My teacher🌟

الجزء الأول🌟

كلية الهندسه..الساعه 9:30
عبد القادر:
والله مخطط بعد نتخرج نخدم مع جدي في التجاره
........
كليه الفنون 11:00
عبد القادر: مخطط إن شاء الله بعد نتخرج نخدم في التجارة مع جدي..
......
ابن منظور 1:00
عبدالقادر: نفكر بعد التخرج نخدم في التجارة ونريح جدي شويه
🔥🔥🔥🔥🔥
لبنت كليه الهندسه: احمم..اعذريني ممكن يكون كلامي ملخبط اول مرة نتعامل مع بنات..
.....
لبنت كلية الفنون: هههه..مرتبك شويه الحق اول مرة نقعمز مع بنت.
......
لبنت ابن منظور: مش عارف كيف نرتب الكلام مش متعود نهدرز ع بنات😅
🦋🦋🦋🦋🦋
بنت الهندسه😍
بنت الفنون😍
بنت ابن منظور😍
🌟🌟🌟🌟🌟🌟🌟🌟🌟🌟🌟🌟🌟🌟🌟
في السيارة...
عبدالقادر وهو يسوق: راهو مش تقولوا لعب بمشاعر بنات الناس بالعكس اني قاعد نعزز في ثقتهم بأنفسهم..
تسألواكيف؟؟
نقوللكم كيف...
اني ربي ناعم عليا بوسامه وشخصية تقتل..وقليل النادر مايكون في مني في المجتمع...تنكروا.؟!!!😎
المهم أني من وجهة نظري حرام نقعد داب وحده بس والباقي يقعدوا يتفرجوا عليها بحسد..فاقلت خل نوزع روحي ع اكبر عدد ممكن...ونكون نفعت بحاجتين..
واولهم تخفيف حمض الحسدوليك الموجود بتركيز عالي عند البنات...
تاني شي نعزز ثقتهم بأنفسهم ان واحد زيي بمواصفاتي اللهم بارك..معجب بيهم...
تو بالله ...اشر بسبابته ع راسه...مش هدا دماغ يفكرصح😁😎
قعد يحرك فيده بحركة دائريه وهو يقول ..
وينك ياراجل عمتي وينك ...طلعت عضو فعال في المجتمع اكثر منك ...😏
وقف عند الإشارة وقال:
افففففف....الليبين كلهم في الشارع...اللي يشوف زحمتهم هادي يقول ان حني بلاد عجلة التنميه فيها تجري جري...
طياح سعدهم وسعدها....
تأفف مرة تانيه ووزع نظره حواليه شبح جنبه شاف وحده مدرسه جنبه وتشوفله...
هو ابتسم ع جنب..والغمازة بانت حول النظارة..وغمزلها...
وهي راحت فيها 😍...
 🌟🌟🌟🌟🌟
عبدالقادر....البالغ من العمر 26سنه...
بوه وامه ماتوا في حادث وهما ماشيين يعزوا
بيعزوا..عزو فيهم💔
المهم
 وقتها كان عمره 7شهور قعد عند اهل بوه لأنهم اولى بيه ومع هدا عيلة امه ماخلوشي ولابطلوا زيارات بش يشوفوه..
لعند بدي يكبر شويه قعد يتنقل بين الزوز...
وكان حايز الغلا والدلع كله...اللي هدا يبي يعوضه عن فقدانه بوه وامه...
وحضرة جنابه مع مرور الزمن بدي يستغل في وضعه هلبه بش يوصل للي يببه 😁
صح لخباط ومستهتر...لكن مش منحرف..ولاقرب فحياته من دخان ولاسكير..ولا مشي في طريق الحرام...
🌟🌟🌟🌟🌟🌟
لبست ووتت روحها بش بتمشي لحوش امها وتحضر بيان اختها...
آمنه: هيا ياحناااااي...
تبرة:هي هي جايه جايه....
