الحلقة الثامنة
#ليلة_من_فبراير
بقلم الكاتبة ✍
☆☆ ☆ ياسمين السعدي ☆☆ ☆
✍انه المحد وكفله بساعة العازه
انه الگلبه اعله حب الناس يتوازه
انه العقله وگف من كثر ما مصدوم
غربه الشالته والذبته اعزازه
مايرحم جفن طبع الدمع حراگ
وانه شايل اعيون اتگول رزازه
ولا يحله رسم حنه اعله جف متعوب
غشيم وعاشريت اجفوف خبازه
مثل موت الگصب مات الخضار اوياي
بأهل وبلا اهل تنشال الاجنازه
كلشي اتغير أبوادمنه حد ما صار
اليجبر اكسورهم .. بالكسر يتجازه
❤️
منال ـ ااااش لاتهووســــين
اجو الناس واخذوهن
نهاوند ـ فتحت عيني من هالحجي
احس ايدي تشنجت ماعرف شبية ..
منو اخذهن؟
ـ بعنــــــــاهن وخلصـــــنة
ـ انصدمت من هالكلام
وبقيت ساكتة
ومشدوهه من السمعته
احس انشليت
وماكدر احرك نفسي
اريد احجي مدتطلع الكلمة
ايدي ورجلية تخشبت
بس فاتحة عيوني وباهتة بوجوهم
اشوف علئ عمة ام محمد
متكدر تباوع بوجهي ومقهورة
وعمة كميلة طلعت من الهول وتمسح بعيونهه
ومنال كاعدة رجل علئ رجل وتعلج ومبتسمة
اتمنيت اصرخ واعيط بهاللحظة
اتمنيت اركض واخنكهه
واقتلهه لمنال
كمت ابجي واشهك بهيستريه
اخاف اتصرف اي تصرف
واتحاسب عليه بعدين
لوانشمر بالشارع مرة ثانية
صرخت بأعلئ صوتي
لالااا عمـــــة ممعقــــولة
اااكيد تكذبون علية موبلة
عفية كولو كذب هنا ديلعبن
يجوز بالحديقة
وكضت طلعت برة ماشفت احد
رجعت جوة ادور بالبيت مثل الخبلة صاعدة نازلة افتح غرفة غرفة واصرخ
وووج ننغـــم
وجج الحــــان
وووج صبــــا
وينجنن خواتي
وووج عمـــة عفيـة
وين خواتي اررريدهــن
جيبوووولي خواااااااتي
ـ ووووجــــع
راحن لاتضليين تصيحين لا الخمج علئ حلكج
ـ احس وكف كلبي من البجي
اخذووني يمهــن
بيييعوووني وووياهن
واالله بعدهن صغااااار
ميعرفن يدااااارن روحهـــن
منال ـ ااااش نصي صووتج
ـ رحت اركض لمنال
وكعدت يم رجلهه
الله يخليي وووولدج عمةة
ااالله يخليلج بنتج
وين رااااحو خواتي
ااااخذيني يمهم ابوس ااايدج
ـ خوالهم تبرعو بيهم انتي شكو
ـ كمت املخ بشعري
عــــــمةة الله يخلييج
ووووين خواااتي
ززززين يمم منوو راااحن
منوو اخذهــــن....
اني اصرخ وابجي وهي تحجي بهدوء
برودهه خلاني اتنرفز
تعلج وتباوعلي صفح
اتمنيت اخلي اصبعي بعينهه وافكس عينهه..
اتمنيت اعضهه
واشلع لحمهه منهه
مثل ماصار بأختي الحان . .
كمت اركض علئ عمة ام محمد
فدوةة عمة ..
الله يخليلج حمودي
وين اخذتو خواتي
ابوس ايدج بداعت بناتج
ام محمد ـ الله لاينطيج منال
عساج بحركة كلب هالطفلة
منال ـ ها وتدعين عليه
لاتخليني اعرفج مقامج ام محمد
خليني بعدني محترمتج
ـ عمـــة وين خواتــي
شسوويناالكم وهيج تسوون بينة
بعدهن صغارر ميفتهمن
عمة ابوس اايدج
عمةة ووين ودوهن
ام محمد ـ يكول ناصر اخذهم لناس ماعدهم جهال.. يكول خوش ناس
ـ كعدت بالكاع وكمت ابجي
ماعرف شسوي
اني صوجي
صووجي خمددت
لو ماخامدة ميروحن مني ..
تقرفصت علئ روحي واني اشهك وابجي
منال ـ طلعي بالشوارع دوري عليهن يجوز تلكيهن برة
ـ عزاااا يعني شمرتووهن بالشاارع
تحجي ويايه بخبث ..
الابتسامة بوجهه
فرحانة بمعاناتي اني وخواتي
عفتهم وطلعت برة بالحديقة
فتحت باب البيت واشوف بالشارع
يمنة ويسرة بلكي الكاهن برة
وين راحن وين اخذوهن
زين شلون ماحسيت من اخذوهن
سديت الباب ورجعت بالحديقة انتضر
خفت لايجوز عمامي ويطلعوني بالشارع ويقفلون الباب عليه ويكولون لعنو عماد انهزمت
كعدت بالكراج انتضرهم يجون واسالهم
صار الليل واجة توفيق وارشد وركضت عليهم ..
عمووو وووين خواااتي
ارشد ـ شكعدج هنا ؟
ـ انتضركم..
وين خوواتي
ووين نغم وصبا والحان
صــدك بعتوهم
ـ ااااش شهالحجيي
ـ خلة ايدة علئ حلكي
ودخلني للببيت ميريد احد يسمع خيستهم...
ـ منو كلج بعناهم
ـ عمة منال كالت
ـ لا وولج وديناهن يم خوالهن
ـ خوالي؟
زين ليش مااخذتوني ووياهن
ـ مو كلتي نبيل ميريدج ..
وهسة هم يريدج قابل شتغير
ـ احس كلامة كذب ..
يحجي ببرود
بس ملامح وجهه مدري شلونهه ..
