(ذهب)

البارت الاول

ويا هلا بالحلوين
شلونكم
ورجعتلكم والبارت الاول من طوگ الذهب
خلي نتفق من البداية ع طريقة النشر
راح تكون كل يومين بارت
احبكم🌼
واتمنالكم قراءة ممتعة
******

أنا ابن زلمة شسولفلك عليه
من يگلك راح اصيد اعتبره صاد
روحوا گلوله السوالف مالتي
طبعي تفگه وما اثني حجايتي
الواگف اعلى النهر لا يحچي بغرور
الصارن بگونيته من سنارتي
طبعي حاجب فوگ كل عين انا اصير
وما احب الريش چفي وسادتي
انا شابع منها وي طرة الشفاگ
الاكل من بعدي شبع بفضالتي
امي من جابتني متنسية بمضيف
الماشبع من زاده اشوفه نساوتي
الذيب من رافگني يدريني ذيب
هناك صوب البر اسوي سوايتي
بيه عفة ذهب ماخاوي الرخيص
غالي وبسوگ الذهب شرايتي
لحگوا اعلى الضال انا الكاس الجبير
ينعدل راسه اليحصل وشالتي
من ارد اصاحب الگط المتروسة ماي
البيها لچعة من الشمس مو مالتي
الابرة ماعافتني چي تدريني خيط
بيه ينشل كل فتگ وبراحتي

علي المنصوري
***

ــ گللللوووووووش
ــ ها بشري ام علي
ــ ابشر يبو غايب اجتك بت مثل فلعة الگمر
ــ محمود مشكور ربي على نعمتك خليتني اشوفن ذريتي گبل ماموت
ــ تعال تعال ادخل يم مريتك
ــ ها ام غايب الحمدلله عله سلامتج
ــ الله يسلمك ..شوفهه شلون حلوه.. بيضة وشگره وشعرهه بلون الذهب
ــ ذهب ..بنيتي سميتهه ذهب

انا ذهب وصدگ من سماني
وحيدة اهلي..
احنه عايلة ع گد حالنه
ابوي فلاح يشتغل ابيت شيخ السلف وامي من بغداد بس تعلمت على عيشتنه وتطبعت بأطباع القرية وجانت عدنه گاع زغيرة گبال بيتنه تزرع بيهه امي ومعتنيه بيهه ومربيه بيها حيوانات
حباهه ابوي وخذاهه واهلهه جانوا ماراضين وهي دگة رجل ما تاخذ الا ابوي ..تزوجته وتبروا منها اهلهه ..عمامي هم جانوا ماراضين على امي بس ما يگدرون يتبرون من ابوي بس ضلو عمامي معادين امي ومايحبونها
امي جانت زغيرة وحلوة ونسوان عمامي كلهن يغارن منها وابوي تزوج جبير بالعمر وضلت امي 15 سنة ماحبلت ولگوها حجه عليهه عمامي يگلون لبوي اتزوج وشوف ذريتك لا تضل عليهه ونسوانهم يعيرن بامي لان ماتحبل وهنه كل وحدة عدهه ستة وسبعة ليگول فريق طوبة
بس ابوي جان يحب امي كلش وماقبل يحط فوكاهه مرة ووره 15 سنة حبلت امي وابوي جان طاير وحار شسوالهه ماخله شي بنفسهه رغم حالته مو زينة بس مامقصر وياهه
جان ابوي متأمل يجي ولد يشيل كبرته بس خابت اماله واجيت انا ع الدنيا بس ماضاج ابد بالعكس جان يحبني ومدللني
جانو يسمونه ابو غايب لان ماعنده ضنه ومن اجيت انا هم ضلو يصيحوله ابو غايب لان بالقرية عدهم لبنيه ماتنحسب ضنه ومايسمون الرجال بأسم بته حته لو جبيرته بنية
جنت اشبه امي
امي حلوة وبيضة وشگرة وانا طلعت عليهه بس هي دايما تگلي انتي احله مني
سماني ابوي ذهب لان حلوة وشعري بلون الذهب وهم لان انه غاليه بغلاة الذهب عده مامنعني من شي حته مدرسة دخلني وتعلمت اقره واكتب وجنت شاطرة واحب العلام
