جريمة صوفيا ( روايات ليبية )

حلقة 13 🔥

رواية #جريمة_صوفيا 💔🔥
( خيال ممزوج بلواقع )
للكاتب : #إبراهيم_رشيد
الرواية بلهجة الليبية
حلقة  13🔥 " 

قراءة ممتعة
عماد:من الغباء متاعي نسيت المفتاح في المستشفى
وقعد يخبط على الباب
رشا:هيا هيا منو هذا كنها رودينة تخبط هكي
وفتحت رشا الباب وجت عينها في عين عماد
رشا:عماد
عماد:اها عماد
وخش عماد بسرعة وتجرأ لأول مرة شد رشا من شعرها بالقوة
رشا استغربت بكل وقبل ماتقول اي حرف
عماد:وين كنتي طالعة ياكذابة ياحقيرة0_0
رشا طبعآ انصدمت بكل بكل من تصرف عماد السريع هذا ومعش فهمت ولا حاجة
عماد مازال شاد شعرها بالقوة..
عماد:احكي وردي عليا وين كنتي اليوم
رشا:عماد نزل يدك ياعماد نزل يدك احسنلك
وفجأ رشا تفك روحها من يد عماد
ولأنها انقهرت بكل وهيا اصلآ حساسة نزلت دمعتها على طول 
رشا:جنيت انت ولا شن قصتك
عماد:تي انتي الي كذابة وتكذبي عليا وين كنتي جاوبيني ومتحاولش تكذبي عليا
رشا:كيف وفي شنو تحكي انت
كان الاثنين صوتهم عالي بكل بكل حتى لينا خافت وبدت تبكي على طول
رودينة:ياساتر هذوما كنهم ياماما
منال:الله اعلم يابنتي خليهم بلكي هكي مختلفين على حاجة
رودينة:ياربي شنو هذا تي بس صوتهم عالي بكل اول مرة هكي يصير
منال:راجل ومراته ويحلو مشاكلهم بروحهم خلاص يارودينة 
عماد:تكذبي عليا قلتي انك ماشية لمركز التجميل ومشيت غادي قالولي مفش حد بالاسم هذا،رنيت على فاطمة قالتلي انك مش ح اتلاقو بكل اليوم احكي قتلك وجاوبيني وين مشيتي خيرلك وعليش كذبتي عليا
رشا:فعلآ انا كذبت عليك لا صاح معاك تعال معايا
كانو الاثنين في مدخل الشقة
رشا:تعال قتلك الحقني
ومشا عماد وراها لعند الصالة وفجأ شاف صدمة حياتة
كانت طاولة وعليها تورتة ومكتوب عليها ( كل عام وانت زوجي ونور حياتي) وفي جنبها هدية سمحة ومغلفة تغليف سمح بكل
عماد على طول حط يدة على وجة
رشا:عرفت توا انا وين كنت؟اليوم عيد زواجنا وحضرتك ناسي بكل بكل فـ حبيت انا نطلع احسن منك ومنكونش حقيرة كيفك وناسية،لكن شكرآ واجد بكل ياعماد مكنتش متوقعه يجي يوم وادير هكي وتمشي وادور ورايا
عماد من وجة كان زعلان بكل وباين على وجة علامات الغباء
عماد حاول يقرب من رشا
عماد:رشا رشا
وفجأ رشا بأعلا صوت
رشا:متقولش رشا متحاولش تلمسني خيرلك
وفجأ تفقد اعصابها بكل بكل وتضرب الطاولة بيدها والطاولة اطيح وتخرب
رشا:شوف وهذي الهدية الي كنت جايبتها لكي اهو نبي نكسرها
وقعد عماد يشوف في رشا وهيا تكسر في كل شي وحاول يديها ولكن مفش فايدة
رشا:امشي معش نبيك تلمسني ولا حتى تجي شوري خليني في حالي خيرلك
عماد:رشا انا غلطان واقسم بالله سامحيني
رشا:اطلع من قدامي وانا توا الوقت ماشية لـ اهلي وتعال تفاهم مع باتي وقولة اني كنت شاك في بنتك
عماد:تي في شن تحكي انتي
رشا:هذا الي عندي خطاني ارجوك وحول من قدامي
عماد:تي باهي واقسم بالله لو اليوم طلعتي من الباب هذا معش تخشي منه بكل بكل
رشا:اوكي وعادي تمام
وطلع عماد بسرعة وكان متعصب من روحة ومن كل لقطة غبية دارها
نزل عماد وفتح باب حوش اهلة وخش على رودينة وامه منال
عماد:اسمعي ياامي ويا رودينة رشا تبي تمشي لـ اهلها وانا حلفت لو طلعت من الباب معش تردلي
منال:شن في بس عليش هذا كلة
عماد:الحق عليا انا ياريت تركبو تهدوها ومتخلوهش تمشي ياريت
رودينة:فهمني شن صار بس
عماد:هيا اكيد ح تحكيلكم كل شي ارجوك ياامي هيا تسمع في كلامك
وطلع عماد بسرعة وولع سيارتة ومشا
منال:تي شن في انا مافهمت منه شي
رودينة:تعالي بسرعة ياماما نركبو
