جريمة صوفيا ( روايات ليبية )

حلقة 24 🔥

رواية #جريمة_صوفيا 💔🔥
( خيال ممزوج بلواقع )
للكاتب : #إبراهيم_رشيد
الرواية بلهجة الليبية
حلقة  24🔥 " 

قراءة ممتعة
صوفيا:لا اطمن توا ح نوقف تاكسي ونجيك استناني غادي
صوفيا وقفت تاكسي ومشا التاكسي ووقف وين ماتبي صوفيا0_0
نزلت صوفيا وكانت تمشي وكانت خاشة لمكان هكي مهجور0_0
كأن مدرسة قديمة او مصنع قديم الخلاصة مكان مش مفهوم الا ان قديم بكل
خشت صوفيا وكانت تمشي وفجأ فتحت الباب0_0
صوفيا ابتسمت وقالت
صوفيا:ليا تقريبآ 4 شهور مشفتكش.....................
وفجأ الراجل يبرم وجة ويطلع سراج0_0
سراج:صوفيا يااهلين شرفتي وانستني
صوفيا:ليا زمان ماشفتك من اول مابدت الخطة
وقمعزت صوفيا قدامة
في المشهد هذا ح تعرفوا كل شي من البداية للنهاية
سراج:الله يسامحك ياصوفيا خربتي كل شي
صوفيا:انا الي عندي قلته ياسراج من اول تلاقينا فيه قتلك لو تبي تحط يدك في يدي اهلين بس انا بصراحة لا نبي قتل ولا نبي ظلم
سراج:تي كيف معلش هذي انتي عارفة ان الباشا الكبير زعلان منك واجد بعد الي صار
صوفيا:شوف رد بالك انا منتهددش ياسراج انت والباشا متاعك هذا عارفين صوفيا من وبنت من تكون
سراج:مفش حد هددك ياصوفيا متغيرش الكلام توا
صوفيا:لا هذا تهديد واسلوبك معايا مكانش عاجبني بكل في التليفون
سراج:انتي خربتي كل شي لما الشرطة خذت عماد انتي ليش مشيتي للمركز اصلآ بصراحة ياصوفيا انا بديت نفقد الثقة فيك
صوفيا:شوف هوا طلبني لأني انا المساعدة متاعة فهمت وضروري نجي هذا شغلي
سراج:اها وطاح في يدك الابتوب ورديتي بيانات الناس كيف ماكانن
صوفيا:مش فاهمة انا تي بجد انتو ناس بلا رحمة ولا ضمير انا لو مرديتش شي كان عماد ح يوصف ادوية غلط لناس واجد وكان ح يريحو فيها زي الطفل عبد الرحمن
سراج:واخرتها شنو توا عماد مازال من افضل الدكاترة نحنا اتفاقنا من حاجة وحدة بس،تحولي عماد من دكتور محترم لشخص مجرم وتخربي العائلة هذي بكل
صوفيا:ومازلت نبي نديرها هذي بس ميكونش ثمنها حياة الناس
سراج:باهي وقصة رشا معلش ليش درتي هكي
صوفيا:انت توا قلتها بـ لسانك اتفاقنا كان عماد واهلة وبس رشا وعيالها ملهمش اي ذنب ولو انت خاش في القصة هذي وتبي رشا فـ اطمن لو فيها نصيب ح تردلك
سراج:تغيرتي واجد ياصوفيا ردي بالك تكوني بديتي تحبي عماد
صوفيا:تي حب شنو معلش انا وجه حب اصلآ انا انكتب عليا نعيش طول عمري هكي ونعيش عشان نرد حقي وبس
سراج:حقك مش ح يرد هكي ياصوفيا كل لما نحاولوا نقدموا خطوة قدام تخربي كل شي وادمري كل شي
صوفيا:اطمن ح نلقا ثغرة الايام الجاية ونبدا نخش منها
سراج:حاب نقولك ان الباشا الكبير زعلان واجد
