الحلقة الرابعه
#ليلة_من_فبراير
أفضل مافي الأزمات
هو أنها تُعيد ترتيب الآخرين حولك تكشف معادنهم
وتبين لك من يستحق أن يكون بالقرب منگ
ومن لا يستحق
كل الأزمات ستمرّ وتمضي
لكن الذين خذلونا
#لن يعودوا إلى أماكنهم القديمة في قلوبنا أبداً ..
❤️
نبيل ـ اااسمعييي لــــج
هذا اخرر حجي عــــندي
رجعي بنــــت رجلـــــج لاهلــــه وخلصيينة منهه
وتعالي انتي وبناتج ابيـــت ابوج معـــــززة مگــــرمة محد يندك بيج
والغرفة الفوك اسويلهه حمام و تواليت ومطبخ وعيشي انتي بنــــــاتج بيه
عجـــــبج
اهــــــلا وسهــــلا
ماعبجـــــج
طـــــــــززز بــــييج
من هالشهر بعد ولافلسس تشوفين مني وااااريد اشوف شلون اااادبرين عيشتج وعيشة بنااتج وية الايجارااات
ازدهار ـ شلون تقبلهه غيرتك هيج تسوي بية ..
الوو الووو نبييل الوووو ..
حسبي الله ونعم الوكيل
ـ سدت التلفون امي
وكامت تشهك بالبجي وعينهه علينه ..
كلنة. التمينه عليهه منتحمل نشوفهه هيج
وخصوصا اني
من اشوفهه تبجي اختنك ويكتلني القهر..
عفية ماما شبيج ليش تبجين
ـ هالرجال ابد ميخاف الله
ابد ميكول وراه گبر ضيق
وراه حساب وكتاب
عاصي بحكي وميقبل ينطينيا
ميكول هالمرة مين تصرف
مين تعيش هي وبناتهه
وفوكاهه بنات ايتام وصغار بركبتي ..
معقولة هيج رخصني
وفضل الفلوس عليه
هيج المادة اغلة من اختك
ربي اني دمة ولحمة
عرضة وشرفه هيج يعاملني ..
خلص والله فلا اسكتلة بعد
سكتت اله مرة .. لان ماجان بركبتي احد
بس هسة لاااا اخذ حقي يعني اخذة من عيونة اشلعهه ..
ـ ضلت امي تخابر اخوتهه الباقين وخواتهه وتبجي وتشكيلهم وتتوعد لخالو نبيل تشتكي وتبهذلة اذا مينطيهه حقهه ...
تركت حل التمارين وانتبهت لامي
من اشوفهه مقهورة ماعرف ادرس ولا استوعب ..
خلصت تلفوناتهه وجبرتنة نتعشة وانام بس هي منامت ضلت كاعدة
مر يومين وامي هادئة
لا احد خابرهه
ولا هي اتصلت باحد ولا طلعت خارج البيت
صار يوم الخميس ورجعنة من الدوام لكيت امي محضرة جنطة صغيرة بيهه ملابسنة ..
غدتنة وسبحتنة وبدلنة هدومنة ورحنة لبيت جدو اهل ماما ..
ماعرف ليش اخاف من خالو نبيل
مو كلش احبة يخوف ..
احسة ميحبني وقاسي
دخلنة ولكيناهم ملتيمن كلتم
حتئ خالاتي جايات ..
راحن خواتي يلعبن وية بنات خوالي واني كعدت يم امي ..
نبيل ـ ااضاهر متواعدات تجن
ازدهار ـ ليش نحتاج اذن من احد حتئ نجي لبيت اهلي؟
ـ دائما من تلتمن تسون مصيبة
ـ ابشرك بعد اكو شخص مابين فد ربع ساعه ويجي
وداد ـ ماردناهه هيج ازدهار
ـ هو البدا.. خلي يتحمل شسويلة
نبيل ـ شتقصدين ولج تهدديني ؟
ـ اني ماهدد اخوية نبيل .. ترة صح خواتك احنة بس مو مثلك
ـ لعد منو هالشخص الجاي
مثلا جاينة صدام حسين حتئ اخاف
ـ مارايدة منك تخاف
اريدك تحترم حقوقنة احنة خواتك
ـ عرفت جاية علئ هالسالفة
ـ نبيل انت عندك ولد وبنات ومرة وبيت متخاف عليهم تحطمهم بسبب جشعك
ـ هااااا
وتحجيهه بوجهي يالمتستحين
ولج لو ماا انيي جان هسة انتو بالشااارع
انيي الحافظت علئ املاك ابوية
اني العفت جامعتي
وضحيت بمستقبلي علمودكم
اني الوكفت وية ابوية بوكت الناس كلهه عافته ومحد قبل يوكف وياه
وانتو جنتو صغار مابيكم فايدة واحدكم لاهي بمدرسته ودفاترة واقلامة وميدري شديصير بية اني وابوية
اني السندتة ووكفته علئ رجليه كل هذاا بجهودي وتعبيي وصحتي وعافيتي
تالي هيج تحجين
ـ علئ كيفك علئ كيفك
محد ناكر افضااالك
بس مو معناهه تاخذ حقنة بحجة اني الوكفت واني السندت...
اذا علئ الجامعه
فـ اني كلش زين اتذكر
انت مقبلت تكمل لان تعتبر الجامعه للتافهين والمراهقين مو رجال الاعمال فلا تذب فشلك علينة
واذا سندتة لابوية
فـ انت سندت ابووك
ترة هو مو بس ابوونة حتئ تحملنة هالمنية
ـ لا اني مصدوووم من كلامهه
ام ايوب ـ لعد شحجينة وشجنة نححي طول هالسنين يا ابو ايوب .
ـ ام ايوب خليج شاهد خير
تقبلين رجلج هيج يسوي
ياخذ حق خواتة
وخصوصا اني ارملة وماعندي معين وبركبتي كوم لحم
نهاوند ـ خالهة ام ايوب تباوع بطرف عينهه علئ امي نظراتهه ابد مو حلوة..
وامي خطية محروك كلبهه وتحجي
ـ ادري ليش يانبيل ..
