(ذهب)

البارت الثالث

ام غازي: ولله يا ام غايب شگلج ماقتنعوا بالفلوس يردون ياراس سعد يافصلية
نسيمة: يمة صخام فصلية
ام غازي: اي ولله وبعدهم الزلم محتارين ومايدرون شيسوون خذو عطوه منهم 3 ايام يفكرون بيهه ويردولهم خبر
نسيمة: الله يسترنه وتعدي عله خير
ذهب
سمعت حجيهن وبقيت صافنة ماجنت متوقعة السالفة هيج تكبر وتوصل لهذا الحد
رغم عايشين بالقرية بس ماعرف شلون يعني لبنية تروح فصليه سامعه بيهه گبل بس ما سائله ولا مره عن هالسالفة
طلعت من المطبخ وشفت امي
نسيمة: ها يمة خلصتن شغل
ذهب: اي يمة خلصنه
نسيمة: امشينه ندگ راسنه شويه ورانه كعدة من الفجر
ذهب: وين انام يمة
نسيمة: فرشتلنه ام غازي بغرفة سعد تعاي
دخلنه الغرفة سعد انه وامي جانو فارشيلنه بالكاع ذبيت روحي ع المندر وامي هم لفت شيلتهه عدل وتمددت
ذهب: يمة ذبي شيلتج محد يمنه
نسيمة: لا يمة ماارتاح خاف احد يدخل علينه مايدري بينه هنا
درت عله امي رفعت راسي وانتجيت عله ايدي وانه متمددة: اكلج يمة
نسيمة: هاا
ذهب: سمعت خالتي ام غازي تگلج يردون فصلية شلون يعني الوحدة تروح فصلية
نسيمة: شلج بهالحجي هسه نامي ومالج شغل بسوالف لكبار
ذهب: شالقضية يمة جا انه زغيرونه فدوة اروحلج كليلي شني يعني فصلية
نسيمة: يعني وحدة من البنات ياخذونهه ويزوجونهه الواحد من ولدهم
ذهب: الله يمة جا ماتنطيني انه ولله موافقة اخذ شيخ واخلص من سند
كامت امي خزرتني وطگتني ع راسي حيل
نسيمة: انجبي وبالج اسمع هالحجي عله لسانج مرة ثانية الف سند ولا تروحين فصلية
ذهب: اي ليش يمة غير تزوج والكاتل منهم سعد شيوخ يعني ولدهم كلهم شيوخ
نسيمة: خايبة وانتي عبالج الفصلية ياخذهه شيخ ويدللهه لا يمة الفصلية مذلولة تكوم بكفخة وتكعد بكفخة هاي اذا مازوجوهه الخادم عدهم لو كهوجي وخلوهه طول العمر خدامة الهم
ذهب: يااا جا لا ماريد
نسيمة: انخمدي بسج وعوفي هاي السالفة
حطت راسهه امي ووره شويه سمعت شخيرهه وانه بقيت كاعدة افكر بالسالفة معقولة الحجي الكالته امي صدگ شلون اكو ناس هيج يذلون بنيه مالهه ذنب بالسالفة بقيت افكر وراسي موتني علما غفيت وماحسيت بروحي
كعدت عله صوت امي تصلي الفجر وانه بعيوني النعاس رجعت غفيت وكعدتني امي من خلصت صلاة
نسيمة: ذهب يمة ذهب يلله گومي صلي وگومي ع حيلج هم يالله نسوي ريوگ ولج ذهب گومي
ذهب: هاا يمة هااا خليني شوي نايمة بعد
نسيمة: خايبه كومي
ذهب: كمت يمة كمت
كمت لميت شعري وانه اثاوب ولميت فراشاتنه وطلعنه من الغرفة واشتغل الكرف وطيحان الحظ سلموني العجن والخبز اليوم وهمة عشيرة لو اعجنلهم بطشت مايكفي ويردون الخبز حار الوجبه بوجبتهه عجنت للريوك ووره ساعة طلعت اخبز وره البيت
سمعت باب البيت انفتح ودخلو بيت عمي ابو سند ولدهم وجناينهم والعكروكة ام سند
