ဗီလိန်ချစ်သူ (completed) (Arc_8,10,15,Extra_1,2,4) (MM Translation)

Arc_ 8.21 Romeo

Chapter (21) – မျက်လုံးမလွှဲနိုင်အောင် ချစ်တယ်


နောက်ဆုံးအချိန်ထိ အကောင်းဆုံးကိုထိန်းထားနိုင်ဖို့ Bonnie က ကျိုးယွင်ရှန့်နဲ့ Ivana ကို နောက်ဆုံးမှ ဓာတ်ပုံရိုက်ကူးစေခဲ့သည်။ သူ့ကြောင်ပေါက်လေးကို ဓာတ်ပုံရိုက်ပြီးတာနဲ့ သူမရဲ့သူဌေးက အခြားပြိုင်ပွဲဝင်တွေကို ဓာတ်ပုံရိုက်ပေးဖို့ စိတ်မရှည်လက်မရှည်ဖြစ်တာကို တားဆီးနိုင်ဖို့ ဒီလိုလုပ်ရတာဖြစ်သည်။ ဒီလိုမှမဟုတ်ရင် သူမတို့သူဌေးက ကြောင်ပေါက်လေးနားက မခွာချင်တာကြောင့် အခြားလူတွေကို ဓာတ်ပုံရိုက်ချင်မှာမဟုတ်ပေ။

ပြိုင်ပွဲဝင် ယောက်ျားလေး၊ မိန်းကလေးတွေ အကုန်နီးပါးရဲ့ သရုပ်ပြမှုက အတောင်ကိုဆိုးဝါးကြပေမယ့် ဒီစုံတွဲတွေမှာ တစ်ဦးက ယောက်ျားဆန်ဆန်၊ တစ်ဦးက မိန်းကလေးဆန်ဆန် ကိုယ်ဟန်အမူအယာကိုသုံးပြီး သရုပ်ဖော်ဖို့ကြိုးစားကြတဲ့အတွက် ရယ်စရာဖြစ်လို့နေသည်။ Bonnie နဲ့ Jeffery တို့က ဒိုင်ဖြစ်ပြီး ဒီပြိုင်ပွဲဝင်တွေကို လမ်းညွှန်ပေးသင့်ပေမယ့် သူတို့နှစ်ဦးလုံးက ဗိုက်ကိုနှိပ်ပြီး ရယ်မောလို့ အလုပ်များနေကြသည်။

Emily အလှည့်ကိုရောက်တော့ သူမက ရုန်းကန်ကြိုးစားမှုမရှိဘူးဆိုရင် မကြာခင် သူမဖယ်ရှားခံရတော့မယ်ဆိုတာ သေချာသိနေသည်။ သူမရဲ့စုစုပေါင်းရမှတ်က တက်လာတယ်ဆိုပေမယ့် Romeo နဲ့ယှဉ်ရင် အနိမ့်ဆုံးအဆင့်မှာ ရှိနေဆဲဖြစ်သည်။ သူမက သူမရဲ့ သူရဲကောင်းဆန်ဆန်ပုံစံကြောင့် လူကြိုက်များသည်။ သူမက မျက်လုံးတစ်ဖက်ကိုအုပ်ထားပြီး နှုတ်ခမ်းမွှေးစစနဲ့ ပင်လယ်ဓားပြပုံစံကို ပြင်ဆင်ထားသောကြောင့် အတော်လေးကို ကြည့်ကောင်းလို့နေသည်။

Emily က ခွေးခြေခုံတစ်ခုပေါ်တွင် ခြေတစ်ဖက်တင်ထားပြီး ယောက်ျားလေးပြိုင်ပွဲဝင်က သူမခြေရင်းမှာ ဒူးထောက်ပြီး လက်ချင်းယှက်လို့ ခေါင်းမော့ဆုတောင်းနေဟန် ပြုလုပ်ထားသည်။ သူတို့ကိုယ်ဟန်ပြထားတာက မပြည့်စုံလို့ တစ်ချက်ကြည့်ရုံနဲ့ ဘယ်သူကမိန်းကလေး၊ ဘယ်သူကယောက်ျားလေးဆိုတာ သိနိုင်ပေမယ့် အရမ်းကို ရယ်စရာကောင်းနေတယ်။ ဒီပုံကိုကြည့်မိရင် ဘယ်သူမဆို ရယ်မောမိမှာသေချာတယ်။

