إسماعيل اتحرك بيهم بسرعة للمستشفى العسكري لانها الأقرب بس الطريق كان زحمة وفرح وراه خلاص هتنهار..لف واتجه للمستشفى الخاص من الناحية التانية..فرح كانت بتنتفض بوجع ودموعها مبتنتهيش.حاسة ان عضم جسمها كله بيتكسر والوجع مؤلم بشدة..واخيرا إسماعيل وصل بيهم..وفي لحظات كانت اتنقلت على السرير النقال تزامنا مع فقدانها الوعي..وانهيار قوتها بعد المجهود دا كله..
مرات إسماعيل كانت شايلة شنطتها وفي إيديها تليفون فرح..التليفون اتهز في ايديها على مكالمة ورنة التليفون صوتها مسموع..
إسماعيل خد منها التليفون وحاول يقرأ الإسم بس كان بالإنجليزي فمقدرش..ففتح مباشرة:ألوو
عمار كان راجع بإبتسامة فرحة لأن القرض اتقبل وفي أقل وقت الفلوس هتجيله..حب يفرحها بالخبر دا..بحيث يبدد قلقها اللي كان ظاهر بوضوح من فترة ما بدأ يفكر في موضوع القرض..لقى صوت غريب بيرد عليه..سرب القلق والشك لتفكيره..اتكلم بهجوم:مين اللي بيتكلم..
إسماعيل: دا تلفون الدكتورة هي بتولد دلوقتي..
عمار اتخض:بتولد!!..أنت فين أنا عمار جوزها..أنت مين..
إسماعيل:أنا اسماعيل يا باشا..احنا في مستشفى ال $$..مبقالناش ربع ساعة هتصل على الحاج محمود دلوقت..
عمار:طب أنا جاي بسرعة مش هتأخر..
عمار قفل وبص للسواق:روح لمستشفى $$ يا سطى بسرعة..
________________________
سبحان الله وبحمده..سبحان الله العظيم..لا حول ولاقوة الابالله ..سبحان الله وبحمده..سبحان الله العظيم..لا حول ولاقوة الابالله
_________________
____
"بهوايا أنتي قاعدة معايا..عنيكي ليا مرايا..ياجمال مراية العين "
الأغنية كانت شغالة بصوت مرتفع بعض الشئ من تلفون أحمد اللي موصله بسماعة بلوتوث وبيرقص عليها هو والثلاثي:هنا، كرم، كريم
سعاد نايمة ومغطية عيونها بطرف طرحتها..محمود بصلهم بقلة حيلة..نور تليفونه كان مكتوم بسبب انه محطوط في جيبه والشمس قوية فمش ظاهر..سعاد اتحركت في نومتها بانزعاج واتأففت..سحبت الطرحة من على عيونها بانزعاج:اوفف..لفت ليهم ورا وصرخت:دي مبقتش رحلة دي قلبت كباريه مزهقتوش من الرقص هناك..اقفلوا الزفت السماعة دي..دا ايه دا ياربي..
أحمد بلع ريقه واتعدل وطفّى الأغنية..تليفون محمود رن تاني بس صوته ظهر بوضوح..محمود جاب تليفونه من جيبه وبص في الإسم لقاه إسماعيل..فتح المكالمة:ألو يا إسماعيل في ايه..أنا في طريقي للبيت أهوه..
إسماعيل:أنا مش في البيت..الدكتورة فرح بتولد في المستشفى وأنا وبدرية مراتي جبناها للمستشفى..
اتكلم بلهجة شبه صعيدي متشوبة بلكنة عامية عادية أثر وجوده في طنطا من زمان..
محمود: دا لسا قدامها وقت..طب أنتم فين وجوزها مش معاها؟
إسماعيل: عمار باشا عرف وزمانه جاي في الطريق..احنا في مستشفى $$ ومبقالناش كتير..
محمود:طب أنا عند كوبري فاروق اهوه..دقايق وهوصل..
سعاد بصت له بقلق وهو بلع ريقه: بنتك بتولد..
سعاد اتعدلت في قعدتها واتكلمت بفزع:دي لسا قدامها أسبوع وولادتها قيصري..يعيني يابنتي هتدوق وجع الاتنين..طب طب بسرعة يامحمود على المستشفى..
أحمد صفر وهنا سقفت بفرحة وصرخت: هيجلنا نونو جديددددد..
أحمدسقف بايده على ايديها بحماس وهو بيبتسم:اشطا يا باشا..