لجحني سند اخبز واجه يمي
جنت منسفة رداناتي وشايلة ثوبي حاطته بملابسي الداخلية وذابه شالي
شافني وعاط: استري روحج ولج
ذهب: شني شمالك تصيح من الصبح گرصك عگرب
سند: خايبة نزلي ثوبج لا اجي احط راسج بالتنور
نزلت دشداشتي وحجيت: يلله نزلته فارج
سند: انتي ليش ماتحترمين
مديت ايدي بالتنور شلعت الخبزة وحجيت :من تحجي عدل احترمك
بعده يريد يحجي واجت امي: ها ها شبيكم عرايك من الصبح يلله ذهبه خفي ايدج الوادم تريد ريوك
خزرني ودار وجهه وراح
ذهب: خاب امداااك روحه بلا رده
نسيمة: ولج ذهب السانج
ذهب: يمة سكتي مني لا اذب روحي بالتنور بالعباس
نسيمة: اووووف منج هوه انه اگدرلج
لمت الخبز الطالع خذته وراحت وكملت انه بسرعة وطفيت التنور ودخلت
تريگوا ولمينه لماعين غسلناهن انوب اجت هوسة التنظيف والغدة
ضلينة عله هالحال 3 ايام واليوم اخر يوم وتخلص العطوة لانطوهه بيت المكتول يا نسلمهم سعد يا نقبل نطيهم فصلية
كعدت الصبح وانه لعبانه روحي من الوضع تعبنه انه وامي كلش بهال3 ايام شكد جنت اضوج من شغل بيتنه بس هنا اشتغل مثل شغل بيتنه عشر مرات
امي عدلت شيلتهه تريد تطلع التفتتلي وحجت: يلله همي روحج هم يالله
ذهب: يمة فدوة اروحلج خل نرد البيتنه ولله تكسرت عظامي من الكراب
نسيمة: ذهب لا ادوخيني البيه مكفيني كومي ولا تجرجرين
خلتني وطلعت واستغربت حالتهه اليوم ضايجة كلش ومتكئبة وماتتحمل مني حجاية
طلعت والموجودين ماتفرق حالتهم عن امي الجو متوتر كلش وواحدهم مامتحمل روحه ناس تعارك بناس
سوينه ريوگ وتريگوا واجه وكت لماعين دخلت للمطبخ لگيتهن مكودات ع السنك وعايفاتهن ورايحات
اليوم لازم نوره تغسلهن احنه مقسمين الشغل بيناتنه
طلعت ادور ع نوره ماكو لاگتني سمر بت عمي ابو غازي
سمر: ها ذهبه شبيج تتلفتين
ذهب: وين نوره
سمر: مادري بيهه خاف بالمطبخ تغسل اماعين
ذهب: وين ولج لماعين مكودات والمطبخ يلعب النفس عايفتهن ورايحة
سمر: يااا عود صگد تحجين جا وين ولت هاي هسه تجي ام سند تلعب بينه طوبة
رحنه انه وسمر ندور عليهه دخلنه بغرفة خاله ام غازي ونلگاهه حاطة ابنهه نايم وغافية ويا
سمر: ياااا دهر فرج نايمة
كعدت كامزة ادور شيلتهه: شمالجن تصيحن
سمر: جا عايفة لماعين المن حبوبة ياهو يغسلهن
نوره: جا شني تكاطعت الدنيا غسلنهن انتن
ذهب: جا مو دورج اليوم ليش احنه نغسل
نوره: وذا دوري انكتبن باسمي تعبن ادياتجن شويه
سمر; كومي كومي خلصي شغلج بلا لغوة
نوره: جا ماگوم وعلي اريد اشوف شتسون وعناد بيجن انتن تغسلنهن
ذهب: انتي شبيج ناوية عله روحج اليوم
سمر: لا عوفيهه عليه دواهه عدي
كمزت عليهه سمر وجلبت بشعرهه وصار لمرافس بفلس صرت بنصهن اريد افاككهن ماكو هاي تصرخ وهاي تصرخ وكلساع اجتني طگة تايهة احس تكسرت ضلوعي من الكتل فلشجن شني من حيل عدجن