كبرت بسرعة وصرت صف سادس ابتدائي بس ليشوفني يگول بت ال18 شكلي اكبر من عمري بهواي وكل البنات لوياي بالمدرسة يغارن مني
جنت اكره عمامي كلش لان من زغري وانا اشوف اذيتهم لامي ومن يطيح ابوي بشدة لو يحتاج شي مايساعدونه بحجة انت تزوجت من غير رضانه
كبرت وكبر هالكره وياي حته ولدهم ورثو هالطبع منهم ومن شافوني كبرت ضلو يدخلون بكلشي يخصني لبسي طلعتي روحتي للمدرسة حته حجاب حجبوني وانا بعدني بالابتدائية جنت دايما اتعارك ويه ابوي لان مايدخل ومايحطلهم حد واگله انته مو ابوي ليش همه يدخلون بيه اكثر منك وجان رده عليه دايما انتي وحيدة وماعدج اخو يحميج وذول حماج من بعدي
امي جانت ماترضه عله تصرفاتهم بس ماتكدر تردهم وابوي راضيلهم
ابوي كبر وتعب وهده المرض وحته من بيت الشيخ بطل وضل مايكدر يشتغل بس الشيخ ماكطع راتبه وقدر تعبه وياهم كل هالسنين وضل راتب ابوي يمشي وهوه كاعد بالبيت
واستغلو عمامي ولدهم مرض ابوي وزاد تدخلهم بحياتنه وانه كل يوم كرهي الهم يكبر اكثر
لحد ما يوم جنت راجعة للمدرسة وامشي بطريقي ابحدي صاحبتي الوحيدة لتروح وتجي وياي غايبة اليوم وجان لازم امر بين البساتين حته اوصل
جنت امشي ابحدي واهيس خطوات وجن واحد يمشي وراي سرعت مشيتي ومالتفتت ضليت امشي حيل وخايفة انه مو من طبعي اخاف وحته ولد عمي من يحاجوني اردهم وماسكت ودايما يعيرون ابوي ويكلوله بتك لسانهه طويل ومامتربيه
بس هالمرة خفت لان جانت ظهرية والبستان فارغ سرعت مشيتي اكثر وكلما امشي بسرعة هوه هم يسرع مشيته لحد ما بقيت اركض ركض مامشي واهيسه يركض وراي
لحد ما جراني حيل من ايدي وطبگني ع جذع نخله جبيرة صرت بينه وبين النخلة
اباوعله واحد اجلح املح كاتلته الشمس وريحته تكتل لعبت روحي ردت ازوع يباوعلي وعيونه حمر
ــ وين گاصدة يحلوة هلج مايخافون مطيرين هيج طيرة بين البساتين
ذهب: ميل مني انته ياهو وشتريد
ــ اريدن اضوگ العسل واحسن بطعمه
خفت كلش من حجيه وشكله بس ماردته يعرف بيه خايفة حته لا يستفرد بيه خزرته وحجيت: ميل مني لا اصرخ والم عليك العالم
ضحك وبينت سنونه صفر وشكله يخرع
ــ هوه ياهو اليطلع بهالظهر لاحمر ماتشوفين البستان يصوصي خلينه نتونس شبيج
تگرب عليه وغمضت عيوني حيل وما حس غير صوت الطبة الصارت وهدني الزلمة الجان كاضبني
فتحت عيوني شوي شوي وانا احس دمي نشف
شفت الزلمة مجطول بالگاع ودمه بطوله وابن عمي الجبير واگف ع راسه وبيده توثيه شكبرهه
حجيت بصرخة: يااا فلك طرك شسويت
خزرني ونوب باوع ع الزلمة ودفره من الگاع وخره من الطريق وعتاني من ايدي حيل وانا اسح بروحي منه مااريد اروح ويا
ذهب: هدني انته شبيك مخبل
سند: امشي لا اخلي لبرجلي يهلهل عله راسج بالعباس
مشيت ويا گوه وانا ماطايقته دفر باب بيتنه برجله وطلعت امي تركض وشمرني عليهه
نسيمة: ياا سودة عليه شبيج ولج ليش جايبج هيج
سند: ام غايب گضبي بتج لا وابو فاضل اسوي بيهه عمل
نسيمة: شبيهه بتي شمسوية
