الحلقة الثانية
#ليلة_من_فبراير
كل شخص في هذه الدنيا فاقد شيئاً يحبه في حياته،
حتى لو ضحك كثيراً ورأيته سعيد،
يَبقى شيئاً بداخله كل ما تذكره ضعف و تألم
❤️
نهاوند ـ يجر بأيدي واني غاصة بالبجي
فتح باب السيارة وصعدني وسدهه بقوة ضليت اعيط وابجي اريد بيبي حورية وعمة شفاء
بس محد منهم اجاني ضلو يتفرجون عليه وهمة ياخذوني
صعدنة كلنة بالسيارة وابتعدنة عن بيت جدو ..
كاعدة بمكاني وابجي ماكدرت اسكت التفتت عليه العروسة وضحكت بوجهي
ـ ليش تبجين حبيبتي
ـ جاوبتهه واني انشغ بالبجي كوة طلعت الجملة من حلكي ..
أر ار اريد بيبي حوورية
ـ دشوفي مو احنة طالعين بالسيارة ونفتر بالشارع علمودج
شوفي هاي الاضوية شكد حلوة..
وهاي المحلات شوفي هالبنات بكدج شكد حبابات وميبجن..
زين نونة شنو تحبين نشتريلج
ـ اسمي نهاوند مو نونة
ـ اي غير احب ادلعج واكلج نونة..
يلة كولي شنو تريدين اشتريلج
ـ مااااريد شي بس اريدد بيبي ..
حجيت وية العروسة بصوت عالي شوي راسا صاح بية عمو فؤاد
فؤاد ـ كاااااااافي تبجين ووولج
نفس صوت هذيج الجلبةةة
نفس النبررة
نفس اللجة مالتهه من تلجج
خررب لشتهه
صددك الخلف ماماتت
ديررري بالج اسمع نفسس منج
ديرري باالج
ازدهار ـ شنو القصة فؤاد مو هيج وياهه ترة بعدهه طفلة علئ كيفك شنو هالاسلوب
ـ سكتيييهه ازدهار ماريد اسمع صووتهه جنت خلصان منهه من جان ابو اسلام هنا..
سافر وانلاصت عليه
ـ هااا يعني بزواجك مني انلاصت عليك؟
ـ سكتيهه.. ومو وكت هالحجي
ـ من صاح بوجهي عمو فؤاد
انخرست من الخوف
كمت كوة اتنفس لان حابسة النفس ولزمتني الرجفة
وخنست بالسيارة
اخاف اتحرك
بس مفهمت عليمن ديحجي
ومنو هاي الجلبة الاشبه صوتهه..
التفتت عليه العروسة ونطتني مصاصة وكلتلي هاي الج حبيبتي
تدرين شكد ضامتلج سوالف حلوة بالبيت..
هزيت براسي واخذتهه واني ارجف
خليت المصاصة بحلكي وسكتت ..
وصلنة البيت واني خايفة منهم
ناس ماعرفهم ولاشايفتهم ومجبورة اضل يمهم ..
احس من الخوف والرجف الارجفة بس اريد انام ..
نزلنة بنفس البيت الزفينة بي عمو فؤاد
ضليت واكفة يم الباب خايفة ومرتبكة
ـ ها ياحلوة ليش خايفة
يلة تعالي ادخلي حبيبتي
ـ عفية خاله اريد بيبي الله يخليج وديني لبيبي..
اقتربت مني وحضنتني
ـ ميخالف اخذج الهه والله بس تعالي شوفي شنو جبتلج
ـ اخذتني ودخلت لغرفتهه شالتني وكعدتني علئ فراشهه وطلعتني جيس كامل حلويات ..
ـ هاي كــلهه الج..
بس ماريدج تبجين بعد
ـ اخذت جيس الحلويات واني امسح بدموعي وافتح واكل ..
بس بعدني حزينة وعيني علئ عمو فؤاد جان بالغرفة ويانة بدل هدومة وعلكهن بالتعلاكة وطلع برة
بس ابد ماشاف بوجهي ..
الفراش حلو وجبير لونه ابيض
والغرفة ريحتهه طيبة
واكو مراية بيهه هواي حمر وعطور واني احب الحمرة
بقيت ساكته و استكشف الغرفة واتلفت بعيوني والحلويات بحلكي
ـ ليش هيج خايفة من ابوج ؟
ـ اخاف منة وماحبة
ـ لالا شنو هالحجي ..
شلون تكولين عن بابا ماحبه ؟
الله ميقبل هيج تحجين
ـ هذا مو بابا هذا عمو فؤاد ..
بابا هو عماد
ـ يامسكينة يابنتي ..
تعالي حبيبتي
ـ سحبتني بصفهه ومسحت علئ شعري .. وكلتلي
ـ لا نونة .. فؤاد هو ابوج الحقيقي
ـ يعني شنو الحقيقي؟
ـ ههه يعني هو الجابج علئ هاي الدنية وطلع بنوته حلوة مثلج
وعماد هو اخو بابا يعني عمو
واني زوجة بابا اسمي ازدهار يعني ماما
ـ بس ماما انسام هي امي
ـ لا حبيبتي ماما انسام هي زوجة عمج يعني مثل عمة شفاء..
واني امج..
تعالي شوفي شنو جبتلج اشتريتهن من زمان وضميتهن الج..
ـ راحت للكنتور وطلعتلي جنطة ملابس كلش حلوااات وملاعيب هواي ..
فرحت من شفتهن مثل كل طفلة تفرح بهيج سوالف خصوصا محد جايبلي هالكد ملاعيب وهدوم
اكلج خاله وهاي الحمرة
ـ ههههه تريدين حمرة صارر اخذي اليعجبج شنو تريدين
ـ صدك
ـ اي والله روحي اخذيهن ..
وعندي صبغ اضافر تريدين؟
ـ طلعتلي حمر وصبغ ااضافر هواي ونطتنياهن احس كلبي راح يوكف من الفرحة ..