صوفيا:شوف انا قتلك ميهمنش حد انتو عارفين انا منو بالضبط وشن ممكن ندير في لحظة ح نخرب كل شي
سراج:نفهم منك ان هذا تهديد
صوفيا:لا تهديد ولا شي بس انا جاية نبي نرد حقي من العائلة هذي جيت انت ومعاك الثاني هذكي تبو تخربولي كل شي تي انا مش مجرمة افهموا مش جاية نقتل
سراج:صوفيا نحنا الاربعة اتفقنا على هكي من الاول فاهمة ولا نحنا الاربعة عندنا مصلحة
صوفيا:انت المفروض توعى لنفسك عيب عليك هكي وحدة متزوجة تي انساها خلاص وشوف حياتك عيب عليك هكي والله عيب البنت كنت ح تسببلها مشكلة طويلة عريضة تي اين حب هذا شوهت سمعتها قدام الناس وكرامتها خربتها بكل
سراج:البركة فيك انتي رديتي كرامتها كلها
صوفيا:الخلاصة توا انتو الثلاثة متهمونش ابدآ وحقي ح ناخذة بالطريقة الي تعجبني انا ولو انتو ناس متاعين قتل وتخريب فـ انا مش ح نقدر نساعدكم
سراج:اوكي ياصوفيا ح نصبروا عليك بس لازم تعرفي ان معش عندك وقت
صوفيا:نرد ونقولك من اول يوم قلت انا منبش نقتل ولا نبي ناس بريئة تخش في القصة وانت قول الحمدالله لأنك طلعت من وسام هذا واحد مجنون والي يقرب من اهلة يقتله
سراج:وسام هذا ح نعرف كيف نتفاهم معاه بعدين وحسابة ح يكون عسير بكل
صوفيا:رد بالك ياسراج قصدكم تبو تقتلوه0_0
سراج:اها الباشا ناوي ان يدمرة بكل ح نحرق قلب امه عليه التافه هذا نافخ صدرة على الفاضي
صوفيا:تي لالا بس والله فكنا من القتل ياراجل مش هكي
سراج:انتي هذي حاجة متخصكش بكل وردي بالك تدخلي في شي ميعنكش ابدآ
صوفيا:تي بس هذا شاب صغير حرام مش هكي
سراج:صوفيا انا خلاص منك تي شن صايرلك المفروض اصلآ تكوني فرحانة لما حد يموت من العائلة هذي والمفروض اصلآ انتي تقتلي امهم بكل بما انها ح تكون بين يديك
صوفيا:شن تقصد بكلامك
سراج:نقصد تعطيها دواء بزيادة او هكي
صوفيا:ياحقير انت جنيت تبيني نقتلها امهم كبيرة وملهش اي ذنب بشي
سراج:والله انا ميهمنش بينك وبينها بس ردي بالك تنسي ياصوفيا حاجة ردي بالك تنسي كيف باتك مات قدام عيونك وانتي صغيرة وعمرك 12 سنة وامك الي ماتت بحسرتها ومن يومها قعدتي وحيدة
كان سراج يحكي وصوفيا انهارت بكل بكل من كلامة وبدت تذكر في كل شي وتبكي
صوفيا:اسكت اسكت خلاص
سراج:باتك الي قتلة اب عماد ووسام ومالك ورودينة ويكون زوج منال الي انتي توا ادافعي عليها لازم تعرفي ان حقك ح يردلك وباتك ح يكون مبسوط منك واجد بكل حتى وهوا في قبرة
صوفيا:حق بابا ح يرد
سراج:صوفيا انا منكتش حاب نزعلك بس انا اجبرتيني نحكي الكلام هذا نسيتي ياصوفيا كيف تعذبتي وقريتي طب مخصوص عشان تخشي في عماد وتاخذي حقك واليوم وصلتي لعند انك تبي تعيشي معاهم وقررتي تنسي حق باتك،المستشفى متاعهم الي توا كبيرة واكبر مستشفى خاصة في البلاد هذي من حق باتك وهما سرقوها منك 