__________________________
سبحان الله وبحمده..سبحان الله العظيم..لا حول ولاقوة الابالله ..سبحان الله وبحمده..سبحان الله العظيم..لا حول ولاقوة الابالله
_________________
________
عمار دخل جري المستشفى بعد ماحاسب التاكسي...جري في الممر بسرعة متجه لأوضة العمليات لقى إسماعيل لوحده بعد مابعت مراته البيت لأن وجودها ملوش لازمة..عمار وقف بسرعة وسند بايده على دراع إسماعيل..خد نفسه وهو بينهج:بقالها قد إيه جوا..
إسماعيل بص في تليفونه:اهو داخلة على ساعة إلا ربع..
عمار:كل داااا!
إسماعيل اتكلم وهو لسا متأثر بمشهد صريخها:دي تعبت جدا..الأسانسير عطل بيها والمحول مكانش بيشتغل..وصريخها كان جايب أخر الدنيا..
عمار انتفض بخوف..صريخها..عطل..تعبت..بلع ريقه بخوف وسند بجسمه على الحيطة..واقف منتظر..الوقت بيعدي ومفيش حاجة جديدة ولا حد بيطلع يطمنهم حتى..فك جرافتته بخنقة وفتح زرار قميصه ياخد نفس..قعد على الكرسي منتظر..وشوية ومحمود جه والعيلة كلها..وكمان توفيق..ساعة والتانية ومفيش صوت والتوتر والقلق ظاهر بوضوع على ملامحهم...عمار كان خوفه بزيادة..أهلها خوفهم رقم واحد على بنتهم وبعد كده حفيدتهم..توفيق في المقام الأول حفيدته بس مننكرش انه يهمه فرح..لكن عمار الوحيد اللي بينهم قلقان بنفس الدرجة على الاتنين..بص من فتحة القزاز اللي في الباب..شايف الدكاترة والممرضين حواليها..كل دا..تلت ساعات بتولد..عمار ركل الحيطة بغيظ واتكلم بزهق:كل دا بيولدوها؟!
سعاد حاولت تبقى هادية:هي بس عشان أول مرة..بتبقى غير..اهدوا شوية..
عمار قعد جنب محمود وحط راسه بين إيديه والصمت عم المكان..دقايق وكانت فيه صرخة شقت الصمت دا وغير ملامحه..الكل جري تجاه الأوضة وأولهم عمار..اللي بص للدكتورة من فتحة القزاز اللي في الباب بتاع أوضة العمليات..بصولها وهي ماسكة البنت من رجولها وجسم البنت كله دم..مقدرش يحقق ملامح البنت وابتسم بفرحة..رجع لورا وسابهم بشوفوه..طب هو اطمن على بنته..هي عاملة ايه؟..دقايق وجه دكتور دخل العمليات من غير كلام..دقايق تانية عدت قلبت على ربع ساعة رعب تانيين..الكل رجع مكانه بقلة حيلة بس المرة دي بإبتسامة أمل..عمار اتجه وقف قدام العمليات..باب العمليات فتح وخرجت الممرضة وهي شايلة البنت ولفاها..ادتها من عمار اللي شالها بخفة وخوف من المسئولية اللي في ايده..ضحك بخفة..وابتسم تاني والبنت بتفرك في عنيها بخفة..بشرتها كانت محمرة وكل حاجة فيها صغيرة جدا بشكل كبير..يمكن البطانية الملفوفة حواليها عملالها حجم يمكن شيله...أحلى هدية جاتله من بعد جوازه من أمها..يمكن هو بيحبها دلوقتي حبه لأمها عليه حبة حب مختلف ليها هي..معقولة دي حتة منه..وهيتقال انها بنته هو..هتكبر قدامه وتنطط حواليه زي كرم وكريم كدا..هتكبر قدام عيونه ويجوزها بايده..وتبقى عروسة زي القمر..هتكبر وتخلف ويشيل عيل ليها زي ماهو شايلها دلوقتي...سعاد قربت منه بفرحة وبصت للبنت اللي شايلها..مدت إيديها تشيلها منه لكنه مردش عليها..
سعاد بلعت ريقها:هات البنت..
عمار مردش عليها وهي نغزته وهنا قربت بإبتسامة وأحمد..سعاد نغزته تاني..وهو انتفض بخفة كأنه فاق من غيبوبة:ها
سعاد ابتسمت وشالت منه البنت براحة واتجهت لمحمود وتوفيق اللي واقفين جنب بعض..
ادتها لمحمود اللي دمعة خفيفة اتمردت من عيونه بفرحة..شالها بخفة وباس راسها..
اداها لتوفيق اللي كان بيرتعش وهو بيشلها..الاحساس دا مختلف حتى مجربهوش مع عمار..عمار أول ما اتولد اتنقل للحضانة مباشرة..مقدرش حتى يتحقق من ملامحه من كتر الأسلاك اللي مغطية جسمه..ويوم مايجربه..يجربه مع بنته..حفيدته هو..