Gustav က ဒီပုံစံကို တစ်ချက်ကြည့်ပေမယ့် ဘယ်လိုမှအကဲဖြတ်ခြင်းမပြုပေ။ ဒါပေမယ့် Bonnie နဲ့ Jeffery က ချီးကျူးနေကြသည်။ ဒီစုံတွဲက ဒီအုပ်စုထဲမှာ သဘာဝအကျဆုံးဖြစ်နေသည်။

နောက်ဆုံးမှာ သူတို့စောင့်ဆိုင်းနေသည့် စုံတွဲအလှည့် ရောက်လာလေပြီ။ ဓာတ်ပုံရိုက်ပြီးသည့် ပြိုင်ပွဲဝင်အားလုံး ဒီနှစ်ယောက်ကို အားပေးဖို့ စုဝေးလာကြသည်။ အခုချိန်မှာ Ivana က မိန်းကလေးပြိုင်ပွဲဝင်တွေမျက်လုံးထဲ နတ်ဘုရားတစ်ပါးလို့ ထင်နေပြီး Romeo က ယောက်ျားလေးပြိုင်ပွဲဝင်တွေအတွက် နတ်ဘုရားမလို့ မြင်နေကြသည်။

Emily က Romeo ၏ နူးညံ့သိမ်မွေ့သော မျက်နှာလေးကို စိတ်ပျက်လက်ပျက်ကြည့်ပြီး အဝေးကိုထွက်သွားတော့သည်။ Romeo က ပြိုင်ပွဲဝင်အားလုံးထဲမှာ ပုံစံက အရမ်းထူးခြားတယ်ဆိုတာ သိပေမယ့် ခုလို အဝတ်အစားလဲလှယ်ဝတ်ဆင်ပြီး ဓာတ်ပုံရိုက်ချိန်မှာတောင် ဒီလိုထိပ်ဆုံးအဆင့်မှာ ရောက်နေလိမ့်မယ်လု့ိ လုံးဝမမျှော်လင့်ထားခဲ့ပေ။ သူဝတ်ထားရတဲ့ အဝတ်အစားက ဘယ်လောက်ပဲ ထူးဆန်းပါစေ Romeo က အခြေအနေကို ချက်ချင်းထိန်းချုပ်လိုက်နိုင်ပြီး ဘာမှမဖြစ်သလိုပဲ သက်တောင့်သက်သာ ရှိနေခဲ့သည်။ model လောကထဲမှာ ဒီလိုပါရမီမျိုးက အလိုအပ်ဆုံးဖြစ်သည်။

ပရိသတ်တွေက Romeo ရဲ့ပုံစံလေးကိုတွေ့ရင် သူတို့ ဘယ်လိုတုံ့ပြန်ကြမှာပါလိမ့်။

ဘာဖြစ်ဖြစ် သူမ ဆက်မတွေးကြည့်တော့ပေ။

"ဘေဘီ.. အလယ်နားမှာ သွားရပ်ပေးပါဦး.."

Gustav က ပြုံးပြီး တရင်းတနှီးပြောလိုက်သည်။

Ivana က Romeo ကို အလယ်ကိုတွန်းလွှတ်လိုက်သည်။ Gustav ရဲ့မျက်လုံးတစ်စုံက Romeo ဆီမှာ ကော်ကပ်ထားသလို စိုက်ကြည့်နေလို့ အခုခေါ်လိုက်တဲ့ 'ဘေဘီ' ဆိုတာ သူမကိုမရည်ညွှန်းဘူးဆိုတာ သိလိုက်သည်။