اخذتني للحمام غسلت وجهي وايدي من الدبك ولبستني هالملابس ومشطتلي كصايب بقراصات جديدة منهه ..
وخلتلي حمرة لونهه وردي
لا خاله اريد حمرة حمرة
ـ لالا مو حلوة الحمرة الوردي احلئ انتي جنتي تحبين الوردي من زمان ..
ـ ها
ـ اي اي اني اعرفج تحبين اللون الوردي
ـ ضليت ساكته
بس بداخلي عيني علئ اللون الاحمر لان هو هذا اللون الاحبة..
صبغتلي اضافري باللون الوردي
ورشتلي عطر
وشالت جنطة ملابسي الجبناهه من بيت جدو وشمرتهة فوك الكنتور ..
شكرا خاله
ـ كليلي ماما ماحب كلمة خاله ..
ـ حسيت بطمئنان شوي وياهه..
ابتسمتلهه وكلتلهه شكرا ماما
راسا حضنتني وكامت تبجي ماعرف ليش
مر الوكت واني افتر ورة خاله ازدهار اخاف اضل لوحدي وية عمو فؤاد وين متروح اني وراهه ..
حتئ لو تدخل الحمام اوكفلهه بالباب
سوتلنة عشة وخلتني يمهه تلف لفات وتوكلني
من حبي الهه لان اداريني
خليت راسي علئ كفتهه
ماعرف ليش هيج سويت بس حسيت محتاجة اخلي راسي علئ جتف احد يحبني....
فؤاد ـ فرشيلهه بالهول خلي تنام هناك
ـ لا والله صدك تحجي انت!
ـ دشاقة وياج مثلا؟
ـ بعدهه طفلة صغيرة والبيت جديد عليهه
واحنة غربة بالنسبة الهه
شلون تنيمهه لوحدهه ابيت مشايفته ابد شلون ينطيك كلبك
ـ لاتسويهه قصة عليه قابل منيمهه بالشارع
من جانت وية بيت ابو اسلام تنام بغير غرفة متعودة يعني
ـ فؤاد شبيك ..
غير جانت تنام يم ولد عمهه وبنات عمهه بكدهه خو مو لوحدهه
ـ وتالي شلون؟
ـ الطفلة تبقئ هنا افرشلهه بالكاع يمي تنام عادي كل الجهال هيج وية اهلهم
ـ ترة بعدنة عرسان اول البارحه اتزوجنة ماصار شهر حتئ تخليهه بنصنة
ـ وشنو يعني ؟
هي راح تنام بالكاع مو بنصنة ..
تنام الطفلة وناخذ راحتنة قابل طايرين
بس مال اطلعهه برة مستحيل اسويهه اني شكبرني واستغرب من بيت جديد عليه واخاف منه مو عاد طفلة بهالعمر
واذا تصمم علئ موقفك اطلع يمهه انام
ـ جنت كلش خايفة لا صدك يخلوني برة انام..
اتقربت علئ خاله ازدهار وجلبت برجلهه
خلصت حجي وية عمو فؤاد وكامت من مكانهه فرشتلي فراش وخلتلي غطة وكلتلي يلة حبيبتي نامي
رغم مجنت نعسانة بس نمت علئ الفراش شالت لعابة جبيرة شعرهه اصفر ولابسة حجاب احمر طويل
وعيونهه زرك ونطتنياهه
ـ نيمي هاي يمج حتئ متخافين
ـ خاله اريد هذاك الدب
ـ الف مرة كلت لاتكولين خاله كولي ماما ..
وبعدين هاي اللعابة احلئ بهواي من الدب ..
حبيبتي نونة تدرين من تخليهه يمج هاللعابة تحلمين احلام كلش حلوةة وابد متخافين
ـ ماعرف ليش ماحبيت انيم هاللعابة يمي حاولت اتحجج بس صاحت عليه ماما ازدهار وخفت..
ـ تدرين هاي اللعابة المعاجبتج اسمهه ليلى..
هاي الجانت وية الذيب كدرت تحمي نفسهه من الذييب وراح تحميج انتي هم
ـ مستوعبت كلامهه شنو تحمي نفسهه من الذيب ..
سكتت ماحجيت شي ..
اخذت اللعابة ونيمتهه يمي وغطتنة واجتي باستني
ـ تصبحين علئ خير بنتي
ـ وانتي هم ..
ماعرف شنو يحجون بهيج مواقف
طفو الاضوية وصارت ظلمة
وكل شوي اتخيل عمو فؤاد يخنزر عليه وعيونة تلمع بالظلمة
من الخوف غطيت راسي بالجرجف وغمضت قوي وراسا نمت
من يومهه واني اصيح لزوجة ابوية ازدهار .. ماما
صارت علاقتي بيهه كلش قوية
وبديت استوعب شوي شوي
انو فؤاد هو ابوية الحقيقي
وعماد هو عمي ..
كمت اكعد وانام واكل والعب وياهه
الشي الوحيد الجنت ماحبة بماما ازدهار
تجبرني العب بلعبات ماريدهه
والبس نفس الملابس الي هي جابتهن
يعني هدومي من بيت جدو ابد متقبل اطلعهن والبسهن ماعرف ليش ..
وهواي ايام من البس هالملابس تحضني وتضل تبجي ..
جانت ماما موضفة بمكان اسمة التصنيع العكسري ..
فـ تاخذني الصبح تخليني يم بيبي حورية وعمة شفاء وترجع الضهر تاخذني منهم ..او همة يرجعوني
حياتي استقرت وياهه وصرت كلش احبهه
حتئ اتصورتهه هي امي الحقيقة وكلتلهة ليش عفتيني يم ماما انسام
ليش ماخذتيني وياج
جانت تضحك من احجي هيج وتكلي جنت مسافرة حتئ اجيبلج هالهدوم الحلوة ...
