#قلوب_لا_تعرف_الرحمه
#فريده _احمد_فريد
الحلقه السادسه
زينه دخلت ع اوضتها بسرعه ....خلعت هدومها اللي غرقانه بدم قمر
ورمتها بخوف ع الارض....خرجت المطوه من صدرها...وبصت عليها برعب
حطتها ف طرحه من بتوعها وفضلت تلف حوالين نفسها مش عارفه تخبيها فين
رفعت مرتبه السرير وخبتها ف جزمه قديمه كانت تحت السرير...
..قامت لبست عبايه تانيه وجريت ع الحمام غسلت ايدها وصدرها من الدم ...وغسلت وشها....
خرجت لقت امها نايمه ع الكنبه قصاد التلفزيون وابوها وزين مش موجودين....
.جريت ع اوضتها...واستخبت تحت الغطا حاولت تنام عشان تنسي الكابوس ده..
..لكنها كانت كل ما تغمض عينها تشوف وش قمر اللي زيد شوهه ف لحظه بدم بارد وهرب زي الجبان
وسابها تلبس الليله لوحدها حاولت تنام بكل طريقه لكنها ما قدرتش...
.سمعت صوت باب شقتهم بيفتح وسمعت ابوها وزين بيتكلموا مع بعضهم..
..عملت نفسها نايمه عشان مش قادره تتكلم استنت لما زيد يرجع وتشوف هتعمل معاه ايه الاول...
حطت رأسها ع المخده وانهارت من العياط لكن بصمت عشان محدش يسمعها
*************************
تاني يوم ف الهايبر ماركت ايمن كان بيظبط ميزانيه الهايبر .....ويشوف الربح والخساره
والمصاريف عشان يزود العمال شويه... ف المرتب بسبب غلوا الأسعار اللي ف ارتفاع مستمر
وهوه بيظبط اسامي العمال ع حسب الاقدميه....شاف اسم اخر عامله جت الهايبر وقف شويه عند الاسم ده
"بدر محمد المحمدي"
الاسم مش غريب عليه ......حاول يفتكر الاسم دا قراه فين قبل كده وفجأه افتكر بدر...قال لنفسه
(لأ طبعآ مش هيه ...هيه اختفت فجآه صحيح واتقأل عليها كلام كتير .....مستحيل تكون هيه...ولو هيه هرفدها فورآ...انا مش ناقص قرف ف الشغل...ع اخر الزمن اشغل عندي واحده شمال ومدوراها هيه واخواتها بلا قرف...بس اكيد مش هيه...عامآ شويه والعمال كلهم هيوصلوا واشوف)
#ملحوظه طبعا بعد ما اتقبض ع البنتين وغابوا عن شغلهم ناس زمايلهم راحوا سألوا عنهم
ف منطقتهم وعرفوا الحكايه من الجيران وطبعا مصيبه زي دي كل اللي ف الشغل سمعوا بيها وايمن كان واحد من اللي سمع وصدق.
....... ايمن رمي الورق من ايده وقام ولع سيجاره وخرج من المكتب ....ووقف يبص ع العمال
وهما داخلين الهايبر عمال النهار...غير عمال المسا....ف دي كانت ساعه تبديل الشفتات...لكن بدر ما ظهرتش
*****************
ف منطقه المرج..... زيد طلع عماره ووقف قصاد باب شقه..خد نفسه وخبط ع الباب
فتحت ست كبيره ف السن قالها
(السلاموا عليكوا يا حجه....اسامه هنا)
(انت مين يابني)
(انا واحد صاحبه قوليلوا زيد وهوه هيعرفني)
(بس هوه لسه ف الشغل...قصاده 3...4 ساعات عقبال ما يرجع...)
زيد افتكر انها هتعزم عليه يدخل لكن الست فضلت باصه له مستنياه يعتذر ويمشي... كح بأحراج وقالها
(ماشي يا حجه انا هنزل استناه ف الشارع)
(براحتك يابني عن أذنك)
قفلت الباب ف وشه...زيد نفخ بضيق ونزل قعد ع السلم ف حوش البيت
من امبارح وهوه بيلف ف الشوارع...خاف لتكون البت ماتت...والحكومه بتدور عليه
زيد كان فاق تمامآ من المخدرات اللي كان شاربها وقتها....لأنه اتعلم شرب المخدرات الجديده
(الاستروكس)
بعد ما خرج من السجن وعجبته اوي...لكنه حس بندم رهيب وهوه شايف حاله عمال يسوء اكتر واكتر
....كان زيه زي شباب اليومين دول بيرموا فشلهم ف الحياه ع.... الظروف.... والدنيا... والبخت المايل....