صرخت وانا بحظن امي: ما سويت شي هذا المسودن طگ الزلمة براسة وخله دمه بطوله
سند: ولج دفنتج حلال وعلي
گالها واجه يريد يهجم عليه وامي خلتني وراهه بسرعه وحجت: ولك عوفهه غير افتهم شبيكم
طلع ابوي عله صوتنه كاضب عوجيته وايده الثانية ع الحايط يتجي بيهه
حميد: هااا عمي سند شجرالك صوتك شعلوه
سند: عمي اگضب بتك وگعدها يمك لا تطلع بعد واذا شفتها طالعة احش جدامها
ذهب: اي مو هوه بكيفك
سند: خايبة اسكتي لا تكشخلين عليه لا اجي اسحلج
حميد: نسيمة اخذي بتج وفارجي
عتتني امي كوه دخلتني للحجرة وانا مارضة اروح ادري بس يستفرد بأبوي يگلب السالفة كلهه ويوز ابوي عليه
بقيت واگفة وره باب الغرفة وتسمع عليهم
حميد: هسه احجي وفهمني شبيك ويه ذهبه
سند: عمي بتك تمشي بين البساتين بالظهرية وثوبهه يلالي بالشمس والفلح تتطمش عليهه اليوم لكيت واحد حاصرهه ربك عبرت وشفتهه جا الله العالم شصار
حميد: انا ابوج يذهبه شلون ولك ياهو هاذ ماعرفته منين
سند: لا ولله غريب مو من سلفنه بس هبدته بتوثيه وخليت دمه سايح
حميد: تسلم البطن الشالتك رجال طالع من ظهر رجال
سند: اسمع عمي البت كبرت ومن اليوم ماريد اشوفنهه تفتر بالسلف وسالفة المدرسة والعلام خل تنساهه
حميد: هاي هيه بويه الدنيا ما تتأمن بعد ماكو مدرسة
سمعت رد ابوي وتخبلت فتحت الباب ردت اطلع وامي گضبتني من ثوبي
نسيمة: وين مولية اگعدي لا تصخميني ولج
ذهب: ما تسمعينه يمه يريد يبطلني وخري مني لا احرگ روحي
نسيمة: اگعدي خايبه مابينه حيل طلايب ابوج مريض اگعدي
بقيت الوب واكل بروحي وامي كاضتني گوه علما شفته طلع وانا ابدي اكله بسنوني
فتحت الباب وركضت ع ابوي
ذهب: بويه صدگ تحجي عود تريد تبطلني
حميد: كافي ذهب گعدي بالبيت وسكتي وانسي المدرسة
ذهب: بويه اريد اتعلم ماريد اكعد
حميد: ذهب لا تخليني اتندم لان انطيتج عين گتلج سدي هاي السالفة وانسيها الله ستر اليوم وابن عمج شافج الله يعلم شيصير بالجاي
بقيت ادگ وانوح ماريد اگعد بالبيت اريد ارجع المدرستي واتعلم وامي تصبر عليه
دخلت عليه للحجرة لكتني كاعدة وابجي
نسيمة: كافي يذهبه راحن عويناتج من البواجي ولج بسج
ذهب: يمه حاجي ابوي فدوة اروحلج ولله ماريد ابطل
نسيمة: ولج شحاجي يايمة مو زين الزلمة الطگا ابن عمج خاف وسكت وماكبر السالفة وجاب عشيرته ولج نصير دماية يخايبه ستري عليه وكعدي العلام اليجي من ورا طلايب مانريده
ذهب: بس انا اريده يمه
نسيمة: كومي يمه كومي غسلي هالوجه الحلو وكومي نسوي عشه ابوج جوعان
گمت ويه امي وانا كارهه روحي وكارهه الدنيا الخلتني ضعيفه ومالي ظهر وياهو اليجي يتحكم بيه
عفت مدرستي وكعدت بالبيت وامي صارت تعتمد عليه بكلشي وتعلمت انظف واطبخ وكلشي اسوي علما صرت انا الشايلة البيت وامي التهت بالكاع والزرع
ويوم عن يوم ابوي يتعب بالزايد ويهلكه المرض
وكلما اكبر يزيد تدخل ولد عمي بيه كرهوني بروحي وبعيشتي
لحد ما اجه ذاك اليوم الي تركنه بي ابوي وراح الدار حقه وخلانه انا وامي نحارب بهالدنيا وتسطر بينه من كل مچان