واني صدكت بكلامهه
ورة شهر عرفت ماما ازدهار ارملة بس شنو يعني ارملة؟ ماعرف
جنت اسمع بيت جدو يكولون
ازدهار ارملة ..
وبنتهه راحت
خطية حياتهه تعيسة
صارلهه شهر متزوجة وماصار عدهه حمل
المسكينه بعد متحبل
يجوز صارت عاكر
ومن هالحجي المافهمتة ولا استوعبته
سألت عمتي شفاء شنو يعني ارملة ؟
كلتلي يعني زوجهه ميت
مافهمت شلون زوجهه ميت ..
واني اعرف الميت ياخذو يخلو جوة التراب
زين هو بابا زوجهه وبعدة ويانه مو
جوة التراب اشو..
هالكلام خلاني اخاف من فؤاد اكثر صرت انضرله نضرة الشبح ...
شلون عايش ويانه وماما ميت رجلهه
بيومهه جلبت ابيبي حورية ما اقبل اروح وية ماما ..
معرفت شنو اكلهه بس ضليت ابجي وخايفة من كل شي
زدهار ـ ليش نونة متريديني شنو صاير؟
ـ مااريد ارووح اخاف من عمو فؤاد
بيبي حورية ـ شنو صاير يمة ضاربهه مسويلهه شي فؤاد
ـ لا والله عمة ممسويلهة شي
صح هو شوي جاف وياهه بس ممسويلهه شي لاضاربهه ولا مأذيهه اصلا ميجي يمهه
يلة يانونة يلة حبابة
امشي وشوفي شنو اشتريتلج فد شي كلش حلو
ـ شنو جبتيلي
ـ ماكلج .. لان عفته بالبيت امشي نروح حتئ تشوفي لان ماجبته ويايه
ـ يلة بيبي روحي وية ماما ازدهار يلة بنتي اني مالي خلك جهال ولا الي خلك دوختهم
ـ بيومهه اخذتني ماما ازدهار بالكوة ضلت الطريق كلة تحقق ويايه شنو مسويلج بابا فؤاد
وليش هيج خايفة
وصلنة البيت غيرتلي ملابسي وخلت الغدة اتغدينة وكعدت تستجوبني واني اسولفهه
ماما انتي صدك ارملة؟
ـ ارملة.. منو كلج ؟
ـ بيبي وعماتي يسولفون بيج ويكولون زوجهه ميت
لعد بابا شلون ويانه هو ميت
ـ اهاااا وانتي من هاي خايفة؟
ـ راسا بجيت وكلتلهه.. اي
ـ تعاي بنتي كعدي بحضني ..
ـ اخذتني بحضنهه وحضنتني ومسحت وجهي ..
ـ طالما سمعتي هالحجي لازم افهمج
ولو اني ماردت احجيلج هسة الا تكبرين
يا ماماتي ..
اني جنت متزوجه من زمااان برجال غير بابا
وهذا الرجال سوة حادث بالسيارة ومات
ـ يعني راح جوة التراب مو
ـ اي حبيبتي الله يرحمة ..
بس مو ابوج هذاك غيرة
ـ هاا ..
ـ شفتي ماكو داعي تخافين من بابا بعد
ـ وكالو عندج بنية همين وينهه ..
تنهدت تنهيدة قوية قبل لاتحجي
ـ صح ..
ولو بنتي بعدهه عايشة ..
جان هسة اكبر منج بشوي ...
ـ حجت هيج ودنكت راسهه وكامت تبجي
.. مديت ايدي وامسح بدموعهه مثل متسويلي دائما وابتسمتلهه
هي شنو جان اسمهه
ـ ... نور
ـ تحجي وتبجي مبين كلش مقهورة ..
زين هي وينهه
ـ راحت ياماما ..
راحت فوك بالسما يم امي وابوهه لحكتهم ماكدرت تفاركهم ..
ـ ليش راحت
ـ الله يحبهه واخذهه
توفت وعمرهه 5 سنين
يعني هسة لو عايشة عمرهه 8 سنين
اتمرضت وماكو ادوية بالمستشفيات لان مسوين حصار علينة الدول الجبيرة الله لا يوفقهم ..
وميقبلون ينطونة ادوية لاطفالنه وتوفت متحملت المرض ..
اكيد هي هسة بالجنة تلعب ومتونسة
ـ نيالهه
ـ اسم الله عليج لاتكولين نيالهه ماعندي كلب يتحمل الفراك بعد
ـ حضنتني وغصت بالبجي ..
ـ بس تدرين شي نونة ..
هاي الملابس التلبسيهه مالتهه
والملاعيب التلعبين بيهه هم مالتهه
ـ بقيت ساكته ماعرفت شجاوبهه
ـ من تلبسين هدومهه احس بيهه بعدهه عايشة وويايه
وحتئ انتي تحبين اللون الوردي مثلهه عندج هواي تصرفات بالضبط هي حتئ اسمج راح يصير نور مثلهه ..
ـ بس اني اسمي نهاوند
ـ اي صح بس نكدر نغيرة اصلا نور احلا من نهاوند نور يعني ضوة الينور حياتنة..
اني اصلا قبلت بأبوج علمودج لان انتي تقريبا بعمر بنتي
ـ حضنتني مرة ثانية وضلت تبجي
حسيت بحنية وياهه محسيتهه وية ماما انسام ..
ولو بعدني احن لبابا عماد وماما انسام واخوتي كلهم كلش اشتاقتلهم..
خلصنة العشة وكعدت ماما تسولف وية فؤاد
ازدهار ـ عاجبني اخلي نونة علئ اسمي .. شدكول فؤاد
ـ هاي شلج بيهه
ـ ليش عادي شكو بيهه
ـ حرام التبني بالاسلام
ـ هي معروفة امهه منو وخوالهه منو يعني مجرد اجراء شكلي شنو اليمنع...
