(ذهب)

البارت الثاني

عطت بي حيل: وعمه شبيك مسودن
صارت عيونه بگصته وگاملي: هاي عليمن ولج
ذهب: اكو غيرك هنا
حجيتهه وشردت للحجرة وهوه ركض وراي وقبل لا يوصل طبكت الباب واسمعه يصرخ يم الباب: بالعباس اليوم اذبحج وين ترحين اذا ماكصيت السانج وذبيته للحلال ياكلنه فلا انا سند بيج خير اطلعي كونج مرة
نسيمة: كافي يمة سند عوفهه جاهله وماتعرف تحجي لا تفضحونه وصوتكم يعله
ام سند: حل بيهه اي ولله تستاهل لسانهه يرادله گص فرخة جاهل السانهه اطول منهه
نسيمة: خليج محظر خير ام سند
ام سند; يااع وانا شحجيت هسه
سمعت حجي هاي البومة وماتحملت اسكت
ذهب: خليهه يمه خليهه البيهه مايخليهه ماترتاح اذا ماتعلگها
بعدني مامكملة واشتغل التدفر عله الباب يريد يكسره ويصرخ وخبصنه خبص
بقيت صافنة شويه وره الباب وافكر
هسه انه ليش ماافتح الباب واطلعله شيريد يسوي يعني يطگني خلي يطگ
فتحت الباب ع كيف بعدني ماطالعة واندفع الباب ودخل عتاني من شعري
ذهب: ااااخخخ شعري شبيك انته ولج يمه لحگيني
نسيمة: كافي سند عوفهه بسك شو عوفهه
صارت امي بنصنه وجرتني گوه منه
سند: ميلي غادي عمه ميلي خن اربيها واعلمهه شلون تحجي
ذهب: انا متربيه احسن منك
هجم عليه وهوه يصرخ: الج عين تحجين بعد انه الج
ضمتني امي وراهه ودفعته حيل وصاحت: بس كافي بحظني وتريد اطگهه ع الاقل احترمني
وخر وهوه فحطان ويناهد: خوش يبت عمي انتي جبتيهه الروحج
اندار ع امه وحجه: يلله يمه
ام سند: ماروح انه امشي انته
سند: يمه امشي رحمة المحمد كافي راح تكفرني
طلع وركع الباب ورا حيل وراحت امه تركض ورا حته ماسلمت
صفگت ايدي حيل وغميتهم :گبر كون ليلفكم روحه بلايه ردة
گرصتني امي من زندي حيل
ذهب: اخخ يمه شلعتي ايدي شمالج وياي
نسيمة: وغمة شوكت تبطلين من هاللسان
ذهب: ولله يايمة لو ما انتي جا طبگته هوه وامه وطگيتهم راس براس
ضحكت امي وباستني: اوووف يا لسانج فدوة اروحلج يا بعد هلي
خلص اليوم ومرت الايام من بعده وبيوم سمعنه الشيخ توفه انخبصت القرية كلهه وغاص السلف بالعالم وكلساع نسمع رمي واجت عراضة بين فلان وراحت عراضة بيت فلان راحت امي للفاتحة وحظرت وياهم 3 ايام الفاتحة لان تكول جان صاحب فضل علينه ولازم نوگفله ورجع بينه الخوف ان راتب ابوي الي صارله سنين ماشي ينگطع وخلصت الفاتحة واحنه ماكلنه الخوف علما سمعن ابنه صار ابداله
كعدت الصبح ومالگيت امي بالبيت سويتلي ريوگ وتريگت ونظفت ع السريع وجاي اوكل بالدجاجات ودخلت امي
نكتت ايدي وكمت: ها يمة وين جنتي
نزعت عبايتها وكعدت: رحت البيت الشيخ
كعدت يمهه وحجيت: وشفتي الشيخ الجديد
نسيمة: لا شفت الحجية امه وكتلهه سالفتنه وكالت اطمني ماكو شي راح يتغير الي جان يسوي الشيخ بحياته راح يكمله ابنه
اطمنه وارتاحينه بعد ماجنه عايشين بخوف وندري اذا انكطع راتب ابوي يكتلنه الجوع ومحد يسأل علينه
كعدت ثاني يوم الصبح محتصرة ومضايگة اريد اطلع واشتم هوى الله گاعدة بين اربع حيطان وچن وحدة بيها جرب لا اشوف الوادم ولا الوادم تشوفني
