🌟..
"قتلك ماقالي شي ياأستاذ!"
عصام:باهي اني اسف كان ضايقتك..
امنه لفت بتفتح باب سيارتها وتركب..
جمدت في مكانها فجأة لما سمعت صوت تعرفه كويس يقول..
"هدا شنو يااستاذة آمنه!؟"
عصام بصدمه ممزوجه بالغضب:شن اديري هني انتي!؟
روبين وهي تمرر في نظرها عليهم بحده قالت:جابني ربي بش يفضحكم ياسفله..
امنه بحده وعيونها مليانات دموع:روبين ضمي فمك..
روبين:لامش ضامه فمي ياأستاذه..ياشيخه..يااختي اللي قاعده تطعن فيا من ظهري!
عصام:اختك!!؟
روبين رفعت حواجبها وقالت:قصدك ماتعرفش انها اختي!؟
شبح عصام لآمنه وهو مصدوم..
وآمنه قاعده تشبح لأختها...جت بترد عليها..لكن تراجعت لما اختارت الإنسحاب خير من الفضايح..
شبحت لسيارتها فتحت الباب وركبت وصكرت الباب..
روبين:هاربه ياحقيره هاربه...
وقعدت تخبط ع سيارتها وتقول:انزلي واجهي واجهي ياخاينه..
شغلت السيارة وتحركت طول..
في نفس الوقت اللي جبد فيه عصام روبين من ذراعها وقال:تعالي هني وصكري فمك..
نفضت ذراعها بقوة وقالت:حول يدك..بعد اللي ريته بعيوني مانقعدش معاك دقيقه وحده...
عصام بقرف:على اساس اني اللي نبي..العشيه بنجيكم الحوش وننهيها مع بوك.. عليك طيحه سودا...
ومشي عنها لسيارته وخلاها وهي تشبحله بحقد شافاته ركب سيارته وتحرك قعدت مع السيارة بعيونها وهي تقول:افتكيت من خليقته..لكن هديكا والله ماني مخليتها تو تشوف شن ندير فيها..
ولفت ومشت للطريق متوجه للمكان اللي يوقف في باص الجامعه...
🍂🍂🍂🍂🍂
فهالوقت..
كانت امنه تسوق وهي تبكي مش واجعها الموقف اللي صار بينها وبين اختها ولاهمها..
كل همها عبدالقادر واللي صارله اليوم بسببها وكلامه الأخير اللي قالهولها قبل ليمشي..
قلبها واجعها عليه هلبه...واللي حست بيه توا ع خاطره خلاها تتأكد من حقيقة مشاعرها زي ماتأكدت من صدق مشاعره..
ولو انها ماتنلامش ع ردة فعلها..هو ليه تاريخ عريق مع البنات وعنده علاقات لاتعد ولاتحصى.. واللي حواليها من اللي يعرفوه فكرتهم عنه زي فكرتها بالزبط..
وغير هكي هي سمعت الكلام من صحابه..يعني شن مازال تبي اكثر من هكي بش تصدق ظنها السيء فيه!
🌟اما هو..
فعلا..ماقدرش يحمل في قلبه عليها شي..مايقدرش قلبه اللي يكنلها كل الحب يحقد عليها..
صاحب القلب الطيب لما يحب بصدق يبرر لمحبوبه كل اخطائه بل احيانا يركب روحه الحق...ويدير الغلط كله جاي منه هو وان المحبوب معذور شن مادار فيه وواجب عليه هو اللي يعتذر ويرضي..
عبدالقادر وهو يسوق:عندها حق..تصرفاتي معاها كانت تصرفات فروخ..مفروض خديت منها الموافقه بطريقه محترمه..كلمت وحده تعرفها تفتح معاها الموضوع ولادرت اي حل بالعقل..وبعدين واضح انها ماتبنيش..وحده زيها هي شن تبي فواحد زيي اني....
عض ع شاربه بقوة....
وفجأه فنص عيونه وشد فرينو...
فاتت من قدامه نفس القطوسه ومعاها قطاطيس صغار..
ارتسمت ع وجهه ملامح الامتعاض وهو يشبحلهم لين فاتوا..
بعدين حرك سيارته وهو يحرك في راسه يمين ويسار...
🍂🍂🍂🍂🍂
وصلت آمنه للحوش..
شافت سيارة بوها مدرسة قدام الباب..
غمضت عيونها بنفادصبر وهي تقول:ياربي ساعدني بش نشد روحي ومانغلطش فيه..يارب..
نزلت من سيارتها..ومشت للباب..
فتحاته وخشت..
..داخل...
عمران:بنتي واني حر فيها يامحمد..
محمد بحده:بنتك توا كبرت وهي حرة نفسها انت ماتقدر تجبرها على شي..
عمران بإبتسامه صفراء:محمد...اطلع منها رجاءا..
تبرة:لا ماتقدرش تقوللنا اطلعوا منها..امنه هادي بنتنا احني اللي كبرناها وربيناها وتعبنا عليها في الوقت اللي كنتوا فيه انت وامها عايشين حياتكم ماتندروا عليها جعانه ولاشبعانه..مريضه ولاحالها باهي..ناقصتها حاجه ولالا...انتم ماليكمش فيها حق بكل..
رفع حاجبه وقال:على هكي الحكايه ولت واضحه انتم عينكم ع حاجه تانيه..
فنصت تبرة بصدمه..
اما محمد اللي وصل لأقصى مراحل الغضب ناض وقف وهو يقول:هي وصلت لهني!؟ غير تروح بنتك اطلع انت وياها..
تبرة بصدمه:محمد!
محمد بعصبيه:ماتسمعيش شن فيه يقول يام!؟
"حتى اني سمعتك ياخالي"
كلهم شبحوا لباب الصاله..
لقوها واقفه تشبح لخالها ودموعها ينزلوا..رشفت وكملت تقول:عمري ماتخيلت ان كلمه زي هادي تطلع منك..
محمد ارتسمت ع وجهه ملامح ضيق ممزوجه بالإحراج وهو يشبحلها..
تبرة ناضت مشتلها وهي تقول:خالك مش قصده بنيتي والله ماقالها الا من ورا قلبه..
آمنه قعدت تشبح لخالها بنظرات خيبه..وهو غير عيونه عنها من خجله..
عمران:خلاص بري لمي حوايجك وهيا..
تبرة شدت آمنه من ذراعها وقالت:والله ماهي طالعتها الله..شبحت لآمنه وقالت..تطلعي من هني تنسيني..
آمنه بنبرة باكيه:خالي لزني من حوشه ياحناي..