ـ كعدي وسكتي ماكو داعي لهلامور
ـ اخو فؤاد انت معليك بهالامور خليهن علية التهي بالحانك وشغلك ..
ـ ضليت كاعدة اللعب بالملاعيب شوي وصاح عليه فؤاد
ـ يــــلة نامي شعندج كاعدة لهلوكت؟
ـ ركضت لفراشي وغطيت راشي وشسويت نفسي نايمة
صار الصبح وجان يوم جمعه ماكو دوام لماما ..
بس فؤاد طالع ماعرف وين رايح
اجانة خالو نبيل اخو ماما ازدهار
دخل للبيت وضل يصيح علئ امي
ـ انتي كل عقلج تريدين تسجلين هالطفلة علئ اسمج
ـ وليش اتصيح ؟وبعدين وشكو بيهه واذا صارت بأسمي
ـ شنو شكو بيهه بابا
اذا تصير بأسمج يعني تاكل بالورث ويااج
تعتبر بنتج قانونيا وتاخذ حصة من املاكنه
ـ انت بس بهاي تفكر ؟
كل تفكيرك بالفلوس
وبعدين هي حصتي وفلوسي
ليش انت ضايج ومغثوث
ـ بابا اتقبلي الووااقع بنتج مااتت
وهاي بنت زوجج يعني غريبة مو بنتج كافي خبالات ازدهار
ـ كاافي نبييل شنوو هالحجيي
ـ هذاااا اخر كلاام عندي
اذا تخليهه علئ اسمج اني بنفسي اروح واعترف عليج بالمحاكم واكول تزووير وواوكل بمكان المحامي الف محامي واخليهم يحرمج من الورث فهمتــــي
تالي متالي عمرنةة يجي الغريب ويورثنة خلي اابالج
اولاااادنة من دمنة ولحمنةةة اولى من الغريب فلوسنة متروح لغيررنة
ـ طلع خالو نبيل كلش عصبي من يمنة وركع الباب وراه
ضلت امي كاعدة مقهورة وتتأفف وعصبية ..
صار الليل و اجة بابا فؤاد وهم ضل يصيح ويعيط
فؤاد ـ تدرين اجوني اخوتج هدداة عليه عبالهم اني دة اجبرج تخلين نهاوند باسمج
ـ اجوي عليك هم؟
ـ عمي كعدي عوفيهه باسم امهه شلج بهالمصايب
ـ قابل شنو ردت اسوي حتئ كلكم هيج اعصابكم وتصيحون هي حاله انسانية ومن حبي الهه اريد اخليهه باسمي
ـ حبيهه محد مانعج بس سالفة اسمج ومدري شنو انسيهه
ـ المفروض انت اكثر واحد يسندني لانهه بنتك هاي طفلة مسكينة ترة
ـ ولان بنتي ماكدر اسندج بهيج قضية
عوفيهه باسم امهه وتولي
ممحتاجة شي من احد ..
هالكلام من سمعته اني وصغيرة ما اله اي تأثير عليه..
بس من كبرت حفر بكلبي حفر وكلشي تغير..
الاحداث تمشي بسرعه
انخطبت عمتي شفاء اصغر عماتي واخرهن
وبسنة 1998 امي صارت حامل
جانو كلش فرحانين بهالخبر
اول مرة اشوف وجه بابا فؤاد فرحان ويضحك ..
حسيت راح يحب هالنونو اليجي هواي واتمنيت يجبني اني هم
رغم جنت اخاف منه
بس حاولت هواي اچذب اهتمامة
جنت دائما احاول اكون شاطرة بدروسي والمعلمات يمدحن بيه حتئ ينتبهلي
بس ابد ما اهتملي
يحب الاغاني والالحان كلش هواي ويخلي الصوت عالي بالبيت
ويضل يغني ويصيح وية الاغنية
احسة يحاول يتجاهلني وميباوعلي
كل مرة ماما تدفعني عليه اخذلة شهادتي بيدي طالعه الاولئ بس ميهتم يهز براسة ويكول عفية ويطلع قلمة ويوقعه وينطينياهه
اتمنيت يلزمني ويحضني مثل عمامي من يحضنون اولادهم
بس ابد ماحققلي هالامنية ولا سمحلي اتقربلة واحضنه
ومحاولات ماما ازدهار اليأئسة وياه علمود تخلي يحبني ..
كلهه فشلت .
وبيوم من الايام كلتلي ماما ازدهار اليوم عيد ميلادج وراح اسويلج كيكية تخبل
طرت من الفرحة اول مرة احد يسويلي عيد ميلاد
جنت بس اتفرج علئ بنات عمي البعمري وهنة يحتفلن بميلادهن لكن اني ابد محتفلت بميلادي
عزمت عمامي وعماتي وسوتلي كيكة وجابت حلويات وشموع ونفاخات تطاير بسبب البنكة والمبردة مفتوحه واحنة نركض وراهن
جنت فرحانة بروحي وملتهية بالحفلة واخيرا صار راسي براس بنات عمي وسولي عيد ميلاد وكيكة
جنت اشوف عماتي ونسوان عمومتي يضحكن من جوة لجوة وبس عمة شفاء مقهورة عليه وماعرف شنو السبب...
مرة الايام وجابت ماما بنية رادت تسميهه نور بس بيبي حورية كلتلهه فال مو زين ترة هم تموت لازم غير اسم
عاد بابا سماهه انغام
وبعدين راسا صارت حامل بصبا
وبعدين جابت اختي الحان
كلهن سنة علئ سنة صارن
اختار بابا اسماء خواتي لان مثل ماكلت يحب اللحن
والصبا هو مقام
مثل نهاوند هم مقام باللغناء..
بهالفترة الحياة اخذت ماما ازدهار عني وصار اهتمامهه ينصب علئ خواتي اكثر بحكم بعدهن صغار ..