صوفيا:مش ناسية وقريب بكل ح تسمع اخبار يفرحنك تي انا ح ناخذ حقي
سراج:نستنوا فيك وردي بالك بس حد يمسكك متلبسة في الحوش
صوفيا:لالا بس خلينا رسائل ياريت
سراج:تمام وقريب بكل ح نتجمعوا نحنا الاربعة على نفس الطاولة هذي 
صوفيا:دير موعد وانا ح نجي
سراج:موفقة ياصوفيا في مشوارك القادم
طلعت صوفيا وكانت تمشي في الشارع والدنيا كانت مطر على راسها
صوفيا تمشي بسرعة وتبكي وتذكر في كل شي صار معاها
صوفيا:وين ماشية ياصوفيا ووين ح تاخذك الدنيا،هذوما يبوني نكون مجرمة عشان يجي وقت و يتخلوا عليا كلهم ونمشي انا في ستين الف داهية،لا ياصوفيا ردي بالك تضعفي ياصوفيا
نمشو مع بعضنا لـ وسام ومحمود
محمود:باهي الف الحمدالله على سلامتها ياوسام
وسام:الله يسلمك
محمود:عشان هكي اليوم ياوسام امتى ماتبي تطلع اطلع ح نعذرك عشان الست الوالدة ووصللها سلامي واجد وربي يشفيها لكم
وسام:مشكور واجد وبارك الله فيك
محمود:تمام وسام تقدر اتفضل لـ مكتبك توا
وسام:تمام
بعد كم ساعة هكي جاء وسام وعماد للمستشفى
كانوا الكل مع امهم في الغرفة
رودينة:بس ياماما مش هكي انتي فاهمة غلط
منال:لا عاد انا مازلت ماكبرت عشان تجيبولي خدامة مازلت مش عاجزة
عماد:ياامي افهمي ياامي مش هكي الموضوع بكل
وسام:تي انتي مازلتي صغيرة واحلا اميرة في الدنيا
عماد:افهميني بس هذا ح تكون معاك وترعاك طبيآ الفترة الجاية و ح تبدا اديرلك علاج طبيعي وهكي ليديك ورجليك وهيا فاهمة شغلها كويس ياامي
مالك:يعني هذا كلة عشان تردي زي الاول
منال:باهي كان هكي ديروا الي تشوفوه مناسب،عماد امتى ح تمشي ترد رشا
عماد:توا الوقت انتو ح تمشوا للحوش وانا ووسام ح نمشوا ويجي الشيخ غادي ونردوها
منال:باهي كويس المهم ياعماد انت البنت الي جايبها في الحوش واثق فيها يعني انها متمدش يدها وهكي على حاجة
عماد:لا مستحيل على ضمانتي انا ياامي،مالك فهمتك كل شي ولما تمشي للحوش كيف تحط وترقد امك على السرير
مالك:لا تمام فهمت
منال:بس انا مش متريحة ياعماد بكل هكي
عماد:ليش ياامي
منال:سيبوني مع عماد شويا
وطلعوا كلهم
عماد:نعم ياامي انتي تأمري كنك
منال:شوف الحوش عايشين فيه اثنين شباب وهذا بنت شابة وانا مش ح نتريح هكي
عماد:باهي شن ندير ياامي
منال:يعني وقت النوم مالك ووسام يركبو يرقدوا فوق في شقة وسام فهمتني
عماد:باهي ساهلة هذي عادي لو انتي متريحة هكي حاضر
منال:هكي تمام ياعماد
وطلع عماد.
مالك:خير امك شن كانت تبي
عماد حكالهم كل شي
وسام:بصراحة معاها حق
مالك:تي معاها حق في شنو بس
عماد:خلاص انتو الاثنين ح ترقدوا فوق شن فيها من موضوع يعني
وسام:معناها هيا نحنا ياعماد
وطلعوا عماد ووسام ووصلوا لعند حوش اهل رشا......
