My teacher🌟

الجزء ماقبل الأخير القسم الثاني

🌟...
"شن نظامك في اليوم شن يعني شن دير؟!"
ابتسم وقال:امم..ياستي اغلب وقتي في الخدمه زي ماتعرفي عندي محل سجاد كبير ومحل تاني متاع مواد منزليه مقسم وقتي بيناتهم..
آمنه:والقرايه؟!
عبدالقادر بضحكه:لاهادي شورك انتي نبيك انتي نتظمي امورها..
ابتسمت وشبحت القدام وهي تقول:تمام..بعدين شبحتله برفعة حاجب وقالت..لكن هاه اللي بنديره بتمشي عليه ماتجيش بعدين تقولي كاني وماني تمام؟..
ضحك وحط يده ع راسه وقال:على راسي..
ضحكت وشبحت القدام بعدين قالت:خوك يمينك..
شبحلها بإبتسامه وقال:عارف..وشبح القدام..
وهي شبحتله وابتسمت..بعدين غيرت عيونها القدام...
وكمل الطريق وهما ساكتين لين وصل للمعهد..
درس قدامه وقال:اول ماتكملي كلميني..
امنه بإبتسامه:تمام..في حفظ الله..السلام عليكم..وفتحت الباب ونزلت..
عبدالقادر بإبتسامه:في أمان الله..وعليكم السلام..
صكرت الباب ومشت خشت للمعهد وهو بعد ماخشت تحرك..
شويه وجاه اتصال..
رد وهو يسوق:جايكم جايكم..
"قدري برا طول لمعرض اسماعيل"
عبدالقادر بقلق:شن في خيره صوتك هكي!؟
"غير برا غادي بعدين ساهل"..
عبد القادر صكر طول وحط التليفون قدامه وغير طريقه متوجه لمعرض اسماعيل..
🍂اللي كان واقف قدام المعرض متاعه بعد ماكلاته النار وتسببت في خساير كبيرة ليه..
كان واقف قدام وهو يشوفله بصدمه...وجنبه خوه زيد يشوف للمعرض بغضب وهو عارف من دار فيه هكي..
حط جلال يده ع كتف اسماعيل وقال:يعوض الله ياصاحبي..
فاروق:المهم توا نعرفوا السبب..ماصه ولابفعل فاعل..
اسماعيل حرك عيونه لزيد...
لقاه يشبح للمعرض وهو معصب..
اسماعيل:عارف من دارها ولا؟
جلال وفاروق شبحوا لزيد..
زيد عرف ان الكلام موجه ليه بدون مايشوف لخوه هز راسه بإيجاب وقال:دير فيه مايعجبك..
اسماعيل تنهد بحرقه ورجع شاف للمعرض بحسرة..
ع طلعة خبراء من معمل البحث الجنائي قسم الحرائق..
جوه طول ووقفوا قدامه واحد منهم قال..
:واضح جدا ان الحريق بفعل فاعل وحني بعد الفحص حنثبتوا هالشي..
اسماعيل هز راسه وهو ساكت والدموع معبيات عيونه..
وزيد يشوفله ودموعه فعيونه ومن الغضب كان شاد ع قبضة يده بكل قوة...
🍂🍂🍂🍂🍂
ماتوقعنش تجي اليوم..
قالت هبه هالكلام لآمنه وهما واقفات في ساحة المعهد..
آمنه :وعلاش مانجيش؟.!
هبه بضحكه:يعني قلت اكيده قعدت سهرانه الليل كله.
امنه ضحكت وقالت:ياباردة..ايه هدرزنا شويه لكن مش الليل كله عاد...
هبه بإبتسامه:تعرفي بجديات عبدالقادر طلع راجل بمعنى الكلمه..
امنه:احمم..باهي عارفين..
هبه:ههههه..بدينا نغاروا .
امنه برفعة حاجب:ردي بالك في الغيرة اني ماعنديش ياامي ارحميني..
ضحكت هبه وقالت:غير امتى يجينا حتى حني يوم ونغاروا ونكدوا عليه عيشته..
امنه بإبتسامه:ان شاء الله عن قريب..
هبه تنهدت بإبتسامه وقالت:تعرفي امونه..البنت مهما كانت ناجحه ومستقله بذاتها وعايشه حياتها صح تقعد بحاجه لنصها التاني..او كلها الآخر..
امنه بإبتسامه:احلا عبارة نقراها في كتاب منارات الحب.."كلها الآخر"...لكن ياهبوش ماتوقفش حياتها لو ماجاهاش..تكمل نفسها بنفسها وتسأل الله يعوضها خير..
هبه بإبتسامه:اكيد..
سكتوا الزوز بعدين قالت امنه:خلاص بتبدا المحاضرة توا نتلاقوا بعدين بإذن الله..
هبه بإبتسامه:تمام..سلام توا..
امنه:سلام ومشت خشت داخل..
اما هبه مشت قعمزت ع واحد من الكراسي وفتحت كتاب اسمه "نبض" لأدهم الشرقاوي وبدت تقرا فيه...
🌸🌸🌸🌸🌸
"اللهم بارك عليها قنينه ومحترمه عجبتني ع الآخر"
تجديده:والله حتى اني عجبتني والباين عليها بنية فالحه..
فتحيه بإبتسامه حماس:خلاص بنكلم شروفه عليها..
تجديده:راهو ينطلك ويقول نبي ناخد وحده اني موازيها..
فتحيه:تو نقعد نزن ع راسه نزن ع راسه لين يقول..
تجديده:زني ياحنة زني انتي في الزنين مايقدرك حد..
ضحكت فتحيه..
تجديده بضيق:عليك عيلة عيلة المراة اللي خداها ولد خوك..شفتي امها ولااختها..ولامرت بوها..
فتحيه:خيرهم؟
تجديده:يخوفوا يابنيتي بالذات امها ماتقولش امها بكل لاجت حداها ولاناضت من مكانها اللي تجري وتحوس حناها بس..
فتحيه بحزن:الفجي فيها مسكينه..يما البنيه بوها وامها مطلقين وكل حد فيهم دار عيله ع حاله وخلوها لخالها وحناها يربوها..يعني شن متوقعه منهم!؟ والله يام في هدا كله مامهم كان البنيه بس واضح عليها متربيه كويس وملتزمه ومحترمه..وهدا اللي يوده الواحد لولده مراة مقومه وبنت ناس متربيه كويس هدا بس المهم يام..