ـ كعدي هنا
ولا تطلعين برة فهمتي
ولاتصيحين ابد
ـ اخواتي عمو
ـ مرتاحات لاتخافين عليهن
ـ عافني وراح لغرفتة بكل برود
باوعت لعمو توفيق ردت اساله
بس هو هم عافني وصعد يركض فوك
ابد كلبي ممرتاح
لو ماخذيهم خوالي
جان كالت ام محمد
ليش بقت تتحسب عليهه
وكميلة تبجي
اكيد ديكذبون عليه
كعدت بالهول انتضر عمو ناصر
ماكو غيرة.. بلكي يكولي الصدك
احس الوكت شطوولة ابد ميمشي
مادري شصار بيه عبالك مريضة ومابية. بعد اكعد..
بس ميقبلون اتمدد بالهول
جبرت نفسي وبقيت كاعدة
كلهم ممهتمين بينة
اسمع اصواتهم بغرفهم
يشاقون ويضحكونرو يلعبون وية جهالهم
هذا الدخل يسبح
وهذا الكاعد يلعب وية جهاله
يمكن فؤاد مو اخوهم
اي اكيد بابا فؤاد مو اخو عمامي
لان ممحروك كلبهم مثلي علئ
لو يحبون بابا فؤاد جان ماسوو هيج
ببناته
يمكن بابا فؤاد لكو بالشارع
وربو وياهم
لعد ليش يكرهو ويكرهونة احنة هم
افكار ماعرف شلونهه اجتي ابالي
مابيدي حيلة غير انتضر يرجع عمو ناصر
سمعت الباب الخارجية انفتحت
ورحت اركض عليه ..
عموووو ااابووس ايددك ووووين خواتي
ـ مين طلعتي بوجهي ..
اصبري خلي ارتاح
ـ انتضرتة يكعد واني واكفة يم راسة.. وين نغم والحان وصبا
الله يخليك عمو وينهن
وين وديتوهن
اخذنني يمهن الله علييك
ـ راحن لغير بيت هناك يستقرن
ـ كلبي انعصر من هالحجي
عموو وين هذا البيت ؟
وين صاير
بيت منو ..
زين ليش ماخذتوني وياهن
بعدهن صغار ميفتهمن شي
ـ ميردوج لان جبيرة ..
يردوهن صغار حتئ يربوهن
ـ يعني صددددك بعـــتهن
ـ ادبسزززز شنو بعتهن ؟
ـ عمة مناال كااااالت بعناهن
ـ ها.. اي معليج بعمتج منال ..
امشي امشي نامي معليج بهاالامور
ـ كعدت يمة وجلبت برجليه
عمو ابوس رجلك
وين خواتي
ابوس ايدك
الله يخلي جهالج وينهن
ـ عمو والله راحن لمكان احسن من هالبيت.. علئ الاقل عيشة نضيفة
منال ـ اي اي بعد سولفهه السالفة كلهه..
وين الفلوس قبضتهن
ـ انطوني بس نص الفلوس
ـ نــــــص شنوو
ـ باجر الباقي
شبيج كبيتي بوجهي
كالو اتفاجئنة لان ركض ركض صارت السالفة وممحضرين فلوس
وباجر يكملوهن
ـ عمووو ليش بعتو خواتي
ليش ليش شمسويات وتبيعووهن
ـ شخبصتييينة بعتوووهن بعتووووهن ااااامشي جوووووة بالغررررفة لا اجررم بيييج
ااامشيييي وليي منااا يلةةةة
ـ دفرني بعيد عنة..
من خوفي ركضت للغرفة وكعدت بالكاع
دعاء ـ ليش تبجين وخابصة روحج
ـ شلون ما ابجي هذني خواتي
اريد اعرف وين راحن ويم منو
ـ امي تكول بعناهن لناس عدهم فلوس
ـ غصيت بالبجي ماعرف شسوي ...
كمت اتخيل هالناس شمروهن بالشارع لو اخذوهن لمكان يخوف
لو اظلم لو يخوفوهن ويضربوهن وهنة بعدهن صغار
والحان ايدهه مورمة
كل غصة اغصهه روحي تروح وياهه
ـ معقولة هيج تحبين خواتج ؟
ـ باوعت عليهه وماجاوبتهه
ـ انتي من غيرر ام
اكيد متحبيهم
ولا همة يحبوج
هيج ماما كالت
هسة اني واخوتي واحد يحب الثاني .. لان احنة نفس الاب والام
بس انتي ليش تحبيهن
ـ ماجاوبتهه عفتهه
تحجي وتخربط بكيفهه
اصلا اخاف اجاوبهه وانضرب مثل ذاك اليوم
سكتت عنهه ضليت حايرة بروحي وبخواتي شلون الكاهن واجمعهن مرة ثانية
ـ امي كالت طالما مو من نفس البطن يبقون واحد يكره الثاني ..
خلي يولن خلصتي منهم
ـ لاتغلطين علئ خواتي دعاء
ـ اووع ..
عشتوو..
كوة تريدين عود تصيرين حنينة عليهن وتريدين تشوفينه شكد تحبيهن
وانتي جذابة ..
كلنة نعرف انتي من غير ام عافتج وشمرتج
وابوج ميحبج مثل ما ابونة يحبنه
فـماما كالت انتي تغارين من خواتج كليتنة نعرف هالسوالف الجذابية مالتج
خلي انام احسن ..
شعندي كاعدة وية وحدة مثلج
ـ هاي شكاعد تحجي
ماجاوبتهه وبقيت بماكني
اسمع عمامي يتصرفون بشكل طبيعي
ولا عبالك شامرين 3 بنات صغار ميعرفن حتئ يحجن بالشارع
خلصت دموعي وعيوني صارت تنبع حرارة
راسي كلش كام ياذيني..
وينج يمة
تعالي شوفي شسوو بينة عمامي وخوالي ..
يمة والله محتاجيج
وين رحتي وعفتينة
ماعرف بأي طريقة اقنع هذول حتئ ارجع خواتي لو ياخذوني يمهن
همة اصلا ميسمعولي حجاية..