حسن:يا عماد توا الي صار صار بس مرة ثانية ياريت اتحكم عقلك وتراجع حساباتك من جديد
عماد:ان شاءالله ياعمي انا والله غلطت ومنك السماح
وسام:عماد مش ح يكرر غلطة ياعمي
حسن:عيب ياعماد انتو في بيناتكم عيال الكلمة هذي مش ساهلة وياريت الي صار اتعلم منه وحاجة ثانية ضروري تعرف من وراها القصة هذي
عماد:ان شاءالله في اقرب وقت ح نعرف من
وفجأ رن جرس الحوش
حسن:هذا اكيد الشيخ ح نصبي نفتح
وسام:لا خليك ياعمي ح نفتح انا
وفتح وسام الباب وخش الشيخ وهكي وكملو كل شي وردت رشا لـ عماد من جديد
الشيخ:الله يرضى عليك ياابني مرة ثانية استغفر الله وتعوذ من الشيطان الف مرة قبل وانا نستأذن منكم توا
حسن:وين ياشيخنا خليك
الشيخ:بارك الله فيك عندي فاتحة تأخرت عليها
عماد:ماشي تمام وسام اطلع مع الشيخ وراضيه
وسام:حاضر تفضل ياشيخ
بأختصار شديد ردت رشا للحوش وكانت مع منال
رشا:وحدة تجيك للحوش هنا تي وليش نحنا وين قاعدين ياعمتي
مالك:يارشا مش هكي بس امي ضروري حد يرعاها طبيآ الفترة الجاية
رودينة:والي جاية البنت هذكي شن كان اسمها هيا اها صوفيا
رشا:صوفيا0_0تحكي جديات انتي
رودينة:والله هكي قال عماد 
رشا:يستر الله وخلاص
منال:المهم يارشا انتي وعماد معش نبو مشاكل ياريت الي صار تنسوه تمام
رشا:حاضر ياعمتي
عماد كان يسوق وماشي لـ صوفيا
عماد:انا قاعد برا ياصوفيا اطلعي
طلعت صوفيا وفي يدها شنطة وركبت مع عماد
عماد:صوفيا نبي نقولك انتي عارفة الحوش في اثنين من خوتي وحاب نبلغك انهم مش ح يرقدوا في الحوش بكل ح يمشو فوق لشقة وسام
صوفيا:والله بجد خايفة نضايقكم
عماد:تي لا عيب عليك
جت اللحظة الحاسمة الي هيا صوفيا ح تخش قدام الجميع للحوش0_0
خليني نشرحلكم المشهد بدقة شويا
كانت رشا مقمعزة جنب منال ورودينة جنب رشا ومالك ووسام قريب منهم
سراج كان عند وسام ولينا تلعب في الارض بالالعاب
عماد خش ووراه صوفيا
عماد:خشي ياصوفيا تفضلي
وخشت صوفيا وجت عينها في عين الجميع0_0
صوفيا:السلام عليكم
منال:وعليكم السلام يابنتي خشي تفضلي
وسلمت صوفيا على الجميع.
يعني سبحان الله جاء شعور داخل صوفيا غريب بكل كيف اطور الموضوع هكي بسرعة بكل كانت صوفيا مجرد طالبة عند عماد وبعدين اشتغلت معاه في المستشفى وبعدين جت و حـ تعيش معاهم في الحوش
مشا باقي الوقت عادي.