هاي تاليهه هيج تحجي ويايه
نشوو نسيت اني اختك من دمك ولحمك
وداد ـ هدئوو شوي كافي صياح
نبيل ـ سكتــي ااااختج اااكو احد غيرهه هارج البيت
نهاوند ـ همة يصيحون واني احاول ارجع نفسي ورة امي واختل بضهرهه ..
ثواني وسمعنة الجهال يصيحون اجة جدو خلدون ..
هذا يصير عم امي
شايفته كم مرة بالمناسبات
طلع خالو نعيم يستقبلة
وقبل لايدخلون باوع خالو نبيل وزوجته بنضرة قاسية لامي وابتسمو ..
مفهمت شنو هالهنضرة وشيقصدون
وداد ـ كومي خاله نونة
روحي يم الجهال برة لعبي وياهم ميصير تكعدين يم الكبار..
مكدرت ارفض كلامهة واضل كاعدة
بس لو بيدي ما اطلع واضل يم امي
لان مارتاح يم بنات خالو نبيل ونعيم احسهن متكبرات ويباوعلي من طرف عينهن مادري ليش ..
عفت امي وكمت وية طلعتي دخل عمو خلدون
طلعت يم باب الاستقبال شفت خواتي يلعبن بالحديقة وية الجهال ..
مديت راسي لكيت بنات خوالي وبنات خالاتي كاعدات علئ المرجوحة ويضحكن ويسولفن
هنة تقريبا بعمري
وكلش يعجبني اكعد وياهن
بس ابد ماحس بيهن يحبني عبالك يستنكفن مني ..
بس شافني كلبن وجههن وكامن يضحكن عليه
راسا رجعت ووكفت يم باب الاستقبال انتضر امي وبسبب وكفتي يم الباب سمت كل حجيهم
خلدون ـ بلة مو عيب
متستحون
شطولكم شعرضكم
هالخلافات بيناتكم وعلئ مود شنو ؟
علمود فلوووس
تخسرون بعض علمود وصخ دنية
تضحي باختك علمود جم فلس
نبيل ـ عمي هاي تريد تمشي علئ حل شعرهه..
ازدهار ـ لالاااا احتررم نفسك
نبيل ـ انـــجبي ووولج
خلدون ـ كعدووووو كااافي احترمو وجودي شنووالقصة
ـ ياعمي ديطعني بشررفي كدامك
ـ اخلي قندرتة بحلكة. اذا هيج حجة
بس خلي يكمل كلامة واني ارد عليه خلي افتهم اكعديي .. كمل
نبيل ـ شكمل ..
عنادهه وراسهه اليابس هو راح يدمررهه ..
كلتلهه غرفتج ابيت ابوج جاهزة
والبناء مياخذلة اسبوع زمان واخلصة بباقي الملحقات
وتعالي كعدي انتي وبناتج
خلدون ـ ياعمي شتريدين بعد
حل معقول وهو هذا الصح
كاعدة ابيت ابوج ومستقرة ومستقلة ..
ومنهه تستفادين من الايجارات الج ولبناتج لا تبيعون ولا تتبهذولن ليش معاندة
ـ موو بلة عميي بشرفك عايب اني بيهه وفوكاهه تحجي عليه ولسانهه شطولة
ازدهار ـ ميخالف
اقبل وراضية بكلامكم ..
اجي واستقر ابيت ابوية ليش لا قابل ماكيف
اخوتي داير مدايري وعايشة بحمايتهم قابل اني عاجبتني عيشتي هسة لوخدي وية بناتي وفوكاهه الوضع مو امان ويخوف
خلدون ـ اذا هيج خلص علئ شنو اختلافكم ؟
ـ بنتي نونة ماعوفهه تجي وياية تعيش
نبيل ـ اهووووووو رجعت لخبالاااتهه
وداد ـ شنو هالحجي نبيل احترم عيب احنة بعمرك ترة مو بكد جهالك حتئ تهينهه هيج
ازدهار ـ ليش هو جهاله يكدر احدد يفتح حلكة وياهم؟ لو نسيتو ام ايوب شستووي اذا نرزلهم لو نعاقبهم
ام ايوب ـ اها انوب ردن عليه
و اني شكو انتن واخوجن بيناتجن ليش تحشرني
نبيل ـ اولاا معليييج معليج بمررتي
واسمعي اكلج...
هالبنية غرييبة
لا دمنة ولا لحمنة
خلك بنت رجلج
داريتيهه وكبرتيهه وعاشت ايدج ماقصرتي وياهه
وهسة مات رجلج والرابط بيناتكم انذفن فــ خلصـــت مهمتج
رجعيهه لاهلهه وتعاالي لان ممجبور ابتلش بيهه واعيشهه هي هم انوب
ـ اني اعيشهه ..
والله العظيم اني اشتغل
واصرف عليهه..
انت معليك بشي اعتبرهه ماكو مموجودة
بس خليهه تبقئ ويايه بالبيت الله يخليك نبيل
ـ بابا ااافهمي عدهه ااااهل عمااامهه اولأ بيــــهه احنةة شكو
باجر عكبة يصير عليهه
تسوي مكسوورة تكسر وجهه
يجوون يصيرون زلم براسنةة
شعدنة بهالطركاعه شكو ملفيهه ويانه اصلا
خليهه يم اهلهه يحيرون بيهه وعود روحي شوفيهه كل ماصحلج
وداد ـ ترة صدك كلامة ازدهار فكري بالموضوع البنت مسؤليه
خلدون ـ كلامة صحيح ..
البنت مسؤلية و مرجعهه لاهلهه
ازدهار ـ معقولة تكدرون تتخلون عن اولادكم ليوم واحد بس..
نبيل ـ لا تعيشين الدور ازدهار
بنتج نور ماااتت صارلهه كوم سنين
وهاي مو نوور
هاي غيرهه ..
غيرر بنت افهميي عاااد
كافيي خباال لعبتي نفسنةة ترررة
طول هالسننيين مصدكة نفسج هاي بنتح
بابا لا انتي اوول وحدة فقدت بنتهه
ولا اخرر وحــدة
ـ الله اكبرر ..
البشر اذا رباله حيوان يحن عليه ويصير قطعه من روحة وميكدر يتخلة عنة
واني ربيتلي بشرر وتريدوني اتركهه..