يالله الليل شطوولة صار ميخلص
هالليلة اصعب من ليلة الشارع
لان خواتي ماعرف بيهن وين
عايشات ميتات
بردانات جوعانات
خايفات
يم ناس زينة لو تاذيهن
هو عمامي وشمرونة بالشارع
اكيد هالغربة راح يمشروهن
لو يسوون بيهن شي
تخيلات بعقلي خلتني اتخبل
ابجي واشهك وكاتمة صوتي خاف يسمعوني وياذوني
الف فكرة براسي دمرتني
متقرفصة علئ جهه بالغرفة
اشوف علئ اولاد عمامي نايمين ومطمئنين
وتحنة مشردين
ياربي ليش احنة مو مثلهة
ليش نختلف عنهم
ليش اخذت امي وابوية
وهيج اتبهذلنة
زين ليش ميحبونة
ماعرف اسألة بعقلي مالكيت الهه جواب
نوبة ادعي يرجعن الي بالسلامة
ونوبة ابجي عليهن وعلئ حالي
هلكت من التعب
بس ماكدر انام
عيني كوة فاتحتهه
علئ كعدتي غفيت
متحملت اضل كاعدة
بس ماعرف شكد نمت
كعدت الصبح علئ صوت عمامي ديتريكون ..
حياتهم ماشية عادي
ياكلون ويسولفون بيناتهم
ولا كأنو صاير شي
ولا عبالك شامرين بنات جبيرتهن اول ابتدائي
جسمي كلة متشنج ويوجعني لان متقرفصة ونايمة
مديت رجلي حسيتهه تشنجت
ومن الالم كمت ابجي
منال ـ راح تبقين هيج كاعدة تعووين ؟ كومي لمي الفرش كووومي
ـ عمة وين خواتي
كلشي اسوي واالله
بس وين وديتوهن اخذوني الله
ـ لا تخبلت هالبنية
صارت بيهه حالة نفسيه
ـ زين هنة وين
بس اروح اشوفهن الله يخليج
ـ اي مو هنة نعل معروضة بالمحل تروحين تشوفيهن وترجعين ..
كوومي كوومي يالمخبلةةة
يلة لميهن بسرعه
ـ جبرت نفسي وكمت الم بالفرش
كوة اشوف بعيوني ماكدر افتحهن
راسي كلش يوجعني
لميت وخلصت
ورحت للحمام غسلت ورتبت نفسي وطلعت
ام محمد ـ تعاي عمة تتريكين
ـ هزيتلهه راسي يعني لا
ـ علئ الاقل شربي حليب
ـ ماشتهي عمة.. عمة وين خواتي..
متجاوبني عمة ام محمد بس ادنك راسهه ومبين مقهورة
منال ـ نهااااوند ووينج
ـ اكره صوتهه ..
اتمنئ تموت ونخلص منهه
بس شيموتهه هاي ..
سحلت روحي ورحت للمطبخ..
نعم عمة
ـ تعاالي غسلي مواعين العشة
البارحة مكدرت اغسلهن..
وهاي مواعين الريوك
هم جلفيهن من زفر البيض ..
باعي حطي شوي زاهي مو تفرغي كله مثل المخبلة
ـ اني مو مخبلة عمة
ـ مخبلة ونص.. يلة غسليهن يالمخبلة
ـ تحجي بهدوء من تكلي مخبلة وتضحك
بتهه كاعدة تتفرج علئ التلفزيون وتريدني انضف واصخهم
بس اكيد ماكدر ارفض ..
غسلتهن وخلصت ورجعت للهول كعدت
منال ـ كوومي تعاالي هنا هاج المكناسة ورحي كنسي الغرفة الخمدتي بيهه
ـ اخذت المكناسة ورحت كنست الغرفة
ستوني كملت وكامت تصيح منال
ـ ياااووصخة ياااخاايسة يااابنت ام الووصخ يالمعفنةةة
كوابة الجاي كلهه زفرر
والمواعين زفررر
بنت الزفرررة
بنت المعفنةة مو كلتلج غسليهن زييين
ـ اجتي علية طايرة للغرفة وضربتني راشديات ودفرتني علئ الكاع..
ام محمد ـ موووو هيييييج مناااال
ـ اااسمي ااام ووووساااام
عندييي كووم وولد
وعنديي بنيية
عندي جهاال اتسمة باسمااائهم
مو تكوولين اسمي هيييج حااف
ـ يابة مو هيج ام دعاء
ام وسام ..الي يعبجج
بس الطفلة ماعتقد متعودة علئ هيج شغل
ـ خلي تولي هالعياارة
بنت الوصخة
شحال لو ما تربت جوة ايد مرة ااااب عود تريد تفهمني جانت حنينة عليييهه خلي تنلصم..
كلنةة نعررف خيستهه
وشلون جانت مسويتهه بمكاان بنتهه الميتـــة
ولو ماهذيج عدهه بنت ميتتـــة
مااجان باوعت بوجهه اصلااا
فلاا نضحك علئ نفسنــة
اصلا حتئ عمتي حوورية
الله يرحمهه
جانت تعررف هالشييي
و مغلسسسة وساكته
من عيد ميلادههه التسوي بالصيف
وهي جاية بالشتـة
فلا تكليلي جانت مدللة ومتعرف تشتغلل ومدري شنوو
بس هاااي شيطاانة
مثل ابوووهه وامهه
بالضبـط بزر شيطاان نكـــس
تريد تسوي نفسهه متعرف شي حتئ منصخررهه
بس اني الهه
والله اصلخ جلدهه صلـخ
اذا متسوي الاريدة واليعجبنيي
اامشي كداامي غسليهن مرة ثانية
لا اشوفج وجه ماشايفته مني
ـ رحت اركض للمطبخ واني امسح بدموعي وافرك بوجهي من الضرب الاخذتة ..
