الحلقة السابعه
#ليلة_من_فبراير
ﺍﻟﻠﻪ ﻣﻮ ﻭﺻﻪ ﺑﻜﺘﺎﺑﺔ ﺃﻋﻠﻰ ﺍﻟﻴﺘﻴﻢ ؟
ﻟﻴﺶ ﻣﺎ تمشي ﺃﺑﻜﻼﻣﺔ ﺍﻟﻨﺰﻟﺔ
وﺍﻟﻠﻪ ﻟﻮ ﻣية ﺳﻨﻪ ﺃﺗﺼﻠﻲ ﻭﺗﺼﻮﻡ
ﺭﻛﻌﻪ ﻣﺎﺗﻮﺻﻞ ﺍﺫﺍ ﻣﺘﻮﻛﻠﺔ
ﺍﻋﻜﺲ ﺍﻵﻳﺔ ﻋﻠﻴﻚ ﻭﺍﻧﺘﺔ وﺷﻮﻑ
ﻫﺬﺍ ﻟﻮ ﺍﺑﻨﻚ ﻣﺠﺎﻥ ﺍﺗﺪﻟﻠﺔ
ﺟﺘﻲ ﻣﺪﺭﺳﺘﺔ ﻭﻷﻥ ﻣﺎﻋﻨﺪﻩ ﺛﻮﺏ
ﺍﺗﻮﺳﻞ ﺍﻷﺳﺘﺎﺫ ﺍﻥ ﻣﻴﺴﺠﻠﺔ
ﺍﺷﻠﻮﻥ ﺃﻛﺘﺐ ﺩﺍﺭ ﻭﺍﺣﻨﺔ ﺍﺑﻼﻳﻪ ﺩﺍﺭ
ﺍﺳﺘﺎﺫ ﻣﺎﺗﻜﺪﺭ ﺗﻐﻴﺮ ﺍﻟﻤﺴﺄﻟﺔ
ﺯﻳﻦ ﺍﺫﺍ ﺍﻛﺘﺐ هلي ﻛﻠﻮﻟﻲ ﮔﻮﻡ
ﻭﻳﻦ ﺍﺣﻂ ﺍﻟﻮﺍﻟﺪ ﻣﻦ ﺍﻟﻌﺎﺋﻠﺔ!
ﻳﺎﺷﺮﻳﻒ ﺍﻟﺒﻴﻜﻢ ﺍﻟﺒﺎﻭﻉ ﻋﻠﻴﻪ
ﻭﻳﺎﻫﻮ ﻣﻨﻜﻢ ﺭﺍﺡ ﻭﺗﻔﻘﺪ ﻫﻠﺔ
المهزلة مو لان عدنة يتيم
ﺃﻧﻌﻮﻓﻪ ميت ﺟﻮﻉ ﻫﺎﻱ ﺍﻟﻤﻬﺰﻟﻪ
ﺷﺒﻌﺔ ﻛﻠﻤﺔ #ﺃﺗﺮﻳﺤﺔ ﻣﻮ ﺃﻟﺔ ﺭﻏﻴﻒ
ﻭﺟﻮﻋﺔ... ﺑﺲ لا تكلة ﺃﺑﻦ ﺍﻷﺭﻣﻠﻪ
❤️
نهاوند ـ احس حياتي اني وخواتي مجهولة
سد التلفون عمو ناصر وكال خلص
باجر نشمررهم بالشااارع وطزز بيهم.. روحي راحت وية هالحجاية
حضنت خواتي وكمت اشهك بالبجي
منال ـ وليـــــــش باااااااجر
هسةةةةة طلعوووو ووشـــمرووهم مننرريددهممم كوووم نااصر اشمررهم برررة وخلصـــــــــنة
ـ انهاريت من هالحجي
وركضت وجلبت برجل عمو ارشد ابوس برجلة واتوسل بي ..
عفييية عمووو لاتشمرونة باالشااررع
وااالله نخاااف وااالله
والله بعد منضررب اااحد
والله وااالله بعد منحجيي
موتوونة كتلل بــس لاتشمررونةة
خواتي صغار واني ماعرف شسووي ووين اخذهم وين اااروح
منال ـ مامستعدين نتحملهن
واااصلاا علئ شنووووو نتحملهن
هاي امهه شامرتهةةة صارلهه سنينن بالجذب ماذكرتهه
وهذول فلوس امهن متلتلة وخوالهم مجلبين ومتنعمين بيهن
وذاببيهن براسسنة
ميكفيي احنة كاتلنة الفگرررر
يااااادوب لاكين اللكمة
وبالكووة البيت مكفينة
تريدونه نتحمل
ارربع بناات
لــــــــــيش يابة ..صحتي زايدة عليية
ارشد ـ مو مال نذبهم بالشارع الناس شتحجي علينة
منال ـ طزززز بالنااااس
محد عايش عيشة الثااني
يريدوون خلي النااس تلفيهمم
ام محمد ـ هذا شلون حجي منال مو هيج التفاهم
ـ ناااااااااااصر
اقسم بذااات الله
اذا ماسويت الاريدددة
يكون اعووفلك الـــــــبيت واروح لاهليي ميكفيي متحملة البقيــــــة فوووك راسيي
ولك عيشششششششةة مثل البشررر ممعيشنييي اني وجهــــاالي
انوب هذوول فوكايــــــة
وفوووكاااههة صلفاااااااات
وادبسزياات يضربن ويغللطن ويتجااوززن ممترباااياات
توفيق ـ اهدي ام دعاء
مو هيج الحجي بعدهن صغار
ـ والله ولا اهدااااء
ناااصر لو انييي لو هالبناات بالبيت
ارشد ـ اكيد البنات نبقيهن انتي عندج بيت اهل بس هالبنات منو الهن
ـ هاااااا هيييج الحجييي
مستغنيين عني يعنيي
ااااي اااي طلعوو وجووهكم الحقيقييية طلعووو
ووواااانت ياانااصر
شنو اخر كلمة عنـــــدك؟ احجــــي
ـ منال اهدي هنة يم توفيق وارشد مو يمي
ـ اهااااا طالماا هيييج الحجي
خلــــــــص
اني رايــــحة لاهليي
وماارجع االاا بييت لــــــوحدددديي
ومن كلشييي جاااااهـــــزز مجهـــزززز
اذاا كشةة نااقصة بيي
اكلب الدنية علئ رااسك
ميكفي متحملة فكررك مطبـــــخ لوحديي مثل البشررر ماعندي
اخشابي بعتهه علمـــــوود اسدسد ديووونك
الزكهه مناا ومــــناا
حتئ اعيش هالجهااال
وتالي هالتااايهاات احسن منيييي تفضلوهن عليييــــه
وووج دعاااء لمي اخوتج وامشي ويايية
ناصر ـ ووين رايحه يمعودة فدوة حبيبة منولة عيووني مو هيج الحجي وين ووين يمعودة كعددي دعااااء ابقي جووة
نهاوند ـ كلام عمو ارشد خلاني اطمئن لزمت خواتي وانزويت بزاوية البيت خطية من الصياح يبجن ويرجفن خايفات
عمو ناصر جلب بزوجته ماخلاهه تطلع وكام يتعارك وية عمو ارشد