وركبت رودينة ومعاها منال وشافو رشا في الصالة وتبكي وطبعآ شافو الدنيا كيف مقلوبة قدامها
رودينة:تي يارشا شنو صار
منال:خير يابنتي عليش تعاركتوا
رودينة:عماد قال ان هوا غلطان ارجوك فهمينا يارشا
رشا:عماد شك فيا يارودينة وكذبني
وطبعآ بأحتصار شديد حكتلهم كل شي صار
منال:غير وسعي بالك يابنتي بس عماد عليه ضغط هالايام صدقيني هوا طيب
رشا:انا مش زعلانة لأن ناسي يوم مهم كيف هذا بس الي قاهرني كيف يجي ورايا ومعندش فيا اي ثقة لا وخش من هنا شدني من شعري وقعد يعيط عليا
رودينة:والله عيب عليه باهي واقسم بالله انسان غبي بكل هذا
منال:رودينة قولي كلمة طيبة
رشا:لا خليه يقعد بروحة هنا انا نبي نمشي لحوش اهلي
منال:غير خليك يابنتي بس
رودينة:رشا هوا حلف فوتي مش وقت مشاكل
رشا:وخليه يحلف وين كرامتي انا بعد كل الي دارة معايا ونقعدلة اخرى
منال:يابنتي والله انتي معاكي حق بس
رشا:بس شنو ياعمتي ولدك هذا خلاص مش عارف شن في عقلة جن على الاخر
رودينة:بصراحا عماد غلطان بكل ويستاهل انك تسيبيلة الحوش بس عشان خاطري يارشا خليك اليوم وبكرا لو تبي امشي عشان خاطري
رشا:لالا مستحيل يارودينة خليه اليوم يقعد بروحة هنا انا الغلطانة اصلآ تعبت روحي وقدرته وجبتله هدية ودرتلة وتعبت لكن هوا ميستاهلش
منال:رشا عشان خاطري انا لو عندي شوية معزة عندك بالله عليك خليك اليوم عشاني
رشا:شانك كبير ياعمتي بس عماد تمادى واجد بكل
منال:هالمرة في وجي انا وعيب عليك ترديني
رودينة:صح عيب عليك تردي ماما وتقوليلها لا وهيا في عمر امك
رشا:ح نقعد عشانك ياعمتي بس والله لو شفت وجه اليوم ولا جاء للحوش مش عارفة شن ح ندير احتمال نقتل روحي
منال:لا مش ح يجي
رودينة:حتى انا متأكدة مش ح يجي
منال:رودينة نوضي نظفي الصالة ورشا تعالي معايا للدار ح نطبخلك شوية نعناع وتهدي
رودينة:باهي حاضر ياماما
عماد لما طلع كان يسوق بسرعة وحزين بكل بكل لين وقف السيارة وقعد يحكي بروحة
عماد:لا مستحيل تي كيف نسيت تاريخ اليوم انا؟كيف درت هكي ياعماد ياغبي تي كيف كيف كيف،كيف ح نحلها توا المشكلة هذي تي والله عيب عليا بس انا من يحس بيا بس من يحس بيا وهذا قاعد يضايق فيا كل شويا ويدز وخلاني نشك في رشا كيف ح تنحل القصة هذي توا والله عيب عليك ياعماد رشا متستاهلش هكي بكل
مشا الوقت وهدا شويا الوضع ونزلت منال وقعدت رودينة مع رشا
رشا:والله عمري ماتوقعت نكون سيئة في نظر عماد هكي معقولة يشك فيا انا
رودينة:تي اكيد لا بس هوا لما رن على فاطمة اكيد الشيطان لعب في عقلة
رشا:لو هوا فعلآ هكي مكانش ح يرد ويمشي لمركز التجميل
رودينة:تي المشكلة هوا غبي بكل بكل بكل لو شاف تاريخ اليوم وركز راهو انتهت القصة هذي
رشا:خايفة يجي معندش نيه نشوف وجة نهائيآ
رودينة:لا مستحيل ضروري يعني الاجواء هذينا توا والله مش ناقصنا نكد ومشاكل
قعد عماد زعلان بكل ومضايق ويلوم في روحة وخلاص
جت تقريبآ ساعة 2 في نص الليل وخش عماد للحوش
شاف سيارة رشا قاعدة
عماد:تمام معناها اكيد امي اقنتعها
وخش عماد لحوش اهلة ولقا الدنيا هدوء بكل والحوش ظلام
مشا لدار وسام وخش قمعز على السرير وحط تليفونة على الشحن
رودينة سمعت ان في حد خش وعرفت ان عماد ومشت على طول
عماد:رودينة شن صار وانا مش قاعد
رودينة:خربت الدنيا ياعماد بكل ورشا زعلانة بكل بكل
عماد:لا حول ولا قوة الا بالله وخلاص
رودينة:وقعدت عشان خاطر ماما وتعبنا عشان اقنعناها تقعد كيف هكي ياعماد عليش درت هكي
عماد:مش عارف شي يارودينة اطلعي خليني نرقد تعبان
رودينة:به اوكي طالعة بس لما تخرب الدنيا بكل متلومش حد لوم روحك
وطلعت رودينة.
