السلام عليكم..
عندي ملاحظه ع بعض التعليقات اللي لما نقراها ضميري يأنب فيا..زي "قدورة عسل..قدورة يهبل..قدورة ياقلبي" ومن هالتعليقات..نحس وكأني فتنتكم واني هالشي قاعده نتجنب فيه هلبه الفترة الاخيره..حتى اني مانحبش نوصف الشكل لهالسبب..
لهدا رجاءا ياريت التعليقات تكون لايقه ونحاولوا ناخدوا من الروايه المفيد فيها مانبيش ولاحرف منها يكون شاهد عليا ارجوكم...
شاكرة ليكم كلامكم الجميل في حقي..
🌸🌸🌸🌸🌸🌸🌸🌸🌸🌸🌸
🌟..
جبد الموس من مكان الطعنه ووخر للخلف..
وهو حط يده ع مكان الطعنه ..ذراعه..
الطعنه جت في ذراع عبدالقادر..كان حاط يده عليها وهو يشوف لحامد بحقد..
حامد:كان ماحولتش من طريقي التانيه تجي في مكانها صح..
امنه بصوت يرجف:كان ماخليتكش تخرت في الحبوس يانجس....
عبدالقادر بصوت عالي:اطلعي قلت اطلعوا..
وجبد السهاره من ع الكامدينو بكل قوة وخبط بيها حامد ع راسه...
عيطوا البنات...
وعبدالقادر وهو يتألم يقول بصوت عالي:اطلعوا..
جبدت سيرين وطلعوا ويجروا..
وعبدالقادر لما شاف حامد طاح ع ركابه وهو شاد راسه..
طلع بسرعه من الدار وصكرها عليه..
بعدين شد ذراعه وطلع يجري وهو يدور لين لقي الباب متاع الحوش..
مشاله يجري وطلع منه وصكر الباب..
امنه كانت برا مع اختها والزوز يبكوا...
لما شافاته طالع قالت:في هني صيدليه نطلع نجيب منها حاجات ونجي..
عبدالقادر وهو يتألم:ماتجيبي شي..بري خودي اختك واطلعوا من الحوش..
امنه:وانت!؟.
عبدالقادر :تو نتصرف غير اطلعي انتي بس..
امنه قعدت تشبحله بألم..
سيرين بخوف:هيا امنه..
امنه:ماعنديش مفتاح..
عبدالقادر:سيارتي مدرسه برا والمفتاح فيها خوديها بري..
امنه بقلق:باهي وانت؟!
فجأه سمعوا صوت سيارة شرطه..
بعصبيه قاللها:قتلك بري اطلعي مادخلكش بيا..
جبدتها سيرين وقالت:هيا ياامنه هيا..
مشت امنه طلعت مع اختها بالسيف ودموعها ينزلوا من عيونها سيل..
طلعوا بسرعه من الحوش شافوا سيارة عبدالقادر..
سيرين:اهيا..
مشولها طول..
ركبوا الزوز وهما يشوفوا لسيارات الشرطه بيوصلوا للحوش..
طول امنه شغلت السيارة وتحركت ودموعها مانشفوش...
...................
في الجنان..
عناصر من الشرطه طلعت حامد من الحوش...
وواحد فيهم واقف ع عبدالقادر ومعاهم اسماعيل..
اسماعيل لما شاف حامد قال:هدا واحد ياخد في الحشيش ويبيع نعرفه كويس...
الضابط:من وين تعرفه؟.
اسماعيل شبح للضابط وقال:مشهور في شارعنا وبرا انشد عليه..اصلا كان توا درتوله تحاليل تلقوه مكيف..
شبح الضابط لعبدالقادر وقال:باهي البنتين اللي قلت عليهم توا وين؟!
عبدالقادر:اني قلتلهم يطلعوا...نبيهم يبعدوا عن الدوشه والفضايح وانت فاهمني..
الضابط:لازم ناخدوا اقوالهم ..
عبدالقادر:يجوكم للمركز غدوة ان شاء الله وتاخدوا اقوالهم..
ع خشة الزبير يجري وهو يقول بذعر:شن في شن صاير..
عبدالقادر قعد يشبحله كويس يبان خايف هلبه ومرتبك شك فيه..وكذلك اسماعيل..
الضابط:من تكون انت؟
الزبير:اني مولى الحوش..
الضابط:صارت اعتداء على حوشك من قبل واحد يدعي انه خوك..
الزبير وجهه تغير لونه وهو يقول:خوي اني!؟
شبحوله عبدالقادر واسماعيل بشك...
الضابط:هدا اللي قال..مرر نظره عليهم كلهم وقال..تفضلوا معانا كلكم بش نكملوا التحقيق..
اسماعيل:خل نرفعوه قبل يشوف جرحه...الضابط شبح لذراع عبدالقادر المربوط وهز راسه بإيجاب..تو نبعت معاكم عنصر..
عبدالقادر:تمام...
🌟وطلعوا كلهم من الحوش..
توجه اسماعيل بصاحبه لعيادة قريبه..
خيطوله الجرح اللي كان عميق شويه وبعد ماداروله اللازم طلعوا من العياده طول للمركز...
🍂🍂🍂🍂🍂
"اني الظالم مفروض ماخليتكش تمشي مفروض جبتها هني"
امنه وهي ترشف قالت:خلاص توا اللي صار صار خالي..
تبره بغضب:عطيه مايرفعه هالمخمج هدا هالقرد السفتول..عليك عيله معفنه..
فنصت امنه في حناها ع خاطر سيرين مقعمزة معاهم..
تبره بعصبيه:بالله خليني ياآمنه كبدي دم عليهم كلهم سحيقه ومسحق...
سيرين ناضت وهي مضايقه ومشت لدار اختها..
امنه:ربي يهديك ياحناي..
تبرة بإنزعاج؛فكيني ترا..
