اقتباس-اعتذار-
------------------
شهندا مسحت دموعها وبصت ل-فرح اللي قاعدة جنبها في كنبة العربية ورا بينما عمار واقف برا بيشرب عصير..:مكانش ينفع نتجوز..الفرق بينا كتير..فروق تفكير واهل ومستوى وعيلةوغيره
فرح اتكلمت بنرفزة:طب مفكرتيش في مشاعره هو..أنتي عارفة انه كان بيحبك صح ولا غلط..ومع ذالك سبتي الجمل بما حمل..طب كنتي لمحتيله حتى..
شهندا:لمحتله..بس هو كان بيتجاهل كلامي ويوم ما أصدر رد فعل خوفت أكتر لأجرح مشاعره.
فرح ضحكت بسخرية:على أساس انك مش جارحة مشاعره دلوقتي مثلا..بتكدبي على مين على نفسك ولا عليه..طب لما هربتي حاجة اتغيرت فيكي بقيتي استرونج وومن دلوقتي!
شهندا صرخت فيها بقهرة:لاء مبقتش حاجة..بس على الأقل بقيت نفسي ومحدش بيتحكم فيا..لا عمي اللي عايز يخلص مني ولا أمي اللي كل ما اروحلها الاقيها في حضن حد غير أبويا ولا أختي اللي نفسها تخلص مني النهاردة قبل بكره!
فرح سكتت لدقايق وهي شايفاها بتنهار قدامها:طب والحل بتعملي ايه دلوقتي..
شهندا مسحت دموعها بكُم بلوزتها:بشتغل على قدي اهو مصاريف الجامعة وكتبها..
فرح اتنهدت:ولإمتى..مش عايزة ترجعي ياشهندا شهندا:مفيش حاجة تشجع إني أرجع حتى..هنا على الأقل في حد بيحترمني..وبيقدر أفكاري ومشاعري..
فرح:بس هناك فيه اللي بيحبك أكتر..فيه اللي وقت ماهتقعي هتلاقي بيشد إيدك يوقفك..على الأقل فيه أحمد اللي لسا بيحبك وعلى وعده ليكي..
شهندا همست بعدم تصديق:أحمد!
فرح ضربت على الحديد وهو سخن:اه أحمد..ومتقلقيش احنا معاكي وهنسندك لكن هنا صعب..على العموم أنا وعمار هنقعد هنا يومين..لو غيرتي قرارك هكون أول حد يشجعك..مش هفرض عليكي رأيي بس كله هيرجع ليكي أنتي..كملت بنبرة بمغذى..أنتي اللي بتبني حياتك وانتي اللي بتهدميها سواء هنا او هناك!!
شهندا سكتت بشرود وفرح ابتسمت بنصر..نادوا لعمار وصلها للعنوان وهي مشيت بتوهان وشرود..عمار بص لفرح وضحك:أنتي عملتيلها ايه..
فرح ابتسمت:حطيت مجرد شمعة في طريقها تنوره وتوريها ان ورا الضلمة حاجات كتير حلوة تستاهل اننا نتعب عشانها!
#يتبع.
#عمر_بيبتدي
#FarahElDesoky
-هنزل قصة قصيرة من فصل أو فصلين على الأكثر يعني بمناسبة العيد..(سرد:فصحى..حوار عامي)..هلاقي متابع.؟؟