مااشوف غير امي ووجه البومة سند
كمت لميت فراشي وطلعت لگيت امي كاعدة بالحوش اتريگ نزعت نعالي وكعدت يمهه
ذهب: اصباح الخير يمة
نسيمة: اصباح العافية يابعد حيلي.. تدني يمة فكي ريجج
ذهب: لا يمة ماريد ماشتهي
نسيمة: شبيج يمة شو وجهج مالايگلي اليوم
ذهب: يمة فدوة اروحلج خليني اطلع شويه اريدن اشم هوى احسن احتصرت من گعدة البيت
نسيمة: ستري علينه يمة ذهبه وين تردين تمشين
ذهب: وين امشي يايمة يعني اشمن هوى وردن
نسيمة: گعدي حبيبة لا يشوفج ابن عمج ويجي يرعد علينه مالنه حيل الطلايب فكينه من شرة
ذهب: لا تخافين يمة تلگينه شرب امس بعده براسه وبعده منطمر كولي اي يمة واليرحم والديج
نسيمة: شگلج يايمة وانا اكدر اگلج لا روحي بس لا تبطين ولا تبعدين ولبسيلج عباه لا تطلعين بطرگ الثوب
طفرت وامي بعدهه مامكمله حجيهه لبست شالي وخليت گصيبتي طالعة من وره جانت طويله وتوصل لافخاذي احبن من البس الشيلة اخليهه طالعة من وره وشديت العباية ع خصري تحزمت بيهه جنت انا متروسه وجسمي حلو ومالبس ثوب عريض كلهن مخصرات امي تخيطهن الي
ذهب: يمة انه رايحة
نسيمة: بس لا تبطين ولج نص ساعة وردي
ذهب: خوش يمة خوش
طلعت وجن طير وفتحولة القفص اعاين منا ومنا واتنفس حيل
اجت عيني ع الكاع مالت امي الخذوهه عمامي وتحسرت مرات اتمنه عدنه گرابة نروحلهم ويجونه وعدي بنات عمام لو خوال يصيرن رفيجاتي
بس وين ياحسره خوالي لا شايفتهم ولا بيوم سمعت بيهم وحته من اسئل امي تبدل السالفة وماتجاوب وعمامي محتارين شلون ينهبونه ويأذونه ومايذكرونه بس بالمصايب
تقدمت اكثر واجت عيني ع بيت الشيخ
اوووف ياربي لا اعتراض ع حكمتك
ضليت امشي وماجان اكو احد بالبستان بس انه
تذكرت حجي امي وخفت خاف يصير بيه مثل گبل ويطلعلي واحد من الفلح درت وجهي اريد ارجع ومااشوف غير سياره بيكب اجت مألفة ومالحكت اروح لا منا ولا منا ضليت جامدة بمكاني وغمضت عيوني وجان اسمع شخطة البريك حيل فتحت عيوني والكه السيارة واكفة وبيني وبينهه شعرة
انفتح الباب ونزل منهه رجال مربوع طول بعرض دشداشته تلمع من النظافه متلثم بشماغه ولابس نظارة شمسية ولابس فوك دشداشته الحزام مال السلاح
وصل يمي وحجه ــ خو ماتعورتي
ضليت صافنة ومفهية بوجهه اباوعله واگول بگلبي هذا رجال وسند رجال
اباوع ع ايده والساعة والمحبس يلمعن بأيده واغم بروحي
ــ شبيج يبنية خرسة انتي
ذهب: هاا
ــ تعورتي بيج شي
رجعلي عگلي وانتبهت وصحت بي: اعمى انته ماتشوف
ــ انه لو انتي الگاطعة الدرب وصافنة
ذهب: لا تذبون بلاكم عله الوادم ماتعرفون تسوقون المن حاطين سيارات
ــ خايبة وعلي لو ما مرة غريبة جا عرفت شلون اتصرف وياج عله هالعرامة فارجي منا يلله فارجي
صاح بيه وخفت منه صوته خشن ويخوف ركضت من كدامة ورحت ركض البيتنه وكلساع اعاين وراي شفته ركب سيارته وراح ودخلت انه للبيت وسديت الباب وضليت صافنة مو رجال هذا جكليت يربي
نسيمة: يااا ولج ياهو هاذ
ذهب: شبيج يمة ياهو
نسيمة: اندري شتخربطين انتي