محمد:المهم توا..مادام الشرطه ادخلت اكيد يطلبوكم للتحقيق بش ياخدوا اقوالكم..من توا توقعوا كل شي لهدا ماتنهاروش ولاتخافوا خليكم واثقات من انفسكم وقولوا كل شي..
امنه مسحت دموعها ورشفت وهي تقول:حاضر...
🌟🌟🌟🌟🌟
في مكتب التحقيق..
الضابط:انت شن كنت ادير غادي بالزبط؟
عبدالقادر بكل اريحيه جاوب:وحده من البنات خطيبتي لأني عارف انهم نساوين برواحهم في الحوش قعدت تحت الحوش بسيارتي لين شفت هداكا التافه جاي وخاش للحوش اكيد مش حنقعد مقعمز نتفرج عليه..
الضابط:بس في النهايه الحوش حوش خوه ووحده من البنات بنت خوه يعني يقدروا يقولوا عليك انك انت المعتدي مش العكس..
عبدالقادر:انتم ختاخدوا اقوال البنات وهما بروحهم يقولولكم من المعتدي..وبعدين ياحضرة كيف نكون اني المعتدي وصاحبي اللي كلمكم وقاللكم تعالوا بناءا ع كلام سمعه مني..
الضابط قعد يشبح لعبدالقادر شويه بعدين قال:ع العموم هو بروحه اعترف ع روحه وع خوه وقال انهم كانوا متفقين..
عبدالقادر بصدمه:على شني!؟؟؟
الضابط تنهد وقال:خوه اللي يكون صاحب الحوش قاله يمشي للحوش لان خطيبتك موجوده فيه كان ناوي الاعتداء عليها..وبعد الاعتداء نتجبر البنت تتزوجه والهدف من هدا كله الاستحواذ ع املاكها...
عبدالقادر من الغضب لين برز عرق في جبهته...
الضابط بتهكم؛ولانه كان مكيف ع قولت صاحبك هر الشكارة كلها...
عبدالقادر حك لحيته من جهة الذقن بقوة من العصبيه..
والضابط يشبحله...بعدين قاله..وقع على شبحله وهو يمصمص في شواربه بعصبيه بعدين وقع ع اقواله وناض..
ومشي طلع من المكتب....
الضابط تنهد وقال:الواحد ياما يشوف ويسمع..بعدين حرك راسه يمين ويسار وهو يشوف للوراق قدامه..
🍂🍂🍂🍂🍂
تاني يوم..
"ياحليلي هيي ياايامي السود المغبرات"
روبين ببكي:عليك فضيحه عليك عار..
مريم وهي تبكي:كله منها كله منها هالمصيبه هادي ناحستني هالبنت ديما ناحستني ومخربه عيشتي..
سيرين ببكي:شن دخلها امنه ياماما!؟ بابا هو اللي طلع مايخافش ربي..
روبين بحده:كيف تقولي ع بوك هكي ياحيوانه؟!
سيرين وهي تبكي؛شن تبيني نقول اه!؟شن نقول..تي باهي هدا ماقلت..اصلا هدا شي يحشمنا حني الناس لما تعرف حتى حني بننفضحوا في جرته..
مريم ببكي وعصبيه:وكله من مني اه قولي كله من مني؟!مش من هديكا!؟
سيرين تأففت بإنزعاج بعدين ناضت من حداهم ومشت لدارها..
روبين وهي معاها بعيونها قالت بتهكم:حطتها في جيبها..
مريم وهي تندب:ووك عليك يامريم ووك وع بختك الأسود يامريم..
وروبين تشوفلها وهي تبكي...
🌟🌟🌟🌟🌟
في سيارة ولد عمته..
كان مقعمز يتكلم بالتليفون..
عبدالقادر:هاه شن صار؟!
اسماعيل:ليهم ساعه طالعين من المركز..
عبدالقادر:ماعرفتش شن صار داخل؟
اسماعيل:عرفت عرفت..خدوا اقوالهم بس..
عبدالقادر تنهد بضيق وقعد ساكت..
اسماعيل:شن صار فيك انت؟!
عبدالقادر:تو وصلت للحوش روح بيا اشرف..
اسماعيل:تمام..باهي شن ناوي ادير؟
عبدالقادر سكت شويه بعدين قال:بعدين تعرف..هي سلامات توا نتلاقوا ان شاء الله..
اسماعيل:اوكي اوكي..تشاوات..
سكر عبدالقادر وهو يشبح للتليفون ويفكر..
وفي جنبه اشرف يشبحله وهو يقول:بتخش؟
عبدالقادر شبحله وقال:زي مااتفقنا شروفه..
هز اشرف راسه بإيجاب..بعدين فتح الباب ونزل..
وعبدالقادر نزل معاه..
وخشوا الزوز للحوش...
كانت الساعه 12قبل الظهر وكان الجو بارد والسمي مغيمه وغيومها ثقيله ومثقله بحبات ماء مجتمعه حتنزل بعد لحظات..
وهالجو يبي غدي سخون يدفي الجوف...
لهدا اول ماخشوا شموا ريحة كسكسي بالخضرة ممزوجه بريحة محشي يبان من ريحته انه حار...وياسلام لو فاحت معاهم ريحة الوشق...!
عبدالقادر وهو مغمض عيونه:الله ياربي...شن هدا !؟
اشرف بضحكه:فضيع انت اقسم بالله..
ع طلعة تجديده من الصاله لما شافتهم فنصت وجيت لعبدالقادر وهي تقول:وين كنت انت وين...وين بتت اعترف..
عبدالقادر فتح عيونه وهو مصدوم قال:غير خيرك ياحناي بالشويه عليك مش هكي!! بتت عند صاحب..
وصلت فيه وقالت:من هو هدا!؟اكيد الضايل سموعه ولا..خبطاته ع الجرح..