تبرة:ومن قالك هدا حوشه!؟ من امتى ولى حوشه!؟ هدا حوشي اني حوشي واني قتلك ماتطلعيش كان تعزي حناك صحيح تسمعي كلامي..
عمران بإنزعاج:ياحاجه بالله ماتزيديش تعقديها وهيا انتي تحركي..
تبرة ودموعها ينزلوا:راجيني نموت وخودها بالله عليك سلم وليدي خلهالي لين نموت وبعدين خودها..اصلا خالتك معاش مطوله خلاص ماقعد اكثر من اللي فات..
آمنه حطت يدها ع راس حناها وقرباته ليها وباساته وهي تقول:خلاص حناي خلاص..مش طالعه..خلاص...
عمران:آمنه!؟
آمنه شبحت وقالت:اللي تبيه نديره حاضر غير خليني معاها..
عمران رفع حاجبه وقال:كان درتي اللي نبيه هكي ولاهكي مش حتقعدي معاها..
تبرة شبحت لآمنه بآستغراب..ومحمد يشبح لعمران..
امنه رشفت وقالت:شن تبيني ندير؟
عمران:تتزوجي..
امنه قلبها زاد دق بقوة ...
عمران:اقسم بالله الراجل هالمره مافيش منه واهله عز الناس نعرفهم من زمان..وهو قالي انه يعرفك انتي تقري فيه..
آمنه وجعها قلبها بزايد..
وحناها وخالها يشبحولها..
عمران:اني نبي مصلحتك..شن ماكان انتي بنتي ونبيك تعيشي مرتاحه والناس هادوا اني شاد فيهم لأني نعرفهم زين والشاب بروحه ماشاء الله عليك..مؤدب ومحترم وجي من الباب طول..قالي بنتك ماعطتنيش فرصه ندوي معاها هدا علاش سألت عنك وجيتك..
امنه نزلت عيونها لوطا وقالت:باهي ماعنديش مشكله..
فرحت تبره..وخالها محمد تفاجئ في موافقها السريعه..
عمران وهو رافع حواجبه قال:خلاص هدا اخر كلام..
رفعت عيونها وشبحت لبوها وقالت:ايه..
بعدين لفت ومشت طلعت من حداهم متوجهه لدارها ودموعها ينزلوا..
عمران مرر نظره ع تبرة ومحمد بعدين قال:ان شاء الله رايها مايتغيرش..السلام عليكم..ومشي حتى هو طلع من حداهم متوجه لباب الحوش...
محمد:كان مش في حوشنا راهو درت تصرف تاني..
تبرة:تعدل عليه انت هدا!؟ ماتعرفاش كيف..لا هو فيه خير ولابنتي...غير خليني منهم توا وقولي زعمه حق راجل باهي اللي قال عليه.
محمد:مش عارف..لكن اني وجعتني امنه اضطرت توافق بش ماتطلعش من هني..
تبره بغضب:وشوف روحك انت شن قلت..
محمد بضيق:ماسمعتيشي شن قال يام؟!
تبرة:شن ماقال يقول مفروض انت ماتطلعش منك كلمه زي هادي..امنه هادي بنتك في راجل عاقل يلز بنته اللي رباها وتعب عليها لين كبرها!؟
تنهد محمد بضيق وقالت:كلمة وطلعت يام في لحظة غضب..
تبرة حركت راسها يمين ويسار ومشت بتطلع من حداه وهي تقول:لاحول ولاقوة الابالله..
🍂🍂🍂🍂🍂🍂
الساعه 1:30ظهرا..
"منين يعرفها!؟"
روبين بعصبيه:تخدم معاه شكلها الحقيره هادي..ومش بعيد هني اللي حطت عليه ومشت خدمت معاه بلعاني..
مريم:وشن عندها بيشبح فيها هي ويخليك!؟
روبين:في اللي هكي ذوقهم منحط زيه هو الحيوان هدا..اسمعي اني معاش نبيه معاش نبيه..
مريم:غير استهدي بالله خل نفهموا الموضوع قبل مرات انتي تطلعي فاهمه غلط..
روبين:لافاهمه صح وصح الصح..بعلامة ان هو مايعرفش انها اختي..لاعبتها صح السافله..
سيرين اللي كانت مقعمزة وساكته ماتحمتلش تسكت اكثر قالت:مامعدله كان على خطيبك وهي هداكا اليوم اللي روحت بيا فيه يلحق فيها واحد خطيبك مايجي في ربعه زينه..
شبحولها امها واختها بإستغراب..
روبين:تتسهوكي انتي؟!
سيرين:قسما بربي بعيوني ريته في جرتها لين حطتني قدام الحوش..
مريم رفعت حواجبها وشبحت لروبين..
روبين رفعت حاجبها وقالت:آمنه!؟
سيرين:ايه امنه..وبعدين خطيبك من قبل مش طايقك ولاانتي طايقتيه شن واجعك لو لقتيه مع امنه ولاغيرها..ع الأقل افتكيتي منه بش تخلى الساحه..
روبين فنصت في سيرين..
ومريم تمرر في نظرها عليهم بشك..
بعدين ناضت سيرين وهي تضحك قالت:خل نمشي نقرا..عندي اختبار غدوة..
ومشت من حداهم..
مريم شبحت لروبين وقال: فوتي الكلام الفارغ...المهم توا كان جي بعدين تو نفهموا منه..
روبين:مانبي نفهم شي..نبي نفسخ ياماما معاش متحملاته خلاص..
وناضت من حداها..
وناضت امها وراها وهي تقول بعصبيه:لا انتي في وراك حاجه..تعالي هني تعالي...قولي شن عندك..
🍂🍂🍂🍂
وبعد العصر..جي عصام لحوش روبين..
وصار نقاش محتدم بينه وبين روبين وبوها..انتهي بفسخ الخطوبه...
وكانت هادي اسعد لحظه عاشتها روبين وزي ماقالت سيرين الساحه خلت لإسماعيل توا واول حاجه حديرها انها ترجعله..
..........
الزبير:قال تخدم معاي وخلاص وعلاقتهم بحدود الخدمه وهو مايعرف عن حياتها الشخصيه شي بش يعرف انها اخت بنتك روبين..
مريم بغضب:اني حظي طايح وعقلي رايح جيبتي كلها جت بنات وكل وحده اخيب من التانيه..ياشماتة اللي يسوى واللي مايسواش فيا..
الزبير عكرش وجهه بملامح ازدراء بعدين شبح لتليفونه..
ومريم مازال تندب على حظها...
🌟🌟🌟🌟🌟
الساعه 7:00مساءا..
خش عبدالقادر للحوش..
درس السيارة ونزل يجري بسرعه لأن المطر تصب..