من هي و طفلة اخذتهه وكبرتهه علئ ايدي طول هالسنين
كلمة الماما من جنت اسمعهه منهه احس روحي تردلي
جنت محتاجتهه تمليلي فراغ الامومة التركته بنتي نور الله يرحمله..
وملتة ونورتلي حياتي ورجعتلي الابتسامة لوجهي وفرحتني
وعلئ عينهه الله رزقني هالبنات وانتو تعرفون اني بعد بنتي تمرضت بمرض بالرحم وصارت فرص الانجاب قليلة بالنسبة الي
بس الله جازاني بيهه وما عااباني
الف الحمد لله والشكر ..
وهسة من كبرت وحلت اكثر واكثر بعيني
تريدوني اعوفهه ؟
الام الترربي مو التخلف ..
اني الشفتهه بكل حالاتهه
سهرت عليهه بمرضهه
فرحت وياهه بنجاحهه
حزنت بحزنهه
جنت احميهه دائما من قسوة ابوهه لااني امهه مو زوجه ابووهه
هي ايدي اليمنة بالبيت
شايلة خواتهه بوقت اني مالي خلك لشي ..
تحبني واداريني وتسمع كلامي وتنقهر علئ قهري
وهسة ..
اطالبوني اعوفهه ترجع لعمامهه؟
هيج بهالبساطة !
تريدوني انسئ كلشي واسمع كلامكم
يمكن..
لو ادري بعمامهه يداروهه ومياذوهه
يمكـــــــن جااااان
فكرت بكلامكم
بس اعـــرف كلش زين
اذا تركتهه هالبنت تضيع وراية
حرام عليكم بشنو ماذيتكم هالطفلة يتمية والله وصة باليتم
نبيل ـ اولا بناتج هم ايتام ويكفي كفالتهن
وثانيا مدنكلج شمريهه بالشارع
عدهه اهل وتروح يم اهلهه
تضيــــع ..تعيش ملكة
احنة شكو تبقئ بركبتهم وبعد ميخصنة
ـ اي انت ميخصك امرهه
بس اني يخصني
نبيل ـ براحتج لعد
خليهه تفيدج وشبعي بيهه
ووبعدين تعالي اكلج ..
المرحوم مو عندة حصة ابيت اهلة ؟
ليش متطالبين بيهه !
علئ الاقل هالبنت تكعد بحصة ابوهه
ـ انت صدك تحجي
ترة اهل فؤاد ماعدهم شي ملك غير هالبيت وفوكاهه قديم وصغير يعني يادوب مكفيهم تريدني اشيل واهجول كم عائلة بالشارع
خلدون ـ يعني تفكرين باهل زوجج ومتفكرين باهلج ! هذا شلون حجي
ـ عمي انت رجال جبير وفاهم وواعي ..
لاتقارن املاك اهلي
بأملاك اهل فؤاد
احنة عدنة خير من الله
وحالتنة مقتدرة
اذا اخذت حصتي محد راح ينضر من اهلي ولا يتشرد ..
بس اهل فؤاد غير شكل
بطرك هالبيت وماعدهم غيرة
خلدون ـ لا هالحجي مو منطقي
نبيل ـ شفت عميي
شفت شلون تحقرر بنت اخوك ووياية ..
والله واقسم بالله العظيم
فلس احمرر بعد متشوفين مني للموت وانسي عندج وورث
ـ غصباا عليك اخذهن
هذا حقيي ورثي من ابوية وامي
مو من حضررت جناابك حتئ تحرمني منةةة
ترةة انت خلك واحد دلال عقارات واخذت المهنة من ابوية
فـلاتبيعهن عليه ابوو ايــــوب
خلدون ـ عيب هالحجي احترمو وجودي
ـ عمي شفتني شكد اتساهلت وياه
وكلتله ميخالف اجي اكعد ابيت اهلي
بس توصل بنتيي لا ما اتاازل عنهه ابدد وشيريد يسوي خلي يسوي
وداد ـ اتعوذي من الشيطان اهدئي
ـ خلصت كل الحلول وية ابن اخوك ياعمي
بس اذا مينطيني حقيي الشررعي والقانوني من ورث اهلي
فالمحاكم بينة
لأاني سويت باصلي ودخلت طرف ثالث بيناتنة وجبتك ياعمي وتعووذت من الشيطان ..
بس هو ديتحجج
باجر عكبة
يكلي ذبيي بناتج علئ عمامهم
هذني مو بناتنة ممجبورر بيهن
نهاوند وخواتهه نفس الاب فـ اكيدد هم راح تكول عليهن غريبات
نبيل ـ مشكتلج
ـ بابا اني ما اجدي منك
هذا حقي وراح اخذةة من عينك
عجبك ماعجبك الئ حيييث
نهاوند ـ صار صياح وعراك بيناتهم
صوتهم كلش عالي
امي رادت تطلع منهم زعلانة
بس عمهه خلدون جلب بيهه
كلهه هسة راح يبدي منع التجوال وعندج بنات وين تروحين بيهن ضلي ابيت ابوج واني ضال وياج ..
صار الليل وامي لمتنة يمهه بغرفة امهه الله يرحمهه..
من سمعت هالحجي الصار بينهم احس كل حيلي راح من الخوف
وبعد مابية اتحرك
خايفة ومرعوبة لا امي تتراجع كدام هالضغوط وتتخلئ عني وترجعني يم عمامي
جابو لفات وبسبي واتعشينة
خواتي نامن من التعب بملابسهن مابدلت الهن
وحتئ اني ضليت بهدومي
بقيت وية امي كاعدة ومجلبة بايدهه ونايمة ع كتفهه
وهي تسولف وية خالاتي ..
ماعرف شلون غفيت من التعب وبعد ماحسيت بشي ..
صار ثاني يوم وكعدتني امي من الصبح وكعدت خواتي شالت جنطتنة وسلمت علئ خواتهه وطلعت ما انتضرت تشوف خالو نبيل وزوجته ..
رجعنة للبيت وامي حسبة تجيبهه وحسبه توديهه
خلصت شغل وصلاتهه واجتي كعدت يمنة ..
ادرس نغم شوي وبالهه يشرد بغير مكان ..