عبدالقادر عيونه قربوا طلعوا من الألم وصرخ بأعلى صوته...
واشرف فنص فيه..
حطت تجديده يدها ع صدرها من الخلعه وقالت:خيرك اللطف..
عبدالقادر ضيق عيونه وقال:شي ياحناي غير يدي كانت راقده وانتي خبطيها بقو قووك..وتهربا كمل يقول..خل نمشي نغير وندوش بش نلحقوا ع الصلاة..
ومشي طول لداره..
تجديده وهي عاقده حواجبها بقلق:في حاجه اشرف مادسش عليا..
اشرف حاول يخفي ارتباكه وهو يقول:مافي شي ياحناي شن بيكون في يعني! هي خليني حتى اني نمشي نوتي روحي..
ولف بسرعه ومشي طلع..
حطت تجديده ايديها ع بعض وقالت:اااخ منكم اااخ..
وفكت ايديها ومشت لكوجينتها..
🌟في دار عبدالقادر..
حول البالطو متاعه بصعوبه شديده..
حطه ع السرير..غير عيونه للروشن لما سمع حس المطر..
شاف منظرها وهي تصب بقوة متوسطه ع شجر الرمان ابتسم..وهو يذكر في اللي صار...
《 رد بالك بالله عليك..》
《 في هني صيدليه نطلع نجيب منها حاجات ونجي..
عبدالقادر وهو يتألم:ماتجيبي شي..بري خودي اختك واطلعوا من الحوش..
امنه:وانت!؟.
عبدالقادر :تو نتصرف غير اطلعي انتي بس..》
نزل عيونه للبالطو وهو يشوفله وابتسامته زادت توسعت وهو يذكر في نظرات عيونها اللي كانت مليانه خوف عليه..
تنهد..بعدين رفع عيونه القدام واذكر شن قاله ضابط التحقيق عن اعترافات حامد..تبدلت ابتسامته لملامح الغضب...
خبط رجل السرير بقوة برجله بعدين لف ومشي للدولاب بش يطلع منه حوايج للصلاه...
🍂فالوقت
اللي كانت فيه امنه مقعمزة في مصلاها بعد كملت قراية سورة الكهف..ولابسه في سبابتها خاتم الذكر..وقاعده تصلي ع النبي...ومرة مرة تسرح غصب عنها وتفكر في اللي وتتسائل عن حال عبدالقادر اللي كانت مشغوله عليه..
وين يخطر ع بالها اللي داراته فيه قلبها وضميرها يوجعوها..
وبدت تفكر في طريقه تصلح فيها غلطها في حقها وترفع عنه ظلم هي اوقعاته بيه...
لين اهتدت لطريقه وحده مافيش غيرها وعزمت ع انها تنفدها...
🍂زي ماكان خالها مقرر قرار وناوي ينفده..
انه يجيب اخته وبناتها يجوا يقعدوا معاهم في الحوش...
وفعلا..
بعد الغدي توجه لحوش اخته وجبرهم اجبار هي وبناتها يلموا حوايجهم ويطلعوا معاه لحوش امه...
🥀اول ماوصلوا للحوش..
مابتش مريم تكلم حد ركبت طول الدور التاني وقعدت في دارها هي وخواتها متاع ايام زمان وبنتها روبين لحقتها..
وتبرة طنشتهم مابتش ادورهم بكل..
اما سيرين مشت لدار اختها امنه تشوفها..
امنه بحزن:اكيد امي حاقده عليا توا..
سيرين:فوتي مادوريش..
امنه:يعني انتي مش واخده مني موقف زيهم؟.
سيرين؛وعلاش ناخد مني موقف واني شاهده ع كل شي صار!
امنه:سيرين..خاطري نعرف شن اللي غيرك من ناحيتي؟
ابتسمت سيرين وقالت:تبي الحق..كنت نغير منك هلبه ع قد ماكانوا يحكوا ع العز اللي عند بوه وع ماتملكي..وكنت نشوف في حناي وخالي كيف يحبوك ويشكروا في اخلاقك نزيد نغير منك..وكنت نشوف فيك غير علينا عاقله هلبه وشاطره وديما ناجحه..كنت نبرد ع روحي وين نذكر...رجلك يعني..
امنه شبحت لرجلها..
سيرين وخرت شعرها ورا وذنها وقالت:نقول شن بينفعها اللي عندها مادام فيها هالعيب؟...لكن في نفس الوقت نشوف فيك اول ماتصير معانا مشكله اول من يوقف معانا انتي ولامرة وخرتي ولاسيبتينا ولاعاملتينا زي ماحني نعاملوا فيك..هدا اللي خلاني اللي نتصل بيك انتي يومها..عارفاتك حتجيني تجري..بلعت ريقها وقالت..كرهت روحي لما شفتك كيف دافعتي عني رغم اني غالطه ومارضتيش فيا شي..
كنت نقول لروحي..مفروض نفرحوا اللي عندنا اخت زي هادي مش نكرهوها ونحطوا راسنا براسها..
نزلت دمعتها بعدين مسحتها وهي تقول..امنه بجديات اني نحبك هلبه..هلبه..
وحضنتها بقوة...وامنه ضمتها وهي تبكي بصمت بعدين قالت..وااك منك ياسمينه يامليانه فترشتي قلبي وهو بروحه مش ناقص..
وخرت سيرين وقالت؛سمينه في عينك...
امنه ضحكت من بين دموعها ..
سيرين وهي تضحك وتمسح في دموعها قالت:ايه حقه..شن صار في هداكا؟..
تلاشت ضحكة امنه بعدين تنهدت وهي تقول بضيق:مش عارفه..
🌟🌟🌟🌟🌟
في المربوعه..
يشربوا وهو وجده في الشاهي الاخضر ويتكلموا في موضوع مهم جدا..
