جريمة صوفيا ( روايات ليبية )

حلقة 27 🔥

رواية #جريمة_صوفيا 💔🔥
( خيال ممزوج بلواقع )
للكاتب : #إبراهيم_رشيد
الرواية بلهجة الليبية
حلقة  27🔥 " 

قراءة ممتعة
رشا في نفس اللحظة كانت تبي تخش ولكن شافت عماد مع صوفيا قررت توقف وتشوف شن ح يصير وكان الباب شبه مفتوح
ورشا كانت عينها على الاثنين
صوفيا:عماد تبي حاجة ولا نقدر نساعدك بـ حاجة؟
عماد:بصراحة انا رديت عشانك انتي0_0نبي نقولك حاجة مهمة
صوفيا:كيف يعني0_0
في لحظة عماد قرب بسرعة من صوفيا ومسك يدها
صوفيا انصدمت وتفاجأت0_0
ورشا تشوف في كل شي
عماد:صوفيا انا نحبك0_0
اللحظة هذي رشا تعرضت لـ صدمة كبيرة بكل
اما صوفيا كانت متوقعة يصير الشي هذا
صوفيا كانت مرتبكة وعماد لأول مرة يكون جريئ هكي
ورشا نزلت دمعتها على طول.
كانت رشا تبي تخش عليهم ولكن وقفت شويا تشوف شن ح يصير
صوفيا حولت يدها بسرعة من عماد
صوفيا:انا بجديات انصدمت بكل
عماد:هذا هوا الي في قلبي ياصوفيا من فترة وانا نبي نصارحك
صوفيا:منقدرش ياعماد عيب انت متزوج ورشا وحدة محترمة وطيبة بكل ارجوك انسى الشي هذا ارجوك
عماد:انا مش طالب منك حاجة ولا نستنى اصلآ في حاجة حاجة في قلبي وحبيت نقولها وبس
صوفيا:عماد ارجوك امشي من هنا بسرعة انا خايفة حد يشوفنا انا مازال بس اسابيع ونمشي من هنا مش حابة نخرب كل شي
عماد:تمام ياصوفيا
رشا كانت مخنوقة بكل وركبت تجري لشقتها وقعدت تبكي
عماد طلع وركب في السيارة وكان محتار بكل بكل ومش عارف شن يدير
عماد:مش عارف شن درت انا هل كان غلط ام صاح بس هكي الي حسيت بيه معقولة يكون الحب حرام هكي
صوفيا مشت بسرعة للدار.
صوفيا:مش مصدقة انا صاح كنت متوقعة ان يحبني بس عمري ماتوقعت عماد يعترفلي هكي والله ياعماد حتى انا خاطري نبادلك نفس الشعور بس اسفة واجد انت متزوج والاهم من هذا كلة انتقامي كلة ح يكون فيك انت
رشا كانت منهارة واجد وتبكي مش لأنها تحب عماد ولا تغار عليه ولكن حركة الخيانة هذي اكيد توجع بكل
رشا:مش متخيلة الي صار ياربي انا في حلم ولا علم بجديات مش عارفة شن نقول ياريتني خشيت عليهم ودرت فضيحة الحقير عماد هذا مش طايقة نشوف وجة مرة ثانية،بس صوفيا ملهش ذنب هوا الي حقير البنت مقالتش حاجة عيب بكل يارب كيف ح نعيش مع عماد بعد اليوم يارب صبرني مش عارفة شن ندير منبش نخرب فرحة وسام اليوم شن ندير بس
بعد المشهد الصعب هذا نمشو مع بعضنا لـ وسام
وسام خش على محمود
وسام:خير قالولي انك طلبتني
محمود:اها وسام تعال قمعز
وسام:نعم
محمود:اسمع ياوسام انت فاهم الي صاير عندنا في الحوش يعني خويا الي يكون اب نبيل ميت من 10 شهور والي صار مع نبيل مش شويا وحوشنا كلة حزين