لكن رغم كل اهمال امي اليه بس مانست يوم ميلادي وجانت دائما تحتفل بي
جنت مستغربة من ماما ابد مشفتهه تلبس خواتي من ملابس نور
رغم عدهه جنطة جبيرة بيهه ملابسهه وهي صغيرة ..
حسيت رجعت لنفس وضعي
مهمشة محد بحالي
امي ماعدهه وقت الي
يادوب ترجع من الدوام وتلتهي بالبيت وية اخواتي وبعدين تخلي راسهه وتنام
جنت اموت قهر من اشوف بابا يلعب وية خواتي ويتركني بحجة انتي صرتي جبيرة ..
اضل واكفة بعيد عنهم واضحك علئ ضحكهم
من يلزم خواتي ويكعدهن بحضنه
لا اراديا اتسحب واروح اكعد يمة
واضل اضحك وياهم
واحاول اعلي صوتي حتئ ينتبه عليه
بس اغلب الاحيان
لو يصيح عليه ويرزلني ويكلي نصي صوتج
لو يلبسني ويكوم
ومن يومهه بدت تصير هواي مشاكل ..
اي شي يصير علئ خواتي
او يتأذن بي ..
اني ابتلي ..
كل ذنبي اني الاخت الكبرى !
وهالصفة لازم تخليني اصير امراة قبل وقتي ..
او سوبر ومن
خصوصا بابا هواي يرزلني
واحيانا يضربني اذا وحدة من خواتي اتاذت
بس امي لا متاذيني ..
يعني رزايل عابرة
رغم حب ماما ازدهار الي بس ماجنت احس بروحي فرحانة مثل صديقاتي
عندي اب وام بس لاذكروني بعيد ميلاد
ولا ذكروني بهدية نجاح ولا ياخذوني للسوك ويفترون دائما يخلوني ابيت جدو ويروحون
كبرت اكثر وصار عمري عشر سنين وعرفت امي الحقيقة اسمهه رحمة ..
جانت اكبر صدمة بالنسبة الي
اعرف عندي ام ثالثة...
غير انسام وازدهار
ضليت ابحث واسال
اذا اكو بعد ام رابعه كلولي بيهه هسة ماريد انصدم بعدين ..
كلولي هي رحمة امج الحقيقة ..
هواي سألت عنهه وعن بيت اهلهه
بس محد جاوبني
كل الامتلكة منهه صورة هوية صغيرة مابيهه ملامح اخذتهه من بيبتي
كل نسوان عمومتي وعماتي يكولن امج ام الرجولة
عافت ابوج
وراحت اتزوجت غيرة
وخلفت غيرج ووشمرتج علينه ونستج ..
ماكدرت استوعب هالكلام ..
صرت اسأل عن امي
اي شخص كدامي اسأله ..
عدا ابوية فؤاد
وبيوم اجتمعنة ابيت جدو حمزة
واجاني الجواب من عمو ارشد ابو محمد ..
ـ ليش تسألين بنتي شذكرج بيهم
ـ ماجنت اعرفهم ياعمو
وهسة عرفت عندي ام اسمهه رحمة عبدالله
اريد اعرف وينهم
ـ استغفر الله..
بنتي امج هي ازدهار ونغم وصبا والحان خواتج وابوج فؤاد شتريدين اكثر بعد
ـ اريد اعرف ليش عافتني وليش ماطلبت تشوفني هالسنين كلهه
عمو اتمنئ اعرف شكلهه
اريد احجي وياهه
ام محمد ـ والله حقهه هالطفلة
الله يكون بعونج عمة
ارشد ـ بيت جدج شالو من زمان ومحد يعرف وين راحو
ـ زين جدو حمزة مو صديق جدو عبدالله يعني ميعرف وين راحو
ـ لا..
لان بعد الصار انقطعت علاقتهم تماما
لان عبدالله ابو رحمة
اتصور ابوية كذب عليه وغشة وتخاربو
ـ يحجي عمو واني صافنة ..
زين هسة حتئ لو اسأل جدو وين يتذكر ..
هو اصلا كلما يشوفني يكلي انتي بنت منو ومنو ابوج لان هواي ينسئ
وين يتذكر امي واهلهة
كاعدين كلنة وكامت تحجي عمتي سهير واتكابلت هية
ومنال زوجة عمو ناصر
وكميلة زوجة عمو توفيق علية ..
سهير ـ امج وحدة ساقطة تبيع الدين والشرف براس اخوية الفقير
لو بيهه خير متشمرج وانتي لحمة حمرة
منال ـ يمةة اعووف جهالي لو امووت شكد شفت من اخوج ناصر مصايب الدنية سواهن بية
واابد مااعفت جهالي
عيني هاي مو ام التعوف جهالهه وحدة ادبسزز
سهير ـ عاد انتي لاتسوين روحج الشهيد البطل شبي ناصر يمة ياريت كل الزلم مثلة فقير وحقاني وخايف الله بس خففي لسانج وياه
منال ـ اووي وشكلنة عيني علئ كيفج
سهير ـ اش اش حبابة كرمينة بسكوتج
كميلة ـ استغفر الله استغفر الله
جانت مدري شلونهه
ملكوفه عبالك وخفيفة
مو رزنة ابد
ولاعبالك ابوهه شيخ جامع ..
جنهه وحدة ممصدكة اتزوجت ويومية مسوية هوسة للرجال ..
استغفر االله لاخلقة ولا اخلاق علئ شنو اخذوهه لفؤاد مادري
هالشاب الحلو الوسيم ياخذولة هيج زباله
ـ كلهم كاعدين يهينون بأمي ويحجون عليهه ..
كرهتهه كره بداخلي مينوصف
اباوع لامي ازدهار شلون بعدهه تبجي علئ نور
رغم صار عدهه 3 بنات بس بعدهه تذكرهه
زين امي ليش مو مثلهن ليش عافتني وراحت..
دقايق ودخلت بيبي حورية للهول ..