عبدالقادر:نبيك انت تكلمه وتفتح معاه الموضوع تجي منك انت خير ياجدي..
فرج:قول الحق ياولد ردك..
عبدالقادر تنهد وقال:لا مش هو البنت..
فرج؛وكان البنت رداتك علاش بفتحه الموضوع مع بوها؟
عبدالقادر:ماهو اني اقنعتها بطريقتي ووافقت..
فرج :اسمع ياولد بلاتزفريت وقول البنت تبيك ولالا؟.
عبدالقادر بضحكه:شن الاحراجات هادي ياجدي ع اساس متحشم منك اني وقصه وموضوع..المهم..ايه تبيني..
فرج تنهد وقال:باهي هات جاي رقم الراجل هات خل نكلمه بش تطلع من راسي..
عبدالقادر بضحكه فرح:والله انت احسن جد في المجرة..
طلع تليفونه وحط ع رقم عمران وقال..هي سجل عندك..
.........
"عمران الاسبوع الجاي عندي لمه"
عمران وهو يشوف في ملف قدامه:والمطلوب؟
الهاديه:2000 بس نشري هديه للمراة مع حق المزين..
عمران بتهكم:وماتبيش قفطان؟
الهاديه:لالاخديت الاسبوع اللي فات..
عمران تنهد وقعد ساكت..
الهاديه:عمران!
عمران بإنزعاج؛ياودي باهي باهي..
فجأة رن تليفونه..
الهاديه:وخيرك تعيط يابابا ماتبيش تعطي ماتعطيش تو ناخد من خوي..
عمران:بري خودي من خوك مالا..
وناض من حداها ومشي بش يرد ع المكالمه..
الهاديه:اففف...ياريتني مافتحت موضوع خوي وبنته هدا بكل مالي بيهم اني..من هداكا الوقت وهو متغير..
....عند عمران..
عمران:ايوه السلام عليكم..
فرج:وعليكم السلام..عمران الهوني..
عمران:ايه تفضل..
فرج؛معاك عمك فرج..فرج الأمين..
عمران بمفاجأة وفرحه:اووو عمي فرج...تي شنو حالك عاش من سمع صوتك..وينك وينك وين ايامكم..
فرج بإبتسامه:والله حتى انت ليك وحشه ياعمران غبت وغابت اخبارك..
عمران بضحكه؛خدتنا الدنيا ياعمي فرج خدتنا..
فرج:والله صدقت الدنيا خدتنا..لكن والله ديما ع البال..
عمران:حتى انتم والله ياعم فرج...شن حالك وحال خالتي الحاجه تجديده والولاد..
فرج:الحمد لله كلنا بخير..انتم شنو حالكم وشن اخباركم..
عمران:الحمد لله..الحمد لله..
فرج:اني خديت رقمك من ولد ولدي..عبدالقادر...
عمران:اها ايه..ايه..
فرج:وعندنا موضوع معاك نبوا نفتحوه ياعمران..
عمران قلبه فر فران من الفرحه لكن طبعا ما بينهاش وقال:ان شاء الله خير!
فرج:خير خير بإذن الله خير..موضوع حكي فيه معاك عبدالقادر قبل..وتوا حولهولي قال الأصول هكي ياجدي..
بعت عبدالقادر لجده بوسه طايره..
فرج لوحها بيده وقال:واني قلت..بنمشوا بالأصول ونبعتوا العيال...
عمران ابتسم وقال:مرحبتين بيكم ياعمي فرج..غير عطيني فرصه نعطي العلم ونرد عليك..
فرج:مافيش مشكله مافيش مشكله..وانت عاد بعد لقينا بعض تعال مرة مرة لسوق عمك الحاج الامين نكسبوك ع فنجان قهوة ونهدرزوا..
عمران بضحكه:ان شاء الله ياعمي فرج ان شاء الله..
فرج:هي مالا مانعطلش عليك..بالسلامه تو..
عمران:سلم ع الولاد ياعمي فرج..بالسلامه..
فرج:يوصل..بالسلامه..بالسلامه..
وصكر...
عبدالقادر بلهفه:هاه شن قالك..
فرج:قال نشاور العيال ونرد عليك..
تنهد بإبتسامه وقال:خير خير..ان شاء الله خير..وهالمرة حتصيب.. ناض لجده وباس راسه وقال..سلملي الصلعه يارب.
ومشي طلع من حداه..
وجده يقول بضحكه:ان شاء الله مايحشمنيش مع الناس..
استرنا يارب..
🌸🌸🌸🌸🌸
"هدا هو"
سيرين خدت الكتاب وقالت:هلبه بنات في المعهد يحكوا عليه..
امنه:اقريه وحتحبيه هلبه..
سيرين بضحكه:وكان مافهمت شي نجي نسألك..
امنه بضحكه:اكيد..
رن تليفونها...خداته من ع الطاوله..
وشافت المتصل تعكرت ضحكتها وقالت:بوي..
سيرين بخوف:ان شاء الله ماسمعش !
شبحتلها امنه بخوف بعدين فتحت الخط وردت..
امنه:السلام عليكم بوي..
عمران:وعليكم السلام..كيف حالك..
امنه:الحمد لله..كيف حالك انت..
عمران:الحمد لله..اسمعي بنقولك..توا كلمني الحاج فرج الامين جد الشاب اللي جي طلبك مني وقال بيجيبوا العويله..
امنه توسعوا عيونها بصدمه..
وسيرين تشوفلها بقلق..
عمران:كلمي حناك وامك وحددوا موعد بش يجوكم فيه..
امنه وهي تحاول تستوعب اللي تسمع فيه:احمم..باهي..تو نكلمهم..ونرد عليك..
عمران:ماطوليش..
امنه بلعت ريقها وقالت:حاضر..
عمران:تمام..ماتبي شي؟.
امنه؛لاسلامتك..مع السلامه..
