نعتذر منكم اعتذار شديد والله امس ماقدرت نكتب سامحوني اللي خليتكم تستنوا ع الفاضي..
ونعيد ونكرر ان التنزيل ع حسب الظروف..سامحوني واعذروني...
💕💕💕💕💕💕💕💕💕💕💕💕💕💕💕💕💕
🌟...
ناض يجري عبد القادر من مكانه وعصام جاها يجري حتى هو..
بس فجأة وقفوا الزوز لما سمعوا صوت يقول
"لااالا ماتمسوهاش"..
التفتوا الزوز للباب..
شافوا استاذه هبه خاشه تجري لآمنة جتها قعمزت حداها وقامت راسها بين ايديها وقعدت تفيق فيها..
هبه:آمنه آمنه..
وامنه مافيش منها اي استجابه..
عبدالقادر بخوف:نجيبلك عطر استاذه؟
هبه وهي تمسح ع وجه امنه:جيب جيب..وشبحت للطالبات قالت..وحده فيكم تجي تساعدني ننهضها..
جوها زوز بنات رفعوا امنه وحطوها الكرسي وحطوا راسها ع الطاوله .
ع جية عبدالقادر بالعطر وهو ميت من خوفه عطاه لهبه..
خداته منه وبخاته في كلينكس وقرباته من انف آمنه وهي تقول:موقف زي هدا يصير لأستاذه ولاطالبه معاكم انتم تحركوا اسعفوها يابنات..
البنات بإحراج :حاضر..
اما عصام وعبدالقادر فكانت عيونهم ع امنه وهي تشم في العطر..لحظات وبدت تفتح في عيونها وتفيق شويه شويه..
هبه:آمنه!
وعبدالقادر زفر براحه..وعصام خدي نفس..
امنه تعكرشت ملامح وجهها ودفت يد هبه وقالت:شن الريحه هادي!؟
فنص عبدالقادر عيونه..
امنه بتعب:ادره الكبد شنو هدا...!!
وناضت قعمزت وهي حاطه يدها ع راسها وقالت:شن صار!؟
عبدالقادر قعد يشم في العطر بإستغراب وقال:والله أصلي وماركه الله..
البنات ضحكوا بصمت..وهبه شدت ضحكتها..
اما عصام قال:دكتورة فاطرة الصبح انتي؟
عبدالقادر شبحلها..
آمنه شبحتله شويه بعدين نزلت عيونها وناضت وقفت وهي تقول:اسفه استاذ مانقدرش نكمل مراقبه..
عصام:مافيش مشكله ولايهمك..
هبه:هي تعالي معاي..
ومشت بيها متوجهين للباب وآمنه يدوب تمشي..
وعبدالقادر وعصام معاها بعيونهم..
بعدين عصام استاقظ للوضع وشبح للطلبه وقال:هيا هيا ولوا لأماكنكم وكملوا الأمتحان هيا..
البنات ولوا لمكاناتهم..
اما عبدالقادر تنهد بعدين التفت جو عيونه فعيون عصام..
عصام:ولي لمكانك..
عبدالقادر غير عيونه عنه ببرود ومشي لمكانه وهو مازال يشم في العطر..
وجلال وفاروق يشبحوله وهما يضحكوا بصمت..
"عيونك في ورقتك انت وياه"
فيسع اختفت ملامح ضحكاتهم وغطسوا روسهم في وراقيهم...
🌸🌸🌸🌸🌸
في الكليه
اللي تقرا فيها اخت آمنه..
روبين:جي حلو لكن فيه حاجات ماعجبتنيش في التقديم والتنسيق جي شلافطي شويه..
رتاج:باهي اهل خطيبك جو؟
روبين:بالله افتكريلنا سيرة عدله..
رتاج:خيرهم!؟.
روبين تنهدت بضيق وقالت:هما ماخيرهم شي لكن ولدهم ياريتاج والله ماطايقاته..مانبيشي..
رتاج:روبين حطي عيونك فعيوني وقول..انتي حانه لهداكا ولا؟
روبين سكتت شويه وقالت:فرق كبير بينه وبين هدا عصام المعقد والمريض...اسماعيل صح يبان صايع..لكن دمه خفيف مهتم بيا كان مدلعني مش زي هدا بكل..
رتاج:معناها انتي كان عاجبك دلاله واهتمامه بس..
روبين تنهدت وقعدت ساكته...
فجأة انفتحوا عيونها ع وسعهم وهي تقول:ولد حلال!
رتاج:منو عصام!
روبين:عصام شنو انتي التانيه!..اسماعيل اسماعيل..
رتاج:حي وينه! وشبحت وين ماتشبح روبين..
لقوه واقف بعيد شويه يلعب بمفاتيحه..
من ورا نظاراته يشبحلها وهو مبتسم على جنب..وهي لما شافت ابتسامته بادلاته الإبتسامه..
رتاج:شن تتبوسيمله مصح وجهك روبين!
روبين:فوتيني..
شويه وبدي يمشي ويقدملها..
روبين لرتاج: مساوي وشاحي..مكياجي شني!!؟
رتاج:عبيطه..
ولفت ومشت وخلتها..
