا داخل بمشروع جبير وية صديقة واداين هواي فلوس من الناس وملتهية وياه بهالمشروع
ـ اهاا.. همست هسة عرفت ليش عايفتني بحالي ..
يلة همزين بلكي تبقئ ملتهية بالمشروع
طلعنة شارع المدرسة وسمعت احد يصيح باسم دعاء بصوت خفيف ..
التفتنة شفنة قيس
ـ قيس حبيبي
ـ عزة دعاء لاتروحين
ـ لاتخافين شبيج
ـ ووين رايحه
ـ ينطيني التلفون وارجع اوكفي
ـ بقيت واكفة بمكاني اباوع عليهم
اتلفت يمنة ويسرة بالشارع عبالك اني الواكفة وياه
لزم ايدهه وضحكتلة
وانطاهه التلفون ورجعت يمي
كمت امشي سريع ماعرف ليش خايفة وكلبي يدك
ـ ولج شبييج تركضيين
ـ امشي خلي نوصل للبيت بسرعه احسن
وصلنة البيت
ماكو احد ماعرف وين راحو
حتئ عمة كميلة ماكو ..
عافتني دعاء وراحت تركض للغرفة
عفتهه ورحت للحمام غيرت ملابسي وغسلت وطلعت
شفت جدرية صغيرة مال خاله ام عمر عرفت هذا غداية اتغديت وكملت ورحت للغرفة ادرس ..
ودعاء بعدهه بملابس المدرسة وتلعب بالتفلون ..
شفت خاله ام محمد دتجي علينة همست ..
ولج ضمي اجتي عمة..
ـ صددك ..
ـ لحكت تضم تلفونهه ودخلت عمة
ام محمد ـ ها يابنات شدسوون
ـ دة ادرس عندي رياضيات
ام محمد ـ وانتي عمة ليش بهدوم المدرسة بعدج
ـ ها اي هسة ابدل
اكلج عمة وين اهلي
ام محمد ـ كميلة راحت لاهله
وامج راحت وية ابوج ماعرف وين
دعاا ـ وين راحو اشو ماكالو راح يطلعون
ام محمد. ـ عمة نهاوند تحبين تجين ويانه
ـ وين عمة
ـ عرس اخوية وعاجبني اخذج ..
دعاء ـ ها عمة بس هية تاخذيهه واني
ـ تريدين تجين امشي منو مانعج ام لسان
نهاوند ـ الله عرس حفلة
صارلي هواي محاضرة افراح ..
ماعرف عمة شوفي عمة منال تقبل
ـ عمج ارشد وقابل شعليهه منال وعلئ العموم ميخالف نكللهه للخاتون ..
حضرو روحكم الجمعه نروح
دعاء ـ هاي شنو عرس والجمعه
ـ اي غير حجز قاعه قابل عرس بالبيت
نهاوند ـ بس عمة اني ماعندي شي البس بالعرس
ـ محسبة هالحساب ..
انتي وهمسة بنتي تتلابسن نفس الجسم تقريبا
عدهه هواي ملابس عود تعالي شوفيلج شي علئ كدج
ـ جنت كلش متحمسة اروح لعرس يمكن صار اكثر من سنتين مارايحين للعرس وحفلة ومغيرين جو ولا فرحانين ...
جانت ايام تقريبا مريحه بالنسبة الي
منال ملتهية بالمشروع مال عمو ناصر
وخاله ام عمر ما نستني كل يوم طبخة شكل تجيبلي وتتفقدني بالقرطاسية
صار يوم الخميس رجعت من المدرسة وسبحت وصعدت يم بيت عمو ارشد
طلعتلي عمة بنطلون جينز وبدي وردي ..
نزلت طايرة من الفرحه وكأنو ستوني اشتريت الملابس من السوك
شوفي دعاء حلوة هالملابس مو
ـ ولج هاي شنو عزة ..
ليش ما اخذتي فستان احلئ
ـ لالا هذا حلو والله كلش عاجبني
ـ تريدين كلايد ومحابس
ـ اااي ارريد
ـ تعالي خلي ارهملج..
ـ طلعتلي اكسسوارات ورهمتلي وية الملابس حتئ ماشات انطتني عدهه اشكال والوان ..