وسام:ميصيرش شي يعني0_0
محمود:خليني نكمل كلامي الاول
وسام:باهي تمام كمل
محمود:انا قصدي شن رايك اليوم بالمرة تجيب الدبلة والطاقم وكل شي ونخلوها خطوبة رسمية اختصارآ لـ حاجات واجد واقل حتى تكاليف لكي 
وسام:خطبة رسمية كيف هذي بالسرعة هذي
محمود:الموضوع ميبش تفكير ياوسام ومفيهش شي نحنا منديروش في حاجة عيب ولا حرام قصدي حتى لو قررت تخليها بعدين حـ تكون هيا هيا حاجة هادية ومفش لا حفلة ولا شي
وسام:تمام بس والله هذا مش مقامكم انتو بس
محمود:نحنا راضيين حتى بـ خاتم فضة ياوسام انا نبي نعطي بنتي وناخذ راجل وميهمنش شي بعدها
وسام:بارك الله فيك بس انا اليوم الشغل فوق راسي ومش حـ نقدر ندير هذا كلة
محمود:انا حـ نسمحلك تطلع والشغل لما تكمل رد بعدين عادي واهم حاجة تكون الست الوالدة راضية بس
وسام:تمام لا امي تمام حـ نمشي توا ونشوفها
طلع وسام وكان يسوق وهوا مش مصدق كل شي كان يصير بسرعة هكي
محمود كان يكلم في ندى
ندى:تي كيف يابابا ليش هكي مستعجل انت
محمود:هكي افضل يابنتي افضل للكل متنسش حوش عمك كيف حزين بكل
ندى:حزين نمشو نديروا خطبة على طول هكي لا نحنا مش متفقين على هكي0_0
محمود:كلة ح يمشي تمام يابنتي توا اطلعي من المكتب وامشي للحوش جهزي مع عمتك الحوش اصلآ في وحدة يوم خطوبتها قاعدة في الشغل
ندى:تمام حاضر يابابا
وسام وصل للحوش وخش وشاف صوفيا.
وسام:صوفيا امي وين
صوفيا:في الدار ومعاها رودينة
وسام:تمام
وخش وسام على امة وطبعآ قاللها الخبر وكانت صدمة كبيرة
وسام:مش عارف عليش مصدومين انتو هكي انسب حل وقلت ان الناس حزينين من الي صار معاهم
منال:تي كيف تجي فجأ هكي ونحنا مش مجهزين حاجة
رودينة:قصدي حرام هكي كان صبرت شويا ياوسام را اقل شي درنا كيف خطوبة مالك جت تهبل بكل
وسام:لالا منبش حفلة ولا شي ولا اجواء انا هكي راضي وهما راضيين
منال:تي باهي كيف ياوسام شن قصتها العائلة هذي مرة وحدة هكي طلعت تعرفهم
وسام:امي منبش كثرت اجواء انا منحبش نكبر القصة انا توا ماشي نجيب في الدبلة والطاقم غير جيت ناخذ في فلوس من الحوش بس وباقة ورد وانتهت القصة مش لازم من اجواء وتصوير وهداية ومصاريف زايدات
رودينة:باهي عماد عندة العلم ولالا
وسام:وشن دخلة عماد في الحاجات هذينا ولا حتى في هذي نبي ناخذ اذنة انا
وطلع وسام.
منال:انا مش قادرة نصدق ح ننجن انا واقسم بالله هبلوني العيال هذوما
رودينة:هدي روحك ياماما الله غالب
منال:كيف بس فهموني عمرها ماصارت في الدنيا بكل نمشي من اول يوم نخطب البنت ونلبسها هكي على طول وانا منعرفهش بكل
رودينة:هوا هكي وسام ديما مستعجل شن نديرولة باهي
رشا كانت تكلم في بيسان.