هي شبحت من فوق لتحت وطنشت..بعدين شبحتله لقاته واصل فيها..
اسماعيل وقف عليها وهو يمرر في نظره حواليه:شن جو خطيبك!؟ شبحلها وقال...نعرفه كويس راهو..
هي نزلت عيونها لوطا وع وجهها ارتسمت ملامح الضيق..
اسماعيل:شنو!؟ شكله مامشاش معاك..
هي قامت عيونها وقالت بحزن:ياريتني ماوافقت عليه مش ليا بكل سمعه..
رفع حاجبه وقال:من هالناحيه عندك حق مش ليك بكل..
روبين شبحتله شويه بعدين قالت:نادمه..
اسماعيل برفعة حواجب:على شنو!؟
روبين:على كل شي..
اسماعيل مط شواربه للأسفل وهو يمرر في نظره يمينه بعدبن شبحلها وقال:بتسيبيه قصدك..
روبين بجديه:لو انت تسامح وتنسى اني نسيبه.
ضحك نص ضحكه وقال:اممم..
روبين:نحكي من جدي ياسمعه والله..اني مش قادرة ننساك..تأكدت من مشاعري اكثر بعد ماخليتك وندمت اللي خليتك..
اسماعيل قعد يشبحلها شويه بعدين ابتسم ع جنب وقال:سيبيه قبل بعدين نتفاهموا..
ولف ومشي وخلاها وع وجهه ابتسامة مكر..
فرصة وجاته لعنده بش ينتقم منها ع اللي داراته فيه..
اما روبين اللي كانت تفكر في نفسها وبس صدقت كلامه وهي فرحانه بيه...ووقتي بدت تفكر في طريقة تخلص بيها من عصام..
🌸🌸🌸🌸🌸
"افطري آمنه"
امنه بضحكه:ناكل خيرك..
هبه ضحكت بعدين حطت يدها تحت ذقتها واتكت بمرفقها ع المكتب وهي تقول:بنسألك سؤال وان شاء الله مايضايقش ولاتعتبريه حشريه مني..
امنه وهي تشرب العصير:امم..اسألي..مافيش هلبه ناس تتحشر فيا اني..
هبه ضحكت بعدين قالت..امم..امنه اني لاحظتك اول ماجيبتي للكليه لبسك كان غامق ومش ملفت وماكنتيش تحطي في شي ع وجهك بس بعدين غيرتي وبدتي تلبسي في الوان وتحطي في رتوش ع وجهك..غمزت وقالت..شن السر..
امنه مسحت فمها بطرف صبعها ونزلت عيونها لوطا وهي محرجه..
هبه ابتسمت بعدين نزلت يدها وقالت:في هلبه بنات هكي يشوفوا ان التغيير في حياتهم للأحسن لما يلبسوا ع الموضة ويديروا مكياج يعني هكي هما منفتحات للحياة ومنطلقات فيها..ولما يكونوا محط اعجاب الغير تزيد ثقتهم بنفسهم..
امنه شبحتلها وقالت بأسف:كلهم يشوفولي ع اني مش بنت زي البنات ومافياش انوثه لأني مانلبس زي مايلبسوا ومانهتمش بشكلي ونحط مكياج وغيره...نكذب عليك لو نقولك اني قويه ومايأثرش فيا كلام الناس بالعكس اثر فيا وهلبه..
هبه:اممم..باهي عندي ليك حاجه حلوة...انتي تحبي تقري ولا؟
امنه بإبتسامه:يعني..
ناضت هبه من مكانها وقالت:تو تحبي القرايه مع الكتاب هدا..
ومشت لشنطتها وفتحتها وطلعت منها كتاب وجت لآمنه بيه وقالت:تفضلي..
خداته امنه وقعدت تشوف لغلافه واسمه..
هبه:ممكن تسثقليه بعد تشوفي عنوانه لكن صدقيني مش حتملي لحظه وانتي تقري حيغير تفكيرك كله..
امنه شبحتلها وقالت:على مااظن تنزلي منه في اقتباسات ع صفحتك صح؟
هبه ابتسمت وهزت راسها بإيجاب..
فجأة طق الباب..
شبحوله الزوز..
هبه:ادخل..
انفتح الباب وخش اللي كان يطق..
امنه فتحت عيونها ع وسعهم ووجهها ولى احمر.
هبه:تفضل عبدالقادر..
عبدالقادر بإبتسامه:احمم..جيت نطمن ع الأستاذه ان شاء الله حالها باهي توا؟!
امنه نزلت عيونها في الكتاب وهي بتتبخر من الإحراج..
اما هبه جاوباته وهي تقول:ايه الحمد لله كويسه..المهم انت جاوبت في الامتحان؟
عبدالقادر وهو يسرق في النظر لآمنه:ايه الحمد لله جاوبت وبإذن الله مصكره..
هبه:باهي كويس..
عبدالقادر:احمم..وخش وفيده شكاره معبيه شكلاطه وكيكه وعصاير..وقال..واضح عليك مش فاطره وجهك اصفر زي الكركم ع قولت حناي..وحط الشكارة ع الطاوله..
هي شبحتلها بربع عين..
هبه بإبتسامه خفيفه:تعبت روحك..جبتلها فطور..