ذهب: ماكو شي يمة ماكو شي
عبرت من يمهه وانه انزع بعبايتي دخلت للحجرة وشمرت العباه والشيلة وبعده صوته يدگ براسي
يماااااي يشحط من الحلا ويسوي سكر جنه ذول لنشوفهم بالتلفزيون جا شماله حظي بس سند الاملح يركض وراي جا بالعباس لو سند هيج انه اروحن اخطبنه
مشت الايام وانه يوميه امد راسي من الباب بلكي المحنه مرة ثانية بس فص ملح وذاب ومابين مرة ثانية وكلما امد راسي يطلعلي حظي المصخم ويعيط بيه وادخل عبالك الله مسلطة بس عليه
وبيوم العصر كاعدين انه وامي انه كاضبة الريموت وحاطتلي مخده گبال التلفزيون ومجطولة ومتابعة مسلسل وامي تخيط بمكينتهه
ذهب: يماااا مكينتج سطرتني اريدن اسمع ماكو
نسيمة: وغمة جا شجابرج تكعدين يمي
ذهب: يمة متابعة المسلسل جا وين اولي عد الجيران اشوفنهه
نسيمة: ضلي ضلي مكابلة هالاتراك ذول واحبنك واعشكنك والمباوس عالگ يا ماتستحين
ذهب: جا همة غير يخبلون روحي فري السلف كله اذا تلكين هيج خلقة تعاي عاتبيني
نسيمة: خايبة گومي لا اهفج بالمگص هسه
ذهب: يبووووي عله حظي گمت
بعدني اريد اگوم ونسمع صوت الطلقات علگت رشگ
ذهب: يمة شني هاي شصار
نسيمة: يا ستار ياربي
كامت امي وسدت باب الحجرة ورجعت كعدت والرمي بعده عالگ: احفظنه ياربي شصاير
گمت انا وفتحت شباج الحجرة وضليت اباوع وامي تصيح: ولج ذهب ستري عليه ذهب لا تجيج طلقة تايهه ولج ردي
ذهب: اييي شبيج يمة خن نفتهم شصاير
وجان نسمع باب بيتنه يندگ وتفلش تفلش
نسيمة: يمة شني هاي شصار ياربي
التفتتلي وحجت: كعدي هنا بالج اطلعين وراي
طلعت من الحجرة وانه وكفت اباوع من وره الباب
فتحت الباب ودخل ابن عمي سعد الزغير ابن عمي ابو غازي متبهذل ودشداشته مشگگة وفحطان
ضربت عله صدرهه امي وصرخت: يااا عزة شمالك ولك
سعد: ضميني عمه فدوة ضميني زلام الشيخ لاحگتني
نسيمة: صخام الصخمك ولك شمسوي
سعد: مو وكت حجي عمة فدوة اروحلج شوفيلي مكان البد بي
نسيمة: دش للحجرة دش
دفع الباب ودخل عليه يركض وهوه خايف ويرجف شويه ونسمع صوت السيارات طبگت يم بابنة وسكت الرمي
اندك بابنة وسعد يتوسل بأمي ماتفتن عليه
سعد: عمة فدوه اروحلج انه ابيتج لا تدلينهم عليه
نسيمة: اكعد هنا اكعد ويصير خير
لبست عبايتهه امي وطلعت وانه ركضت ع الشباج فتحته شويه واباوع زلم ملثمين مامبين منهم شي
واسلحتهم بديهم وسياراتهم تارسه الشارع
نسيمة: خير يمة رايدين شي
ــ خل يطلع الزلمة الدش عدكم عيب ع الزلم تتحامه بالنسوان
نسيمة: يا زلمة يمة محد دش عدنه
ــ احنه شفنا بعيونه دش بهذا البيت خل يطلع احسله
نسيمة: روح يمة اخذ زلامك وروح كتلك ماعدنه احد روح شوفه وين راح
ــ خوش جا گليله هوه الجابهه الروحه الشيخ مايسكت عن دم ابنه
راحو ودخلت امي ولونهه مخطوف زنگت سعد من دشداشته وحجت: احجي ولك اسعيد شمصخم ولك
سعد: كتلت ابن الشيخ عمه
دفعته ولطمت ع خدودها: صخام الصخمك شلووون ولك ولافي عليه هنا
سعد: عمة انه بحماج لا تعوفيني
نسيمة: امشي اطلع ولك ولا اشوفك مرة ثانية معتب بابي الشيخ صاحب فضل عليه ومو انا لالفي كتال ابنه