ـ شوفي هذا المكياج باجر اخذة ويانة ونلبخ هناك
ـ لا عزة اني اخاف
ـ ولج امي متجي شبيج خايفة كبر اي والله
منال ـ ها شدسوون
دعاء ـ دنحضر لباجر
ـ مدري شعجب راح تاخذج ام محمد مو عوايدهه
نهاوند ـ دتحجي منال واجتي ام محمد
ـ والله كلت اريد افرح هاليتيمة خطية خلي تطلع من هالجو الكئيب بس بنتج جلبت بركبتي وماحبيت اكسر بخاطرهه
ـ اذا مضايقة منهه عوفيهه عيني ممجبورة تاخذيهه
ـ قابل شايلتهه علئ راسي لخاطر نهاوند ..
منال ـ هاااا
ـ تعالي عمة شوفي هالترانشوز علئ كدج لبسي وية هدومج باجر
ـ اخذت الترانشوز وكدرته طلع علئ كدي ..
من الفرحه مدري شبية ممصدكة بنفسي بس اريد باجر يجي والبسهن..
بعد المشاحنات بالحجي بين عمة ام محمد ومنال كل واحد راح لمكانة
كعدت الصبح كملت شغلي بالبيت ورتبت الفراشات ودخلت اسبح
كلتلنة عمة ام محمد بال11 انتو متحضرين ولابسين منبقئ ننتضر
متدري اني ودعاء كعدنة من ساعه 7 الصبح
صارت بالعشرة ونص وبدلنة
شفت نفسي بالمراية فرحانة بروحي
صار شكد ملابسة هدوم طلعه
دعاء ـ زين البدي حلو عليج
ـ صدك
ـ اي والله طالعه حلوة
بس يرادلج لبخ وصبغ اضافر
ـ لالا عيني اخاف
ـ امداج جبانة هسة محد يتزوجج تبقين عانس منو يباوع بوجه وحدة مثلج جلحة
ـ هاي شبيج دعاء
ـ والله شبيج الولد يحبون الوجه الحلو الابيض العيون الحلوة لعد عبالج يتزوجون وحدة قبيحه
القبيحه تعنس ابيت اهلهه محد يخطبهه
ـ انتي مين اتعلمتي هيج تحجين
ـ الدنية علمتني حبيبتي ..
يلة اني كملت اخذت حتئ صبغ الاضافر امشي خلي نروح لاتعوفنة مرة عمج
ـ وية طلعتنة من البيت
شفت عمة ام محمد وبناتهه نزلن من الدرج
جاب عمو ارشد سيارة جبيرة ورحنة وياهم ..
وصلنة بيت اهل عمة ام محمد
بيت حلو بس قديم كلش و صغير
الناس ملتمين ويهلهلون ويصفكون
من فرحتي عبالك عرس اخوية
مو واخو زوجة عمي
لازمة بذراع دعاء ونمشي
ماحسيت بنات عمو ارشد مندمجات وياية او يحبن يمشن ويايه ..
ماعرف هيج حسيت
فمالكيت غير دعاء ..
دعاء ـ عمة وين الحمام
ام محمد ـ هذا حمام ..وهذااك تواليت
ـ اريد احط مكياج وين اخلي
ـ هاي غرفة مرة اخوية دخلو بيهه
نهاوند ـ راحت للحمام دعاء وطلعت
خلت مكياج لوجهه شلون طلعت حلوة
رسمت عيونهه رسم
وهي لابسه تنورة سودة وبدي اسود وسترة خضرة كلش حلوة
وحذا اسود وبي كعب عيني عليهه شلون لابسة كعب وتمشي بي متوكع ..
فتحت شعرهه وهي مشسورته من البيت
طلعت فد شي تخبل ..
تعاي اخليلج مكياج
ـ لا اخاف
ـ وج تعاالي امي ماكو
ـ خاف تعرف
ـ ترة حتئ بنات عمو ارشد حاطات مكياج شبيج خايفة .. تعالي
ـ اتقربت منهه بس كلش خايفة وحايرة
اريد اخلي مكياج واطلع حلوة
وخايفة تعرف منال وشيخلصني
كعدتني علئ الكرسي وخلتلي مكياج
رسمت عيوني رسم ..