تجديده تنهدت وقالت:ان شاء الله تطلع كيف ماتقولي..
رفعت فتحيه فنجان القهوة بتشرب منه وهي تقول:وخير ان شاء الله...ورشفت من الفنجان...
🍂🍂🍂🍂🍂
الساعه 11:00صباحا..
من قدام مقر البحث الجنائي..
مقعمزين الأربعه في سيارة اسماعيل اللي كان مهموم...
وهما يحاولوا يخففوا عنه..
اسماعيل بضيق ممزوج بالعصبيه:الناس اللي ليها عليا فلوس اللي دفعوا عرابين ولاعطوا دفعه اولى ومخليين سياراتهم في المعرض ومشت انحرقت..وفلوسهم صرفتها..كيف ندير معاهم! منين نجيبلهم حقهم قولولي..اقسم بالله اللي عندي كله حطيته في دفعة سيارات جديده جاية بعد رمضان..يعني توا ماعندي شي..
عبدالقادر قعد يشوفله بضيق..
فاروق:هما لما يعرفوا ظرفك حيعطوك وقت ادبر فيه امورك..
اسماعيل:وكان ماقدروش ظرفي شن ندير بعدين..نخش الحبس!
جلال بضيق:لاحول ولاقوة الا بالله..
اسماعيل زفر بقوة وهو مغمض عيونه بعدين مسح بإيديه ع وجهه وقال:حسبي الله ونعم الوكيل..حسبي الله ونعم الوكيل..
وخبط بيده ع دومان السيارة بقوة..
وجلال وفاروق يشوفوله بحزن..
وعبدالقادر اللي مقهور ع صاحبه ملتزم الصمت ويفكر..
🍂🍂🍂🍂🍂
"مسافر! قولوا هاارب!"
:وعلاش بيهرب!؟
زيد بغضب:ع اساس مش عارفين!..فوتوا الجو متاعكم هدا راهو عارف وفاهم كل شي..واقسم بالله ماني ساكت..
:شن تفتفت انت!
زيد هز راسه وقال:زيدوا استعبطوا زيدوا..لكن باهي..
ولف ومشي وخلاهم..
وهما يشبحوله..بعدين واحد فيهم قال..
:مادوروشي مايقدروا يثبتوا شي..الفرخ اسماعيل عند مشاكل مع هلبه ناس..
:هوهدا..قولي كلمك بوي؟.
:ايه كلمني يسأل شن صار..
:اموره غادي تمام؟
:ايه قال صاحبه اجرله شقه كويسه واموره كلها تمام..
:كويس...
وأمهم اللي كانت مقعمزة تحت روشن الصاله سمعت شن قالوا وهي تبكي بصمت بحرقه..
طاحت بين نارين..هادوما ولادها وهداكا ولدها ماتقدرش تختار بيناتهم..
كل اللي قدرت عليه انها دعت ع بوهم اللي كان سبب الشر كله...هو اللي زرع الفتنه وخلا ولاده يكرهوا خوهم و يديروا فيه مادارو...
🍂🍂🍂🍂🍂🍂
الساعه '12:30قبل الظهر..
في الطريق..
"لاحول ولاقوة الا بالله..والله لو كنت نعرف ماكنت كلمتك راهو دبرت راسي وخلاص"
عبدالقادر:لالا ماتقولش هكي ياراجل..اصلا اني وهكي ولاهكي ماشي بنروح بالمدام..
اشرف رفع حواجبه وقال:بالله قدورة نزلتي ع اليمين خل ناخد تاكسي..
عبدالقادر بإستغراب:علاش!؟
اشرف:نزلني نزل ياراجل مانبيش نولي صحيح وجه..
ضحك عبدالقادر وقال:تي عادي ياودي مافيش مشكله اني بناخدها من المعهد ونحطها في حوشهم..
اشرف بضيق:شن ماكان مفروض تقعدوا برواحكم وبراحتكم..
عبدالقادر بضحكه:جايه ايام ان شاء الله ونقعدوا براحتنا..ماجتش ع هاليوم يعني مادورش..
اشرف :تس عليك مواقف..والله لو نعرف انك مشغول هكي مادورتكش بكل..
عبدالقادر:تي خلاص يانفاخ خلاص..اني اللي مرة تانيه كان كلمتني مش مدورك لو بتنفخهم هكي..
ضحك اشرف...
🌸قدام المعهد🌸
هبه بمزح:غير تعالي نروح بيك وفوتيه..
امنه بضحكه:بطلي برادة هبه خيرلك..
وهبه تضحك..
ع جية سيارة عبدالقادر...درس ودار كلاكس..
امنه:هي سلام توا....
هبه بإبتسامه:سلام...
امنه وهي ماشيه نزل عبد القادر وفتحلها الباب الخلفي اللي وراه بالزبط..
جت هي وقالت:السلام عليكم..
عبدالقادر بإبتسامه:وعليكم السلام..
ركبت وهي مبتسمه..
وهبه تشوفلهم بإبتسامه..بعدين غيرت عيونها جو في عيون اشرف اللي كان يشبحلها..
تحشمت وغيرت عيونها ومشت طول لسيارتها وعيون اشرف معاها..
لين ركبت فيها..
تحرك عبدالقادر ومازال اشرف بعيونه مع سيارة هبه..
عبدالقادر:ابله آمنه هدا ولد عمتي اشرف..دكتور وتخصصه مخ واعصاب..
اشرف:كيف حالك اختي امنه..
امنه:الحمد لله..كيف حالك انت..
اشرف:الحمد لله ماشيه..
عبدالقادر:نبيك دوريله عروسه مانبيش نتزوج قبله..
اشرف ضرب عبد القادر ع ذراعه بقبضة يده..
عبدالقادر قعد يضحك..وامنه تشبحله من المرايه وهي شاده ضحكتها..هو شبحلها ابتسم وغمز بعينه..
هي تحشمت ووجهها ولى احمر وغيرت عيونها للروشن...
وهو ضحك وشبح للطريق...
🌸🌟🌸🌟🌸
واقفه تغطي في طنجرة الغدي وهي دندن..
في كلمات جميله...
يابيت العيله ياعالي ياعالي..
يامظلل بالحب...