حجج فارغه لشباب فاشله فضل قاعد ع السلم لحد ما راح ف النوم
*******************
شمس فضلت مستنيا صخر يتصل بيها....لكنه ما أتصلش فكرت تكلمه هيه.
..لكنها خافت ليزهق منها...ف ركبت عربيتها وكانت هتروح لمدينه بدر
شافت انه من الأحسن تروح هيه وتشوف المكان وتلف فيه لوحدها الأول
لسه هتدور العربيه...لقت تلفونها بيرن...قلبها نط من مكانه لما شافت رقمه ....حطت ايدها ع قلبها
وخدت نفسها وردت
(انا قلت انك طنشت الموضوع بتاعي يا استاذ صخر)
صخر بجديه
(لأ انا ما بأهملش شغلي...انا فاضي دلوقتي يا انسه...تحبي نروح دلوقتي ولا عندك مواعيد تانيه)
(لأ احب دلوقتي فين حضرتك وانا اعدي عليك بعربيتي)
(لأ هنروح بعربيتي انتي فين وانا اجيلك)
(ماشي تمام انا قصاد الجامعه جامعه القاهره عارفها)
(عارفها...ماشي يا استاذه هكون عندك ف ربع ساعه سلام)
قفل معاها ع طول....شمس تعجبها كان بيزيد كل مادا....ايه اللي حصل له خلاه يتصرف كده
ويتعامل بقسوه مع الجنس اللطيف اللي كان مجنون بيهم....هيه فاكره كويس كلام جنه عنه
لما كانت دايما تقولها
(اخويا كويس ف كل حاجه الإ موضوع البنات ده نفسي يبعد عنهم شويه انا عارفه انه بيسهر كل يوم ف كازينو شكل ومع واحده شكل....نفسي يرحم نفسه شويه من القرف ده)
شمس عمرها ما نسيت الجمله دي لكنها مستغربه هوه ليه اتغير ...وبقي ناشف وجاف ف الكلام مع البنات
وهيه المفروض بنت جميله قصاده...شمس قعدت ف عربيتها وفضلت تسلي نفسها بالتلفون لحد ما يوصل ********************
زينه رجعت من شارع البنات ...راحت سألت حد من الجيران عن حاله قمر
واتطمنت انها عايشه لكن وشها اتشوه وخيطت رقبتها زينه كانت حزينه...مهمومه اوي..
.من غير ما تقصد ...خبطت ف راجل كان ماشي بصت له واعتذرت فورا
(استاذ ايسر ...انا اسفه اوي ما شفتش حضرتك)
(ولا يهمك يا انسه)
ايسر كان لسه هيمشي لكن زينه مسكت إيده بعفويه وقف وبص لها بأستغراب وقالها
(ف حاجه)
(معلش يا استاذ ايسر انا عارفه ان وقت حضرتك مشغول بس ممكن أسالك ف استشاره قانونيه)
(اتفضلي)
(هوه....هوه لو شاب جرح بنت ف وشها بسلاح زي مطوه...دي فيها مشكله عند الحكومه)
ايسر برق لها وقال بحده
(مشكله...بتقولي مشكله بس...طبعا دي جنايه فيها مش ااقل من 3 سنين ولو تحبي تتأكدي اقري قانون العقوبات ماده....)