عمران:سلام..
صكرت امنه وهي تشوف للتليفون بعدم استيعاب..
سيرين بخوف:شن يبي؟!
امنه قامت عيونها وشبحتلها بعدين قالت:قالي اهله يبوا يجوا يخطبوني!
سيرين:اهل مني؟!..بعدين فتحت عيونها ع وسعهم وقالت...اهل عبدالقادر؟!
امنه هزت راسها وايجاب وخدودها بدوا يتوجهوا حمرة حياءا..
سيرين ضحكت بفرح وهي تقول؛ياااربي..عليك جو..الله يابختك ياامونه بجد..ياهكي الحب يابلاش منه..
امنه ضحكت وهي متحشمه..
واختها بدت تغني..
ياوين عرفها بنت الأصول..جاها للمربوعه طول..
وامنه تضحك وهي حاطه يدها ع عيونها...وقلبها يرفرف من الفرحه...
🌸🌸🌸🌸🌸
هالنهار عليه ندور..هالنهار ربيعه نور..
امنه بضحكه؛غير اصبري ياحناي خل يولد ويسموه..
تبره بضحكه:لالا بنيتي بعون الله صاير منه..تي هدا راجل حقاني والله انتي ماتستاهلي كان اللي زيه..
ع خشة مريم ومعاها روبين..
مريم:بنتك في هم وغم ماعالم بيهم كان ربي وانتي تغني وتزغرطي!؟.
امنه تلاشت ضحكتها وهي تشبح لأمها بحزن..
تبرة:لو منك نزغرط ونغني اللي افتكيت من راجل معفن زي هدا..وبعدين انتي هكي ولاهكي حتزغرطي وتغني امونه بتنخطب خلاص..
شبحتلها روبين بحقد..
مريم ضحكت بسخريه وقالت؛بعد ماخربت عليا وع اختها عمرت لروحها...صحه ليها..
انصدمت امنه من اللي سمعاته..
تبرة:شن تقطفي انتي!؟؟
مريم:هدا الحق..من نهار جبتها ماريتش كان الخراب...خربت بيني وبين بوها وتوا فرقت بيني وبين راجلي..ومن الحقد اللي معبي قلبها خربت حتى ع اختها..
تبره:وشن دخل امنه بخياب بنتك الخايبه..
فنصت روبين في حناها وقالت:انشدي حفيدتك اللي انتي مربيتيها كيف حامت عليه لين خطفاته وخربت بيني وبينه..
تبرة بغضب:كذابه في نص وجهك يابنت الكذابه..
مريم:زيدي يام زيدي..
تبرة:لا امك ولانبي نعرفك...
مريم بإنفعال؛مالا والله ماقاعدتها هني الله..غير يروح محمد..
ومشت من حداهم وروبين قالت قبل تلحقها:ان شاء الله ماتتهني..
ولحقت امها..
وامنه واقفه تشبحلهم ودموعها ينزلوا..
سيرين ودموعها في عيونها:ماتعدليش عليهم..
تبرة:سلم بنيتي ماتخلي شي يخرب عليك فرحتك..
ضمت شواربها لداخل بألم وهي تكتم في بكاها بعدين مشت من حداهم لدارها..
تبرة بقهرة:حسبي الله ونعم الوكيل..حسبي الله ونعم الوكيل..
وسيرين مشت من حداها حتى هي وتوجهت لدار المعيشه..
🥀هلبه ناس في حياتنا..حوالينا..وللأسف احيانا يكونوا اقرب الناس لينا..وين يشوفوا فرحتنا يسرقوها بكلمه..بنظرة ..بتصرف يقلبها تعاسه وحزن..والمؤلم اكثر ان هالفرحه مرات تجيك بعد امد طويل من الهم والغم..يستخسروا فيك الفرحه..مادام بيهم تقعدي ديما تعيسه بش يحسوا ان مازال في حد اتعس منهم....وفي اللي مايحبش يشوف حد خير من حاله يبي يتفرد بالباهيه هو وبس...لصوص الفرحه هادم..ربي عطانا الوصفه السحريه اللي نصنعوا بيها لأنفسنا حصن منيع ضد سيوف كلامهم المسموم اللي ديما تتسلط علينا...
¤ولقد نعلم انه يضيق صدرك بما يقولون○فسبح بحمد ربك وكن من الساجدين¤
🌸وهدا اللي داراته آمنه..
توضت..وصلت ركعتين...ارتاحت وسكنت نفسها شويه..
بعدين قعدت تسبح ع اصابعها...وشويه شويه..ارتاح قلبها وانشرح صدرها..
واذكرت اتصال بوها...من بين دموعها قعدت تضحك من فرحتها..
🌷طبطبه ربانيه...مافيش احلى منها🌷
بعدين اذكرت انها غدوة ع موعد مع يوم مهم جدا بالنسبه ليها حتواجه فيه غلطها...وتصلحه...
🌸🌸🌸🌸🌸🌸🌸🌸🌸
اليوم التالي..
الساعه 10:30صباحا..
"شن تقولي ياأستاذة هدا كلام خطير راهو!"
امنه بثقة:عارفه..بس مش اخطر من اني نقعد ساكته ع ظلم اني درته بروحي..اني ظلمت الطالب عبد القادر الامين وتسرعت في حكمي عليه..هو فعلا تغير المده الاخيره وولى مهتم بقرايته اسألوا باقي الاساتذة اللي يقروا فيه كله ملاحظين هالتغيير..ممكن اني من النوعيه الصعبه..وكان ردة فعلي مبالغ فيها اتجاه تصرفاته..
العميد:استاذة لو فعلا انتي ظلمتي الطالب وتسببتي في طرده من لاشيء..اعترافك ورجوعك عن الغلط مايعفيكش من المسؤوليه..