ناصر ـ انتت ترريد تهجم بيييتييي
اخـــذ بنااات اخووك واطلع بيييت وحدك اني ماكدر استأجر بيت
ـ ما نايماات علئ كلبببك بابااا حاالهن حال جهالنة بالبييت
منال ـ طالماا هيج اني رخيصــــة عدكمم نبيع الببيت وكل واحد ياخذ حصتـــــة ونخلــــص
ارشد ـ شنو تبيعوون البييت
هوو بيكفكم
البيت قديم وميجيب سعر
واحنة خمستالاف واحد
وررثة بهالبييت
شنحصل تفاااليس
ووين نشترري
ووين نكعد
معناهه راح نخلصهه ايجارات
منال ـ وطزززز المهم ووووحديي
نهاوند ـ اتمنيت اغمض وافتح
الكة كلشي منتهي
وواشوف خواتي نايمات ومرتاحات وراجع كلشي لطبيعته..
صياحهم تعبنه
الحان تعبت من البجي
وغفت علئ كتفي
ضلو يصيحون بيناتهم ومنال دكت رجل لو اني لو هنة بالبيت
ناصر ـ اخرر حجي عنديي تذبهنن لو اشمر البيت ازااله شيووع وغصبا عنك تبيع بذيج اللحظة
ارشد ـ انت غشيمم لو تسوي نفسك غشيم ؟
مو تدري بس نص البييت النة
والنص الثاااني باسم عمي الله يررحمة ولك لاتعيد غلط ازدهار الله يرحمهه
ـ ميخصنيي ..
نص البييت
ربع البييت
عساااا حصتي بي شبررر
ابيع يعني ابييع ..
اررريد ارتااح باباا كافيني طلاايب
ـ ولك ميجيبلنة شــــيي ااافهم
خلف الله علئ ولد عمك ساكتين عن حصة ابووهم وولك ووين نوولي اذا تبيعون البييت كل واحد يطلعله شكدد عشر ملايين وين نحطهه شتجيبب
منال ـ عسة حصتة مليوون نبيييع احسن من هالقلة قيييمة والاذية والحقاارة
ناصر ـ هااا شكلتووو
نهاوند ـ عمو ارشد سكت من هيج حجة عمو ناصر وماجاوبة بعد ..
حسيت خلص راح ياخذنة ويشمرونة بالشارع
شفتة جاي بتجاهنة وكف كلبي
اتمنيت الاتوقعة خطأ
صاح بصوت عالي وكال
كوووومي يلةةة امــــــــشوو طلعو بررة ..
ارشد ـ لحظةة لحظةةة خلــــي نخابر خوالهم بلكي غيرو رأيهــــم صبروو شويي..
ـ اخذ تلفونة عمو ارشد وخابر علئ خوالي احس كلبي مو يرجف لا احسة يريد طلع من مكانة
يارب يكون هذا حلم مو حقيقة
يارب يكون كابوس واكعد الكة امي عايشة وتاخذنة وبعد منجي هنا ابد
عيني علئ عمو اريد المح منة كلمة تريحنة اني وخواتي ..
ناصر ـ شووو جيبب خليي انيي احجيي وياااه شنو نتووسل بيي ..
اسمممع ابوو ايوب
لو تاااخذ بنات اختك
لووووو تلكااهن بالشاارع مشمورات
نبيل ـ تشمروهن
تبيعووهن
ادفنووهن ..
طزز ..
هنة بنااتكم لو بناتنة
بااااباااا شايلات اسم اخووك وابووك قابل شايلاات اسمي واسم ابووية
ـ هاا نبييعهن ندفهننن عاادي ؟
ـ اااي كلش عادي انتو عمامهم
ـ هذا اخر حجيي
ـ ااخرر حجي
ـ خوووش تدلل يابة
منال ـ والله خوش فكرة نبيعهن..
عااشت ايدة
علئ الاقل نستفاد منهنن
مو بس اكل ونوم مثل الحيوانات
ـ سمعت كلمة نبيعهن وندفنهن
مكدرت اوكف
كعدت بالكاع وخواتي كعدن يمي
منال كيفت علئ هالحجاية تكله اي نبيعهن ونستفاد منهن..
حضنت خواتي وكمت اختض من الرعب
نغم ـ وين راح يودونه
ـ مـ مادري انـ انــ انتي لزمي صبا
ولزميني وابد لاتعوفيني
ولا تعوفيهه ابـــد ابدد
سد التلفون وكللهم راح نشمرهم بالشارع معليينة بيهم بعد
اجئ يركض علينة
هو طويل وضعيف ومشيته سريعه
احسة ميمشي عبالك طاير علينة
سحبني من ايدي
وخواتي مجلبات بية
والايد الثانية شايلة اختي لحونة
محد لحكنة وركض علينة ..
يسحلني واني وخوات نركض وراه
التفتت اباوع علئ عمو توفيق وعمو ارشد وابجي واصيح عفية عمو نخاف من الظلمة نخاف من الشارع والله بعد منضرب احد ..
من البجي دموعي خلصت
احس روحي مصدومة بالديصير
ماعرف شسوي ..
