Taehyung ke Jungkook ka Jimin

Ch 18 - Taehyung ka Birthday

Third Person's POV:

2 mahine ho chuke the. Sabh apni apni life mein aage badh rahe the. Iss bhaag daud bhari zindagi mein se samay nikaalna mushkil sa bann gaya tha. Taehyung ka Birthday aa chuka tha. Usne Namjoon, Jin, Suga, Hoseok, Jimin, Jungkook ko message kar "Nam Da Dhaba" pe party karne bulaya.

Darasal "Nam Da Dhaba" Taehyung ke acche dost Eric Nam ne boht hi mehnat se payi payi jodke shuru kiya tha. Uske papa usko Engineer banana chahte the parantu uske kuch aur hi sapne the. Uske andar khudka business shuru karne ki iccha thi. Usne apne dil ki pukaar suni aur ghar se nikal padha. Kabhi railway station pe raat guzaari toh kabhi doston ke gharon pe neend puri ki. Khaana milta toh bhagwaan ko shukriya kehkar woh bhook mitata, nahi milta toh woh bina kuch khaye hi din nikaalta. Uske sapne toh bade the hi, uska jazzba aur bhi bada tha. Pehle pehel usne ek choti moti job kar paise ikkhata kiye. Unhi paiso ke balbute usne ek choti se dukaan rent pe li aur waha kuch vishwaasyogi doston ke saath Dhaba shuru kiya. Shuruaat mein kaafi dikkaton ka saamna karna padha par uske haar na maankar har chunauti ka datkar saamna karne waale attitude ne usko ek safal insaan banaya. Aaj dekho toh uska Dhabe mein har roz bheed dikhai deti hai. Kabhi kabhi toh baithne tak ki jagah nahi rehti. Itna hi nahi, usne apne Dhabe ke kayi saare branches India bhar mein khol liye. Sachmuch yeh safalta uski iccha shakti ka hi nateeja tha.

Ab baat ko waapis le chalte hai Taehyung ke Birthday ki ore. Taehyung ka Birthday ho aur uske dost na aaye, aisi na insaafi bhala kaise ho sakti thi? Sabh log "Nam Da Dhaba" pe aa pohoche. 2 tables already reserve karne ke kaaran plan cancel hone ke chances almost zero the. Jabh puri mandali ikkattha hui toh pehle sabh apne apne life ke baare mein batane lage.

Namjoon Hwasa se shaadi ke baad boht khush tha. Usko apne mehnat ke dum par promotion mili. Khushi ka thikaana toh tabh na raha jab Hwasa baby expect karne lagi. Namjoon ne kayi baar apne doston ke saamne papa banne ki khwahish vyakt ki thi. Ab woh khwahish hakikat mein badalne ja rahi thi. Woh aksar apne aap ko baby product shops mein khada paata. Kabhi baby shoes kharidta toh kabhi baby toys. Uske baby ka sirf usko aur Hwasa ko hi nahi parantu uske saare squad ko hi intezaar tha.

Jin ko ek play mein lead character mil gaya tha jisko leke woh boht excited tha. Play ki popularity ke chalte, all over India woh shows karne ke liye travel karte rehta tha. Kammo bhi Jin ke saath kaafi khush thi. Jin ki success ko dekhke Kammo ke mummy-papa bhi zyada dino tak Kammo ki pasand ke khilaaf na reh paye. Jo thodi boht shanka thi woh Taehyung aur Jimin ne mummy-papa ko samjha kar dur kardi. Ab toh kisi bhi waqt shaadi ki announcement ho sakti thi.

Suga ne kuch labels ke liye apply kiya tha aur luckily woh select bhi ho gaya. Log uske passion ko neecha dikhate, par ab usko koi fark nahi padhta tha. Rapping uska pyaar tha jisko woh kabhi nahi tyaag sakta tha. Pyaar rapping ke alawa Jimin bhi tha. Bhale hi Suga ek introvert tha jo apne feelings ko chupa ke rakha karta tha, Jimin ke saamne yeh saari baatein udan choo ho jaati aur woh dono ek cliche romantic couple jaise behave karne lagte.

Jimin ek happy space mein tha. Masti ke bina bhi koi life hai bhala? Par yeh masti apni taraf aur career ko leke seriousness apni taraf. Usne realize kiya ki uska inclination cricket ki taraf hai. Tv pe Virat Kohli ko khelte dekh woh aksar khudko uss field pe imagine karte hue kho jaata. Usne socha ki woh padhai beshak karega parantu cricketer banne ke apne sapne ko bhi nahi tyaagega. Uske 12vi ke results kabhi bhi aa sakte the, intezaar tha toh bas uska. Raha sawaal uske aur Suga ke relationship ka toh woh din ba din strong hote ja raha tha. Unke baare mein kareebi doston ke alawa kisiko bhi pata nahi tha aur woh iss homophobic society ke chalte kisiko batane ke baare mein bhi nahi soch rahe the.