دخلت امي وام غازي وام سند وجناينهه يركضن والولد واكفين اباب الغرفة ويصيحون
ام سند: فلك طرجن عليمن هالمكافش
سمر: جا خاله جنتج جلدهه يحكهه مايصير نخليهه تحك غير نساعدهه
نوره: خايبة كفي مني لا بالعباس اجي امرعدج
ام غازي: بسجن وصمخ بيا حال احنه هسه وانتن تتعاركن امشي سمر روحي الشغلج يلله وانتي نوره خاله اذا مالح حمل كعدتنه خلي رجلج يردج البيت عيالج لا تضلين هنا
زعلت نوره ولمت جهالهه وودت عله رجلهه يرجعهه للبيت واجه رزلهه واتعارك وياهه وعافهه وطلع
صار العصر وبدت الزلم گرابتنه تتجمع وامي تاكل بروحهه اكل
كاعدة وشادة راسهه بعصابة ومدنكه وكاضه راسهه بثنين اديهه
كعدت يمهه وحجيت: يمة حبيبة جا غير تكليلي شمالج
نسيمة: مابي شي يمة لا تخافين..  راحو عمامج
ذهب: اي طلعو گبل شويه
نسيمة: الله يسترنه ييمة وينج يم البنين تحظرينه وتعدينهه عله خير
ذهب: جا يمة ياهي الفصلية الراح ياخذونهه
كمزت وعاطت بيه: ماكو فصليه سدي هاي السالفة ياخذون فصل وبس
عفت امي وكمت اباوع الكل كاعد عله اعصابة يتاني ويندعون ويتنخون بالايمة
صار المغرب ودخلو الزلم واحدهم مايگص وجهه السيف
گعدوا بالديوان واصواتهم عالية وعياطهم واصل للستار
اتجمعنه كلنه النسوان يم باب الديوان نسمع حجيهم بس امي كاعدة عله صفحة
سمعنه سعد خابر عله غازي يساله شسوو وغازي تعارك ويا ومابقت غلطة ماغلطهه عليه وسد التلفون
سوه سوايته وشرد وخلانه هنا مخبوصين
من گد الصياح والعرك مانميز حجيهم وماندري شيحجون
شويه وسمعناهم كامو شردنه كلنه من كدام الباب وطلعو
راحو الناس الي جانو وياهم ودخلو عمامي والولد للبيت وجوهم ماتتفسر
شويه وصاح عمي ابو سند عله مرته تصيحله امي
جنه كاعدين بالمطبخ ودخلت ام سند; ام غايب ابو سند رايدج
اباوع لامي كامت حته كبل لا تكمل ام سند حجيهه وجنهه تدري بي راح يصيحلهه
دخلت عليهم وكلنه كمنه وكفنه اباب المطبخ نسمع
نسيمة: السلام عليكم
الكل: وعليكم السلام
ابو غازي: كعدي خويه ام غايب كعدي
نسيمة: ماريدن اكعد خويه واگلهه الكم من الاخير ماعدي بت تروح فصلية
ابو سند: اكعدي خل نتفاهم يم غايب لا تصعبين الامور
نسيمة: كافي يبو سند اتركونه بحالنه هسه اخذ بتي واطلع وماردن الكم مرة ثانية ولا تشوفوني وكلشي مارايدة منكم بس بتي ماتروح فصلية
ابو سند: بتج من تروح يم غايب راح تحفظ رگاب وتوگف دم
نسيمة: واحنه مالنه شغل بالدم السواهه هوه يتحملهه
ابو سند: البت بت اخونه يعني بتنه واحنه متولين امرهه من بعد ابوهه وماعدنه بت تصلح للزواج غيرهه وانتي تدرين كل بناتنه معرسات وبنات غازي جهال ما بالغات ومو بعمر عرس