طلعنة بالحديقة وراد يشغل السيارة
بس ما اشتغلت ابد
حاول وياهه قفلت ابد ماتحركت
طلعت منال تركض علينة
اشوف الفرحة بعيونهه متنوصف
مستغربة منهه ليش هالكد تكرهنة اني وخواتي والله مااتذكر اذيناهه ابد
منال ـ اخذ درااجة توفيق اذا السيارة متشتغل
ـ راح يركض لدراجه عمو توفيق شغلهه وصعدني واني مجلبة بالحان احس ايدي خدرت من الوجع بس لازمتهه بكل قوتي
وصعد نغم وصبا بحضنهه
وطلعنة الباب بدون وعي صرخت ..
عفيــــة عموو الدنيةة ظلمةة
ـ اااااااش اذا اسمع نفسج هسة بهالمنهولة اذبج انتي وخواتج ومحد يعرف بيكم ووين..
نفس ماااسمع
ـ حبست انفاسي وكتمت بجيتي
طلعنة الشارع وبعد مااندل
ماعرف وين اخذنة..
لنص الطريق
وكال بانزين الدراجة خلص
ومنع تجوال ماكدر اتقدم اكثر ..
نزلوو هنا ..
اباوع شارع تقريبا فارغ
يمة محلات اضوية حمرة خافته بالشارع
كمت ابجي واشهك ..
عفية عمو لا تعوفنة الله يخلي جهالك اابوس ايدك عمو نخاف والله ..
بس ماهتم النة
لاف بالدراجه ومشة سريع
اختي نغم وصبا يركضن وراه
واني بيدي الحان واركض واصرخ عمووووو
عموووو والله نخاااف عموووووو عموو عفية ارجعع الله يخلييك عموو
بس راح واختفت الدراجة وهو هم اختفة..
لزمت خواتي وانزونية يم اول محل
الجو حار ..
بس احنة نرجف ونختض
ظلمة ويخوف الشارع
مابي احد
كمت اتخيل هواي شغلات
اتخيل شبح اسود راح يطلعلنة من المحلات..
سمعت صوت ناس ديمشون
رفعت راسي شفت 3 ولد جايين بأتجاهنة
جريت خواتي وحشرت روحي يم الحايط..
مر تقريبا عشر اشخاص ما اهتمو لوجودنة ..
بس مشو وعافونة حتئ ما سألونة انتو منو وليش هنا ..
بس واحد اجئ وراهم
وسألنة ..
من شفتة انرعبت شكلة يخوف
ماادري اني صايرة اخاف من كلشي ..
ـ انتو ليش هنا؟
ـ نـ نـ ننتضر عمو يجي
ـ منو عمكم
ـ عمو عماد هسة يجي ياخذنة
ـ امشو اني اوصلكم
ـ لا عمو كال منوخر منا
ـ الوكت مو خوش وانتن جهال امشي وياية عندي نساتل وجبس وعصاير بالبيت كلشي عندي
نغم ـ اي اني جوعاانة
ـ كفشت نغم من شعرهه وجريتهه عليه اننجبي انتي ..
ووخر مناا ترة عموو يم ذيج المحلات هسةة يجي عليينة
ـ وينة ؟
ـ ماعرف شنو الخلاني اصرخ .. عـــــموووووو عماااااااااااد
من شافني صرخت عافنة ومشة سريع واختفئ ..
ديري بالج تكولين جووعانة لاحد غرريب افتهمتتتي
ـ جوعانة وارريد اناام
صبا ـ اني هم جوعانة وعطشانة وبية
بي بي
ـ عزةة توالييت تريدين..
ـ ااي كلش محصورة
ـ مين اجييب وين اوديج
ـ مادري راح اسويهه علئ روحي
ـ اوكفي اوكفي ..
اخذتهه ورة الشجرة اليمنة ووكفت اباوع الشارع..
ـ خلصت تعالي غسليلي
ـ وين اغسللج ماكو ميي
ـ لعد شلون اني وصخت
ـ عزااا ...
حسيت نفسي متورطة
وراسا كمت ابجي
ماعرف شسوي وشلون اتصرف
ياربي والله بعدني صغيرة مادبرهه ابقئ لوحدي وية خواتي
دورت منا منا بلكي الكة شي انضفهه بي
مالكيت غير باكيتات صغار واوراق اخذتة و نضفتهه شلون ماجان ولبستهه
صبا ـ بعدني مو نضيفة نونة
ـ امشي حبابة الصبح نشوف مي واغسلج بس اسكتي لاحد يسمعج
جريتهه من ايديهه ورجعت لمكاني
كل هذا واني شايلة لحونة بايدي اخاف اعوفهه..
بس ايدي خدرت
وكمت ماحس بيهه وخفت لاتوكع مني
شفت باكيتات جبيرة بالزبل مشمورة كدام محل شوي مسافة عن المحل الاحنة يمة ..
شجعت نفسي
وكمت اخذت هالباكيتات وجبتهن
خليت لحونة بوحدة من الباكيتات
ونغم وصبا بالثاني
واني كعدت يمهم
ايد يم الحان...
وايد يم خواتي
كل شوي يطفر جريدي علينة
ونتصارخ
لو نشوف ابو بريص يمشي علئ الحايط المرتجين عليه ونكوم نركض ونبجي من الخوف..
ومن يروح نرجع لمكانة..
احس راسي راح ينفجر من الوجع
الليل صار كلش طويل مديخلص
كعدت اسولف وية روحي
خاله ام حسين وينج
خالة اني وخواتي بالشارع ذبونة
ماا اندلكم شلون اجيكم
عفية خاله تعالي اخذينة
يارب ليش ما موتتنة وية ابوية وامي
هسة يجون الامريكان ويقتلونة
لو ياخذونة العصابات ويحركونة
افكار سودة اجتي براسي من المصايب الاسمعهه من الناس
خواتي استسلمن ونامن كلهن
بقيت اني لوحدي
عيني علئ المحلات الظلمة
والشوراع المحفرة من العبوات والانفجارات هواي ناس ماتو بهالمكان وابقئ اتخيل اشياء تخوف واتجمد من الرعب
نسمة هوئ خفيفة تحرك الشجرة اليمنة خلتني انرعب واتصور بيهه شبح وراوح الناس الماتو لو حرامي لو امريكان بيهه
عيوني حركتني واخاف اغمضهه
اخاف انام واكعد الصبح مالكة خواتي
خلص دمعي وصفنت بحياتنة اني وخواتي ..