رشا:حتى انا نعرفها يابيسان شفتها مرة ماهو هيا الي كانت ماسكة قضية فاطمة
بيسان:تهبل بكل ابلة ندى ربي يهنيهم
رشا:ان شاءالله
بيسان:كنه صوتك هكي انتي
رشا:كيف يعني
بيسان:قصدي حسيتك كنتي تبكي
رشا:لالا عليش نبي نبكي تعبانة شويا بس من لينا وسراج
بيسان:باهي تمام
رشا:صكري يابيسان رودينة خشت عليا انتظار
وردت رشا على رودينة
رودينة:وينك انتي كنك معش نزلتي
رشا:شويا وننزل عليش
رودينة:تعالي بسرعة لأ في اخبار جديدة ح تصدمك انزلي يارشا
رشا:باهي شويا وننزل
رشا صبت على المراية قعدت تحط في شوية مكياج وهكي على امل ميبانش انها كانت تبكي وهكي
ونزلت رشا وشافت رودينة وصوفيا وكان تصرفها تجاه صوفيا طبيعي
رشا:بصراحة انا مع وسام
رودينة:كيف يعني وين اجواء الخطبة وهكي حرام هيا فرحة مرة وحدة في العمر
صوفيا:خلاص يارودينة هيا صاح فرحة وحدة بس هذا كلة مش مهم المهم الاثنين يتهنوا مع بعضهم وهكي والباقي عادي
رشا:صاح كلام صوفيا عليش مكبرة الموضوع انتي انا نشوف فيه عادي بما ان الناس حزينين وهكي
رودينة:كلمي عماد قوليها لاه باهي
رشا:لا مدخلنش كلميه انتي منبش نرن عليه انا
نمشو مع بعضنا شويا لـ فاطمة
فاطمة نزلت من السيارة ووقفت قدام المستشفى
فاطمة طبعآ في داخلها حزن كبير بكل لأتها في فترة قصيرة خسرت كل شي
مشت فاطمة وخشت للمكتب وقعدت تاخذ في شهاداتها وجوائز التكريم الي على الساس
الممرضة:مش مصدقة يادكتورة يعني خلاص انتي ح تسيبينا
فاطمة:من اول ماطلع قرار المحكمة كنت ضروري نجي ناخذهن بس نفسيتي تعبت شويا شوفي هذينا كلهن تعبت فيهن لكن توا ملهنش اي معنى خلاص
الممرضة:مش عارفة شن نقولك احسن وافضل حد ح نشتغل معاه هوا انتي
فاطمة:يارب يجي مكاني هنا حد يستاهل ويكون احسن مني
الممرضة:مستحيل مفش افضل منك انتي في كل حاجة
فاطمة:يلا كلة نصيب من ربي ردي بالك من روحك بس 
فاطمة طلعت وكانت حزينة ودمعتها على خدها وركبت في سيارتها ومشت
عماد كان مع معين وطبعآ لأن صديقة المقرب فـ هوا قالة على كل شي
معين:معقولة ياصاحبي هكي لكي فترة مخنوق ومضايق وتوا غير حكيت
عماد:ماهو انت شفت الفترة الاولى كلها مصايب على راسي انا وكيف كملت قصة الشقة
معين:عماد انت من حقك تحب لأنك بشر بس متنسش انك متزوج
عماد:ماهو هذي القصة كلها انا بعد اليوم معندش وجه نقابل صوفيا بكل
معين:الله غالب ياعماد عليك خليك راضي بالواقع وخلاص
عماد:معين انا مفش حد حاس بيا المسؤولية كلها على راسي نحل في المشاكل كلهن بس معمرش حد جاء وقالي احكي شن مشكلتك انا في النهاية بشر ونحس