ليش هالكد تصفنين ماما
ـ شلون ادبر العيشة بعد
جنت معتمدة علئ الراتب الينطيناه نبيل من حصتي هسة راح يكطعهن عني
ويبقئ راتب التصنيع العسكري
وهالراتب كل كم شهر يلة يجي ونشوفة يعني ممكن نبقئ شهور فلس ماكو بجيبي
ايجار البيت وسحب كهرباء ومصاريفكم ودراستكم
لازم ادور بيت اصغر من هالبيت
غرفة وملحقاتهه تكفينه حتئ نوفر من الايجار
بس المصيبة وين ادور
وين اروح واني مرة لوحدي
الجيران اعرفهم هنا وائمن بيهم
شلون اذا اتحولنة بغير منطقة
شمدريني الجيران شيطلعون
زين اذا اخلي محامي يطلعلي ورثي
اكيد يريد كومة فلوس بين ميطلع حصتي
هذا كلة وكت وفلوس مين اجيبهن
كل الفلوس الجوة ايدي هسة 350 الف وكم ذهباية
وين اخليهه وماضل لراس الشهر شي كلهه كم يوم ويجيني ابو الايجار
ـ شفت ماما مهمومة وتحجي
احسهه تفكر بصوت عالي مو تسولفلي ..
اكلج ماما
ـ كولي
ـ انتي ممكن تعوفيني بيوم من الايام ؟
باوعت علية ونضرة عتاب بعيونهه
ـ يعني كل هالحجي الصار البارحة واللغاوي والمشاحنات والعركات والتوعيدات مني.. ومن نبيل
وماعرفتي امج شنو؟
ماكو ام تترك ضناهه
ـ بس امي الحقيقية عافتني
ـ اولا اني هي امج الحقيقة
ثانيا مو كل شخص خلف يعني اب او ام حقيقي..
العبرة باليربي مو يخلف
صح اني ماربيتج من اول عمرج لان جنت ماعرفج ..
بس من اول ماشفتج حبيتج وهذا يكفي ..
وبعدين ليش تكلبين حجينة وتخلينة نروح لغيرة سيرة..
اني احجي عن البشر العندة ضمير
مو غيرة..
يولي انتي بنتي
حالج حال خواتج نغم وصبا والحان
وبعدين كافي تبيعين غباء علئ امج
امني وين ماروح رجلي علئ رجلج ..
ـ هالكلام هواي فرق عندي
شال كل الخوف من راسي
كلامهه عبالك مي بارد ونزل علئ كلبي
صارلي واهس بالدراسة
ومداراة خواتي
صرت كلش مطيعه لامي
احسهه ضحت باخوتهه علمودي
حسيت هالشي جبير من ام ربتني ودارتني ..
خلص الشهر وامي ادور شغل وماكو متلكة
العيشة صارت كلش صعبة
مو مثل قبل تكدر تشتريلنة
استغنية عن هواي امور بحياتنة
من لوازم المدرسة
واحتياجاتنة الخاصة
وبدت امي تبيع باغراض البيت
غرفتهه باعتهه واشترت كنتور علئ كدنة
ووصارت تصفي بكل شي تشوف نفسهه متحتاجة راسا تبيعه
اعتبرتني اني ونغم كبار
واستغنت عن النساتل والجبوسه
كامت تجيب لخواتي الصغار لان ميتفاهمن وتقسمة بيناتنة
ولو اختي نغم تضل تتعارك وية امي وخواتي
احسهه متفهم شي عقلهه بعدة صغير
طول الوكت امي تسويلنة كليجة وكيك بايدهه من طحين الحصة
وتوكلنة حتئ منتشري هواي ونوفر فلوس
جنت اشوفهه حايرة وتتصفن هواي
ضلينة اكثر من تلث اسابيع هيج حالنة
مر علينة ابو الايجار وحجت وياه امي حتئ يقلل من الايجار
بس ماقبل كال البيت جبير وبي حديقة وجديد مو قديم حتئ اقلل ايجارة ..
اذا متكدرون ادفعون اطلعو من البيت شوفولكم علئ كد فلوسكم بس هالبيت ما قلل ايجارة ..
اشوف امي تسمع هالحجي
و تعابير وجهه متتفسر من الحيرة
طلبت منة ينطيهة مهلة بين متشوف بيت ثاني ..
والرجال ما مامنع كلهه انتي ارملة وصاحبة ايتام
وهاي مني الج شهرين ادبرين نفسج بيهن ..
مرت ايام كلش مو حلوة وقاسية علينة وخصوصا علئ امي
ضلت تخابر علئ عمهه خلدون وباقي اخوتهه تريد حصتهه من الايجارات بس ميجاوبوهه ..
واذا جاوبوهه يكلولهه عوفي الغريبة ترجع لاهلهه وتعالي
صارت امتحانات نص السنة وخلصت وامي نفس وضعهه وحيرتهه ..
اول يوم عطله
و امي كلتلي كومي نسوي حملة علئ البيت دنصفي من الاغراض وننظفة
للمغرب يلة خلصنة شغل
بس هلكنة من التعب
طلعت امي هواي اغراض مال بابا
كالت تبيعهه وتستفاد منه
مثل مسجلات وراديونات ومضخمات واجهزة قديمة ماعرفهه شنو جانت عندة اشتراهن اول السقوط يشغل بيهن اغاني
وعندة الات موسيقية تقريبا 3 قطع
بس العود مالتة ماقبلت تبيعه لان مكتوب عليه اسم والدي
فـ غلفته وضمتهه بكنتورهه
ثاني يوم امي سوت حلاوة حليب ووزعت ثواب لابوية مو هواي سوت كم ماعون وزعتهم للجوارين اليمنة تقريبا 5 بيوت
دقايق واجتي علينة ام حسين جيرانة جايبة بيدهه الماعون ..
وكعدت تسولف وية امي
ام حسين ـ صدك تحجين؟ وين تشيلين انتي وهالبنات وين تروحين
ـ والله مو هين عليه اشيل بس الايجار ماكدر ادفعه وحقة ابو البيت يريد فلوسه كاملة ..
وبعدين البيت جبير علينة كلت اشوفلي بيت غرفة وملحقاتهه بين ماتفرج
ـ زين وين تروحين
ـ مادري .. اصلا شايله هم بس الله يعرفة
لازم ادور جاري قبل داري
لان عندي بنات مترهم اكعد بمنطقة مو تمام
ـ اي والله هسة النفوس اتغيرت والجار الزين ميتحصل
خلي اسأل ابو حسين واوصي اهلي يشوفلج مشتمل هنا قريب علينة بلكي نلكة
ـ ياريت والله ام حسين تسوي فضل ..