ياربي شسوينة حتئ هيج يصير بينة
امي تكرهني وعافتني من اني وبالكماط
وابوية ماجان يطيق يباوع بوجهي
عمي عماد وزوجته سافرو تركوني
ماما ازدهار ماتت وعافتنة
ربي ليش حرمتني من كل واحد جان يحبني ..
حتئ بابا جان يحب خواتي ومات
ماما ازدهار جانت لامتنة وتحبنة وماتت
وين راح اروح بيهن
لاعندي فلوس
ولا اندل بيت خاله ام حسين
ثواني وصرخت اختي الحان وغصت بالبجي وكمز من كدامنة جريدي كلش جبير عبالك بزونة...
فزيت علئ صوتهه
وراسا شلتهه مااعرف شبيهه
لحوونة شبيج حاولت اسكتهه عبالك متاذية من شي
كعدن خواتي من النوم علئ صوتهه ..
تصرخ وتكلي اوا ..
شفت ايدهه مليانة دم
اخترعت من هالمنظر
مسحت ايدهه بملابسي وشفت اصبعهه الصغير مكروض وينزف دم
روحي راحت ماعرف شسوي
اتخبلت عبالي اختي راح تموت
اريد مي ..
اي شي اغسل ايدهه
ماكو مالكيت غير ملابسي
لفيتهه بيه واضغط علئ ايدهه
ضليت علئ هالحاله الئ ان طلع
الفجر وبين النهار
شوي ارتاحيت من غمة الليل
كوة سكتت لحونة ووكف النزف
خطية متاذية باصبعهه
خبصتني جوعانة
وحتئ خواتي هم جاعو
كابلتهم وكمت ابجي والله ماعرف شسوي الهم..
الشارع مابي احد
ابد ماكو بشر بالشارع
ماعرف وين راحو الناس
بس النهار مو مثل الليل يخوف
ضليت كاعدة
بلكي عمامي يحنون علينة
ويرجعلونة يلكونة بنفس المكان
بس ماكو احد ..
صارت الشمس عالية
ومحد منهم اجانة
وخواتي خبصني جوعانات
وعطشانات
شفت كعدتي مابيهه فايدة ..
اخذت خواتي وكمت اتمشئ بيهم
رجعت بنفس الطريق الجابنة منه عمو ناصر .. شفت اثنين رياجيل كبار ..
ـ عمو ليش طالعين من البيت منع تجوال اليوم ميصير تطلعون بالشارع ارجعو للبيت
ـ يعني محد يطلع بالسيارة اليوم
ـ ياسيارة ممنوع تمشين ..
زين وين اهلج؟
ـ خفت احجي شي ..
هنا هسة اروحلهم
ـ شلون امهات تالي وكت مال حررك
عايفات بنات كل وحدة بطول اصبعي بالشارع لوحدهن وبهالضرووف التعبانة
رجعي عمو رجعي لبيتكم
لا يلزموكم الامريكان ويروح العرض بالرجلين
ـ مافتهمت شنو يعني يروح العرض بالرجلين بس خفت من حجية
بقينة نمشي من الجوع والعطش خواتي كامن يونن يالله شلون اسكتهن
شفت فرع يشبه فرع بيت جدو
راسا دخلت بي
خواتي يمشن ويبجن
يريدن اكل واني هم جعت
بس ماعرف مين ادبرلهم اكل
..نزلت اختي لحونة تمشي
لان بعد ماكدر اشيلهه ..
بداية هالشارع اكو زباله
ماعرف لحونة شلون شافت خبز بالزبل وراحت تركض عليه
خلتني اركض وراهه
بس مالحكت عليهه
شالتهه الخبزة واكلتهه
تكلي عمية جوعانة
حاولت اخذة من ايدهه
ماكدرت جلبت بيهه
اختي صبا هم شالت من الزبل وكعدت تاكل نغم تفتهم تكلهم لا وصخ لاتاكلون بس هنة جوعانات..
كلش جوعانات
ماهتمن وصخ او لا المهم ياكلن
انهاريت من هالمنضر وضليت ابجي..
هالشارع بي بيوت بس كل وواحد ساد بابة
كعدت اني وخواتي علئ رصيف يم بيت بابة سودة جبيرة
نغم ـ عطشتت نونة اررريد مي
ـ ميين اجييب اني همم جوعاانة وعطشاانة بس مين اجييب
ـ دكي هاي الباب كليلهم نريد مي راح اموت عطش
ـ الجو حار وتراب خفيف مو كلش قوي
اخذتهن ورحت دكيت الباب بس محد طلع..
شفت لحونة عبالك ذبلت من العطش شفايفهه صارت يابسة
رحت للبيت الثاني دكيته قوي لان مبين بي ناس عدهم سيارة بالكراج ..
طلعلي ابو البيت وكلتلة عمو عطشانين الله يخليك ..
ـ اي عمو ابقو بالباب هسة اجيبلكم مي ..
ـ سد الباب ودخل وطلع بيدة بطل مي بي برودة
شربنه خواتي كلة وضليت اني ..
باوعت عليه واستحيت اطلب
ـ هسة اجيبلج بعد مي لحظة
ـ جابلنة بطلين كبار بيهن برودة شربنة وارتوينة ..
طلعت ام البيت وراه لافة حجاب علئ راسهه ذكرتني بأمي ازدهار نفس طولهه ودورة وجهه تشبهه كلش شفتهه ابتسمت
ـ ماما انتو ليش هنا
ـ ماعدنة مكان نروحلة
ـ ياا ليش وين اهلكم
نهاوند ـ راسا جاوبهه زوجهه
وكلهه لاتدخلين بهيج امور معليج..
ـ اكيد جوعانين ..تعالو دخلو
ـ رادت ادخلنة للبيت بس زوجهه ماقبل ..
ـ شمعرفنة منو وراهم ؟ وين ادخليهن
دتشوفين العصابات يتفننونن بهالسوالف
ـ خطية خلي ننطيهن غدة
ـ صبيلهن هنا برة البيت يكعدن ياكلن
ـ الجو حار
ـ جايزة من نفسج لومن جهالج
بابا الناس مو امان والوضع يخوف ..
ـ دخلت المرة جابتلنة صينية بيهه تمن ومركة عدس وخبز ومي وكعدنة ناكل اباب البيت ..