ကောင်လေးရဲ့ ကြွေသားလိုဖြူဖွေးတဲ့ အသားအရေပေါ် မီးထိုးလိုက်ချိန်မှာ သူက ရတနာလေးတစ်ပါးလို ထင်မြင်ရသည်။ Gustav က ဓာတ်ပုံကို စတင်မရိုက်ကူးခင် ကြောင်ပေါက်လေးရဲ့ကိုယ်ပေါ် မီးအလင်းအမှောင် အနေအထား၊ ကိုယ်ဟန်တို့ကို သေချာချိန်ညှိလိုက်သည်။ Ivana ပေါ်ကို မီးအလင်းအမှောင် သေချာကျရဲ့လားဆိုတာ နည်းနည်းလေးမှ ထည့်မစဉ်းစားမိလိုက်ပေ။ သူ့စိတ်အာရုံတစ်ခုလုံးက တစ်ဦးတည်းသော ကောင်လေးဆီသာ ကျရောက်လို့နေသည်။

"လာ.. ထိုင်လိုက်.. ကိုယ်တစ်ချက်ကြည့်ဦးမယ်.. No.. No.. Ivana.. မင်း ကြောင်ပေါက်ကိုမဖက်နဲ့.. ဒီအတိုင်းပဲနေ.. ဒီဟာက ခန့်ညားတဲ့ပုံစံပေါက်နေပြီ.. ဒီပုံစံလေးကိုပဲ ကိုယ်သဘောကျတယ်.."

Gustav က ဓာတ်ပုံရိုက်ရင်း ညွှန်ကြားနေသည်။

Bonnie က သူမနှုတ်ခမ်းကိုမဲ့လိုက်ကာ စိတ်ထဲကတော့ ပြောဆိုနေမိသည်။

"Boss.. သိပ်မတွန့်တိုပြနဲ့လေ.. ရှင်က Ivana ကို ကြောင်ပေါက်လေးနဲ့ တရင်းတနှီး ပူးပူးကပ်ကပ်ပုံစံ မမြင်ချင်တာမဟုတ်လား.. ဒါက ဓာတ်ပုံရိုက်ဖို့ ကိုယ်ဟန်ပြရုံလေးပဲကို.."

"ကောင်းတယ်.. ဒီအတိုင်းနေ.. ဘေဘီ.. ကိုယ့်ကို တစ်ချက်ကြည့်ပါဦး.. မင်းအနှစ်သက်ဆုံးလူကို ကြည့်သလို နူးနူးညံ့ညံ့နဲ့ နက်နက်ရှိုင်းရှိုင်းလေး ကြည့်လိုက်.."

သူ့လမ်းညွှန်ချက်တိုင်းက နူးညံ့နေသလို ချစ်ခြင်းတို့ဖြင့် ထုံမွှမ်းလို့နေသည်။ လူတိုင်းကတော့ ဒီလိုပြောဆိုတာက အာရုံဝင်စားနေတဲ့ ဓာတ်ပုံဆရာ ပြောရိုးပြောစဉ်အတိုင်းပဲလို့ ထင်လိုက်ကြသည်။ ဒါပေမယ့် တကယ်တော့ ဒီဟာတွေက Gustav ရဲ့ တကယ့်ခံစားချက် အစစ်အမှန်များဖြစ်သည်။ ဆယ်ကျော်သက်လေးက သူ့ကို ချစ်ရည်ရွှန်းလဲ့တဲ့ မျက်လုံးလေးတွေနဲ့ ကြည့်လိုက်တော့ သူ့စိတ်ဝိညာဉ်တစ်ခုလုံး ဗရမ်းဗတာဖြစ်သွားသလို ခံစားလိုက်ရသည်။

"ဘေဘီ.. ကိုယ့်ကိုပြုံးပြပါ.."