ـ لا فضل شنو خوات احنة ..
زين ام نغم اكدر اسألج سؤال
ـ يا مو استوج كلتي احنة خوات ..
سألي براحتج
ـ ليش متروحين لاهلج ؟
مو مرة كلتي بيت اهلج جبير
وهم تصيرين بنصهم وائمن الج ولبناتج
ـ ياريت والله ..
شفايتلي
بس اخوتي ميردون نونة وياية
يكولون غريبة ويريدوهه ترجع لاهلهه ..
عبالك اني خدامة
وخلصت خدمتي وية هالطفلة
حتئ ينطوهه لغير ناس
يمعودة اذا اهلي اخوتي من دمي ولحمي ممعتبريني ام ..
بعد ما اعتب علئ الغريب
ـ يااا شوف ..
زين انطيهه ياخيتي شلج بدوخه الراس
ـ مترهم .. هالطفلة حسبتهه حسبة بناتي اذا اذبهه علئ عمامهه باجر اي شي يصير علية راح يشيلون بناتي ويشمروهم علئ عمامهم ..
واني ادري بعمامهم ماعدهم رحمة وركابهم بيد نسوانهم
مدكليلي شلون اخلي طفلة بيدهن
ـ زين لعد ماعندج غير حل
تاخذين بناتج وتروحين تكعدين ابيت اهل رجلج هو هم اله حصة وياهم وانتي وهالايتام اولئ منهم
ـ يمعودة ياعمامهم
همة ذاكريهن بفلس لو عانة
بس اول وفاة فؤاد كل و احد شال 50 لو 75 الف ونطاني ووراهه راحو وكالو عدولنة انوب اروح يمهم
ـ ذكروكم او لا ميهم
بس هذا حق بناتج وانتي مرة ارملة والدنية عكست وياج هالفترة
فـ غصبا عليهم يفرغولج غرفة بالبيت انتي وبناتج حتئ تكعدون بيهه
ـ بس بيتهم قديم ومو كلش جبير ما اتصور بي غرفة زايدة
ـ شعليج انتي
حشري نفسج وياهم ترة مجبورين يفرغولج مكان
والله الناس تاكل وجوهم وتخلي راسهم بالطين عايفين مرة وايتامهه هيج لا معيل ولا فلوس
والعمام ترة ينعابون اكثر من الخوال
اذا اخوتج تجيهم حجاية وحدة
فـ حموينج تجيهم الف من الناس
وبعدين هذا حق ابوهن ليش خايفة
ـ زين نفرض مقبلو شسوي
ـ عاد اذا مقبلو هدديهم تذبين البيت بالازاله وتبيعي بفلسين وطبهم مرض وخليهم يطشرون
ذاك الوكت ميكدرون يسوولج شي
لو ينباع البيت وتاخذين حصة المرحوم
لو ينطوج مكان تكعدين بي احسن من بهذلة هالايجارات والعيشة الصعبة يا اختي ..
ترة غير هالحل ماعندج
ـ اي والله صح
ان شالله باجر امر عليهم واتفاهم وياهم بلكي الله يقبلون
ـ طلعت خاله ام حسين من يمنة وهي قانعه ماما تاخذنة ونعيش ابيت جدو حمزة ..
راسا ماما خابرت علئ عمامي اتلاثتهم ناصر وتوفيق وارشد وكالت الهم تريد تحجي وياهم باجر وكلولهه ننتضرج تجين ..
خلصنة عشة وماما فرشتلنة حتئ انام بس خواتي رادن يشوفن توم جيري بالتلفزيون وكعدنة نتفرج ..
ماما يعني باجر نروح نبقئ ابيت جدو
ـ لا لا منبقئ..
بس اذب الهم حجاية وارجع . . بلكي ترهم
ـ واذا ماصارت
ـ خلي نتفائل يابنتي ..
بلكي عمامج تطلع منهم سالفة زينة لخاطر اخوهم
ومنا لباجر الف سالفة تتغير ..
ـ ان شالله ..
كعدنة الصبح ماعدنة شي
امي سوت ريوك وحضرتنة وطلعنة لبيت جدو حمزة ..
اول مادخلة لبيتهم اتلكتنة عمة ام محمد وعمة منال وعمة كميلة
وجوهن ابد متتفسر خصوصا عمة منال زوجة عمو ناصر كل شوي تخزرني ماعرف شبيهه ويايه
منال ـ خير ازدهار صاير شي
ـ لا ماصاير شي ليش
ـ يعني خابرتي الزلم وكلتي عندج مووضوع مهم وانخبصو زلمنةة عليج
يعني اكيد اكو شي
ـ اي ان شالله من يجون نسولف
ـ هااا ..
اكيد نهاوند مسوية شي يكسر الوجه
ـ يااااااستار شنو هااالحجي
ليش هيج تحجين عن بنتي
ـ اااي لعد شنو صاير وخابرتينة بنصاص الليالي
ـ عيوني اني جاية اتفاهم وية حمويني مو وياج ومنو كلج بنصاص الليالي خابرتكم ساعه 7 ونص اول الليل ترة
ـ تتفاهمين بشنو؟
ام محمد ـ شبيج ام دعاء شنو هالفضول هسة يرجعون الولد من الشغل ونفتهم شبيج اكلتيهه حاصل فاصل ..
ـ ديلا هسة اني شحجيت بلة ..
عشتو
بس غير مستغرربة من وضع ام نغم
ـ ليش عيوني ليش تستغربين
ـ يعني بصراحة وبدون زعل
ذاك اليوم توفه فؤاد
وانتي تفترين منا ومنا وحتئ بوشي مالابسة علئ وجهج
ـ اولا اني ماريحه لبيت غربة ..
المفروض هذا بيت اهل زوجي وعمام بناتي
وثانيا اني بكامل حجابي ولابسة اسود يعني ممتبرجة وطالعه
وثالثا العدة خلصت صار فترة
فماكو داعي لهل حجي
ـ والله احنة عدنة المرة متطلع الا ورة السنة مال رجلهه
ـ اني ممسؤله عن تخلف غيري
طالما مطبقة شريعه الله
وماشية عليهه بمايرضي الله ..
