وردة
احس حياتي واصلة لمرحلة نهايتها مجهولة بالنسبة اليه كلبي رافض بشكل قطعي اي علاقة جسدية من اي نوع . بعدني مشتاقة حيل لفاروق مشتاقة لحنيته مشتاقة لحظنه حيل . اني تورطت اكبر ورطة بحياتي من قررت ارتبط بليث .اكتشفت بس متاخر بانه انسان اناني وحقير .
مرت ايام واني اتجنب ليث والهي نفسي بالشغل وبالاطفال . ...يوسف متفوق بالمدرسة وجابلي شهادته درجاته كلش زينه . حنين يوم عن يوم تحلى وصايرة دلوعة وتدلل هوايه وتغار من علاوي من تشوفه بحظني تذب روحها بحظني وتكوللي لعد وين مكاني ليش ماتخذيني لحظنج ماما واني ابوسها واشيلها بحظني واعوف علاوي .
بالليل نيمت الجهال بغرفتهم وصعدت فوك لغرفتي وبحظني علاوي حتى انيمه ...دخلت لغرفتي فززني المنظر ليث كاعد بصالة غرفة النوم وكدامه قوطية يمكن بيرة وماعون جرزات وكاعد يشرب ويقلب بالقنوات .....مابقى عقل براسي اقتربت منه
_هاي شنو ليث اشداتسوي ؟ اشلون كاعد بكل اريحية وجماله تشرب ترة خاف ربك هالبيت بيه اطفال صغار .
ليث _ اشبيج كبرتي الموضوع بعدين الجهال نايمين وعلاوي بعده صغير مادايفتهم .
وردة ،_ اشمعنى بغرفتي ماتروح تشرب بغرفتك .
ليث _ هيج عاجبني اسهر ويا مرتي
وردة _ هذا من كل عقلك داتحجي
ليث _ اي من كل عقلي وبعد مااريد اسمع كلمه من عندج .افتهمتي لو لا ؟
سكتت وماجاوبته خليت علاوي بفراشه حتى ينام جان نعسان والساعة صارت عشرة ونص
واخيرا نام علاوي .دخلت الحمام فرشت اسنوني وغسلت وجههي وطلعت ردت ادخل بفراشي اريد انام صاح من يمه
وردة _ وردة روحي جيبيلي شوية فاكهة من الثلاجه جوا . انداريت عليه واني اباوعله والحقد مالي كلبي خزرته .....بعدين نزلت مااريد اسوي مشاكل بهالليل خليت الفاكهة بماعون واخذته خليته كدامه على الميز وبسرعة لزم ايدي
ليث _ تعالي كعدي يمي شويه نحجي .
جريت ايدي بسرعة
وردة _ اني نعسانه وتعبانه رجاءا ليث عوفني لخاطر الله .
توجهت للجرباية و اتمددت على طرف السرير واتغطيت بالبطانية .
واني بعز النوم حسيت بايدين تسحبني لاحضانه تملكني الخوف احاول افلت ومااكدر محاوطني بايدي قوي مااكدر اتحرك .....شويه وحسيت بانفاسه انتظمت اطمئنيت هو يمكن نام حاولت ارجع للنوم ماكدرت .
الصبح فتحت عيوني بعده ليث مكلبجني بايديه
ظهري ملاصق لصدره مااكدر اتحرك حتي رجليه مخليه بين رجليه ا. ياربي اشلون اكوم .
وردة _ ليث ...ليث ...عفية اريد اكوم .....
اتحرك شويه ...
ليث _ خلينا نايمين ..
حسيت بيه دفن وجهه بركبتي جسمي كله يرجف منه ....اريد افلت مااكدر
وردة _ ليث اريد اروح للحمام .
طبع جم بوسه بركبتي وشمشم شعري وبعدين ابتعد شويه شويه وعافني . كمت بسرعة ودخلت الحمام .
ومن طلعت لكيته بعده نايم ... على بطنه ...باوعت علاوي بعده نايم .. الساعة ثمانيه ....ياه.. الدوام بعدين اتذكرت اليوم جمعة ارتاحيت شويه ونزلت جوا ..عمتي بالمطبخ داتحظر ريوك ....شافتني ابتسمت وكالت
_ صباحية مباركة عروستنا جيت الصبح اشوفج اسفة مادكيت الباب عبالي وحدج ...شفتج بحظن ليث طلعت بسكوت . ربي يسعدكم .
ضاق صدري بكلامها احس بيها سجينه وانغرس بس ماردت اضايقها جاوبتها والغصة ببلعومي
_ تسلمين عمه
حظرنا الريوك ...دخلت سارة المطبخ وهي لازمة ايدين يوسف وحنين .......ماصار شويه والا دخل ليث وبحظنه علاوي .....وهو يكول ومتعمد يسمع امه الحجي
_ نازلة وعايفه علاوي ماخلاني انام كايم من النوم ويبجي . هاج اخذيه اروح اسبح .
اقتربت منه ومن اخذت علاوي بحظني كرصني خفيف من خصري وهو يغمزلي بعينه .
اني اتخبلت بالزايد ياربي هذا ليش هيجي يسوي بيه .
العصر طلعت لغرفتي حتى انظفها من الوساخة اللي جان مخلفها ليث وراه اخذت علاكه وخليت بيها القواطي والزبل .....انداريت شفت علاكه بيضة على الجرباية ....اتقربت فتحت العلاكة بيها ثوب ووورقة ...باوعت على الثوب جان ثوب نوم شفاف وقصير لونه احمر . ....مديت ايدي للورقة قريتها مكتوب عليها ( هذا الثوب لبسيه هاي الليلة يخبل عليج لبسيه واتحظري اجي اشوفه عليج )
قريت الورقة وطويتها بيدي وخليته بالعلاكه ويا الثوب وذبيته بسلة الزبالة الموجودة بالغرفة .
نزلت جوا وتلكاني ليث على الدرج ابتسملي ابتسامه خبيثة وكال
_ عجبتج هديتي اختاريتها بنفسي وتخيلتها عليج .
_ روح استلمها بسلة الزبل ترة ماعجبتني ابد .
خنزرني وعكد حواجبه ولزمني من زندي
_ تلبسيها اذا مو اليوم باجر . ردت انزل جان لازم زندي قوي سحلني من زندي وراه ......وصلنا الغرفة فتح الباب ودخلني ودفعني جوا .
_ انتي ماحد مالي عينج شنو هالصلافة والراس اليابس . كمت من مكاني ووقفت كدامه .
_ عبالك بهاي تصرفاتك راح تفرض رايك عليه وتسيطر ترة اني لحمي مر وراح تتعب هوايه .
ضحك وكشر عن سنونه
_ اي بعد بعد طلعي لسانج وسمعيني صوتج .
يلة بسرعة حظري روحج راح اطلعج ويا الاطفال نتعشى برا خطية الاطفال من زمان ماطالعين
_ علاوي راح انيمه ورا شويه انت اخذ حنين ويوسف اني ماعندي خلك .
_ اني مااعرف شلون ماتضوجين ماعندج طلعات بس البيت والشركه
_ اني مرتاحة هيج ٠
_ بس اني مامرتاح لتصرفاتج هاي ياولي شويه احساس شنو هالبرود اللي عندج .
ماجاوبته اكتفيت اتوجهت للباب وطلعت .
ومن رجعت حتى انيم علاوي شفت ليث نايم بالفراش ومتغطي .