သူ့လေသံက ရေငတ်နေသူလို အက်ကွဲလို့နေသည်။ သူ့အာခေါင်တစ်ခုလုံး ခြောက်လာတဲ့အထိ ဆွဲဆောင်ခံနေရပေမယ့် သူလုံးဝ မရပ်တန့်ချင်ခဲ့ပေ။ ဒါက သူ့အတွက် ချိုမြိန်လွန်းသည့် ညှင်းဆဲမှုလေးဖြစ်တော့သည်။
ကျိုးယွင်ရှန့်က ပြုံးလိုက်သည်။ သူ့နားထဲတွင် ပြင်းထန်သည့်အသက်ရှူသံကို ကြားလိုက်ရသည်။

"ကောင်းတယ်.. ဟုတ်ပြီ.. မိုက်တယ်.. ဘေဘီ.. မင်းက နတ်သားလေးလိုပဲ.. ဘေဘီ.. မင်းက အကောင်းဆုံးပဲ.."

သူက သူ့ချစ်သူလေးကို တောက်လျှောက်ချီးမွန်းနေလိုက်တာ Bonnie ရဲ့ ပုံစံတစ်ခုလုံး ကူးချထားသလိုပဲ။
Acheson ဓာတ်ပုံစတင်ရိုက်ကူးစဉ်ကတည်းက Bonnie က သူ့ကိုသိလာခဲ့သည်။ Acheson က အေးဆေးငြိမ်သက်လွန်းသောကြောင့် သူက အခြားဂြိုလ်ကလာတဲ့ ဂြိုလ်သားလို လူတွေနဲ့ ခပ်ကင်းကင်းနေလေ့ရှိခဲ့သည်။ ဒါကြောင့် Gustav က သွေးအေးလွန်းသူလို့ Bonnie ထင်ထားခဲ့ပေမယ့် ခုလိုမျိုး ရူးသွပ်လုနီးပါး သွေးဆူလာမည်ဟု လုံးဝမထင်ထားမိပေ။

သူမက ဒီမြင်ကွင်းကို မှတ်တမ်းတင်သိမ်းထားသင့်တယ်ထင်ပြီး သူမဖုန်းကိုဖွင့်ပြီး ရိုက်ကူးထားလိုက်သည်။ ခဏကြာတော့ သူမရဲ့သူဌေးကို သတိပေးလိုက်သည်။

"Mr. Acheson.. ရှင် သူတို့ကိုရိုက်ဖို့ တစ်ပုံပဲကျန်တော့တယ်.. သူတို့ကို အကောင်းဆုံးအနေအထားနဲ့ ကိုယ်ဟန်ပြခိုင်းပြီး ရပ်သင့်ပြီ.."

"တစ်ပုံပဲကျန်တော့တယ်.. ဟုတ်လား.."

Gustav က ကင်မရာကိုငုံ့ကြည့်လိုက်တော့ သူက 29 ပုံရိုက်ပြီးသွားလေပြီ။ အချိန်ကုန်တာ မြန်လှချည်လား။ 29 ပုံက ဘာကြောင့်များရမှာတုန်း။ 2.9 ဘီလီယံရိုက်တာတောင် မလုံလောက်သေးဘူး။ Gustav က ဆံပင်ကိုပင့်တင်လိုက်သည်။ သူ့အမူအယာက မသိသာပေမယ့် သူ့နှလုံးသားက ဒေါသထွက်လို့နေလေပြီ။

ကြောင်ပေါက်လေးနားကို ကပ်ရဖို့အခွင့်အရေးက လွယ်တာမဟုတ်ဘူး။ အခုတော့ အလဟဿဖြစ်သွားရပြီ.. သေလိုက်စမ်း..။

Daddy ပေါင်ပေါ် လာထိုင်


Ivana နဲ့ Romeo တို့ ဘယ်လိုအနေအထားနဲ့ သရုပ်ပြသင့်သလဲဆိုတာ တိုင်ပင်နေတဲ့မြင်ကွင်းကိုကြည့်ရင်း သူက ထိုင်ခုံမှာထိုင်လိုက်ပြီး လှမ်းခေါ်လိုက်သည်။

"မင်းတို့ ဒီလိုမျိုး လုပ်လို့ရတယ်လေ.. ဘေဘီ ဒီကိုလာ.. ကိုယ့်ပေါင်ပေါ်မှာ လာထိုင်လိုက်.."