وصل في الباب فتحه وخش داخل وصكر الباب وقعد يحول في كندرته..
ع طلعة حناه من الكوجينه..
تجديده:قدورة روحت وليدي؟
ضحك نص ضحكه وقال:لاقاعد في الخدمه..
تجديده حدفت عليه الفوطه وقالت:معفن..
هو تلقاها وجي لحناها حاوطها من كتافها وقال:شن جو توجي..
تجديده:انت خيرك..كلمني جدك وقالي مش مزبوط الولد يخدم النهار كله وماباش يحط في فمه شي..
عبدالقادر بضحكه:مايدرق عليك شي فروجه..
ضرباته ع صدره وقالت:قول خيرك..
عبدالقادر:مافي شي حناي..
تنهدت وقالت:باهي برا بدل حوايجك خل نحطلك الغدي..
عبد القادر:لالا حناي بنرقد تعبان بنطيح ع وجهي..
تجديده بضيق:باهي برا تريح توا وبعد تنوض بتاكل غصب عنك..
عبدالقادر ابتسم وقال:حاضر حبي..باس ع راسها..
بعدين مشي وخش لداره وصكر الباب..
وحناه لفت ومشت وهي تقول:مش بلاش الولد هدا..اكيد الحكايه ليها علاقه بالبنيه اللي يبيها..زعمه شن صاير؟!
سكتت شويه وهي تفكر بعدين قال..ماليها الا أشرف غير يروح نقوله يهدرز عليه ويشوف خيره..
ووصلت في الكوجينه وخشتلها...
🍂🍂🍂🍂🍂
(قد استكثرت الحب على نفسي..ولم اصدق انني سأجد يوما من يحبني بصدق..يحبني لأجلي ويقبلني بعيبي..بل انني بت اشعر انه لايراه..حتى انه جعلني لأرى عيبي هذا معه...
اااه كم اشعر بندم شديد قاتل...فقد ضيعته بعد ان بدا لي صدقه...ربما لأني لست محظوظه في هالدنيا...ربما)
طلقت البير وحطت يدها تحت ذقنها وقعدت تقرا في كلامها اللي كتباته ودموعها تنزل ع ورقة المذكرة..
بعدين جي في وذانها كلامه ليها..
《 تعرفي مهما اديري فيا مسامحك برغم كل شي والله مسامحك..وصدقيني مش حنتخلى عنك ولانخليك يوم تحتاجيني حتلقيني قدامك..
وحنسأل ربي كل يوم ينولني اللي نبيه ولو استجاب وقتها بس حتعرفي صدق نيتي معاك..》
عضت ع شاربها بقوة وقعدت تبكي بصمت..
لعند ماطق باب دارها..
مسحت دموعها بسرعه وقالت:خش..
انفتح الباب وخشت حناها وهي تقول:مونا حنينه..
ضحكت امنه وقالت:اييه ياحناي ذكرتيني بأيام زمان..
جتها تبره وقالت بضحكه:كانوا احلى ايام..بالذات وين تجيني وفيدك الخلاص و زيت الزيتون المنقع فيه قرنفل وتقوليلي ياحناي امشطيلي شعري..
حطت يدها ع شعر امنه وقالت:هالشعر السمح...وفتحاته وبدت تمسح عليه ع طول وتقول...الله يبارك..الله يبارك..
وامنه مبتسمه..
بعدين تبرة بدت تظفر فيه وهي تقول:ايه..قوليلي شن حكايته العريس اللي وافقتي عليه طول هدا..
امنه تلاشت ابتسامتها وتبدلت بملامح الارتباك وهي تقول:مانعرفش..سمعت بالموضوع اول مرة بكري قدامكم..
تبره رفعت حاجبها وقالت:عليا اني يامونا..اني اللي نعرفك لو تطربق الدنيا ماديري حاجه انتي ماتبيهاش..قولي الحق شن داسه على حناك..بوك بروحه قال تقري فيه..معناها فيه حاجه..
تنهدت امنه وقعدت ساكته..
وقفت تبرة اللي دير فيه ومشت قعمزت ع السرير وهي تقول:احكي لحنينه احكي نسمع فيك..
امنه قعدت تحرك بسبابتها صفحات المذكره وهي في قمة الخجل..
تبرة:امنه..تي تكلمي عاد من هو هدا اللي قالب حالك..شن شكله وشن سماه ولعيت من؟
امنه ضحكت وقالت:وشن تاني؟
تبرة:تي هي احكي بلاتسهويك زايد..
تنهدت امنه وقالت:طالب يقرا عندي في الكليه..بس هو اكبر مني مخرت في الكليه..دمه ثقيل وبارد..ولصقه ومدرهلي كبدي...وخلاني نطلع عن طوري وندير حاجات ندمت عليها..
تبرة:تس تس تس..شكلك يابنت طايحه فيه طيحه قويه..
امنه فنصت في حناها وقالت:حنااي!!
تبره بضحكه:ماك ماشفتيش وجهك وانتي تهدرزي عليه..وبعدين مادام جاك من الباب وبوك شكر فيه وفي عيلته معناها وليد كويس...
امنه تنهدت بحزن وقعدت ساكته..
تبرة عقدت حواجبها وقالت:باهي شن هو اللي خلاك اديريه وندمتي عليه؟!
امنه شدت دموعها بقوة وقالت:شي..قصدي يعني يخلي فيا نهزب فيه وننفلت عليه..
تبره:يستاهل كانهو يلحقك فيك من تركينه لتركينه ويبي يكلمك اهو عرف انك مش متاع تلخبيط وجي لبوك طول..
امنه دمعوا عيونها..
تبرة شافت دموعها وقالت:خيرك بنيتي؟
امنه رشفت وقالت:شي..بس مش قادره ننسى اللي صار اليوم..
تبره:راك تعدلي ع كلامك خالك هو طارتله من بوك وكلامه بس..انتي عنده زي بنته واعز مايفرط فيك بكل..
امنه هزت راسها وقاعده ملامح الحزن ع وجهها..
ناضت تبرة لحفيدتها ومسحت ع شعرها مرة تانيه وقالت:هي نوضي بنيتي نديروا العشي نوضي..
امنه تنهدت وناضت وهي تقول:حاضر..
ومشت هي وحناها بطريقها لباب الدار..
تبرة:ايه ماقتليش شن شكله وشن سماه؟!
آمنه ضحكت غصب عنها....
🌟🌟🌟🌟🌟
وع آذان العشي نوضت تجديده حفيدها بش يصلي..
وهو ناض طول..بعد توضا طلع من الدار بش يشوف كان جده روح ولالا.. تلاقى هو واشرف طالع من الحوش..