زينه شاورت له بأيدها وقالت
(مصدقاك يا استاذ متشكره ع وقت حضرتك اوي)
زينه بصت له بحزن وسابته واقف ومشيت....ايسر بص لها وكان عايز يسألها
هيه اللي اتجرحت من حد ولا مين ....والسؤال الغريب دا ليه لكنه طلع ع مكتبه
لما لقاها دخلت البيت بتاعها ....دخلت زينه لقت اخوها وابوها وامها قاعدين ف الصاله
زين وقف وقالها بغضب
(كنتي ف انهي داهيه وازاي تخرجي من غير ما تقولي)
زينه فاض بيها صرخت ف اخوها وابوها
(كنت ف انهي داهيه يا زين كنت عند الداهيه اللي اخوك دمر حياتها ....ادي اخر دلعك ف ولادك الرجاله برافوا يا بابا والله عرفت تربي ...تربيه زباله)
طبعا زينه خدت ألم محترم ع خلقتها بسبب كلامها...زين مسكها من شعرها وقالها بغضب
(تربيه مين اللي زباله يا زينه انتي ازاي تتكلمي كده معانا...انتي شكلك عايزه تتربي من جديد)
لكن زينه ما خافتش منه زي كل مره نطرت ايده بعيد عن شعرها وصرخت فيه
(كفايه...كفايه بقي انت متفرعن ع ايه...ايه الغرور اللي انت فيه ده...انت من ناحيه بتمشي مع البنات وتخلي بيهم...ع اساس انك دنجوان ومفيش زيك...واخوك رد السجون بيقتل ويشوه ف خلق الله حرام عليكوا بقاااااااا....اخوك يا زين بيه امبارح جالي وخدني اضرب واحده قالي انها ضربته بالشبشب ورحت اجيب حق اخويا .....أاقوم ألقيه هوه اللي اتحرش بيها وقالها كلام زباله انا ما أقبلهوش ع نفسي ولما قلتله مش هضربها ضربها هوه بالمطوه ف وشها وشوهها .....دمر مستقبلها وهرب واديه من امبارح مجاش اخوك الدكر عور البت ورمالي المطوه وهرب سابني انا هناك لوحدي مع البت وهيه سايحه ف دمها انا برضو خفت عليه وخدت المطوه معايا وخبتها هنا والمطوه لسه بدم البنت المسكينه رحت رحت اتطمن هيه عايشه ولا ماتت عشان اخوك جاب المطوه ف رقبتها والناس جريوا لحقوها وخيطوا لها رقبتها قبل ما تموت يا زين حرام عليكوا عمركوا ما فكرتوا ان اللي بتعملوه ف بنات الناس هيطلع ع اختكم اتقوا ربنا بقاااااا انا تعبت منكم كلكم)
سابتهم ودخلت جري ع اوضتها.......زين بص لابوه وامه...وخرج من الشقه ورزع الباب وراه بعنف
************************
صخر قرب يوصل للجامعه عند شمس.... كان متضايق انه وافق ع الشغل معاها
هوه خد عهد ع نفسه ما يتعاملش مع الجنس دا بطريقه مباشره تاني ابدا
لكن شمس صعبت عليه ...أنب نفسه طول الطريق خصوصآ انها باين عليها من طريقه لبسها انها مش تمام
وصل صخر عند باب الجامعه الرئيسي...اتصل بيها
(انا واقف عند الباب الرئيسي...انتي فين)
(لحظه واحده واكون عندك انا قصادك اهوه هقفل عربيتي وانزلك)
شمس بصت ع عربيته....هوه نزل وقف جمب العربيه عشان تشوف
ولع سيجاره وبص ف الارض... هيه شافته بصت له بحقد كبير....كان وسيم وجذاب ف بدلته الرسميه
لكن شمس مش بتبص له ع انه راجل وسيم...لأ هيه شيفاه وحش .مصاص دماء .
.شيطان متجسد ف جسم راجل جذاب تعشقه اي بنت من بنات حواء.....
.شمس حاولت تبتسم وراحت عليه ....شافها قرب منها ومد ايده يسلم عليها من باب الذوق
مش اكتر سلمت عليه وقالتله
(نمشي)
(يلا عشان عندي مواعيد تانيه)
شمس كشرت بخيبه امل... يعني هوه مستعجل اوي انه يخلص معاها
ويسبها ويمشي ....المهم ركبت من غير ما تعلق ع كلامه....