فما احتاج نصايح وارشادات من احد
ـ حاولت عمة ام محمد تغير الموضوع وتكعد تسولف وية امي
بس نضرات عمة منال وكميلة تخوف
صار الضهر واجو عمامي صبو الغدة وكعدنة نتغدة وجابو الجايات وبدت امي تسولف وية عمو ارشد بعتبارة اكبر عمامي ..
منال ـ شنو عيني شنو؟
ازدهار ـ مثل مسعمتي
ـ ترة البيت صغير ياابة
مدشووفين احنة 3 عوائل محشورين بيي
ـ اي بس عدكم زلمكم تكدر تحير بيكم
بس اني منو الي
ـ وانتي عينج علئ زلمنة
ـ لاا مو هيج قصدي والله
بس من جان عايش فؤاد الله يرحمة ماخلاني معتازة لاحد
وجنت كاعدة بيت لوحدي وساكتة مادكيت بابكم
بس هسة اختلف الوضع
صرت ارملة وبركبتي بنات صغار شلون اعيشهن
الايجار يوم عن يزيد
والراتب ميجي الا كم شهر
واصلا اكو حجاية يقطعون رواتب التصنيع العسكري مدكلولي مين اعيش
كميلة ـ روحي لاهلج
بيت اهلج كلنة شايفي صلوات يسد عين الشمس
ـ عندي ضروف ماكدر اروحلهم
منال ـ شنو يمة شنو..
ضــــــروف
والله اتحملي اذا ضرووووف
كلنة متحملين ضروفنة وعايشين ومجبوبين
ـ اشو الزلم ساكتة والنسوان تسولف بمكانكم ..شنو القصة ؟
اجيت احجي وياكم مو وية نسوانكم
ناصر ـ يعني ..
حجي منال صح... البيت صغير
ـ يمعود ابو محمد ..
انت جبيرهم احجيلك كلمة
ـ اي عادي تعالي كعدي ويانة
بس وين تكعدين البيت مقبط مابي غرفة زايدة
منال ـ شنوووووو شنووو
تكعد ووويانة شنوووو
وووين تكعد ..
مدتشووفون جهاالنة صاروو بطولنة ويحتاجوون الغررف مالتهم
ووين انيمهم بالمطبخ
ازدهار ـ ابني فوك غرفة وملحقاتهه
ـ يالمثقفةةة مدتشووفين البييت عكاادة وميتحمل ثكلل لو البيج مييخلييج
ـ شنو ؟
ام محمد ـ شبيج منال شنو هالحجي
منال ـ ولجن انتي وكميلةة هم صدكتن بحجيهه
ازدهار ـ احترمي نفسج مناال ترة ساكتتلج بمزاجي
ـ لاااعيــــوني صــدك ..
خووفتيني يـــااابة
كل هالشهورر كاعدة لووحدهه عـــــادي لا كالت ارملــــةة
ولا كالت بنات ايتـــــاام
ولا كالــــت مصرف مااعندي
ولا هالخراابيــط
هسة طلعت عدتهه تريد تجيي هنااااا تكعددد علئ كلوووبنة
مااافكررتن ليشش يالذكيااات
ازدهار ـ شتقصدين ؟
ـ تررررة وواااضح كلامي
ـ سكت مرتك ابو دعاء
عيب هالحجي ترة اني مرة اخوك وضيفة ابيتكم
ناصر ـ كافي عاااد سكتتي
ـ لاا والله فــــلااا اسكت لو تمووتوون
هاااي اتعوودت تمووت واحدددد
وترجع تتزوج غيرة
ام كصةةة الفكررر
كرطتلهه اثنين زلــــمم وماكفااهه
تريد تكعد هناا تتصيدلهه واحد من زلمنةةةة ام الرجووولة
ـ عزة بعينج ..
حسبي الله ونعم الوكيل عليج
انتي مرة وعندج عائلة متخافين عليهم من هالحجي متخافين من حوبتي
ارشد ـ شنو هالخرابط ام دعااء
ولگ نااااصر سكت مررتك عاااد انفضحنة
كميلة ـ والله الدنية متتأمن
لعد وين جانت قبل
ليش هسة اتذكرت من خلصت عدتهه
نهاوند ـ صار صياح وصوت عالي امي بس دموعهه تجري وتتحسب عليهم..
منال ماقبلت تسكت وضلت تصيح وتتعارك وية اماما
كام عمو ارشد عيط علئ عمو ناصر علمود زوجته وهذا كام وضرب مرتة كدامنة
وساعه السودة من ضربهه انكلبت وحش ومتسكت ابد وتهمش بيدهه
منال ـ اااااام الرجووولة
يوومية بحضن وااااحد
تموتي مناااا وتاخذيلج الثاااني منااا اتعوودتي موو يالكحبةةة
ازدهار ـ ولكم ااني ابيتكم سكتووهه عاااد
ـ لوو بيج خييير تروحييين لاهللج تنجبييين وتكعديين يم اخووتج
مو تحييين هنااا
بس متصررررفلج هالساالفة
وو اضاااهر اخووج ابو كروون يعرف بيج موو راحه وشمرررررج علينة حتــــئ بلكي تلكين رجاااال من زلمنة يسترررج ويخللص هو منـــج
توفيق ـ صووتج ام دعاااء فضحتينةة
وگ نااصر سكــــت مررتك
يمعوود كافي البيت قديييم وميسترر صووت
ازدهار ـ حسبي الله ونعم الوكيل عليكم
نسوانكم هيج تحجي كدامكم
وتتهمني بشرفي وانتو ممهتمين
خلص لعد
البيت اشمرة ازاله شيوع وكل واحد ياخذ حصته
ارشد ـ متكدرين تسويهه واحذري تلعبين هاللعبة ويانه ..
تريدين تعالي كعدددي
بس البيت مينباااااع
ـ كعدددة وياكم مترهم بعــد
هاي بحضوركم وكل الحجي كدامكم وما اهتميتو
واصلاا معرفتو تسكتولكم مرة منهن ..