معين:معاك حق ياعماد انت شايل مسؤولية الحوش كلة على راسك بس ياعماد والله متأكد رشا كويسة وتحبك متكسرش بخاطرها حرام ساد الي درتة فيها ياراجل
عماد:الضحية في الموضوع هذا كلة المسكينة رشا،تعبتها معايا وكرهتها في حياتها ومع هذا كلة مازالت معايا
معين:هذي ام عيالك وخلاص انتو في بيناتكم عيال ياعماد وبدوا يكبروا حاولوا تعيشوا وخلاص الدنيا شن نهايتها ياصاحبي غير كلنا نبو نمشوا منها للقبر
عماد:والله مش عارف شن ندير يامعين باهي غلط الي درتة انا مع صوفيا
معين:سوا غلط ولا صاح مش مهم توا صار الي صار
عماد:خلينا نكملوا شغلنا وخلاص
معين:حتى القهوة كملت والناس يستنوا هيا في ورانا حالات واجد بس تعرف شاغلني موضوع
عماد:شنو
معين:فاطمة ياعماد
عماد:كنها فاطمة
معين:شنو نسيت انت ولا كيف انها خسرت شغلها في الاذاعة وخسرت شغلها في المستشفى
عماد:لا والله مش ناسي وهذا هوا الي بجديات مزعلني وحارق دمي على الاخر
معين:ياعماد هيا توا معش عندها اي دخل او مرتب في حياتها وبزيادة عندها عيل شن نديروا نحنا ضروري نساعدوها
عماد:صاح كلامك بس فاطمة عارفها انا اكثر واحد نعرفها متحبش حد يساعدها خصوصآ في موضوع الفلوس هذا وبعدين هيا باتها لما مات سيبلها ميراث وهكي
معين:مهما كان ياعماد دير حل في الموضوع هذا الفلوس الي عندها ح يجي يوم ويكملن اصلآ
عماد:انا ح نقمعز معاها ضروري نحكو انا وياها
معين:يكون احسن
وسام شراء خاتم الخطوبة والطاقم وكل حاجة ورد للحوش.
رودينة:اهلين بالاخ المستعجل
وسام:وين مالك انا ورايا شغل
رودينة:مازال راقد مالك اصلآ يرقد في الصبح
وسام:تي عارفة اليوم في الصبح طلعت ولقيته نايض يلعب في ببجي،ياعليك قصة ح نركب نشوفة
وركب مالك فتح الشقة وخش على مالك
مالك:طفي الضي ياراجل نبي نرقد
وسام:ياراجل حس على دمك وقت نوم هوا توا
مالك:كنك ياوسام شن في
وسام:معقولة الساعة توا قريب 3 وانت مازلت راقد
مالك:ياوسام ياحبيبي شن في
وسام:لا استفزاز صحصح معايا شويا
مالك:نعم ياراجل والله مصحصح كنك
وسام:كيف ح تشيل مسؤولية حوش وزواج بس
مالك:خلاص ياعم الجنتل اهدا اليوم ماشيين يخطبولك بس
وسام:متخلنش نرتكب في جريمة توا مش وقتك بكل
مالك:احكي باهي شن في
وسام:على الواتس دزيتلك عنوان الحوش عشان تشيل امك ورودينة ورشا
مالك:باهي تمام حاضر
وسام:وانا طالع توا واقسم بالله بعد ربع ساعة ح نرن على رودينة ولو قالت مالك مازال راقد والله نجيك و حـ تشوف حاجة متعجبكش بكل
وطلع وسام.