نسيمة: جا تذبون بتي بالنار وتردوني اسكت واوگف اعاين وينكم عنهه كل هاي السنين هسه تذكرتو عدكم بت اخو من احتاجيتوهه تحمي رگابكم بسكم ضلم كافي اخذتو مني رجلي وتمرض من الضيم ومات بحسرته واخذتو گاعي الفنيت عمري بيهه وهسه جايين تاخذون بنيتي الطلعت بيهه من هاي الدنيا وتذبونهه بحلگ السبع لا جا ساعتهه اصيرن ذيب وانهش لحمكم كلكم
ابو سند: بسج يم غايب ولا تفكين دفاتر عتگ الراح مايرد واحنه ماخذنه شي مو حگنه الگاع احنه اولى بيهه وانتن بس نساوين ماتگدرن تحمنهه وبت اخونه احنه نعرف مصلحتهه
عاف امي وصاح: ام سند ام غازي جهزن البت عكب باجر نوديهه البيت رجلهه
كامت امي تصرخ وتلطم ودگ عله روحهه وتسب وتفشر عليهم وانه واگفة جامدة بمكاني مادري شسوي شگد جنت اكره عمامي بس اليوم كرهتهم اكثر يوم عن يوم ظلمهم يزيد مارحمونه واحنه امانه عدهم وابوي موصي بينه گبل لا يموت
ركضت عله امي وكومتهه من الكاع وعمامي عافونه وطلعو
امي نغمى عليهه من البواجي وشلناهه دخلناهه بغرفة سعد غسلت وجهه وكعدت
بس شافتني حظنتني حيل وعله صوت بجيهه
نسيمة: ذهبه يمه ولج تعاي ليه
ذهب: هاا يا بعد روحي يمج انه يمة
نسيمة: ولج يردون يحرموني منج يردون يودونج فصلية مكسوره وانه عشت عمري اتحلم باليوم لاشوفج بي عروس وازفنج بيدي واجهزنج يا بعد امج
ذهب: كافي يمة كافي اهم شي صحتج لا تفكرين بيه طبني مرض اهم شي انتي سالمة
بست راسهه وگمت وابالي سند گلت اروح اشوفنه اكيد مايقبل ياخذوني جا مو هوه يريدني گمت ادور عليه ماشفته من العصر من راحو لبيت الشيخ افتريت البيت كله وهوه ماكو دخلت للمطبخ وشفته من شباج المطبخ دخل للبيت طلعت ركض عليه لكيته يريد يدخل
ذهب: سند
اندار عليه باوعلي ودنج: هاا ذهب
رحت يمة وحجيت: سند انته مو رايدني انه موافقة عليك موافقة اخذك عسى ما باجر انه موافقة بس لا تخليهم ياخذوني سند امي مريضة اذا رحت تموت وراي ولله
اندار عليه باوعلي وحجه: روحي ذهب الله يوفقج
خلاني ودخل وانه احس الدنيا سدت بيبانهه بوجهي ليش ياربي هيج خليتنه مالنه احد ليش خليتنه العالم تتحكم بينه وواحد يجرنه طول والاخر يجرنه عرض
ارحمنه ربي ولله ملينه لا تظلمنه اكثر
كعدت بالكاع وحطيت راسي بين رجليه ابجي بحرگه وجان اسمع صوت فوگ راسي
ام سند: كومي ولج
رفعت راسي اباوعلهه عبايتهه عله راسهه تريد تطلع واحس الحقد كله تجمع عدي: شتردين مني
ام سند: بالج اشوفج مرة ثانية متگربة يم ابني افتهمتي حسبالج ماشفتج وانتي تتوسلين بي تردينه ياخذج خايبة تحلمين سند ياخذج انتي الفصلية هواي عليج يم لسانين
عافتني وطلعت وطلع وراهه سند مدنك وما يباوعلي وطلعن جناينهه راحو البيتهم ونوره خازرتني ووجهه يضحك اخخخ يا نار گلبي اخخ من الدنيا الخلتني ذليلة بديكم