تريدني اجي اكعد يمهن حتئ يذبن تهمة عليه اني وبناتي
وذاك الوكت تذبحونة بتهمة شررف حسبي الله ونعم الوكيل عليكم كلــــكم..
منال ـ طزززز ..
ياريييت ينبااع البيت وافتك من خلقكمم الجاايفة وااااخللللص
نهاوند ـ حجت هيج عمة منال وركض عمو ارشد لزكهه براشدي خلاهه توكع بالكاع
وصارت طحن بين عمو ارشد وعمو ناصر وعمو توفيق بنصهم يريد يفاككهم بس ميكدر
والنسوان كلهم انكلبن ضد امي
ام محمد ومنال وكميلة ويدعن عليهه
لميت خواتي واخذت جنطة ماما وجريت امي من ايدهه وطلعنة نركض من البيت
راس الشارع شوي بعيد عن بيت جدو لازم نتمشاله
خطية ماما شبعت بجي طول الدربونة بالكوة وكفت سيارة إجرة وصعدنة ورجعنة للبيت ..
طول الوكت امي ماحجت ولا كلمة بس تبجي وتتحسب عليهم
طلعت ذهبهه والفلوس العدهه وخلتهن بجنطة وحضرت ملابسهه
ثاني يوم الصبح اخذتنة امي وخلتنة يم بيت ابوحسين جيرانة ..
ام حسين ـ ها بشري شسويتي
ـ شحجيلج ..
حتئ ما انتضرن كم يوم يمثلن عليه ويكذبن ..
لا بالوجه انطونياهه
ـ صدك والله .. شكالن
ـ تهموني اريد اروح اكعد يمهن
حتئ ابوك واحد من زلمهن
شفتي هيج تهمة ..
شسوي اذا الله اختارلي اصير ارملة مرتين..
يتهموني كصتي فكر واكرط الزلم ..
هسة مو وكت حجي
ماكدر اتاخر اريد اروح للمحكمة
البنات امانة بركبتج ام حسين من ارجع كلشي احجيلج
ـ روحي خيتي الله يسهلج لاتخافين عليهن بناتي ذني
ـ راحت امي وضلينة يم خاله ام حسين
مرة جبيرة وبناتهه وولدهه كبار بالجامعه
سوتلنة ريوك ثاني وجبرتنة نتريك
يومية الكهرباء يكطعوهه الصبح فماكو لا تلفزيون ولا شي نتفرج عليه
واختي لحونة حركة تريد تلعب راحت خاله جابتلهه ملاعيب بنتهه ايناس من غرفتهه
هي مو صغيرة همين جبيرة بس عدهه ملاعيب ..
كعدنة نلعب
وكعدو بناتهه الخمسة من النوم
شافونة وكيفن علينه
اتريكن وخلصن شغل البيت
وكل وحدة لزمن وحدة من خواتي وكعدن يلعبن بشعر خواتي ويمكيجوهن
وهنة مكيفات وساكاتت
صار الضهر وبعدهه امي ما اجتي خابرتهه خاله ام حسين كلتلهه بالطريق فد ربع ساعه واوصل ..
اجتي امي حتئ تاخذنة كامت تضحك من شافت خواتي مسويلهن تسريحات ومكياج و ميكفات ...
عاد خالة ام حسين ماخلتهه تطلع جبرتهه تضل تتغدة وترتاح يلة تاخذنة
ـ بشري شسويتي
ـ والله افتريت فرة رجلية وكعن..
بس ان شالله احصل نتيجة
ـ ان شاله يارب لخاطر هالبنات
ـ والله بعت ذهبي كله ورحت وكلت محامي علئ ورثي وورث ابو فؤأد
كلتلة من احصل الورث بيدي انطيك باقي فلوسك صاحبة ايتام وكاعدة ايجار وماعندي بعد
ـ المحاميين مو كلهم عدهم ذمة وضمير
ـ لا ام حسين اني هم مو غشيمة
سألت بالمحكمة عن احسن محامي وهواي مدحولي بي يلة رحتلة
سويتلة وكاله واستنساخات وصعدة ونزلة ولعبان نفس
بس ان شالله تجيب نتيجة
ـ ان شالله ميكسر بيج
و اي شي تحتاجين ذمة بركبتج تجين وتحجين
ـ رحم الله والديج حبيبة متقصرين
هو اني ليش ماريد اطلع منا
علمود هالجيران بصعوبة المستأجر يلكة. جار بي خير ويأمن بي
ـ والله ياعيني انتي هم اخلاقج طيبة ماشفنة منج باطل طول هالسنين ..
لا تخافين ربج ينصرج عليهم ان شالله
ـ امين
ـ اتغدت امي لكمتين واخذتنة وطلعت
رجعنة للبيت سبحت وصلت وسوت غدة وكعدنة ناكل وياهه ..
مر يومين وكامت الاتصالات تركع من عمامي وخوالي
ناس تهدد وناس توعد
وية الضهر اجئ خالو نبيل وتهجم علئ بيتنة والجيران فزعولنة
راحت امي وسوت علئ خالي تعهد بعدم تعرض بالشرطة ..
حالتنة المادية صارت كلش تعبانة
بيت ابوحسين وبعض الجوارين
هواي وكفو ويانة
يتسوكون اكل ويجيبولنة
بس امي هواي ايام متقبل تاخذهن
بس النسوان يجبروهه وتضل تبجي تكول انذليت بعد هالعمر
ام حسين ـ شنو هالحجي معناهه انتي ممعتبرتنة اهلج وخواتج
ـ لا والله اكثر يشهد الله
خواتي من امي وابوية سؤال ميسألن عليه وهنة عدهن خير من الله بالعافية عليهن
ـ هسة اسمعيني مو وكت هالحجي جايتج بغير سالفة ان شالله خير عليج
ـ خير ان شالله
ـ ام براء الدلاله تعرفيهه
ـ اي شلون مااعرفهه
ـ الله وفقهه وفتحهه بوجهه
وفتحت محل كماليات نسائية
ـ ماشالله بالعافية عليهه هي هم تعبت
ـ اي خطية ..
وتريد مرة توكف بالمحل تبيع
تعرفين بيهه المرة عدهه شلل برجلهه متكدر توكف بالمحل ..