جانت تصلي واجتي
سمعتهن هيج يحجن و كامت تصيح عليهن
بيبي حورية ـ شبيجن ولجن
متستحن تاكلن بلحم مرة غايبة
اول حدة اخر وحدة تطلك
سهير ـ ها يمة صدك تحجين يعني عادي اجيج مطلكة؟
ـ ادبسز عدلي حجيج ويايه ..
وبعدين ليش دتحجون كدام هالطفلة
مو خطية ..
ماعدجن رحمة عليهه
ولجن خافن الله بيهه
ولاتحجن هيجي كدامهه
كلجن عدجن بنات والدنية تغدر ومتتأمن..
وانتي يابنتي شلون تقبلين بهالحجي
ازدهار ـ يا عمة الطفلة كبرت
ومدعرف اجاوب عن اسألتهه
ترة هي هم حقهه تريد تشوف امهه وتعرفهه
سهير ـ وحدة عوبة واكيد هاي مثلهه راح تطلع لان تشبه امهه نفس الجهرة الزفرة
بيبي حورية ـ انجبيي ادبسززز بنت اخوج هاي مو بنت الغريبة لحمنة ودمنه شلون هيج تحجين كدامي عليهه
ـ من حجت عمتي سهير وبيبي رزلتهه راسا كمزت من يمي ..
زين عفية ماعدكم صور لماما غير هالصورة اريد اشوفهه
سهير ـ اي جانت عدنة كومة صور
صور مهرهه وعرسهه وسيارة الزفة عمت عينهه خسارة بيهه الصرف والله
ـ عفيه عمة الله يخليج ووينهن
ـ كمع تريديني ابقيهن عندي
عووذة كلهن حركتهن من شمرتج علينه
منال ـ اي والله ماظلت صورة يمنة ابد كلهن اخذتهن وحركتهن اني هم اتشائمت منهه شعندي اضم صور وحدة مطلكة وانفكر مثلهه
ـ كومي بيبي كومي وياية
خلينة نطلع برة نكعد
لاتظلين كاعدة يمهن وتسمعيلهن
امج هي ازدهار حبابة وخوش بنية
سهير ـ ههههههه اي وتسوي عيد ميلادج بالصيف لان الشتة مو حلو
ازدهار ـ شتقصدين
ـ مثل ما فهمتي هو هذا القصدتة
بيبي حورية ـ كااااافي استحححن عااد
ـ مفهمت شنو معنئ هالحجي بس راسا بيبي كامت تصيح عليهن
كوومن انتن حضـــــرن الغدة يلــة كاافي لغووةة صار الضهر والغدة ممددددود شتنتضرن اني اروح اصبة ..
ـ اخذتني بيبي وطلعنة برة
بس ضلت كلمات عماتي محفورة بداخلي وخصوصا عمة سهير مفهمت شنو يعني تحتفل بالصيف والشتة مو حلو؟
تمشي الايام
تروح وجوه
وتجي وجوه
اتوفئ جدو بسنة 2002 وبيبي ماوطولت وراه اقل من شهرين وتوفت هي هم ..
بيومهه بقينة بايتين ابيت جدو علمود الفاتحه
صاحتلي عمة شفاء كلتلي جيبيلي كلاص مي لان جانت حامل ومتخربطة
اخذتة المي ورحت الهه وضليت كاعدة يمهه ..
ضلت تسولف ويايه وتسالني عن دراستي وشلون ماما ازهار ويايه وبابا فؤاد ..
سالفة جرت سالفة وسألتهه شوكت عيد ميلادج عمة
ـ ههه اني كبرت ويني وين العيد ميلاد
ـ ليش عمو ميجيبلج كيكة
ـ لا حباب عمج خوش ولد جابلي بعيد ميلادي الفات
ـ شوكت يايوم
ـ اني وياج جينة بالشتة
انتي بشهر الثاني
واني بشهر الواحد
ـ صدك اني جاية بالشتة؟
ـ ااي اجيتي بيوم ميتكرر الا كل اربع سنين 29/2 بعز البررد طلعتي
ـ ضلت ابالي كلمة اجيتي بالشتة..
والشتة منعلك بي بنكة ولا مبردة..
زين عمة لعد ليش كل ايام عيد ملادي بالصيف ؟
ـ ها .. ياه ..
اي تدرين نسيت عيد ميلادج بالصيف عادي حبيبتي المهم سوولج كيكة ومحتفلين بيج ..
يلة حبيبتي روحي برة خلي انام كلش تعبت
طلعت وعفتهه لعمة شفاء بس الكلمة ضلت ابالي
خلصت الفاتحه ورجعنة للبيت
وكعدت وية ماما وسألتهه ليش عيد ميلادي تسوي بالصيف واني جاية بالشتة
ـ منو كلج جاية بالشتة
ـ عمة شفاء كلتلي
ـ لااا انتي عيد ميلادج بالصييف بشهر السابع فهمتي
و لاتضلين تسألين بهيج امور ياماما وبعدين عمة شفاء خلي اشوفهه واني اعلمهه
ـ ليش ماما هي تحبج والله
ـ روحي ماما روحي لغرفتج وية خواتج وكافي لغوة
استغربت من ردة فعل امي ليش تعصبت وانقهرت ولو بعدين رجعت عادية بس مفهمت حالتهه ليش هيج سوت
راحت السالفة وانست
و صارت حرب الحواسم بسنة 2003 وكعد بابا بالبيت يمنة..
طول اليوم لازم العود مالته ويدندن
لو يغني لخواتي اغنية حلوة
اسمهه يبنتي لاتعتبين
دهري رماني يانــغم بوية
نيالهه نغم
بابا يغنيلهه ويحبهه ويضحك بوجهه هي وخواتي مو مثلي
بس والله جنت افرح من اشوفه يحب خواتي ..
صح انقهر واغار بس ما ابينهه
بدت الحياة ترجع شوي شوي للناس
وبابا رد رجع لشغلة..