عبدالقادر بضحكه مرتبكه:معليشي زيادة الخير خيرين..
امنه انحرجت هلبه قدام هبه ومش عارفه كيف تنقد نفسها من الموقف اللي حطها فيه عبدالقادر قدامها..
شبحت شويه للشكاره..بعدين ناضت...
وخدت الشكارة..
هبه وعبدالقادر قعدوا يشبحولها..
هي طلعت من ورا المكتب ومشت للباب وهما مازال يشبحولها..
عبدالقادر بإبتسامة توتر:لا استاذة لا حرام نعمة ربي..
ومشي وراها وهبه لحقتهم..
طلعت امنه من المكتب ومشت ع طول الممر لين وصلت في اخر شافت يمين ويسار...
بعدين تبتت نظرها ايسارها وبعدها مشت..
وهبه وعبدالقادر وراها وهما مستغربين..
وقفوا الزوز وهما يشبحولها كيف مشت للعمال اللي ينظفوا في الكليه..ابتسمت في وجوههم وكلمتهم وهي تعطي فيه في الشكارة وهما ابتسموا وخدوها منها..
ارتسمت ع وجه هبه ابتسامة رضا..
اما عبدالقادر فكان يشبحلها بإعجاب شديد..
هي لفت ومشت جيهتهم ولما وصلت فيهم آمنه قالت لعبدالقادر بدون ماتشبحله:دير الخير في مكانه الصح مرة تانيه..
ومشت من حداهم..
وهبه مشت لحقتها..
اما هو قعد وراها بعيونه وهو مبتسم..بعدين تنهد..
ورجع شبح للعمال وشافهم كيف ياكلوا...
اتكى ع الحيط بكتفه وهو مبتسم ويفكر...
قطع عليه تفكير عصام لما جي خاش للممر وهو يقول:شن ادير هني؟!
عبدالقادر رفع حاجبه وشبحله:واقف..شن تشبح فيا ندير..بعدين حط ايديه ورا ظهره وقال... هل في مشكله في وقفتي هني.!!؟
عصام شبحله من فوق لتحت بعدين مشي كمل طريقه..
عبدالقادر بإزدراء:اثقل من دمه ماريتش..ااه بس لو نقدر نطلعه من مكتبها ولانطلعها هي..
"قدووو"
شبح لصاحبه اللي ينادوا فيه..تنهد ومشالهم..
🌸في المكتب..
هبه:قصته قصه عبدالقادر هدا..
امنه قعمزت ع الكرسي وعيونها لوطا ووجهها مازال احمر..
هبه بضحكه:الباين ان الكتاب جاك في وقته..
شبحتله امنه وخداته من ع الطاوله وهي مبتسمه وقالت:مشكورة هبه..
هبه:العفو ياستي..
ومشت قعمزت ورا مكتبها..
ع خشة عصام..
عصام:السلام عليكم..هاه شن حالك استاذه توا؟
هبه شبحتلها..
امنه بدون ماتشوفله:الحمد لله استاذ..اسفه سببت ربكه في الأمتحان..
عصام مشي قعمز ورا مكتبه وقال:ولايهمك كل شي مشي تمام..
حط الوراق ع الطاوله وقال:عبدالقادر كان هني؟
امنه قعدت ساكته..
هبه:ايه..سأل عنها ومشي..
عصام بإنزعاج:مش عارف امتى يمل ويسيب الكليه المخلوق هدا ولاامتى يلزوه قاعد غير مسبب للمشاكل والإزعاج بنادم عايش ع الهامش بلا فايده...
امنه ضايقها الكلام هلبه..
وهبه لاحظتها وهي تشبحله..
عصام رفع حواجبه وقال:اهي ورقته قدامي اول وحده..
شبحتلها امنه..
قعد يمرر في نظر ع الإجابات..
شيئا شيئا بدت ترتسم ع وجهه ملامح الدهشه..بعدين قعد يقلب في الوراقي يدور ع وراق اللي مقعمزين قدامه ووراه..
لقاهم...وقعد مركز في الإجابات..
بعدين رفع حواجبه وقال:جابت ماعندها خلاص!
امنه:ان شاء الله خير!..
وهبه تشوفلها..
عصام بدهشه:مجاوب تصدقي!! مافي سؤال مخليه وكلها اجابات كامله!!!
امنه بدون ماتحس ارتسمت ع وجهها ابتسامه حلوة..
هبه لما شافتها حطت يدها تحت ذقنها وهي مبتسمه..
عصام:شي لايصدق الصراحه!!
امنه:احمم..حتى "البريزنيدشن" اللي داره كان ممتاز..
شبحلها عصام وقال:شكله ناويها حق!
امنه فتحت اللاب متاعها وقالت:وهو المطلوب المهم الطالب ينفع نفسه ويستفيد وينجح..
عصام شبح لورقة عبدالقادر تاني وقال:ويطلع ونفتكوا منه..
امنه شبحتله بحده..
وهبه شبحت لعصام شويه بعدين نزلت عيونها للاب توب..
🌟🌟🌟🌟🌟
تحت المكيف..
عبدالقادر:تبوا الحق الجو غادي ممل شويه..لكن عادي مش مشكله تو نتعود..