مالك:تي هذا كنة على الصبح عليش يدوي معايا هكي تهديد وعياط وخلاص الواحد ميعرفش يرقد في الحوش الممل هذا بكل
نمشو مع بعضنا شويا لـ ندى
ندى:يارانيا شعري سمح هكي انا
رانيا:تي يهبل بكل
ندى:خايفة خايفة بكل من القصة هذي
رانيا:معقولة ندى بنت اللواء محمود تخاف
ندى:مش عارفة ليش اليوم بالذات خايفة وخايفة اكثر شي من عمتي ام وسام
رانيا:لا ان شاءالله ح تطلع وحدة كويسة
ندى:مش عارفة ليش خايفة نطلع شينة
رانيا:تي شينة شنو هما اصلآ يحلموا بوحدة هكي لـ ولدهم عيون خضر وشعر اصفر نعاليا تي والله لو خويا كبير كنت ح ناخذك له على طول
ندى:بطلي استفزاز اصلآ حتى وسام مش قليل يعني طول وعرض ولحية وعيون حلوة
رانيا:لا الحق طرف نيالك بيه احلى واحد في الداخلية كلها
ندى:هيا باهي كملي بسرعة قريب يوصلو
رانيا:هيا يابنت اثبتي بس
ندى شافت تليفونها وكانت خلفية التليفون صورت المرحومة امها
ندى:والله خاطري ماما تكون معايا في اليوم هذا
رانيا:ياروحي الله يرحمها ويسامحها
وسام كان يكلم في مالك
مالك:والله قاعد جهزت روحي ونستنا فيهم واقسم بالله عارفهم انت هما الي حـ يطولوا
وسام:باهي ياراجل قوللهم هيا عطلتوا على الناس
مالك:باهي ياوسام تمام
وسام:ومتنسش كيف ماقتلك خوذ باقة ورد كبيرة وفخمة معاك خوذ اغلا حاجة
مالك:لحظة شنو اغلا حاجة هذي؟
وسام:الله يخربيتك انت مش عارف لمنو طالع بخيل هكي خوذها وتوا نعطيهن لكي مالك صكر صكر متخلينش نشتمك هنا
وصكروا الخط
مالك:يعني فوق ماهو متعبني معاه قاعد يعيط عليا والله هذا مستفز بكل تي هيا ياامي
منال:هيا هيا طالعين
رودينة:ياريتك مشيتي معانا ياصوفيا
صوفيا:لالا تمشو وتجو طيبين انا عندي كم مشوار ح نطلع
رشا:تمام ياصوفيا ردي بالك من روحك
وطلعو وركبو في السيارة
مالك:عيالك وين يارشا0_0
رشا:جاء بابا خذاهم
منال:ياربي منك ياوسام كيف حـ نخش للناس هكي بس وفي يدي الطاقم
رشا:عادي ياعمتي تصير مافيهش حاجة وبعدين كلمت وسام مبدري قالي الاقتراح هذا كان من اب البنت عادي يعني
رودينة:ربي يسترها معانا وخلاص
صوفيا كانت طبعآ في الحوش ومفش معاها حد
صوفيا:الو ضروري نتلاقو يعني
سراج:لازم ياصوفيا
صوفيا:باهي توا نجيك انا انت وين
سراج:تعرفي نتلاقو على الكورنيش احسن وامان مش ح يشوفنا حد
صوفيا:تمام قولي وين بالضبط
طلعت صوفيا وركبت في تاكسي،ووصلت قبل سراج وبعد شويا سراج جاء
سراج:اسف طولت غير زحمة بس
صوفيا:لا عادي
سراج:شنو في جديد ولالا
صوفيا:قولي انت الي طلبت تشوفني
سراج:اها حاب نقولك ان بعد بكرا اجتماعنا نحنا الاربعة وضروري تكوني موجودة
صوفيا:غريب كيف صار هكي
سراج:كل حاجة ماشية تمام التمام والامور طيبة لعند توا
صوفيا:يعني شنو ياسراج
سراج:يعني قريب عماد حـ يمشي في ستين الف داهية ونتريحوا منه بكل والمستشفى هذي ح تصكر بكل وطبعآ الفضل يرجع لكي