طلع سعد من بيتنه وكعدت امي ادك وتلطم وانا صافنة وماعدي اي ردة فعل همه ذول عمامي بس بالشدة يذكرونه مو جديدة عليهم سعد مالافي علينه من سنين واليوم ذكرنه من طاح بهبية
ضلينة خايفين الليل كله وامي كلساع تفتح الشباج تباوع وترجع ماندري عله يا ساعة يهجمون علينه مرة ثانية
گعدت الصبح عله طگطگة امي تبدل شفتهه لبست عبايتهه تريد تطلع
رفعت راسي فاتحة تك عين: وين رايحة يمة
نسيمة: البيت عمج ابو غازي
ذهب: شسوين
نسيمة: اشوفهم شسووا عله سالفة المعزة ابن عمج
ذهب: يمة خيولون شعلينه بيهم شو احنه لو نموت محد بحالنه ليش احنه نركض وراهم
نسيمة: انجبي ومالج شغل بهاي السوالف وگومي كفي البيت مو اجي ولكاج بعدج نايمة ما اتاخر انه
طلعت امي وكمت وانا اتأفأف لو بس امي تعوفهم يولون وماتركضلهم بكلشي يصير جا احنه بخير
كمت لميت فراشي وظفرت شعري وطلعت ع البيت نظفته وذبيت اكل للدجاجات وامي مااجت تأخرت كمت حظرت الغدة وبديت اطبخ وكلساع اباوع ع الساعة صار الظهر وامي ماكو
شويه واندگ الباب لبست شيلتي وطلعت صحت من وره الباب: ياهوو
ــ انا سند فكي الباب
ذهب: لا هله ولا مرحبا شيريد هذا جاي
عليت صوتي وحجيت من وره الباب: امي مو هنا
سند: ادري ادري هي ودتني عليج تگول خل تجي البيت عمي ابو غازي دفكي الباب خل اطب كتلتني الشمس
فتحت الباب ودخل
ذهب: خير امي وين
سند: ابيت عمي ابو غازي هي كالت روح جيبهه يمنه تساعدنه
ذهب: ليش عود شعدهم
سند: دمشي ولا تلغين زايد ترحين وتعرفين
رحت لبست عباتي ع السريع وطلعت ويا وخبلني الطريق كله عدلي عباتج غطي شعرج امشي عدل صاير شريف ابو العرگ والنسوان
وصلنه البيت عمي ابو غازي بالف ياعلي وكلساع اريد اهد عليه
دخلت واشوف لوجوه كلهه مگلوبة سلمت وكلهه ترد من وره خشمهه مرت عمي ام غازي وبناتهه ومرت عمي ام سند والجناين
من عساجن لا رضيتن كون
شفت امي ورحت يمهه: هاا يمة خير ليش مااجيتي
نسيمة: مانرد اليوم نبات هنا
ذهب: ياا ليش عود
نسيمة: ولج شني ليش غير ابن عمج كتال ابن الشيخ جا نضل مثل امس الليل كله كاعدين متنطرين الدرب عله يا ساعة واحد داكنه واحنه بس نسوان
ذهب: وهسه غضب سعد وينه
نسيمة: شردو البغداد
ذهب: جا هوه راح واحنه نضل هنا بالضيم
نسيمة: اسكتي هسه وتعاي اشتغلي ويانه والسانج شويه ليحاجيج لا تردين
ذهب: خوش يمة خوش راح احطلي تيب ع حلكي حته الصم كلش
نسفت رداناتي وبديت اشتغل وياهن وانه گوه كاضة روحي كلساع وحدة منهن تذب عليه حجاية وابدي اكوم امرعدهه
اخوان سند الازغر منه كلهم مزوجين بس هوه ضال عله ع گلبي مايقبل يعرس لو ذهب لو ماكو وهاي مرت اخو نوره مرت حسن تريدله اختهه وكلما تشوفني تبقه تصجم وتذب بسامير
جنت كاعدة اكشر بالبتيتة نسوي غده للفريق العدنه وكلمن كضتلهه شغله شي تطبخ شي تعجن شي تنظف والزلم كلهم بره يحظرون للكعدة مال العصر ويتفقون حته يرحون العصر البيت الولد المكتول ويكعدون وياهم وكلساع وصايرتلهم هوسه بره ومتعاركين بيناتهم وجيب سيد فلان وودي سيد فلان