امي جانت خايفة الشيخ يگطع راتب ابوي عگب مامات بس طلع اصيل وقدر العشرة وخله كلشي مثل ماهوه
عمامي طغوا وزادوا وماخلونه بحالنه ابد حته الگاع لگبال بيتنه لامي فنت عمرهه تزرع وتعدل بيهه طمعوا بيهه وهي مالهه قيمة لان زغيرة كلش بس حلت بعينهم وخذوهه
بيومهه امي تخربطت وكلش اختاضت عله گاعهه بس تبقه مرة لا حول ولا قوة وماتگدر تحجي شي
كلشي يسوونه عمامي ويانه يزيد كرهي وحقدي عليهم تمنيت الله خالقني رجال واوگف گبالهم وماخلي امي بالذلة والمهانة
وانا زغيرة اشوف بيت الشيخ من بره
واتمنه ادخل واشوفه من جوه جنت دايما اسأل ابوي عليه واخلي يسولفلي عله شكله من جوه لان هوه جان يشتغل بي وشايفه
جان بيت جبير وعالي جنه قصر مبني من طابوگ مو مثل بيوتنه من طين ومبين من بعيد من بين كل بيوت السلف
كبرت وانا اشوفنه من بعيد واتحسر واگول شيصير لو الله خالق ابوي شيخ وعده هيج بيت واصير انا بت الشيخ ومحد يكدر يمشي حجايته عليه
مشت لايام بسرعة وعمري صار 18 سنه وكلمن تجي لامي وتشوفني تضل فاكه حلگها عليه والنسوان تتخطبني بس ياحسرة المنحوس يبقه منحوس
سند مسوي روحه يحبني ويريدني وانا اعرفنه كلش زين ماحباني بيوم بس يريد يكسرني ويخليني جوه رحمته لان انه اعانده دوم وكل قسمة تجيني يخربهه ويگعدني صرت اشوف دم اسنوني بس ماشوفه كرهته كره العمى
حلفت واخذت عهد عله روحي اليوم الي يجبرني بي سند عله الزواج منه اصب عله روحي نفط واحرگ روحي واخلص من هالدنيا الگشرة وماصيرله مرة
جان عدي ثنين عمام عمي ابو سند وعمي ابو غازي
مرت عمي ام سند جانت تكرهني وتكره امي ودايما تعير امي لان ماعدهه بس انه وهي خلفتهه كلهه ولد
وكلما تشوفني تبقه تتگلب عليه وتحجي سند وسند وهوه سند واحد مخربط سكير يومية راد يطوطح توالي الليل
تحجي وعبالك انه كاتله روحي عليه ومسوي عليه فضل يريد ياخذني ماتدري بيه انا مااطيق اشوف جهرته
وبيوم دخلت علينه ام سند تبجي وتولول وتدعي وتعد وتسطر نريد نفتهم شبيهه ماكو
سعدية: يبووووووي وينج ام غايب لحگيني خيه
نسيمة: ياستار ياربي شصاير گومي ذهبه يمه فتحيلهه الباب
ذهب: ختولي يمه ختولي عوفيهه بلكي تصگعهه الشمس وتموت ونخلص
نسيمة: ولج گومي فتحي الباب للمرة عيب
گمت وانا ادردم واغلط عليهه وعله ابنهه ورجلهه ع الواهس
ياربي كون كرف اليكرفهم كلهم ومايخلي واحد بيهم اووووف ياضيم گلبي
فتحت الباب وحجيت: هااا خاله ام سند شبيج
دفعتني ودخلت
ام سند: تميلي من دربي خايبه ميلي... يبوووووي خيه ام غايب
ذهب: يا مال السطر انشالله
طلعت امي من الحجرة وتلگتهه: هلا بأم سند خيرج خيرج شمالج تصرخين
ام سند: لحگيلي خيه ام غايب زلمتي تسودن عله كبر جايبلي فرخه جويهل جوه اباطه ويگلي عرست عليهه ولج خيه دبريني شسوي
نسيمة: ياااا صدگ عود
ام سند: اي خيه صگد صگد ولج خيه نااار وشابه بصدري بوويووووي كون اكضنهه هاي الجايبهه وانتف ريشاتهه