Hoseok apne teacher ki naukri se khush tha. Free time mein woh apni hobby ko zinda rakhte hue dance classes bhi liya karta tha. Jimin ko ek baar jaise usne motivate kiya lagbhag ussi tarah usne kayi aur bhatke hue baccho ko sahi rah dikhai thi. Uske students uski badi izzat karte the. Kuch toh pyaar bhi karte the, student teacher waala nahi, thoda alag waala. Dance class ki ek student toh Hoseok ko constantly approach kar rahi thi. Sabh kuch ab Hoseok pe nirbhar tha.   Raha sawaal Hoseok ki zindagi ka toh chehre pe ek hassi ke saath woh life ke har ek mod ko enjoy karta. Kabhi bhi kisi situation mein niraash hue bina, apne kadam badhaye jaata.

Jungkook ne apne future studies ke liye jis college mein apply kiya tha, usko waha merit ke basis pe admission mil gayi. Jimin jaise aur bhi logon ki usne tuition leke kaafi pocket money jama li thi jo ab uski padhai mein kaam aa raha tha. Woh lawyer banne mein interested tha aur ab usko woh banne se koi rokh nahi sakta tha. Rahi baat uske aur Taehyung ke relationship ki toh woh kaafi speed se progress kar raha tha. Woh aksar dates pe jaate, Taehyung uske upar kisses ki barsaat kar deta toh Jungkook uspe gudgudiyon ki. Bhale hi iss homophobic society ki nazron ke saamne haathon mein haath daale ghoomna aasaan nahi tha parantu woh bina hatash hue iss problem se bhi nipat lete the. Dono ne ek dusre se ek promise kiya tha ki woh kuch saalo baad jabh unke careers stable ho jayenge tabh apni families ko apne baare mein saari sacchai batake apne relationship ko next step pe le jayenge aur zindagi bhar ek dusre ka saath nahi chodhenge.

Taehyung already Fine Arts ka course kar raha tha. Mummy-papa ne objection uthaya par Kammo aur Jimin dono hi behen bhai hone ka farz nibhaate hue uski tarafdaari karne lage aur aakhir jeet Taehyung aur uske choice ki hui. Sapne, unn sapno mein uska choice of career, dost, family aur Jungkook the. Sabh kuch as per planned ja raha tha. Life se aur kuch nahi chahiye tha.

Baatein khatm hui toh baat aayi birthday bumps aur cake cutting ki. Maar khake Taehyung ka bhurta bana gaya. Ghar jaake usko balm lagana padh sakta tha. Cake kaatke aadhe se zyada cake toh Taehyung ke chehre pe laga diya. Raat ko isko aise khulla bhej diya jaye toh bacche bhi darr sakte the. Taehyung ne aas-paas dekha aur kisike dekhne se pehle hi jaldi se Jungkook ko lips pe kiss di. Taehyung ke lips pe jo cake laga hua tha woh Jungkook ke lips pe lag gaya jiske impulse mein Jungkook ne khudke lips ke saath saath Taehyung ke lips bhi lick kiye. Iska explanation dete hue Jungkook keh padha ki cake tasty hai aur woh sharm se laal ho gaya. Jaha ek ore Namjoon aur Jin unn dono ki taraf dekhke smirk karne lage, dusri ore Suga, Jimin aur Hoseok bhi chidhane lage.

Order kiya hua khaana aate hi Taehyung aur Jungkook ko sabhi ke chidhane se bachne ka mauka mila. Sabhne daba kar Tandoori Chicken, Butter Chicken, Kadhai Paneer, Dal Fry, Naan, Pulav Rice, Lassi aur Gulab Jamun ka luft uthaya. Jabh Taehyung pay karne ja hi raha tha tabh sabhne usse rokhkar contri karne ka decide kiya.

Jabh sabh utne ki tayyari kar hi rahe the, tabh Jimin ke phone pe notification aaya. Usne check kiya toh apna 12vi ka result paaya. Woh acche number se pass ho chuka tha. Khushi ke maare woh fula nahi sama paya. Usne yeh khushkhabri waha khade uske sabhi doston ko di toh sabhne usko group hug karke Jimin ke naam ka cheer bhi kiya. Jimin ne sabhko next meet pe daaru pilaane ka wada kiya.

Doston ko bichadne ka mann nahi tha. Kya pata next time apne busy schedule se time nikaalkar kabh ek saath ikkhatta ho paate? Namjoon ko agli flight se Bangalore jaana tha, Jin kuch dino mein Delhi mein show karne jaane waala tha, Hoseok baccho ko padhane ke liye fir busy hone waala tha, Jungkook aur Yoongi family ke saath choti si trip pe jaa rahe the. Sabh khush toh the par bichadne ka ghum bhi tha.

Sabhne ek dusre ko kaske hug kiya aur jald hi agli baar milne ka waada kar.
Sabhi ek saath gaane lage,
"Yeh Dosti Hum nahi Todenge,
Todenge Dum Magar Tera Saath Na Chodenge"

Yeh madhur geet ke saath, sabh apni apni manzil ki ore nikal pade.

**************THE END************