فاروق:ولينا تجار يااا..
جلال بضحكه:وعندنا محلات ونبيعوا ونشروا..
فاروق:ونقروا وندير في ابحاث وحالتنا بلة..
عبدالقادر شبحلهم بإزدراء:كملتوا!؟
هما ضحكوا..
عبد القادر:باهي نوضوا ياخايب انت وياه خل نمشوا لنادر..
فاروق:نادر توا هني مش في الحوش!
عبدالقادر:عارف ياذكي..بنطبوه عليه خل يقرينا كلمتين لامتحان غدوة خير من ضياع الوقت..
ومشي..
الزوز ناضوا وهما يشبحوله بذهول..
بعدين قال جلال:يايوم من ايامه الأولى..
فاروق ضحك وقال:غير تعالى هيا..
وجبده ومشوا الزوز لحقوه...
⚡عبدالقادر وهو ماشي للدروج..
ركب وهو يقول:سبحان الله..امتى الواحد يحط قدامه هدف وحاجه يبي يوصلها تتغير فيه هلبه..يبدا يبي يدير هلبه حاجات قبل مستحيل يديرها ولايفكر يديرها..تبوا الحق..
اني هدا وين حسيت اني عايش حق..يعني بنادم في منه فايده..
وصل فوق والتفت لصحابه وقال:تي هيا ياقومبالي انت وياه..
فاروق:شوفه غادي في اخر الممر..
ومشوا التلاته لأخر الممر..
وصلوا غادي..
لقوه مقعمز يقري في بنات..
وحده منهم كانت تعرف عبدالقادر زمان..
لما شافها لف ومشي..
اما جلال وفاروق قدموا لنادر وقالوا:شن جو نادو..
نادر:اوووو شباب شن الاخبار..معليشي توا مشغول شويه تعالوا بعد نص ساعه..
فاروق:والله قلناها نجوك الحوش خير لكن قدو..والتفت يمينه..مالقي حد..بعدين التفت ايساره ووراه مالقي حد..وين مشي هدا!!؟
جلال:تمام نتلاقوا بعدين نادر..
وجبد فاروق ومشوا الزوز..
ونادر رجع يقري في البنات...
وصلوا فاروق وجلال في عبد القادر وقالوا:خيرك هربت!؟
عبدالقادر:الركيكه زينه مقعمزة ماريتوهاش!!
ضحكوا صحابه..
وقال فاروق:وليت زي المطلوبين..
جلال: كان بتقعد وين ماتشوف وحده تعرفها ادير هكي ياقعادك هارب عمرك كله..
فاروق بضحكه: والله حق مافيش بنت في طرابلس ماتعرفاش..
عبدالقادر:جديات والله فلقت روحي فلقه..اححح وخلاص..
بعدين قال..هي تعالوا نقعمزوا ونقروا كلمتين خير مش ضياع الوقت..
وخش للقاعه...وصحابه لحقوه وهما يتسوهكوا عليه..
🍂🍂🍂🍂🍂
الساعه 2:00بعد الظهر..
"امي زي ماهي امكم مش كان بوكم ترضوله اللي يديره فيها والله ماتجو تريس اللي تشوفوا في امكم تنضرب قدامكم وانتم تتفرجوا عليها"
هدا اسماعيل واقف قدام خوته ويأنب فيهم..
:والله الزوز والدينا مانقدروا نديروا شي..
اسماعيل:خلاص مالا خلوني اني نتصرف بوكم مش بوي..
زيد:في النهايه عمك راك تنسى.
اسماعيل:وهي امك راك تنسى..تي وربي وربي لو كان بوي حي وريته يضرب في امي والله نوقفله بالله..
زيد:شن تبينا نضربوا بونا ولاكيف..
اسماعيل:ياسيدي حاموا ع امكم اقفوا بينه وبينها..خلوه يتحشم ع وجهه ومعاش يمد عليها يده يابهايم..
سكتوا خوته وكلامه مش عاجبهم..
اسماعيل:انتم خوتي اللي تبوه اني فيه مش حنبخل عليكم بشي..لكن بوكم والله ماهو طايل من رزق بوي كان المعاش اللي دايرهوله وهدا اخر كلام عندي..
ومشي خش داخل للحوش..
واحد من خوته:مش عارف لامتى بنقعدوا تحت رحمته.
زيد:الرزق رزقه عنده حق..
:مش عارف انت مع منو بالزبط.
زيد:اني مع الحق..ومن الاخير اني بناخد وجهي وبنطلع من هالوجيج والمشاكل فديت وتعبت..
ومشي خش داخل حتى هو..
اما باقي الولاد...خدوا بعضهم ومشوا ناويين الحوش اللي قاعد فيه بوهم بش يبلغوه بكلام اسماعيل...
🍂🍂🍂🍂🍂
روحت للحوش..
خشت داخل..شمت ريحة الغدي كان بالبصله..
ابتسمت..ومشت طول للكوجينه..خشتلها وقالت:السلام عليكم حنينه..
تبرة ابتسمت بالسيف وهي تقول:وعليكم السلام بنيتي..
امنه:شن الغدي!؟
تبرة:رز بالبصله قريب يطيب..