عماد فتح الدولاب وخذا توته من لبس وسام ولبسها وطاح رقد
جاء ثاني وناضت رشا بدري زي ديما وفتحت الروشن
رشا:سيارتة قاعدة يعني اكيد جاء رقد تحت امس وانا مستحيل ننزل معندش نيه نشوف وجة بكل
عماد فتح عيونة وكأن حلم الي كان صاير معاه قعد شويا كم ثانية لين استوعب هوا ليش راقد هنا اصلآ؟
عماد:رودينة رودينة
رودينة:نعم
عماد:اركبي فوق هاتي اي لبسة كلاسكية بسرعة طولت على الجامعة
رودينة:به حاضر كنك على الصبح
طلع عماد للصالة وشاف امة
عماد:صباح الخير ياامي
منال:صباح النور ياحبيبي كنك مزعل رشا
عماد:والله ياامي غلطت وخلاص صار الي صار توا
منال:حرام باهي اليوم طيب خاطرها بكلمتين
عماد:حاضر بس ياريت متخليهش تمشي لـ اهلها
منال:هيا وعدتني ح تقعد،والله ياعماد رشا طيبة ومحترمة بكل وانا من اول ما اخترتها لكي كنت عارفتها هيا شنو وبنت منو لو لفيت العالم كلة مش ح تلقا زيها بنت كويسة بكل ومؤدبة
عماد:تي عارف ياامي وحتى انا معترف اني غلطت واليوم توا نجيبلها اي هدية ونمشيلها نفكر ناخذلها حاجة ذهب
منال:رد بالك ياعماد هيا هكي تحس روحها رخيصة وهكي خوذ حاجة بسيطة احسن
عماد:ماشي ياامي بس الفطور وين
رودينة ركبت فوق وفتحت رشا الباب وكان في يدها نسكافيه
رودينة:تي كنك منزلتش تحت معانا
رشا:لا وين ننزل وخوك هذا قاعد
رودينة:باهي يارشا يبي لبس الجامعة هوا
رشا:خشي جوا افتحي الدولاب ح تلقيهن وشوفي كيف انا نركبلة في لبس ومدلعته بس هوا حرام وخسارة فيه
رودينة:مفهمتش انا
رشا:خشي جوا ح تلقي اللبس جاهز كلة
لبس عماد وهكي وبعدين طلع ومشا للجامعة
بعد المحاضرة زي كل يوم مشا هوا وصوفيا للمستشفى
صوفيا:دكتور كنك اليوم مش على بعضك
عماد:والله شوية ظروف هكي
صوفيا:لأن غريب اليوم مخذيتش الوقت كلة وطلعتنا بدري
عماد:والله هكي ياصوفيا في خلاف بيني وبين مراتي ويستر الله
صوفيا:ان شاءالله ح ينحلن هيا الحياة الزوجية هكي اصلآ
عماد:ان شاءالله خير وخلاص واليوم ضغط وقصة وانا معندش راس بكل
صوفيا:لو تحب اليوم يكون مفش شغل عادي جدآ
عماد:لا وين خلاص مش ديما هيا الواحد لازم يشتغل غصبآ عنا ياصوفيا مرة مرة
صوفيا:بس انت اليوم مش مركز بكل
عماد:عادي كلة ينحل
صوفيا:واليوم في عملية يادكتور
عماد:اوووو باهي باهي خلي اول حاجة تجي بس
وبدا عماد يشتغل وطبعآ بحزن شديد بكل بكل بكل
رشا كانت في الحوش وبدون مبالغة معندهش نيه في ولا اي حاجة
فتحت تليفونها ورنت على فاطمة
رشا:الو فاطمة
فاطمة:اهلين رشا وينك
رشا:فطوم انا اليوم منقدرش نجي بكل بكل
فاطمة:ليش خير صاير معاك حاجة
رشا:والله هكي تعبانة ومعندش نيه لشي بكل
فاطمة:عليش يارشا
رشا:هكي شوية مشاكل بيني وبين عماد
فاطمة:احكيلي باهي
وحكتلها رشا كل حاجة صارت وصكرت الخط
فاطمة على طول رنت على عماد
عماد:الو فاطمة