صوفيا:باهي لعند امتى انا ح نقعد معاهم
سراج:شوفي انتي وقت مايجي اليوم الموعود انتي عندك قرارين القرار الاول تسيبيهم والقرار الثاني تقعدي عادي لين تكملي مع امهم وتمشي في حالك
صوفيا:باهي يعني قصدك عماد معش ح يطلع من الحبس
سراج:مؤبد كيف مانشوف فيك،الحكم مؤبد من توا
صوفيا:يستر الله وخلاص انا خايفة بجد
سراج:متخافش ياصوفيا كل شي قرب على الانتهاء المهم زي ماقتلك بعد بكرا موعدنا ساعة 4 شوفي طريقة تطلعي بيها
صوفيا:تمام بس ياسراج صارت اليوم حاجة غريبة معايا بكل
وقالت لـ سراج كل شي
سراج:الحقير يعني بعد خذا رشا مني وتزوجها بالغصب جاي يبي يخونها اخرى
صوفيا:افهمني ياسراج بس انا نبي نقولك حاجة ثانية
سراج:شنو قولي
صوفيا:الناس هذي لما عاشرتهم وعشت معاهم اكتشفت فيهم حاجات واجد مكنتش متوقعة نعرفهن
سراج:شنو يعني احكي
صوفيا:طيبين بكل كويسين وكل حاجة فيهم تهبل عائلة تهبل بكل من الاخير شفت فيهم طيابة واحترام عمري ماشفته في حياتي يعني بجديات عشان منكونش ظالمة الناس هذي تستاهل كل خير
سراج:صوفيا الكلام هذا معش ينفع توا خلاص كل حاجة صارت وردي بالك تنسي ان العائلة هذي هما الي قتلوا باتك وامك ماتت من حسرتها عليه وعشتي طول عمرك يتيمة ووحيدة والمستشفى هذي ملك باتك انتي وملكك انتي وهما سرقوها منك
صوفيا:مش ناسية مش ناسية حاجة بس انا نحكي في كل حاجة شفتها
سراج:انا لازم ندير حاجة قبل ما نتجمعوا الحقير الكلب عماد هذا زاد حقدي عليه ووسام مش ناسيه بكل
صوفيا:رد بالك ادير حاجة خلاص بما ان الخطة متاعنا ماشية عشرة على عشرة معناها خلاص
سراج:وربي نحرقك ياعماد بكل
صوفيا:انا حـ نمشي توا وزي ماقتلك رد بالك ادير حاجة
برمت صوفيا وكانت تمشي وكانت حزينة بكل بكل
صوفيا:واقسم بالله ناس محترمين وانا لازم نراجع روحي هذوما طيبين بكل ويستاهلوا كل خير ووحق ربي حرام هكي بكل،بس لا مش ح نسمح التعب هذا كلة يمشي على الفاضي انا يشهد عليا ربي حبيتهم بس حقي يردلي ومعش نبي منهم شي
اهل وسام وصلو ولقو ترحيب وكرم كبير بكل ومشت كل حاجة كيف ما وسام يبي واحسن وتعرفوا على ندى والكل كان متريح وطبعآ زي ماتعرفوا ديما اول لقاء يكون جميل
اختصارآ للأحداث الكل روح وهوا مبسوط وكمل اليوم على خير وسلامة
رودينة:مش قادرة ياصوفيا نوصفلك مش قادرة بكل بنت تهبل بكل بكل شنو يارشا
رشا:لا بجد عروسة سمحة وتهبل
رودينة:تحسيها امريكية مش من هنا بكل
صوفيا:ههههه شوقتيني نشوفها
رودينة:صورت معاها تعالي شوفي
صوفيا:مشاءالله ربي يهنيهم ويخليهم لبعضهم
رودينة:وين ماشية يارشا
رشا:انا تعبانة بكل ونبي نركب فوق
رودينة:بس مازال بدري
رشا:لا والله حاسة بدوخة بسيطة هكي لأن اليوم نضت بدري