ياربي شلون راح هيج اضل عاشية وياهم
فوك ماباعو خواتي هيج يأذوني
ـ حطييي شوووي زاهيي بيددج وفرركي الموواعيين فررك يالووصخةةة
ـ سويت مثل ماطلبت وغسلتهن وكملت
طلباتهه متخلص و اوامرهه متنتهي
كل شوي مطلعتلي شغلة من جوة الكاع حتئ اسويهه
كل هذا الديصير فوك طاقتي
كوة اشتغل لان عقلي مشغول بخواتي
بس محد حاس بيه من الموجودين
يتعاطفون وياية دقايق
ويعوفوني ويرحون
ياربي اتمنئ الكالته منال كذب
بلكي صدك يم خوالي مو يم ناس غربة
رجعو عمامي والوضع ماشي طبيعي عدهم..
ردت اروح اكعد يمهم بالهول بس منال ماقبلت طردتني وكلتلي ولي بالغرفة وسدي الباب ..
الغرفة مو كلش بعيدة عن الهول
اذا اركز اكدر اسمع حجيهم
بس هوسة الجهال متخليني اسمع بووضوح
بقيت الباب مفتوحه ومديت راسي بلكي اسمع كلمة تريحني ..
منال ـ اليوم روح جيب بقية الفلووس اريد اطلع اشتري جم شغلة
ناصر ـ العصر امر عليهم مو هسة
ـ اي خوش اريد اطلع للسوك صارر سنين ماطالعه مثل البشرر من فكرك
ـ لااتضلين تحجين هيج منولة
كلنة هذا حالنة
حتئ اهلج هيج وضعهم مين اجيب ابوك
ـ تعيرني بأهلي ؟
ـ مااعيرج حبيبتي
بس كلنة بالهوئ سوئ
يعني الشغل علئ كد الحال
و يادوب مطلع العيشة
نهاوند ـ عزا يعني صدك باعو خواتي
لان البارحة كلهه باجر ينطوني بقية الفلوس وهسة يريد يروح العصر يجيب فلوس
اي.. يعني صدك باعو خواتي
زين معقولة مابجن
ما استغربن من الناس الراحن يمهم ..
معقولة ميذكرني ميريدني
ماعرف شسوي وشلون اتصرف
وهذول ابد ممهتمين بينة شنو من اهل هذول وين اولي شسوي
ارشد ـ شكد نطوك بيهن؟
منال ـ هاااا هسة ادوروون فلوووس..
موو بالبدااية صرتوو شرفاء برااسي ومن صارت صددك كمتو تسأالوون عن الفلوس
ارشد ـ الحجي مو وياج ..
احجي ناصر شكد نطوك بيهن
منال ـ مو هواي
هنة جم فلسس بس احسن من ماكو
ام محمد ـ ماكدر اسكت اكثر ..
يعني باجر عكبة من اموت
هم تبيعون بناتي؟
منال ـ قابل وين وديناهن
اليسمعج يكول بايعيهن نتاجر باعضائهن بابا يم ناس ثكيلة عدهم فلوس يكدرون يعيشوهم
ارشد ـ الوكت اغبر ام محمد
ودتشوفين القتل علئ الهوية
وبالشوراع صاير
والانفجارات مستلمتنه دك
وشغل ماكو بس للعندة حزب
شلون نعيش اربع بنات كل وحدة منهن طلباتهه شكل ..
ام محمد ـ شنو هالحجي ارشد؟
وهنة البنات شطالبات المكرودات
اشو لايفتحن حلك
ولا يمدن لسان
وبعدين عندك 5 بنات وهالوحيد
يعني عادي تبيعهم علمود تعيش
ـ لالا شنو هالحجي علئ كيفج ابيع بناتي شنو
ـ ولگم هذني بناات اخووكم
ماكدر اسكت بعد
انتو شنو من بشر
اجتي المرة ليمنة
ورادت تكعد ويانه علئ حب الله
بس منال زرعت براسنة تريد تبوك زلمنة
واحنة مثل الخرفان صدكناهة و صرنة ضدهه واذيناهه
بس من انقتلت
احس شي بداخلي دمرني
انوب شردتو بناتهه بالشوراع
وهسة بعتوهم
ولكم ماكدر بعد
تانيب الضمير ميخليني انام
افز بالليل الف مرة من الكوابس
نوبة شوف وحيدي مدري شبي
ونوبة اشوف بناتي مشردات بالشوارع
خايفة تطلع حوبتهه وحوبة بناتهه ببناتي وابني الكوة شفته
وگ ارشد اني خاايفة ومرعوبة
خاايفة منــــكم
اليشمر عرضة مرة يعيدهه الف مرة
وخاايفة من الحوبة تلحكنة وتسحكنة
منال ـ لاااتخافين
ماكوو لاااحوبة ولا عوووبة
لو اكو حووبة
جاان حصلتهه من زمان وطلعت بالاكرهم
مو هذاا حالي ..
وبعدين لا تخاافين انتي ورجلج ولاتسوين هالتمثيلية علينة
راح تحصلين جم فلس ادللين نفسج وبناتج بيهن
ـ بقت منال تسولف وية ام محمد وتغريهه بالفلوس
عمة كميلة وعمو توفيق ساكتين ماسمعتهم يحجون ابد
بقيت كاعدة بمكاني ماعرف شسوي
ياربي يكون هذا كلة حلم واكعد منة
حتئ الدموع خانتني ومتقبل تنزل بعد
يمكن خلصت دموعي وصفالي وجع الراس
صار العصر وطلعو عمامي وبقن نسوانهن ..
كاعدة بمكاني وماعرف الوكت
متيهه ليلي من نهاري
بس سمعت باب البيت اندك
وطلعو فتحو الباب الجهال..
سمعتهم يكولون
وحدة بالباب اسمهه ام حسين برة تريدكم
كمزت من مكاني من سمعت ام حسين يمكن هي جيرانة نفسهه ..
طلعت اركض من الغرفة للهول
شفت منال برة يم الباب
طلعت بالحديقة وشفت خاله ام حسين دتحجي وية منال
لا شعوريا ركضت عليهه واني اصرخ
مثل المخبلة وبعالي صوتي ..
