الحلقة الاولئ
#ليلة_من_فبراير
بقلم الكاتبة ☆☆ ☆ياسمين السعدي ☆☆ ☆
🌹
امسى حيزا كبير بيننا
سوداء قلوب احبتنا
كان حب امي سقيما
وقلب والدي عقيما
خرجت من رحم ينبذني
من فؤاد يكرهني
من حضنٍ يرمقني
بسهام الغيض والازدراء..
لا سلطة لنا على قلوبنا
فـهي تنبض لمن أرادت
وكيف ما أرادت
بعضهم ينبض القلب له
وبعضهم يتألم القلب منه
وبعضهم لا حياة لنا بدونهم
ولا نستطيع تحمل فراقهم
فـ إذا أغلق الشتاء أبوابي
وحاصرتني تلال الجليد
من كل حدب وصوب
فـ ليس امامي سوئ انتظار الربيع
حينها افتح نوافذي
لنسمات الهواء النقي
وانظر بعيــــداً
لأرى في الافق أسراب الطيور
قد عادت تغنّي متراقصة
مع شمس تلقي خيوطها الذهبيّة
فوق أغصان اشجاري
لتصنع لـــي
عمراً جديداً ..وحلماً جديداً.. وقلباً جديداً
❤️
بغداد الاعظمية
الجمعه 20/ فبراير (شباط) / 2004
وية العصر كملت تنضيف البيت
خلصتة من وكت لان اليوم نريد نروح لبيت عمي ارشد عدهم حفلة عيد ميلاد ابنة حمودي
اليوم صار عمرة سنة ..
كلهم فرحانين بي لان صار علئ خمس بنات يلة شافو الولد ..
اخذت ملابسي واريد ادخل للحمام لاكتني اختي الصغيرة الحان ..
يلة لحونة امشي اسبحج
الحان ـ لاا مااا ماريد البارحة سبحت عوفيني
ـ ولج تقبلين تروحين وسخة لعيد الميلاد؟ كل بنات عمي راح تشوفيهن نضيفات وينكرطن كرط
ـ ماماماماما معليية مااســــبح
ـ يلة يلة بكيفج لا تصيحين
روحي دخلي للغرفة الجو بارد ولاتلعبين بالصوبة خاف تتأذين ..
عفتهه ورحت اخذت جدر الحمام حتئ اسبح
ماكو كهرباء والسخان ميشتغل لازم نحمي مي ونسبح..
دخلت للحمام سبحت
رغم الجو كلش بارد اليوم
بس اتعودت لازم اسبح يوميا
خلصت و لبست دشداشتي الحمرة وجواريب الحمر لان باردة ومشطت شعري وخليت بوند عليه وعفته مفتوح حتئ ينشف
وطلعت كذلة خفيفة
اخذت عطر ورشيت شوي..
باوعت بالمراية
ماعرف شلون اشيل هالحزن من وجهي
احس نفسي كلش جبيرة
مبين وجهي هواي اكبر من عمري
بس رغم كل شي ابتسمت ..
واخيرا راح احتفل بعيد ميلادي هالشهر مثل البنات
لان هالسنة كبيسة
يعني بيهه يوم 29
مو مثل كل سنة
28 يوم ويخلص الشهر
ويضيع عليه يوم ميلادي ومحد يسوي ..
سمعت صوت برة البيت
مثل القوطية التدحرج بالشارع
اقتربت من الشباك وفتحت البردة
شفت الجو مغيم وترعد وهوئ عالي الاشجار تتمايل مثل البنية الترگص علئ معزوفة تحبهه ..
الله ..
احب هيج جو
خليت شالي الصوف علئ راسي
ولبست الروب
وطلعت بالحديقة ..
لو ما هالحديقة ماعرف شجان سويت بروحي ..
صح كلش صغيرة بس احبهه ..
ثواني ولسعتني البرودة لان شعري رطب
بس اتحملت وما اهتميت
تلفلفت بالشال وضميت نفسي
السما منضرهه يشرح الگلب
قطع من الغيوم الكثيفة علئ شكل طبقات ..
وكل طبقة لون و شكل ..