فاطمة:كنك ياراجل هكي انت عيب عليك وحرام الي درته تي وانا نقول ليش كلمتني ياريت رشا قالتلي دايرتلك مفاجأ بس
عماد:فاطمة انا توا قدامي حالة مش فاضي
فاطمة:باهي امتى نتلاقو
عماد:مش فاضي بكل وعندي عملية
فاطمة:مدخلنش بيك اليوم ساعة 9 تجي قدام الاذاعة توا نحكي معاك
عماد:ساهل ساهل ح نشوف
فاطمة:مش ح نشوف ح تجي ضروري ياعماد
عماد:باهي اوكي
وصكرو الخط.
باقي اليوم مشا عادي بكل رشا مطلعتش من الحوش بكل وجاء الليل وكانت رودينة معاها
رودينة:شفتي مالك اليوم قال جاي الخميس الجاي مروح
رشا:باهي كويس بكل امتى قالها
رودينة:دزها في المجموعة متاعنا ع الواتساب
رشا:منش عارفة انا اليوم درت كتم على الواتس بكل كملتها يوتيوب وخلاص درت كتم لكل حاجة وبعدين المجموعة فيها عماد معندش نيه نرد فيها ح نكتبله ع الخاص
رودينة:تي لعند امتى ح تهربي من عماد يعني وبعدين هوا مسكين ديما مش فاضي بكل حتى بعد يدز يسجل فويس
رشا:رودينة متحاولش ادافعي عليه لأني بجد مش طايقة نشوفة بكل
رودينة:المهم توا بالله حلو مشكلتكم الخميس ح يجي مالك و ح يرد وسام عنده عطلة واخيرآ يارب ح نكونوا كاملين كلنا مفش حد ناقص بس ياريت ياريت تكملوها انتو وتحلو القصة
رشا:إن شاءالله يادونا
طلع عماد من المستشفى ومشا لفاطمة قدام الاذاعة
عماد:هيا اطلعي قاعد برا
فاطمة:تعال انت
عماد:معندش نيه ومعندش نيه نشوف حد نعرفة فوق
فاطمة:باهي هيا نازلة
ونزلت فاطمة وركبت جنب عماد في السيارة
فاطمة:معقولة الي درتة هكي ياعماد عيب عليك والله
عماد:يافاطمة عاد انا شن ندير حطي روحك مكاني
فاطمة:منحطش روحي مكان تي انا قاعدة نبني وانت تهدم
عماد:مش هكي بس انا غلطت واي بني ادم يغلط
فاطمة:باهي توا شن ح يصير اليوم رشا كلمتني واعتذرت انها تجي بكل للجلسة
عماد:منش عارف توا ح نروح ونحاول معاها وخلاص
فاطمة:وانت اصلآ معقولة ياعماد تنسى اليوم هذا
عماد:اول مرة نديرها يافاطمة والله انا من يحس بيا
فاطمة:كنك احكي
عماد:فاطمة انا طول عمري ندير في حاجات غصبآ عني ومفش حد عمرة حس بيا انا من الاخير رشا منحبهش ولا نحس في اي مشاعر تجاهة كل شي ندير فيه من برا قلبي
فاطمة:عارفة الكلام هذا انا بس صدقني رشا ام عيالك مهما صار بيناتكم ح تقعد هكي وبعدين ياعماد انت الكبير وانت الي لازم اتحمل وانت توا اب ومسؤول قدام ربي على عائلتك حرام هكي
عماد:باهي باهي ساهل ح نكمل حياتي ندير في كل حاجة بالغصب وخلاص
فاطمة:تي انت قاعد تحكي وكأن عمرك 18 سنة عماد اوعى شويا خلاص نحنا خشينا للثلاثين
عماد:تمام يافاطمة ان شاءالله خير
فاطمة:وحاول تراضيها رشا حرام هكي
عماد:هوا هكي ح نروح توا نتفاهم معاها قوليلي انتي شن جو مراد
فاطمة:كويس اهو قاعد من الشغل شبه منشوفش فيه الا كم ساعة بس
عماد:امالا شن نقول على روحي انا