وركبت رشا فوق وخشت للشقة وكانت حزينة بكل
قمعزت رشا على السرير وخذت صورتها هيا وعماد من الجنب
رشا:ليش هكي يارشا الانسان الي يحبك سيبتيه الانسان الي يموت عليك ويعشقك سيبتيه بس عشان واحد حقير ونذل وخاين عليش لعند توا عايشة معاك بس مش فاهمة واقسم بالله كل دقيقة معاك تمشي كأنها سنة انتمنى نموت ولا نعيش مع واحد زيك ياعماد
رشا من عصبيتها كسرت الصورة وكانت طايحة على الارض
مشا الوقت وروح عماد ووسام وكانوا مجتمعين تحت
عماد:وين السرعة هذي ليش ماقتلي باهي
وسام:مشت كل حاجة بسرعة وحتى امك تفاجأت
رودينة:المهم بجديات ربي يهنيك وطلعت تعرف تختار
وسام:هههههه شنو ياامي شن جو ندى عجباتك ولالا
منال:بسم الله مشاءالله عليها قمر البنت ربي يهنيك معاها
وسام:ان شاءالله ان شاءالله خلوني نركب نرقد انا تعبان بكل وين رشا مش شايفها
عماد طبعآ من اول ماشاف صوفيا كان ناسي يسأل على رشا وعيالة بكل
عماد:صاح رشا وين
رودينة:قالت تعبانة وهكي وركبت
ركب عماد فوق وفتح باب الشقة وخش شاف رشا
رشا كانت مقمعزة في الصالة وحاطة السماعات
عماد خطم من جنبها
عماد:خير يارشا
رشا كانت عينها في عين عماد بس مردتش عليه ابدآ
عماد استغرب من تصرف رشا وخش جوا شاف صورته هوا ورشا مكسورة كيف ماهيا
عماد:رشا رشا
وطلع عماد ماسك الصورة ورشا مازالت بنفس الجلسة ونظرة الاستفزاز
عماد:نحكي معاك ردي عليا
قرب عماد وفك السماعات منها
رشا:كنك كنك قاعدة نسمع في اغنية مهمة بكل
عماد:تي شن تدوي انتي شوفي بنتك لينا مكسرة هذي وانتي ولا على بالك قاعدة تسمعي وندوي معاك متردش كنك انتي
رشا:لا مش لينا الي كسرتها انا كسرتها
عماد:شن تحكي معلش
رشا:وجود الصورة هذي مضايقني ومكرهني في حياتي ومكرهني في الساعة الي تزوجتك فيها
عماد:كنك تدوي هكي انتي معلش خاطرك في مشكلة في الليل
رشا:بالله عليك سيبني في حالي وخليني نسمع اغنية شيرين تقول فيها خاينين ياعين سمعت ولالا خاينين ياعين
عماد هكي شك ان رشا سمعت كل شي
عماد:تي شنو انتي اكيد صايرلك حاجة
رشا نزلن دموعها على طول وبدت تحكي في كل حاجة
رشا:عماد امشي من قدام وجي الساعة هذي احسن ليا ولكي ورد بالك تقرب مني ولا تلمسني ارجوك مش طايقة نشوف وجك هذا بكل،راك تحسابني بنت صغيرة ومش شايفة قدامي حاجة تي لا تكون غلطان انا شفت كل حاجة بس لأني بنت حلال ونحب نستر مدرتش فضيحة انا كنت نقدر نخش في وقتها نقلب الدنيا عليك وعليها بس هديت وقررت نسكت عشان منخربش فرحة وسام الي يستاهل كل خير والبنت صوفيا مقالتش حاجة بكل انت الي خاين طلعت،عماد خطاني ارجوك الله يلعن الساعة الي شفتك فيها والله يلعن اليوم الي جمعنا لازم تعرف اني حتى انا عمري ماحبيتك ولا حسيت معاك بشعور الحب لكن في نفس الوقت عمري مافكرت نخونك مع اني نقدر وبسهولة بكل نقدر نخونك بس انا وحدة متربية ونبي السترة ونبي نربي عيالي بس من يوم وغادي رد بالك لما نكونوا بروحنا تقرب مني ولا حتى تفكر تدوي معايا انا كرهتك بكل واقسم بالله الموت احسن من الحياة معاك واقسم بالله كل دقيقة معاك نقول يارب نموت منبش نشوفك كرهتك بكل خطاني خلاص تي انت الي تعيش معاك تبيلها الف دكتور نفسي مش وحدة بس