والسما ابد ممبينه
اضاهر الشمس هم زعلانة ومختفية
ورة هالغيوم
رغم البرد القوي
بس اكو كم طير بالسما يلعبن
يالله شكد حلوات… نيالهن
ياريت عندي اجنحة مثلهن
واطير وابتعد عن كلشي
اتمشيت خطوتين
وكعدت علئ الصبة
عيني علئ شجرة النارنج
شلون مقاومة الريح..
وهو يحاول بيئس يتمسك بيهه
بس للاسف الهوئ اقوئ منه واتساقطن كلهن بالحديقة..
ثواني وبدت الغيوم تواسيني
وتبجي لحالي
وعيوني وياهه تهل بدمعهه
صح عمري 12 سنة
بس الالم الشفتة بحياتي خلاني اكبر قبل وقتي
ضليت كاعدة بالحديقة مالي واهس ادخل جوة ..
كئابة وكهرباء ماكو شعندي داخلة
دقايق وصار صوت قوي
فزيت ودخلت اركض للبيت
مادري هاي كراكيع ورعد لو ضرب وانفجارات.. تاهت علينه
ـ ياستار شنو هالصووت
ـ ماعرف ماما عبالي كراكيع
ـ لا ولج هذا مو رعد ..عبالك ضرب لو انفجار ربي سترك شديصير برة
وابوج بعدة مارجع وين اروح المن انطي وجهي
ـ من كلتلي هيج ماعرف ليش ماخفت علئ ابوية..
لاتخافين يمة يجي وين يروح
ـ الاوضاع تلفانة يابنتي وتلعب النفس واحد ميأمن يطلع منا لهنا ميعرف شيصير بي
ينخطف ينكتل ينفجر امريكان يغاتلو لو يحبسو هالتايهات ممحسبيلهه
ـ جمعتنه امي بالهول وكعدنة كلنة يم الصوبة ننتضر ابوية
تقريبا ساعه 4 ونص العصر بس عبالك المغرب لان ظلمة ..
رادت امي تروح للمطبخ تجيب شمعه بس سمعنه هوسة وحركة قوية برة
كلنة خفنة وارتبكنه
وامي نفسهه خايفة وترجف
بس تحاول متبين النه وتبتسم كل شوي
عافتنة وكامت يم الشباك دتشوف شكو
قبل لاتوصل ..
سمعنة باب بيتنة الخارجية تفلش وناس دخلو علينه واصوات غريبة مدنفهمهه
ركضت علينة حضنتنة وصرنة جوة ايدهه وهي تبجي وتقرة قران واني ابجي وياهه واخواتي يتصارخن
دفرو الباب الداخلية ونفتحت
وكلنة كمنة نصرخ ونعيط
دخلو علينة بيدهم لايتات كلش قوية ووموجهين الاسلحة علينه ويصيحون ويعيطون واحنة مدنفهم منهم كلمة
جانو لابسين زي الجيش الامريكي
امي حظنتنة بكل قوتهه
تقدم واحد علينة
حسيت هاي اخر لحضات النة
حضنت خواتي وجلبت بدشداشة امي
وامي تصرخ والله ماعدنة شي والله ممسوين شي
ـ لاتخافون ماكو شي اجراء روتيني تفتيش المنازل.. عدكم اسلحة ؟
ـ والله مااعدنة شيي راسي وراس جهاليي بهالبيت
ـ وصلتنة اخبارية هالمنطقة بيهه اسلحة لازم نفتشكم
ـ البيت كدامكم بس فدوة ابوس ايدكم لاتأذوونة
ـ ماعدكم رجال بالبيت نحجي وياه
ـ خوية والله زوجي طالع لشغلة وبعدة مارجع خوية انت عراقي مثلنة واني بشاربك اخيتك اني
ـ تريدين تحافضين علئ حياتج انتي واطفالج اكعدي هناك ولا تتحركين
ولا اطلعين صوت ابد نفذي الاوامر وبس
ـ اي ان اشالله خوية بس والله ماعدنة شيي
ـ صفنت عليه هذا شلون يحجي مثلنة عراقي اشو طويل مثلهم ولابس نفس لبسهم .. ماركزت عليه من الخوف
اخذتنة امي وحصرت روحهه بزاوية بالهول واحنة داير مدايرهه ترجف وتبجي وتكول وينك فؤاد وين صرت..