امنه:وهدا الشي التاني اللي جيتك ع خاطره..اني نبي نسيب التدريس في الكليه..افضل شي نديره لصالحي ع الأقل..
العميد قعد يشبحلها شويه بعدين قال:وحتى اني نقول هكي افضل..هز راسه وقال..ع العموم نشكرك ع شجاعتك الرجوع عن الخطأ والاعتراف بيه فضيله..
امنه ابتسمت وقالت؛شكرا..طلب اخير من حضرتك..
العميد شبحلها بإنتباه وقال:تفضلي..
🌸🌸🌸🌸🌸
وع وجهها ابتسامة راحة جميله تمشي آمنه بإتجاه مكتبها لين وصلت فيه..
فتحاته وخشت وهي تقول:السلام عليكم..
ردت عليها هبه:وعليكم السلام..شن صار؟
بدت امنه تلم في حاجاتها قالت:كل شي مشي زي مانبي..تريحت..
هبه بإبتسامه حزن:قصدك خلاص بتسيبي الكليه؟
امنه هزت راسها وهي مبتسمه قالت:ايه..
هبه:حتى اني استقلت واليوم اخر محاضرة نعطيها..
امنه وهي متفاجئة:جديات!.
هزت راسها هبه بإيجاب وهي مبتسمه..
امنه ابتسمت وقالت:ان شاء الله خير..
هبه:ان شاء الله..
ع خشة عصام..شاف آمنه تلم في حاجاتها ماقدرش يمنع نفسه من السؤال:شن في استاذة؟
امنه بدون ماتشوفله:بنسيب الكليه..وكملت تجميع اغراضها..
وعصام شبحلها شويه بعدين قال:موفقه..
وقدم خدي حاجه من ع المكتب ومشي طلع بسرعه وهو مضايق.
هبه شبحت لآمنه..
وامنه بتجاهل تام قعدت تلم في حاجاتها...
🌟🌟🌟🌟🌟
الساعه 7:30مساءا..
في الطريق...
عبدالقادر بصدمه:هدا امتى صار!؟
فاروق بضحكه:اليوم قبل الظهر هكي..وعلقوا حتى اعتذار ياقدو...
عبدالقادر وقف السيارة ع تركينه وقال:فاروق مش مقلب من مقالبك انت والتافه التاني ولا؟!
فاروق:ههههه..اقسم بالله مانكذب عليك في حرف ياصاحبي..
عبدالقادر قعد ساكت وهو يفكر..وتفكيره قاده لنتيجه وحده بس ان ورا اللي صار هدا هي...معلمته..
ارتسمت ع وجهه ابتسامه وهو يقول:تمام تمام..تو نجي غدوة ان شاء الله ونفهم شن صار..
فاروق:اوكي نتلاقوا..سلام..
عبدالقادر:سلام...
وصكر وقعد يضحك من الفرحه وهو يخبط في تليفون ع ركبته بخفه..
فجاة رن تليفونه..
شاف المتصل..فتح الخط طول ورد..
عبدالقادر:ايوه جدي..
فرج:وينك انت؟.
عبدالقادر:في الطريق للمحل..
فرج:باهي اسمع بنقولك..كلمني توا عمك عمران..
عبدالقادر بإنتباه:ايه؟
فرج:قال قول للعويله يتفضلوا نهار الإثنين.
عبدالقادر من فرحته رفع قبضه يده فوق ونزلها وهو يقول بهمس:يسسس..
فرج:ايوه..معاي ياولد!؟
عبدالقادر حط مقدمة انفه وقال:اها ايه..معاك...على خير ان شاء الله..
فرج:ان شاء الله..هي برا غادي ..وصكر عليه..
وعبدالقادر حدف التليفون ع الكرسي اللي في جنبه وبدي يدربك ويغني..
واخيرا عطاني الله...وحن عليا العالي..
وربي كتبني ليه وكتبه ليا الغالي...
توا اخترعتها ماتركزوش هلبه...هههههه...
🌟🌸🌟🌸🌟🌸
ووصل الخبر لتجديده اللي فرحت من قلبها واخيرا بتمشي تخطب لأعز حفيد ع قلبها واللي قعدلها من ريحة ولدها..
وقررت ترفع معاها بنتها فتحيه...
وعبدالقادر مشي بروحه لخالته نبيله بش يطلب منها تمشي مع حناه وعمته وهي فرحتله ع الأخر..ووافقت تمشي بكل سرور...
🌸اما عند امنه فكانت تستعد نفسيا لهاليوم..
وحناها تستعد من ناحية اخرى...الضيافه ومايتبعها وكذلك بتغييرات بسيطه في المكان اللي بستقبل فيه الناس..
وبالنسبه لمريم..هداها محمد وحلف عليها تقعد وجابله كل ماتحتاجه بش نقعد فوق وماتضطرش تنزل وتحتك بحد وتصير مشاكل...ومتجاهله تماما موضوع بنتها ولاهمها..مش غريب عليها..
بس روبين كانت ناويه على شي تاني...
🍂يوم الأحد..
في الكليه..
"بنفسد عليها زي مافسدت عليا"
رتاج:شن بديري؟!
روبين:اهو جي سمعه..تو نكلمك في الليل ونهدرزوا سلام..
ومشتله بسرعه..
وصاحبتها مطت شواربها لداخل بأسف وهي تشوفلها بعدين مشت ع حالها..
وصلت روبين في اسماعيل وقالت:سمعه وين مختفي المده اللي فاتت؟
اسماعيل:اسمعي هما كلمتين بعد اللي سمعت ووصلني عن بوك واللي داره في اختك مايشرفنيش نرتبط ناخك بنت هدا بوها..
روبين بصدمه:من قالك؟!
اسماعيل:اللي قالي قالي وحاجه زي هادي ماتدرقش..امسحي رقمي امسحيني اني من حياتك كلها..اوكي..كان في وتم...رفع يده وحياها تهكما وهو يقول..تشاواات..