عبدالقادر:اوو اشرف شن جو..ورفع يده..
مد اشرف يده وقال:تمام..شن جوك انت..
طق عبدالقادر فيده وتصافحو وهويقول:ماشي الحال..طالع انت..
اشرف:ايه ماشي الجامع نصلي العشي..
عبدالقادر:فهالصقع!؟ صلي هني ياراجل وخلاص..
اشرف ابتسم وقال:ياغالي مايجيش هكي صلاة الراجل في الجامع..فحاله وحده يصلي في حوشه الفرض لو الطريق صارت فيها لسبب كان..اما غير هكي هي واجبه في الجامع راهو..
رفع عبدالقادر حواجبه وقال:اول مرة نسمع بيها المعلومه هادي!قبل كنت نحساب اللي يمشي يصلي في الجامع هكي يعني يدير في حاجه مستحبه فهمتني كيف؟
اشرف بضحكه:ايه فاهمك..لالا ياغالي ياواجبه..وراهو اللي مايصليش الصلاة فالجامع تقعد صلاته معلقه بين السماء والأرض بين انه تقبل وترفع ولاتولي ع صاحبها..
عبدالقادر بصدمه:لهالدرجه!.
اشرف:واكثر...
عبدالقادر ضحك بإحراج وقال:عليك احراج وخلاص اللي عاش برا يعرف فالدين اكثر من اللي قاعد هني..
اشرف ضحك وقال:نروح ونزيدوا نهدرزوا..
شده عبدالقادر من ذراعه وقال:راجي شويه راجي..
طلقه ومشي يجري لداره...
ولحظات وجي يجري وهو يلبس في بالطوه ع التوته وقال:هي اطلع هي..
ضحك اشرف وطلع ووراه عبدالقادر وهو مازال يدخل فيده اليسار في كم بالطوه...
🌟صلوا صلاتهم في الجامع..
بعدين طلعوا...روحوا ع رجليهم وهما يهدرزوا في الطريق..
اشرف:معقوله!؟
عبدالقادر بضيق:زي مانحكيلك..مش قتلك حسيتها اني مش راغبتني من الأساس..
اشرف بأسف:لا حول ولاقوة الابالله..
فجأة رن تليفون عبدالقادر..
طلعه من جيبه وشاف المتصل..وقف في مكانه..
وقف معاه اشرف وهو يشبحله..
وعبدالقادر يشوف لإسم المتصل وهو مضايق..
اشرف:منو؟
عبدالقادر:عمي عمران..بوها..
اشرف:باهي رد عليه..
عبدالقادر قعد يشبح شويه للتليفون لين فصل..بعدين رده لجيبه وقعد يمشي..
اشرف مشي معاه وهو يتسائل:خيرك مارديتش؟!
عبدالقادر بضيق:عارفه شن بيقولي..
اشرف:شن ماكان مفروض ترد..
عبدالقادر :تو نعاود عليه بعدين..
اشرف هز راسه بإيجاب وهو يشبحله ع جنب ويشوف في الدموع اللي حابسهم عبدالقادر في عيونه...
🍂🍂🍂🍂
وعدت الأيام..
وقعد عبد القادر حابس وجعه في قلبه وملهي روحه في الخدمه مع جده اللي كان مستغرب فيه كيف معاش جبد سيرة القرايه ولاعاد مشي للجامعه..واللي ماخلاشي يسأله هو شطارة عبد القادر فالخدمه معاه خلاته يقول لروحه
"المهم يرد باله ع رزقه والباقي مش مهم.."
🥀وآمنه حتى هي ع اساس بتلهي روحها في خدمتها لكن هيهات تقدر تلهى عنه في مكان يذكرها بيه على الدوام هدا غير قصتهم اللي انتشرت وولت ع لسان الكليه كلها بطلبتها واساتذتها...
بينما علاقتها مع الدكتور عصام ولت سطحيه لأبعد حد بالذات بعد سمعت بفسخ خطوبته من اختها..
..واختها روبين...رجعت لإسماعيل اللي ماكانتش تعرف انه ناوي يفوت معاها فترة معينه وبعدين يسيبها ويردلها اللي داراته فيه..
💎في معرض السيارات..
واقف يشوف في وحده من السيارات وهو يهدرز بالتليفون..
اسماعيل:امتى هدا؟
روبين:اخر الاسبوع..
اسماعيل:امم..تمام بري..
روبين بضحكه:ربي يخليك ليا يارب..
اسماعيل ارتسمت ع وجهه ملامح الازدراء وهو يقول:ويخليك ليا..هي تشاو توا مش فاضي..
روبين:اوكي حبيبي بايات..
اسماعيل صكر وقال:اففف..مش عارف وين كان عقلي لما عرفتها هادي!؟
"سمعه"..
التفت وقال:ايوه..
زيد:طالع شويه عندي مشوار ضروري قريب..
اسماعيل:توكل..
زيد رفع يده وحياه ومشي طلع من المعرض ع خشة عبدالقادر.
عبدالقادر:شن جو زيدو..ومد يده..
صافحه زيد وقال:اوو قدو...شن جوك انت..
عبدالقادر:تمام..طالع..
زيد:ايه تبي شي؟
عبدالقادر:سلامتك حبيبي منور..
زيد:تسلم..اوينا..سلام.
ومشي..
عبدالقادر:سلام...وخش..
حاوط فمه بإيديه وقال بصوت عالي:سموعه..
اسماعيل التفت وشافه قال:اوووووو قد قد..وينك ياناسينا وين..ومشاله..
وصلوا في بعض وحضنوا بعض..
عبدالقادر:مشغوليات ياصاحبي..
اسماعيل:استاحشناك يامعفن..
ضربه ع ظهره وقال:تستاحشك العافيه..
ضربه ع ظهره بقوة وقال:تفاول عليا يازفت..
بعد عنه وهو يتحسس في ظهره وبعقدة حواجب يضحك:احح مااثقل يدك ..
اسماعيل:قول ماشاء الله ياوجه البومه..
عبدالقادر يضحك وخلاص..
اسماعيل:خش داخل خش..
ودفه بقوة...وعبدالقادر اندفع القدام وهو يضحك عليه ويستفز فيه واسماعيل يهزب...
🌸🌸🌸🌸🌸
في مكان تاني..
دار الأيتام تحديدا..
تماضر:هكي كملتي اجراءات الكفاله كامله..
هبه وهي مبتسمه ادس في البيرو متاعها وقالت:الحمد لله..جزاك الله خير امونه وحتى انتي تماضر..
امنه بإبتسامه:وإياك هبوش..بعدين شبحت لتماضر وقالت..كان معاش عندكم شي تعالوا معاي لحوشنا حناي مدايره كعك هوني يجنن..