يللي فيك اجتمعوا عيالي..
بالروح والقلب ..
 ع خشة حفيداتها..
اسيل:الله ع الرايق ياناس..شن الغدي توبا..
تبرة:غير وكان تفكيني من الاسم بس..
سيرين بضحكه:ادلع فيك ياحنينه..
تبرة:مانبيلها دلع غير تقولي حنينه بس سادني..
ضحكوا البنات...
شويه وسمعوا باب الحوش انفتح..
تبره:امنه روحت شورها..
سيرين:مامشتش في سيارتها؟
تبرة:لا ياحنه راجلها جي رفعها الصبح..
اسيل وسيرين:اوووووو...
اسيل بضحكه:يابختها..
ع خشة عمها محمد وهو يقول:من هي هادي؟!
تخزطت اسيل..وسيرين شدت ضحكتها..
تبرة:خيرك مروح توا!؟
محمد بإبتسامه:يام شن الغدي؟
تبرة:حطيت طبيخة بصله ع النار بندير مكرونه مسقيه..
محمد:تقلبيها رشدة عادي!؟غير شويه وجايين جماعة العمل بيتغدوا هني..
تبرة:ايه عادي وليدي عادي..اسيل تحركي لدار الخزين جيبي منها الماكينه متاع الرشده..
اسيل:حاضر..ومشت طلعت بسرعه..
تبرة:وانتي سويرة بري ديري دورة ع المربوعه..
سيرين:حاضر...ومشت طلعت حتى هي..
تبرة:ان شاء الله امنه بكري تعاوني وادير طريفات امبطن حداها..
محمد عقد حواجبه بإبتسامه وقال:الا ع سيرة امنه يام..بننشدك..
تبره :انشد؟
محمد بشي من الحشم "الحياء":يام..امس لما جبتوا امنه لراجلها كانت معاك وحده شن تقرب لراجل امنه؟
تبرة بإبتسامه؛خالته..
محمد:باهي...يعني يام..شن وضعها؟
تبرة:مش متزوجه..
محمد ابتسم ع جنب وقال:ان شاء الله خير..
ومشي طلع من حداها...
وتبرة قالت بضحكه:ماشاء الله عليها نبيله عاقله وسمحه..
🍂🍂🍂🍂🍂
"تحسابيني مش زابط اللي صار يام والله عارفهم هما اللي داروها"
وردة بدموع وهي خايفه:وشن بدير توا
اسماعيل بغضب ممزوج بالحسرة:الله غالب..هو جي عمي..وهما جو خوتي..وخبط بقبضة يده ع صدره وهو يقول..خوتي..مانقدر ندير شي..غير حاجه وحده..معاش نبي نعرفهم يام..والحوش هدا معاش يخشلوه..والراجل هداكا بنطلقك منه..
وردة ببكي:في ستين ودرة..
اسماعيل:ماعدا زيد..زيد مانيش ظالمه..ماريتش منه الا الباهي..
زيد في داره يسمع في خوه وهو في قمة الخجل من اللي داروه بوه وخوته..وواجعه خوه الكبير..
وردة بدموع؛ايه زيد وليدي مش زيهم بكل..والله من بكري وهو حابس روحه في دراه محروق قلبه عليك..
هز راسه وقال:ليا الله يام..ليا الله..
ومشي من حداها لداره..
وهي رفعت عيونها وقالت بحرقة:الله ياخد منك الحق ياعبد الفتاح الله لايوجهلك الخير وين ماتحط...
🍂🍂🍂🍂🍂
الساعه 3:30قبل العصر..
في دارها مقعمزة على سريرها وتتكلم بالتليفون..
آمنه بأسف:الله المستعان..
عبدالقادر:والله من بكري عقلي عنده مش قادر نفكر الا في حاله..
امنه:بنقولك حاجه وماتزعلش مني..هادي اخرة لعبه ببنات الناس..
عبدالقادر:قصدك حتى اني جايني ماجايه!؟
امنه بضيق؛مش هدا قصدي..واظني تعرف كويس اللي صاير بينه وبين اختي وكيف خلاها تسيب خطيبها وتوليله ولما دارت مايبي سيبها..
عبدالقادر وهو متفاجئ:كيف!!؟
امنه:قصدك ماتعرفش!
عبدالقادر قعد ساكت وهو مضايق..
امنه تنهدت وقالت:اختي حتى هي مش خير منه وحصلت نتيجة غبائها..وهو لقي اللي داره وراهو مش شماته..بس بماانك صاحبه وتهمك مصلحته انصحه ياعبدالقادر يبعد عن الطريق اللي ماشي فيها....
عبدالقادر تنهد وقال:لاحول ولاقوة الابالله..ع العموم اني مش مخليه حنوقف معاه ونساعده شن مادار هدا يقعد صاحبي وليه معاي وقفات عمري ماننساها..
امنه بإبتسامه؛مش متوقعه منك غير هكي..
عبدالقادر بخجل مصطنع ضحك وهو يقول:احرجتيني..
امنه ضحكت..وهو قعد يضحك معاها بعدين قال..
عبدالقادر بضحكه:بنخشوا ع الامتحانات النهائيه راهو..
امنه بإبتسامه:تمام..افتح الماسنجر تو نبعتلك الجدول اللي درتهولك هما 4مواد وايام الاسبوع 7...وشوف كيف قسمتهم وانت تحدد الوقت حسب فضوتك..
عبدالقادر بإبتسامه:Ok my teacher
ابتسمت امنه بإستحياء...
🌟شويه وصكر منها عبداالقادر وخش ع الماسنجر شاف الجدول اللي داراته...وقعد يراجع في عقله مواعيد الخدمه متاعه وقعد يرتب فيهم ويعاود لين رتبهم كلهم صح...
وبعتهم لآمنه...
بعدين مشي طلع من داره بطريقه للصاله..
يسمع في هدرزة عمته وحناه ومعاهم اشرف..
خش عليهم وقال:شن هالدوشه!
اشرف:تعال طلعني من هالوحله اللي وحلتني فيها..
عبدالقادر قعمز حدا عمته وقال:وحلة شني؟!
فتحيه:نبيه يتزوج خلاص ساده بيخش ع 35عام..
عبدالقادر بإبتسامه:لالا اطمني توحه شكله بينوى خلاص..