لحكييينة خااالة
عمــــااامي باااعوو خوواتــــي للحراميـة
مافكرت بشي بهاللحضة
ماعرف مين اجتني القوة
وراح مني كل الخووف
حاولت منال تسد الباب
بس ام حسين دفعت الباب ودخلت ...
ام حسين ـ عزةة العزااج خااالة شهالحـــــجـــي وج احجيي شبيج
ـ وووج خاالة لحكـــيلي
عماامي باعوو خواتي للحرامية
مااادري ووين ودووهن
منال ـ يابة حجية انتي همم تصدكين بهالمخبلةة
خطية صاررت بيهه حاله نفسية لان ابوهه وامهه انكتلو وماتو كدامهه المسكينة
والله خطية متنة قهر عليهه
ـ حاولت منال تلزمني
ومتخليني اوصل لخالة ام حسين
بس فلتت من ايدهه
ماابية شيي خاله
واالله كذب ماابية شي
مو تعرفيني من زمان
اني مابية شي
خااله شمروونة بالشاااارع
ومن رجعونة النااس الغربة
باعو خواتيي واني نايمة جنــت
مادري وينهنن ووين اخذوهن
ام حسين ـ عزااا عزااااا شنو هالحجييي
ابو حسين ـ اهدي عمو خلي نفتهم
منال ـ شتفتهم حجيي
مكابل زعطوطة وتريد تفتهم منهه
مو دكلك عقلهه مو تمام
شوفتنة نجووم الضهر بهالجم يوم
ـ عمو خواتي ماادري بييهن ووين مااعرف وين اخذووهن
منال ـ ياااا شوف شوف شوف هالحجي وج مين تجيبيهن هالسوالف
هاي تاالي المداراة بيــج
شنوو هالصلااافة
شنو هالعيين الكووية المتنكسرر
عيينيي حجي
البنات يم خواالهن
لا بعنااهن ولا شي
مو اكلكم مخبلة بيهه حاله نفسية بس متصدكوني
ـ حاولت تسكتني منال بس ماكدرت
جنت مثل المخبلة اصرخ واحجي
ام محمد وكميلة وكفن اباب البيت وبقن بعيدات ماتقربن
الجوارين فتحت بيبانهه من صياحي وطلعت تشوف شكو
واني كل شوي اعيد الجملة
عمامي باعو خواتي للحرامية
خاله ام حسين
والجوارين كامو يحققون وية منال
وهي تحاول تسكتهم
نوبة تتمسكن بالحجي
نوبة تكلهم هاي مخبلة بيهه حاله نفسيث
وكذابة هية صايرة مخبلة ماعرف شبيهه
واني افرفح واصرخ اكثر من هالحجي
واكول باعوهن ماعرف المن ودوهن
الجوارين التمت وصارت تحجي وتتهامس
حسيت نفسي قوية وماخفت بعد
حجيتلهم شلون ذبونة بالشارع قبل يومين
وجابنة واحد صديق عمو عماد
الناس تخبلت من السمعتة واستغربت من كلامي
ماحسبت لاي شي
ولا لاي عقاب
ما ابالي شي
غير شغلة وحدة
شلون الكة خواتي ويرجعولي
ام حسين ـ وين البنات الصغار ام وسام
ـ هو تحقيق ؟ راحوو يم بيت خوالهم ناخذ اذن منكم يلة نوديهن
ابو حسين ـ زين وين زلمكم
ـ طالعين ..
وبعدين وين الفلوس
مو علئ اساس جايين تنطونه فلوس الغراض مالت بيت المرحومة
جيبوهن يلة انطونياهن
ابو حسين ـ اذا طالعين هسة اتصل بواحد منهم واساله عن البنات
منال ـ وانت بصفتك شنوو تسأل عن بناتنة
ام حسين ـ حگ الجيرة
وحگ ام نغم علينة
تخلينة نسأل عن بناتهه ..
ـ حگ الجيرة خلص وانتهئ
راح هالزمن بعد ميرجع ..
وام نغم راحت لدار حقهه
واحنة عمام البنات
فـجيبو فلوس الغراض
والله وياكم
وكلمن يحير بروحه واهله
و لاتدخلون بشي ميخصكم بعد
ابو حسين ـ بعد الشفتة منسلمهه بيدكم ..
نظمهه للبنات..
بس خلي نعرف وين هنة
نهاوند ـ الجوارين صارو قسمين
بيهم الصدك بحجيهه وراح رجع لبيته
وبيهم لا ضل واكف يتفرج
خابر عمو ابو حسين علئ عمو ارشد
وكله البنات وين
ارشد ـ موجودات ليش تسأل؟
ـ جيبهن ابو محمد عندي امانة فلوس جايبهه الهن
ـ انطي الامانة لاي واحد يمك من اخوتي
ـ لا خوية لاا
اشوف البنات اربعتهن
يلة انطيكم الفلوس ..
هذا حگ ايتام ماكدر اتلاعب بي
شوكت تجون لان ماكدر اتاخر
ـ ليش شكد الفلوس ؟
ـ خير من الله
مووطلبتو نبيع اغراض بيت اخوك .. بعناهن وصارن خوش مبلغ
ـ اني جاي فد ربع ساعه
ـ اذا مو كدام البنات ماسلم ولا فلس
ـ شنو عوود انت تخوووني
لو تخووفني
ـ البنات وين ابو محمد
ـ موجودات
ـ نهاوند تكول بعتوهن
ـ بعنااهن شنو شنو هالحجي
وبعدين بابا احنة عمامهمم
انـــت شكوو داخل بيناتنة
ـ خلف الله عليك خوية
بس هم ما انطي الفلوس
اذا مو كدام البنات ..هذا حقهن
منال ـ اي ابقو مجلبيين بالفلووس
مبين تريدون تبووكووهن
والله العظيم نشتكيي عليكم
ام حسين ـ احنة منبوك احد ام وسام
ـ لعد احنة مأمنين بييكم
وتالي تلهطوون لفلووس عليينة…
ادري ماكلتو هذا حگ يتاامة شلون تااخذوو ببطوونكم
متستحون متخجلوون
ام حسين ـ لو ماخذيهن ببذونة مثل متكولين منجي لباب بيتكم ترة
ـ لعد شكو مجلببن بالفلوس
ـ نشوف البناات يلة ننطي الفلووس هذا حقهن بيت ابوهن وامهن
ـ هاااي حجة ..