بس محد منهم سألنة انتو منو وليش هنا كلما تريد تحجي هالمرية زوجهه ميخليهه ..
شبعنة واخذنة بطل مي متروس ويانة وكلنالهم شكرا
بس ضليت بمكاني ماعرف وين اروح
ـ عمو اكلتو وشربتو بالعافية..
بس ابتعدو عن بيتنة حبابة
روحي لغير مكان...
هزيت براسي وكلتلة اي
رجعنة يم الزبالة لان يمهه ساحة جبيرة يوكفون بيهه سيارات
اخذتهن ورحت بين السيارت كعدت
لحونة وصبا يلعبن ويضحكن ميدرن بالمصيبة الاحنة بيهه
من اشوفهن اموت بجي
شنو ذنبنة وهيج ننشمر بالشارع
شنو سوينه حتئ هيج يكرهونة
النهار طويل شيخلصة
ايدنة توصخت وملابسنة ادمرت من التراب والوصخ مال الشارع
وجرح اختي شوي التهب
صار الجو تراب ااااحمر
مثل اليوم الختفت بي امي
هم جان هيج احمر
خواتي اختنكن علمتهن يرفعن ملابسهن ويخلنهه علئ خشمهن وحلكهن
بس لحونة عدهه تحسس قصبات
حرت وياهه شلون اخليهه تتنفس
اختي جانت لابسة جواريب اخذته منهه وبللته وعصرته وخليته علئ خشمهه وحلكهه جنت اشوف امي هيج تسوي
وبللت ملابسي وخليتهه الهه
مو مهم اني اتنفس تراب
المهم لحونة تكدر تتنفس
شوي وبدة التراب يخف ما ضل هواي
ولا استمر..
جان ماتت اختي لو باقي للصبح ضلت بس تگح وكوة تجر نفس
صار الليل
واحنة بنفس المكان بيين السيارات
نقضي حاجتنة ابمكانة
واغسللهن شوي من هالمي العدنة
حسيت بوصخ مو طبيعي
احنة ممتعودات هيج نغسل وهيح نقضي حاجتنة ..
النمل والبگ والدود والابو بريصات والفيران كلهن يمنة
لان الزباله قريبة علينة
متنة بس نحگ جلدنة راح اتملخ
وشعرنة صار عبالك مشيب من التراب
وكلما يكولن جوعانات الهيهن باللعب
بس وجبة وحدة اكلنة وباقي اليوم كلشي ماكو..
نامن خواتي وضليت اني
اغفئ واكعد فازة مخترعه
من الكوابيس الاشوفهه
لو اشوف احد باگ خواتي
لو فد حيوان يخوف جاي علينة
ماكدرت انام عدل
بس الله يعرف هالليلة شلون خلصناهه
صار الصبح وسمعت صوت سيارات كعدت خواتي واخذتهن لراس الشارع شفت سيارات وناس رايحه ورادة
رجعت لنفس المكان الذبنة عمو ناصر بي
يم المحلات
بس بعدهه ممفتحه كعدنة يم اول المحل شفت الكارتونات متحركات من الهوئ ورايحات بعيد ..
اشوف حالنة يبجي من الوصخ الاحنة بي
طلعونة بملابس البيت
اني بدشداشتي الوردية
وخواتي بجايم بيت..
والحان ملابسهه كلش توصخت لان مرتين بالت علئ نفسهه
وماكدر انزعهه واغيرلهه شلون تبقئ بدون هدوم بالشارع ..
والي يبيس عليهه البول ..
تعبت من الوكفة والفرة بالشوراع
ممتعودين هيج نتوصخ وهيج نجوع ونعطش ..
كعدنة يم المحل وارتجينة عليه ..
ـ شجابكم هنا عموو؟
ـ فزيت من هالصوت التفتت شفت رجال طويل وعندة لحية ولابس بنطلون وقميص ..
اخذت خواتي وابتعدت عنة .. ماجاوبته
ـ وين اهلكم ؟ شجابكم هنا
ـ ننتضر عمو يجي ياخذنة
ـ شنو هذا الدم بملابسج ؟
ـ هاي اختي الحان ايدهه اتعورت البارحة
ـ شو تعالي خلي اشوفهه
ـ خفت اتقرب منه بس هو اتقرب علينة واني ابتعد عنة دنك للكاع وفتح باب المحل الجنت كاعدة يمة ..
ـ هذا محلي عمو لاتخافين ..
منو انتو وشجابكم هنا تعالي جيبي اختج خلي اشوفهه شبيهه
ـ عندك مي عمو
ـ اي اي تعالو هذه حنفية ..
ـ طلعلنة صوندة من محلة وغسلت للحونة شفت اصبعهه بوضوح هالمرة معضوض قوي شايل وصلة منة
كلبي انعصر عليهه خطية شلون متحملة هيج اذية ..
ـ تعاي تعاي هذا شاش وتعقيم جيبيهه خلي الف ايدهه..
ـ دخلت للمحل والرجال عقم ايد اختي ولفهه وكال شوي مورمة لان ايدهه وصخة ..
عادي لاتخافون هاي الجريدية دائما تعضنة هسة اتطيب..
ـ هزيتلة راسي ورديت شلتهه وطلعت وشربت خواتي مي وغسلت وجههين واني هم غسلت ايدي ووجهي ..
صبا ـ جوعاانة نونةة
ـ ااش هسة يجي عمو علينة
ـ لاتسكتين الطفلة جوعانة خطية .. اصبري عمو هسة يفتح هالمحل واشتريلكم ريوك
ماكلتيلي منو انتو وشجابكم لهنا
نغم ـ عمو ناصر جابنة هنا
ـ يعني عمج اخو ابوج الجابكم هنا؟
ـ اي
ـ ليش وين ابوج امج
نهاوند ـ ميتين
ـ لا اله الا الله ..
وليش شمركم عمكم ناقص الغيرة؟
ـ ماعرف
ـ شكد صارلكم هنا
ـ اول البارحة جابنة
ـ من ااااول الباررحة يعني صاررلكم يوومين هناا؟
ـ اي
ـ حسبي الله ونعم الوكيل ..
وج عمو منو ابوج
يعني بيت منو انتو وشسمج انتي
ـ نهاوند فؤاد حمزة ..