فنص فيه اشرف..
تجديده:وشن خلاك تقول هكي؟!
عبدالقادر وهو يشبحله بربع عين:اليوم هكي حسيت ركزت ع حاجه خلتني نقول هكي..
اشرف ضحك وحرك راسه يمين ويسار..
فتحيه:ماتتكلمش بالألغاز قدورة..
عبدالقادر بضحكه:مش عارف شن بنقولك..لكن ولدك من لما روح وع قد ماطلعت معاه ماريتاش مرة رافع عيونه في بنت ماتقولش قعد عايش برا قريب 7سنين..لكن اليوم دارها ولأول مرة..
اشرف:عبد القادر ماتخلنيش نقلب ع وجه التاني..
عبدالقادر بضحكه:هدا الحق وهدا اللي شفته..تبيني نكلمك المدام ماعنديش مشكله راهو..
تجديده:ياولد ادوي زين خيرلك من هي هادي..
اشرف:عبدالقادر!
عبدالقادر يضحك وخلاص..
فتحيه:بالله وليدي قول من هي؟!
اشرف:فوتيه يام ماتعرفيش برادته انتي !
عبدالقادر:صار هكي يادكتور! مال باهي..توحه ولدك شكله عجباته صاحبة المدام شافها القدام المعهد اللي يخدموا وفتح فليتشاته عليها وقعدوا معاها لين قريب رقبته انكسرت..
حدف اشرف المخده ع عبدالقادر جت ع وجهه وعبدالقادر يضحك وخلاص..
فتحيه بفرح:معناها هي نفسها يما البنيه اللي قتلك..والله كان تولي كنتي معاش نبي من الدنيا شي..
عبدالقادر وهو يرقص في حواجبه:حتى هي صاحبة المدام..
اشرف ناض وهو يضحك ويحرك في راسه يمين ويسار وطلع من حداهم..
عبدالقادر:هاه ريتيه ماقال شي ولااعترض..شفتي!
فتحيه بضحكه:مالا بالله سلم وليدي انشد امنه عنها..
عبدالقادر بإبتسامه:من عيوني تحتح..
فتحيه بإبتسامه:تسلملي ياربي والله مريتك زي العسل ربي يهنيكم ويكملكم ع خير..
عبدالقادر رفع ايديه  وقال:ياااااارب..حرك عيونه ع جنب وقال...توجي قولي امين..
تجديده وهي تخدم فالشاهي قالت:امين ياودي امين..
ضحكت فتحيه..وعبدالقادر نزل ايديه وهو يشوف لحناه بإبتسامه..
🌟🌟🌟🌟🌟
الساعه 6:00مساءا..
في حوش عمران أب آمنه..
الهاديه:بخوت ياحنه بخوت طاحت واقفه..
اختها:نصيبها...
الهاديه:اممم..شفت امها الجربه امس..موليه عزوز وقاعده شلافطيه زي ماهي..
اختها ضحكت وقالت:وانتي عاد قعدت تكوشي..
الهاديه:ولاحسبتها موجوده اصلا يدوب شبحتلها..
اختها:باهي قوليلي امنه امتى عرسها؟
الهاديه؛بعد مايتخرج سبع البرومبه...
اختها ضيقت عيونها وقالت:مش خاشه راسي انها مش علاقه..
الهاديه؛حتى اني..طلعت مش هوينه ياحنه عايبه وطيحاته راجل معبي وزين على زين..
اختها:يقولك حظ القبايح في السمي لايح..
🥀ماسمعتش جمله مليانه كفر وسخط ع قسمة الله بين خلقه زي هالجمله...كل حد في الدنيا وربي شن قاسمله..وفي من نيته تخدمه...يعني اللي مؤمن بجملة زي هادي شن متوقع يجيه من ربي غير مايظن بيه...واللي تمشي وتحسد في الناس ع ماعطاهم ربي مش تكسب حاجه غير االلي ينقاس بنيتها بس...صفوا النوايا واحمدوا الله ع ماعطاكم..ولو شفتوا نعمة ع حد مش عندكم ادعوله ربي يحفظهاله..ويعطيكم خير ماعطاه..وصدقوني ربي حيعطيكم خير خير من ماعطاه...ولو كان الرضا بس..ساد البني آدم يكون قانع وراضي بمقسومه حيكمل عمره كله وهو عايش مرتاح البال...ونعمة راحة البال من أعظم النعم...🌷
🍂🍂هالنعمه اللي فقدها اسماعيل بعد اللي صارله...
في احدي المقاهي..
عبدالقادر:غير قولي قداش..
اسماعيل:اصلي ياقدو اصلي...لكن فوت الموضوع تو ندبر راسي...
عبدالقادر بإصرار:اقسم بربي ماني مخليك قبل لنعرف قداش عليك..
اسماعيل تنهد وشبح للفنجان قدامه وقعد ساكت..
عبدالقادر:تمام اقعد ساكت اني تونتصرف..
اسماعيل بضيق:ياقدري الملبغ كبير هلبه..مليون و125 الف..
انصدم عبدالقادر.
عبدالقادر:125 نقدر ندبرهم لكن المليون هما المشكله لزوز تجار خوت نعرفهم..متسلف منهم المبلغ قبل ع خاطر دفعه ينجيبها وعطوني سته شهور بش نجيبلهم فلوسهم..وبعد رمضان المده اتم..
عبدالقادر قعد ساكت وهو مضايق ع الآخر..
تنهد اسماعيل بحرقه وقال:حسبي الله ونعم الوكيل..
عبدالقادر بحقد:بعد هدا درقت عليهم ومابلغتش..
اسماعيل:شن تقول انت! هادو خوتي وعمي..مانضرهمش حتى كان هما ضروني..ليا الله وخلاص تو يفرجها من عنده..
ابتسم عبدالقادر وقال:واني والله ماني مخليك ياصاحبي..
وحط يده ع يد صاحبه..
ابتسم اسماعيل ع جنب وقال:ساد انك مسيب مشاغلك وقاعد معاي...
عبد القادر:خوي انت راهو خوي..ولأنك خوي بنقولك حاجه وياريت تسمعها مني..
اسماعيل شبحله بتركيز..
عبدالقادر:اللي كنت ادير فيه مز غلط في حياتك فوته..وشوف كيف تترداعلك بعدين..