ورجعنة احنة الطلاب للمدارس
جانت عندي معلمتي اسمهه انفال هواي تحبني
هي معلمة فنية وتحب دائما تسولف ويانة وتسألنة ونجاوبهه
وبيوم من الايام سالتنة عن عيد ميلادنة شوكت ومن اجت يمي ..جاوبتهه
ماعرف
ـ هاا كل هالشطارة ومتعرفين شوكت يوم ميلادج
ـ ناس يكولون بالشتة وناس يكولون بالصيف
ـ شنو.. يعني شلون؟
ـ ضليت ساكته ماعرفت شجاوبهه
ـ زين شوكت يسوون عيد ميلادج
ـ بالصيف ماما تسوي
ـ اي خلص لعد عيد ميلادج بالصيف
ـ بس عماتي يكولن اجيتي بالشتة وكل واحد يحجي شكل
ـ لا انتي دوختيني ..
راح تخلين ياخذني الفضول واطلع اضبارتج واشوف ميلادج
انتضري هالاسبوع اجيبلج الخبر اليقين..
ـ مر كم يوم وجتي ست انفال عليه..
ـ نهااوند تعاي تعاي
ـ اي ست ..
رحتلهه اركض
نعم ست
ـ انتي امج شنو اسمهه؟
ـ عندي اثنين
امي الحقيقة رحمة..
وامي الربيتني ازدهار
ـ ياحبيبتي عندج مرة اب
ـ اي
ـ هي حبابة وياج ازدهار خو ماتضربج
ـ لا تحبني متضربني ابد
ـ اي الحمد لله ..
ـ ست ماشفتي شوكت عيد ميلاددي
ـ اي حبيبتي سمحتلي المديرة وشفت الاضبارة..
انتي ميلادج يوم 29/2 بالشتة يعني هالشهر عيد ميلادج لان هالسنة كبيسة وشهر الثاني 29 يوم
ـ هالكلام خلاني اتاكد ماما ازدهار ماجانت تحتفل بعيد ميلادي ابد
بس جانت تحتفل بعيد ميلاد بنتهه نور
يجي يوم واتاكد من هالمعلومة
متت قهر
ليش بشنو اختلف عن البنات حتئ ما احتفل بعيد ميلادي مثلهن
ليش يخلوني احتفل بعيد ميلاد غيري
كلت لازم هالسنة احتفل بعيد ميلادي وبنفس يوم ولادتي
اكيد اذا فاتحت ماما بالموضوع ماراح تزعل مني
بس كأنو القدر ميحب يشوفني فرحانه
...............................
بقينة طول الليل كاعدين ننتضر بابا يرجع من برة
امي بعدهه تبجي وتصلي حتئ يكون بابا بخير ويرجع سالم
ماما ماكافي بجي عيونج ورمت
ـ مو عوايد ابوج يتأخر بهالاوضاع
ـ يجوز راح لبيت جدو
ـ كلبي ممرتاح ميسويهه فؤاد يعوفنة ويروح يبات يم اخوته بهيج اوضاع ..
ـ مسحت دموعهه ورجعت تصلي
حسيت بتعب ونعست خليت راسي يم خواتي ونمت
كعدنة الصبح وراحت امي تركض لبيت جوارينة ابو حسين طلبت تخابر عمامي وخوالي من تلفونهم ..
كلولهه ماجاهم فؤاد ولا شافو ..
رجعت ادك وتلطم ووجهه مخطوف
لبست ملابسهه وكلتلي
لمي ملابسكم راح يجون اخوتي علينه
لبست خواتي ملابسهن
ولميت كم هدمة وبدلت وطلعت وية امي اعزل البيت علئ السريع وياهه
مانضفنه بس حاولنة نرجع كلشي بمكانة ..
سوتلنة امي ريوك وكعدنة نتريك بس هي مقبلت تاكل تكول صايمة
تقريبا 3 ساعات واجة خالو نعيم اخو ماما ازدهار علينة
نعيم ـ خوو ماا اذووكم الامريكاااان من دخلو عليكم احجي خو مااااذووكم
ـ ماسوو شي لاتخاف بس كلبو البيت
ـ اتعرضولكم ؟ ممعقولة شافو بس بنات وصارو شرفاء
ـ وياهم مترجم عراقي كلي اكعدي انتي وجهالج وابد لاتطلعين صوت
اني هم نفذت كلامة..
هسة فدوة مو وكت هالحجي بشرني رحتو لمكان شغلة؟
ـ راح نبيل يسأل عليه
بس الطرق كلهه مسدودة
صارلي اكثر من ساعتين ونص بالطريق واحنة منا لهنا عبرة جسر ..
يلة امشو لا نتاخر اخذتي هوياتكم فلوسكم ذهبكم لا تعوفين شي
ـ كلشي اخذت وياية
ـ طلعنة كلنة و صعدنة السيارة وخالو نعيم قفل الباب واجة
طول الطريق يهداء بأمي يكلهه لاتخافين منع تجوال وازدحامات ومارجع ان شالله مابي شي
ـ وصلنة لبيت اهلهه و نزلنة كلنة
وراحن خواتي يلعبن وية اولاد خوالي
الا اني ضليت لازكة بامي
احس البيت غريب عليه ومستحية منهم رغم من سنين اجيهم بس احسهم غربة. عني ..
رجع خالو نبيل وكال ماموجود فؤاد بشغلة وسأالت الناس اليمة كالو قفل محلة البارحة ساعه 3 تقريبا
امي انهارت من سمعت هالحجي
نوبة تبجي ونوبة تصلي وتدعي
مر يوم
يومين
خمس ايام وماكو خبر عن بابا
عمامي ما اجو ولا وصلو
بس تلفونات بيناتنة
وكلهم يخافون يروحون يسألون الامريكان عن بابا
يخافون خاف ابوية مسوي شي وياخذوهم انوب كلهم
او الي يسمون نفسهم مقاومة بذاك الوقت يشوفوهم داخلين للامريكان ويعتبروهم منهم ..وهمين ياخذوهم
بس راحو يفترون من مستشفئ لمستشفئ يدورون بالجرحئ والجثث بلكي يلكوه
ومالكو شي ..