تتحججون حتئ تبوكوونة
والله افضحكم هناا
وبمنطقتكم اسويلكم هوسة تفشلكم وتخلي روسكم بالكاع
ام حسين ـ ماعدنة شي نخاف لو نخجل منة..
ـ والله افضحكم كدام هالعالم الواكفة
شوفو عيني
احنة امنة بيهم
ونطيناهم مفاتيح بيت حماية الله يرحمة يبيعون الغراض ويصفون البيت وتالي مجلبين بالفلوس مينطوهه النةة
ام حسين ـ انتي مو كلتي البنات ابيت خوالهم
ـ ااي ابيت خوالهم
ـ اتذكرت رقم وداد عندي ..
هسة اتصل عليهه
نهاوند ـ طلعت تلفونهه خاله ام حسين وخابرت علئ خاله وداد
منال اتخبلت بالزايد من هيج سوت خاله اول مأ سألتهه البنات يمكم لو لاوبعدين وكعدت تسولفلهه بالصار
ومنال فاتحة عينهه
والحقد يتطافر منهه
عفتهه وانتبهت علئ ام حسين
اسمع صوت خاله وداد تصرخ وتعيط بنات اختي وين وديتوهن ..
انطت ام حسين التلفون لمنال وبقت تصيح عليهه
ومنال تكلهه اخوج نبيل هيج كال احنة شعلينة ..
تربعت خالة ام حسين بالكاع
وكالت ما امشي منا الا اشوف بنات ام نغم وين راحن ..
وهسة راح تجي خالتهن وداد ونشوف تاليهه
منال صار وجهه يضرب الوان
بس ابد ماخفت منهه
حسيت عندي ضهر قوي
بوجود خاله ام حسين وزوجهه والجوارين
الجو حار بس لازمتني رجفة ماعرف ليش
ماعرف شلون اوصف شعوري بهاللحظة
وصل عمو ارشد وعمو توفيق
ارشد ـ هسة ييجبهم ناصر
بلة هذاا حجي ابو حسين
تحجي هيج علينة مو عيب
ابو حسين ـ هذا السمعنا ولازم نتاكد بنات صغار مينتركن هيج
ام حسين ـ مافهمناكم
مرة اخوك كالت يم خوالهم
اخابر خوالهم يكولون مو يمنة
والهوسة كبت
الطفلة تكول عفتوهم بالشارع يومين وهسة بعتوهم ..
الحجي ممترابط والازم نعرف بنات ام نغم وين
نهاوند ـ حاولو عمامي يذبون الصوج بيه ويمشون بكلام منال نوبة يكولون تاهن وبقينة ندور عليهن
لو مخبلة وبية حاله نفسية بس خاله ام حسين ماسمعتلهم..
اجتي سيارة من بعيد تعلك لايت وتمشي شوي سريع..
شفت هاي خالة وداد دتسوق السيارة نزلت تصرخ وتعيط من سيارتهم
والتمو المنطقة كلهم علينة
وداد ـ ووووين بنات اااختــــــي
لاا يم نبييل
ولا ونعيييم
ولا بااقي خوااتتي
وووين وديتوهننن
ارشد ـ ليش الصياح
موجودات هسة يجيبهن ناصر
ام حسين ـ متخافون الله
جهال صغار هيج تسوون بيهن
وفوكاهه بنات
شامريهن بالشاررع بنص هالمصايب معقولة يطلع منكم هالشي ياولد الحجي
ارشد ـ ياابة علئ كييفج
ترة الحجي مو بس الكم
هنة تاهن طلعن يتشرن وتاهن
محد شمرهن شنو هالتهاايم تشمروهه علينة
وداد ـ لعدد وين بناات اختيي اشو بس نوونة هناا وين الصغاار
منال ـ هسة اتفطنتي عندج بنات اخت
ـ اااي هسةة اتفطنتت ..
لأن عبااالي عدهن عمام زلمم
عبالي اواادم يلمووهن
ويداروهنن مو يبيعووهن
منال ـ محد باااعهن
انتي تصدكييين بهالمخبلةة
باباا مااخذهن نااصر وراح يشتريلييهن فووك مندللهنن وندااريهن تاالي هيج سوون وويانه
صدددك لو كال المثل
خير تسووي شرررر تلاكييي
صياحهم صار كلش عالي
كلبي كام يرجف موو بس جسمي
التفتت شفت عمو ناصر جاي من بعيد يتمشئ ووياه خواتي
ملابسهم واحذيتهن جديدة
وقراصاتهن جديدة
و شايلات جبس وعصير وياكلن
يعني صدك جانو بايعيهن لان هاي مو نفس الملابس اللبستهه الهن
عفت كل الهوسة الوراية
ورحت اركض عليهن
وججج اااالحاااان نغمممم صبااااا
حظنتهن عبالك صارلي سنين مشايفتهن
الحان جيتت عليه وحضنتني
ونغم عيونهه مورمة من البجي
وصبا مصدومة عبالك
اشكال شفنة مصايب بهالاسبوع اني وياهن
حضنتهن تلاثتهن
وكمت اشم بيهن وابجي وهنة يبجن
هسة ردت روحي الي وارتاحيت
حتئ وجع راسي وعيوني راح
ولجن وين جنتن ..يم منو
نغم ـ ها
ـ ليش سكتي ..
رفعت راسي شفت عمو ناصر مخنزر وفاتح عيونة علينة
وصاك علئ سنونة ويحجي بهمس
ـ نفس ما اسمع منجن
ديرن بالجن تحجن كلمة... افتهمتن
ـ نغم خافت منة وكلتلة اي عمو
ـ حضنتهه وهمست بأذنهه احجي مثلي وين جنتي يم منو ضربووكم اذوكم هناك
ـ لا ..