جتها تبرة تمشي بسرعه شبحتلها:كيف قصدك بتمشي للبيان بحوايجك هادم...
آمنه: ايه ماعنديش غيرهم وهيا حناي بالله ..فتحت الباب وطلعت..
تنهدت حناها بضيق ..وطلعت وراها...
 🌹آمنه بنت25...المتفوقه والناجحه واللي سابقه سنها حتى في الدراسه خشت ع عمر 4سنين..
برغم نجاحها هدا...الا انها كانت مش واثقه فنفسها من نواحي تانيه..زي كونها انثى...
مانبيش نقول مش مهتمه بنفسها لامهتمه..بس لنفسها مش مفكرة انها تلفت انتباه حد...وممكن العيب الخلقي اللي عندها مخليها مش مفكرة فشي اساسا...
ركبت السيارة وجنبها حناها وتحركت....
🎸🎸🎸🎸🎸🎸🎸🎸🎸🎸🎸🎸🎸🎸🎸
وعبدالقادر يابوعنب ضاق الحال عليا..
داوي حالي يابو عنب سيدي روف عليا..
المشكله انه يسمع في الاغنيه المفتوحه في سيارة...
خالد وفوديل وتالت اللي معاهم مانعرفش اسمه😅...
يقولوا  عبدالقادر يابوعلام...وهو يسمع فيها عنب...😂
وهو مكمل طريقه..رن تليفونه...
نقص الصوت...
وقامه يشوف فيه....ضحك...
شويه ودرس ع تركينه...
عبدالقادر: واهو حاجه تانيه ننفع بيها في المجتمع...نحافظ ع قواعد المرور...وييينك ياراجل عمتي بسس..😁...
شبح لتليفونه وقال...اللي تتصل هادي مش حتعتقني لين نرد ...ههههه...لالا مش زي مافي بالكم...هادي خالتي بلبله..
او نبيله...هادي ..طبعا هي تتصل مرة مرة تنشد ع حالي واحوالي...لكن غالبا اتصالاتها لمصالح....
اولهم..اني نسحبلها فلوس من المصرف...
وتانيهم ...حك لحيته وهو يضحك وقال..مش حنقول تانيهم انتم حتعرفوه توا...لأنه غالبا هو السبب اللي متصله بيا  ع خاطره...
فتح الخط...ورد....
عبدالقادر: بلبله....
نبيله :قدري ...شن جو ياصقوعي...
عبدالقادر بضحكه:مليييح ياصقوعيه...
ضحكت وقالت : مليح بكل...وحتى اليوم الجو قنين والشميسه زارقه...
عبدالقادر بضحكه: زبطتت النعته ره..
نبيله:ههههههههه خلاص هيا تعال جري جري طارحتهم فوق السطح...
عبدالقادر بضحكه:تم...مسافة الطريق..
نبيله : سوق باالشويه ...وره نراجي فيك سقد روحك البساطات كلتهم الشمس..وصكرت عليه..
عبدالقادر قاعد التليفون ع وذنه ويضحك برفعة حواجب: متعود عادي...هي هكي خالتي هادي شخصية مش مفهومه...
وملخبطه شويه...
حط التليفون في مكانه...ورجع شغل السيارة وتحرك بطريقه لحوش خالته...
🛶🛶🛶🛶🛶🛶🛶🛶🛶🛶🛶🛶🛶🛶🛶
لولا الهوى...
لولا الهوى....
معقوله انتي اللي تشكري فجمالي
وفروحي وكمان حسني....حسني....
دنا اللي دايب رسمي فهمي نظمي..وفوزي وشوقي لو تحبي...
فاتح بحداه الأغنيه من تليفونه ويكد في البساط ويغني ..
مرة يكد...مرة يرقص....
ويحب هلبه يرقص بكتافه...معروف بيها الحاجه هادي 😁..
تمت الأغنيه...
مشي لتليفونه وعاودها مرة تانيه...