فتحت عيني شفت روحي بالمراية كمت ارجف ..
عزة دعاء مسحي عيوني
ـ محد يشوف امشي امشي هسة بالهوسة ينمسح المكياج لاتخافين
خلي هاي الحمرة وردية بلون البدي مالتج
ـ اخذني الغوة وخليت حمرة ..
فرحانة بروحي طالعه مرتبة وحلوة
ولو شعري قصير بس زين شكلي حلو
ينطلع بية
شافتني عمة وبناتهه ماحجن شي عادي
وهنة هم حاطات مكياج..
شوي اتشجعت من شفت عمة ممهتمة
وية الغدة وزعو لفات كباب مشوي وزلاطة ..
خلص الغدة و صعدنة الكوستر
وبدة الهوسات
خوات عمة ام محمد هواي يمكن 8
وعدهه اخوة همين هواي ماحسبتهم
وصلنة بيت العروس ونزلنة
النسوان يركصن ويهلهن
اجواء حلوة وفرح صار هواي مفتقدي
اتقدمت من بين الناس اريد اشوف العروس ..
صارت كدامي العروسة شلون حلوة
ناعمة وشعرهه مرفوع ومكياجهه يجنن وبدلتهه منفوشه هواي كلش جبيرة
يالله شكد حلوة ..
انطبع كلام دعاء براسي
المكياج يخلي البنية حلوة وتتزوج واحد يحبهه
اخذو العروسة وكلنة طلعنة وراهه ورحنة للقاعه
دعاء هناك انطلقت بالركص وية البنات
واكو ولد همين موجودين والعريس يركص القاعه كلهه تركص بس اني وكم عائلة كاعدين
حبيت شخصية دعاء
اجتماعيه وبسرعه تكون صداقات وية البنات مو مثلي انعزالية
واحس بروحي حتئ حجي ماعرف احجي
رغم عمو ارشد كاعد وشافني حاطة مكياج بس ماحجة ولا كال شي
وشاف دعاء وبناتة يركصن بالقاعة بس ماهتم..
اي زين يعني مو متشددين مثل مكنت متصورة
حسيت بنفسي محتاجة حمام بس ما اندل وين اروح ..
كمت ورحت يم دعاء كوة وكفتهه
دعااء وج دعاء
ـ ها شبيج تعالي ركصي ويانة
ـ لا يارركص .. اريد اروح للحمام
ـ مو كلتلج روحي ابيت عمة ام محمد
ـ ماجنت احتاج حمام
ـ امشي هسة اخذج
ـ اخذتني ورحنة نتمشة لنهاية القاعه علئ اليمنة دخلنة لكينة حمامات نسائية
دخلت وهي بقت برة يم المرايات تعدل بروحهه
طلعت اغسل واجاهه اتصال ..
منو
ـ قابل منو
هو بس حبيبي قيس يعرف هالرقم
اوكفي خلي اجاوب ..
ـ حجت وياه بدلع وتتميع بصوتهه
استغربت عليهه شلون هيج غيرت صوتهه بقت تسولف وتضحك وياه وتوصفلة نفسهه شلابسه وشنو حاطة مكياج وشلون ركصت بالقاعه سمعته يصيح عليهه يكلهه لاتركصين ماقبل وهي تتمضحك
وبالاخير كلتلة يلة روح اتاخرت عليهم برة وسدته
ـ شلون هيج غيرتي صوتج بثواني
ـ ولج انتي خطية ولا عبالك بنية شبيج كلشي متعرفين
ـ والله مستغربة شلون غيرتي هيج
ـ هسة معلينة من هالحجي ياحلوة
عيني صديق قيس ذاابح روووحه عليج
متخبل تخبل اصلا هسة خابرني علمودج
ـ صفنت بوجهه ..
يعني شنو ذابح روحه عليه؟
ـ يريد يصادقج حتئ يجي يخطبج يالغبية شبيج هيج كوة تفتهمن
ـ يخطبني!
وللحكاية بقية……………… 🥀
لاتنسون تصويت وتعليق حبايب حتئ استمر