وسام رد للشغل وكمل اليوم كلة يشتغل
صوفيا كانت جنب منال على السرير وكانت تحكي معاها
منال:مشاءالله عليك يابنتي واضح انك شاطرة
صوفيا:شكرآ ياعمتي منال انتي قوليلي متريحة هكي ولا
منال:متريحة
صوفيا:توا جاء وقت الدواء
(في المطبخ)
مالك:تي كنك يارشا قالبة وجك هكي
رودينة:الاخت مش متقبلة ان البنت هذي تجي للحوش
مالك:لو انتي تغاري على راجلك يابنتي متخافش انتي احلا منها بمليون مرة
رشاك:اسكت غيرة شنو هذي
رودينة:هكي تمام يامالك توا تطلع وتجيب كل شي مكتوب في الورقة هذي بكرا ح يبدوا يجو الضيوف
مالك:تي اها صاح يارا وامها جايين بكرا نبي كل حاجة 5 نجوم
رشا:ههههه ياعيني نحنا ديما حاجتنا خمس نجوم سوا جت يارا ولا غيرها
رودينة:هيا بسرعة اطلع بس را يصكر المحل
مالك:باهي وهيا كل شي جاء على مالك هوا
حوالي جت ساعة 12
رشا خشت للدار وشافت منال وجنبها صوفيا
رشا:عمتي منال تصبحي على خير انا راكبة فوق
منال:قدامك كل خير
استغربت صوفيا بكل من تصرف رشا لأنها من اول ماجت الاثنين مقالنش لـ بعضهن ولا اي حرف
منال:وانتي يابنتي امشي لدارك ارقدي خلاص تعبتي معايا واجد اليوم
صوفيا:لا ابدآ هذا شغلي انا
منال:رودينة رودينة
وجت رودينة
رودينة:نعم ياماما
منال:خوذي صوفيا لغرفتها الباين انها متحشمة
رودينة:هيا تعالي معايا
ومشت صوفيا مع رودينة
رودينة:نبيك اتصرفي طبيعي ياصوفيا كأنك في حوشك باهي اطلعي للمطبخ وهكي وعادي مالك ووسام مش ح يجو بكل
صوفيا:حاضر وشكرآ واجد لكي
رودينة:العفو تصبحي على خير حبيبتي
صوفيا:قدامك الف خير
عماد وصل للحوش وخش شاف رشا
عماد:انستي حوشك من جديد
رشا:عماد لازم تعرف اني منسيتش ولا اي شي من الي ولا نسيت الاسلوب الي كلمتني بيه يومها انا ربس يشهد عليا اني رديت عشان عمتي منال وبس اما انت ف معندش نيه نشوفك ابدآ ولا نحط عيني في عينك
عماد:حقك يارشا وانتي معاك حق انا مش ح نقرب منك ابدآ خليك على راحتك
رشا:وحاجة انا سكتت ومحكيتش كلمة ليش اخترت صوفيا بالمخصوص معلش؟
عماد:بنت شاطرة معلش ومش ح نلقا احسن منها بكل يراعي امي
رشا:انت مش ملاحظ ان من اول ماخشت لحياتنا كل شي تغير وبدن المشاكل البنت هذي مش تمام
عماد:شن تقولي انتي باهي عارفة ان هيا الي جابت دليل برائتك؟وهيا الي طلعتنا من المشكلة هذي
رشا:صوفيا0_0في شن تقول انت
عماد:زي ماسمعتي
رشا:وكيف هذي
عماد:انا في يوم جت خذتني الشرطة مش عارف هل سمعتي عليه او لا
رشا:اها قالتلي رودينة
عماد:............وحكالها عماد كل شي
عماد:وهذي هيا القصة كلها يارشا تمام
رشا كانت مصدومة من تصرف صوفيا
طول الليل رشا كانت تفكر وخلاص
رشا:حيرتني البنت هذي مش فاهمة هيا ليش كويسة هكي طلعت،بس واقسم بالله انا مازالت ماخشت راسي بكل بكل لكن بجد بارك الله فيها
مالك ووسام.
وسام كان راقد وخش عليه مالك
مالك:ياراجل شنو الشقة المرعبة هذي انا خايف
وسام:اطلع برا خليني نرقد
مالك:كيف قولي حاطلي كنبة برا وتقولي ارقد بعدين صقع بكل والشقة فاضية
وسام:بكرا عماد ح يصرف اطلع توا بس يامالك نبي نرقد افهم
مالك:ليلة سودة شكلها هيا كان لازم تجي البنت الي اسمها صوفيا هذي اصلآ
جاء ثاني يوم وكان الوضع طبيعي وعادي بكل
وسام طلع بدري من الصبح ومشافش ولا اي حد
كانوا الجميع على سفرة الفطور بأستثناء صوفيا
رودينة:صوفيا وين ياماما
منال:منش عارفة شكلها هكي خجولة مازالت شويا
رودينة:ح نمشي نكلمها
رشا:لا استني ح نمشي انا خليك
ناضت رشا من السفرة ومشت لعند الغرفة الي فيها صوفيا وخبطت على الباب
صوفيا:تفضل
وخشت رشا
رشا:صباح الخير
صوفيا:صباح النور
رشا:تعالي الفطور جاهز
صوفيا:لا منبش نزعجكم
رشا:تعالي بس مفش ازعاج
صوفيا:تي لا........