ابتسم اسماعيل وهز راسه بإيجاب وهو يطبطب ع يد صاحبه...
وعبدالقادر يشوفله بإبتسامه...
🌟🌟🌟🌟🌟
الساعه 12:15ليلا..
وهو مقعمز في الجنان وغام روحه ببالطو اسود يتكلم بالتليفون..
عبدالقادر:المشكله في زماننا هدا الموجعه ماتجيك كان من القريب..
امنه تنهدت وقالت:وهو هدا اشد امتحان..تعرف ان ع قد ماريت وشفت..اعتزلتهم..زي ماقال سيدنا عمر..اعتزل مايؤذيك..بس في منهم مجبرة ع خاطر ربي نواصلهم..ومواصلتهم هم ثقيل ع قلبي..نقعد في صراع بين اني نكسب راحة نفسي ولانرضي ربي..وطبيعي جدا نقدم رضا ربي ع كل شي في النهايه..ونقول لروحي مافي حد يستاهل نخسر ربي ع خاطره..نواصل ونتحمل ونذكر في حديث الرسول وهو يقول..ولو سفوك المل ونقول معليشي انتي رابحه..وهما الخاسرين..
عبدالقادر بإبتسامه:شن معناها ولو سفوك المل؟.
ضحكت امنه وهي تقول:ولالوحوا عليك تراب بمعنى ابسط..
عبدالقادر تنهد وقال:تو انتي مرتي وفي شي مايدرقش عليك..علاقتي مع عمامي للأسف زي الزفت..وراهو مافيش بيني وبينهم شي..لكن ع خاطر زرق الدنيا كرهوني..واني الحق مش متقبلهم ولانبي نتعامل معاهم..اني ولد خوهم يتيم..مفروض بعد راح بوي يولي عندي في مكانه سته..تنهم وهو يقول...نحمد ربي ليل نهار اللي خلا حناي وجدي  حيين كانهدا الله اعلم شن صاير فيا توا...
امنه:الحمد لله...بس في نفس الوقت..واصلهم...
تنهد وقعد ساكت..
امنه:تعرف من احلى الحاجات اللي عرفتها المده الاخيره شن هي؟
عبدالقادر:اني..
امنه ضحكت وقالت:ندوي جديات..
قعد يضحك..
امنه بإبتسامه:المهم..معلومه حلوة قريتها..تخص الناس اللي زيك او اي حد فقد بوه وامه حتى ع الكبر..وماحصلش فرصه يبرهم او مازال خاطره يبرهم..انه يواصل عمامه وخواله..تصدق ان حتى مواصلة اصدقاء الوالدين بعد وفاتهم بر ليهم..
عبدالقادر ابتسم وقال:تو نحاول..برغم اني والله نواصل فيهم خوالي مرة مرة...بالذات نبيله هادي قريب كل يوم نكلم فيها واغلب الايام يانتغدا يانتعشى عندها..
امنه ضيقت عيونها وقالت:ايه حقه بنسألك عن خالتك نبيله؟
عبدالقادر:اسأل يامعلم..
ضحكت امنه وقالت:نبيله خالتك علاش لتوا قاعده وحدانيه؟.
تنهد وقال:خالتي نبيله..ياستي خالتي نبيله زمان كانت مخطوبه لواحد كان يقرا معاها في الجامعه..تبيها وتبيه..حددوا عرسها بعد تتخرج..وتخرجت..وخش اسبوع العرس..في اليوم اللي بيقروا فيه الفاتحه الراجل دار حادث...
ارتسمت ع وجه امنه ملامح الألم..
عبدالقادر:قعد في غيبوبه كامل وخالتي مسكينه حالتها النفسيه كانت مدمرة...بعد طلعوا بيه برا مازادش شهر وتوفى..
امنه بوجع:لاحول ولاقوة الابالله..
عبدالقادر:ومن بعدها خلاص..صكرت ع مواضيع الزواج مرة وحده وقعدت تخدم في حناي وجدي لين ربي خدي امانته..وقعدت بروحها في الحوش..جدي الله يرحمه من خوفه عليها..كتبلها الحوش باسمها..وخوالي وخالاتي ماعارضوشي واجعتهم اختهم...
امنه:وكيف قادره تعيش بروحها في الحوش؟
عبدالقادر:وحده من خالاتي جارتها جنبها بالزبط..
وعندها جيران يعاملوا فيها تقول بنتهم يوميا ياهما عندها ياهيا عندهم....
امنه سكتت وهي تفكر بحزن في حال نبيله بعدين قالت:باهي توا كان جاها حد تقول باهي؟
عبدالقادر بضحكه:عندك ليها عريس؟
امنه:لانسأل بس..هي كم عمرها..
عبدالقادر:42عام..
امنه:حلو..
عبد القادر بضحكه:شن هو الحلو قولي شن في راسك..
امنه بضحكه:ياودي مافي شي..
عبدالقادر بإبتسامه؛باهي ياقنين..اني في راسي شي..
امنه:في قرايتك وامتحاناتك بس..
عبدالقادر بضحكه:ياودي غير اسمعي شن في قبل..ولد عمتي اشرف اللي بكري كان معاي في السيارة..
امنه:خيره؟.
عبدالقادر:عجباتك صاحبتك اللي اليوم كنتي طالعه انتي وياها؟.
امنه بفرحه:بالحق!!
عبدالقادر:والله العظيم..
امنه ابتسمت بحماس وقعدت ساكته..
عبدالقادر:قوليلي شن وضعها شن نظامها..
امنه:عادي..هي يعني عزباء..البنت الوحيده وعنده تلاته خوت ولاد وبوها متوفي...بنت محترمه متدينه متربيه احسن تربيه..ورزينه واخلاقها ذهب..
عبدالقادر:عز الطلب..ولد عمتي حتى هو راجل محترم وملتزم وبرغم ان عاش برا سنين لكن حافظ ع نفسه كويس..متربي احسن تربيه واخلاقه الماس..
امنه بضحكه:كم عمره؟.
عبدالقادر:35عام..
امنه:امم هي عمرها 27عام..حلو..
عبدالقادر:اها معناها حلو الاولى ع خالتي فيها موضوع حتى هي..
امنه:هههههه...
🌸وكملوا هدرزتهم مع بعض للساعه 2 وامنه هي اللي سكرت بالسيف..🌸
🌸🌸🌸🌸🌸
تاني يوم كان الجمعه...