وكمل كدان ع رقيص...😂
ركبتله خالته...لقاته يرقص: يانهاري الاحرش وني نحسابك حنى نشرته...
عبدالقادر قعد يغني ويرقص فكتافه ويقدملها...
لولا الهوى ماكنت جيت لولا الهوى...
حبيبتي جيت وبقولها بالعربي...
مسيطرة ع بالي ع فكري ....
فكري...وبقولها من قلبي...
وصل فيها...وقعد يقدم ويوخر وهو يرقص بكتافه..
خالته ضحكت وضرباته ع كتفه : برا قوله لوحدة من المنجوهات اللي تبلعط عليهم..
عبدالقادر وهو مازال يرقص:مافيش وحده منهم تستاهل الكلام اللي في الأغنيه...اللي ينقاللها الكلام هدا لازم تلخبطني ...مش اني اللي نلخبطها...
نبيله بضحكه : باهي ياملخبط كمل اللي فيدك بسرعه بش تتغدا..
وقف ورفع نظاراته فوق راسه :شن دايرة...
نبيله بضحكه:كسكسي بالحوت...
فجاة طاح يحك في البساطات بجهد جهده بأقصى سرعه..
وخالته تضحك عليه...
عشقه الكسكس بالحوت😍...
زيني 😍😍😍😍😍....
بيناتنا هلبه صفات مشتركه😍...غير هو مش مركز😑
ماعلينا 😔...
🌟🌟🌟🌟🌟🌟🌟🌟🌟🌟🌟🌟🌟🌟🌟🌟
الساعه 8:00مساءا..
تشوف لاختها كيف طالعه حلوة وناعمه هلبه..
هي مبتسمه طول الوقت وهي تشوفلها وفرحانه لفرحتها...
بينما في ناس تانيه فسرت نظراتها ع مزاجها ...
:ماما شوفي شبحاتها لروبين مش مريحتني..
مريم ام آمنه: خيرهم..
سيرين اختها: يتنطر الحسد من عيونها...
مريم:ترا اسكتي وياسرك قطاف..
سيرين:😒...
.......
اختك خيرها لابسه هكي اللطف..
روبين:من يوم يومها شلافطيه الحق مانبيهاش تجي قبل لكن امي...
صاحبتها رتاج: مهما كان اختك..
روبين : والنبي اسكتي ماتنرفزنيش...مش عارفه لما يجوا اهل عصام كيف بنعرفهم عليها..
.......
تنهدت آمنه بملل...ماتحبش تجي للمناسبات الإجتماعيه هلبه ...
شويه وجت امها قعمزت حداها....
مريم:خيرك جايه هكي اللطف تقول ارمله ولاهجاله..
شبحتلها وقالت بتهكم:حال الارمله والهجاله خير من حالي...اقلها فقدوا راجل يتعوض..لكن اني فقدت اللي مايتعوضش..
مريم شقلبت عيونها بملل: اييييه علينا ...نكد في نكد زي بوك بالزبط..غير شن خلاني نضبح عليك تجي مش عارفه.. ناضت من حداها ومشت...
آمنه ابتسمت بتهكم ممزوج بالألم..برغم ان الدموع عبوا عيونها...
الاانها بدلت ابتسامتها..بإبتسامة كبرياء وتماسكت ..
شويه...
وجو اهل العريس....
وكانوا جايبين بيان مش ناقصه كان بوك وخوك زي مايقولوا😂
المهم..
خش الخطيب بش بيلبس خطيبته..
عصام استاذ في الجامعه ..انسان مثقف ومحترم ووسيم
عمره 30سنه...طبعا خطوبته من روبين تقليديه عن طريق وحده من صاحباتها تكون قريبته...
كلهم انبهروا بيه لما شافوه..مازال احلى من روبين بهلبه ويبان شخصية ثقيله ورزينه...
يدوب لبسها الدبله وخدي كم صورة وطلع...