ونزل يده ولف ومشي خلاها وهي واقفه في مكانها جامده من صدمتها..
وهو حس روحه شفي غليله فيها وخدي بثار كرامته منها..
🥀وديما اصحاب النوايا السيئة يطيحوا في الناس اللي تشبهلهم بش يتجازوا جزاء من جنس العمل وماينالوا شي غير الخسارة🥀
🌸🌸🌸🌸🌸🌸🌸
يوم الإثنين...
الساعه 5:00عصرا..
رن جرس الحوش..
طلع محمد بش يفتح الباب..
وصل فيه وفتحه...
جو عيونه في عيون نبيله خالة عبدالقادر..
نزلهم طول وقال:تفضلوا تفضلوا..
خشت تجديده الاولى...ووراها فتحيه ونبيله..
طلعتلهم الحاجه تبرة وهي ترحب بيهم...
ومحمد دخل عبد القادر..
محمد وهو يصافح فيه:الحمدلله..شن حالك انت..
عبدالقادر:الحمد لله .
طلقوا ايدين بعض ومحمد يقول:تفضل تفضل...
عبدالقادر؛يزيد فضلك..تسلم..
وخشوا النساوين داخل..
.......
نزلت من فوق تتبختر وهي لابسه احلا ماعندها..
وابتسامة مكر ع وجهها..
ومشت بإتجاه الصاله..
قابلتها اختها ووقفتها وهي تقول:شن دايره في عمرك؟
روبين ؛خيرك مش حلو؟
سيرين:روبين بري اركبي..
روبين شبحتلها من فوق لتحت..بعدين قلبت عيونها ودفتها ومشت..
سيرين وهي تشوفلها بكره:مريضه..
في الصاله..
تبرة:حتى حني سكنا غادي مده..
تجديده:اي اي..راياتك مرة عليا وجهك مش غريب..
تبرة بضحكه:حتى اني شايفاتك قبل..
فتحيه:محلاهم ايام الشرقيه يهبلوا..
تجديده:ايه والله ايام راحت ومعاش تولي..
تبرة:صدقتي..شبحت لنبيله وقالت..حتى انتي بنية الحاجه تجديده؟.
نبيله بإبتسامه:زي امي خالتي تجديده..اني نكون خالة عبدالقادر..
تجديده:وزي اميمته...
ابتسمت نبيله..
تبرة بإبتسامه:ربي يحفظك..
نبيله :تسلمي ياحاجه..
ع خشة روبين..
لما شافتها تبرة وجهها تغير..
روبين بصوت مايع:السلام عليكم..
لما شافوها وشافوا لبسها بانت ع وجوههم ملامح عدم الرضا..
وجتهم سلمت عليهم...وتبرة وهي تشبحلها تحاول تكتم نظرات غيظها ابتسمت مجامله وقالت:هادي بنت بنتي التانيه..
تجديده مجامله؛ربي يحفظها"غبارة كان ماتطلع اختها زيها شن اللي لابساته هدا الستر ياربي"
قعمزت روبين حداها حناها وحطت رجل ع رجل..
ع خشة سيرين اللي كان لبسها محترم ومظهرها لائق..
طلقت السلام..وجت تسلم عليهم..
عجبتهم هلبه..
تبرة:هادي بنت بنتي الصغيره..
نبيله بإبتسامه:ماشاء الله..ربي يحفظها..
سيرين؛تسلمي ..وجت لروبين جبدتها وهي تقول:ترا تعالي شويه..
ناضت معاها ومشوا طلعوا من الصاله..
ولما وصلوا للكوجينه..
جبدت روبين يدها وقالت:علاش اطلعي فيا خايفه يغيروا رايهم ويخطبوني مكانها؟!
سيرين:ع اساس..حبيبتي الولد بروحه يبيها وميت عليها جية ماليه مجرد شكليات وبس..
وخشت للكوجينه..
وروبين مشت لحقتها وهي بتموت من الحسد..
🌸اما امنه..
فكانت مقعمزة في دارها تقرا في الاذكار..
وبعد كملتهم بدت تسبح..وهي تراجي امتى ينادوها بش تطلع..وقلبها يدق بأقوى مافيه..
بعد ربع ساعه...
خشت سيرين على امنه وقالت:هيا امونه..
وقفت امنه وخدت نفس بعدين قالت:لاحول ولاقوة الابالله..بلعت ريقها وقالت..شن رايك سيرين..
سيرين بضحكه:والله تهبلي..
ابتسمت امنه..ومشت للباب..
وطلعت مع اختها...
وكل ماتقدم خطوة ناحية الصاله قلبها تزيد دقاته..
لين وصلت في الصاله وخشت..
امنه:السلام عليكم..
شبحولها..عجبتهم هلبه..لعند ماشافوا مشيتها..
انصدموا...
فتحيه وتجديده....لكن نبيله لا لأنها تعرف عيب امنه الوحيد..
تبرة لاحظت فتحيه وتجديده كيف وجوهم تغيرت..وحست بالضيق..
وحتى امنه حست بيهم لكن حاولت تتجاهل..
سلمت عليهم التلاته...
تجديده بالسيف تسلم..
لكن فتحيه سلمت عادي..لانها شافت مميزات تانيه عند امنه ابرزت جمالها..
بعد سلمت عليهم مشت قعمزت حدا حناها..
تبرة:هادي امنه بنيتي وحفيدتي...
نبيله بإبتسامه:ماشاء الله عليها ربي يحفظها..
امنه بإبتسامه:تسلمي..
نبيله:اني خالة قادر...اسمي نبيله..
فتحيه:واني عمته فتحيه..وهادي امي حناه تجديده وامه اللي رباته..
امنه:ربي يخليلكم ليه..