من بعد عصر هداكا اليوم عبدالقادر تفاهم مع جده بخصوص
مبلغ معين ناوي يسحبه من حسابه..وجده بعد عرف السبب قاله ان هدا رزقه وهو حر فيه..
في نفس الوقت..
كانت اسماعيل يدور ع طريقه تخلي اصحاب الدين يعطوه مهله زياده...
وامه مسكينه بش تساعده بعد الكارثه اللي حلت بيه قررت تبيع كل شي غالي عندها وتعطيه حقها ...
اما زيد...
فماكان فيده شي غير حاجه وحده دارها وهو متمني من الله يوفقه فيها..
🍂🍂🍂🍂
"اهلا وسهلا..اهلا..قتلي انت زيد خو اسماعيل الصغير ولد عبدالفتاح؟"
زيد هز راسه وهو يقول:ايه..
:امم..منظرك يازيد منظر واحد عنده هم..
زيد تنهد وقال:ايه ياعمي عبدالله ووالله هم كبير..سمعتوا باللي صار للمعرض ولا؟.
ابتسم الراجل وقال:ايه ربي يعوضكم ان شاء الله..
زيد بضيق:آمين..واني جيتك نطلب منك طلب..عمي عبدالله..يعلم الله بالخساره اللي خسرها اسماعيل بعد اللي صار وهو والله كان ناوي يعطيكم حقكم كامل بعد رمضان لكن اللي صار..فسد كل شي..وخوي راجل وعنده كلمه وعمره ماخلا حد ياكل حقه ولاكلي حق حد..هدا علاش بنسألك بربي ياعمي عبدالله انت وخوك تعطوا مهله 6شهور زياده لين يوفي المبلغ كله بعد توصل الدفعة الجديده ويبيعها بعون لله..
عبدالله ساوا تقعميزته وقال:امس تفاهمت اني وخوي في الموضوع هدا..وهو بلسانه قالي...زيده ع المده متاعه..واني قتلك مانزيدش ع كلامك كلمه خلاص...احني ناس نعرفوا ربي والحمد لله..ونعرفوا اللي يعطي فرصة لمعسر لين يتيسر حاله ربي يتجاوز عنه يوم القيامه...وحني تجار دنيا واخره ياولدي..
زيد بفرح ودموعه في عيونه:يعني مش مطالبينه بشي توا؟.
عبدالله بإبتسامه:وبنزيدوا في المهله كيف ماقلت..
زيد ضحك بفرح..بعدين مسح دموعه قبل ينزلوا وقال:باهي ياعمي بالله عليك ماتقوله ع جيتي هادي..مانبيشي يتحسس..
عبدالله هز راسه بإيجاب وهو مبتسم...
وزيد مازال يمسح في دموعه وهو يضحك من الفرحه..
🍂🍂🍂🍂🍂
يوم السبت...
الساعه 11:00صباحا..
مقعمزة في احدي قاعات الدور التاني في الكليه تراجي فيه..
كانت مقعمزة تقرا في كتاب PDF ع تليفونها...
وحواليها في طلبه وطالبات يقروا..
وفي من يشبحلها ويتكلم بهمس..
رن تليفونها...
ردت طول..
امنه:وينك؟.
عبدالقادر:5دقايق ونكون قدام وجهك..
امنه بضحكه:باهي سقد روحك..
عبدالقادر بضحكه:ثواني..وصكر..
هي ضحكت ونزلت تليفونها ورجعت تقرا فيه من جديد..
🌟هو فهالوقت كان واصل للدروج..
ركب بسرعه..
ووصل للدور التاني...
وتوجه طول للقاعه اللي هي فيها..
وخش..
اغلب الموجودين شبحوله..
هو مشالها طول وقعمز جنبها..
امنه نزلت تليفونها وقالت بإبتسامه:شن صار معاك؟.
عبدالقادر:حولتهم ع حسابه طول..
امنه بإبتسامه:حلو..
عبدالقادر:عندك ليه موضوع حتى هو؟.
امنه بضحكه وهي تفتح في اللاب توب:ركز معاي يابارد ياسرك براده..
هو ضحك وطلع نظاراته الطبيه ولبسهم..
امنه:من امتى!؟.
عبد القادر:من مده قالي الدكتور معاش تستخدم اللاب توب من غيرهم..
امنه:تمام..معناها..حاول حتى الموبايل معاش تستخدمه الا وانت لابسهم..
عبد القادر بإبتسامه:حاااضر..
ابتسمت وقالت:هي انتبه هني..
🌸وبدت تقرا هي وياه وهو مركز معاها..مره مع تفاصيل ملامحها وهي تشرح ومره مع كلامها..ومرة مرة كان يحط في نكته وهي تضحك..ومرات تلبس وجه الجديات وهو يخاف ويركز معاها..
والطلبه يراقبوا فيهم..حبوهم مع بعض..وحسوهم
ثنائي لطيف مع بعض..وقصتهم جدا مميزة..
🌸وتكررت جايات امنه حسب الجدول...
وكانت هي وعبدالقادر محط الانظار وحديث الكليه..وهما الزوز كانوا بعد يكملوا قرايه يمشوا مع بعض الكافتيريا..وياكلوا مع بعض..وهدرزتهم وضحكهم كان مخلي يتمنى يكون مكانهم...
🌹وفي ايام..
جت فيهم تماضر للكليه لآمنه وكان جلال يشوف فيها ويرجع يزن ع عبد القادر بش يفتح موضوعه مع امنه...
ومن جهة تانيه..
تكلم اشرف مع عبدالقادر عن هبه وطلب منه يكلم امنه...
وهو كلم امنه عن الزوز...وهي اتفاجئت وفرحت هلبه..
وقررت تجمعهم مع بعض الزوز بش تقوللهم..
🌸في الحديقه اللي جنب دار الأيتام..
مقعمزات الثلاته ع كرسي طويل يهدرزوا..
تماضر:واخيرا رمضان بيخش..
هبه:ايه..والله من توا نفسيتي تنعنشت..
امنه:امم..وتوا بعد اللي بنقوله حتنعنش اكثر..
شبحولها باستغراب..
امنه بضحكه:جبتكلم عرسان منك ليها!؟
قعدوا يشبحولها وهما متفاجئات بدون مايتكلموا..