انتشرو الامريكان بكل البيت
فلشو كلشي
وكلبو كل شي
نسمع صوت التكسر مالتهم
بس مدنعرف شديكسرون وشيحجون
الرعب العشنة بي مينوصف
امي ايدهه تختض و ترجف
الجو صار باارد مينحمل احس راسي راح يطك من الالم حاضنة خواتي وكلنة بحضن امي
الباب مفتوحه كلهه والهوئ يلعب بالهول والجنود واكفين يمنه موجهين سلاحهم علينه
دقايق وكلهم التمو بالهول مرة ثانية
كللنة الولد بيتكم نضيف مابي شي ونتأسف للصار وطلعو ..
بس ضليت اني وخواتي
كاعدين بمكانة ونبجي ونرجف
ماعرف من الخوف نرجف لو من البرد
كامت امي وسدت الباب وراهم
وراحت للمطبخ تريد تشوف شي تعلكة
الدنية ظلمت وصار الليل
سمعتهه تبجي وتكول الله لاينطيكم شمسوين بالمطبخ..
دقايق و جابت شمعة جبيرة وعلكتهه
تحاول متبين كدامنه هية خايفة
كامت تضحك ويانه وتلاشينه
بس القلق بوجهة كلش واضح
كلنه مصدومين من الصار
ـ ادري ووين صار ليش اتاخرر اكو واحددد يضل برة البيت لهلوكت بهيج ضرووف
ـ يجوز مگطوع الطريق ومكدر يجي
ـ كلبي مامرتاح ماعرف شبيه ..
اكوم اتوضئ واصلي واسويلكم عشة
ـ ذيج الليلة كلنة مانمنه
حتئ عشة ما اكلنة..
كهرباء ماكو منعرف ليش ابو المولدة ماشغلهه وامي تخاف تطلع وتروحله لان صار الليل..
هواي تأخر ابوية صارت ساعه تسعه وبعدة مابين ..
لا عدنة تلفون ارضي ونكدر نتصل علئ خوال او عمام ونسألهم ونحجيلهم الصار
ولا عدنة من هاي التلفونات الهسة طالعه يسموهه نقال طابوكة كلش غالي ومكدرو اهلي يشترو..
ولا همة قريبين علينة لان هسة بدة منع التجوال وامي متكدر تاخذنة وتروح
ضلت امي حسبة تجيبهه وحسبه ترجعهه وتحرك بروحهه علئ ابوية
كل خواتي الصغار نامو بحضني لان ادفو بطانية وصوبة وصار البيت دافي ..
وامي ضلت سهرانة تصلي وتقرة قران حتئ يوصلهه خبر من ابوية..
دائما من اكون كاعدة لوحدي استذكر الماضي.. لو امي رحمة بمكان ماما همين جان خافت هيج علئ بابا وتضل تصلي وتقرة قران حتئ يرجع؟
فتحت عيني علئ هالدنية
ماعرف شنو طفولة ..
اتمنيت اعيش مثل البنات الاشوفهن
اتمنيت اطلع للسوك وية امي وابوية وادلع عليهم واكلهم اشترولي هاللعبة لو هالملابس لان عجبتني ..
اتمنيت اعيش طفولتي مثل بقية البنات..
اجيت للدنية ماعرف شكل امي
ولا اتذكرهه ..
شايفتهه بالصورة ..
وياريت صورة مثل البشر
صورة وحدة وكلش قديمة
حجمهه صغير بكد اصبعي
و ما ملونة بالابيض والاسود
وفوكاهه مكسرة وبيهه خطوط بيضة
وكأنو شبح بهالصورة مو بشر
اللون الطاغي بيهه اسود
لكن شكل امي وملامحهه ابد مو واضحة كلشي ضايع بيهه مثل حياتي الضايعه ..
يكولون عمري اقل من 3 ايام وجدي عبدالله ابو امي اخذني وذبني علئ ابوية
اسمي #نهاوند ..
ومعنئ اسمي هو نوع من انواع المقام الغنائي العراقي ..
يعني هذا المعنئ الاعرفة ..
يجوز اله معنئ ثاني مادري بعد ..
ابوية وامي اتزوجو بسنة 1991
زواج جدا تقليدي بدون معرفة مسبقة ..
جدو عبد الله ابو امي
مؤذن بالجامع بمنطقة الاعظمية..
وجدو حمزة ابو ابوية
جان مسؤل عن ممتلكات هالجامع ..
