(ذهب)

البارت العشرين والاخير

حيدر: راح تضلين اليوم تصفنين بوجهي ما الج نية تنامين

غطيت راسي بالبطانية من الفشلة وسويت روحي نايمة

حيدر: تينة

حجيت من وره البطانية: هممم

حيدر: ليش ما دخلتي مدرسة

وخرت الغطة من وجهي وحجيت متفاجئة: هااا

رفع راسه واندار عليه وسند روحه عله ايده: احجي صدگ تره

ضليت صافنة بوجهه ومحتارة شگله مادري منين جابلي هالسؤال وانه جدامة انثول فوگ ما انه ثولة

حيدر: شبيج ساكتة

تينة: ما اعرف ما ناشدة روحي ولا واحد من اهلي لان اعرف الجواب.. البت عدنه اول ماتكبر تبدي تتعلم تعجن وتخبز وتنظف وتطبخ ومرات تطلع تساعد اهلهه بالگاع والزرع والحلال ماعدنه ولا بت من العشيرة كلهه دخلت مدرسة لو تعلمت لقراية والكتابة عبن ممنوع عدنه بت تطلع من بيت اهلهه الا البيت زلمتهه من تجي قسمتهه

حيدر: حابة تتعلمين

تينة: هااا... شلون اتعلم وانه بعمري ما گضبتلي قلم لو ورقة

حيدر: ليش احنه شلون تعلمنه يعني طلعنه من بطن امهاتنه نعرف نقره ونكتب

تينه: تدري مرات احسدنك

حيدر: هههههه ليش

تينه: عبن اشوفنك تقره هواي والنهار كله حاط راسك بالاوراق والكتب لو اشوفن اوراقك التكتبهن ودفاترك اتمنه اصيرن مثلك

حيدر: هااا اثاريج تدورين بغراضي يا ملعونه

تينة: لا لا ولله ما ادورن بغراضك ابد بس انته مرات تعوفهن بمچانك وتكوم وانه اضمنهن الك

ضيگ عيونه وحجه: تضمينهن

شمرت الغطة وكمت عله حيلي شغلت الضوه وفكيت الكنتور طلعت اوراقة الضامتهن واجيت كعدت يمة

گام هوه عله حيله واخذهن مني

يگلب بيهن ويباوعلي متفاجئ

رفع راسه عليه وحجه: ههههه ليش ضامه ذني كلهن

تينه: جا مايطيني گلبي اذبنهن وانته كاتبهن

حجيتهه بدون ما احسبلهه حساب واشوفنه صفن بوجهي

ضل يباوعلي وانه مادري وين اضمن وجهي منه

ابتسم بوجهي وحجه: گومي لميهن ومن باجر نبدي ندرس انه وياج شگلتي

اباوعله وما مصدگة هذا الجدامي حيدر اخافن هذا حلم واصحه منه والگه حالي مثل ماهوه مامتغير

حيدر: يلله گومي كتلتيني بصفناتج

انتبهت عله روحي وگمت شلت الاوراق بسرعة ضميتهن ورجعت تمددت يمه