إمبراطورية الأسود

البارت 113

مسح سلاحو و بقا كايضورو فجهة الاشخاص لي باقيين واقفين ... أسوار ابراهام مالك و الدكتور
أرسلان : سالينا من قضية التهاون .. نجيو ليكم
أسوار : أرسلان راه..
أرسلان : هسسس ا خويا العزيز الهضرة معاك ماشي دابا ( شاف فأبراهام ) فين كنتي هاد الصباح؟!
أبراهام : الصمت
أرسلان : مشات لك الشجاعة؟!
أبراهام : ( حدر عينيه ) كنت كانقضي شي شغل ا ميستر ارسلان
أرسلان : بحالاش هاد الشغل.!! .. بقا ابراهام كايشوف فمالك و هو متردد واش يقوليه ولا يخبي و فحالة كدب عارفو غادي يعيق بيه ولكن ممكن مايعيقش بيه فواحد الحالة
أبراهام : كنت كانصلي ا ميستر أرسلان
أرسلان : من ايمتا وليتي متدين.!
أبراهام : ماشي بزاف ا ميستر أرسلان
أرسلان : همم مزيان ( ببرود ) عموما ماقنعاتنيش هضرتك ( تيرا فيه جابها ليه فالكتف ) إنذاراتك كترو مؤخرا رد البال فالمستقبل ممكن تجيك ف( اشار ليه لراسو )
أبراهام : ماغايتكررش هادشي ا ميستر أرسلان ... عاود شاف فالطبيب عطا إشارة لجوج رجالو جاو هزوه الدكتور من يديه و عطا اشارة لوحداخر و جابو ليه الكرسي فين يجلس .. مقابل مع الدكتور بالضبط .. قلب الكرسي و جلس فيه بالمقلوب هز الفردي فيديه و بقا كايضورو فيديه ضرب القرطاسة اللولة جات فالكف ديال الدكتور بدا كايغوت بسبب الألم .. عاود ضرب ليه القرطاسة فالكوع موراها زاد تيرا ليه من فوق الكوع شوية .. و فكل مرة كايجيب القرطاسة فالمنطقة لي من مور المنطقة لي تيرا فيها فاللول .. الصراخ ديال الدكتور كايتسمع فالجردة كاملة اسوار و ابراهام و مالك مافاهمينش علاش كايدير فيه هادشي اما أرسلان فكان كايتفنن فالقتل ديالو بطريقة جد جد بطيئة .. كاينحت ليه الجسم ديالو بالقرطاس و غادي بشوية بشوية دقة بدقة منطقة بمنطقة سالا من اليدين و بقا هابط بالقرطاس شوية بشوية .. صوتو بح بالغوات و دموع الرجال لي ماكايسيلو إلا فالحالات القصوى هاد النهار سالو للدكتور و تخلطو مع الدم .. رجع ليه الكسدة ديالو كلها متقبة غربااال جدو غير سمع صوت القرطاس بدا كايطل من الشرجم و هو مستغرب علاش ارسلان قتل الدكتور اثار انتباهو لابيسين لي ولا واحد الجزء منو لونو حمر قاتم لون الدم و الجثث لي فيه .. فحين أرسلان كان سالا منو و شافو بلي مات ولكن مزال مابرد لو دمو كايبان بارد من برا ولكن فالداخل ديالو شاعل فيه 100 بركان و بركان حامي .. اشار بسلاحو لواحد من رجالو باش يجي لعندو هضر فودنيه و مشا دازو دقائق و عاود رجع و فيديه بيدو ديال البنزين و بريكة .. وقف و هز البيدو بدا كايخويه عليه .. لاح البيدو و شعل البريكة لاحها عليه و خلاه للعافية تاكلو حتى تأكد بلي شعلات فيه عاد ضار لعند اسوار و مالك .. بحركة خفيفة جبد الفردي تيرا فيهم بجوج وسط الصدر و رجع الفردي لبلاصتو
أرسلان : ( بهدوء ) المرة الجاية مانبغيش هادشي يتعاود حيت ايلا تعاود ماكايناش شي حاجة غاتمنعني باش مانصفيهاش لكم ( شاف فأبراهام ) هبطهم يتعالجو ( هز راسو للبالكون ديال جناح جدو ) كانظن الميساج وصل ... تخطا الدم و توجه لغرفة ريماس اما أصلان مافهمش اش وقع و علاش هاد الحالة كاملة و علاش اد الكم ديال الناس تضربو هاد النهار .. بغا يعيط على دوك 2 رجال لي موالفين يكونو معاه .. ماكانوش و هنا ستنتج بلي حتى هما غايكونو تقتلو مع دوك الخداما .. عرف القضية حمااااضت ولكن فنظرو دابا ماعندو علاياش يتشوش حيت السوسة ديال ريماس فبالو بلي راها ماتت و تهنا منها
♔ كانت كاتسنط فالباب ديال جناح اصلان غير سمعات الخطاوي جايين بدات كاتنقز برجل راجعة للبيت ديالها باش ماتتسماش متطفلة .. دخلات و جلسات فالكرسي و ما هي الا لحظات حتى دخل ارسلان للبيت و سد الباب موراه ...