بس الحان بقت تبجي طول الليل
وكالو منريدهه رجعوهه
وبعدين اجة عمو ناصر اخذنة كلنة
ـ حضنتهن بكل قوتي وكمت اشهك وابجي
اجتي خاله ام حسين ورايه وباستهن ومسحت علئ راسهن
منال ـ هاااا شفتوو جايبهن عمهن يتمشئ من راس الشاارع ومشتريييلهن
مو اكلكم مخبلةة هالبنيةةةة
مو اكلكم بيهه حاله نفسية
وتجذذذب شلوون تصدكووهه
ام حسين ـ ووين جنتو خاله
وداد ـ نغممم احجي الصددك
صدك بقيتو بالشااررع لو لا
صبا ـ اي خاله
نمنة بالشارع ووصخ ايع ويمنة فارة وذبان يعضنة
شوفي ايد لحونة عضتهه الفارة
منال ـ اااي غيررر دايحاات وتااهن خصوصاا هالادبسز الجبيرة
راس البلة والشيطنة
خطية هذني الصغار مابيهن اذيه
ـ راسا اجتي خاله وداد سحبت الحان مني وهي مجلبة بية متقبل تعوفني
ـ جيبي بنات اختي جيبيي
خلي اشوف وين اتاذت
ـ هنا بأصبعهه الصغير
ـ يااايمة سودة عليية
هيج تبهذلتو بعد امكم ازدهاار الله يرحمج خيتي هيج حال بناتج بعدج
ادريي ودووهه للطبيبب شووفو ايدهه ليش مورمةة ولكم انتوو شنو
منال ـ ياريت بس فلوس ماعدنة
مو كلنة لنبيل انطيهن من فلوس امهن نصرف عليهن بس ماقبل يحب الفلوس اكثر من بنات اختة
وداد ـ امشو خاله امشوو..
الله لايعوزكم لبشر بوجودي
نهاوند ـ ووين راح تاخذيهن عفية خاله
ـ اخذهن عندي
انني اربيهن
طالمااا عماامج متعااجزين منهن وشامرريهن بالشواار وبايعييهن ومدري شمسووين
ـ اشوف علئ عمامي
كل واحد تطافر من عيونة جدحات نار تخوف
ومنال واكفة اباب البيت تخزر بية ..
اجني صبا ونغم ولزمني من ايدي
نغم ـ تعااي ويانة نوونة
لاتعوفينه
وداد ـ لاااا ياابة لاا
وين تجيي
لا نونة تضل يم عمامهه
ـ جنت خايفة من هالكلمة وسمعتهه
عرفت راح تاخذ خواتي وتعوفني خاله وداد
ـ ماكدر اخذهه
البنية جبيرة وتحل علئ زوجي
وهي اصلا مو بنت اختي
يعني مو مسؤليتي
فـ ماكدر اخلي النار يم البانزين
ـ ضليت ساكته ماحجيت اي شي
بس امسح بدموعي وعيني علئ خواتي
ام حسين ـ وين تبقيهة يم هالظلام
ناصر ـ ماسوينة شي الهن يابة
هذني بنات اخوية
ليش تكولين ظلام
شنو هالتهمة تذبوهه علينه
وداد ـ الله يعلم وين الصدك ووين الجذب
بس نونة الهه الله
ارحم من عدنة
وبعدين اخذت تلاااثة منهم
ميكدروون يحملوون وحددة
ابو حسين ـ يابة اني اخذهه مستعد اخذهه واربيهه وية بناتي يشهد الله
منال ـ لا ….
عدهة عمام ييتلشون بيهه
ام حسين ـ خافو الله باليتامة والله الحوبة تبطي بس متخطي
ـ كافي عااد يالعجوزز
موو كداام عيننج جابهن عمهن
مرتباات وبيدهن حلويات
شهاللغوة الزايدة بعد
ـ خلف الله عليج خاله
بكد امج اني وهيج تحجين ويايه
ـ اي انتي هم لاتظلين تتهمين علينه
شنو متخافين من حوبتنة تلحكج ..
نهاوند ـ شفت عمو ناصر اتقرب علئ زوجته ومدري شحجة وياهه
وهي باوعت عليه بخزرة عين
منال ـ لاااا
محد ياخذ بنت فؤاد
خلوهه تبقئ يمنة
حالهه حال دعاء بنتي
ام حسين ـ مو دكولين بيهه حاله نفسيه انطونياهه
ـ اي هي صح مخبلة ..
بس احنة نتحملهه لخاطر ابوهه شلون يعني نشمرهه بالشارع
ـ عفتهم يحجون بينهم
ورحت لخواتي احضن بيهن وابوسهن .. شفت بوجه خاله وداد واني ابجي
اجتي عليه تمسح علئ راسي وتحجي بصوت ناصي
ـ ماعندي شي وياج خاله
بس رجلي اعرفة مو راحه
وعيونة طايرة منا ومنا
وما أئمن عليج يمة
وبعدين راح تبقين بس انتي يمهم
اكيد راح يتحملوج
ـ خاله بس ديري بالج عليهن
والله هاليومين
بس الله يعرف حالنة شلونة
والله من الزباله اكلنة
عفية خاله الحان ايدهه مورمة
ومتاذية اخذيهه للطبيب
عفية خاله لاتاذيهن ابوس ايدج
ـ كافي مردتي كلبي ..
هنة وبناتي نفس الشي
خاله لاتخافين عليهن بناتي هنة
ديري بالج علئ نفسج .. والج الله
ـ خاله كل فترة جيبيهن اشوفهن الله يخليج
ـ ان شالله ..