وخواتي نغم وصبا والحان
ـ زين وين بيتكم
ـ منا هيج كبل
ـ يعني اذا اخذج تندلين توصلينة
ـ لا بس من اوصل للشارع اندل
ـ كعدو عمو كعدو ..
استغفر الله ربي
شبيهه الناس انجلبت اتخبلت تذب عرضهه بالشارع ..
الله ينتقم من السواهه وجابنلة هالمصايب
ـ ضلينة كاعدين اني وخواتي فتحت المحلات وراح عمو الرجال اشترالنة بساكت ونساتل وكيمر ومربئ وخبز وفرشلنة بمحلة وكعدنة ناكل
شبعن خواتي وكمنة
ـ عمو لمي الباقي وضمي يمج خاف شوي لاخ يجوعن خواتج انطيهم خطية ..
ـ شكرا عمو ..
المحل صغير يبيع بي اضوية وحنفيات وبراغي اني وخواتي تقريبا سدينة المحل مابي مجال بعد ..
اخذت خواتي وردت اطلع
ـ وين رايحة؟
ـ عمو نكعد بالباب لان ماكو مكان هنا
ـ لالا ابقي كاعدة معليج خلي ينسد يكدرون يدخلون..
ـ زين عمو ماكو تواليت هنا
ـ لا والله عمو المحلات مابيهه ..
لحظة شوي اكو بيوت هنا ورانة اخذكم تروحون بيهه
ـ مكدرت اكول لا جنت كلش محتاجة تواليت اني وخواتي .. يعني وين
ـ هنا عمو لاتخافين اصحاب البيت اصدقائي ..
امشي اخذكم كملو وارجعكم بلكي يجي احد يعرفكم ..
ـ اخذنة ومشينة تقريبا عشر دقايق بالشوراع..
جنت مضطرة اثق بي لان ماعندي غير حل ..
وصلنة بيت بابة جبيرة وبي حديقة
دك الباب وطلع رجال اتفاهم وياه ابو المحل ودخلنة للكراج مالهم اكو بيهه حمام تواليت مادخلونة جوة بالبيت
اخذت خواتي ودخلنة كلنة اخاف اعوفهن برة
كلمنة كلشي وغسلنة ورتبتهن وطلعنة ..
وحجة ويانه ابو البيت
ـ عمو انتو مين ؟ من يامنطقة
ـ من الاعظمية
ـ هاا مناا ..هي هاي الاعظمية عمو
زين بيت منو
ـ بيت فؤاد بابا اسمة فؤاد
ـ اسمج الكامل شنو؟
ـ نهاوند فؤاد حمزة
ـ لالالااااا بيييت حجيي حمزززة انتووو
ـ اي جدو حجي حمزة
ـ كوولي غيررهه ووج عمييي
الله اااكبرر
جدج جان لازم الجاامع ومرات يأذن بي موو هو هذا جدج
ـ اي هو جان بالجامع
ـ عماد ابو ااسلام شيصير منج
ـ سمعت عمو عماد راسا بجيت ..
بابا عماادة ااي هذا عميي سافر من زمان ونساني
ـ ولجن انتن بنات منوو فهمني
ـ فؤاد بابا اسمة فؤاد
ـ ياااا الملحن النكتل قبل سنة تقريبا هذا ابووكم
ـ اي هو
ـ ززين شجاابكم هنا؟ ليش بالشارع انتو
نغم ـ عمو ناصر جابنة وذبنة هنا
صبا ـ اي بالدراجة جابنة وعافنة ورااح بعيد
ـ صدك هالحجييي عموو؟
نهاوند ـ اي عمو ذبونة هنا وراحو
ـ ااالله اكبررر علئ البشررر
معقوولة عمامج هييج يسووون
ماااااصدك
خووش اوادم كافيين خيررهم شررهم
ينحلف براسهم
معقوولة ولد حجيي حمزة هيج يسوون معقوولة يشمروون عرضهمم بالشاررع هييج .. ليش عمو شمسووين
ابو المحل ـ قابل شمسوين ؟
كاتلين واحد منهم مثلا
لو شماااا يسوون يبقون بنات وصغار شلون يشمروهن
وهمة ولد حجي ؟
المفروض متربين علئ المبادئ والاخلااق لو يهجمون البيت هجم يتحملوهم
ابو البيت ـ زين امكم وين؟
ـ ماتت
ـ لا الله الا الله ايتام الاب والام ويشمروكم معقوولة ولد الحجي يطلع كل هذا منهم
ابو المحل ـ هسة شنو الحل نبقيهم بالشارع
ـ لا امشي ناخذهم لبيت عمامهم ونكون سوينة العلينة وبرينة ذمتنة كدام الله ..
ـ دخل ابو البيت جاب سويج سيارتة وصعدنة بالسيارة
وصعد ابو المحل وياه
اباوع علئ الشوارع عبالك مو هي نفس الشوارع النروح منهه لبيت جدو
مرعوبة بس مابيدي شي
لا اكدر انزل اني وخواتي
ولا اكدر احجي وياه واكلة وين ماخذنة
ندخل بشارع ونطلع من غيرة
تقريبا ورة ثلث ساعه وكفت السيارة
انتبهت شفت بيت جدو حمزة كدامي
ماكدر اوصف فرحتي
اتصورت خطفنة هالرجال
بس طلع ماخذنة من غير افرع اني مااندلهه ولاماشية بيهه
ابتسمت وكلتلة شكرا عمو الله يخلي جهاالك ان شالله
كعدي هنا عمو خلي نشوف عمامج ونتفاهم وياهم
نزلو ودكو جرس البيت
واحنة بعدنة بالسيارة
اباوع من الجامه
دقايق وطلعت عمة منال ماعرف شحجو وياهه وباوعت علينة وفتحت عينهه
ـ ادبسيزززيااات هذنني انهززززمن من البييت من اوول البارحه طلعن يشتررن ومارجعنن
ـ انصدمت من كلامهه فتحت الباب ونزلت خواتي ورحت يمهم ..
احنة مانهزمنة انتو شمرتونة
ـ ياااا شوف شوف شوف الصلااافة يمةةةةة كل البلةةة بهالخبيثة ولج احنةة شمرنااكم ادبسزززز متستحيين تحجيهه كدام الززلم بس ماعلييج عتب مثلـــ
ـ وسكتت ماكملت
راسا حجة الرجال ابو المحل ..