وروبين كانت شايفه روحها بيه ع بنات العيله...واغلب اللي عزمتهم...عزمتهم بش تغيظهم بيه...
شويه
وآمنه قالت لحناها هيا...لان وراها نوضه بكري في اول يوم دوام في الكليه....
سيرين: روحت بكري من السحن..
روبين :يستر الله من عيونها ....
سيرين: تو نعطيك مية رقيه بعدين...
🍃ماتستغربوش...
في خوات هكي...يبدوا من نفس الأب والأم وهادي مشاعرهم اتجاه بعض🍃
🌟🌟🌟🌟🌟🌟🌟🌟🌟🌟🌟🌟🌟🌟
اما كسيكسو ياحناي نودك بيه..
تجديده بضحكه: انت وين تمشي لخالتك نبيله تولي تدوي زيها..
ضحك عبدالقادر وقال:اسلوبها يعجب فيا..
تجديده  ضحكت وقالت :هات البشارة...
عبدالقادر ابتسم بفرح:نمشي نلوح سيارتي في الرابش!!
تجديده ضحكت وهزت راسها بإيجاب...
ناض وباس راسها وهو يغني : ياسلم حناي اني
ديماديما ادلع فيا..ياسلم حناي اني ديما ديما تفرح فيا...
يانجي حناي اني...ياسلم حناي اني.
*لكن وقسما بالله ماتتخرجش السنه الجايه وعليا اليمين ناخدها منك ونقطع عليك الفلوس ومعاش تشوف مني خمسه قروش مصديه"...
قعد جامد فمكانه وهو يشوف لجده ويضحك بإرتباك:حااضر😅
عطاه الحاج فرج تفنيصه ومشي لداره...
عبدالقادر: مولي يخوف هلبه...
تجديده بضحكه: تبيها العين الحمراء...
شبحلها شويه بعدين ابتسم وقال:يانجي حناي اني..
تجديده:هههههههه
🌟🌟🌟🌟🌟🌟🌟
ورجعت اشرقت شمس يوم جديد...
وبنفس الروتين ماشيه الحياة...
غير اختلف اليوم شويه على آمنه اللي كانت تستعد للمشي للجامعه...
اول يوم ليها...وحتدرس في الجامعه لأول مرة..
بعد ماكانت مدرسه في مدرسه لمدة شهرين...ماتحملتش قله ادب الطلبه واستهتارهم سيبتها وطلبت من خالها يدبرلها في الجامعه...بإعتبارها واخده الماجستير...
وخالها بالمعارف حصللها..في قسمها الحاسب الآلي ...
🌹بعد فطرت ...
ناضت بتطلع...
خالها محمد:ارفعيلي راسي ..
ضحكت وقالت؛متوقع غير هكي..
خالها بضحكه؛طبعا لا..
ابتسمت وباست ع راسه...وجت طالعه لقاتها حناها بالبخور...
قعدت تبخر فيها..
امنه وهي تكح وتضحك في نفس الوقت:غير علاش بس..
تبره: بش يصرف عنك عيون الناس..
آمنه بضحكه؛ وع شن بيعينوني الناس..
تبرة بأستعجاب:قاتلك ع شني ...صغيرة واستاذة في الجامعه ...
آمنه ضحكت بتهكم وقربت باست ع راس حناها بعدين قالت: الناس هني مايعينوش فحاجات زي هادي اطمني ياحناي...
مشت من حداها متوجهه للباب...
حناها معاها بعيونها وهي تشوفلها بضيق ...
طلعت امنه وصكرت الباب وراها...
شبحت تبرة للكوجينه لقت ولدها يشوفلها بضيق حتى هو...
🌟🌟🌟🌟🌟🌟
طالع حالا ياصديقي....
نقز في السيارة..
وشغلها..
عبدالقادر: مجبور الله غالب الحاج مولي يخوف الحق..هههههههه .......اوكي حوزلي مقعد...ههههههههه
وتحرك طول طلع من الحوش...