ـ جرت الحان مني
ورحي راحت وياهه
صافنة وعيوني تجري دمع
بس فرحانة لان راحن يم خاله وداد
اعرف بيهه تحبهن
وحتئ الي تحبني متكرهني
احاول اضحك بوجهن
بس ماكدر
الحان تبجي
وصبا تاشرلي بيباي
ونغم ملجبة بأيدي
وداد ـ وين ملابس البنات
منال ـ اي .. لحضة
ام محمـــــد
جيبي ملابس البنات ورة الباب
نهاوند ـ تحجي وجر بالكلمة منال
وتباوع صفح
طلعت خاله ام محمد
بيدهه جنطة ملابس خواتي
بقيت واكفة وساكته
حتئ دموعي خلصن
سدت الباب وشغلت السيارة خاله وداد وساقته وبدت تبتعد
عيني عليهن وبس ابجي
اندارن خواتي وياشرلي بيباي واني أأشرلهن الئ ان لافت السيارة علئ الشارع العام
ام حسين ـ شوف راحت وداد ومانطيتهه الفلوس
ناصر ـ مو بحاجتهه
خير من الله عدهم
بس هالطفلة تحتاج كلشي جيبوهن
لو هم راح تعصون بيهن الا ترجع وداد
نهاوند ـ حجو الجوارين وية عمو
ابو حسين وكالو هاي هية مالكم حك بعد عليهم انطوهم فلوس اخوهم
شال عمو ابو حسين ونطاهم الفلوس
ابو حسين ـ زين متنطونه الطفلة اربيهه بنص بناتي
وشوكت متريدون تعالو شوفوهة لو اني اجيبهه الكم
ـ جلبت بايد خاله ام حسين بلكي صدك يقبلون عمامي اروح وياهم
بس منال ماقبلت
ارشد ـ شعجب ام وسام ؟
ـ بيت عمهه اولئ بيهه
نهاوند ـ اريد اروح وية خاااله
منال ـ مو اكلكم دايحة متصدكون تريد تروح ابيت بي شباب غربة عنهه شيحجون علينة الناس ياكلون ووجوهنة ناصر جر بنت اخوك
ابو حسين ـ ماكو داعي تجروهه
هي راح تدخل للبيت وان شالله اني والحجية كل فترة نجي نشوفهه
اخوية ابو محمد
اذا تكدر انقلهه للبنية من مدرستهه للمدارس اليمكم قبل لا تبدي المدارس
واذا متكدرون اني اكدر اساعدكم
ارشد ـ اي ان شالله
بس نفرغ انقلهه
ـ بوستني خاالة ام حسين وشاورتني
ـ لو بيدي ماعوفج ياخاله
بس شبيدي
عمامج كلمتهم هي اللازم تمشي
ـ لاتعوفيني عفية خاله
ـ سودة عليه يايمة
اتبهذلتن بعد امجن
لا اعتراض علئ حكمك ربي
لكن نسألك اللطف فيه
ـ انطو الفلوس بيد عمو ارشد
وراحو بيت عمو ابو حسين
الجوارين هم رجعو لبيتهم
ورجع انزرع الخوف والرعب بداخلي
صفيت لوحدي وياهم
دخلوني للبيت وسدو الباب
لزمتني منال وسحلتني من شعري وكامت تفر بيه بالهول
ـ ادبسززززز
ااااني هيج تسووين بيييه
ام محمد ـ كاااافي بعد ماا اتحمل التسوووي وية هالطفلةة ..
كاافي عووفيـــــه
ـ وخرري منا انتي معليج ام محمد
ـ اررشد توفيق كميلةة ناااصر
يمعودييين مو هيج
هاي يتيمة موو هيج
ناصر ـ كالت منال طلعت تصيح بالشارع وفضحتنة بين الجوارين خليهه تتأدب
ام محمد ـ علئ شنو تتأدب
غير يكون مسووية شي
ولكم ممسوية شيي
تريد تعررف خواته وين
اتقوو الله ياناس بهالطفلةة
ناصر ـ ميخـــصج انتي بيهه
اني عمهة واريد اربيهه
ـ اررشد احجييلك كلمــةة
ـ مالي خلك مشاكل
بس عيب التصرف السوته
شنو تطلع بالشارع وتصيح وتلم علينة الجوارين هي هاي تربية
ـ لعد السوويتو انتوو شنوو
لعبت نفسي منگ ومنكم كلكم
ولكم الحيوانات ماسووت سوايتكم
الطفلة تريد تعرف وين خواتهه
كافي خافو الله عاد
يكفي نامن بالشارع يومين
ولكم كافي
ولگ ارشد
باجر هم راح يشمرون بناتي ويبيعووهن مثلهن
منال ـ يااابة
ام الضمير الكااعد ومتمدد
اشو هسة اتذكرتي
ليش سكتي من ذبيناهن بالشارع
ووين جان ضميررج غاافي
وشعجب هسة صحــة
ـ اي هسة صحة
ـ رجعي نيميي ..
هالسااقطة خلتني اخسرر فلووس
وراح اخليهه تتمنئ الموت علئ سوايتهه وفضيحه اليوم
نهاوند ـ شافت عمة ام محمد زوجهه كاعد ومدنك راسه وميحجي
وكامت تصيح
كلتلة ماكعدلك يوم واحد بعد بهالبيت
انتو مو ثقة ولا امان علئ اطفالي
صعدت لغرفتهه تركض لبست ملابسهه وعمو ارشد يتعارك وياهه ويحاول يبقيهه
بس مقبلت
اخذت بناتهه وابنهه حمودي
وطلعت وطلع وراهه عمو راشد
سحلتني منال للمطبخ من شعري
وسدت باب المطبخ علينه
كفختني علئ راسي قوي
ووكعت بالكاع واني اشهك وابجي شبيج عمة
ـ بنت فؤاد النذذل
بنته طالعه علييه
نفس الطيينة الخايسة
انتي وياه نفس الشي
صدك الخلف مافطس
الا اخلي بكبره يندم علئ السواه ويايه
الا ابجي بكبرة دمم
وابجيج انتي هم
وادمركم مثل مسوة ويايه
وللحكاية بقية………… 🥀
اعرف هالبارتات حزينة شوي بس لازم اذكرهه حتئ تعرفون شنو مرت بيه البطلة
و لا تنسون حبايب.
لايك وتصويت وتعليق حتئ استمر روجو للقصة خلوهه شوي ترتفع اذا تحبون 😘