امنه ضحكت وقالت:والله ندوي جديات..هبوش ولد عمة زوجي العزيز..وتومي صاحب زوجي العزيز...
الزوز شبحوا لبعض وهما مش مصدقات بعدين شبحولها..
تماضر:صاحب زوجك العزيز من هو!؟
امنه:واحد اسمه جلال بيتخرج السنه هادي معاه حتى هو شاب كويس..من عيله معروفه..ودايخ وراك وسأل عنك زياده وقداش ليه يزن ع زوجي العزيز بش نفتح معاك الموضوع..
هبه:واني!؟
امنه بضحكه:ياحنه زوجي العزيز قالي اشرف ولد عمته شافك مرة عجبتيه وامه شافاتك في بياني قريب هبلت عليك..وهو زاد سأل عنك وكلم زوجي العزيز بش نفتح معاك الموضوع..هاه قولولي شن نرد ع زوجي العزيز..
هبه:قوليله قالتلك هبه ربي يزيدك عز يازوجها العزيز..
ضحكوا تماضر وآمنه...
🌸وردهم كان انهم يبوا مهله يفكروا  ويردوا عليهم..
وهالمهله استمرت العشرة الأيام الاولى من رمضان..
اللي دارو فيهم عبد القادر وصحابه امتحاناتهم وابلوا فيهم بلاء حسن...
🌟الساعه 10:00ليلا..
وهو يسكر في ازرار سوريته يكلم فيها ع التليفون اللي كان فاتح المايك متاعه وحاطه ع الزيانه..
عبدالقادر:مزبوط هكي ولا؟!.
امنه:ممتاز ممتاز..شطور عبدو..
عبدالقادر بضحكه وقلبه يدق بقوة:لما تقولي عبدو نحس في قلبي بيطلع من مكانه..
ضحكت وقالت:ماشي للصلاة..
عبدالقادر وهو يلبس في ساعته قال بإبتسامه:ايه..شن ديري توا..
امنه:ياسيدي بعد ضميت الحوسه وبخرت بنمشي نتوضا بش نصلي..
عبدالقادر وهو يساوي في شعره:عقبال ماضمي حوسة حوشنا وتبخريه وتصلي فيه..
ابتسمت بإستحياء وقعدت ساكته..
عبدالقادر ضحك وخدي تليفونه وصكر المايك وحطه ع وذنه وقال:شن صار في صاحباتك؟.
امنه بإبتسامه:قوللهم عطوا الموافقه كان بيبعتوا يخطبوا..
عبدالقادر فتح باب الدار وطلع وهو يقول:يافرحة قلب توحه..
ع طلعة فتحيه من الكوجينه:سمعت اسمي..
عبدالقادر:وتي روحك بش تمشي تخطبي لشروفه..
ع طلعة اشرف من الصاله وهو يقول بلهفه:قالت باهي..
عبدالقادر:سمعتي بوذانك..
امنه بضحكه:ايه ايه..
اشرف تخزرط ومشي بيطلع بسرعه..
عبدالقادر:وولى العريس هاربا من الحشم..
امنه بضحكه:من شني!؟.
عبدالقادر:صح فطورك..
امنه:هههههههه..
🌸🌸🌸🌸🌸
ومشوا فتحيه وتجديده ووحده من عمات اشرف لحوش اهل هبه وطلبوها رسمي..
وكذلك اهل جلال مشوا لأهل تماضر وطلبوها رسمي..
وبعد اسبوع....كانت الفضانيه لكل وحده فيهم...
🌸🌸🌸🌸🌸
يوم 17من شهر رمضان...
كان عبد القادر مطلع امنه وتجديده وتبره لأحدي المنتزهات المشهورة في العاصمه...
امنه وعبد القادر كانوا يتمشوا ...وتجديده وتبره مقعمزات يهدرزوا..
تبرة:هو ولدي يبي يستقر..وحكاية الصغار مش هاماته هلبه يقولي فيها ديما يام اني كان نبي صغار راني تزوجت من زمان..
تجديده:شن بنقولك ياحاجه..نبيله زي بنيتي بالزبط ونتمنالها مانتمنى لفتحيه بنتي..وهي قالت قولوله من توا يحسم امره لو يبي صغار يشوف غيرها..مش ياخدها توا وبعدين ياخد عليها..
تبره بضحكه:وعلاش ياخدها من الاول كان هدا!..قوليلها قالتك خالتك تبره اطمني بنتي..اللي خايفه منه مش حيصير بكل..
تجديده:تو نوصللها..ما على الرسول الاالبلاغ...
🌸🌸🌸🌸
"بالله بالله عاوديها"
امنه بضحكه:حبيبي..
عبدالقادر ؛تعرفي كان مش عيب اقسم بالله كنت صيحت صيحة جلتهم كلهم..
امنه ضحكت..
هو شد يدها وقال وعيونه يتأملوا في عيونها:تعرفي انتي شنو..انتي دعوة خير..مرات دعتهالي امي لما كانت حيه...ولابوي..ولاحد يحبني حناي عمتي خالاتي...ولاحد درت فيه خير ونسيته..المهم انتي حاجه باهيه درتها في عمري ولقيتها..
امنه بإبتسامه حياء وهي تشوف لعيونه:وانت جبر ربي ليا...عطاني راجل فرفوشي يمسح كل حزن ريته وحسيت بيه في حياتي كلها..
عبدالقادر:ILove you my teacher..
ضحكت امنه ونزلت عيونها
"قدورة"
فنص عيونه..وامنه قامت عيونها ادور ع مصدر الصوت..
لين شافت ايمينها لقت عزوز بفراشايتها  جايتهم..
وصلت فيهم وقالت:مش عيب عليك في رمضان العزيز جايب وحده ادور بيها في الليل وحداك حناك ياريتك متحشم منها...امتى تطبلها سراكتك هادي..هدا غير قالوا قاري الفاتحه في بنيه وينها مسكينه تجي تشوف شن قاعد يصير منها..
ضحكت امنه..
حليمه:تضحكي ياللي ماتتحشمي ولاتستحي..
فنصت امنه..
عبدالقادر:هييه عاد هييه..سكتلك هلبه راهو..
شبح لحناه وقال بصوت عالي شوي:حناي...
التفتوا تجديده وتبره..