الباب بتاع أوضة العمليات فتح وخرجت فرح على السرير النقال..ينقلوها لأوضة عادية..
______________________
سبحان الله وبحمده..سبحان الله العظيم..لا حول ولاقوة الابالله ..سبحان الله وبحمده..سبحان الله العظيم..لا حول ولاقوة الابالله
_________________
______
هنا وأحمد والولاد روحوا مرغمين غصبن عنهم بأوامر من محمود بصرامة عشان ميتلموش حواليها أول ماتصحى وتفوق من البنج..
الكل اتجمع حواليها في الأوضة تقريبا والبنت نايمة في سريرها بهدوء..وعمار قعد جنبها بيراقب انفعاللاتها أثناء نومها..
عدى وقت وفرح بدأت تفوق بشكل بسيط لكن البنج مأثر عليها..تمتمت من غير وعي:بولد..ماما..عمار..أتجوز...المطبخ..لاء لاء احنا المطبخ..توفيق هيسمع صوتنا...نام على الكنبة..يا نصاب..مفيش واحدة..أحمد بيخطب...ايدك بعيد..
اتكلمت كتير كلام مش مفهوم بالنسبة للكل ماعدا عمار اللي فاهم الحوار تقريبا..كتم ضحكته بقوة على كلامها..فتحت عيونها وبصت ليهم بتوهان مش فاهمة حاجة وهي هنا ليه..
غمضت عنيها وفتحت..بلعت ريقها بخفة ومدت ايديها تجاه عمار كأنها بتشده..عمار سحب كرسيه وقعد جنبها..بص ليهم باستغراب لما فضلت ساكتة..
سعاد ابتسمت: البنج بس لسا مفاقتش منه..
فرح فتّحت فجأة وابتسمت لعمار بعدم وعي:هات بوسة..
عمار بلع ريقه واتنفض..اتكلم بإحراج:نامي يافرح نامي..
حركت راسها برفض:لاء مليش دعوة..هروح أقول لبابا
عمار لف ليهم لقاهم بيكتموا ضحكهم بالعافية..عمار بص لمحمود:ماتتكلم يا بابا..
فرح رفعت صوتها:هات بوسة بقى..
عمار باس راسها وبعد..فرح كشرت بتذمر وعدم موافقة:مش دي..مش دي..
عمار بص لمحمود اللي مقدرش يكتم ضحكته ورجع لورا وسعاد قعدت بكسوف من كلامها..توفيق ضحكه اللي كان مسموع..
عمار قرب بقلة حيلة وباسها من خدها..كشرت بقوة وعبست بملامحها وهزت راسها:لاء..لاء..بتاعة المطبخ ياعمار مش دي..دي بتاعت الصالة..
عمار همسلها:يخربيتك اتهدي..توفيق هنا..
فرح مدت شفايفها لقدام:خليه يغمي عنيه أحسن..يلا بقى..
عمار بص لتوفيق اللي نام جنب محمود على الكنبة وبيكتم ضحكته أكتر..توفيق حط ايده على عنيه وحرك ايده بمعنى •براحتكم.. براحتكم•
عمار مسح على وشه باحراج من كلامها..شدت ايديها من ايده بتذمر وهي بتهز راسها:أنت مش حلو مش هديك بوسة لما تيجي المطبخ تاني..أنت مش مؤدب..
عمار عض على شفايفه بغيظ ونفسه يخنقها من كلامها..انقذها من تحت إيديه البنت اللي احتجت بالبكى على جوعها كل دا..
سعاد بلعت ريقها وقامت..شالت البنت من سريرها وعمار قام..سعاد قربت البنت من فرح: يلا حاولي تقومي عشان ترضعيها..
فرح اومأت بالنفي:لاء..خلي عمار هو مش مؤدب خليه يرضعها..
عمار حاوط نفسه تلقائيا وضحك:أنتي بتتهبي ايه..لاء طبعا..
فرح لفت لمحمود بتوهان زي السكرانين:طب خدها أنت ياحاج..أنا عايزة أنام..
محمود بيحاول يتكلم من بين ضحكه:على عيني يابنتي كنت عملتها معاكم..
فرح مدت شفايفها السفلية لقدام وبصت لتوفيق برجاء: عشان خاطري..
توفيق ضحك:ماينفعش والله..أنا مراتي مش معايا..اسف معملش حاجة من غيرها..
سعاد ضحكت:يلا بقى البنت جعانة..
ساعدت فرح انها تتعدل ومحمود وتوفيق خرجو وعمار قعد مكانهم بغيظ منها ومن توهانها دا..أمال لو سكرت فعلا ولا شربت كاس..ايه هتفضحه...!!
الفصل التاسع عشر ج١
Magsimula sa umpisa