هبه:كعك هون مايتفوتش..يقولوله حتى سوكني ولا؟
امنه:هو اكثر من منطقه ادير فيه بس في الجنوب بس حني اكثر شي وتسميته تختلف ع حسب المدينه المشهوره بيه..
هبه:اها..
تماضر:سهفتيني..خل نكلم بوي ناخد اذنه..
هبه:واني نتصل بخوي لحظه بس..
وامنه قعدت واقفه تراجي فيهم...
🌟🌟🌟🌟🌟
"كان حالتك صعبه لهالدرجه اني عندي ليك اقتراح"
رشف عبدالقادر من القهوة وقال بإنتباه:شن هو؟
خود ايفون برو ماكس..وخود ساعه ماركتها قويه وحاجه ذهب هكي وبرا للوفاق وقوللهم يديروهم في صندوق ويديروا جوهم ..وينزلوا ع صفحتهم..
من A إلى A..
تزعليني انتي واني نرضيك...
وبالله عليك تزوجيني...
وابعتهالها وادعيلي..ورشف من القهوة متاعه..
عبداالقادر بإمتعاض:تتسهوك..
اسماعيل بضحكه:صدقني هكي ترضيها النساوين يرضوا بالحاجات هادي..
عبدالقادر بإمتعاض:الحق مش فيك الحق في اللي جاي يفضفضلك..
اسماعيل قعد يشرب فالقهوة وهو شاد ضحكته بعدين قال:وخيتي سلمهم اللي يحبوا ومتعذبين..
عبدالقادر قعد يشرب في القهوة ويشوفله ع جنب ..
واسماعيل يضحك عليه...
🌸🌸🌸🌸🌸
"صحتين بنياتي"
هبه:سلمك خالتي تبره..
تماضر:سلمك ياربي..
تبرة:تبوا حاجه تانيه؟.
امنه:قعمزي هدرزي علينا حنينه .
تبرة:لا بنيتي بنمشي نتفرج ع الصلاة في السعوديه..ربي يوصلنا لمكه ونصلوا فيها زيهم يارب..
البنات كلهم قالوا:آمين...
تبرة:نخليكم تهدرزوا براحتكم..ومشت من حداهم..
هبه:ماحجتش خالتي تبره؟.
امنه:لاحجت..لكن كان تلقى كل عام تمشي غادي
تماضر:تمشي عمرة..
امنه:مشت قبل مرتين..وقبل بتمشي رمضان اللي فات لولا ظروف خدمة خالي محمد..رمضان هدا ان شاء الله نمشوا جميع..
هبه:مازال عليه شهر..ربي يبلغنا ان شاء الله..
امنه وتماضر:آمين..
سكتوا شويه وهما يشربوا في القهوة وياكوا في الكعك..
بعدين شبحت تماضر لآمنه وقالت:معاش صار جديد امونه؟
هبه شبحت لآمنه بحزن..
امنه بضيق:بوي يومها قالي انسي الموضوع..واني ماسألتاش علاش لأني عارفه اللي صار..
خدت نفس وزفرت بعدين حطت يدها ع رقبتها وقالت..مضايقه هلبه..حاسه روحي مخنوقه..نزلت يدها وهي تقول..امس نرصد في الدرجات جو قدامي اسمه ودرجاته..قلبي وجعني..هو كان ناوي يتخرج خلاص واني عفستله في مستقبله كله..وياريت على حق..ظلم في ظلم..ظلمته ..وبدت تبكي..
البنات ناضوا وحطوا فناجينهم ع الطاوله وجوها قعمزوا حداها..
هبه:اذكري الله امنه..
تماضر:خلاص حبيبتي..امونه..
امنه مسحت دموعها وهي تقول:استغفر الله العظيم..وخلاص..
...وورا باب الصاله كانت واقفه حناها تسمع..
تبرة في نفسها:قلتها اني قلتها حالها المنقلب هكي هدا مش بلاش..
🌟🌟🌟🌟🌟
الساعه 7:30 مساءا..
كان واقف يشوف في الحسابات..
وحداه عاملين المحل يخدموا ويهدرزوا وهو يسمع فيهم..
واحد منهم قال:ياراجل حالتهم بالويل...الحوش اللي ساكن فيه بالإيجار يعيشوا في الحيوانات مش البنادميه..
:لاحول ولاقوة الابالله..امتى بيبتروله رجله؟
:تقريبا بعد اسبوع..مش عارف كيف بيصير فيه وفي عيلته واهو رمضان جاي..والله حالتهم تقطع القلب..
:ياريت فيها كيف ندفعوا عليه حتى حق الايجار..
:ندفعوه عنه الشهر هدا...والشهر الجاي واللي بعده؟!
عبدالقادر:اكرم..
شبحوله الزوز...
عبدالقادر:من هو هدا اللي تحكوا عليه؟
:هدا واحد كان يخدم هني ايام ماكان السي جمعه ماسك المحل...عنده سكر مسكين ورجله جتها غرغرينه سكت عنها لين وصلت لمرحله خلاص لازم يبتروها..
عبدالقادر بأسف:لاحول ولاقوة الا بالله....سكت شويه بعدين قال..بعد نصكر المحل ترفعني لحوشه؟
:ان شاء الله...
عبدالقادر هز راسه ورجع شاف للحسابات..
والعاملين الزوز شبحوا لبعض وابتسموا براحه..
بعدين رجعوا لهو بخدمتهم...
🌟بعد ساعتين بالزبط..
صكروا المحل..
ومشي واحد من العمال في المحل مع عبدالقادر لحوش الراجل المكروب..
لما دخلوهم للحوش..
عبدالقادر صدمه اللي شافه..الحوش فعلا غير صالح للبشر..
ريحة الرطوبه...المجاري...غير انه صغير هلبه..
دارين وكوجينه وحمام..بس...
قعمز عبد القادر وسمع منه عن وضعه..وانوجع قلبه هلبه وحس اتجاه نفسه بشعور احتقار..
🌟في الطريق..