تجديده كانت تتمقل فيها وهي تقول في نفسها"البنيه قنينه الحق..لكن ياودي عيبها مايترقعش"
فتحيه:تسلمي حبيبتي..
نبيله:استاذة في الجامعه..
امنه:كنت..تو حولت للمعهد اللي تقرا فيه اختي..
ابتسمت سيرين..
وروبين تشبحلهم من فوق لتحت..
تجديده:كم عمرك؟
شبحوا لتجديده...
امنه بإبتسامه:25 سنه..
تجديده برفعة حاجب:اها..باهي..
فجأة..طق باب الصاله..
سرين ناضت طلعت..
لقت خالها محمد..
محمد؛قولي لآمنه تلبس حجابها وتطلع للراجل يبي يشوفها..
سيرين تفاجئت وقالت:باهي..
ومشت طول خشت وهي تقول:خالي قال الراجل يبي يشوفك..
انصدمت امنه..
نبيله:ايه قال نبي نتفق اني وياه ع بعض الامور..
تبرة؛نوضي بنيتي البسي حجابك واطلعي للراجل..
امنه بلعت ريقها وناضت..
ومشت..
وتجديده معاها بعيونها كيف تمشي وهي مضايقه ع الآخر..
............
في الدار..
خشت سيرين على آمنه لقتها تمسح في المكياج..
سيرين؛علاش تمسحي فيه!؟
امنه؛وعلاش نطلعله بيه!؟هو مازال اجنبي عليا..
ولبست عبايتها الواسعه..
سيرين:حتى العبايه!
امنه:اكيد..حيشوفني زي ماشافني قبل..مازال مايحلليش ياسيري...بعد قراية الفاتحه ساهل..
ضحكت سيرين وقالت:اوكي..
لبست امنه شاربتها..
بعدين مشت بتطلع...
سيرين:موفقه..
قرصتها امنه من خدها وطلعت..
وسيرين وراها..
امنه وهي ماشيه فاتت من قدام الصاله..شافوها شن لابسه..
ابتسمت نبيله..وفتحيه كذلك..
🌸وصلت آمنه في المربوعه..
طقت الباب..
محمد:خشي خالي خشي..
عبدالقادر كان منزل راسه لوطا وقلبه يدق بقوة..
خشت امنه وعيونها لوطا قالت:السلام عليكم..
عبدالقادر :وعليكم السلام..
قعمزت آمنه مقابلاته..
ناض محمد وقال:عن اذنكم..
ومشي طلع..
رفع عبدالقادر عيونه وقال بإبتسامه:Myteacher..
رفعت عيونها فيه وقالت:شن حال جرحك..
عبدالقادر بإبتسامه:اموره تمام مادوريشي بكل..
نزلت عيونها وهي شاده ابتسامتها..
عبدالقادر:سيبتي الكليه..
امنه تنهدت وقالت؛هدا الاحسن..
عبدالقادر:من اي ناحيه؟
امنه:المشكله اللي صارت انشهرت هلبه ومعاش ينفع نقعد معاك فيها..حتزيد تطلع الدوة..والأهم..اني غلطت وهادي العقوبه العادله ليا..
عبد القادر بإبتسامه:امم..اول شي انتي ماغلطنيش بش تتعاقبي..
امنه:لاغلطت..
عبدالقادر:لاماغلطتيش وكان عندك حق تصرفاتي معاك كانت بايخه ونستاهل اللي درتيه فيا..
قعدت ساكته وقلبها يدق بقوة..
هو ابتسم وقال:ع العموم وهادي ثانيا هدا اللي نبيه تسيبي الكليه..
امنه بتعجب:علاش..
هو بضحكه:لسبب نحتفظ بيه لنفسي..
شبحتله بحده..
هو ابتسم لما شاف عيونها..
هي رمشتهم ونزلتهم..
ضحك وقال:نجوا لثالتا وهدا الأهم..طبعا العرس بإذن الله حيكون بعد مانتخرج..واني بش نتخرج لازم نقرا مليح..وندير مشروع مليح..ونبي من يساعدني..باهي من يساعدني..من يقريني..من اللي معاه حنوصل لاخر الطريق في القرايه واخيرا نتخرج!؟قلت لروحي علاش ياقادر دور وتسأل انت..والمدام استاذة في المجال..
شبحتله وهي متفاجئه..
عبدالقادر بضحكه:اها اللي جي في بالك توا..بنقروا الفاتحه طول..
امنه:مستحيل!
عبدالقادر بإبتسامه:مافي شي مستحيل..معلمتي..انتي علمتيني الحاجه هادي ع فكره..لهدا اني فتحت الموضوع مع عمي عمران ووافق...وحتى خالك قال مافيش مشكله المهم هي توافق واني عارفك حتقولي باهي..
امنه ضيقت عيونها وقالت:خاطري يولي عندي شويه من ثقتك بنفسك..
عبدالقادر :بعد قراية الفاتحه نعطيك الثقه كلها..تي مش غير الثقه اني بنعطيك عمري وحياتي وكل ماأملك..
نزلت عيونها لوطا وقلبها يدق بكل قوة..
عبدالقادر بتوسل والحاح طفولي:قولي باهي بالله عليك..قولي باهي..هيا هيا..قولي باهي..قولي هيا..
هي ضحكت بأنزعاج وقالت:تي باهي..خلاص باهي..
هو صيح بصوت هامس:الله اكبر..
هي غلبتها ضحكتها وناضت ومشت طول طلعت..
وهو معاها بعيونه ويضحك ويقول:غير وين ماشيه خليك شويه بس..
ع خشة خالها...
زمط ضحكته ولبس وجه الجديات..
محمد قعمز وقال:هاشن صار مشت الأمور تمام..
عبدالقادر ابتسم وقال:تمام التمام..
ابتسم محمد وقال:كويس...على بركة الله...
....يتبع....