وصارت علاقة صداقة بين اجدادي كلش قوية وتحولة هالصداقة للنسب
وتناسبو بزواج اولادهم
بابا فؤاد … و امي رحمة
مو كلش كبار كبار من تزوجو
ابوية عمرة 22 سنة
وامي عمرهه 17 سنه
ولان جدو عبدالله كلش يثق بجدو حمزة
فـ ما سأل عن بابا بالمنطقة
لان عود واثق من اخلاقة ومتصور راح يكون مثل جدو حمزة نفس الطبع والسلوك ..
صايم مصلي قارئ قران ويخاف الله ويمشي بالطريق بدون اخطاء
بس للاسف انصدمو بواقع ثاني ..
جدو حمزة ماجان يعرف بسوالف بابا لان جدو انسان فقير وكلش جبير بالعمر ..
جان ينام من اول اليل
فميدري شيصير وراه
وبيبتي حورية بعد افقر من جدو
واكثر شي الي خلة بابا مينكشف لاحد
جان اغلب الايام يبات يم عمة الوسطاني سهيل ..
لان عندة شباب بعمرة فياخذ راحته يمهم
بالاضافة سهيل عم بابا مو من النوع الملتزم والمتزمت ويحاسب مثل جدو
امي وابوية اتزوجو ابيت مستقل عن بيت جدو وهاي كانت رغبة بابا حسب معرفت ..
لكن جدو حمزة
شرط علئ بابا يسكن وياه عمي عماد الجبير
لان امي بعدهه صغيرة وميصير تضل بالبيت لوحدهه منو يبقة يمهه من يطلع للشغل
وبالااضافة لهذا الكلام
الايجارات جانت غالية بهذاك الوقت ..
وبابا ميكدر يدفع ايجار بيت لوحدة فبوجود عمي وعائلتة يخف الحمل
وفعلا كل واحد اخذلة طابق واستقرو..
مرت الايام والشهور علئ زواجهم وبدت مشاكلهم تطغي علئ حياتهم
رحمة ـ يعني لشوكت يبقئ هذا وضعك ولشوكت اضل استحمل ترجعلي بنصاص الليالي
فؤاد ـ رجعنة لنفس الاسطوانة المتخلص
ـ طكت مرارتي يارررجال
ـ ناقصج شي بالبيت؟
ـ اني مادحجي علئ البيت
ـ نااقصج شــــيي
ـ اي… انت ناقصني
ـ لا تلوفيهه عليه .. ناقصج اكل
شرب ملابس احتياجات ؟
ـ لااااا ماناقصني
ـ خلص شتريدين مني بعد ؟..
بعز هالاوضاع ومكعدج بيت وحد وممخليج محتاجة شي ليش هاللغوة الزايدة
ـ اكلك انت صدك تحجي !
تدري لو ابوية يعرف بسوالفك شيسوي بيك
ـ وليش ادخلين اهلج بهالموضوع هو عناد وخلص !
ـ ليش اتزوجت اذا يومية تسهر لوجه الصبح يم الــ
ـ شبيج رحمة ..
ولج والله العظيم اني مسهران وية كحاب
كل ما بالموضوع احب احضر مجالس الطرب ..
ماكدر اترك حلمي وهوايتي النحرمت منهة ..
ـ لو يعرف ابوك وابوية والله يموتوك
لو يسلموك للشرطة بيدهم
ـ لج ليش محسستني مسوييلي مصيبة شمسوي قابل ؟
ـ كـــل هااي البلاوي عندك عاادي !
ترة سوالفك مينسكت عنـــهه ابد ..
ـ ها ههه
ـ ليش تضحك وتهز براسك ؟
مو تدري ابوك وابوية شيوخ جامع ويخافون الله وانت ادور مغنئ وركص وبهذلة ملاهي
ـ لج بابا مو ملهئ
والله العظيم مو ملهئ
هذا اسمة جلسة طررب
مجموعه من المطربين والملحنين المبتدئين ونكعدد سوية ندندن ونتونس
وووينه ووين الملهئ
وبعدين يارحمة انتي زوجتي ..