عبدالقادر:احتقرت روحي كيف كنت عايش الفلوس اللي نصرف فيهم ع الدبش متاعي يأجروله شقه في احسن منطقه..الفلوس اللي صرفتهم ع سياراتي اللي نغير فيهم كل عام ومرات في العام مرتين يعيشوه هو وعيلته مرتاح لأخر العمر..قصدي بجديات قعدت نفكر ربي علاش عطانا حني وخلاهم هما هكي!؟ وطول جاوبت ع روحي بأن فهالدنيا كل حد وربي قاسمله رزق..لكن مع هدا خلا الغني والفقير ديما فث حاجه لبعض بش ديما يعانوا بعض..يعني نفسر اكثر..اللي عنده يعطي للي ماعنداش وبالمقابل اللي عنده ياخد اجر في الدنيا يزيد يوسع رزقه وفي الآخره عاد عند ربي شي مايخطرش على بال....فهمتوا ولانزيد نشرح ريقي شاط..ههههه..اممم..المهم...قررت نمشيله مرتبه اللي كان ياخد فيه ايام خدمته في المحل..والسكن وصيت صديق ليا يشوفله شقه باهيه..وهو قال بعد مايدير العمليه يبي يخدم خدمه تناسب وضعه مايبيش يقعد فالحوش واني قتله تو نشوفلك..الحق مش عارف شن هي الخدمه اللي تناسب وضعه..تنهد وقال...ربي يفرج على عباده ويسخرنا لبعض...
🍂🍂🍂🍂🍂
في دارهم...
كانوا الزوز...
وحده تصلي....
والتانيه تتكلم بالتليفون...
روبين :ايه اختي من امي..وحده متعجرفه ومتكبره وشايفه روحها بفلوس بوها اصلا ماعندهاش غيرهم بش تشوف روحها..
اسماعيل بتهكم؛شكلك تحبيها هلبه..
روبين:مش مني من تصرفاتها هي..اني كان بنقعد نحكي عنها وعن عمايلها تكرهها اكثر مني..
اسماعيل:لهالدرجه!
روبين:واكثر..امي اللي هي امها مش طايقتها..ديما تقول عليها وجه نحس من لما ريتها ماريتش خير..
اسماعيل:معقوله !؟
روبين:ايه..ماهو هي فيها عيب خلفي في رجلها بالفلاقي عايبه ياما عزروا امي بيها وصارتلها مشاكل في جرتها لين اطلقت..حتى بوها ماباش ياخدها عطوها لحناي ام امي يش تربيها..
اسماعيل:هدا كله ع خاطر عايبه!؟
روبين:امم..امي كانت تقول بتقعد في الرقبه البنت هادي ع خاطر عيبها هما يبدوا صحيحات ومش عاجبين يابال عايبه..تصدق خطبها عمي المده اللي فاتت رداته قالت صايع وماينفعش..
اسماعيل:ان شاء الله عمك هداكا حامد متاع الحشيش!؟
روبين بضحكه:ايه..
اسماعيل؛مصصصح وجهه..
روبين ضحكت وقالت:رداته..
سيرين بعد كملت صلاته علقت ملايتها وقالت:راك تنسي تقوليله قداش مرة خشينا الحمام اليوم..وخشت سريرها..
عكرشت روبين وجهها بإزدراء وهي تشوفلها بعدين قالت:خلينا منها سمعه وقولي شن درت اليوم...
اما سيرين بعد خشت سريرها عطت اختها بالظهر وطلعت تليفونها وحطت ع اذكار النوم وبدت تقرا فيهم وهي تكح مرة مرة..بعدين قالت:شكلي بنمرض...ورجعت كحت..بعدها رجعت تقرا في الأذكار..
🍂🍂🍂🍂🍂🍂🍂🍂🍂🍂🍂🍂🍂
يوم الخميس..
الساعه 5:30عصرا..
الزبير وهو يلبس في كندرته:قتلك مانقدرش نقعد عندي ماندير..
مريم:كيف يصير في البنت..
فتح الباب وطلع وهو يقول:كلموا اختها تجي تقعد معاها..وصكر الباب..
مريم رفعت حاجبها وقالت:ايه صح..تجي امنه تقعد معاها..
ومشت تجري لتليفونها بش تتصل بيها...
..........
آمنه وهي اطلع في جلابيتها:حاضر حاضر جايه.......باهي...بالسلامه..
وصكرت وهي تقول بتهكم:عندي ام مافيش زيها حنونه لأبعد حد..
وخدت شاربتها ومشت لطاولة الكوي بش تحددها..
🍂🍂🍂🍂🍂
واقفه ع المرايه وهي تمكيج وتغني..
واختها راقده في سريرها من التعب وهي تشوفلها قالت:قصدك حتى ماما بتمشي وتخليني..
روبين وهي تبخ في العطر:لالا كلمت هديكا تجي تقعد معاك..
سيرين:من هديكا؟.
روبين:امنه..
سيرين تنهدت وقعدت ساكته..
"هيا ياروبي بنت خالتك جت"
روبين:هيا ماما طالعه..
خدت عبايتها وشنطتها وطلعت تجري وصكرت الباب..
سيرين وعيونها تعبوا دموع:عليك ام امي..
فجأة انفتح الباب وخشت آمنه وهي تقول:السلام عليكم..سوسو لاباس عليك..طهور ان شاء الله..
وجتها قعمزت حداها..حطت يدها ع جبهتها بش تشوف حرارتها..
ابتسمت سيرين بتعب وقالت:لايوريك باس امونه..
ابتسمت امنه وقرصتها من خدها بعدين قالت:تو نديرلك خلطه تقضي ع البردة بالمرة..شويه ونجيك..
وناضت..
سيرين:بنوض معاك..
امنه:حبيبتي انتي تعبانه خليك في مكانك..
سيرين:لالا نقدر انوض غادي..اصلا زادت تعبتني الرقده..
امنه تنهدت وقالت:باهي نوضي معاي هي..
وناضت معاها..ومشوا طلعوا مع بعض من الدار....
🌸🌸🌸🌸
مقعمز ع كرسي البار تتفرج ع اختها كيف تتحرك في الكوجينه وهما يهدرزوا..
امنه:اني استغربت اللي سكتوا ع الموضوع قعدت نراجي كل يوم تخش فيه علينا امي هاده وديرلي فضيحه..
سيرين:ماما مادام بابا سكت وعداها مادورش..
امنه:موقف بوك حتى هو حيرني..
ضحكت سيرين وقالت:قاعد طامع فيك توافقي على عمي..
امنه:لما يلحس ظهره عمك هدا ناخده..
ضحكت سيرين..
وامنه ضحكت معاها وهي تصفي في مشروب الاعشاب اللي داراته لاختها...
🍂🍂🍂🍂🍂🍂
الساعه 8:40مساءا..
في احد زوايا حوش جاره من جارات اخت مريم..
كانت روبين واقفه تتكلم بالتليفون..
روبين:لمه ممله وكل شي فيها شلافطي ويدره الكبد غير شن جيبني بس..
اسماعيل:ماعندكش من يروح بيك!؟.
روبين:ياريت..اصلا بابا اليوم مشغول ع قد ماحاولنا فيه بش يقعد مع اختي المريضه ماباش..لين كلمت ماما بنتها هديكا تجي تقعد معاها..