🌟🌟🌟🌟🌟🌟🌟
في كلية العلوم..
قسم الحاسب...
استادة فايزة: بنية ماشاء الله عليها نعرفها معرفه شخصيه..
عصام:اول مرة تحاضر لكن..ان يعطوها ماده اساسيه تحسيه تسرع ومجازفه...
فايزة؛بالعكس يااستاذ اني درستها زمان ونظرتي فيها نظره ماتخيبش إن شاء الله..
عصام : إن شاء الله..هي مالا اني بنستاذن عندي محاضرة..
فايزة: اذنك معاك...ضحكت وقالت...ايه نسيت..مبروك الخطوبه..
عصام ابتسم:الله يبارك فيك....
ومشي طول لقاعات المحاضرات...
🌟🌟🌟🌟🌟🌟🌟
وصلت للكليه...
درست سيارتها في الساحه...
فتحت الباب ونزلت ...
مجرد سكرت الباب...
سطربت حداها سيارة...دارت عاصفة الصحراء😂...
تكمشت في بعضها وهي مغمضه عيونها...
هو نزل من السيارة وهو يغني : كل البنات بيك مغرومين..
ياحرام دول مساكين...ياحرام دول مساكين..
هي قعدت تشوفله وهي تحك فعيونها...
شافاته يمشي بغرور ويقص في الطريق...
وهو يتنطوط ع قولة ملاك😂...
ملاك هادي وحده من متابعاتي العسلات😍..
المهم..
مطت شواربها بإزدراء وقالت؛إن شاء الله عقابها خير..
بدت تمشي بطريقها للكليه ..
وين جايه تقص الطريق اللي يشوفها كيف تمشي يوقفلها طول..
وهي تضاااايق ع الآخر من هالشي..
كملت طريقها وتحاول تتجاهل النظرات ليها...
🍃راهو حتى في مجتمعات العالم الاول هكي يتصرفوا لازم يحسسوا اي حد ربي مبتليه بعيب معين انه ناقص..وممكن يعايروه بيه ...ويتنمروا عليه مع الأسف🍃
🌟🌟🌟🌟🌟🌟🌟
الساعه 9:00...
خشت للقاعه بعد طلقت السلام...
وصكرت الباب...
كلهم مركزين عليها كيف تمشي..
لعند وصلت للطاوله حطت حاجاتها ووزعت نظرها عليهم. وقالت: طبعا اول حاجه وقبل كل شي نخش اني مانعرفش حد يخش بعدي ومن اليوم حنبدا بالشي هدا..
فاروق :هدا شنو خيرها متحمسه هكي هادي...
جلال صاحبهم حتى هو: معناها قدو مطرود...
فاروق ضحك..
امنه وهي طلع في اللاب من الشنطه:ضحك وهدرزة جانبيه مانبيش اللي يبي يهيدق يطلع من توا...
فاروق وجلال😳😳...
🌟🌟🌟🌟🌟🌟
طبعا السيد قدورة بعد شرب النسكافيه متاعه ع رواء.. ولخبطله كم بنت ع صبح ربي😁..
تسقد للقاعه بش يحضر المحاضرة...
وصل في القاعه فتح الباب بكل ثقه وخش..
آمنه وقفت شرح وشبحتله برفعة حاجب عرفاته من البدايه وطبعا مازال طايرتلها منه: هيييي هيييي انت .
عبدالقادر رفع حواجبه وتلفتلها واشر ع روحه: Me..
آمنه برفعة حاجب وهي تاشر بيده: لف وارجع من وين ماجيت..
قعد يشبحلها برفعة حواجب وحط ايديه ورا ظهره وابتسم وقال:Oowww...Good morning....My teacher

....يتبع...

نبيكم تعذروني اول روايه ليا فكرتها تكون وليده اللحظه واحداتها وليدة اللحظة كذلك💓💓💓