ဓာတ်ပုံဆရာ ဒါမှမဟုတ် ဒိုင်တစ်ယောက်က ပြိုင်ပွဲဝင်ကို ဘယ်လိုအနေအထားမျိုး ကိုယ်ဟန်ပြသင့်ကြောင်း ဒီလိုလမ်းညွှန်ပေးလေ့ မရှိကြပေ။ Mr. Acheson က အခုလိုပြုလုပ်တာ ပထမဆုံးအကြိမ်ဖြစ်သည်။ ပြိုင်ပွဲဝင်တွေက အံ့အားသင့်သွားကြပေမယ့် သူတို့က သူ့ရဲ့ခံစားချက်ကို နားလည်သွားကြသည်။ Romeo က အရမ်းကိုလှလွန်းသည်။ ကာတွန်းကားထဲက ဇာတ်ကောင်လေးလို လှလွန်းသည်။

Gustav က ဓာတ်ပုံဆရာဖြစ်ပြီး ဓာတ်ပုံဆရာတိုင်းက လှပသောအရာဝတ္ထုများကို ရှာဖွေလေ့ရှိသည်ကို လူတိုင်းသိထားကြသည်။ ပြီးပြည့်စုံသော ဓာတ်ပုံတစ်ပုံထွက်လာဖို့ ဓာတ်ပုံဆရာများက နာရီပေါင်းများစွာ ဆင်းရဲဒုက္ခခံပြီး စောင့်ဆိုင်းခဲ့ကြသည်။ မိန်းကလေးအသွင်နှင့် Romeo အပေါ် သူဒီလောက် စိတ်အားထက်သန်စွာ လမ်းညွှန်ပြသပေးတာ အံ့သြစရာတော့မဟုတ်ပေ။ သူလည်းပဲ လူသားတစ်ယောက် မဟုတ်လား။

ယောက်ျားေးလပြိုင်ပွဲဝင် Romeo ကို ကျန်ပြိုင်ပွဲဝင်များက ရန်လိုမှုမရှိကြတော့ပေ။ ဘာကြောင့်လဲဆိုတော့ Romeo ရဲ့ နတ်သမီးကဲ့သို့ ကျက်သရေရှိစွာ လှပနေမှုလေးကို သူတို့ရင်ထဲ စွဲနေသောကြောင့်ဖြစ်သည်။
ကျိုးယွင်ရှန့်က ခဏတွန့်ဆုတ်နေပြီး Gustav ရဲ့ ရှည်လျားသည့်ခြေတံများပေါ် ထိုင်လိုက်သည်။ Gustav က ရေမွှေးတချို့ ဆွတ်ထားပုံရပြီး သူ့ဆီကရတဲ့ရနံ့က ကျိုးယွင်ရှန့်ကို အရမ်းသက်တောင့်သက်သာ ဖြစ်သွားသလို ခံစားရစေသည်။

"ကျွန်တော် သဘောပေါက်ပြီ.. ကျေးဇူးတင်ပါတယ် Mr. Acheson.."

"ကိုယ့်ကို ကျေးဇူးမတင်ပါနဲ့.. ဒီဟာက နောက်ဆုံးပုံပဲ.. ဒါက လုံးဝ perfect ဖြစ်နေရမယ်လေ.."

Gustav က တွန့်ဆုတ်စွာ ကြောင်ပေါက်လေးကိုလွှတ်လိုက်ပြီး ဓာတ်ပုံဆရာနေရာကို ပြန်သွားလိုက်ရသည်။ သူက ပါးနပ်စွာဖြင့် ကြောင်ပေါက်လေးရဲ့ဆံပင်ကို အသာအယာ ပွတ်သပ်လိုက်တော့ ဆံပင်လေးတွေက ပိုးကြိုးမျှင်လေးတွေလို နူးညံ့လှတာကို ခံစားလိုက်ရသည်။ ကြောင်ပေါက်က ဘာခေါင်းလျှော်ရည် သုံးတာပါလိမ့်။ ဒီအနံ့လေးက လန်းဆန်းနေပြီး သူ့ဆံပင်လေးတွေကို နူးညံ့ပျော့ပြောင်းနေစေသည်။ သူက ကြောင်ပေါက်လေး၏နှာခေါင်းကို ချစ်စနိုးညှစ်ကာ မေးလိုက်ချင်စိတ်ကို မနည်းထိန်းထားလိုက်ရသည်။