امنه:هي شويه نخش نبدل ونصلي ونجي ندير السلاطه..
تبرة هزت راسها وهي ساكته..
وامنه مشت طلعت من حداها..
فاتت ربع ساعه وروح خالها..
خش عليهم الكوجينه لقي آمنة ادير فالسلاطه..
يدوب سلم ومشي لداره..
طاب الغدي وسقاته هي..
وجي خالها بش يتغدى..
قعمزوا مع بعض ع الطاوله وقعدوا يتغدوا وامنه ملاحظه ان جداها وخالها جوهم مش مزبوط..وجوههم مقلوبه وساكتين طول الوقت..
محمد:الحمد لله..وكيف جاي بينوض..
امنه:خليك خالي..
شبحلها هو وجداها..
امنه حطت الكاشيك وقالت:شن في ؟!
تبره تنهدت وقعدت ساكته..
محمد:مافي شي..
امنه:لافي خالي لوسمحت تكلم..
محمد تنهد وقال:بوك..
امنه:خيره!؟
محمد بضيق:جاني وقالي نبي..تنهد مرة تانيه وقال..نبي بنتي تجي تعيش معاي..
آمنه بصدمه:نعم!!؟
تبرة عيونها تعبوا دموع..
محمد بضيق:قال خلاص البنت كبرت ولازم تعيش معاي توا..
امنه بعصبيه:واني مانبيش ومانيش طالعه من هني..وهو قولوله بنتك ماتت من زمان من لما تخليت عنها وخليتها وهي بأمس الحاجه ليك..ماتت خلاص معاش عنده بنات..
وناضت من حداهم ودموعها ينزلوا ومشت طلعت وهي تقول:قولوله ماتت امنه...امنه ميته ماعنداش بنات..
وخشت لدارها وصكرت بابها بقوة..
خالها حط ايديه ع الطاوله وقعد يشبح لوطا بحزن..
وتبره تمسح في دموعها بمحرمتها..
🍂بكت امنه لين تعبت من البكي..
بعدين ناضت توضت وصلت ركعتين وفرغت كل اللي في قلبها لله سبحانه وتعالى..
وبعد كملت الصلاة مشت انطرحت ع السرير بتعب وقدت..
وقلبها مفطور من الحزن..
🍂🍂🍂🍂🍂
"امي هدا رايها شن تبيني نديرلها"
الزبير:مش عاجبها خوي صار! تي مفروض تحمد ربها ع عيبها في من يطلب فيها..
مريم:هكي امي قالت..
الزبير:وهي بنتها ولابنتك..
مريم:اسمع يازبير ماتكسرليش راسي خلاص صكر ع الموضوع..
الزبير شبح للتلفزيون وهو متنرفز..
ومريم تاكل في العنب ومرة مرة تسرقله في النظر..
اما عند بناتها في الدار..
كانت روبين راقده وحاطه سماعات وتسمع في الاغاني وهايمه..
اما سيرين كان تطلي في ظوافرها وهي تشبحلها بشك وحاسه ان في شي صاير مع اختها..
فجأة رن تليفون سيرين..
حولت اللي في ايديها خداته وفتحت الخط طول وردت:هلا زيدوا..
زيد:شن جو سيرين..
سيرين:تمام..خيره صوتك..
زيد:سيرين اليومين الجايات نبي نشوفك..
سيرين:اوكي..تعالي للمعهد في نفس المكان..
زيد:تمام..يللا تشاو..
سيرين:بيباي...
وصكرت وهي مستغربه وتفكر..
سمعت اختها تتنهد شبحتها وضيقت عيونها يشك وقعدت تفكر فيها هي...
🌟🌟🌟🌟🌟
"جي تغدا وطول للباب"
فرج:اللي فيه طبع مايخليشي..
تجديده:الولد ماشي يقرا مايلعبش..
فرج:وانت مصدقه وفايت عليك!؟
تجديده:اني في الاول زيك ماصدقتش لين ريته اليوم بعيوني مع الفجر مقعمز في دويرته ويقرا..
فرج سكت وهو يفكر..
تجديده:غير كان يعرفني عليها هالبنيه اللي سقمت حاله..
فرج:والله لو ينجح ويخدم ع راسها نخطبهاله طول ونديره عرس يحطوا بيه سنين..
تبرة:ان شاء الله يارب ان شاء الله..هاك الطويسه ياحاج..
خداها منها وقعد يشرب..
فجأة..
سمعوا صوت زغرودة..
تجديده:هدا شني!؟
مط فرج شواربه للأسفل بإستغراب وعدم معرفه..
ع خشة فتحيه عليهم وهي تضحك وفرحانه قالت:أشرف نجح يما اشرف نجح تخرج يابوي..
تجديده ناضت وهي تزغرد..
فرج:ماشاء الله ماشاء الله..
جت تجديده لبنتها وحضنتها وهي تقول:مبروك عليه وليدي ومبروك عليكم انتي وبوه..
فتحيه ودموعها ينزلوا:الحمد لله يام الحمد لله..
وناض فرج لبنته حتى هي يباركلها بعدين طلع للصادق...