رشا:عمتي قالت ضروري صوفيا تجي هيا عاد متزعليهش
مشت صوفيا مع رشا وكانت مستغربة من تصرف رشا بكل
المهم بعد شويا عماد طلع.
منال:خلي من يدك يابنتي البنات ح يلمن السفرة
صوفيا:لا عادي نساعدهن صوفيا
صوفيا ورشا ورودينة كانن في المطبخ.
رشا:تعرفي يادونا هذا صوت سراج يبكي فوق
رودينة:خليك انتي انا ح نمشي نجيبة
رشا:باهي غطيه كويس بس
ومشت رودينة
رشا:صوفيا انا حابة نشكرك واجد
صوفيا:على شنو
رشا:عماد حكالي على كل شي وانا اسفة واجد لو كنت ثقيلة معاك
صوفيا:لا ولا يهمك بس انا الي درتة كان واجبي والله فتحت التليفون بس عشان كنت ان حاسة في حاجة غلط في الموضوع
رشا:بارك الله فيك انتي صاحبة الفضل كلة
صوفيا:لا والله متقولش هكي،العسل هذي بنتك صاح
رشا:اها بنتي تعالي لينو هذي صوفيا
لينا:الاا
رشا:هيا مستغربة بس شويا و تبدا تاخذ عليك
صوفيا:تعالي يالينا تعالي
رشا:كم يوم بس واتغير معاك
وسام مشا للشغل وعماد حتى هوا على المستشفى طول اما مالك كان في سابع نومة
وسام:شنو الملل هذا انا نبي نمشي لـ ضروري
وطلع ووسام ومشا لعند مكان مكتب ندى
خش وشاف مشهد هكي اضايق منه
كان نبيل قاعد مع ندى ويضحكوا ويبصروا وهكي
ندى:اهلين وسام
نبيل:وسام خيرات
وسام:شكلي جيت في وقت مش مناسب
ندى:لا تفضل تعال،بس انتو تعرفوا بعض0_0
نبيل:يااهلآ وسهلآ وسام،اها كان معايا زمان في الكلية
وسام:نبيل كيف حالك
نبيل:الحمدالله،تي قولي لكن عمي غريب من النادر ماتعجبة حاجة ليش اختارك انت بالذات
ندى:ههههه بصراحة نبيل يقصد ان بابا مستحيل يحط حد في المكان الي انت فيه توا
وسام:والله هوا الي ردني للكلية وهوا صاحب الفضل في كل حاجة
نبيل:باهي انا نسيبكم توا بروحكم ونستأذن
ندى:اقعد يانبيل كم القهوة
نبيل:لا يابنت عمي انا نبي نطلع ضروري توا ههههه توا نتلاقو في الحوش وتكملي القصة وسام يازعيم نشوفك على خير
وسام طبعآ كان جاف شويا مع نبيل لأن قال لمحمود كل شي يوم ما الشرطة مسكت عماد
ندى:شن تشرب ياوسام
وسام:لا بصراحة انا شارب بس جاي ناخذ الفاتورة ونبي ندفعها توا لأني مستعجل شويا
ندى:عيب خلي علينا المرة هذي
وسام:لالا وياريت بس فاطمة لما تسألك متقولش حاجة
ندى:باهي بس كيف ح نجاوب لما تسألي
وسام:قولي اي حاجة بس المهم متعرفش
ندى:ولا يهمك الموضوع عندي،الحسابات والفاتورة ح تلقاها عند رانيا برا يارانيا اهتمي بالاستاذ وسام
وسام:شكرآ لكي ونشوفك على خير
ندى:يارب موفق وسام
وطلع وسام ومشا لـ مكتب رانيا
رانيا:اهلين تفضل وقع هنا وهذي القيمة
وسام كان يوقع وبعدين طلع الفلوس ولكن فجأ رانيا تقولة حاجة
رانيا:متخافش راهو نبيل يكون ولد عمها بس وكانوا مخطوبين بس توا انفصلوا وحاليآ هما كيف الخوت
