Bad Chick [COMPLETED]

25

"Sige na kuya, 80 pesos na lang isa, tig dalawa naman bibilin namin eh. Saka kung nandito lang si kuya Gilbert panigurado papayag yun! Tropa kami nun eh!" pamimilit ni Jennie dun sa tindero ng damit.

"Kaso nga wala siya dito kaya hindi talaga pwede miss. Magandang klase kasi yang tshirt at jacket na hawak mo kaya di pwede. Saka hindi mo ko madadaan sa patropa tropa mo. Malamang kilala mo si Boss Gilbert, kagawad yun dito eh!" iritableng sagot naman nung mama sa kanya.

Napatingin ako kay Jennie at kitang kita ko kung paano kumunot ang noo niya dahil hindi siya pinagbigyan at pinaniwalaan nung tindero. Mukhang napipikon na rin siya dahil hindi na siya pinapansin nung manong. Pinagmamasdan ko lang siya habang nakakunot ang noo niya at nakapout. Ang cute niya kasi eh. Para siyang pusang naiinis. Di ko tuloy maiwasang mapangiti. Kaya lang napawi ang ngiti ko ng muling magsalita si manong.

"Pero totoo nga kasi manong, tropa nga kami nun ni Kuya Gilbert!" pagpupumilit niya pa rin.

"Hindi nga sabi ako naniniwala sayo! Tigilan niyo na nga yang mga modus niyo. Alam na alam ko na yan! Di mo ko maloloko miss. Sayang maganda ka pa naman! Akin na nga yan at sinasayang niyo lang ang oras ko! Umalis na nga kayo dito!" pagsusungit ni manong sabay agaw ng damit sa kamay ni Jen.

Nakita ko kung paano nagngalit ang mga bagang niya dahil sa naging aksyon ni manong. Naku! masamang pangitain to. Kilala ko pa naman tong babaeng to. Siguradong hindi rin to papatalo eh. Nakita ko ring pinagtitinginan na kami ng mga tao kaya naman umaksyon na rin ako. Hinawakan ko yung braso niya para sana ayain na siyang umalis dahil nakakahiya na kaso agad niyang naalis yung kamay ko.

"So, sinasabi mo bang manloloko ako? Wow manong ha! Sa ganda kong to mukha ba kong manloloko? Eh sa ating dalawa ikaw tong mukhang snatcher eh!"

Laglag ang panga ni manong habang nagtawanan yung mga tao sa sinabi ni Jen at kitang kita ko kung gaano nanlaki yung mata ni manong sa mga binitiwang salita ni Jen sa kanya. Maski ako di ko napigil na mapatawa dahil totoo naman din kasi yung sinasabi niya.

"Aba't---" sasagot pa sana si manong pero di niya na nagawang matuloy yung sinasabi niya nang muling nagsalita si Jen.

"Bakit totoo naman ah! Alam mo manong bawas bawasan mo yang pagiging masungit mo, kaya ka napapanot eh! Bleh!" sambit ni Jennie sabay ng pambebelat niya sa masungit na matanda.

Mas lalong lumakas ang tawanan ng mga tao at sa sobrang galit, umamba na si manong na lalabas ng tindahan at susugurin si Jennie. Pero bago pa siya makalapit ay agad nang hinila ni Jen ang kamay ko saka kami tumakbo palayo sa masungit na tindero.

"Hoy! Bumalik kayo rito!" sigaw ng masungit na matanda na pinipilit kaming habulin.

"Sungit! Panot! Panot!" sigaw niya pa habang tawa ng tawa.

Napapailing na lang ako habang tinitignan ko siya habang tumatakbo kami papalayo. Kakaiba talaga tong babaeng to. Walang filter. Kung ano yung naisip niya yun talaga yung sasabihin niya kahit na mapaaway pa siya. Walang sinisino, mapa bata man o matanda.

Nang mapansin naming sumuko na ang masungit na matanda sa paghabol sa amin ay huminto na kami sa pagtakbo dahil malayo layo na rin yung narating namin. Nagkatinginan kami at sabay na napatawa. Napatigil ako sa pagtawa ng mapansin kong magkahawak pa rin pala kami ng mga kamay.

"Okay ka lang?" tanong niya sakin habang hinahabol ang kanyang paghinga. Nabaling ang mga mata niya kung saan ako nakatingin at nung marealize niyang magkadaupang palad pa rin kami ay agad niyang binitawan ang kamay ko. Hindi ko alam kung tama yung nakita ko pero parang namula bigla yung mga pisngi niya. Di ko na lang pinansin dahil baka mamaya mali lang ako ng nakita. Isa pa medyo madilim rin kaya baka namamalikmata lang rin ako.