ـ زين ماكو رجال نتفاهم وياه؟
ـ واالله كلهم طلعو علئ باب الله
ابو البيت ـ ترة اني صديق ابو اسلام يعني مو غريب عنكم الولد يعرفوني عشرة عمر بيناتنة
منال ـ ابو اسلام!
تعالن تعاالن ادخلن عيوني عمة ليشش هيج خليتونة هاليلتين نبجي وننوح والله نمررد كلبنة عليكم عبالنة خطفووكم كتلوكم لو تشوفين ناصر شصار بي سودة بوجهي
بس يدخن وعيونه هالكبرهه ورمت من البجي عليكم
ابو المحل ـ كالن عمهن ناصر اجئ وذبهن
ـ يعني ياخوية انت تصدك بجهال ومتصدك بية انيي مرة شطولني وشكبرني متاخذ بكلمتي
ابو البيت ـ واذا هيج خايفين عليهن شلون يطلعون للشغل ويعوفوهن؟
المفروض يفتشون الاعظمية شبر شبر حتئ تلكون هالبنات ..
مو يروحون لشغلهم
ـ اني ماااااكلت راحو لشغلهم
طلعو يدورون عن مكصووفات الرركبة هذني
وبعدين شنو مو عيب واكفين تتحاججون وية مرة بالحجي
عدكم شيي من يجون زلمنة عود تعاالو احجو ..
امشن دخلللن جوووة امهاااات المصااايب من يووم اللفيتو عليينة مااششفنة خيررر من وراجن
ـ سحبتنة من ايدنة وركعت الباب بوجه عمو ابو المحل وعمو ابو البيت
تمشي وادفر بية اني وخواتي
رغم الضرب والاذية
بس جنت فرحانة رجعت للبيت اني وخواتي دخلنة واجتي كميلة وام محمد شافونة
ام محمد ـ وين وداكم عمكم ناصر
منال ــ ااااي اااي ذبووهه براس نااصر علئ اساسس انتوو خيريين لو تريدوون جان جلبتو بيهن مو تعوفوهن يووولن
كميلة ـ غير انتي ورجلج دكيتو رجل
ـ كلنةة مشترركين بهالساللفة يااابة اسمعوو ززين والله العظييم اذاااااا تحااولون تذبووهه براسي اني ورجلي اكلب السالفة علييجن واركبهه براسجن وتعررفن منااال منو
كميلة ـ عوووذة يساعدة الله اليبتلش ويااج ..
اروح اكمل شغلي احسنلي
ام محمد ـ اتريكتو ؟
ـ اي بس اريد اسبح خواتي واسبح
ـ هاي شبيهه ايد اختج؟
ليش ملفوفة شنو هالدم
ـ عضهه جريدي وشال لحمة منهه وعمو ابو المحل ضمدهه
ـ يا .. خطية تؤ استغفر اله
اخذيهن سبحيهن وبعدين احجيلنة الصار
ـ اخذت خواتي ودخلت للحمام سبحتهن وسبحت وغسلت ملابسنة وطلعت
خليتهن بالغرفة وصعدت اشر الهدوم
كعدت اسولف لعمة ام محمد شلون ذبنة عمو ناصر ووين ضلينة وشنو الصار
وولد عم ناصر وبنته دعاء يضحكون علينة ومحد كلهم عيب تضحكون خطية
صار الضهر واجو عمامي
بس محد منهم باوع بوجهي
ولا وجه خواتي
ولا حتئ ما سألونة وين نمنه ومنو جابنة
جنت كلش تعبانة ونعسانة
بس اريد انام
عيوني موتتني من الوجع
بس كلت انيم خواتي يلة انام محد يتحملهن
صبو الغدة بيت عمو ارشد وصاحتني عمة ام محمد ..
اخذت خواتي ورحت اغديهن بالهول وعمة ام محمد تسإلني
شنو صار ويانة واني احجيلهه
ماعرف ليش سألتني مرتين يمكن لان عمامي موجودين رادتني اعيد الحجي
كاعدين بيت عمو توفيق
وعمو ناصر
كل واحد حاط صينية الغدة مالتة علئ جهه ويسمعوني شدأحجي
ارشد ـ شسمة هذا الجابكم
ـ ماعرف اسمة
ـ كال صديق عماد
ـ اي بس ماعرف اسمة
ـ اكيد هسة وصلت السالفة لابو ااسلام شنوو راح نكلةة
غضب الله علئ راسكم ولكم
شراح نحجيي شنو عذررنة
منال ـ عذررر شنوويابة
هنة شرردن من الببييت وانهززمن واحنة عبالنة انخطفنن
شمدرينة ويامن رايحات
الله يعلمم شسيوون تربية زباااله شيطلعن قابل
ـ غصيت باللكمة من هيج حجت .. اختنكت وانكطع الهوئ عني
كوة شربت مي وباوعت عليهه
احنة مانهزمنة عمة
ـ عمةة العمتج
اادبسزززز تكذبيييني
احجووو كوولوو
تووفيق اررشد ام محمد كميلةة
ااانهزمنن لو لاا... .احجن
ـ كلهم سكتو ومحد جاوبهه
ادور بالوجوه علئ كلمة منهم تنصفني اني وخواتي ماكو
ماعرفت شحجي بس صافنة عليهم
دك تلفون عمو ارشد وكمز من مكانة
ـ ولكم هذا ابو اسلام
توفيق ـ جاوبة لاتخلي يدك كلة ماكو شي
ارشد ـ هذاا المحسبناالة
احنة نااس معروفين بالمنطقة
وانفضحة من ورة عماايلك انت وومرتك يااناصر
منال ـ كلكم مشترركين ويانة عيني
لا تحاوولون تذبوهه براسنة
كلنالكم اخذووهم عدكم سكتو وماحجيتو شي
جاي هسة تذبهه براسنة كلنةة مشترركين يابـــة
ـ شحجي شكول لساني نعكدد
منال ـ كلة انهزمن من البيت مثل متفقنة
ـ رد عمو ارشد علئ التلفون ..