ကျိုးယွင်ရှန့်က ဆံပင်တုစွပ်မထားပေ။ သူ့ရဲ့ Stylist က သဘာဝမကျတဲ့ ဆံပင်တုကို တပ်ပေးတာက သူ့ဦးခေါင်းပုံစံလေးကို ဖုံးကွယ်ရာရောက်တယ်ဆိုပြီး ဆံပင်ရှည်တချို့ကို ဆက်ပေးခဲ့သည်။ ဓာတ်ပုံရိုက်ပြီးရင် ဒီဆံပင်တုတွေကို အလွယ်တကူ ဖြုတ်ပစ်လိုက်လို့ရသည်။

ဒါကြောင့် Gustav က Romeo ရဲ့ဦးရေပြားလေးနဲ့ လှပတဲ့ဦးခေါင်းပုံစံလေးကို မြင်နေရပြီး ဒီပုံစံလေးက သူ့ကို ပိုမိုဆွဲဆောင်နေသလို ခံစားလိုက်ရသည်။ ဒီအတိုင်း ကောင်လေးကို ပုန်းလျှိုးကွယ်လျှိုးလိုက်နေရတာ ကောင်း မကောင်း သူလည်းမသေချာတော့ပေ။

သူ့ရဲ့စိုးရိမ်ပူပန်မှုကို အနောက်ခဏပို့ထားပြီး သူ့အလုပ်ကို ဆက်လိုက်ရသည်။ Ivana က သူ့နေရာမှာ အစားဝင်ပြီး ထိုင်ခုံမှာထိုင်ချလိုက်သည်။ သူတို့က ဓာတ်ပုံရိုက်ဖို့ပုံစံကို အမြန်ဆုံးပြင်ဆင်လိုက်သည်။

"ဘေဘီ.. နောက်နည်းနည်းဆုတ်.. ကင်မရာကိုကြည့်.. မှန်တယ်.. ကောင်းတယ်.. ဘေဘီ.. မင်းရဲ့မျက်ဝန်းပြာလေးတွေက မျက်ရည်လေးတွေနည်းနည်း ဝေ့ဝဲနေပါစေ.. ကိုယ့်ကိုကြည့်.. ဟုတ်ပြီ.. ဒီအတိုင်းပဲ.. ရိုက်ပြီ.."

Gustav က ကင်မရာခလုတ်ကိုမနှိပ်ခင် မှန်ဘီလူးကို တစ်ချက်ညှိလိုက်သည်။ ဓာတ်ပုံရိုက်ပြီးတော့ သူက ဆယ်ကျော်သက်ချာတိတ်လေးဆီ လျှောက်သွားပြီး ဖက်လိုက်သည်။

"ဘေဘီ.. မင်းအနေအထား အရမ်းကောင်းတယ်.. ကိုယ် မင်းကိုချစ်တယ်.."

သူ့အသံက လှိုက်မောနေပြီး ဒီလေသံထဲ သူ့ခံစားချက်အားလုံး လှစ်ဟလို့နေသည်။

ကျိုးယွင်ရှန့်က ဒီလိုစကားမျိုးမှာ မပျော်ဝင်ခဲ့ပေ။ သူက ပြိုင်ပွဲမပြီးခင် ပြဿနာမတက်ချင်သောကြောင့် ပုံမှန်ကဲ့သို့ ကျေးဇူးတင်စကားသာ ပြောလိုက်သည်။
အနောက်တိုင်းသားများက 'I Love You' ဆိုသည့်စကားကို ပါးစပ်ဖျားလေးနဲ့ ဖောဖောသီသီ ပြောဆိုသုံးနှုန်းလေ့ရှိကြသည်။