ووصتني اشوفلهه وحدة ثقة تلزم هالمحل ولازم تكون مرة لان ملابس نسائية داخليه وهالسوالف مينفع يلزمهه رجال ..
والله محد خطر ابالي غيرج
ـ والله ياريت ليش لا
بس البنات وين اخليهن والعطلة الربيعية قربت تخلص والمدراس بعد كم يوم وتبدي
ـ ياا صدك تحجين
بناتج بناتي عين غطة وعين فراش خليهن يمي بين مدبرين نفسج
ـ فدوة لكلبج اخت عزيزة والله ..
ـ الناس لبعضهه نتراحم بيناتنة بلكي الله يفكنة من هالشدة
الكتل والاغتيالات بالشارع صارت
ـ اي والله ..الله يستر ..
زين شكد الراتب ؟
ـ اول شي كالت تنطيج ثمنتالاف باليوم يعني تقريبا 240 الف
وكلما تجيبين زباين للمحل اكثر
يزيد راتبج اكثر
ـ ميخالف محتاجة لكل فلس وراية محاكم وعيشة وايجار وجهال يردون .. انعم الله
ـ خووش ام نغم
لعد من باجر اخذج ونروحلهه
ـ هي وين محلهه؟
ـ هنا يمنة مو بعيد اقرب بهواي من السوك ..
باجر الصبح حضري روحج ونروح الهه وتتفقون والبنات لاتشيلين همهم مثل ما انتي امهن
اني خالتهن بيبيتهن بكيفج بعد
ـ رحم الله والديج حبيبة ماقصرتي وكفتيلي وكفة اخت يشهد الله
ـ ياا النبي وصئ بسابع جار شنو هالحجي .. يلة حبيبة سلم عليكم
ـ راحت امي واتفقت وية المرة واستلمت الشغل بالمحل
رغم مشاكل خوالي وعمامي علئ الورث ماكفتهم..
انوب التفتو عليهه ماعدنة مرة تشتغل بالسوك ..
ويومية طلابة وعركة بالتلفون واشكال الحجي تسمع
و جانت تسمع هالحجي من خالاتي وخوالي سوية
حرب نفسية صارت ضد امي ازدهار
ذبلت اكثر من قبل
صارت متاكل ابد
بس تشرب جاي ووشوي خبزة وتكوم تكول معدتي تاذيني ماكدر اكل
شهر فبراير
خلص وماكدرت امي تسويلي العيد ميلاد الوعدتني بي .. اصلا جانت ناسية الميلاد بسبب المصايب التهل علينة
ما جنت مقهورة منهه ابد
بس كلش مقهورة عليهه
شعرهه صار ابيض من الشيب
ووجهه اتجعد وبين عليهه الكبر هواي
ضلينة بهالبيت لان امي كلش خايفة تشيل ..
تخاف تكعد بمنطقة متعرف بيهه احد .. فـ اتحملت الايجار الغالي في سبيل متاخذنة لمنطقة ماعدنة بيهه عرف
ايام طويلة وامي تركض بالمحاكم
ناس يكلولهه غيري المحامي هذا يضحك عليج وناس يكلولهه عادي اجرائات الورث هواي تاخذ وقت
وامي حايرة متعرف شسوي
صار ضغط مو طبيعي عليهه
خصوصا تطلع من الصبح وترجع الضهر وترد تطلع العصر للمغرب ورة المغرب بشوي يلة ترجع وتاخذنة من بيت ابو حسين
كامت امي تخجل تذبنة يمهم ولو همة ما حجو كلمة بس هي تتحسس
انطتني المفتاح من ارجع من المدرسة اني ونغم نروح لبيت خاله ام حسين ناخذ خواتي ونبقئ بالبيت ووية العصر قبل لا تظلم اخذهن واروح لبيتهم لليل تجي امي تاخذنة
بدينة نحضر لامتحانات اخير السنة وهاي ايام عطلة قبل الامتحانات مباشرتا منداوم بيهه
فـ ادرس واخلص واكعد وادرس نغم لان اشوف امي تعبانة مابيهه حيل و احاول اساعدهه بأي طريقث
ـ باجر ماروح للمحل ..
عندي مراجعه بالمحكمة
ـ شوكت تخلص هالمحاكم
ـ انشلع كلبي يايمة
حسبي الله ونعم الوكيل بيهم
عفية بشر ميفكر بأخرتة ..
راسي راح ينفجر من التعب
اريد انام هلكت رجلية صارن خيوط من الوكفة بالمحل وراسي منفوخ..
ـ نامي ماما لحونة اني انيمهه
ـ يلة بنتي طفي الضوة خلي ارتاح ..
صباا و نغم
لا تتعاركن وية خواتجن اريد انام ماما
نغم ـ اي ماما حاضر
ـ نامت امي وضلينة اني وخواتي نتفرج الئ ان نعسنة ونمنه ..
كعدت الصبح علئ حس امي تغير ملابسهه
ـ شوفي ماما خاف اتاخر بالمحكمة ولو ما اتصور اتاخر لان شغلة سهلة ان شاالله ...
الريوك جاهز واكو غدة بالثلاجة احمي من تجوعون
وطلعي لخواتج كيك وكليجة لاتخليهن يجوعن لو يفكدني خصوصا لحونة
واااااااي بشر يجي متفتحين الباب اله مفهووم ماما
ـ اي اكيد ماما
ـ راح اطلع وانطي خبر لاام حسين تخلي عينهه عليكم
ـ اي حبيبتي ماما
ـ يلة بنيتي ديري بالج علئ خواتج
ـ طلعت امي ورجعت لنومتي لان جنت كلش نعسانة
حسيت علئ صوت الباب يندك بقووة واحد برة يصيح ويهوس
باوعت بعدهه ساه 11 الصبح
خواتي التمن يمي من الخوف اريد اروح اشوف منو باب المطبخ اخاف
نغم ـ امشي هاي شبيج منو هيج يدك الباب
ـ مادري .. تعالي هنا وين رايحة
جريتهه من ايدهه ورحت لباب المطبخ باوعت من الجامة شفت عمو ناصر وعمو توفيق يدكون بالباب وشكلهم مبين عصبي كلش...
وللحكاية بقية.................. 🥀
لاتنسون تصويت ولايك حتئ استمر حبايب