نوره: شني يذهب جا ماعرستي لهسه
ذهب: جا ماتشوفيني كاعدة كبالج شوكت عرست بعد
نوره: جا هوه سند ذاك اليوم يكول انه اريدن اعرس ومستحي من بت عمي اخافن محد ياخذهه
ذهب: جا مايعرس گاضبته انه گليله لا يخاف ولا يستحي اذا يريد انه اروحن اخطبله
بقت تباوعلي وخازرتني وتتأفاف جني كاتله ابوهه
شوي ودخل رجلهه وصاح: ولج صخمة نويره من شوكت وديت الجهال كتلهم خل يصبون جاي ماصبيتي
نوره: ياااا فلك طرني محد گلي
حسن: خايبة من ثول الثولج اي ولله هم محسوبة عليه مره دميلي ميلي لا اشگ راسج بالقوري بالعباس
اخذ القوري وراح انطا لامه تسوي جاي وطلع
وانه كوه حاصرة ضحكتي احس ماي بارد ونزل ع گلبي وهي بقت تنافخ وترگع بالجدوره وتصيح عله جهالهه وماتعرف شسوي من فشلتهه
خلص الغدة وصبينه اتغدو واجت هوسة الماعين احس ظهري انگطع بنص وانه واكفة ع السنك اغسل وارجع ليوره وواكفة يمي نسرين بت عمي ابو غازي تشطف والباقيات يلمن الاكل ويعزلن
خلصنه وسوينه جاي شربو صارت ب4 العصر وتحظرو وبدلو كلهم وراحو لبيت الشيخ
تونه كعدنه واجت ام سند ترعد: ياااع فلك طرجن كاعدات ولجن كومن حظرن العشه للوادم هم يالله علما يجون يلگون عشاهم حاظر
نسيمة: خطيه ام سند خل يرتاحن شويه تعبن اليوم وانوب يكومن يسون عشه
ام سند: يااع ومن يجون الزلم يردون عشه شنگلهم ولله جانن يرتاحن دكومن گومن بسجن ربده گومن
گامن كلهن وانه ضليت كاعدة يم امي لو تموت مااگوم اشتغل خدامة عدهه وتتامر بكيفهه كومي وكعدي
باوعتلي وحجت: جا وانتي شمالج ماتكومين رجليج محنايات
ذهب: لا ولله تعبانات مابيه اگوم جا شني اطونه درب نرتاح
ام سند: جا وحد من البنيات انتي كومي حالج حالهن
نسيمة: كومي يمة ذهبه كومي ساعدي البنات
كمت وانا انافخ اووف منج يمة بس مره وحده اوكفي وياي
وبدت لغوة العشه وصار المغرب ومحد بين بعدهم ماراجعين اذن الاذان وسمعنه الهوسه بالباب وجن رجعوا
شويه ودخلو كلهم دخل سند للمطبخ وصاح
سند: جم مره كايلج لبسي شيلتج عدل لبس العيارة هذا بطلي
جنت دايرة ع السنك اغسل اماعين ومامنتبهه اله
وماحسيت غير جراني من ايدي دارني عليه وصاح: مو جاي احجي وياج
ذهب: وياي
سند: لا ويه امي شيلي كصيبتج لا تخلينهه طالعة من الشيلة ولفي راسج عدل
ذهب: بس ماكو احد
سند: ذهب لا تعاندين لا احطنج دم بركبتي تره عقل ماضال براسي
دفر الصينيه البالكاع وطلع
ذهب: وثول انشالله
درت وشفت نوره خازرتني بحقد هاي الثانية هم يا ساعة مجلبه بكوشتهه موتتني عبالك بايكة رجلهه
صبينه عشه وتعشو والهسه محد حجه ع الكعدة ومحد كال شتفقوا
وره العشة كلمن دخل الغرفته طشو من وكت لان تعبانين وانه هم لكيتهه من الله خفة وراحة اذا يضلون كاعدين كلساع جاي ماي ويطيحون رجلينه من الروحة والردة
خلصنه اماعين غسلت ونشفت ايدي ردت اطلع من المطبخ واسمع امي وام غازي يسولفن
ام غازي: ولله يا ام غايب شگلج ماقتنعوا بالفلوس يردون يا راس سعد يا فصلية......

يتبع...
raheel997