يعني المفروض تفهميني وتفهمين حلمي
ـ بلة هذاا حلم ؟ احلم بشي بي حظ بي خيرر مو ركص ولعبان نفس
ـ قابل مأذيج هالغنة والركص ؟
ـ كل هاااي سوالفك وتكول ممأذيني
ـ وج شوكت اذيتج ؟
اذا انتي حقانية مثل متكولين اعترفي ضاربج هاينــج مأذيج مقصر علييج كولي احجي
ـ لا مااضاربني بس هايني ومأذيني
ـ بشنو؟
ـ تارسلي البيــت كاسيتات وشرايط غنة وركص وصخام وجــه ..
الكاسيتااات والمسجلات ااكثر من هدوومي وواغراضي دشووف شوووف الكنتور مقبط من هالزباايل..
ـ لااتكولين زبايل
ـ لا زبايل ونص ..
ادري شنو ماخذني بس للخدمة؟
من تكعد بالبيت تنعزل بهذيج الغرفة وتلزم هالخشبة مالتك وتكعد ادندن وتنسة عندك مرة
و لو طالع النهار والليل كلة وماشوف وجهك
واني هناا وحدي مثل الحيووانة محبوسة بهالبيت واتصفن علئ الحياطين طكت روحيي وولعبت نفسي
ـ هالخشبة اسمهه عود
والف مرة كلتلج هاي هوايتي ونحرمت منهه بسبب تزمت ابوية
واذا عازل نفسي عنج لان اعرف طبعي احب ادخل بكل شي حتئ بالطبخ.. وانتي متحبين هالشي ..
لذلك انعزلت عنج حتئ لاتصير مشاكل بيناتنة
ـ كل عقلك مقتنع بكلامك؟
انت تحير شلون تونس روحك
وعايفني مثل الجلبة لوحدي ..
ـ يعني مادعرف شتريدين مني اكثر كلما تطلبين تطلعين للسوك اكلج روحي كلما تريدين اهلج اوديج شنو المطلوب اكثر؟
ـ والله اني مااضل هيج اريد احس بيك مثل اي مررة تحس برجال يمهه
شوف اخوك شلون محمحم علئ مرته وجهاله ..
شوف شلون مداريهه وكاعد علئ حلكهه والله اموت قهر من اسمع ضحكهم وشقاهم ولمتهم سوية ...
شوف نفسك شلون عايفني لنصاص الليالي لوحدي مثل الجلبــة االجربة ..
عوود مصدكة روحي عندي رجال عمت عيني اي والله
ـ ترة اني مو يومية اروح علئ شنو هوستج
ـ من الســـببت للجـــمعه ترووح وبس يوم الثلاثاااء تكعد يمي
ومن تكعد حابس روحك بهذيج الغرفة وحاسبة عليييه هاليووم !
صددك تحجي انتتت
ـ كم مرة كلتلج تعالي اسمعي الحاني اكعدي يمي نسمع كاسيتات انت ميعجبج
ـ دررروح تريديني اغضب الله علمود تفاهة يالحان يا اغاني حراااام باباا حرام
احجي شي بي خيرر حتئ اكعد وياك
ـ ااوووووهوووو الكعدة وياااج لعبان نفسس ابتعدي عنيي راااح اتاخر عن الجماعه
ـ ما ابتعدد شسوووي
ـ دووخــــرري مناا
ـ اااااي ياياابة ييعنييي تدفعنييي بالكااع واني حاامل علموود ركاصااااتك ووعلموود سهراااتك وية شلة الحررام كرررهتك وكرهت السااعه القبلت بيهه اتزوجـــك ..
يبووو ياااحضي الاااسوددد
ـ لا تصيحيين صووتـــج
ـ يبوووو ياحضي الااغبررر
انيي بنت الحسب والنسب
بنت الخااايف الله مؤذذن بالجاامع شكدة شكبررة العاالم تحلف براسه
بنت القايم الليل يصيلي ويدعي اخذيليي هيج واحد مثـــــلك ..