🌸🌸🌸🌸🌸
الساعه 5:30عصرا..
مقعمزة في الجنان...وفيدها الكتاب اللي هدتهولها صاحبتها تقرا فيه..
من لما اول ماقراته غرقت في العالم متاعه ونست كل شي صار معاها..
كانت تقرا والإبتسامه ع وجهها..
وحناها تسقي في الغرس وتتفرج عليها وهي تقول في نفسها"اني اللي ربيتك وتعبت عليك مش مخلياتك لي حد"
اما امنه وهي تقرا..عجبتها قطعه في وحده من الصفحات قرتها اكثر من مرة..
بعدين خدت تليفونها صورت القطعه..ونزلت ع صفحتها ع الفيس..
القطعه كانت..
《ولاتظني أبدا أن الأنوثة في ارتداء الكعب العالي واحمر الشفاه والثوب الضيق..
بل هي مزيج من رقة الطباع وهدوء في تناول امور الحياة..وذوق رفيع في اختيار كل شيء ليس فقط الألوان والملابس بل في الافكار والكلمات..واخلاق رفيعه وثقافة واسعه..وعلم بكل مايرضي الله..
فكوني دائما زهرة بيضاء نقيه..احتفظي بعطرك حتى يأتيك الربيع》
حنان لاشين..
خدت نفس عميق..
بعدين ناضت ومشت خشت داخل توجهت لدارها..
خشتلها..ومشت فتحت الدولاب وطلعت شنطه فتحتها..وطلعت منها حوايجها الاولات كلهم..
بعدين خدت الشنطه وردتها لمكانها..
مررت نظرها ع لبسها..بعدين خدت نفس وقامت تليفونها واتصلت بتماضر..
امنه:السلام عليكم تماضر..........الحمدلله انتي شن حالك............دوم يارب...تومي حبيبتي فاضيه توا؟........ابتسمت وقالت...تمام راجيني شويه وجايتك...وعليكم السلام..
وصكرت...
بعدين خدت العباية الوحيده اللي عندها بش تحددها...
🌟🌟🌟🌟🌟🌟
"يبستولي ريقي يبس ريقكم"
نادر قال الكلام هدا بعد تلوح ع الكرسي من التعب..
عبدالقادر بضحكه:كله بأجره ندورة..
نادر:انت بالذات تسكت مانبيش نسمع حسك..
ضحكوا الولاد..
عبدالقادر:ولايهمك غالي غدوة لما نألف كتاب عن نجاحي تو نتكلم عليك فيه ولايهمك..
نادر:مانبي منك شي غير انك تصفي بس..صفي بسسسسسسس..
عبدالقادر؛صافيه بعون الله..
نادر من وسط قلبه:يااااااااااارب..
والولاد يضحكوا وخلاص..
🌟وقعدوا يراجعوا لساعة متأخره في الليل..
بعدين اللي هدا روح لحوشه..
عبدالقادر لما روح لقي حناه ساهره تراجي فيه..
جاته طول اضبطاته..
عبدالقادر بخلعه:خيرك!؟
تجديده وهي تشم فيه:لاشي غير استاحشتك..
بعدين حضناته من الجهه التانيه وهي تشمشم وعبدالقادر يضحك بإستغراب..
بعدين بعدت وقالت:قولي وينك لتوا هدا كله قرايه!!؟
عبدالقادر:والله قرايه بالله..
مدت صوابعها الزوز السبابه والوسطى وقالت:هادو كم..
عبدالقادر:تمانيه..
خبطت بيدها ع صدرها وقالت:نهاري احرش..رفعت سبابتها بس وقالت..وهدا كم..
دار حوله بعيونه وقال:11..
ضرباته ع ذراعه وقالت:فالح كان في التزفريت يامعفن..
عبدالقادر وهو يتحسس في ذراعه:شن بنديرله انتي ديما ضاربك الخنس والوسواس معشش هني..وحط يده ع راسها..
بعدين قربه وباسه..
تجديده:معناها تقرا بالحق وليدي ولا..بترفع راسي زي اشرف وليد عمتك..
عبدالقادر:الله!تخرج اشرف!
تجديده:ايه وخدي المازستير وقال بيروح..
عبدالقادر:باهي باهي مبارك..ايااه عاد شن بيفكني من لسان بوه توا..
تجديده بضحكه:ان شاء الله حتى انت تنجح وتولي خير منه..
عبدالقادر:ايوه توجي كثري من هالدعوات السماح..
تجديده:من غير ماتوصي..هيا سلم وليدي برا ارقد بش تنوض ناشط ان شاء الله..
عبدالقادر بإبتسامه:ان شاء الله..تصبحي ع خير..
تجديده:قدامك كل خير ياغالي..
تنهد عبد القادر ومشي لداره..
وحناه حتى مشيت لدارها وهي تدعيله..
🌸🌸🌸🌸🌸🌸🌸
مع صباح يوم جديد...
اشرقت آمنه هالمرة بروح حلوة مختلفه حاسة روحها راضيه ومرتاحه هلبه..
صلت الفجر في وقته...وبعد ماقرت وردها من القرآن..
قعمزت كتبت مجموعه من الخواطر ونزلتهم ع الصفحه العامه..