ضليت كاعدة فترة ابحدي اتوسل بربي يرحمني وكمت بعدين
دخلت لكيت امي نايمة وتون تگربت عليهه وجست راسهه مصخنه گابة نار احاجيهه ماترد عليه انه شفتهه هيج وانه تسودنت ركضت الغرفة عمي ابو غازي ومرته وفلشت عليهم الباب: عمي عمي الحگني عمي امي مادري شبيهه
طلع عمي مخترع ومرته ورا: شمالج ولج شجاج
ذهب: عمي دخيلك امي…امي مصخنه وما تحرك لا ايد ولا رجل
اندار عله مرته وصاح: ام غازي دخلي عليهه شوفي شمالهه
راحت تشوفهه وركضت انه وراهه دخلت حاجتهه ماتحجي جاستهه مصخنه عافتنه وطلعت حجت ويه عمي شويه ورجعت: ذهب لبسي امج عباتهه بين مالبس عباتي واجيجن
گومت امي بالگوة عدلت شيلتهه ولبستهه عبايتهه واخذ عمي سويجة وطلع واجت ام غازي لابسة
ام غازي: يلله ذهب عينيني نوصلهه للسيارة
گضبناهه انه وام غازي وگومناهه مشيناهه للسيارة صعدناهه توسلت بيهم اروح وياهم ماخلوني عافوني وراحو والنار تاكل بيه الساعة ب12 بليل والبيت محد بي كلهه نايمة من التعب مال النهار
ضليت افتر وخوفي علما امي يزيد صارت بال1 ونص وهمه ماكو طلعت بالحديقة اتانيهم ل2 وسمعت سيارة عمي طبگت بالباب ركضت ع الباب فتحته واشوف امي تنزل من السيارة وكاضبتهه ام غازي اتجيلهه والكانوله بيدهه
دخلت وكمزت عليهه حظنتهه: يمة امي سودة عليه شصاير بيج
ابو غازي: لا تخافين مابيهه شي صخونه وراحت يلله تصبحون عله خير
دخل وعافنه دخلنه امي انه وام غازي للغرفة وهم عافتنه وراحت
كعدتهه وكعدت يم رجليهه: يمة حبيبة شبيج شيوجعج
حجت بصوت متعوب: انتي التوجعيني يذهب انتي
ذهب: لا تخافين يا بعد روحي بتج بعشر زلام محد يگدر ياخذ حگهه
نسيمة: ولج يردون يطونج فصلية
ذهب: وانا رضيت بنصيبي يمة ظلم الغريب اهون من ظلم اهلي شيسوون بيه يبقون غربة ماعليهم عتب بس من تجيج الطگة من اهلج توجع يمة توجع
شبگتني وضلت تبجي بحسرة وانه ابوس بيها واحسن روحي تريد تطلع اصبر عليهه وانه اريدلي واحد يصبر عليه
كعدت الصبح وانه مانايمة غير ساعة وحدة شفت امي غافية عفتهه وكمت خليهه ترتاح
طلعت وتلگتني ام غازي: ها يمة ذهبه اصباح الخير
تعجبت من اسلوبهه وياي ورديت: اصباح النور هلا عمة
ام غازي: ردي يم امج يمة مانريد منج شي اليوم انتي عروس ارتاحي رايحين انه وام سند للسوك هسه نشتريلج جهازج
دخلتني بالغرفة وسدت الباب وانه ضاله اصفن هيج البشر يصير من عده مصلحة وياك يصير انعم من الدخن
كعدت يم امي شويه ودخلت عليه نسرين: تعاي ذهبه اريدنج شويه
كمت وطلعت وسديت الباب عله كيفي لا تكعد امي دخلتني بغرفة امهه ولكيت مره غريبة كاعدة
نسرين: هاي ام قاسم راح تحفلج وتعدلج
ام قاسم: يمة صلاوات عله محمد هاي العروس خايبة هاي معدله من الله ماتريد تعديل