وگ والله ثمم وااالله
اذا ماضليت هنااا وبطلت من سواالفك الا احجي لابوية كل شيي
ابو اسلام ـ خيرر ياستار شبيكم شصاير ليش هالعيااط صعدت اركض وكوة اندليت دربي فهموني شكو
رحمة ـ تعاال ياابو اسلام احضررنة وشوف اخوك بعد ماكدرر اتحملة خلص صبرري وكرهته ودووني لاهلــي اريد اخلصص منةة
ابو اسلام ـ تعااال انـــت وين رايح احجيي شصاير
فؤاد ـ عوفهه يابة ماتعودت عليه هي يوميه تهوس وتعيد هالاسطوانة عوفهه توولي
ـ تعال لك شنو هالحجي تعاال اكعـــد خلي افهم شبيكم
ام اسلام ـ بهالفترة هواي كثرت مشاكلكم استهدو بالرحمن ياجماعه شنو صار عين ماصلت علئ النبي وصابتكم
رحمة ـ بعد ما اضل لحضة بهالبيت اني رايحه لاهلي
ام اسلام ـ رادت تطلع رحمة جلبنة بيهه ومخليناهه تطلع
وابو اسلام سحب فؤاد ورحمة واخذناهم للاستقبال وصار حجي وصياح بيناتهم ..
رحمة حامل تقريبا بالشهر الرابع وماصارلهم ست اشهر من اتزوجو بس خلصو كل هالاشهر مشاكل كلش قوية بيناتهم كل مرة ندخل ونحاول اني وابو اسلام نحتويهم ونفهمهم بس هالمرة اثنينهن قافلين وابد مديتفاهمون ..
ابو اسلام ـ ترة فؤاد انسان طيب ومابي اذية بس الشغلة الوحيدة البي يحب مجالس الطرب
ـ وانت تقبلهه يروح لهيج مكانات؟
ـ اكيد ما اقبلهه بس هو رجال يعني مترهم نربطة ونكعد ونتحكم بي
ـ طبعا لان اخوك متنطي بي ..
بس اريد اروح احجي لعمي حمزة واشوفه يقبل علئ سوالف ابنة
فؤاد ـ اذا تجيبين سيرة لابوية متلومين غير نفسج
ـ شنو تهـــدددني
ابو سلام ـ مو هيج تنحل الامور اصبرو شوي علئ الاقل احترمو وجودي اني اكبر منكم وكاعد لخاطركم ..
نهاوند ـــ يكولون امي بذاك اليوم ماصبرت ..
لان بابا ما اهتملهه وعافهه وطلع للسهرة
وهية لبست عبايتهه ودكت رجل الا ياخذهه عمي ابو اسلام لبيت اهلهه لو تحرك روحهه ..
وعمي مالكة حل غير يلبي طلبهه لان خاف من تهديدهه ..
راحت امي لبيت اهلهه
وحجت كلشي لابوهه ..
جدو عبدالله من عرف انصدم هو وخوالي بس ماسوة شي حاول يحل المووضع بهدوء
جابو لبابا وكعدو يحجون وياه ويكولون وعدهم يتغير ويغير حاله وميروح لهلاماكن ..
بس للاسف ..
ماتغير ولا كدر يتغير
ورجع لطبعه وسهراته وجلساته
وجدو عبدالله من شاف بابا ما وفئ بكلامة وصل الحجاية لجدو حمزة
لان اهل ماما ماقبلو يضلون ساكتين
جدو حمزة من عرف شافهه جبيرة بحقة هو متدين ومعروف يكون ابنه هيج حاله يدور ونسة وطرب
وصارت مشاكل كلش جبيرة بيناتهم وكلهم صارو ضد بابا ووصل الحال بجدو حمزة يتبرة من بابا اذا استمر يروح لهيج اماكن ...
اما اني جنت شهر عن شهر اكبر بداخل رحم امي رحمة..
صارت امي بنهاية شهرهه الثامن
والناس يرجعوهه لبيتهه وترد ترجع لاهلهه بمشكلة وية بابا..
وبسبب كثرة المشاكل المدتنحل وبابا دائما يخلف بوعودة
جدو عبد الله صمم يطلك امي ..
رغم محاولات هواي ناس وتتدخلاتهم حتئ يرجعوهم لبعض ..
بس مافاد
لا بابا تنازل عن حلمة لخاطري ...
ولا ماما تنازلت عن حقهه لخاطري …
وبليلة من ليالي فبراير اطلكو وافترقو وكل واحد راح بطريقة ..
وراهه بكم يوم صار موعد ولادة امي جان يوم السبت 1992/2/29
يوم مميز من شهر شباط مينعاد الا كل اربع سنين ..
مشت السنين واني وحيدة
لا شايفة امي ولا اعرف ابوية ..