رشا قالت الكلام هذا ومشت بسرعة للدار وعماد كان متأثر بكل من كلامها وقمعز ساكت ومصدوم من كل كلمة قالتها رشا
عماد:عندك الحق يارشا عندك الحق في كل كلمة قلتيها انا منستاهلش وحدة كيفك بكل كل لما نحاول نصلح حياتنا نزيد نخربها بكل شن الي قاعد يصير معاك ياعماد خربت رسمي توا ومعش تصلح بكل
وسام رقد على السرير وكان قاعد محتار
وسام:نرن ولا منرنش شن ندير بس،تي نرن اكيد هذي خطيبتي رسمي توا خلاص
ورن وسام على ندى
ندى:ياربي الحمدالله ان جت منه هوا
وردت ندى
وسام:يااهلين
ندى:اهلين وسام
وسام:عندك العلم ان اليوم هذا حلمت بيه من اول يوم شفتك فيه
ندى:اها باهي باهي
وسام:ندوي معاك كنك
ندى:منش عارف شوية مرتبكة انا
وسام:باهي قوليلي عجبك الطاقم ولالا
ندى:يهبل ذوقك حلو بكل
مشا اليوم هذا عادي وكان الجو طبيعي مفش حاجة
وطلعت الشمس وجاء ثاني يوم.
عماد كان راقد على الكنبة في الصالة وفتح عيونه
عماد:بما ان مازال بدري نطلع احسن
طلع عماد لـ شغلة بدون مايشوف ولا مخلوق
مشا الوقت بسرعة لين تقريبآ جت ساعة 2
عماد كان يشتغل ويخشو عليه حالات وحالة بعد حالة
سراج خش للمستشفى وقعد يمشي لين خش على مكتب عماد0_0
الممرضة:تفضل يااستاذ
سراج:اها معلش نبي نخش على الدكتور ضروري
الممرضة:عندك حجز؟
سراج:اها امس كلمتك بالتليفون وحجزت
الممرضة:تمام مازال ربع ساعة بس على الموعد تفضل تريح
سراج:تمام حاضر
سراج كان يستنى يخش بفارغ الصبر وبعد شويا خش على عماد وقمعز قدام عماد
خلوني نقوللكم عماد من كثرت الناس الي يشوف فيهم في حياتة فـ هوا ناسي شكل سراج بكل لأن شايفة مرتين من قبل بس
عماد:اسمك سراج صاح،تمام تفضل ياسراج قولي شن فيك
سراج:معلش ح نقولك بس ياريت نكونوا بروحنا
عماد:تمام حقك هذا اطلعي برا شويا
الممرضة:حاضر
وطلعت الممرضة وصكرت الباب
عماد:وهذي طلعت الممرضة قولي ياسراج شن صايرلك مع انك شاب وحسيتك طبيعي
سراج:لا ماهو انا مش جاي نعالج0_0
عماد:كيف مفهمتش عليش جايني معناها
سراج:انا سراج حبيب زوجتك السابق ورشا اختارت يكون اسم ولدك على اسمي...............😳
عماد:.........................😳
سراج:...........................0_0يتبع الحلقة الثامنة والعشرين
مواجهة غريبة بكل بين سراج وعماد
ح نشوفوا في حلقة بكرا ردة فعل عماد شنو؟
الرواية قاربت على الانتهاء خلاص والحلقة ال30 ح تكون الحلقة الاخيرة