عبدالقادر:تعالي اتفاهمي مع صاحبتك..
وجبد امنه ومشي..
امنه:من هي هادي!؟.
عبدالقادر:هادي عمل الشر اللي دايره في حياتي..
.......
تجديده:حليمه..تعالي تعالي..
مشتلهم حليمه وهي تبكبك من الغضب وصلت فيهم وقال:ريتي ولد ولدك ياتجديده..من هي هادي اللي ينسرف بيها من تركينه لتركينه..
ضحكت تبره بإستغراب..
تجديده بضحكه:يعطيك الهني هادي مرته مرته..وهادي الحاجة تبرة حناها..
حليمه حطت يدها ع ذقنها وقالت:حقوو! عليك عمله عملتك ياحلومه..
تجديده:تي غيرتعالي قعمزي تعالي..
حليمه ضحكت وقالت:هاني جايه..
.........
قعمزوا الزوز ع كراسي حطوهم جنب بعض..
عبدالقادر :اهو نكلمهالك ياستي..
وضرب ع رقم خالته نبيله..
وامنه تشبحله..
حط التليفون ع ودنه وقعد يراجي فيها ترد..شبح لآمنه لقاها تشبحله..غمزلها..ابتسمت بحياء..
ابتسم وقال:هاه بلبله حبي شن جو................تمام الحمد لله.........اهي جنبي امونتي..
ضحكت امنه وهي تفنص فيه..
هو بإبتسامه:خوديها تبيك في موضوع....مدلها التليفون..
خداته امنه وردت:السلام عليكم مساء الخير ابله نبيله..
وعبدالقادر قعد يتأمل فيها..
امنه:الحمدلله..كيف حالك انتي؟
نبيله:الحمد لله حبيبتي..شن دايره مع المنجوه...
امنه بضحكه:مافيش منه..
نبيله بضحكه:لاعاد كان امونه راضيه عليه شن مازال يبي..
وامنه تضحك وخلاص..
وهو تلقائيا يبتسم معاها لما تضحك..
امنه ابتسمت وقالت:عندي معاك موضوع ضروري لازم ننهيه اليوم..
نبيله بإبتسامه؛واني قلتي شرطي بش نعطي الرد..
امنه:واني نقولك ارتاحي..خالي يبي مراة يرتاح معاه ويتفاهم هو وياها تنوسه ويونسها وقال لو في بالي الصغار راني من زمان متزوج...
نبيله قعدت ساكته..
امنه:والله خالي راجل عسل مافيش منه صدقيني حتعيشي معاه احلى ايام عمرك..
ابتسمت نبيله وقالت:مادام هكي خلاص..
امنه بضحكه:واخيرا..دهشتينا وراك..
عبدالقادر:تاخد بتار ولد اختها..
امنه فنصت فيه وهي تضحك..وهو فنص فيها..
قعدت تضحك بدون صوت..
نبيله بضحكه:وين طالعين..
امنه غيرت عيونه عنه وقالت:ل******..
نبيله:اها الجو غادي قنين في رمضان..قولي لقدو يطلعنا ليلة تانيه..
شبحتله وقالت:ابله نبيله قالت طلعنا حني وياها ليلة تانيه..
عبد القادر حول عيونه في بعض وقال:تبي الحاج يعلق مشنقتي..
امنه قعدت تضحك وهي تقول:ان شاء الله ان شاء الله..
عبدالقادر فنص وقال:ان شاء الله يعلق مشنقتي!؟
امنه بضحكه:يابارد ابله نبيله قالت نهار الخميس الجاي..
جبد التليفون منها وكلم خالته وهو يقول:تفاهمي انتي وفروجه....اليوم ماخلاني نطلعهم لين خليني ونخليك قال قداش ليك مش مدور الخدمه في جرة  القرايه..
نبيله:ماعليكش فيه تو نكلمه اني عمي فرج..ماعندك وين تهرب بطلعني يعني بطلعني..
عبدالقادر:قولي لخالك يستعجل..
امنه حطت يدها ع وجهها وهي تضحك...
ونبيله قالت بضحكه:خزي يلي ماتتحشم...
🌸🌟🌸🌟🌸
وتمر الأيام عليهم كل يوم احلى من اللي قبله...
خطب محمد نبيله...واتفقوا ان الزواج يكون بعد العيد...
زي ماتحدد عرس هبه وأشرف بش يكون بعدهم مباشره..
اما تماضر فهي زي آمنه..تراجي خطيبها لين يتخرج...
💙من جهة تانيه..
قدر اسماعيل يأجر مكان تاني بش يدير فيه معرض جديد..
وخوه زيد مافارقاش بكل...
وكذلك سعوا الزوز ع موضوع طلاق امهم من عبد الفتاح وفعلا تم الطلاق...
ومافي حد من ولادها قدر يقرب من الحوش بعد اللي صار وفي النهايه لموا بعضهم وسافروا لبوهم من خوفهم لينتقم منهم اسماعيل...
🍂🍂🍂🍂🍂
يوم 25رمضان...
الساعه 12:00ليلا..
كان عبدالقادر ماشي ع رجليه لسوق جده بيتفاهم هو وياه في بعض الأمور اللي تخص خدمتهم..
وين وصل للسوق وخشله وقعد يدور ع جده..
تفاجئ وين لقاه مقعمز هو واحد شوفته بس خلت عبد القادر يغلي من الغضب..
لف ومشي طول طلع من السوق قام تليفونه ودار اتصال..
...........
"هاه شنو فهمتيها؟"
سيرين:تمام...خل نخشوا ع اللي بعدها لان فيها كذا نقطه مش فاهمتها..
امنه وهي تقلب في صفحات الشيت:Ok...هي هادي..ياستي بسيطه جدا ركزي معاي..
فجأة رن تليفونه..
جابتهولها سيرين من ع الطاوله ومداته وهي تقول بضحكه:زوجك العزيز..
ابتسمت امنه وخداته وردت...
امنه:السلام عليكم..
عبد القادر بغضب مكتوم:كان مش بروحك خليك بروحك نبيك ضروري..
امنه شبحت لسيرين وقلبها يدق بقوة من الخوف..
بعدين مدتلها الشيت وناضت..
خداته سيرين وهي مستغربه..وامنه مشت طلعت من حداها..

...يتبع.....