نسرين: اي بنيتنه حلوة بس بعد عروس نريدهه تبض
ام قاسم: تعاي يمة گربي ليه
رحت كعدت يمهه وفتحت شعري رادن يصبغن شعري ماقبلت وماخليتهن عاد گالن بس خلي تحفلج
حفت وجهي وماخليتهه تخف حواجبي ماحبهن خفيفات
ودخلت سمر جايبة جدر شيرة وكعدت تشيرلي
وهاي ام قاسم ثولتني شكد تگرگ وانه بيناتهن جني لعابة يودني منا ويجيبني منا
اجن ام سند وام غازي من السوك مشتريات اشكال والوان وكعدن جناين ام سند يفتحن بالعلاليك وعبالك الغراض الهن فرحانات اكثر مني اطتني نسرين دشداشة جديدة من الجايباتهن
نسرين: دخلي حبيبة سبحي ولبسي هاي بعد العروس مايصلح تلبس شي قديم
اخذتهه منهه واطتني شامبو ومنشفة ودخلت سبحت طلعت واباوع الوجهي بالمراية عبالك مو انه حواجبي مغيراتني كلش صارن مرسومات وشكلهن احله من گبل بس انه اسم الفرح ماكو بگلبي خايفة من الجاي وخايفة عله امي كلش
تذكرت امي من الصبح ماشفتهه رحت دخلت عليهه لكيت حاطيلهه الغدة كدامهه وماجايسته ابد بس كاعدة ودموعهه تصب
ركضت عليهه وكعدت يمهه: ها يمة ليش مامتغدية
باوعت بوجهي وبجت بصوت عالي وغطت وجهه بشيلتهه
ذهب: يمة بسج فدوة اروحلج اندعيلي محتاجة دعائج هسه كولي كون الناس الرايحتلهم يطلعون اوادم وما يأذوني
مسحت عيونهه بشيلتهه وحجت: روحي ييمة الله يوفقج ويطيج عله گد نيتج يا بعد بيتي
نمت عله رجلهه وضلت تلعب بشعري وتمسح عله راسي وانه بالي مو وياي ابد
خلص هاليوم بسرعة وطار وما حسيت بي وجان اخر يوم الي بين اهلي يمكن همه انحسبو عليه اهل وانفرضو عليه ويمكن الي راح امر بي يخليني اتحسر عاللي عايشته هسه
مادري شنو من حياة متانيتني
صعبة لمن تروح للموت برجليك وصعبة لمن انته عايش وماتعرف مصيرك شنو
خلص الليل وانه وامي ماضگنه طعم النوم ابد
وحدة مگابلة الثانية ونبجي احس روحي جن طير مذبوح روحي مفرفحة وماتدري شتريد
اذن الفجر ونسمعهم گعدو يصلون
كلهم يصلون وكلهم يصومون وكلهم يعرفون حقوق الله بس ولا واحد عده رحمة ولا واحد نصفنه
گامت امي طلعت توضت ورجعت امي ضلت بس ساكته وماتحجي ويه اي واحد بالبيت رادت نرجع البيتنه بس عمامي ماقبلو الا لمن يسلموني لبيت الشيخ حته وتخلص السالفة خايفين علينه وهمه الكتلونه بديهم
صارت الساعة ب8 ودخلت علينه ام غازي
ام غازي: يلله يذهبه عمامج هنا يگولون تحضري
گمت وامي گاعدة ويدهه عله راسهه وتون بدلت ثوبي ولبست عباتي واطني النسوان جنطتي دخلت عله امي بست راسهه وهيه بعدهه عله گعدتهه
ذهب: يمة حبيبة حاجيني انه ذهب..  يمة رايحة انه.. يمة بعد روحي احجي
ابو سند: يلله فضيهه امشي
گمت وانه عيني عليهه ماودي افارجهه
طلعت من بيت عمي ابو غازي وصعدت بالسيارة وبعد ربع ساعة وصلنه البيت الشيخ

يتبع…..
raheel997