فاطمة:الله غالب العمر يكمل والشغل ميكملش
عماد:خلاص انزلي توا حظري الحلقة
فاطمة:تمام بس توعدني تروح لـ رشا طول
عماد:لا هذي اكيد
نزلت فاطمة وعماد كان يدز في مسجات صوت لمالك
عماد:تي باهي قصدي كيف هذي عليش متبش حد يجيك في المطار
مالك:معايا واحد صاحبي وهوا ح يوصلني استنوني في الحوش انتو بس
عماد:تمام باهي يعني ساعة كم تكون هنا
مالك:بالكثير بكل ساعة 6 الليل نخش عليكم في الحوش
عماد:تمام معناها انا مش ح نكمل الدوام عشان حضرت جنابك
مالك:باهي ووسام امتى ح يجي
عماد:حتى هوا ح يطلع يومين اجازة يعني الخميس يكون معانا ان شاءالله
مالك:تم وعندي لكم مفاجأ كلكم
طلع عماد وخذا شوية ورد لـ رشا وروح للحوش وجاء جنبها
عماد:شوفي انا ممكن نكون غلطت بس اي راجل في مكاني كان ح يدير هكي يعني حد طلعت مراتة ومش عارف هيا وين قاعدة توا والله ممكن يخرب الدنيا كلها حطي روحك مكاني يارشا والله انا غلطت صاح بس ضغط الشغل وحياة متعبة بكل بكل نسيت حتى عيد زواجنا من الشغل وعمليات ويومي كلة في المسشتفى والله مسؤولية كبيرة عليا ارجوك كوني معايا متكونش ضدي
بأختصار شديد تراضو وكلة تمام بس طبعآ هذا موقف مستحيل رشا تنساه بسهولة
مشن الايام بسرعة لين جاء اليوم الي كان ح يجي فيه وسام ومالك ويتجمع الكل من جديد
جاء وسام الاول وطبعآ الكل كان قاعد جنبة ومشتاقلة بكل بكل
رودينة:عيني عليك ياخويا قعدت اسمر خلاص
عماد:كنك انسمرت صاح
وسام:ماهو القصة كلها في الشمس اصلآ،اووو ياامي ريحة الاكل لعند هنا رايفت عليه بكل
عماد:اليوم امك منال العالم جديات انت جيت ومالك جاي فـ اليوم مدلعتنا
رشا:لا ياعماد والله عمتي ديما فنانة
منال:تعالن معايا يابنات نحطو الغداء معناها
ومشو كلهم وقعد وسام ماسك لينا ومعاه عماد بس
وسام:ياحبيبة عمو،عماد قولي مالك كيف حالة
عماد:كويس بس خوك هذا هبلني ياراجل يصرف في فلوس واجد
وسام:ليش حولتله فلوس اخرى انت؟
عماد:اكيد ليا فترة محولتلش
وسام:كيف هذي انا من فترة بسيطة كلمني يبي 1500 يورو ودزيتله
عماد:كيف هذي0_0ياراجل من الاخير العيل هذا شاك فيه متزوج
وسام:ههههه حتى انا شكلة هكي
مشا الوقت بسرعة لين جت حوالي ساعة 8 الليل وكان الكل قاعد ويستنا في مالك
وفجأ رن الجرس وفتحت رودينة الباب بسرعة بس مرة وحدة خشت ووراها مالك وكانت مش فرحانة بكل0_0
كان اول ظهور لمالك.
مالك خش قدام الجميع وكانوا كلهم مصدومين لأن كان في يدة بنت صغيرة حوالي عمرها 8 شهور
الكل كان مصدوم ويشوف للبنت ومالك فقط
مالك:نقدملكم هذي تكون بنتي0_0
عماد:....................😳
وسام:....................😳
الباقي:......................0_0يتبع الحلقة الرابعة عشر
الحلقات الجاية ح تبدا الرواية في الاحداث المتسارعة✅وفي احداث جديدة وشخصيات جديدة🔥