اسماعيل عقد حواجبه وقال:قصدك نساوين قاعدات برواحهم في الحوش!!؟
روبين:شن بيصيرلهم بتاكلهم الغوله!؟
سكت شويه بعدين قال:ترا صكري شويه جاني زبون..صكري..
وسكر منها واتصل بعبدالقادر طول..
في معرض السجاد..
كان عبدالقادر واقف ع وحده من السجادات صناعه محليه"بني وليد" ويسوقلها..
عبدالقادر:افضل سجاد بعد السجاد الإيراني سجاد مصنع بني وليد..تعرف كيف يخدموا عليه....
قطع عليه كلامه تليفونه اللي رن..
عبدالقادر:اسف جدا..عن اذنك شويه..
ومشي ع تركينه ورد..
عبدالقادر:سمعه والله مشغول...
اسماعيل قاطعه وهو يقول:غير اسمعني قبل..الأبله متاعك امنه..
عبدالقادر وقلبه قريب وقف قال:خيرها!؟
اسماعيل:توا هي في حوش امها مع اختها مريضه ومافي حد معاهم هما بس في الحوش..شوف اني مستريح مش عارف علاش..
عبدالقادر عقد حواجبه وقال:غلط قعدتهم برواحهم غلط في وقتنا هدا..صكر صكر ماشي غادي توا..
اسماعيل:تمام....يصير اي شي كلمني..
عبدالقادر:سمعه..كأنك تعرف شي اني مانعرفاش..وبعدين تعالى جاي..كيف عرفت انها قاعده مع اختها برواحهم!؟
اسماعيل بضيق:مش وقته توا ياقادر بعدين نحكيلك المهم توا برا غادي...تشاو...وسكر عليه..
عبدالقادر قعد يفكر بخوف..بعدين التفت لواحد من العمال:علي..تعالى...
🍂🍂🍂🍂🍂
مقعمزة قدام اختها اللي راقده في سريرها تشوفلها كيف رقدت..
بعدت تأكدت انها راحت في النوم..
ناضت ومشت طلعت من الدار وطفت الضي وخلت الباب مفتوح...
ومشت للصاله..
قعمزت ع الكنبه..وقامت تليفونها وخشت ع برنامجPDF
وبدت تقرا في رواية"الهالة المقدسه"..
تحكي الروايه عن قصة حب عفيفه..وعن قصة العودة الصحيحه لله..وعن طريقة التربيه الصحيحه للبنات تحديدا..
روايه عميقه وجميله..
غاصت فيها آمنه بكل جوارحها..
لعند ماقابلتها جمله خلت قلبها يدق بوجع..
"ان يغرم بك شخص ما فذاك رائع جدا..وان تكون على يقين انه مغرم بك فذاك أروع"...
ونزلت دمعتها بدون ماتحس..
🍂🍂🍂🍂🍂
فهالوقت..
كان عبدالقادر واصل حدا حوش ام آمنه..
درس وقعد يشبح للحوش..تنهد بعدين قال:ياريت نقدر نشوفها حتى لمحه..
فجأة..
سمع صوت سيارة جايه..
عقد حواحبه وهو يشبحلها بتركيز..شافها درست..
ولحظات ونزل منها واحد..هو ماقدرش يشوفه كويس كل اللي قدر يزبطه انه شاب صغير في العمر..
فتح باب الحوش وخش..
هو طول رفع تليفونه واتصل بإسماعيل..
عبدالقادر:ايوه سمعه قولي..انت متأكد ان مافي حد قاعد معاهم في الحوش!؟.
اسماعيل:ايه..مافي حد..علاش شن في!؟
عبدالقادر سكت شويه وقعد يفكر..
في لحظة اذكر لقطه شافها لما لحق امنه مرة لهني..
لما جت مروحه ووقفها واحد وقعد يكلم فيها..
فنص عيونه وقال:هو..
اسماعيل:من هو!؟
عبدالقادر:خلاص خلاص صكر..
صكر عليه ونزل يجري من السياره..
وقف وقعد يشبح للسور..بعدين لف ع الحوش..
شاف جهه يقدر يركب منها..
مشالها بسرعه..
.......
في نفس الوقت...
كانت امنه وهي تقرا واقفه عند مقطع في حوار عجبها واثر فيها..
《أصعب من الموت؟!وماذاك؟
الوقوع في الحرام..ان تأسرك الشهوة》
🌷وهني طبعا الحرام والشهوة مش مقتصرات ع فعل الزنا..بكل كل ماتحركه الشهوة هو حرام نطيحوا فيه..واولهم علاقات الحب المحرمه...اللي فيها مكالمات ومواعيد سريه وخلالهم الله اعلم قداش ذنب نطيحوا فيه..
المكالمات بالذات اللي تجي في أخر الليل ياقداش نحصدوا منها في ذنوب بملء الجبال..اما المواعيد...اللي تصير فيها حاجات تعتبر مقبلات للزنا....وكل هالخبائث اللي هدا اقل مايقال عنها يدرجوا فيها تحت مسمى الحب....الحب بريئ من كل هذا براءة الذئب من دم يوسف..
وأي شيء ربي مش راضي عنه مش حتنزل عليه البركه..
شي ربي مش راضي عنه لايمكن يمشي القدام..
شي يضيع عفة البني أدم "ذكر اوانثى"لن ينال رضا الله...🌷
تنهدت آمنه وقالت:اللهم اكفني بحلالك عن حرامك..نقعد طول عمري بروحي ياربي ولاندير حاجه تخليني نخسرك ونخسر نفسي..
فجأة سمعت باب الحوش انفتح..
شبحتله وهي عاقده حواجبها وقالت:مسرع روحوا؟!
ارتخوا حواجبها وانفتحوا عيونها ع وسعهم اول مابان عليها اللي خش..
وقفت في مكانها وهي تقول بصدمه:شن جابك انت!؟
حامد بصوت مش راكز:حوش خوي..نجيه امتى مانبي..
وقدملها..
هي وخرت خطوتين..وجت بتجري لدار خواتها..
لحق عليها خطف وشدها من ذراعها..
عيطت..
حامد:وين هاربه وين..اني جايك انتي..تي كان مافطستش خشمك الليله مانتسماش راجل..
هي بعد سمعت شن قال خبطاته ع وجهه بتليفونها..
هو توجع وطلع وهي هربت تجري..
لحق عليها طول...
وشدها قبل لتوصل للدار..
امنه قعدت تعيط...
وهو يقوللها؛تو نوريك يابنت ####..
وجبدها..وهي تقاوم فيه وتعيط..