وسام بنظرة غريبة وكلها تقزز هكي
وسام:منو انتي عشان تقوليلي هكي اصلآ؟خليك في شغلك
وحط وسام الفلوس بالقوة وطلع
رانيا:هههههههاي والله معجب بيها هي
وسام طلع وكان زعلان بكل
خليني نقوللكم شخصية وسام عمرة ماحس بالحب ولا فكر في الحاجة هذي بس ممكن بعد شاف ندى تغيرت نظرتة بكل
وسام:عليش مفهمتش حاجة ليش البنت هذي قالت ممكن كان باين عليا معجب بـ ندى بس كيف ياوسام كانت مخطوبة من نبيل وهوا ولد عمها وحاليآ يبصروا وامورهم تمام معش فهمت شي انا بكل
عماد كان في المستشفى وخذا ريست بسيط وطلع يشرب في قهوة
عماد:الو يامالك
مالك:نعم ياعماد
عماد:مازلت راقد قصدك
مالك:اها راقد
عماد:نوض بسرعة في عمال جايين ح يجيبو شوية حاجات لشقة وسام
مالك:باهي ياعماد
عماد:والله غير نروح حـ نهزبك وانزل شوف هلك تحت بلكي يبو حاجة
مالك:باهي ياعماد تم خلاص صكر
وصكروا الخط.
اليوم هذا مشا كلة عادي مفش حاجة جديدة اليوم كان شوية زحمة وهكي لين جاء الليل والكل كان راقد
صوفيا طول اليوم كانت تحكي مع سراج رسائل فقط
منال:ساعة 1 يابنتي امشي ارقدي خلاص
صوفيا:لا ياعمتي منال ساعة 2 عندك دواء انتي وضروري نعطيه لكي
منال:باهي يابنتي تريحي شويا
صوفيا:لا انا تمام تريحي انتي ولو خذتني غفوة معدلة المنبه
مشت تقريبآ نص ساعة هكي وصوفيا كانت راقدة جنبها بس وهيا مقمعزة
وفجأ تليفون صوفيا يرن0_0 بس كان صامت ووضع هزاز
صوفيا فتحت عيونها على طول وشافت اسم سراج
صوفيا طلعت برا بسرعة بكل
منال هكي فتحت عيونها وحست بشي غريب وشافت صوفيا طلعت من الدار
صوفيا:ياربي الزفت هذا عليش نر عليا توا
فتحت صوفيا الباب بصوت بهدوء وطلعت برا للجنان
وردت على سراج
صوفيا:الو يازفت انت عليش رنيت عليا
سراج:ياصوفيا مكالمة مهمة بكل
صوفيا:احكي بسرعة
سراج:في خزنة في شقة عماد ضروري تعرفي كم الرقم متاعها نبو نفتحوها ضروري
صوفيا:جنيت انت تبيني نسرق مثلآ
سراج:مش فلوس ياصوفيا فيها كم حاجة مهمة ونبوها
صوفيا:باهي باهي ح نشوف شن يصير معايا
سراج:كنك تحكي هكي ياصوفيا شنو نسيتي انتي عليش جاية للحوش هذا
صوفيا:مش ناسية مش ناسية عارفة انا جاية ندمر العائلة هذي بكل وقريب ح تسمع خبر يفرحك
وصكروا الخط.
صوفيا صكرت وكانت تمشي بسرعة عشان تخش للحوش ومحد يحس عليها
ولكن فجأ وبدون اي مقدمات
جاء حد وراها ومسكها من يدها بالقوة بكل0_0
صوفيا برمت وجها وتشوف قدامها................😳
صوفيا:.......................😳
انا وانتو:............................0_0يتبع الحلقة الخامسة والعشرين
مازال في مغامرات واجد في حياة صوفيا خصوصآ في اخر حلقات