رباني عمي ابو اسلام وزوجته
وكبرت بنصهم واني اصيحلهم يمة ويابة
كل عقلي همة اهلي
وولد عمي اخوتي وبنات عمي خواتي ..
بس من صار عمري اربع سنين ونص تقريبا صار حدث ثاني غيرلي كل حياتي
جنت اشوف زوجة عمي ام اسلام تلم بملابس اولادهه بالجنطة الجبيرة وتاركة ملابسي بالكنتور لوحدهن ..
وبسبب عقلي الطفولي الممستوعب الديصير ..
كمت اخذ ملابسي من الكنتور
واخليهن بالجنطة
واكلهه ماما ليش متخلين هدومي وياكم والله هدومي نظيفة ..
وهية تبتسلمي ومتحجي شي
و تشيل ملابسي وتخليهن علئ جهه من الفراش …
مفهمت ليش هيج تسوي وليش عافت ملابسي علئ جهه..
بس الاتذكرة كلش انقهرت منهه كلتلهه ماما بعد ماحبج وطلعت من الغرفة اركض وابجي ..
مر يومين ونسيت الصار رغم اشوفهم يصفون بأغراض بيتهم وتجي ناس تاخذ الاغراض وتروح
الئ ان فرغ البيت
صار الليل واخذوني بيت عمي ابو اسلام ورحنة كلنة لبيت جدو حمزة وبتنة يمهم
اشوف لمتهم كاعدين يبجون ومرات يضحكون ومرات يسولفون
بس ممستوعبة الديصير
طفلة صغيرة محد بحالهه يفهمهه شي ولا يحجولهه شي …
صار الليل ونمت مثل اي طفل يحط راسة وينام شوكت مينعس ..
بس من كعدت الصبح
اختلف كل شي عليه ..
كل طفل يكعد من النوم يشوف امة وابو واخوته يمة ..
بس اني ماشفت اهلي
لا اخوتي ولا خواتي
لا بابا ولا ماما
ادور بالوجوه مستغربتهم
رغم اعرف هذول عمامي
وهذا جدو وهاي بيبي
بس ماريدهم
اريد بابا عماد وماما انسام..
خفت واستغربت وضليت ابجي وافتر بالبيت واصعد وانزل اصيح بأسمائهم ومحد يرد عليه..
اخذتني عمتي شفاء وخلتني بحضنهه وهي تمسح دموعي وترتب شعري كلتلي حبيبتي كافي تبجين مو زين تتفاولين عليهم هيج ..
سألتهه وين بابا وين اهلي اريدهم..
كلتلي ..
عمو عماد واهله راحو بعيدد لدولة اسمهة الاردن ومناك احتمال يروحون لكندا
مفهمت شنو يعني اردن وكندا
وليش تكلي عمو عماد ؟
ليش متكلي بابا عماد
ابد مفهمت ولا استوعبت هالكلام
هي تحجي واني ابجي
كل الفهمته من كلامهه
بعد ابد ماشوفهم
ضليت ابجي علئ فراقهم ايام طويلة
حالي حال اي طفل يتنحس علئ فراق اهلة مافهمت ليش عافوني واخذو كل اخوتي وخواتي وياهم
شنو سويته حتئ يتركوني ويروحون
احساس مينوصف بالخوف والالم والحسرة ..
حسيت نفسي وحيدة بنص ناس غربة ماعرفهم ولا محتكة بيهم ..
بعض من عماتي ونسوان عمومتي استغلن ضعفي ودموعي وكلولي ما اخذوج لان وكحة ومتسمعين كلام
ومن وقتهه واني احاول اصير حبابة وما ابجي بصوت عالي حتئ يرجعولي بابا وماما وياخذوني وياهم
مرت الايام والاشهر ونفس حالي
كلهم يكولون
بابا عماد مو بابا
وماما انسام مو ماما..
لكن مدفهم شي من كلامهم
جنت اشوف جدو حمزة وبيبي حورية هواي يتعاركون وية عمو فؤاد ويرزلو
جنت كلش اخاف واستغرب منة
و اول ميدخل للبيت اركض اختل بأي مكان وابتعد عنة ..