بعدين كملت قراية باقي الكتاب اللي عطتهولها..
خشت عليها حناها وقالت:مازال مش فاطره..
رفعت راسها من الكتاب وهي تضحك بعدين قالت:حي والله ماشفت الساعه ..
تبرة بإبتسامه:هي نوضي وتي روحك سلم بنيتي..
امنه بإبتسامه:حاضر..
طلعت تبره وصكرت الباب..
وناضت امنه بش تبدل...
🌺ووتت تبرة الفطور...
وجي محمد قعمز بش يفطر..
لحظات وخشت عليهم آمنه..
كانت لابسه عباية فضفاضه وشاربه لونها رصاصي هافت وفيدها شنطة الاب توب وشنطة اليد ع كتفها..
امنه:صباح الخير خالي..
شافها محمد ابتسم وقال:صباح الخيرات..
وقعدت تفطر وهي واقفه..
محمد:قعمزي..
امنه:لا خالي مستعجله قريب يبدا الأمتحان..
شرب محمد الشاهي وناض وقال:حتى اني مستعجل..ماتبوا شي؟
تبرة:سلامتك بس..
امنه:جيب ع طريقك فطيره لما نروح ان شاء الله بندير فتات..
محمد بضحكه:حاضر..هي السلام عليكم..
ومشي طلع..
بعد طلع قالت تبرة لآمنه:تي خيرك وليتي للأسود..
امنه ابتسمت وهي تغمس في العسل وقالت:الأسود لون قنين ياحنينه غير حني ظالمينه..شبحتلها وكملت تقول..وليه مكانه المناسب..والملون حتى هو ليه مكانه المناسب..
تبرة:ووجيهك اللي رايح اصفر حطيتله طشة كريمه وبودرة اللطف ودرتي كحيله..
امنه:وجهي الأصفر تو ينور مع الوقت لما نهتم بماكلتي..والكريمه والبودرة والكحيله مكانهم مش الشارع حبيبتي..
تبرة ابتسمت بتعجب..
امنه بضحكه:ماتبي شي حبيبتي..
نبرة:روحي بكري بش اديري الغدي مش تحصلني فيه..
امنه:هههههه..حاضر..بالسلامه توا..
تبرة:بالسلامه بنيتي ربي يحفظك ويفتحها عليك...
بعد طلعت امنه ابتسمت تبرة وقالت:ايه والله..مافيش خير من السترة..
وقعدت تلم في ماعين الفطور...
🌟🌟🌟🌟🌟🌟
الساعه 9:30صباحا..
في القاعه...
كان عبدالقادر مقعمز يراجع وصحابه يراجعو حتى هما..
هو كان مرة مرة يشبح للباب وللساعه...
لعند ماجت امنه وخشت للقاعه وهي تقول:السلام عليكم..
قعد عبدالقادر سرحان في مظهرها الجديد..
يشبحلها وهي متفاجئ وعيونه تلمع..
هي حطت شناطيها ع الطاوله وقالت:حولوا اللي في ايديكم هيا..
بدوا يلموا في حاجتهم..
وعبدالقادر حط الشيت في الشنطه ومرة مرة يشبحلها..
امنه طلعت وراقي الامتحان وقالت:خلاص؟
عبدالقادر:ايه خلاص استاذه..
مابتش تشبحله..وبدت طول توزع في الوراقي..
لما وصلت فيه حطتها طول ومشت..
وهو معاها بعيونه والإبتسامه مافارقتش وجهه..
بعد كملت توزيع..
مشت قعمزت ورا طاولتها وربعت ايديها وقعدت تراقب..
تجنبت تشبح جيهته...
اما هو فكان منهمك في الحل..
هي قعدت ادور بعيونها ع الطلبه غصب عنها عينها جت عليه..
لقاته غارق في الورقه ويكتب..
ضيقت عيونها وهي مبتسمه..
هو رفع راسه فجأة هي طول غيرت عيونها واخفت ابتسامتها وقالت:عيونكم في ورقتكم..
ضحكت ضحكه خفيفه ورجع يحل..
لأخر دقيقة في وقت الأمتحان قعد...
وطلع اخر واحد...
امنه بعد طلع طول شافت ورقته وتفاجئت ع الآخر مافيش اجابة غلط..واجابته كلها نموذجيه..
امنه بضحكه:سبحان الله وبحمده...
🌟🌟🌟🌟
واستمر عبدالقادر ع مثابرته واجتهاده طول اسبوع الامتحان..
وامنه بدت تركز عليه وع التغيير اللي صارله...
فالوقت اللي كان فيه صاحبه اسماعيل يمشي يوميا لكلية روبين..كان يوقف ع البنات ويهدرز عليهم قدامها بش يحرق دمها ويستفزها بش تسيب عصام بسرعه..
وهي فعلا كان هدا اللي صاير فيها ومازالت تفكر في طريقه للخلاص من عصام..
واختها سيرين مش احسن منها حال....
يوم الخميس...
في المعهد من الخلف...
سيرين بدموع:لازيد بالله عليك لا..شن تحرق ماتحرق هادي تموت غارق ياغبي والله تموت..
زيد:احسن خل نفتك من هالعيشه..