مشي صخر ف طريقه لمدينه بدر ابتدت هيه الكلام بجديه
(دلوقتي هنروح ع هناك وحضرتك بخبرتك هتشوف لنا موقع كويس عشان يكون مكان المول....وهتعمل لي ماكت وميزانيه البنا....وانا هعمل دراسه جدوي شامله للمصاريف كلها ويمكن اطلب مساعده من حضرتك ممكن ولا فيها مشكله)
صخر بص لها ورمي السيجاره ...فكر شويه وقالها بجفاء
(انتي طلباتك كتير يا انسه...عاما هشوف لو وقتي سمح هبقي اساعدك بس كفايه طلبات انا شغلي ابني لك المكان زي ما انتي عايزه لكن اكتر من كده مش شغلي)
شمس اتضايقت اوي.....بصت له وماعلقتش....صخر كمان ماقالش حاجه تاني
كمل طريقه وهما الاتنين ساكتين
********************
بدر وقفت و مسحت دموعها قبل ما تد خل ع اختها اوضتها
دخلت لقتها قاعده ع سريرها وساكته خالص... قربت قعدت جمبها ع السرير
وحطت ايدها ع دراعها ...وقالت لها
( وبعدين معاكي يا قمر هتفضلي قاعده ساكته كده طب عيطي... الطمي.... اندبي حتي ....بس بلاش تسكتي كده يا اختي)
قمر بصت لها ومدت ايدها رفعت المرايا بصت فيها نزلتها تاني جمبها
بدر لسه هاتتكلم قمر قالت لها
(خلاص مفيش حاجه تتقال ....اخرجي وسبيني يا بدر لو سمحتي ...انا عايزه اقعد لوحدي عشان خلاص اتكتب عليا الوحده طول عمري ....قبل كده كنت بقنع نفسي ان اللي هايتجوزني ها يشوفني حلوه لكن.... خلاص يا بدر حتي الامل دا مات نهائي دا قدري وانا مجبره ااقبل بيه يعني لو عيطت...... لو صرخت..... لو قمت دلوقتي ولعت ف نفسي.... ايه اللي هيحصل يعني خلاص والنبي سبيني انا بس مش عايزه منك غير انك تستحمليني يا بدر....... عشان انا مش هخرج من البيت تاني الا ع تربتي....... انا مش هقدر اشوف الخوف او القرف والاشمئزاز ف عيون الناس ليا ......دا قدري الاسود يا بدر انتي بكره ارجعي لشغلك عشان نقدر نعيش...... وانا من ناحيتي مش هطلب منك اي حاجه ليا ابدا...... يلا سبيني لوحدي لو سمحتي)
بدر طبطبت عليها ....وسابتها وخرجت كانت عايزه تهون عليها لكنها ملقتش اي كلام مقنع تهديها بيه
**************************
زيد لقي اللي بيهزه يصحيه ....قام مفزوع لقاه اسامه صاحبه
اسامه قاله
( ايه يابني مالك اهدي انت نايم هنا ع السلم لييه)
زيد بص له وقاله
(ميسي اناواقع ف مصيبه كبيره ....فاكر واحنا ف السجن انت قولتلي ايه.... قولتلي اعتبرني اخوك لو عايز اي حاجه بعد ما تخرج من هنا ابقي تعالي لي... صح وانا واقع ف مشكله اهلي طردوني.... اتبروا مني يا صاحبي.... و مش لاقي مكان اعيش فيه.... ساعدني يا ميسي وهيبقي ليك عندي واحده )
اسامه طبطب عليه وقاله
( انا عارف احساسك دا كويس.... انا كمان اهلي واخواتي اتبروا مني ....مفيش غير امي هيه اللي فاتحا لي.... بابها تعالي وهشغلك معايا ف المستشفي)
زيد( مستشفي ايه هشتغل فيها ايه يعني)
ميسي( هتشتغل معايا ف النضافه يا زيد)
زيد برق اوي وقاله
( نضافه انا ع اخر الزمن اشتغل بتاع زباله )
ميسي بص له اوي وصرخ فيه
( اومال فاكر نفسك هتشتغل ايه وحياه امك ....ياض احنا اللي زينا رد السجون محدش بيرضا يشغلهم عنده.... احنا ف نظر الناس زباله المجتمع ......هنعمل ايه يعني نرجع للسكه الزباله الشمال عشان نعيش .....ولا نشقي ونعيش بنضافه ....اسمع يا زيد انت لو عايز تعيش بما يرضي الله تعالي اشتغل معايا .....وهلاقيلك حته تبات فيها.... لو مش عايز تعيش بضمير وتشتغل زي الناس.... انت من سكه وانا من سكه وكفايه اوي الوساخه اللي عشنا فيها ودخلنا بسببها السجن.... وضاعت سنين من حياتنا هدر... هااا قولت ايه )
زيد بص له وفهم من كلامه ان الشغلانه دي مش هتحتاج اوراق ولا فيش وتشبيه
ف اضطر يوافق عشان ما يتشردش ف الشارع
يتبع ف الحلقه 7 ........