وهو هم ابد ماحاول يتقربلي
جانو دائما يرددون كدامي
بنتك تحتاج ام
اتزوج لخاطر بنتك
امهه تزوجت وشافت حياتهه
وانت بعدك
بنتك مالهه غيرك
واحنة مادايميلهه
ونسوان عمومتهه
وعماتهه ميكدرون علئ تربيتهه
و ابو اسلام اخذ عائلته وسافر..
لازم تتزوج وتنسيهه عماد وانسام وتعيش حياتك ...
اسمع كل هالحجي بس ابد متصورت المقصودة اني !
جنت طفلة معزولة عنهم
لان بس عمتي شفاء جانت حبابة ويايه البقية كلهم يضربوني ويأذوني
وبيبتي حورية ام ابوية جانت تنقهر عليه من هيج يسوون بية
وتكلي تعالي بيبي كعدي يمي
حتئ لا ياذوج ..
وبهالطريقة انعزلت عن عالم الطفولة تماما واختلطت بعالم الكبار
التهي بسجادة بيبي لو بنضارتهه
واكبر ونسة عندي من تتعكز عليه و تمشي ..
احس نفسي مسوية انجاز
جنت اشوفهه شلون تلزم كتاب جبير وتفتحه وتضل صافنة عليه ومن أسالهه تكلي هذا الكتاب اسمة قرأن
ايام طويلة وهذا حالي..
امل واضوج اريد اطلع العب وية الجهال بس بيبي متقبل واذا اغافلهه واطلع لازم انضرب واتأذة من اولاد عمي وارجع اختل يم بيبي
وبيوم من هالايام
صارت هوسة بالبيت
واشوف الناس فرحانة ولابسة احلئ ملابس والبيت مليان نفاخات وزينة ..
اخذتني عمتي شفاء
سبحتني ولبستني ملابس حلوة
ومشطت شعري
وصعدنة بسيارة وويانة سيارات هواي
اشوف الناس تصفك وتهلهل وتضحك
واني هم وية الجهال كمت اصفك واركص وفرحانة ..
بس علئ شنو فرحانين هالناس ماعرف
لزمتني بيبتي وكلتلي اليوم عرس ابوج فؤاد يابيبي..
باوعت الهه بأستغراب بس ماحجيت ..
وصلنة لبيت نزلنة كلنة وشفت عمو فؤاد مرتب وحلو طالع
ووياه وحدة لابسة بدله بيضة اخذهه وصعدو بالسيارة الحمرة
واحنة وراهم بغير سيارة
اسمعهم يكولون زفة ابوج هاي عرس ابوج انتي محظوظة حضرتي عرس ابوج ويضحكون واضحك وياهم
بس ابد ممستوعبه
انو فؤاد هو ابوية الحقيقي …
ضلينة نفتر بالشارع وراهه ماعرف وين رحنه بيت غريب مشايفته نزل بي عمو فؤاد والعروسة
عفناهم ورجعنه
وراهه نمت ومادري بعد شنو صار وراية
مر يومين و اجئ عمو فؤاد وعروسته اتغدو يمنة واني ورة بيبي اتختل منهم خلصو الغدة ورادو يطلعون
اجتي عمة شفاء بيدهه جنطة كالت هاي كل ملابسهه هنا ..
اخذت الجنطة مرة عمو فؤاد
واجة عمو فؤاد لزمني من ايدي حتئ ياخذني
جنت كلش اخاف منه وماحبة
لان ما شايفته هواي
بالصدف اشوفه
وهو مو محبوب يخوف
راسا بجيت وجلبت بيبيتي حورية ماريد اروح وياهم
وهي هم رأسا حضنتني وضلت تسولف ويايه وكلتلي هذا ابوج وهاي امج الجديدة وهي تحبج
شوفيهه هاي العروسة الجانت لابسة بدلة بيضة
بعدني ما التفتت واجئ عمو فؤاد جرني من ايدي وكال عوفيهه تولي انوب نقنع الجهال ..
متت خوف منة
يجر بأيدي واني غاصة بالبجي
فتح باب السيارة وصعدني وسدهه بقوة ضليت اعيط وابجي اريد بيبي حورية وعمة شفاء بس محد منهم اجاني ضلو يتفرجون عليه وهمة ياخذوني
صعدنة كلنة بالسيارة وابتعدنة عن بيت جدو ..
وللحكاية بقية… 🥀
اذا عبجتكم انطوني ارائكم وتوقعاتكم احبكم