سيرين:زيد مش هكي معقوله انت جبان لهالدرجه!!
زيد بعصبيه:جبان شني!!جبان شني..اني فديت تعبت كرهت حياتي..
سيرين قعدت تبكي وهي ساكته..
زيد بضيق:خلاص بالله عليك مش ناقص..
وسيرين تبكي وخلاص..
زيد:سيرين خلاص..
"انتي ياطالبه"..
فنصت سيرين وشهقت بخوف..
اما زيد مشي يجري للسور وطول ركب ونقز منه..
وسيرين جوها الابلات يجروا وهي بتموت من الخوف..
..........
المديرة:قداش ليا ندورلك فيها انتي بالذات..
سيرين ببكي:اسمعيني ياأبله شويه بس..
المديرة بعصبيه:صكري فمك وعطيني رقم امك ولابوك نكلمهم..
سيرين:حي عليا...!
المديرة:توا تقولي حي عليا خيرك مافكرتيش من الأول في نتايج عمايلك..
سيرين قعدت تبكي وهي ساكته..
المديرة:هيا عطيني رقم حد من اهلك..
سيرين شبحتلها شويه بعدين قالت:..........
🌸🌸🌸🌸🌸🌸
طلعوا من المكتب الزوز وهما يهدرزوا..
هبه:عندي واحد تاني لنفس الكاتبه..
امنه:خلاص نتلاقوا ان شاء الله يافي حوشك ياانتي تجي لحوشنا وتجيبيه..
هبه:بإذن الله..
امنه بإبتسامه:تعالي انتي بش نضوقك الكعك متاعنا مافيش منه راهو..
هبه بضحكة:اووو اغراءات..
ضحكت امنه وشبحت القدام فجأة تلاشت ضحكتها وغيرت عيونها لجهة تانيه..
لما وصلوا لأخر الممر..
"لحظه استاذة"
وقفوا الزوز..
عبدالقادر:والله العظيم نبيك في موضوع ضروري جدا مهم جدا جدي جدا...فوق ماتتصوري جدا..
امنه شبحتله برفعة حاجب..
هبه:تلقيني غادي...واشرتلها ع المكان..
ومشت..
امنه شبحتلها شويه بعدين شبحتله وقالت:يامخلوق انت افهم انت تحط فيا في مواقف زي الزفت تجيبلي في الشبهه..
عبدالله بضحكه:اهدي شويه ووسعي بالك وعطيني فرصه نتكلم.
امنه ضمت شواربها لداخل بغضب بعدين قالت:تكلم..
عبدالقادر خدي نفس عميق بعدين زفر وقال:احمم..اني..تنهد ووزع نظره قدامه بعدين شبحلها و كمل يقول...اني قبل عمري ماوقفت وقفه زي هادي ع بنت..وقفة نكون فيها..متوتر..ملخبط..ضحك ومسح ع لحيته بعدين مسح ع حاجبه وقال...مش عارف منين نبدا الكلام ولا شن نقول..لكن..وسكت..
هي قعدت تشبحله وتراجي فيه يكمل..
هو خدي نفس بعدين رفع حواجبه ونزلهم وقال..
"ترضي تتزوجيني"
انفتحوا عيونها ع وسعهم...واكتسي وجهها باللون الأحمر..
وبدت ترجف...وقلبها يدق بأقوى مافيه...
عبدالقادر:عارف ان غلط نجيك بروحي ونقولك كلام زي هدا..لكن كنت تبي نسمع منك الموافقه..ونبعت اهلي طول..
امنه من صدمتها وعدم استيعابها للموقف مشت بسرعه وخلاته..
وكلمة"ترضي تتزوجيني" قاعده ترن في ودنها بالصدى..
قعدت تشوف لرجلها العاجزة..ودموعها بدوا ينزلوا...
هبه شافت حالتها جتها شدتها وقالت بقلق:امنه خيرك!؟
امنه:بنروح هيا..
"استاذه امنه..استاذه..اسف لو درت حاجه ضايقاتك.."
وهي جابده هبه من يدها وتمشي معاها..
امنه بدموع:قوليله يمشي..
هبه التفتت:خلاص برا عبدالقادر ربي يهديك..
هو مشي وقف قدامها وقالت:في شن غلطت فهميني!! اني طالبك بالحلال..
هبه انصدمت..
امنه قعدت تشبحله بألم ودموعها ينزلوا..
وهو يشوفلها بنظرات رجاء..
فجأة رن تليفونها..
استاقظت وقاماته مسحت دموعها وشافت المتصل رقم غريب...
كانت تبي ترد عليه بش تتخلص من عبدالقادر بس..
وفتحت الخط وردت:ايوه السلام عليكم........
عبدالقادر تنهد..بعدين مسح بإيديه ع وجهه..
وهبه تشبحله..
امنه بخوف:باهي باهي..جايه..وصكرت ومشت طول..
عبدالقادر جاي بيلحقها وقفاته هبه لما قالت:خليها توا ياعبد القادر..
شبحلها..
هبه:لوسمحت..
عبدالقادر غمض عيونه وهز راسه بإيجاب..
وهبه طول مشت ولحقت امنه...
.....يتبع.....
