حكمة الذئب

بارت22

ضحكت وسن : اي والله وصرتي تحجين وتهددين يرضوة ..
هملتها وماحجيت . اجة بشار ..
صحته ياكل اشرلي مايريد .. وطلع ..
سداد رجعت للغرفه هم ما تشتهي ..
ووسن صبت صينية وراحت الغرفتها ..

بقيت يم بسمة وحمودي بعد ماكملوا نظفت واخذتهم للغرفه فرشتلهم ..
سألتهم تنامون..  حمودي مايفوت نومة الظهر بسرعه راح للفراش وغطيته ..
بس بسمة بقت يمي جانت عندي طلبيه وبالي يم جدي لايصير عليه شي ردت اشتت تفكيري گعدت اشتغل بيهن ..
ضحكت .. شتسوين ؟
جاوبتها .. اشتغل
شافت الستن والدانتيل .. هاي عروسة
ابتسمت ..
اني هم اريد بدلة عروسة سويلي .
هزيت راسي اي تتدللين .
گامت حضنتني . فزيت لان حركتها فجائيه بس حسيت بشي داخلي تحرك ناحيتها ..
- انتي حبابة حبابة گمت احبج .. عندج جهال.
جاوبتها بس ولد واحد..
بقت تعاين بالغرفة وينة هذا اشرت على حمودي
رديت عليها : لا ابني جبير اخذ جدج للمستشفى
جاوبت .. بس هذا مو جدي
سكتت واتنهدت : شيفهم هالطفله وشلون راح تستوعب انه ذولاك مو اهلها وذوله اهلها ..
سمعت الباب انفتحت طفرت .. شفت مهدي .
صاح وسن وسن .. طلعت وتلگته سولفتله ..
ماحسيته استغرب ..
وردة فعلة عادية بس سأل على جدي وامة
بعدين طلع ..
رجعت للغرفه وافكر معقوله يدري .. شو مااستغرب ولاسأل ..
رجعت للغرفه لگيتها نايمة وراسها يم حمودي ..
شلت بطانية وغطيتها ..

للعصر كلش قريب المغرب اجه عمي صالح ورزاق ..
سألتهم على جدي :
جاوبني عمي : ضاربته جلطة وخلوه الباجر ..
شهگت واختنگت بعبرتي سودة عليه يابوية .. خلصت عمرك كله بضيم وقهر ..

ماانطاني گلبي مااگول العمتي ..
لبست عباتي وگلت العمي رايحة البيت ام هيثم اخابر عمتي ..
ووصيت سداد تصب العشا بمكاني هي ووسن .
دگيت الباب طلعتلي مسك .. شافتني ابتسمت ورحبت بيه ..
- هلو خالة تفضلي .. صاحت بيبي ماما اجت خالة ام حكمت ..
تلكتني ام مسك .. اتعذرت منها لان اجيت بهيج وكت ..
وگلتلها اريد اخابر عمتي ..
سألتني على اصواتنا الظهر استحيت ارد بس گلتلها جدي تخربط واخذوه للمستشفى..
انقهرت عليه لان المنطقة كلها تحبه ماعندة اذيه على احد ..

خابرت عمتي وطلعت ام مسك من يمي وسدت الباب .
ردت عمتها : منهو انتي
- اني رضوة اريد عمتي حمديه ..
- عمتج ملتهية عدنا خطار .. وطبگته .
بقيت صافنه هسا شلون اگلها ..
رجعت ضايجة للبيت .. شفت عمي يصيح وين عشاجن كتلنا الجوع ..
جاوبته : اي عمي جاية ..
حجيت عليهن : ماعرفتن تصبن ..
وسن ردت : بنتي تبجي ماادري شبيها من يجي مهدي يله اتعشا عود اعزلي حصتنا ..
گمت اصب وبسمة تساعدني تاخذ الماعين للسفرة ..
وبعدها صفطت طوس الزلاطة بصينية وضحكت
- صارن ثگال ثگال مااگدر اشيلهن ..
ابتسمت الها : عوفيهن اني اشيلهن ..
اخذتهن وبعدها جبت الخبز لگيتها واگفه منتظرتني گعدت گعدت بصفي ..
احس سكري هبط من الجوع بلا غدا .. صبيت جاي وي الكبة احب وياها جاي ..
وعمي هم راد .
وگعدنا ناكل ..
عيني على مكان جدي كل يوم هو الجامعنا هسا بس اني وعمي صالح والجهال حتى سداد سوت لفه وراحت نامت ..
اووووف الله ينطيك طولت العمر بلياك انتيه والله ..