الحلقة الخامسة عشر
محمد:: وين امجد
نا:: مش قاعد
محمد:: كيف هوا دزلي مسج وقالي تعال
نا:: مش امجد الي دز المسج انا
محمد:: حولي باهي بنطلع
نا:: منيش محوله وخش عندي كلام بنقوله
محمد:: انا اختصرت عليكي وقتلك خلاص طلعت من حياتك شن تبي اكثر
نا:: انت مش فاهم ولا حاجة وحرام تظلم الناس
محمد:: نسألك سؤال وجاوبي عليه
نا:: اسأل
محمد:: انتِ وقيس تحبو بعضكم
نا:: هضا الي طلع معاك توا
محمد:: جاوبي
نا:: خش للصالة باهي بنقعدوا هكي قدام الباب
محمد:: باه وخش للصالة
نا:: قمعز
محمد:: بتحكي ولا نطلع
نا:: لا خلاص حنحكي ومش حنكذب عليك لاني منحبش لا الكذب ولا اللف والدوران
محمد:: باهي
نا:: انا وقيس كنا نبو بعضنا من زمان وانفصلنا عن بعضنا من اكثر من سنتين
محمد:: خبط الصالون بكراعه كنت حاس اصلا
نا:: محمد كان ف مقدوري نكذب بس انا منحبش نكذب
محمد:: يهزب معناها كل شكوكي صاح
نا:: محمد لو سمحت انا محكيتش الكلام هضا عشان تقولي كان معايا حق
محمد:: وافقتي تنخطبي عشان تكلمي براحتك ودروحني انا صاح
نا:: رقيتلي محممممد لو سمحت انا مقلتش الكلام هضا كله عشان تشك زيادة انت مشفتش روحك من اول سوء فهم اتهمتني بالخيانة وانا قتلك من قبل مانرتبطوا اني مستحيل نكذب عليك حتي لو درت غلط حنجي ونقول تقدر تفهمني لو صارن معانا مشاكل ف المستقبل شن كنت حدير اه انا حنقولك كنت حطلقني من اول مشكلة
محمد:: اي حد ف مكاني كان حيفكر نفس تفكيري يعني قاعده مع حبيبك السابق قدام كل الناس بحجة ان يشرحلك
نا:: بس انت اتهمتني بالخيانة بدون ماتعرف ان كان ف بينا شي
محمد:: نسألك سؤال وعلي حسب جوابك حنسكروا الموضوع ولا كأنه صار شي
نا:: اسئلتك الي مش حتكمل اسأل
محمد:: صار حاجة بينك وبينه
نا:: (انفجعت وتمنيت الي فكرت فيه ميطلعش صاح) شن قصدك. بحاجة؟
محمد:: يعني قعدتي انتِ وياه بروحكم او
نا:: (مخليتش يكمل كلامه وصبيت ونشير بدي ع الباب ومعصبه) محمد صبي اطلع برا
محمد:: رفع راسه شنو
نا:: نعييط زييي ماسمعت اطلع براااااااا ومعش توريني وجك
محمد:: نونا والله ماقصدي
نا:: معش تحملت ودموعي نزلن محممممد اطلللللللع
محمد نزل راسه لوطا وطلع ونا مشيت طبقت الباب وراه بالقوة علي قد ماقهرني وانسندت ع الباب وقعدت ننزل لعند لقيت روحي مقمعزة ونا نبكي لييش هكيي يسييير معايا ليش. معنديش حظ انكويت بنار قيس ومزلت انتعذب لعند توا وربي دزلي محمد ونا كنت مجروحة ووعدني مايزعلنيش ولا يجرحني كسرتني ي محمد وضربته كانت اوعر من ضربة قيس طعني ف شرفي وصل ف شرفي نا نسمة الي فارضه احترامي علي كل حد نعرفه يسيرلي هكي من اقرب حد ليا والي كان حيكون زوجي كنت مستعدة نضحي بحبي لقيس بس لاني لقيت حضن دافي عند محمد لقيت قلب حنون حاويني ومستعد يفديني بروحه بس لاني منبيش نجرحه لاني عارفه قديش واعر الجرح بعد يجي من حد تحبه ليش يامحمد هكي ليش تسكر فيا مش ناقصني وجع وهم مزلت صغيرة ع الهم وقلبي معش يتحمل اكثر وقعدت نخبط ف راسي ع الباب ومقهوووووورة واااعره بككل حد يطعنك في شرفك الحاجة الوحيده الي البنت تموت ولا تفرط فيها يطعونها فيها وصبيت وحاسه راسي دايخ خشيت للمطبخ بنشرب اميه وصبيت الكباية وبديت نشرب ويدي قعدت ترعش وطاحت من يدي علي خشت العيال
YOU ARE READING
#لعبة_القدر 💚(روايات ليبية) بقلم الكاتبةBent_benghazi#
Romanceرواية ليبية شرقاوية مميزة 💚