Gustav က ကောင်လေးရဲ့တုံ့ပြန်မှုကြောင့် စိတ်ပျက်သွားပေမယ့် ပြိုင်ပွဲကိစ္စကို ဆက်လုပ်ရမှာရှိသေးလို့ ကောင်လေးကို တစ်ချက်ထပ်ဖက်လိုက်ပြီး Bonnie နဲ့ Jeffery တို့ဘေး သွားရပ်ရင်း ကနေ့ရိုက်ခဲ့တဲ့ပုံတွေကို ပြန်စစ်ဆေးနေလိုက်သည်။

ပြိုင်ပွဲဝင်အားလုံး အဝတ်လဲခန်းဆီပြေးလာပြီး ဝတ်ဆင်ထားသမျှကို ချွတ်လဲလိုက်ကြသည်။ တစ်နေ့တာဒုက္ခခံရတာ ပြီးဆုံးချိန်ရောက်လေပြီ။

Ivana က Mr. Acheson ကို တစ်ချက်လှမ်းကြည့်ပြီး သူ့ချစ်သူမိန်းကလေးနေရာမှာရှိတဲ့ ကျိုးယွင်ရှန့်နားပြေးသွားလိုက်ပြီး လက်မထောင်ပြလိုက်သည်။ ကျိုးယွင်ရှန့်လည်း လက်မထောင်ပြီး လက်မနှစ်ချောင်းထိပ်ချင်း ထိကပ်ကာ ချစ်စရာအပြုအမူလေး လုပ်လိုက်သည်။ John က သူတို့နောက်မှာ ကင်မရာတစ်လုံးနဲ့ လိုက်ရိုက်နေလို့ သီးသန့်စကားတော့ ပြောခွင့်မရလိုက်ပေ။ ကျိုးယွင်ရှန့်က တုံ့ဆိုင်းစွာ လက်ယမ်းပြလိုက်သည်။

Ivana ကတော့ မယုံပေ။ Mr. Acheson ကိုကြည့်လိုက်တာနဲ့ သူက Romeo ကို ဘယ်လောက်တောင်နူးညံ့ပြီး ချစ်ခင်ကြင်နာတယ်ဆိုတာ ထင်ရှားနေသည်။ တကယ်လို့ သူသာ Romeo ကိုမချစ်ဘူးဆိုရင် ဘာကြောင့်တစ်ချိန်လုံး Romeo ကိုပဲ အာရုံစိုက် လိုက်ကြည့်နေမှာတဲ့လဲ။ ဓာတ်ပုံရိုက်တဲ့တစ်ချိန်လုံး သူမဘယ်လောက် သည်းခံနေရတယ်ဆိုတာ သူမဘာသာ အသိဆုံးပဲဖြစ်သည်။ Mr. Acheson က သူမဘာလုပ်နေသလဲဆိုတာ လုံးဝမသိတဲ့အပြင် ဘယ်လိုလုပ်သင့်တယ်ဆိုတာ တစ်ချက်လေးတောင် လမ်းမညွှန်ပေးခဲ့ပေ။ သူက Romeo ရဲ့အလှဆုံးအနေအထားကိုပဲ တစ်ချိန်လုံး ရိုက်ကူးနေခဲ့တာဖြစ်သည်။

သူက Baby လို့ခေါ်နေပေမယ့် ဒီစကားလုံးတွေက ပေါ့တီးပေါ့ဆ ဒီအတိုင်းခေါ်လိုက်တာမဟုတ်သလို စိတ်တင်းကျပ်တဲ့အခြေအနေကို လျော့အောင်ခေါ်နေတာလည်း မဟုတ်ပေ။ သူက Romeo ကို သူ့ရဲ့တန်ဖိုးကြီးရတနာလေးလို သဘောထားမှန်း လေသံထဲမှာ သိသာနေသည်။

Ivana က ဒီကိစ္စအတွက် လုံးဝမနာလိုမဖြစ်ဘဲ သူမရဲ့ထိုးထွင်းမြင်နိုင်စွမ်းကိုပဲ ဂုဏ်ယူလို့နေသည်။ Mr. Acheson က Romeo ကို လုံးဝချစ်နေတယ်ဆိုတာ သူမပိုင်ဆိုင်သမျှအားလုံး ချလောင်းရဲသည်။
==================