نسيمة: اهدي خيه اهدي مو زين عليج لا يرتفع ضغطج
ام سند: ياااع غدي وانا منين اجاني الضغط كلشي مابي
ذهب
گبر كون اي ولله حته گبر حل عساج بهالحال وارده
ام سند: اووووف ولج يمة لحگيني انهجم بيتي يمة
نسيمة: تعاي ذهبه يمة جيبي ماي الخالتج خل تشرب
عبرت من يمهه ودخلت للمطبخ جبت كلاص ماي وانطيته الهه: تفضلي خاله
نسيمة: اهدي خيه ام سند ميخالف كعدي ابيتج ولا طلعين وتخلين الجديدة تسرح وتمرح براحتهه
ام سند: يااع ترديني اردله ماارد بالعباس وتحرم عليه دشة ذاك البيت هاي كعدتي وماتحرك
ذهب
فگرنه هذا غير اللفاج علينه
بقت لليل عدنه وما سكتت ولا گطعت ابد راسي صار هالكبره منهه كلساع اريدن اهدن عليهه وامي تگضبني لو بيدي احط طابوگه براسهه واموتهه
گمت من يمهه ورحت يم امي بالمطبخ
ذهب: ولج يمة بعد ماتحمل لو انا لو هاي بالبيت راح افتح الباب واهج
نسيمة: ولج حبيبة سكتي.. عيب المرة خطار عدنه
ذهب: ولج ياخطار يمة ياخطار احنه الخطار وهي ام البيت من الصبح الهسه بس تتأمر عبالك خدامة الخلفوهه شيلي هاذ وحطي هاذ
نسيمة: ميخالف حبيبة تحملي اكيد باجر لو عكبه يجون عليهه رجله لو واحد من ولدهه ويرجعونهه
ذهب: شلوووون ترديني اتحملهه العكب باجر اطك واموت ولله
اجانه صوتهه من الحجرة: شعدجن بالمطبخ تتبسبسن وعايفاتني لوحيدي
ذهب: هسه مو مال واحد يروح يبتلي بيهه
نسيمة: اشششش تأدبي وروحي كعدي يم المرة علما اكمل عشة
تعشينه وحطت راسهه وانطمرت وگضه اليوم عله خير وماحطيتهه خطيه برگبتي
وكعدت ثاني يوم من فجر الله ع نفس الرنة
وانه گوه جارعتهه علما صارت الساعة ب8 الصبح انفتح بابنه ودخل سند
و انا احس اجاني الفرج اول مرة افرح بجيه سند النه بالعادة اغمنه من الباب بس اچهبه جاي
سند: صبحكم الله بالخير
نسيمة: هلا يمة هلا بيك تعال اكعد اكعد
يحجي ويه امه وعينه عليه: شلونج يمه
ام سند: وصمة حته صمة وين جنت وانا من البارحة هنا ومحد چهبني لا انت ولا اخوتك
سند: شني سالفتج يمة زغيرونه وتزعلين
ام سند: كون الغسل اي ولله دسكت اسكت جا ماتروح تكل لابوك زغيرون ويعرس
سند: دكافي يايمة اكصري الشر وكومي وياي ارجعي البيتج
ام سند: حلفت مارد چا يعرس عليه ويريدني اردله خوش ولله
نسيمة: ميخالف خيه ام سند انتي الجبيرة وام البيت ليش تخلين غيرج ياخذ مجانج
سند; اسمعي الحجي يمه وكومي لا تخلين غيرج يسرح ويمرح
ام سند: ياااع غدي... ولكم شلون اردن وانا مختاضه منه وهوه حته مانشد عليه
اتعصب سند وضل ينافخ.. اندارلي وحجه: جيبيلي ماي ريگي نشف
رحت للمطبخ وانا ادردم ياهو گايللهم خدامة الخلفوهم انا بس يامرون عليه
جبت كلاص الماي ومديت ايدي: هاك
اخذه مني وحجه: الناس تكول تفضل
ذهب: حته لو كلت تفضل تره الماي يبقه نفسه مايتغير طعمه
طگ الگلاص من ايدي ونرگع بالگاع وتطشر الگزاز
عطت بي حيل: وعمه شبيك مسودن
صارت عيونه بگصته وگاملي……

يتبع....

رحيل القوافي
raheel997