سمعت صوت بابا عماد يحجي بس مافتهمت شديكول
اتمنيت اخذ التلفون واحجي وياه كلش مشتاقتلة
عفية عموو انطيني احجي وية بابا عماد مشتاقتلة واالله
همست عمة منال
ـ انجبي ام دروب عبالهه منعرف دروبهه تريدين تتمسكنين وتتشكين من عدنة
ارشد ـ ماكو شي لايضل بالك ..
يعني تاهن ولكيناهن والحمد لله انسدت السالفة
عماد ـ شنو تاهـــــــن وووشلووون تااهن بناات صغااار اشلون اطلعووهن لوحدددهن
وليش ماطلعتوو
ادورون علييهن اذا تااهن
صديقيي خابررني مفرفح
وحجاالي كلشي بالتفصيل
يكوول مبين شامرريهن
ـ لالا شنو شامريهن يابة
اصبر عماد شبيك
وبعدين ليش نشمرهن
وانت شنو تصدك صديقك الغرريب
ووتكذب اخووك ووين صايرة هااااي
ـ ديحجي عمو ارشد وية بابا عماد وعمة منال سوت نفسهه تبجي وتحجي اتسمع بابا عماد
منال ـ ليشش عمـــة
ليشش طلعتن ونهزمتن
واذا عمجن ناصر رزلجن
قابل شصاار يعني
غير حاسبجن حسبة دعااء
غير خايف علييجن ياعمةة
االله ستر ما باكوجن الحرامية
لو اخذوجن الامريكان وتصخم وجهنةة
عمامج خلصو الليل يدورون
وداعتك يا ابو اسلام
وداعتك وانت غالي عليية
لا اكلو ولا شربو
ولاقبلو ينامون
مثل المخابيل يدورون عليهن وتالي لكوهن وجابوهن وهيج تحجي هالجبيرة وتهم علئ عمامهه يم الغررب
حسبي الله ونعم الوكيل
ولج بزر شيطان انتي
مو معقولة شكد شايلة شيطنة حتئ مرت ابووج جانت تتشكتي منج
انطيني انطيني التلفوون يا ابو محمد خلي افرغ كلبيي يم عماد بلكي يلكة جاررة لبنت اخووو
الووو ابو اسلام شلونك عيني مشتااقيلكم ..
ووگ عييني ابو اسلاام
يااريت ترجع
عمامهه مديكدروون علييه
هالبنية فدد مرة فلتت
من عررفت امهه عايفتهه ومتزوجهه اتخبلت علينةة
متتحمل كلمة من ااحد
وانت تعررف الوكت ااغبر والعراق بي اشكال بعد السقووط
وهي بنت ينخااف عليهه
اخوتك غير من خوفهم يرزلوهه يحجون عليهه
ودااعتك حتئ ميضربووههم ابدد
يضربون جهاالهم ومحد يضربهمم
بس هي هااي الجبيرة كل مرة تهددنةة تطلع وتنهزم من البييت اذا هيج نعاملهه حتئ مرة ابووهه جانت تشتكي منهه يبوو ابو اسلام
ارجع ارجع فدوة لعينك هالبنية كبرت وماعاد نكدر نسيطر علييهه
ـ دموعهه وطريقة كلامهه خلاني اشك بروحي ..
نطتني التلفون وكالت عمج عماد يريدج وابتسمت بخبث..
كيفت كلت راح اشتكيلة بلكي يرجع ياخذنة وياه
بعدني ماكلت الووو واستلمني عمو عماد
ـ ادبسززز تطلعيين من البييت وية خواتج وووين ووليتن
متستحيين
واذاا عمااامج رزلوووج لو غلطووو علييج
حتئ لوو ضرربوووج وطيحو حــــظج تنجبيين وتسكتين
وتكعديين بمكاانج
مين متعلمة سالفة تطلعــــين من البييت ولج اني ماربييتج هييــــــج قليلةة ادددددب
ـ عمو
ـ انجبييي
نزلتييي راااااسنة بين الناااس العالم كلهه تعررفني وتعرف ابووية
تكــــــلي شلون بنااتكم بالشارع باقيات وولج ليشش لــــــيشش
اكو بنــــت بعمرررج هيج تسووي عمرررج ستووج 13 سنةة
وكل هذاا يطلع مننج
لج اقسمم بالله العظيم
اذاا سمعت كلمةة علييج بعد
ارجعلج من كندااا واجي اطيح حظــــج افتهمتي
تسمعين كلام عماامج انتي وخواتج وتنجبيييــــــن وتكعديين
ـ كلامة خلاني انخرس
معرفت ادافع عن نفسي ابد
بس عيوني تصب دمع
وكلمة حاضر بابا بشفافي
اخذو مني التلفون وكعدنة ..
احس بكسرة خاطر مو طبيعيه
ربي احنة مظلومات والله
ليش هيج كلهم ياذونة ويحجون علينة ويصدكون بعمة منال
كلبي شال حقد عليهم
كرهتهم كره بس الله يعرفة
اخذت خواتي ودخلت للغرفة
مالت بيبي
كلش تعبت من البجي واني اصلا قبل ليلتين مانايمة عدل
نيمت الحان وحجيت وية نغم وصبا .. لاتطلعن برة ابــــد
ترة يشمروكم بالشارع
مثل ذاك اليوم
واي شي يصير كعدوني
لا تطلعون برة الغرفة ابـــــــد ..
كالو.. اي
خليت لحونة ونمت يمهه
ماحسيت بروحي من التعب
اشكال الكوابيس شفت
كعدت من النوم ظلمة فتحت عيني ماشفت احد
الباب مفتوحة مال الغرفة
وضوة قليل يمي ..
متنكعه من العرگ حارة
والبنكة مطفيهة عليه
شفت الحان مو يمي وخواتي ماكو
كمت اركض مثل المخبلة عليهم
طلعت ماشفتهم بالهول
بس النسوان موجودات كمت اصرخ فقدت
ااالحاااان نغمممم صباااا
منال ـ ااااش لاتهووسسين
اجو الناس واخذوهن
ـ فتحت عيني من هالحجي احس ايدي تشنجت ماعرف شبية .. منو اخذهن
ـ بعنــــــــاهن وخلصـــــنة
وللحكاية بقية............... 🥀
لاتنسون حبايب تصويت وتعليق حتئ استمر وياكم النشر بين يوم ويوم حبايب