الحلقة السادسة والأربعون
وقعدت راقده ونضت راسي يوجع فياا من البكاء قريب ينفجر صبيت خذيت حبتين بنادول ولبست استرتش اسود وقميص امتاع قيس لونه اسود ولفيت روحي ف بطانية وقمعزت قدام التلفزيون وحطيت الفيديو امتاع عرسنا وقعدت انتفرج عليه ونبكي لعند عيوني انتفخن وقعدن يحرقن فياا كنت نبي قيس ومحتاجته وف نفس الوقت راقيلي منه وحاسة لو شفته حنقتله عشان حرمني من وليدي كان شعوري ملخبط بس الي عارفته اني نبيه ومحتاجته ونعست ع الصالون ومعش نضت الا ثاني يوم الصبح علي صوت الجرس يرن صبيت ومنبيش نفتح وبحتت من العين شفت امجد مصبي لاني كنت محتاجه حد من هلي حد يحس بيا بدون مانحس بروحي فتحت الباب وارتميت ف حضنه وقعدت نبكي نبكي بعبرتي ورقبتي مخنوقة نبكي لعند معش قدرت حتي ناخذ نفس
امجد:: نونااا كنك شن في
نا:: نبكي وساكته
امجد::ومتخوفينيش احكيلي كنك تبكي ووين قيس
نا:: نبكي
امجد:: خشاني وسكر الباب وخذاني معاه وقمعزني ع الصالون وقمعز جنبي
نا:: نبكي ونحكي لعند الكلام ماحوتك يطلع وين كنت ليش سيبتني حتي انت ليييش
امجد:: مستغرب ومش فاهم حاجة خذاني ف حضنه احكيلي سلم خيتي كنك شن صايرلك كنه شكلك هكي وعيونك منفخات ووجك اصفر وكنك تبكي ووين قيس احكيلي ماتشغلينيش
نا:: قيس :((((( قيس عدا وسيبني بروحي معش يبيني
امجد:: شن قاعده تقولي انتي شنو معش ببيكي هذي وين عدا
نا:: قعدت نبكي وماسكة راسي منعرفش منعرفش
امجد:: تي والله مافهمت حاجة احكي كلام مفهوم ازف
نا:: امجد اناا تعباانه تعباانه بككل نبي ماما محتاجتها
امجد:: وجعه حالي ومعش عرف شن يديرلي ومفهمش شي من دوتي تعالي باهي و وحطيت راسي علي كراعه اهدي خلاص تو نحل الموضوع معش تبكي
نا:: كيف تحله كيف
امجد:: اهدي بس وارقدي
وقعد يملس علي شعري لعند نعست ومعش حسيت بشي وامجد يفكر يحاول يفهم حاجة من الكلام الي حكيته بس مقدرش وخدا موبايله وقعد يرن علي قيس ويلقا فيه مقفل وشويه هكي ورن الجرس خذا مخده وحطها تحت راسي ومشا فتح الباب وكان وليد
وليد:: امجد انت شن ادير هنا
امجد:: جاي نشوف في نسمة خش
وليد:: شن اخبارها تووا احسن
امجد:: تي شن احسن ياراجل من امبدري وهيااا تبكي توا كيف رقدت ومش عارف كنها
وليد:: قصدك مقالتلكش
امجد:: حكت لكن مافهمت منها شي
وليد:: خليني نخش وتو نحكيلك
امجد:: خش هيااا
وليد:: خش للصالة ولقاني راقده ع الصالون قمعز ع الصالون الثاني من امتا راقده
امجد:: توا كيف رقدت من امبدري وهيا تبكي
وليد:: عليك قصة
امجد:: شنو الي صاير مش فاهم حاجة انا
وليد:: محكتلكش نسمة
امجد:: حكت حاجات لكن مافهمت شي وكملتها بكاء
وليد:: ياسيدي من حاجة اسبوعين او اكثر كانت ف الجامعة وعندها امتحان و.............
وحكاله كل الي صار معايا
امجد:: صبا وهوا معصب تي كييييف يسير هضا كله ومحد يقولي كيف
وليد:: ياااراجل اهدا وقمعز تو تفجع اختك
امجد:: وليد الله يربحك شن اهدا عارف روحك شن تقول انت اختي راجلها لها اسبوعين مسيبها ومش سائل عليها وتقولي اهدا
وليد:: يعني كان عيطت وصرخت بتحل الموضوع
امجد:: قمعز وهوا راقيله ومسألتوش عليه ف الشغل
وليد:: واخذ اجازة من الشغل مدة شهر من يوم الحادث
امجد:: وين بيكون عدا وين
وليد:: انا بروحي معش عرفت شن اندير وحتي اخت قيس مش عارفه شي ولا رن عليها حتي هيا
امجد:: بس كيف يسيبها هكي بروحها كيف عطيناها لاه عشان يسيبها
وليد:: محد يعرف شن الي صار كان خايف عليها وقريب ينهبل وقت الي جابها المستشفى وبعدها دورناه معش لقيناه
امجد:: متقولش روح لبنغازي
وليد:: لا ماضنيش لان لو روح را وصل لاخته الخبر
امجد:: خبط يده علي كراعه حسبي الله ونعم الوكيل حسبي الله ونعم الوكيل شن انديروا توا قولي
وليد:: وسع بالك وتو نلقو حل ونونا مش بروحها معاها نحنا ومش حنخلوها
امجد:: يحكي بحرقة عليا لابسه القميص امتاعه شفتها
وليد:: بحت فيا وشافني كيف راقده ولابسه قميصه متلومهش علي اي تصرف اديره قيس راجلها ونونا تحبه ومتحملش بعاده عليها
امجد:: شوف وجها كيف شاحب وعيونها هالات شوفها كيف رايحه كامشه ورقيقه
وليد:: ياامجد هضا شي طبيعي الزعل ايدير اي شي
امجد:: قرب مني وقمعز علي ركبيه وقعد يمسح علي شعري سامحيني يانوناا مقدرتش نحميكي ومنخليكش تزعلي اسف عشان سيبتك بروحك لو كنت قاعد مكنش صار هكي
وليد:: خلاص ياراجل انت ملكش ذنب اساساً الذنب كله ذنب قيس
امجد:: كان نممسكة بس كان نحصله
وليد:: امجد رد بالك تدخل بين الراجل ومراته مشاكلهم يحلوها بينهم نحنا علينا نحمو نسمة بس
امجد:: ااااخ ااااخ
وليد:: يلا خلاص صبي روح
امجد:: لا قاعد معاها
وليد:: نسمة جت هنا عشان بتقعد بروحها خليها بروحها ع الاقل الايام هذي عشان نفسيتها اتعدل
امجد:: باهي يلا اطلع
وليد:: يلا
YOU ARE READING
#لعبة_القدر 💚(روايات ليبية) بقلم الكاتبةBent_benghazi#
Romanceرواية ليبية شرقاوية مميزة 💚