اخر شي امي ماقبلت نبقئ ابيت اهلهه اكثر ..
تكول عظم بني ادم ثكيل
واليطلع من دارة يقل مقدارة ..
وصممت تاخذنة وترجع للبيت
رجعنة للبيت ومارسنة حياتنة ولو بصعوبة لان ماما تضطر تعوفنة وتطلع تتسوك ونضل لوحدنة بالبيت رغم تقفل علينة من برة بس يضل بالهه يمنه
صار يوم ميلادي وخلص والبيت كئيب
بابا ماعرف اخبارة
ماما مريضة ونايمة كوة تطبخ وترجع لمكانهه
عمامي اجوي علينة مرتين وراحو بعد مشافناهم
خوالي نفس الشي كلمن ملتهي بحياتة
مر اكثر من شهرين وابوية ماكو خبر عنة
امي ماسكتت
عدهه اصدقاء هواي بالتصنيع العكسري وعدهه معارف راحت توسطهم يسألون عن ابوية
العيشة دبرت لان امي عدهه راتب معيشتنة بي
واخوتهه يدزولهه ايجارات من حصتهه بالورث
ومنهه تدفع ايجار بيتنة وخط المولد واشترولهه اخوتهه تلفون طابوكة حتئ اي شي يصير نكدر نتصل عليهم ..
الاوضاع كلش خطرة جانت بال2004
يوم انداوم واسبوع نكعد امي تخاف عليه
وبشهر الرابع اتصل شخص من معارف امي وكلهه لكينة سيارة زوجج بالانقاض مشمورة ومحروكة
انخبص البيت كلة من هالخبر
اتصلت علئ عمامي وهي تبجي
كلنة اتصورنة بابا فؤاد مات
راحو شافو السيارة قاصفيهه الامريكان هي وكم سيارة وياهن ومحتركات فحم صايرات
بس ماكو جثة ردو راحو للطب العدلي وسألو و افترو بالمستشفيات ونفس الجواب ماكو
استسلمنة للقدر واعتبرنة ابوية مفقود مثل هالمفقودين
من يومهه وامي كلش تغيرت
صارت عصبية
وهواي تبجي
ومتتحمل هوسة خواتي
احاول اخفف عنهه بس ماعرف شنو احجي وياهه..
كل الاعرف اكولة
ان شالله يرجع بابا لاتضلين تبجين
وهي تكول ان شالله
راح الشتة واجة الصيف
الربيع ميمر علينه بهيج ضروف
الجو صار حار وية امتحانات نهاية السنة
امي هملتني بالدراسة
مالهه خلك ادرسني بعد
واني مو كلش افهم بعض المواد
بس شي علئ شي شديت حيلي ونجحت
رغم جانن خواتي بركبتي
اني اغسللهن واوكلهن انضفهن
او انضف وراهن
وبيوم 4 بشهر السادس حزيران سنة 2004
جان يوم حار كلشش
كهرباء ماكو
والسحب طافي
الشمس عاليه والبيت يفور
امي خلصت صلاتهه واتمددت
واني رحت صبيت الغدة وخليته
وكالعادة امي متقبل تاكل
هي بس وجبة وحدة وتقفل بعد
غديت خواتي وسبحتهن ونامن علئ الكاشي من الحر
وغسلت المواعين ولميت المطبخ ودخلت للحمام سبحت
كملت كلشي ورحت يمهم بالهول
اباع عليهم كلهم نايمين ويتصبصبون عرگ
لزمت كارتونة جبيرة وكمت اهفيلهم
خطية لحونة صغيرة ومتكدر تتحمل
وامي رغم الحر نامت بحجابهه فتحتة الهه وضليت اهفيلهم الئ ان تعبت
كلت استراح شوي وارجعلهم
عفتهم وطلعت برة بالحديقة شفتهه يابسه
امي هملتهه من يوم الانفقد ابوية
واني مخبوصة جنت بين دراستي والبيت وخواتي
جريت الصوندة فتحتهه ماكو مي
المي مكطوع
مرات المي الأبي يجي بدون كهرباء ولاماطور بس هسة ماكو
الوردات ذبلن والحشيش صار اصفر والاوراق يبسن ..
متت قهر عليهن
الحديقة اندمرت
دخلت جوة جبت سطل مي من الحمام وكمت ارويهن شوي شوي
وكفت بسد النارنجة لان الشمس قوية
مامنتبهه علئ الشارع وكاعدة اروي الوردات
ثواني والباب انخضت خضة قوية وانرجت وكأنو شي اندعم بيهه
واني كلش جبانة وخوافة
عفت كلشي من ايدي وركضت جوة البيت سويت الطريق خطوتين .. ماماا
ـ ولج شنو هالصوت
ـ ماعرف ماما فزييت من الصوت احس كلبي راح يوكف
ـ ماكو داعي لهل خوف انتي بالعراق يابنتي جمدي كلبج ..
ـ عدلت حجابهه وطلعت للباب تشوف شنو صاير وطلعت اني وراهه اتسحب وكلبي يرجف من الخوف
شافت من فوك الباب ماكووشي وكت ضهرية والشمس تصكع ومحد بالشارع هيج وكت
صاحت منو منو.. محد يجاوب
فتحت الباب علئ كيفهه
مديت راسي اريد اشوف منو
لكيت رجال واكع اباب البيت ومتمدد وبس ايدة طالعه
اتقدممت امي خطوتين وصرخت
فـــــــؤاد...
وللحكاية بقية... 🥀
لاتنسون تصويت وتعليق حتئ استمر وياكم😍