عياطها فيق سيرين مخلوعه..
سيرين:آمنه!!
"حول ..حول ياحقير الله يلعنك حول"
"تعالي..هني تعالي"
سيرين:نهار اسود!
وناضت تجري ...
....برا....
امنه فلتت ومشت تجري للصاله من جديد..
ووللأسف بسبب اعاقه رجلها كانت تجري بصعوبه وهو يلحق عليها..
لما جي بيشدها في اخر محاوله..عتر فرجل طاوله وطاح..
لكن جبد رجلها وطيحها..
امنه بألم:اااه..ظهري..
وهو شدها من رجلها التانيه وجاها..
امنه حاولت تفلت رجليها منه ماقدرتش..
قعدت تعيط وثقول:ياربي يارب..ياااربي خلصني يارب..سترك وعفوك يااربي..
حامد بضحكه:ادعي وعيطي لين تشبعه مايقدر حد يخلصك ياحلوة حتى ربك..
امنه بحقد وقرف:فاسد..فاجر..
حامد:تو نوريك من هو الفاسد الفاجر..
امنه بخوف شديد غمضت عيونها بشده وعيطت بأعلي صوتها وقالت:يارب...
فجأة..
سمعت صوت حاجه تكسرت..مع صوت صرخة ألم طلعت من حامد....فتحت عيونها وشافاته كيف شاد راسه وهو فاتح عيونه ع وسعهم...
"امنه..نوضي..نوضي"
امنه دفاته وطيحاته وناضت تجري..
جت لسيرين وشدتها وهي تقول:تعالي نطلعوا تعالي..
وكيف جو بيمشوا للباب..
ناضلهم حامد يجري وقال:تعالوا هني وين هاربات!..
وطلع بوخوصه من جيبه..
عيطوا الزوز..
بعدين جبدت امنه سيرين وقعدت تجري بيها للدار وهو في جرتهم..
وصلوا الدار وخشوا..
وصكرت امنه الباب في وجهه في اللحظه اللي وصل فيها حامد في الباب..
سيرين بذعر:الحقير هدا عارف انك جايه للحوش..
امنه وهي تصكر في الباب بالمفتاح:اكيد ياسيرين قالهالي بروحه جايك..
"ايه جايك ومش طالع من هني قبل ندير مانبي"
امنه وهي ترعش من خوفها:حسبي الله ونعم الوكيل..
🌟في هالأثناء.
كان عبد القادر يحاول يركب صعب تسلق السور..
وكان يسمع مرة في صوت عياط خلاه بينجن...
لين قدر يركب وينقز من السور..
جي في الجنان ع ركابه وجعوه لكن مادورش..
طول ناض ..جي بين عيونه روشن دار البنات لمح منه آمنه..
مشاله يجري..
.............
واقفات مع بعض..
امنه حاضنه اختها والزوز يشوفوا للباب وهو ينهز لأن حامد يدف فيه...
امنه:تليفونك وين!؟
سيرين وهي ترعش:حطاته في الشحن في الصاله..
امنه غمضت عيونها بشده وقالت:الله المستعان..حسبي الله ونعم الوكيل..
فجأة اندق روشن الدار بقوة..
انخلعوا الزوز..
سرين بخوف:قصدك جانا من الروشن!؟
انخلعوا تاني لما سمعوا صوت الباب يندف..
امنه بصدمه:مش هو..
طلقت امنه اختها ومشت للروشن وحولت الستار..
لما شافت اللي في الروشن شهقت بصوت عالي...
سيرين بصدمه:حي هداكا؟!
وكانوا يشبحوا لعبدالقادر وهو يحرك في فمه ومش سامعين شن يقول..
امنه بصدمه:شن يقول!؟
سيرين:افتحي الروشن بش نعرفوا..
سمعوا الباب اندف بقوة..
عيطت سيرين وقالت:افتحيه..
طول امنه من الرعشه فتحاته..
عبدالقادر :بعدي..زيدي غادي..
سيرين جبدت امنه..
وهو قال:يارب..وركب ونقز من الروشن وخش للدار..
وامنه مازال تشوفله وهي مصدومه..
سمعوا صوت الباب اندف بقوة هلبه حينفتح خلاص..
شبحله عبدالقادر وقال:خودي اختك وبروا اوقفوا حد الباب..
امنه بصدمه:شن بدير!.
سيرين جبدت اختها وقالت:مش وقت اسئله ياهمي..
ومشت بيها وقفوا حدا الباب...
عبدالقادر قدم للباب..
امنه بخوف:عنده موس راهو..
عبدالقادر حط يده ع المانيليه وهز راسه بإيجاب..
اندف الباب..
امنه قالت بخوف شديد؛رد بالك بالله عليك..
عبدالقادر شبحلها وابتسم..
هي بلعت ريقها ورمشت عيونها ونزلتهم حياءا..
وهو شبح للباب..وحرك المانيليا..وفتحه ع وسعه..
فالوقت اللي كان فيه حامد جاي يجري بسرعه بش يدف بالباب..
خش داخل وهو مندفع ماقدرش يشد روحه لين طاح ع سرير سيرين..
عبدالقادر شبح للبنات وقال:اطلعوا بسرعه اطلعوا..
امنه:وانت!؟
جبدتها سيرين وقالت:هيا..
حامد وقف ع حيله وقال:مدخلات راجل للحوش يا####
اندفع عبدالقادر بسرعه وضربه ع وجهه بقبضة يده
وهو يقول بصوت عالي:اطلعوا..
طلعت سيرين باختها وامنه تجري معاها وهي تشبح لعبدالقادر ودموعها وينزلوا..
حامد حط يده ع وجهه وجي لعبد القادر خطف بالموس..
شد عبد القادر يده بقوة ووقعدوا يتصارعوا..
....عند باب الحوش..
وصلوا امنه وسيرين في الباب...
سيرين فتحت الباب وقالت:هيا..
امنه ببكي:شن بيصير فيه؟.
سيرين بخوف:يدبر راسه..
امنه حركت راسها يمين ويسار وقالت:لالا مانقدرش نخليه بروحه..
ومشت ولت بتخش داخل..
سيرين بخوف:ياامنه تعالي ياامنه....ومشت وراها..
فهالوقت..
كان عبد القادر حيغلب حامد..
بس حامد غافله لما حسسه انه حيستسلم وضربه ع براسه ع راسه بقوة..
غمض عبد القادر عيونه بألم ورخي حامد..
وهني خدي الموس متاعه وطعن عبدالقادر...
وهالمشهد جي في عيون سيرين وامنه..اللي صرخت بأعلى صوتها لما شافت دم عبدالقادر....
....يتبع....
